رواية ليلة الحنة الفصل السابع والعشرون بقلم بسمة البياتي
_فاتت سرور گاللها اخذي الجاي ودي العمج
سرور اخذتة وراحت
اشرلي امشي گدامه
هذا شبي شو وضعة أبد معاجبني
مشيت وراه واني لأزمة گلبي فتنا للبيت هدوء
اندارلي گال ليش وگفتي
گتلة لعد شسوي عندك كلام احجي اهنا مابيه حيل أصعد فوك
_يا مثبت العقل والدين حركات الجهال بطليهن أمشي صعدي
_هفففف صعدت واني أنافخ فتحت باب الغرفة وفتت عبالك طاگة بيها عبوة بيبان الكنتور مفتوحات على وسعهن وملابسه تارسات الجرباية من غير البوخة الگبت بوجهي
هاا بس لا مصعدني انظفها ترى مابيه حييييييل
_وتاليييييي ياربي هذا لسانج ينقص شي اذا سكت شوية وماتحرك بحلگج
_خليت أيدي على حلگي هيان سكتت حتى ترتاح
راح شغل السبلت وأجه گعد على الجرباية أشرلي اگعد قريب منه
حركاتة مريبة جيت گعدت وخليت مسافة كبيرة بيني وبينا للأحتياط
_ أعتقد وعدتج بالعطلة انطيج حريتج صح
_گلبي فز صفنت عليه بدون ما انطق يعني جايبني اهنا حتى يطلگني خفت أحجي ويبين القهر بصوتي هزيت رأسي بمعنى أي
_واذا گتلج نكمل سوى ترضين بهالشي لو مصممة على الطلاگ؟
_صدمة حقيقية جاوبت مثل الهبلة هاااا ششنو نكمل
_لاتفزين مجايبج حتى أغصبج على شي مرايدتة
دنتناقش عادي وألج حريتة الأختيار يا نكمل او ننفصل اني موصغير وأكيد حالي حال أي شاب أريد أكون عائلة زوجة واطفال وبالنهاية أنتي زوجتي على سنة الله ورسولة وبنت عمتي رابية گدام عيني وأعرفج من طفولتج مراح الگي أحسن منج
واذا گلتي لا ما اگدر وصعب اتقبلك كـ زوج اعتبريني ما حجيت شي وره العيد أخذج للمحكمة ننهي هذا الزواج
_عرگت وسخنت الموقف الأني بي ما انحسد عليه معقولة أمجد بنفسه يطلب مني ننجمع سوى ونتمم زواجنا من التوتر افرك أيد بيد
_جاوبي ليش ساكتة وأياج اتگليلي خلي افكر
صارلنة قرن مزوجين جوابج أريده هسه و بهاي للحظة
_ايياه واذا صارلنة هواي مزوجين شنو التفكير مو من حقي
_قبل ثواني صوتج ماكو من حجيت كلمة أستفزتج انطلق لسانج
_تنهدت زين سؤال شنو الخلاك تريدني كـ زوجة مو جنت ماتتقبلني ومعتبرني مثل أختك
_الزمن كفيل يغير هواي أشياء بالبداية هذا أحساسي
وبمرور الأيام كلشي تغير دامج حلالي وبينا عقد وأرتباط صعب أشوفج مثل أختي
ويلا كافي تتهربين جاوبي
_جريت نفس عميق باوعت بعينه لا ما أريد اطلگ
ليال مطلقة انوب اني هم اصف وياها أهلي من گاعهم تعبانين ما أريد أزيد حملهم
_وأثقة من قرارج ما أريد جوابج بس حجي لسان لأن هواي أشياء راح تتغير عيشة بيت أهلج بعد ماكو حياتج راح تتغير 180 درجة
_أي أعرف ترى مو طفلة وأعرف شنو زواج
أبتسملي أبتسامة سلبت روحي من الخجل گمت وگفت
_وين؟!
_هاا مو شفتك سكتت عبالي خلصت كلامك
داروح
شو هذا ضحك بصوت عالي
يوووو شششبيك
_رب الحلو صارلي ساعة شجاي احجي
واتگلي مو طفلة وأعرف شنو الزواج
_مسحت گصتي ليش جان قصدك من هسه أبقى اهنا
_لا ننتظر نسوي زفة جديدة ونعزم العشيرة حتى الكل يعرفون ونخليهم يشهدون على هاي اللحظة التاريخية
_جاي تصنف حضرتك ترى خجلانة ليش متقدر هالشي
گام وگف گال بعدنا ماسوينا شي ليش الخجل يابة
عزززا شگد سخيف سكتت شجاوبة اصلاً الكلام ضايع مني
_رايح أسبح رگبتي شعر وجسمي مدبك من الحر ما اوصيج من اطلع عود الگيج منهزمة
_والله من هاي سوالفك راح صدك أنهزم و انفذ بجلدي
_شحدج يلا رايح بين ما اخلص رتبي هاي الهوسة
_عافني وراح لزمت خدي صاير نار شراح يخلص هالليلة ما أدري
گمت أشيل بالملابس وادحس بالكنتور شلون مجان عقلي مشغول الف سالفة برأسي
انداريت الشباك صار گدامي البردة مفتوحة عيني أجت على بيت أهل مينا عزززززا الشباك مقابيل بيتهم من الخرعة ركضت اليم باب الغرفة أريد اطلع بس أخاف أمجد عبالة انهزمت منه
هسسه هذا وين صار
عشر دقائق بقيت على نفس الوگفة فات أمجد
صفن عليه
_ ليش واگفة اهنا
_لزمت گلبي أدري شعاجبك بهاي الغرفة يعني قحط غرف الا تختار هاي
_ احلف عليج مو عاقلة
_هز ايدة وفات راح وگف يم ميز التواليت يمشط
باوعلي بنعكاس المرآيا
_راح تبقين جامدة مثل الصنم
_سد البردة كلما أشوف هذا البيت انرعب وياريت لو تأخذ غير غرفة على الجهة الثانية
_طلعتي صدك بوخة وبس لسان
_راح سد البردة وأجة تمدد
واني على نفس وگفتي مزروعة مثل الشجرة بمكاني ما أعرف شسوي بحياتي ما خجلانة هلگد
_شلون بلوة هاي لأزم كل خمس دقايق اگلج تعالي
_خليت خصلات شعري ورة أذني وتقدمت بثگل
ايباه ولا جاي أعرف نفسي وفجاة أنتبهت على المكان ورجع طار الخجل
عززززا بس لا تريدني انام من جهة الشباك
أبد والله مسسستحيل أنت تعال منا واني منا
_ بابا منو ضاحك عليج وگايلج الجن يگمز من بيت البيت هاي اصلاً اذا اكو بالبيت جن من الأساس
لاتصيرين ثولة ويلا تعالي متعود على هالجهة
ما اگدر أغير مكاني
_والله أخاف ليش ماتصدك
_ اذا نمت منا راح اظل منطيج ظهري للصبح
-خرب بكلمة منا رجعت معت من الخجل
جيت بصفة ما أگدر أخلي عيني بعينة
لزم أيدي أجاني شعور حلو
_باوعيلي ليش دايرة رأسج
_صديت عليه عيني أجت بعينه ما أعرف ليش العبرة خنگتني أبد مجنت متوقعة راح يجي هذا اليوم لان أعرف ماعندي حظ والشي الي اتمناه ما أحصلة بسهولة
_خايفة مني؟
_هزيت رأسي بالنفي
-لعد ليش الدموع تارسة عينج
_هاا ما ادري يمكن لأن خجلانة
_الخجل شي طبيعي وبمرور الوقت يزول
دائماً خلي بالج اني سترج وغطاج راح اكملج وتكمليني حياتنا من هاللحظة راح تنربط سوى
_ان شاء الله
خلى أيده على شعري تلمسة ونزلها على خدي
طبع بوسة قريبة من شفايفي ما أعرف شصار بحالي رجع طبع بوساتة بكل مكان بوجهي اخير شي أستقر على شفايفي باسني بوسة طويلة وجريئة فصلت عن الدنيا
أخذني الحضنة كان دافي بدفو كلماتة الهمسهم بأذني طمئني احتواني خلاني اطير ويا السحاب
اكتمل زواجنا وماظل شي أسمه بس على الورق
لبست ملابسي ردت اگوم باوعلي بستغراب
_وين؟
_هاا محد يدري اني اهنا هسه يدورولي
_صدك تحجين مو سرور شافتج وياي على العموم براحتج بدربج طفي الضوا
_يووو هذا شبي شو نطاني ظهرة امداني شبيه
ما أعرف اتصرف صدك سرور شافتنا
رجعت للفراش بس هو ماتحرك ظل على نفس وضعة
هففف هاي بعدنا بسم الله وخليتة يزعل فلا تصيرلي جارة تلفوني جايبتة وياي من الأرتباك نسيتة
اخذتة من الكومدي ليال متصلة ودازة رسائل تسأل ويني وشيريد مني امجد وليش تأخرت
كتبتلها
(راح ابقى بيت خالي لايظل بالج) تم التسليم وبسرعة غلقت التلفون حتى لاتظل تستفسر
تقربت عليه
احم لعد من گتلك انام من هالجهة گتلي اذا نمتي راح اظل منطيج ظهري للصبح
لعد هسه مو هم منطيني ظهرك وتدري بيه أخاف
جاوبني وهو بعده على نفس نومتة
_مو ردتي تروحين ليش غيرتي رأيج وبقيتي
_هاا جنت ناسية سرور شافتنا وحتى نسيت اني جايبة تلفوني وياي
تحرك نام على ظهرة وفتحلي أيده دخلت بحضنة وخليت رأسي على صدره
ظلينا گاعدين الحد الصبح
گمت احوص حس بيه گال شبيج
مو أخاف اگلك وهم ترجع تزعل
_لا يابة احجي
_أريد اروح للبيت أسبح وأبدل ملابسي قبل لايگعدون وتصير هوسه
_قابل ماكو حمام اهنا اذا رحتي منو يفتحلج الباب أكيد الكل نايمين
_ مو قصة حمام بس الشامبو مال شعري خاص ما اگدر أستعمل غيره وملابسي كلها اهناك
هسه اتصل على ليال هي تفتحلي الباب
_ماشي اني هم أروح اسبح قبل لا أبوية يجي يسوي مداهمة علمود صلاة العيد
_تعال وصلني اخاف انزل وحدي
_شطلع هالخوف مالتج امشي أمري لله
_جريتة من ايده واني أضحك من بعد موت بابا وعماد هاي اول مرة افرح من كل گلبي
نزلنة سوى اتصلت على ليال يدك وماكو رد
يبووو بس لا تلفونها صامت قبل لاتنتهي المكالمة جاوبت
بالگوة گالت الوو مبينا جانت بسابع نومة
_شكو داگة من هسه
_تعالي فتحي باب المطبخ
أجت كفشتها منثورة تباوعلي من فوك ليجوة
أمجد من جاوبتني ليال رجع البيتهم
طبيت للبيت عيني تفتر
_شدورين؟!
_هااا لا شدور بس دأشوف منو گاعد
_عود مستحية لو شنو
_مو نعسانة وبالگوة تحجين امشي رجعي نامي وكرميني بسكوتج
_لا عمري النومة وبح طارت تعالي احجيلي شصار
_عااا شحجيلج صدك متستحين
_ههههه يعني نگول مبروك
_اششش خرب ببليسج راح تگعديهم بربج سكتي
_ماشي سكتت ماتحملت حضنتها ربي يجعلها زواجة الدهر وأشوفج أسعد الناس
_نزلن دموعي ربي لايحرمني منج
كافي شوفي بجيتني
_مسحت دموعها هاي الفرحة الـ بوجهج عيد ثاني بالنسبة الي
_ رجعت حضنتها بعد عمري ليلو اموت عليج
_فدوة رحتلج حبيبتي صدك شجابج من هسه
_أريد اسبح وأبدل ملابسي
_مممم ماشي
_كافي تباوعيلي بمكر ترى من صدك اخجل
_ههههه يلا يابة راح اغمض
_فتت للغرفة خالة نايمة اخذت ملابس ورحت سبحت من طلعت طبيت لفراشي وغطيت رأسي ادري راح يگعدون ويستلموني
وجمالة الريوگ يمنا ورة الصلاة بيت خالي هم يجون ظليت احوص اختنگت من الحر
حاولت أنام مگدرت اصلاً يانوم هذا وأني
عقلي وگلبي وروحي يمه ومشغولة بأبسط تفاصيلة كل لحظة أسرح بخيالي وأذكر كلامة ولمساتة لا أرادياً أبتسم
صارت ضجة الحبابات گعدن گطعت النفس
المشكلة صوتهن كلهن بالغرفة ويسألن ليال هاي زلال وشجابها مو جانت بايتة اهناك
ليال العوبة تضحك وتگوللهن أجت تمحي أثار الجريمة حتى لحد يسألها شجانت تسوي اهناك
طاح حظج ليال هاي ياجريمة اااخ لو ما خجلانة شجان خلصها مني
رغد _ هيانها دتتحرك والله گاعدة بس مغلسة
_أنجر الغطى مني غمضت عيني بقوة
اهووو شراح يفضني اليوم
_گومي لج لا عبالج تنومين نفسج أفلامج متعبر علينا ترى جربناهن قبلج ونعرفهن
_عدلت گعدتي اذا تعرفوهن شكو خابصاتني كرموني بسكوتكم يكون افضل
شذى_غير نريد نفرح بيج ونهلهل
_عززززا هم عايزة بربكم سكتوا بين ما يصير الريوگ ونكمل ترى كاتلني الجوع مو وقتها تحجون وتخلوني استحي وما أكل
فاتت خالة الوجه يضحك أجت بوستني وباركتلي
اووويلي ششلون احراج
سألتها خوما حجيتي شي گدام ماما وبيبي
_لا بعد ردت اتأكد منج بالأول
_الله عليج سكتي
_يووو ليش ولج
ليال_ أم بطن جوعانة تخاف لا يخجلونها وتنحرم من الگيمر والكاهي
فردوس _ هههههه والله عليها سوالف يلا ماشي ننتظر قابل شكو ورانة
_طلعت من الغرفة أجو بيت خالي الحمدلله مبين امجد هم مگايل شي الهم
كلما عيني تجي بعينا اثنينا نبتسم
صدقة صدك لو گالوا عصافير حب
طنشت عيون العوبات الي مركزات بيه وگعدت أكل براحتي خوو اني حتى معايدة بعدني ممعايدتهم ادري هسه قابل غربة وبحياتي مشايفتهم شو من الله خلقني مگابلتهم شنو هالسالفة هاي ما أدري
كملنا الريوگ بسرعة فلتت للغرفة
دقايق وفاتت مرت خالي هلهلت لا عاد من صدك الموضوع زاد عن حده دخلت بنص هدومي الي يدورني مايلگيني
خطية فاتت ماما مستندة على ليال بالگوة تمشي گمت بسرعة رحتلها حضنتها
حورية _جنت شايلتلج هم بكبر الدنيا هسه يلا بالي ارتاحيت أمجد خوش أمجد أدري بي رجال من ظهر رجال راح يصونج ويشيلج بعيونة
-أي طبعاً هذا حبيب گلبج لأزم تمدحين بي
-لا مو مدح أمجد افعالة تشهدله
امشي ليش خاتلة روحي عايدي أمي وخالج
_هااا يعني ضروري اعايدهم
فردوس _ صايرة هواي تخجلين ولا جاي نعرفج
_اهووو هم راح يحجون اوك رايحة وأمري لله
جيت عايدت بيبي وخالي من كلامهم الظاهر يعرفون
خطية خالو شال ١٠٠ الف انطاني گال هاي عيديتج
بست أيده ورأسة ورجعت للغرفة
خالي أخذ الولد راحوا يعايدون اقاربنا
البنات نصهن راحن البيت خالي يطبخن الغدة
بقيت وحدي ويا غزولة
رأسي انسطر اريد أنام بس مد اگدر
قبل الغدة بنص ساعة رحت البيت خالي ظليت گاعدة بالمطبخ بهالحر إمجد بعد لا شفتة ولا حجيت ويا صبوا الأكل
گعدنا كلنا سوى
بالگوة أكلت شوية رأسي يريد ينفجر من النعاس
أريدهم بس يخلصون وتنشال السفرة داروح أنام
وصال _ شبيج تطوطحين بالگوة واگفة
_ نعسسسانة أريد أنام من البارحة منايمة
_هههههه حقج يابة اي عيوني ومتصعدين الغرفتج تنامين أحد لأزمج
_هاا شنو الغرفتي لا اروح البيتنا
_صدك تحجين بابا شبيج انتي مخبلة
_الله عليج غلسي ادري بنفسي داجفص واخوط بصف الأستكان
_لعد اذا تعرفين بنفسج هيج امشي ولي صعدي فوك
وبدربج أخذي كوب الجاي الرجلج لان صعد قبلج مبين هو هم بالگوة فاك عينة
_بدون ما احجي شي رحت اخذت كوب جاي من الصينية وصعدت
وصلت للباب ارتبكت اوووف والله صعبة مدري شوكت تصير الأمور عادية وأتعود
فتحت الباب على كيف امجد بطرك الشورت والفانيلة مبطوح على بطنة ومغمض مدري نايم لو بس هيج مغمض
حس بية رفع رإسة
_ماتفوتين ليش واگفة بالباب
_مو شسمة عبالي نايم.
_والله مطفي وبالگوة فاتح عيني
_انطيتة الجاي ورحت للجهة الثانية من الجرباية گعدت
_ نمتي لو لا ولو الجواب مبين من شكلج
_لا ماگدرت هوسة والجهال طابين طالعين
خلى كوب الجاي على الكومدي وتقرب مني
_ليش بعدج گاعدة تعالي نامي
_هاا أي هسه
تمددت سحبني الحضنة ترى مقفلة الله عليك اگعد راحة وخلي أنام
_نامي يابة نامي حتى منا الليل أريدج مصحصحة
_ يووو هذا ولا يستحي ضميت رأسي بصدرة وغمضت يمكن ماطولت عشر دقايق ورحت بسابع نومة
مدري شگد نمت اكثر من مرة طفت الكهرباء صارت حارة وتجي المولد بس المروحة تشتغل أحس بالحر بس أبد ما بيه افك عيني
سمعت صوت طكطة بالغرفة ومهامس بالبداية عبالي حلمانة فتحت. تك عيني حاولت اصفي ذهني وأركز انصدمت بشوفة زيد وحسوني واگفين يم ميز التواليت مدري شيسوون
بسرعة گعدت لحيلي همزين جنت بعيدة عن امجد
وثوبي مستورة بس شوية مرفوع ورجلي طالعة
حسوني _شسوين بغرفة عمو أمجد
_هو منو الأزم يسأل اني لو أنت
_شگد ماتستحين اوگفيلي الا اگول البابا ويمه عليج
_شبيت نار لك حقير منو المتستحي
على صوت صياحي گعد أمجد مثلي انصدم بشوفتهم سألهم شسوون اهنا
زيد _جيت أرش عطر، منك وحسوني أجة وياي
_هاي أخر مرة تفوت لهنا بدون ما ادك الباب وتستأذن مفهوم لو أعيد
يلا طلعوا منا
حسوني_امشي نزلي لا أخلي عمو علاء يصعد يشبعج كتل
_من العصبية احس شرار گام يطاير مني أريد اگوملة امجد سبقي راح لزمة من أذنة لواها
وهذا بكل صلافة يدفع أيد أمجد ويتجاسر علينا ويهدد ينزل يگوللهم
أمجد ماتحمل جابة براشدي فره فر حسوني طلع يركض ويهدد اله اگوللهم
زلال وعمو بالغرفة وحدهم ونايمين سوى
امجد طلع وراه بس ذاك نزل بسرعة
أمجد_ شنو هالتربية وهالأخلاق إخوانج وينهم عنه قسماً اذا ماربوا ومايگدرون عليه اني أربي الهم بگد ابو الفلسين وسوالفة اكبر من صماخة
.
_محد مطلع عينه غير ماما كلما يسوي مكسورة اطمطملة ومتقبل احد يحجي العادل وعلاء،
وهاي النتيجة
_ ومن يطلع من الطريق عود هذاك الوكت تگعد تعض اصابعها ندم ترى حسين بمرحلة المراهقة لأزم احد يتابعة ويعلمة الصح من الغلط دزوا يم أبو ليش عمتي تشيل خطيتة
اني راح احجي وياهم ويصير خير بعد من تفوتين قفلي الباب زيد وريم متعودين يطبون ويطلعون براحتهم
_ ماشي
مزاجي تعكر امجد راح يسبح لان گعدنا مدبگين من الحر من طلع اني هم فتت ذبيت مي على روحي
ملابسي نفسهن لبستهن بعدني مجايبة شي
طلعت لگيتة ديبدل
راح تطلع
_تريدين أبقى؟
_هاا لا لا بس داسأل
_ما اتأخر رايح ويا علاء نعايد جماعتنا قبل العشا تلگيني گدامج
_تمام اني هم رايحة البيت أهلي اجيبلي كم قطة ملابس بين ما انقلهن كلهن
_انتظرج لو انزل قبلج
_لا عادي روح امشط شعري وأجي
باسني وراح اويلي ممتعودة على هاي الرومانسيات والدلال مشطعت شعري ونزلت
اصوات تجي من الأستقبال ظليت واگفة بنص الدرج لا اگدر اكمل وأنزل ولا أگدر ارجع أصعد
امجد طلع من الأستقبال لمحني واگفة اجة اتجاهي
_ماتنزلين شمنتظرة
_هااا منو اهنا
_خالاتي امشي سلمي عليهن وعايديهن
يلا اني رايح رايده شي أجيبلج من أرجع
_ لا سلامتك صدك اسويلك جاي قبل لا تروح
_ مابقى وكت اخوج خبصني حرگ الموبايل بالاتصال
_راح امجد كملت طريقي ونزلت فتت للأستقبال
اوووف خالتة سعاد هم اهنا
مدري شلون يباوعولي
كوثر _تعالي حبيبتي
_ابتسمتلها استلمت خواتها وبناتهن بالسرة
احس خدي نشلع
من وصلت الـ سعاد بقت گاعدة ودارت رأسها
فشلت من حركتها تجاهلتها وكملت البقية حتى بناتها وجناتها نفس الحالة بالگوة سلمن عليه
خالة باوعتلي بتوسل الظاهر انحرجت من تصرف أختها
الخاطرها سويت الموضوع عادي گعدت شوية الى أن صاحتلي وصال للمطبخ
وصال_خوما نغثيتي من هاي الحية والله لو ما ماما كوثر واگفة بعيني جان لعبت بيها طوبة
_لا يمعودة على شنو أضوج ( علاج الجاهل التجاهل) من قهرها أكيد عرفت بيه راح اكمل ويا امجد ضاجت
_اي أدري بيها جانت كاتلة روحها تريد ازوج أمجد الأبن بنت أخوهن ويطلگج خصوصاً من تعاركتي وياها أخير مرة زاد حقدها عليج
_فرق شاسع بينها وبين خالة ولا عبالك خوات
امشي نرجع يمهن حتى لا يطلعن سالفة
_يلا تعالي
_گاعدة على أعصابي ورة وين يلا راحن تنفست براحة ستأذنت من خالة ورحت البيت أهلي
ليال_هلا بالعروس تعالي احجيلي شبي حسوني أجة على ماما يگلها زلال بغرفة عمو أمجد ونايمة بصفة الا اگول العمو وبابا عليها
ماما وخالة حجن عليه وسكت
_لج الأدبسز فايت ويا زيد للغرفة يرشون عطر فزيت من النوم على صوتهم بس شافني گعدت طلع لسانها عليه ينتر ويهدد
أمجد ماتحمل گام ضربة وتحلف بي
_اي گال الماما عمو أمجد ضربني أدري انتوا غير تقفلون الباب
_شمدريني نسيت ما أجة على بالي يفوتون براحتهم بس والله الحقير حرگ دمي اخلاقة صايرة زفت
_يمعودة شگد احجي وانصح ماكو فائدة ماما متقبل احد يغثة اتگول عايف أهلة وباقي يمنا
الي يضوجة معناها يضوجني
_محد راح يعم عليه وبفسد اخلاقة غيرها
فتت للغرفة أخذت كم قطعة ملابس مابية حيل أخذ أكثر
أخذتهن ورجعت
امجد قبل العشا رجع بعدني كلش خجلانة من خالي ووليد وانوب ايهاب هم اهنا
ولا عبالك أعرفهم من طفولتي
كملنا لملمنا السفرة ردت اساعدهم اغسل مواعين وصال ومريم مقبلوا
استغليت الفرصة أخذت ريم وصعدت الغرفتي
ريم_ زلولة سؤال
-جواب
_شكو ساحلتني وياج وجايبتني اهنا
_طاح حظج يعني تضوجين اذا گعدتي ويا خالتج
_لا ما أضوج بس ليش ماتحجين الصراحة وتگولين اخاف ابقى وحدي وجايبتج. يمي مثل چلب الحرسة
_امداج على هذا التشبيه زين اذا تعرفين الجواب شكو مدوختني بلغوتج الزايدة
سكتت شوية وهم رجعت تلغي موعت أذني
انطيتها اذن الطرشة گعدت ارتب نفسي خليت مكياج ردت احس فعلاً اني عروس وحياتي بدت من هذا اليوم
ريم ضاجت عافتني وراحت صح خايفة بس شسوي ما اگدر أنزل جنت جايبة سيت نوم لبستة اريد كلشي أجرب ادلل نفسي وادلله أريده يحبني مثل ما احبه وشكو ذكرى قديمة برأسة يمحيها
ربع ساعة وفات للغرفة شافني ظل واگف بمكانة يباوعلي بأعجاب
احم عفية لاتباوع هيج
_ المنو لابسة ومجهزة نفسج؟
_عزززا هذا شبي صدك تحجي شنو المنو غير الك
أبتسم بخباثة
_اذا ألي لعد شلون تريدني ما امتع نظري
_يووو طلعت مو سهل ولا ينگدرلك اجة بدون مقدمات حضني اووويلي الظاهر راح أدمن هذا الحضن
قطع علينا هاي الأجواء رنة الموبايل علاء يتصل
امجد جاوبة بضجر ششرايد مو قبل ساعة جنت مگابلك
لا ما أجي روح أنت
لك لا تلح والخلقك ما ازحزح من مكاني
عميييييي عريسسس شعندي عايف مرتي ومگابل شكولكم
هههه روح اسأل عمتي هي اتگلك منو العروس
يلا ازحلك ولا تظل كل شوية متصل
سده هو يضحك
الظاهر اخوج انصدم مايدري اختة اليوم بحضني
_لا فدوة مو الهدرجة ششلون تحجي ويا هيج مفكرت بيه شلون أخلي عيني بعينة
_اي بعد وبعد كملي مو جايبج بالسكتة وداك الناقصة وياج
_طگگت عيني واااي أمجد اشش الله عليك اسكت
_من سوالفج تخلين الأخرس يحجي
_عمي سكتت خليت أيدي على توبة بعد اذا ادخل
ليال_قبل الظهر أجوي لمى ورجلها يعايدون خالة
وأهلي
گعدت ويانة سوالف وضحك ورة شوية سألت على زلال
لمى_ لعد زلال وينها بس لا الخاتون لهسه نايمة
_وجان يجي الرد الصاروخي من خالة فردوس
_فدشوية تجي ويا بيت خالج على الغدة
_هاا شعجب اهناك
_غير بيتها المكان العايش بي زوجها مكانها
ليال_ لمى صفنت ثواني حجت بحذر ويمكن خوف أفهم من كلامج زواجها من... أمجد تم
فردوس _ أي الحمدلله ربي يسعدهم
لمى_ زلال هواي عانت تستاهل ترتاح وتنسعد بحياتها ربي يتمملهم على خير
ليال_صح حاولت تبين قوية لكن متأكدة داخلها اهتز رجعت تسولف عادي بعدت نظري عنها اعرف اذا أجت عيني بعينها راح أشوف الحزن والحسرة بيهم
خالي وعادل لزموا بزوجها ماقبلوا يروح قبل لا يتغدة
بعدها بشوية أجوي امجد وزلال
أمجد راح للأستقبال وزلال فاتت للغرفة يمنا
حتى زلال من شافت لمى ارتبكت
لمى استقبلتها عايدتها وبنفس الوقت باركتلها
زلال _ ما أعرف شبيه من شفت لمى اختل توازني لهسه من التقي وياها اختنگ واراتبك
واليوم بالذات لقائنا كان جداً صعب
ماگدرت ابقى وياها بنفس المكان رحت للمطبخ اساعدهم بلكي التهي شوية
صار وقت الغدة والمشكلة لازم كلنا ننجمع على سفرة وحدة نساء ورجال هاي عادتنا
اليوم اول مرة زوج لمى راح يشاركنة السفرة
التمينا كلنا عيني على أمجد وجهة محتقن
لو يطلع بيده خلال ثواني يترك المكان
صديت على لمى گاعدة تاكل عادي وتسولف ويا ليال و وصال حتى ما ندارت للجهة الگاعد بيها أمجد.
اما هو مبين تأثير وجودهم عليه
خصوصاً هذا أول لقاء اله ويا زوجها
اني حتى ما التفت ناحيتي ولا كاني موجودة
اكل يمكن لگمتين حط بحلگة يريد بس يگوم وفعلاً من أجتة الفرصة ترك المكان وطلع
رجع البيتهم
اشتعلت نار من القهر صار عندي لعبان نفس
ليال_شبيج شكلج مو على بعضة
_الله عليج لاتسأليني عوفيني بقهري
عفتها ورجعت للبيت جيت للغرفة لگيتة متمدد ويدخن
لا حاجاني ولا حاجيتة جريت المخدة تمددت وغمضت عيني بالگوة حابسة دموعي ومانعتهم من النزول للعصر ظلينا على نفس الوضع
الغرفة من دخان الجگاير والريحة صارت متنطاق
تالي گام بدل وطلع
لهنا ودموعي علن استسلامهن صارن يتسابقن على النزول بجيت وبجيت وبجيت الحد ما اختنگت ونفسي انگطع ظليت اعض اصابعي ندم ليش بهالسهولة استسلمتلة ليششش اااخ يا ربي ليش
گمت سبحت خليت مكياج احاول اخفي اثار البجي
نزلت جوة الكل حسوا بوضعي سألوني تحججت بقلة النوم والنعاس
امجد ما رجع غير ساعة 11 باليل وضعة اسوء من الظهر كذلك گضاها تدخين تالي اندار للجهة الثانية ونام
الكلام شبه معدوم بينا
بهاي الليلة حرفياً متت دموعي نشفن والندم مأكلني كرهتة وكرهت نفسي مجرد شافهم سوى انجن.
تأكدت أمجد من سابع المستحيلات يگدر ينسى ويطلع لمى من گلبة والخسرانة والوحيدة هي، اني ...
