رواية لك ياذا الجمال اليوسفي الفصل السادس والعشرون 26 بقلم فاطمة العبادي

رواية لك ياذا الجمال اليوسفي الفصل السادس والعشرون بقلم فاطمة العبادي 

انمغصت بطني وانه اسمع صوت سداد يطرق الباب و يصيح ، كام ليث من مكانة وانه غطيت كل جزء طالع مني بالشال

واجة صوت سداد يحجي بصوت واحد محروك كلبة

... ز*** عليكم فتحو الباااااب ليييث رهف

مشى ليث بكل صلافة فتح الباب لأن يعرف هسة سداد راح يتأكد ان انه بعلاقة ويا اخو

وانه اريدة يعرف ويتأكد

اريدة يشتعل نار يومية ويطفة

انفتح الباب وكبل سداد زنخ ليث من ياختة

... مو من الرجولة تختلي ببنية وهية عرضك ، ان جانك زلمة توكف كبال الملأ وتكول اريدهة وتاخذهة تخليهة ع ذمتك وسوي وياها الي يعجبك ..

ليث حجة بهدوء مفرط ... اهدء انت عريس وكاشخ و وراك روحة المرتك لا تغث روحك بعلاقتي الغرامية ولا تشيل هم بت عمك بأيادي امينة ..

رهف ... اي صح هذا مو شغلك احنة نعرف شنو نسوي 

باوعلي بخزرة و عيونة تبث شرار و صاح ... انتي بالذات سكتي ما اريد اسمع صوتچ

ليث ... لا تصيح عليهة سداد انه ضغطت عليهة تجي لأن مشتاقلهة وهية تنك براسي مشتاقتلك وتعال النه وهسة تعال شوفني بلبس الخطوبة كلت ما ارد طلبهة ههههههههه

رهف ... ههههههه مو ردت تشوفني شلوني بالفستان الي اختاريتة الي

سداد ... كل ثنين الشيطان حاضر بيناتهم ليث انه راح اسكت اذا يتكرر هذا التصرف مرة ثانية ثق برسول الله احجي الأبوي واخليك امام الامر الواقع

ليث ... هذا الهوا الي تريدة يجرالك دامك خايف علينه من الوقوع بالفاحشة حجاها بشقة وضحك

و استرسل بالكلام وكأن يرش ملح ع جروح سداد ... بس انته ما تخاف عليهة اكثر مني انه اخاف عليهة من روحي

سداد ... يله نزلو مو زعاطيط ولا انتة مراهق ليث

حجاها بخزرة وتأكد من نزول ليث كدامي و فسحولي المجال انزل بعد ما اتاكدو محد موجود ..

ما كدررت احجي شي بيناتهم بعد ، بس من نزلت واجة سداد وكف كبالي كبال الناس بحجة السلام والمباركة همس بصوت خافت

... هية كطرة رهف لو طاحت .... بكبرج تطيحين وياها

رهف ... قصدك من عينك اطيح

سداد ... صايرة تحجين بوكاحة ، بس يله اعبرهة الج ما تطيحين من عيني بس انتي تطيحين بقعر الهاوية و صدكي محد راح ينتشلج منها انه سداد الجنت ميت بيج راح اوكف واتشمت بيج ..

رهف ... اصححلك كلامك مو جنت ميت بيج انته مازلت ميت بية ، و كلبك هسة غادي نار

بس لا تخاف اذا ردت اتزوج ليث ما اضل هنا اكللة اتزوج بغير بيت حتى ما ينسد علينه الباب انه و اخوك وانت تموت من القهر ههههه

سداد ... ما توقعتج هيج رهف لهاي الدرجة ... حجة برجيف

رهف ...بلعت ريكي عزة شسويت انه

استرسلت ... ترة اشاقة لا اريد ليث ولا شي اكرهة اخوك لأن دمرني بس ردت اثير غيرتك

وحتى من صعدت يمة ردت اتعارك ويا بس انته اجيت

ضحك باستهزاء ... هاي جذبة جديدة

رهف ... والله عاد صدكت ما صدكت طك راسك بالحايط اخر همي 

عفتة وراي مصدوم وكأن صفعتة ع وجهة

انه ما كتلة هذا الحجي حتى ابرر لا حتى ازيد حيرتة وقهرة واشغل عقلة لأطول وكت ممكن

لأن لو ينصاغ ذهب هم بعد ما اريدة

فـ مالة داعي ابرر لو اخلي يصدگ انه بريئة ..

رحنة لبيت العروس، ما باوعت عليهة حتى ما ينطيني كلبي اروح واشوفة وياها

لفيت شال حول خصري و ركصت بمهارة و كأن اريد اشتت انتباه الكل واجذب كل الانظار الي ..

ضليت اتمايل واهز بخصري ، ومن دخل سداد بس حطيت الشال على ايديني غطيتهن وضليت ارگص غطيت على الموجودين كله في سبيل اجذب نظره

صارت عيني بعينه غادي نار ويريد ينفجر وگفت ، ورفعت الشال حطيته على رأسي وانه مركزة نظري علي ومبتسمة ، راد يوگف گلبه

بس جذب مثل شعوري انه گلبي ضل يتگطع من شفته بصفها ومن رگصو سلو

قريبة علي ويتمايلون ، وهمسلها بأذنها كم كلمة ابتسمت عليهن .. حسيت رأسي دخن

ما اعرف شلون انتبهت الحفلة وشلون طلعت شوكت اجة هاني واخذني جر لسيارتة صعدني بغضب وكال لفي روحج طالعات زرورج ..

لفيت روحي بدون جواب، احس روحي مخنوكة و بأي لحضة انفجر

الدموع واكفة بطرف رمشي و اكو غصة جاي تجرح بحنجرتي ..

نزلت راسي ما رفعتة، اريد اشرد اريد ابتعد عن كل الموجودين واصرخ من كل كلبي و ابجي بحركة وألم ..

اريد اكض سداد و افرغ نار كلبي بي، اريد اضربة و اصرخ علي وارتمي بحضنة وابجي منه ..وعلي ..

جانت لحضات صعبة، ما اتمناها لعدوتي .. الله يساعد كلبي بيومهة

احس سجاجين جاي تكطع بي .. نياط كلبي. تكطعن من رفعت راسي وشفتة مصعدهة يمة بالصدر ماخذهة يصورون ..

والله اخربهة عليك ، وما اسمح لفرحتك اتم لو اعرف بيهة موتي

دنيت روحي ع باب السيارة كلش ، غمضت عيوني وفتحت الباب ما حسيت غير بروحي اتدحرج ع ارض الشارع و جلدي يتگشط بالتبليط الحار .. شميت ريحة الدم، وسمعت صوت الزلم يصيحون رهف هاي .. وصوت اقدامهم التركض بهمة بأتجاهي

هاني ... مادري مادري لا تكلي شلون طاحت ليث مادري 

ليث ... وخر خلي اشيلهة وخر نزل مرتك من السيارة بسررررررعة

هاني ... نزلهة انته انه اشيلهة

فاضل ... ياربي سترك ودخيلك انه مو كتلكم انتبهو شوفهة بيهة روح

هاني ... اي مفتحة عيونهة عمي

رفعني من الكاع بس استغربت من كال مفتحة عيونهة وانه ما جنت احس بشيء

اوجاع بكل جهة من جسمي، رطوبة ع وجهي، اصوات سب

ليث وهاني يتقاذفون بالكلام وليث يحمل هاني المسؤولية و كل شوية يرزلة بـ مطي غير تقفل باب السيارة

يمكن عرف انه فتحتة وذبيت نفسي متعمدة

يتبع صوتهم صوت امي الباكي

"لا تتناكرون صلو ع نبي ان شاءالله مابيهة شي ، سودة بوجهي يمة شيطيحج من السيارة" 

صارت وشة بأذني وباد كل جسمي ، بدأت الوجاع تخف شوية شوية بعدهة اختفت وسكن جسمي

بعدها روحي ، رميت ايدي من حضن امي

الى ظنت هذا الوداع الأخير ...

.

.

.

فلك

خطوبة سداد انگلبت علينة يوم اسود ودم

منظر رهف المليان دم وهية تنشال من الكاع ما يفارگ مخيلتي 

اصبر بدرة و انه مو اقل منها حزن ولا تأثير

رهف ودرة صارن رفيقات دربي و مثل خواتي

وكل مكروه يصير بيهن يأذيني ..

جنة انه ودرة بمطبخنة كاعدين ولافين نفسنة بالعبي و الكحل نازل لخدودنة لأن بجينة

وطب علينه فالح كال ... جنجن ارامل مابيهة شي البنية هسة خابرنة بس شگ بسيط براسهة ومتزلغة

وانتي درة عبالك وحدة ميت رجلهة وكاعدة تلطم علي وكحلتج واصلة لراس الفرع

فلك ... اي غير اختهة

درة ... فالح وخر عني حجتهة وبجت

فالح ... يا بوية انه غلام بوية حضرولنة بلم راح تغرك المنطقة بدموع درة

عمي ترة انه مو سباح لخاطري لا تبجين ماريد اغرك

ضحكت من بين دموعهة وكالتلة ... صدك مابيهة شي 

فالح ... اي وسيد خضير كلشي مابيهة هاي اختج متعودة ما تكمل فرحتهة يمكن حسدوهة

لان هية ماشاءالله طالعة جميلة بشكل انه من شفتهة نشف ريگي

درة ... وليش نشف ريگك؟

فالح ... ارتفع سكري فات همام للمطبخ وكال وهوا يسوي حركة بأيدينة بمعنى اهدو

... مابيهة شي صلن على محمد وبلى بجي درة مسحي دموعج

فالح ... قصدك حلقومة ههههه

همام ... لا يا محمد درة فلك انتن بس تبجن هاي وضيفتجن بالحياة منو يصير بي شي تكعدن تلطمن علي

فالح ... ولك لو طايح انه ما بچن علية هيج بس هية هم حظوظ كلهة تركض ورا الحلوين

همام ... هوا انتة الا شوية جان صخمتنة ويا رهف ماد روحك من الجامة وتطربك جنك طرزان الغابة

فالح ... ع الاقل انه مستور الا رهف فضحتنة فضيحة الكفار بنص المسلمين

كعد هوا بالكاع ومدد رجلينة

هية البنية طاحت ولتفت العباية وصعد الثوب لهنا والرجلين يصيحن رحم الله كل اعزب شاهد وتحسر فمات متحسرًا 

يأشر ع زرورة

بس احنة متنة من الضحك

ونوب يحجي بكل جدية ، ولجن بعد لبسن مستور بالعرس انه كبل طفرت من السيارة كلت الم الي تطشر ، چا غير عرضنة صار فيلم سينمائي ..

ادري الخياط ماعدنة قماش و سيد خضير لو ادري كاصلهة وصلة من بردتنة ..

همام ... فالح غير حادث هوا هههه والله عليك سوالف حتى لو لابسة مستور الهدوم يطفرن بالحوادث اسئل مجرب انه مرة اندعمت لكيت تيشيرتي طالع من راسي 

فالح ... ايييييي اتذكررر اجيناك لگينالك جنك صخل مدعوم التيشيرت مجلب بگمع راسك ومطلع لسانك وتلهث وتصيح فالح الحگلي ..

طكة بعكسة ويعضلة شفتة ويكلة وهوا يعدل ياختة ... اصلا كمت كلشي مابية

فالح ... ابد مابيك شي بس تلاثة من صابيعك تكسرن وضلوعك ترضرضن ترضرض ..

همام ... تسكت لا ارضرض ضلوعك

باوع لدرة لصافنة عليهم والعباية مفتوحة وكللهة ... لبسي عبايتج عدل لا اطير فچچ ابوكسي 

فالح ... ولك حدك

همام ... ما تشوف الزلم رايحين جايين اصلا شعندجن هنا كومن كومن طبن للبيت 

... وين همة الزلم انته احول شو ما جاي اشوف احد

همام ... كومن دخلن جوة يلة

فلك ... اوووووو حتى ماتخلون واحد يبجي مثل البشر شبيكم الزلم بس تنكون

فالح ... لا ما اسمحلج تتجاوزين بحقنة انتن تنگن مو احنة ويلة فوتن جوة خاف يجي احد ويشوف وجوهجن ويخترع كلهن كحل

كمنة انه ودرة باوعنة بالمراية وصدك صابتنة صدمة الكحل مشخبط وجهنة ضلينة نمسح بي ونضحك ع روحنة جان ام بارق صوتهة شعلوة تكول

... هنة هذني بنات جعفر لازم كل فرحة ينقصنهة علينة شفتي من طاحت بالشط

وكلبت الجو لطم

وهسة نفس الشي مادري شني هاي الفگور مادري

والله لو انه من نجوى ولا اعزمهن ايجيبن شرهن وياهن ويجن

نجوى ... ام بارق زحمة نصي حسج هذا امر رب العالمين ما شفتي البنية شالوهة غركانة بدمهة

هية بيدهة خو ما بيدهة

ام بارق ... اي ضلي نجوى ضلي فقيرة مثل گبل بس مات الرجل وعد حطت عينهة ع زلمتج ولفتة جوة باطهة

درة .. ردت اطلع اهد عليهة ، واتعارك بس فلك كضتني وهمست ... اتجفي الشر 

زميت شفايفي بغضب و ضليت اسمع شنو يحجن هواي حجي فاتني من حجيهن واسمع عمة نجوى تگللهة ... ماكو هيج حچي

جان تدخل ام فالح ع خط و كالت بغضب دفين

... ام بارق خلينة ساكتين لو ابو بارق يدري شردت وعد من وراج صارت ، ساعة وحدة ع ذمتة ما يخليچ ليش تفتحين دفاتر قديمة

ام بارق ... انه خفت ع رجلي منهة حقي وشني تايهتلة يطلك ويعوف بكيفة خوش حلوة هاي علمود والله ست وعد شردت انه مالي غرض

صاحت عمة نجوى بغضب ومبين هواي كابتة بصدرهة ... لا الج غرض كلة من وراج لا هية رادت فاضل ولا فاضل رادهة رجلج الحاط عينة عليهة من هية ع ذمة جعفر وخلة جعفر يعوفنة كلنا ويروح يكعد بيهة بعيد ولا يطب علينة ولا نطب علي

ومن مات رجلج انتهز الفرصة بعدة ما نشف تراب كبر جعفر وهوا تشيطن وشد الحزم و كال مرت المرحوم انه اخذهة

ام فالح ... وانننتي هديتي عليهة بليلة ظلمة بشلبة وتكليلهة اذبحج واسم الله عليج مو كليلة شر الحد هسة ابو فالح يذكر دمهة اللي لكينا ع كاع ام بارق كلهة سكتت لخاطر فروخج

ردت مرت عمي الثانية ... الحد هسة اتذكر كالو لا تحجون كدامة هذا خبل ويطلكهة

و وعد لو يركع يم رجليهة ماتاخذة

ما ناقصنة مصايب

واحد مات وعافلة 3 بنات يتامة وما نريد الثاني يطلك ويتشتتون اطفالة

ومن ذيج ساعة الله حد هسة وعد كافة روحهة وما رضت حتى اتطلع البنات العمامهن كلتلهم انتم غرب

ام بارق ... عود تحجين صدك انتي هية وعد حيالة شمالج انتي شني نجوى ماشفتي ابنج ليث شلون فز عليهة من طاحت من السيارة تطلع مثل امها ما تركض الا ع متزوج

نجوى ... خافي ربج كلنة ندري وعد ماخذت جعفر من جان متزوج جان مطلك

ورجع ام هاني و وعد ع ذمتة وضلت عندة وربت بنيتة من المرحومة لو ما بت اصول وحاطة درة بعيونهة هية واهلهة وشايلينهن بالصلاوات

جا ما هاني جاب عمرة يغار ويكره خوالهن

جيف خوالة مرمرو وشبعو ذل وكتل وخوالهن دللوهن

جا هوا عاش اليتم ع اصولة والذلة

وهنة ما عاشنهة ، الولد كلبة من الغيرة صار اسوووود من عباتج 

لو ما وعد زينة وبت اصول ما صار هذا كلة

ام بارق ... وشجاب هاي ع هاي

نجوى ... القصد وعد زينة وما كاتلة روحهة ع رجل كل همهة تربي البنات وتكبرهن

ام فالح ... ام بارق اتجفي الشر تراهة بعدهة زغيرة وحلوة لو راد ابو بارق ينزلهة ضرة عليج محد يكضة

وهذااا البيت الصارلج سنين تبنين بي وتأثثين وصرفتي علي ملايين يصير الهة

والرجل الهة والولد ، ف اكول سدي الدفاتر العتيگة وستري ع روحج ، بيتچ لا ينهجم

ام بارق ... عشتووووو تربي البنات يا بنات هاي المستخفة رهيفة لو العبدة خليني ساكتة

ولا ابو بارق ولا غيرة يكدر ينزلهة ضرة علية

نجوى ... هوا من يوم جابو البنات وردت وعد يريد الحجة عليچ وانتي تنبشين بالماضي شنو تتوقعين ?

فأكول لو تسدين السالفة وتعوفين مرت المرحوم وبناتة وما تجيبينهن ع لسانج احسن ما يكض عليج الجبيرة ويخلي ورقة طلاكج بحلكج ويذبج ع اهلج

ام بارق ... انننتتيييي شلووون تحجين وياي بهاي اللهجة

نجوى ... انتي جبتيهة الروحج ام بارق لان محد يسلم من لسانج لا صغير ولا جبير ولازم تعرفين الي بكلبي علمود مرة ثانية ما تكولين وعد رادت تاخذ فاضل منج

وصدكي ام بارق اذا مرة ثانية كدام الصغير والجبير كلتي هذا الحجي الا احط سالفة گبل بذان ابو بارق وهوا يتصرف لأن مو حالة هاي تتهمين فاضل و وعد بشي ما مسوينة

ام بارق ... انه اكوم اروح البيتي احسن كلجن صفيتن ويا وعد ام الزلم بس انه انه وانتن انتن

ام فالح ... شقصدج ؟ حجي الصدك يزعل والله ولا عندج لا حظ ولا بخت

ام بارق ... اي ماعندي حظ وبخت وان شاءالله بتها ما تطلع منهة سالمة الله يحرك كلبج يا وعد مثل ما حركتي كلبي 

عساها بعزيز كلبهة 

نجوى ... دعائج بنحرج ام بارق ..

طلعت تجر بخطواتهة بغضب و تدعي بداخلهة ع امي بحركة الگلب والفقدان ..

جان ابنهة واكف يستشيط غضب ومن باوعتلة رمقني بغضب ماعرف شنو وليش حسيت بعيونة نظرة حقد ..اول مرة اشوفهة من عيون همام ..

ماعرف شلون دخل هاني علينة ، شوكت رجع من المستشفى وشلون مادري 

صاحت عمة بشررر

كللهة الحمدلله بس وجهة اصفر

صعد بسرعة يركض دقايق ونزل يركض لونة مخطوف وعيونة حمر مدمعة .....

 الفصل السابع والعشرون من هنا