 |
رواية لك ياذا الجمال اليوسفي الفصل الخامس والعشرون بقلم فاطمة العبادي
رحت لغرفة عمي فاضل دكيت الباب طلعت عمة نجوى كتلهة عمي كاعد
كالت اي
فتت باوعلي وكال خير ان شاءالله رهف ..
رفعت راسي باوعتلة و حجيت ... عمي انه اكو شخص جاي يتحارش بيه وكلش مضايقني ..
رفعت طرف حاجبة مستغرب و عدل كعدتة اشر ع مكان يمة و كال ... تعالي يمي كعدي ياهو هذا الي مضوج بنيتنة
بلعت ريگي و رفعت راسي باوعت ع ملامحة رغم الحنان الي بعيونة لكن ملامحة مغلفة بالقسوة
صراحة مادري ليش خفت ، وترددت
و بهاي اللحظات عدت التفكير و النظر بالموضوع
اول شي خطر براسي ان انه راح اطلع من هذا البيت وبعد لا اشوف ليش ولا يشوفني ليش حتى اروح اسوي مشكلة .. راح اصير جوة جناح امي
هيج فكرت ، تقربت كعدت يمة و كتلة بخوف
... عمو ولد بالشارع دوم يضايقني وانه اخاف
ما توصي الولد يشوفولنة خط ياخذنة للمدرسة
فاضل ... جا انتن مو ترحن ويا سداد
رهف ... بس راح نشيل منا ومن باجر نطلع يعني سداد شيجيبة علينة واحنة وراكم
فاضل ... جا واذا ورانة لا تخافين سداد يجي عليجن ياخذجن ويجيبجن
واذا مو سداد اودي حمودي وما يصير خاطرج الا طيب
وكليلنة هذا المسربت ياهو؟
رهف ... ما عرفة واحد مهتلف يكض الدرب للطالبات وانه خايفة منه
فاضل ... كولي لسداد علي اذا شفتو بالدرب خلي يضبة
هوا شسوالج
رهف ... عمو يشمرلي حجي
فاضل ... شمرو راسة بعيد عن جسمة كون الناقص
من تشوفينة احجي لسداد وخلي يأدبة
رهف ... ان شاءالله عمي
من رخصتك تصبح ع خير
فاضل ... اجمعين ..
كمت من مكاني دا امشي صاح رهف انتي متأكدة راضية بأبن خالج
درت وجهي علي و كتلة ... اي موافقة عمو هز راسة
مشيت عمة نجوى واكفة يم الباب تباوع وتسمعنة اجتازيتهة وطلعت
اول ما فتت للغرفة باوعت لدرة كاعدة وتقضم بأظافرهة تخصرت وكتلهة بغضب ... ولج هذا ليث الأغم يحجي صدك لو يشاقة
... هوا يعني .. مادري .. يمكن
... وشنو. اليمكن ولج درة هية لو اي لو لا
دارت وجهة بعدم موبالاة وكالت ... اي صدك و شنو يعني مابيهة شي لا عيب ولا حرام الله القى حب خالج بگلبي
دمغتهة ع راسهة ... درة عيب هسة من يدرون شنو يكولون عليج ترة والله واكفة انه هسة مصدومة ومجاي اكدر اصدك يطلع منج هيج
يمتة حبيتي
درة ... ورة مااا حبني هواااا
شهكت و لطمت ع صدري ... الصلافة تبدي منه خالي هلو هلو وهوا نسوي روحة براسي شريف الدين البصري
درة ... هذا يهو ؟ حجتهة وضحكت
رجعت دمغتهة ع راسهة وكتلهة ... انتم مخابيل ترة عيب الي تسوونة والله عيب
درة ... خالج هوا حبني شسوي انه شبيدي كلبي مو الي وكلش رهيف بس شفتة تسرسحت بدون نعال
رجعت دمغتهة اكثر من مرة صاحت بتولول اوي اوي اوي راسي رهف انتي ما راح تحسين لأن ما تعرفين معنى الحب الحقيقي
رفعت طرف حاجبي مستائة و تخصرت الهة ... شلونه بله معنى الحب الحقيقي
جرت نفس وابتسمت اساريرهة و همست ... من ينقهر هوا و گلبچ هوا اليوجعچ هذا الحب الحقيقي
رهف ... يعني اذا هسة خالي حر انقهرررر انتي كلبج يوجعج
هزت راسهة ... اي من ينقهر هوا انه كلبي يوجعني بدالة
واذا خنكتة عبرتة عيني التدمع
صفكت ايديني و غميتهة ... ورطتي روحج وخالي وطبكم حمس شنو تالية هذا العشق العقيم
درة ... مرة كضني عمي فاضل احجي ويا نسيتي من شفتينة جوة الدرج شبيج وكلج تبجي ع مبايل
جذب هوا كلي كسري مدري شنو غايتة من خلاني انه اكسرة بايدي اظن هذا الزلمة خبل
شهكت مصدومة وغطيت شفايفي بأطراف اصابعي ... لا تجذبين
درة ... مجذبة عليج قبل ... رمقتني بطرف عينهة
رهف ... سولفيلي شلون كضج تحجين ويا لو شلون
كعدت يمهة وبدأت تقص عليه الي صار كلة وانه اشهك بصدمة و اكللهة عزة وطين راح يوكفلج سجينة خاصرة ما دام حجة ع خالي حر هيج
رفعت ايدهة بعدم مبالاة وكالت ... شنو بكيفة القرار الأول والاخير الي انه صاحبة الشأن لا تنسين
نمنة بيومهة بعد نقاش طويل ، و انتقلنة لبيتنة الجديد ويا امنه بغرفة خاصة تجمعني انه ودرة بداخل بيتنة الجديد
وتحت جناح امنة
درة ... اول خطوا الي بهذا البيت صار اجمل وابهى من التقت نظراتي المتلهفة و نظرات عيونة الي يحاول يخليهة تكون جافة
حتى ميحسون ما يدري العشك مفضوح
واليحب من صدك
عيونة فاضحتة
انه لو مر بخيالي اسافر العالم ثاني
ما بالكم اذا صار گبالي
احس روحي فراشة ربيع فردت جنحانهة و حلقت ترتشف من عشقة رحيق الغرام
و تنثر ع عيونة عبير الأمان
هوا مرة گلي " انه مثل الطفل المتشرد جنت راح اموت بدون مؤى وأمان لو ما لاگي گلبچ "
ينطيني الهام و يخليني اعشقة بشغف
وانطي الأن الي ينشدة من گلبي
ابتسمت و هوا بادلني الابتسامة ما جنة ابتسم جن فنانة يرسم لوحة بأبهى الوان الطبيعة
خلاني ادوخ بملامحة وهوا مبتسم ..
رافع ردن تيشيرتة وبارز ساعد ايدة ، الي مزينتة ساعة ذهبية ويشد بالكهرباء
هوا ليش الي نحبة نشوفة اجمل انسان ؟ معقولة الحب يخلينة نعشق المحبوب بغض النظر عن كل عيوبة
رهف باوعتلي بنص عين وضلت تباوع الي واله وهوا يباوع للكهرباء ويرجع يباوعلي القينة السلام وبعد ما سلمنة رهف انسحبت ليجوة بهدوء و انه كتلة بصوت خافت
... عينك ع شغلك لا تلزمك الكهرباء
حر ... امانه الله هية لزمتني من فتي ما جنج حاطة رجلج بعتبة البيت عبالك حاطتهة بنص كلبي وفززتي كل ذرة عشك بداخلي
درة ...هههههههه غزلك مال مخابيل بس ميخالف وما الجنون الا للعاشقين
حر ... لا انه مجنونچ چعب كلبي ولا على المجنون حرج
حر ... تنهدت شفتهة فاتت لجوة عافتني انجوي بنار اللهفة الحارقة و الشوق الي حاصرني لأخذهة الحضني وارتشاف رحيق شفايفهة المزينة بلون حمرة وردية ..
و استنشاق عطر الليل الحالك الي نال شرف تقبيل عنقها قبل شفايفي ..
بعدهة قطع سلسله مخيلتي و احلامية المتوجة بدرة صوت عالي من برة البيت ..
عفت الشغل البيدي و طلعت شفت الجيران يتعاركون وبيناتهم مشدات كلامية و قذف بالكلام و باقي الجيران يحاولون يتدخلون ويفاككون بينهم ..
حد ما وصلت للطعن الرجل الي لابس دشداشة سودة كال لأبو البنطلون
"اخو لك** روح كض خواتك **** "
ثارت براكين الرجل ابو البنطلون الي عرفت اسمة امجد من خلال كلامهم ويا وصياحهم علي بمحاولة يهدونة ، وتفجرت و هجم ع ابو الدشداشة وضربة بشيء بعينة خلا الدم ينفض من عينة مثل الحنفية ..
استغربت ، اسلوب ابو الدشداشة الدنيء وتصرف ابو البنطلون ، جان ممكن يكسرلة ايد لو رجل مو يقلع عينة
العين اذا راحت مايجي مكانهة شي ولا ترجع مثل ما كانت ..
بالاخير كلشي يطلع بساعة العصبية ، حطو ابو الدشداشة بالسيارة وسحبو امجد للبيت
رفعت حواجبي وقوست شفايفي بعدم رضا
شلون اامن ع وعد والبنات هنانة ..
درت وجهي شفت كاتي مادة راسهة من الباب وحاطة الشال ع راسهة بأهمال وخصلات شعرهة الأصفر نازلات من مقدمة راسهة ..
قطبت حواجبي ومشيت سريع شافتني وكفت استقامت عضيت اصبع السبابة و كتلهة بغضب
... ليش مادة راسج من الباب ادري شنو كلولج فيلم سينمائي اكشن من بطولة سلمان خان
كاتي ... هر شبيش ردت اشوف ليش يتعاركن
... مالج غرض بالوادم عسما يتذابحون عيب بابا عيب ما يكولون هاي اجنبية واصلهة مو مسملة ولا محجبة لا كببل يكولوون عراقية وصابغة عطوبهة صفر تكول قرقوز
مشت وياي للبيت وتباوعلي ببرائة
... بس هوا انا ما يدري هنة يكولن هيش ، شلهن غرض هنة
حر ... هههههه شيفهمج هذولي بعركتهم طعن اعراض وخاف يجي يوم ويحجون ع عرض هذا البيت بس لأن مديتي راسج من هذا الباب
... انا ما يفتهم ليش تكولين عليه هيش هر انه ما يفتهم؟ تحجي بعتب
حر ... لا بوية انتي عقلج يوزن بلد
بعد تعب وشغل طويل بهذا البيت وعد صاحت "عوفو الشغل حطيتلكم غدة بالديوانية تعالو"
عفت الشغل والنقل من ايدي وغسلت ايديني دخلت محد تربعت براس السفرة ورفعت رداني وصحت
... وينجن يله نريد ناكل جوعانين لو هسة متزوج جا مرتي غدتني من 11
فاتت درة تمسح بأيديهة كالت ... لو هسة مرتك هنا جا دفناهة بالحديقة
وكف الهوى بريتي لا يرضى يطلع ولا اكدر اجر نفس ثاني ، حسيت بحجايتهة ضغطت ع انفاسي
وشي تجمع بصدري وضك نفسي
شايفين من تخنكم العبرة بس ماكو بعينكم دمعة تنزل وتبرد هذا الگلب الموجر؟
شايفين من يشح عنكم الهوى ؟
هيج صار بية حتى لكمة ما اشتهيت اكل ، من غصب عليه علمود ما احسسهن اكلت لكمتين بس
بس غير احس الكمتين نزلن سم ابطني
حتى معدتي تحرگني ضلت ، وتحججت بالشغل وسرعان ما طلعت من البيت
وعد طلعت وراي قبل ما اطلع وكالت ... حتى ما شربناك جاي
حر ... ع جايات ان شاءالله ..
درة ... طلع حر وجهة مطعون اجهل السبب الي خلا يصير هيج بس هوا اكيد الشغل ويجوز مشاكل بالشغل ، انقهرت لأن ما سولفنة وما صارت فرصة
احس حتى الساعات تمر علينة مثل الثواني تركض ركض ومنلحك نشوف بعض لو نشبع من بعض ..
مر هذا اليوم والبعدة ، خربت خطبة رهف وصهيب صار بيهة عارض
وكل واحد يكول شكل اخير شي تم الرفض وكلشي تفركش
لكن الصدمة كانت بأتصال عمة نجوى ع مبايل أمي و عزيمتهة ع خطوبة سداد واصرارهة ان تجي بيوم الخطوبة الصبح و نتغدة يمهم ..
كان الخبر صدمة وزلزال نزل ع راس رهف الضلت ترجف مثل نبتة هشة وسط ريح كادت ان تقلعها من جذورها ..
عيونهة غوركت رأسن ونزلت راسهة ع كتاب بدون صوت ما اسمع بس حسراتهة ، الي لفتت انتباهي وما لفتت انتباه امي الي ما تحس بمشاعرنة ومشاكلنة ..رغم تحبنة
بس احسها من كبرت صارت ما تنتبه، لا لبحة صوتنة المتجرح من توالي الحسراات والشهكات ولا لرموشنة المتقرحة من ذرف الدمع ..
غيمة حزن مطرت ع كلبي قبل كلب رهف ، حزن لهذا الخبر السمعتة .. الي المفروض يكون سعيد
بلحظة حسيت نفسي عاذول مو من الاحباب ...
شمرت الكتاب وكامت بهمة تفتح الكنتور بمحاولة منهة حتى تختار فستان يطلعهة جميلة و تلبسة حتى تعلن للوجود انه اجمل من عروستة انه الي استاهلة مو هية ..
طلعت امي و هية ضلت تذب بكلامهة المحبوس بحنجرتهة ..
.... احنة مو يوميا نروح وياهم مادرينة شنو سووهة فجاة
درة ... مو يكولون اقضو حوائجكم بالكتمان اكيد ما حجو حد ما تمت السالفة وبعدين الخطوبة بعد يومين اكيد كلشي تم امس لو اليوم ..
رهف ... بس احنة مو غرب ويعزمونة المفروض ينطونة خبر احنة ما نروح بعزيمة ..
درة ... اووو هي ما كالت بالاتصال معزومين كالت خطوبة سداد بعد يومين تعالو من الصبح خية لا تضلون للعصر ادز واحد يجيبجن
رهف ... هاي عزيمة معناها وليش امي كلتلهة لا احنة نجي مشي البيت قريب
درة ... جا صدك هوا قريب
دارت وجهة الأصفر و خصمت عيونهة الحمر اثر خنكتهة وتجمع الدموع بتفكيررر
و كالت ... اي زين سوت ..
درة ... يولي ما يستاهلج المفروض يفهم ويحقق بالموضوع
رهف ... نسيتي هوا خطبج بهدف يثير غيرتي و يكلي مثل ما انتي بحضن اخوي، راح اخلي اختج بحضني
... لا مو غلس ع موضوع وهذا دليل ع ان كلامة مجرد يريد يثير غيرتج ويشب نارج
ويجوز حاجة عمي وكلة شوفلي غير مرة ..
رهف ... الله لا ينطي ولا يوفقة
... رهف حرام عليج خية دعائج بنحرج تحسبي ع ليث المطي سداد شكو
... شلبسسسس شنووو البسسس اريد ملابس جديدة
... لبسي ملابسج مال عرس هاني
.... لا شافوهن عليه اريد جديد
اكسر حصالتي واشتري ادري بأمي هسة تكول مشترين بيت من جديد ماعدنة فلوس
ركضت وكفت ع اطراف اصابعهة وطلعت الحصالة الضامتهة فوك بالكنتور و كمت انه محذرة ..
... نص الج ونص الي
... بس انه خليت بيهة عشرة زايدة
... اخذي عشرتج ما ميتة عليهة
جبنة سجين وكسرنه الحصالة بعد ما قفلنة الباب خوفا من امي لا تعترض وتكول مالهة داعي المصاريف الزايدة وخلنهة للعرس ..
فتحناها والفلوس طاحن منا ومنا كد ما متروسة .. بس كلة اللاف وخمسات مابيهة بس ثنين خمس وعشرينات ..
اخذنة كل وحدة خمس وعشرين ورتبنة الخمسات، طلعن 45 الف اخذت عشرة هية والنوب تقاسمنة الباقي ، ورتبنة الالاف و تقاسمناهن ... صار مبلغ زين
ورحنة نگينة ع امي حتى طكت مرارتهة اخير شي كالت اشوف خالجن حر شوكت ما يفرغ يجي ياخذنة للسوك ..
رهف ... خالي حر كللهة ع باجر ، انه شسويت اخذت مبايلهة بخلسة و طفرت بالحمام و قفلت الباب ..
طلعت رقم ليث و ضغطت اتصال، بداخلي براكين تفور وتريد تثور بس ما اعرف شنو مصبرني ..
دك دك وجاوب بألو
القيت السلام ورد بعدهة كال متسائل ... رهف؟
رهف ... اي رهف شمسرع نسيت صوتي
... هوا لو ناسي صوتج ما مها حد هسة زعلانة عند اهلهة
... المهم ردتك بشغلة
... عيوني الج
... كول تم وتدللين وانفذهة وعد بالأول
... غير اعرف شنو هية يجوز صعبة شلون بله
رديت بدلال ... اكو شي يصعب عليك؟ لو شي اطلبة وما تنفذة اليه
رد بعزم ... اكيد لا انتي تأمرين امر
رهف ... اوكي اليوم العصر تعال اخذني للسوك اريد اشتري ملابس لخطوبة سداد
...انتي؟
... اقنع درة وامي يرحن ويانة تعاال
... بس غريبة منج هاي الشغلة بصراحة
... اذا ما تريد ما باللازم براحتك بس عود انه كلت ابن عمي و كلبه يمي ومن اطلب منه شي ما يكول لا حجيت بغيض
رد بسرعة ... لا لا ما كلت لا اجي اجي بس استغربت تغيرج المفاجئ عليه
رهف ... هههههههههعععه مو انه كلت شلي بواحد مطي مثل اخوك ما يفتهم شي ، المستقتل عليه احسن
... وراج شي بس تبين بعدين الظهر اجي السوك بعيد هم ياله نوصل وتتسوكون ..
.... لا بطلت لا تجي ما اروح وياك
... نجبي لج ليش بطلتي شنو تلعبين عليه
... لا دام تكول وراج شي لا تجي ولا تحجي وياي بعد باجر اروح ويا خالي حر
... لا رهف الظهر اجي واشوفج لبسي وردي بربج
... ومنو حضرتك علمود تكول لبسي وردي رجلي لو حبيبي روح باي باي هوا مو صوجك صوجي انه القررت افتح صفحة وياك ..
... عمي يا كلمة ردي المكانج منين تطفين انتي سديت الخط بوجهة، وايديني ترجف
انه مو هيج وهذا مو ثوبي
ولا هاي تصرفاتي
معقولة اكو شي بداخلي دفعني اتصرف ويا بهذا البطش والمكر ..
انه صح وكحة بس مو لهذا الحد !
اكو شي بداخلي يكلي اخذي وكسري سداد مثل ما كسرج قهري سداد اكثر لأن ما سمعچ
خابر سديتة بوجهة ، وكتبتلة رسالة راح انطي المبايل الأمي لا تخابر
مسحتهة وطلعت انطيتة الهة، و هوا شوية دك وهية جاوبتة اخذ وعطة بالسلام اخير شي كالتلة
لا عمة مشكور حر باجر ياخذنة للسوك مشكور بعد كلبي ما تقصر
ضلت تتشكر منه و مبين هوا يحاول يقنعهة ياخذنة اخير شي تشكرت منه وكالتلة صار بالثنتين جاهزين تلكانة ..
ضليت اكمز واصيح ... مو كلتي خالي حر ياخذنة
سدت الخط وغمتي
... ترديني اردة وهوا احرجني احسن ما يجي حر علينة مناك لهنا و بعدين يرجعنة ويرجع للبيت
عاد هذا بيتهم يمنة
... اوووووووووو
عفتهة و فتت للغرفة، اداري دموعي و اسمع خططهة للعصر
ما تشترن شي مصلخ، ما تشترن فستان اغلى من 50 الف
همزين جوة ايدي 100 اطلعهة
اشتري بيهة لبسة الي ولبسة لترف والباقي اچملجن بي خاف تنقصن ..
صار العصر ورفضت رفض قاطع ما اروح وانطيت فلوسي لدرة كتلهة ع ذوقج وقياسي تعرفي ..
و امي وصتني اقفل الباب وما افتح الاحد وعافت فونهة يمي اخابر بي اذا صار شي ..
طلعو ورة دقايق دز
"الفوصة انه اعلمج جاي علمودج وتطكيني بوري"
ما رديت علي متعمدة، ما اعرف اسباب الي داسوي بس اعرف هذا كلة نابع من حقدي ع ليث اريد اشلع كلبة ..
وانة منتظرة دز رسالة ... اختاريتلج فستان ع ذوقي اتمنه اشوفج لابستة بس مو بخطوبة سداد لان شبه عاري
اجن بعد المغرب، و شفت الفستان جان شكلة حلو درة حجت من ورة خشمهة ... هذا ذوق ليث يكول الامي حلو و هاي اختيارات هذا الجيل
... هوا حلو بس مو مستور
بعد ما امي ذبت روحهة من التعب و ترف تلبس بملابسهة تجربهن
الملعونة صايرة تكول عمرها 15 سنة ما جنهة 12 ..
سحبت درة للغرفة وكتلهة بهمس هوا شمدري المبايل عندي
... امي كلتلة عفت المبايل عند العنيدة خاف يصير عليهة شي
المهم، بيوم الخطوبة الصبح لبست احلى شي عندي، مو حتى اكسب اعجاب ليث بمظهري
لا حتى اثير غيرة سداد
لان ليث هوا وقندرتي ..
و لبست شالي مثل قبل ، رفعت مقدمة شعري بف وحطيت الشال بأهمال ويا مجموعة اكسسوارات ومكياج خفيف و عدسات قلبًا شكلي 180 درجة
وزادني جمال فوك جمالي و تمييز فوك تمييزي
طلعت كبال امي فكت حلكهة و كالت بلغة تهديد ... اذا شافج واحد من ولد عمامج ورادج اكضج واذبحج وخصوصا ولد ابو بارق ..
رهف ... محد يريدني لا تخافين ، يلة نروح
مشيت و عيون درة الفاتحة حلكهة تترقبني كتلهة بغضب ... راح يفوت بريعصي بحلكح شدعواج هيج فاتحتة
احسهة مصدومة لان المفروض اليوم الطم ، لحكتني و همست اخر الحب جنون ..
طلعنة من البيت، امي تقفل الباب و عيون بعض الشباب المتجمعين يم باب المحل مال ابو عون تراقبنة او بالأحرى تراقبني بأعجاب
مو غرور مني بس انه فعلا ممييزة و مكياجي والعدسات زادني جمال وتمييز ..
و اخذتنة امي مشي و تحجي عليه العالم كلهة تباوعلج لو ضالة ع طبيعتج احسن هسة شيكولون عمامج عليج انه شمالني ما خليتج تغسلين
... كل بناتهم يتمكيجن شنو يم رهف و وكفت وبعدين مكياجي خفيف كلش بس انه حلوة شسوي ..
... ضمي شعرج
تنهدت و قربت الشال من مقدمة شعري كلش و درة اشرفت ع شكلي بعد ما حلفتهة بروح ابوي اذا حلوة صدك لو خرب شكلي ..
بس اكدتلي ان اني حلوة وصرت احلى من قربت الشال و ضميت الجزء الطالع من شعري و ضل شالي محطوط بأهمال ع شعري ..
وصلنة و عرفت راح اثير غيرتة و اشعل نارة، يتراووالي شفت النار طفرت من عيونة و كفر كدامنة صاح ع اولاد عمامنة وخوالة ... سووو طريق شباب سوو طريق
كتلة بكلبي ... عسا نار كلبي تحرگك سداد ..
التفتت باوعلي بنظرة غضب وكأن يكلي ... بعدج بكلبي لا تدوسينة ..
تجاهتلة متعمدة مو برضاتي لأن مو من عوايدي اتجاهل نظراتة ..
و شفنة ليث تقرب سلم ع امي وسلم علية ضحكت و ضليت اخذ وانطي ويا بالسلام كلة علمود احرك سداد و اخلي رماد منثور مثل ما سووة بية
لا فهمني ولا انطاني فرصة و جرحني كلش
استغربت من شفت مها و سلمت عليهة بعدهة سالتهة شوكت رجعتي
... البارحة عيالي رجعوني و قبلت ارجع بعد ما توسلو بية كلت زحمة و رجعت ..
... الله يهدي سركم حبيبتي
مشت الساعات ، شفت لوعة سداد الي يفوت يصيح ويطلع يصيح والله لوعتة جاست كلبي و حركتة
مرت الساعات و خلصنة غدا فتنة يم فلك نبدل بفساتينة بعد ما خلينة طنون من المكياج تضامنن ويا الموضة الدارجة بهاي الفترة ..
جان فستاني حلو ، والله ذوقك حلو يا ليث، طلعت من يمهن وانه اعدل شعري و اصعد فوك بحجة اروح اشوف مها وما ادري بليث فوك ، بس انه ادري و من خلصت تبديل سمعتة يسولف ويضحك و صعد ..بينما مها جوة ...
جنت حاطة الشال وخافي شي بسيط من ظهري و اكتافي الي مطلعهن الفستان ..
دكيت الباب دكة و فتحة هوا الي تفاجئ من شافني و رفع طرف حاجبة، باوعلي من فوك ليجوة بنظرة اعجاب يصاحبهة الغضب من عنادي و كسر كلمتة ..
حجيت برهاوة ... ويييين مهاا اريييد حُمرررة منهة ..
رمش بعيونة و همس بغضب ... روحي بدلي فستانج لا اكسر راسج
... عفوا و بصفتك منو و شنو تطلب مني ابدل
ليث ... لا تصيرين عنيدة و روحي بدلي ما اريد اشوفج بي و اخذي مبايل امج حتى احجي بي وياج
هزيت راسي بالرفض وسويتلة حركة رفض بشفايفي
باوع ليفوك كال صاعد للسطح لحكيني لا يجي احد
ما رديت تخطاني و صعد فتت لغرفتة عدلت روحي ع مراية و تاكدت ان جمالي ما اختفة و بعدني جميلة و نزلت الشال عن اكتافي ..
و صعدت ورة بس صرت بالسطح سد الباب من برة و كال بغضب
... ولج انتي شلون تعانديني وتلبسينة وانه كتلج ما اريدج تلبسينة هاااا حجاها وهوا يكعد ع كرسي بالسطح ويحط ايدة ع ركبتة بغضب ..هز رجلة و حجيت برهاوة استفز غضبة وانة احط ايدي فوك رجلة التهتز من الغضب ..
... بس انه اريد اكون اجمل الموجودات
... جاي تستفزيني و تشبين نار الشيطان الكاعد براسي اصلا الفستان طالع مدري شلونة عليج ، تنهد وكال ...انتي شلون تسوين هيج انه من اختاريتلج هذا الثوب مو كتلج ماريدج تلبسينة بخطوبة سداد ..
ذبيت شعري ليورة و شلت ايدة من ع رجلة و كعدت عليهة لفيت ايدي حول ركبتة و همست يم أذنة
_ يعني شنو موحلوة ؟
_ لا اتطيحين الطير الطاير من سماا ماريد احد يشوفج بهذا اللبس غيري روحي نزعي لبسي شي ثاني وتعاي اشوفج
سويتلة بحلكي حركة رفض عقد حاجبة بغضب وكض ايدي قوي ضغطهة
_ ليش تعانديني
_ لأن احب اشوفك عصبي ونار الغيرة تطلع من عيونك
غمض عيونة متأثر بقربي و تنهد وضل مغمض عيونة
حطيت ايدي ع وجهة وبستة بخدة برهاوة
همست بصوت ضعيف _لخاطر عيونك راح ابدل
ليث ... انتي وراج شي
رهف ... رجعنة؟
ليث ... اي رجعنة تغيرج غريب انكلبتي بسرعة خيالية
مو صوجك صوجي عفتة و كمت من ع رجلة و حجيت بغضب ... اصلا بعد ما احجي وياك
لفتتني محاولة فتح الباب و التفتتنة ثنيناتنة من اندك الباب مال السطح واجة صوت ... منو بالسطح فتحو البااااب ......
