 |
رواية ليلة الحنة الفصل الخامس والعشرون بقلم بسمة البياتي
أقسى أنواع الحب هو الحب من طرف وأحد
شعور صعب وقاتل من تحب شخص من الأساس أنت مو بعينه حتى النظرة العابرة يستكثرها عليك
ااااخ يا گلبي شبيك دومك تمشي عكس وياي شنو الشفتة من أمجد حتى تحبه
مو هذا نفسه أمجد الي جنت اتقبل الموت وما أتقبله مو هو نفسه الي جنت أضحك على لمى
وأحجي عليها لان حبتة
مو هو نفسه بيوم عرسنا نزلت يم رجله حتى يعوفني ومايقترب مني شنو التغير
ليشش الهدرجة مشاعري رخيصة عندي دائماً تركض وره الشخص الغلط
لمى زعلانة كم مرة أجه زوجها وعيالها يرجعوها متقبل ترجع خالة شگد حجت شگد نصحت ماكو فائدة
أبوها من بعيد مفرفح اخير شي گاللها اذا مناوية ترجعين امشي ابقي بيت عمتج لا تقين اهنا
خالة حاجتة وبعد انسد الموضوع
شگد متعذبة وشگد تعبانة والغيرة ماكلتني لكن أبد ماضعف احتفظت بـ مشاعري النفسي وبس
من سابع المستحيلات أبينله حبي لو أعرف أبقى عمري كله هيج ما راح أذل نفسي وأخلي يعرف بحبي راح أبقي حبي بيني وبين نفسي الى إن الله يفرجها عليه ويطلعة من گلبي
واذا نجي للواقع هو منين راح يعرف اشو لا يباوع بوجهي ولا معبرني مايحاجيني غير بوقت المصايب او الأمور الضرورية
بداخلي حسدت لمى أي حسدتها شنو من حب يحبها عيونه ماتشوف غيرها وگلبه مقفول عليها
بعدت وتزوجت وحبها بگلبه ماتغير وما اعتقد راح يتغير هي عايشة بروحه ومحتلة كيانه
ليال_ وين صافنة؟
_هاا لا ما صافنة جاي أدرس
_ عليه ولج صارلي ساعة عيني عليج غرگانة وبعالم ثاني وهاي الصفنات والحسرات ورأهن سالفة كبيرة
_يووو ليال لاتسووين من الماكو اكو
_ماشي راح اتركج براحتج بس أذكري كلامي مصيري أعرف شنو الديصير وياج
ولو أعتقد عرفت شنو موضوعج وسبب تعاستج
_ياموضوع؟!
_ماكو شي سلامتج كلشي بوقتة حلو
_سكتت وهي هم سكتت معقولة عرفت البيه
لا ياربي الهدرجة مبين عليه
ليال_اگص أيدي اذا ما تطلع زلال واگعة بالحب ويا خوفي التحبه أمجد
صح بالبداية جنت أشجعها عليه لكن بمرور الوقت تأكدت أمجد ميفيدها لا هو الراح ينسى لمى ولا لمى راح تنساه وموبعيد تطلگ وتأخذة
حبيت اجس نبض لمى عصرية أخذتها وصعدنا للطابق الثاني الغرفة رغد
لمى_هااا يولي شو جبتيني اهنا
_احسن جوة هوسة صارلنة هواي ممدردشين
يلا بسرعة سولفيلي
_شسولف!؟
_ليش تريدين تطلگين من فارس؟ ترى ماتعبر عليه مال مشكلة بينكم ومد أيده عليج
الولد ابن اوادم ومحترم وبعيني دأشوف شلون ظهرة مكسور يومية جاي يريد يراضيج والتلفون مايسكت من الأتصالات
_ولأن خوش ولد ما أريد ابقى ويا ليال اني ما استاهل فارس شنو ذنبه يعيش ويا وحده دتخونة بمشاعرها والله حاولت احبه واتقبله مجاي أگدر تعبت بالقرآن تعبت لا عبالج عاحبتني عيشتي تأنيب الضمير موتني
-هاا وبرأيج الطلاق هو الحل؟!
-شسوي ماعندي حل ثاني
_زين فرضاً اطلگتي شراح تسوين ترجعين الأمجد؟
_تدرين مرات افكر اگول اي اطلگ وأرجع الحبيبي
جربت اعيش ويا غيره وفشلت واني متأكدة هو لهسه يحبني عيونه فاضحاتة قبل زواجي مجنت اصدك زواجه من زلال ورق وبس
بعد فوات الأوان يلا تأكدت
حاولت أبعد هاي الأفكار من رأسي اگول شجاي أخربط مو هو هذا أمجد الي تخلى عني
وگدام الدنيا كلها أخذ بنت خالتي والغريب والقريب عبالهم عايشين سوه وزواجهم كامل
لا كرامتي ولا عزة نفسي تسمح انسى بيوم الباعني وفضلها عليه
_ (الحد متعرف أمجد شايل بگلبه بسبب كلامها ولا تعرف سوالف أبوها ذابة كل اللوم عليه)
_هااا وين صفنتي
_لمى الحد الأن دتحجين عن نفسج وبس كأنما القرار ألج وحدج لغيتي وجود امجد وزلال
عبالك الي تفصلي راح ينلبس وكلشي يمشي مثل ما أنتي مخططه
تعتقدين امجد اذا اطلقتي راح يرجع يأخذج؟
نصت رأسها ونزلن دموعها هزت رأسها بمعنى لا
لمى جاوبيني لاتحاجيني بالأشارات أمجد راح يتقبلج وأنتي جنتي ويا غيره
_بشهكة لا
أعرف نفسه عزيزة وغيور لكن اذا حبه الي اقوى من كلشي وممكن يتخطىئ اخطائي مثل ما اني راح اتخطئ خيانتة الي حتى ننجمع سوه
_شوفي ما أريدج تتأملين وتهجمين بيتج علمود افتراضات ترى مو كل مرة تحصلين نفس القسمة فرضاً اطلقتي وامجد ماگدر يتقبلج
راح تبقين تتحسرين على فارس وأيامه لان اني وأنتي ندري أبوج ما راح يتركج بحالج وهم يشوفلج واحد ينطيج اله والله اليعلم شلون راح يطلع
مثل مگلتي امجد غيور ونحس والله بعيني اشوف تحكمة بزلال رغم ماتربطهم مشاعر حب لكن خانگها
اقل غلطة منها يلعب بيها طوبة وأكثر من مرة حتى ضرب ضاربها
لمى مسحت دموعها گالت هسه عقلي متشوش
خلي افكر براحتي واقرر
تركتها براحتها ولو أدري تفكيرها راح يظل مثل ماهو لان صوت قلبها متغلب على صوت عقلها
زلال_اليوم جمعة باليل أجت وصال گالت باجر
أخو خالة كوثر وعائلتة معزومين يمنا ويمكن خالتهم تجي
من الليل شلت هم ما أريد أروح وأشوفة داحاول بكل طاقتي أبتعد عنه بلكي اگدر اطلع هالحب
الي ما اله أمل من گلبي
اني متعودة من تصير عدهم عزيمة او يجيهم أحد لأزم أروح أظل اهناك أمثل دور الزوجة السعيدة
ثاني يوم وره الريوگ رحنا اني وليال لان وصال طلبت منها تساعدها بالطبخ
رحنا اهناك خالي والولد مموجودين البنات بلشن بالطبخ واني وريم نظفنا البيت
خالة كلش متغيرة عليه حتى كلام متوجهلي
وهالشي جداً حاز بنفسي احبها وحاسبتها
خالتي مو مرة خالي ممتعودة على برودها
كملت التنظيف ورجعت ويم البنات بالمطبخ
فات أمجد جايب فواكه وطرشي وصمون
خلاهن على الكاونتر
والله حتى ما اندار للجهة الأني بيها
گلبي ديتگطع والمصيبة لأزم اتحمل واسكت
أسمعة شلون يتشاقى ويا ريم
ادري باليال تحس بيه لهذا تحاول تلهيني گالت گلي الشعرية
كمية كبيرة خليتها بالجدر وظليت اگلي بيها
كملتها درتلها مي وملح وعفتها أمجد راح يبدل
فاتوا خالو ووليد
خالي نفس طبع بابا الله يرحمه وحده وره الثانية وبوسنا من رأسنا وسأل عن احاولنة واذا محتاجين شي
بعدها طلعوا من المطبخ
رحت داشوف الشعرية شو هاي جلحة ومنظرها يسد النفس
اگلج ليال أشو الشعرية مدري شلونها
ليال_شنو شبيها شو وخري
لج زلال هاي شمسويتلها
_يمعودة شمسوية مبينا عادية تخرب بسرعة
اشو هاي من ضاگتها رفعت حاجبها سألتني بشك
_شگد خليتي زيت من گليتها؟
_وجهي خبط الوان أحمر واخضر وأصفر
هاا
_شنو هاا
_ريم وگفت بالنص تفرفر بعيونها
بلعت ريگ يعني يمكن مو أكيد گليتها بدون دهن
وصال جانت ملتهية من سمعتني اندارت
وصال_عزززززا زلال ششعرية مادبرتيها
ليال_وين عقلج من اگلج سالفتج مو خالية تضوجين
_دكافي داگلكم نسيت جل من لا يخطئ
ريم_زلوووولة گلت الشعرية بدون دهن وهلا وهلا وهلا
_سديت حلگها بيدي اششش والله اذا حجيتي اگص لسانج واذبه للبزون
دفعت أيدي
_شتنطيني حتى أسكت
_نعال أبو الأصبع بنت أبوج وأحجي
_هااا والله فلا أسكت
_ليال حارت بالشعرية ووصال رجعت انخبصت
واني لزمة ام لسان أريد اسكتها
طگت روحي منها كاااااافي لا تخليني أسبج وأسب عمج
_قصدج عمي أمجد موو الا اگله
عموووووو أمجد
ثواني وفات عتريس
امجد_ششكو
ريم_عمو تقبل زلولة تضربني
_الخطار على جية وصوتكم طالع للشارع
شنو جهال رررريم اذا بعد سمعت صوتج
لاتلومين الا نفسج
ريم_اني ششعليه هي گلت الشعرية بدون دهن وتعصبت عليه
_شگد حقيرة فضحتني أمجد ما حجة عافنة وراح
ريم من خوفها انهزمت من المطبخ
أجوي الخطار ما شاء الله كومة
خالهم وولده وبناتة واحفادة
وره شوية أجت خالتهم هم
اجني بناتهم ويانة ساعدنا بالصب والتقديم لا اني ولا ليال ما گعدنا وياهم شگد صاحونة ما رحنا
ما ادري ليش حسيت اقارب خالة يعرفون نوع علاقتي بأمجد نظراتهم وتبسمرهم الي دليل على هالشي طنشتهم والتهيت بغسل المواعين
جيب هذا وودي ذاك للعصر يلا راحوا متنا تعب
المشكلة خالتهم لاطشة
رحنا گعدنا وياهم النسوان بالهول وزوج خالتهم وولدها بالأستقبال
بالبداية سوالف عادية الى إن خالتهم فجرتلي القنبلة
أم تيسير _ زلال عندي حجاية وياج ادري بكوثر تخجل وماتگدر تحجيها وضامة ضيمها بگلبها
_اي تفضلي أسمعج
_يمه خلي نحجي بدون خجل اني ادري زواجج ويا أمجد لهسه مامتممينا
زين لشوكت تظلون هيج العمر جاي يركض
امجد مو صغير الأصغر منه صاروا اباء،
انتي هسه طالبة كلية وباجر عگبة تتخرجين ويمكن بساعتها تشوفين شخص يناسبج وتجين تطلبين الطلاگ حتى تأخذي وبهاي العمعمة كلها أمجد هو الخسران
_زين هسه اني شنو المطلوب مني؟!
_انفصلوا وفضوها فكري بمرت خالج
ما اعتقد قصرت وياج بشي رادتج وانتي ماتقبلتي أبنها ما اعتقد بعد عليها قصور
كوثر أم خسرت واحد وانحرمت من شوفتة علمودج وهذا الثاني حياتة واگفة وهم الخاطر عيونج
وصال_هاااا هسسسسه صار الصوج بيها والغلط منها وهذاك الناقص عديم الغيرة مابي ذنب ووامه انحرمت منه ظلم
كوثر _على كيفج يوم سعاد مو هذا قصدها
زلال_ وصال فدوة العمرج سكتي خلي تكمل اني عاجبني أسمعها للأخير
باوعتها بتوسل رغم صايرة بركان سكتت ما حجت
أي خالة كملي
سعاد_ماحجيت شي غلط يستوجب الصياح
ندري أركان غلط بحقج ومحد بينا راضي بالسواه
والغلط اخو صلحة والحمدلله الأمور رجعت المجاريها
كوثر أم وگلبها مفرفح على أبنها وتتمنى تشوفة
ومن الأساس هذا مو موضوعنا
يابنتي مارايدتة وهو مارايدج عليش باقين لهسه اطلگوا وفضوها
امجد لگينالة بنية نريد نزوجة
_صارلي ساعة افور على اعصابي متحملتها بس من گالت لگينالة مرة انطعنت بنص گلبي دعيت بكل جوارحي مايبين عليه قهري وغيرتي
وصال _هاا هذا طلع مربط الفرس لاگيلة مرة ومدستريها بينكم وهسه حاطين زلال بالنص وواگعيلها دك بالحجي
اي يمه منو هاي الصارلكم ساعة خابصينا علمودها
كوثر_ أسماء حفيدة ساجد
_تحجين صدك بنت أبن اخوج وينها وين أمجد
كل عمرها مايجاوز الـ ١٥ سنة وامجد عنده علم بالموضوع زين أهلها ششلون ينطوها بهذا العمر وجمالة الواحد اكبر منها
سعاد_ وشبي امجد الف من تتمناه اذا اخذتة راح تدلل وأهلها يحبونه ويحبون كوثر متأكدة يگولوله گبع وأخذ
هاا زلال ليش ساكتة بنتي اذا اطلگتوا أنتي هم ترتاحين بدال ما ظالة جوة إيده لا تگدرين تطلعين ولا اطبين براحتج
وهو المسكين يصرف وينگل ومامحصل شي
كوثر _يااا سسعاد شدتحجين
وصال_ليش دتسكتيها خليها تحجين قابل هي منين جايبة هالكلام اذا ما احد ناقلة الها
زلال_وهووو منو الرايد منه فلس أحمر من حياة بابا مجان يقبل يصرف عليه وهو وخالي بالمعارك يخلون المصرف ويطلعون ترى ماميتة من جوعي ولا باقية بدون هدوم أهلي مكفيين وموفين
اما بالنسبة الزواجي منه هذا انتوا وذاك امجد روحوا احجوا هالحجي اله مو الي ترى العصمة بيده مو بيدي لا جابرتة يبقى وياي ولا كاتلة روحي عليه
سسعاد_ احترمي الأكبر منج ولاتعلين صوتج
_غير بالأول الأكبر مني تحترم نفسها حتى احترمها
_ششنو قصدج ولج
_قصدي واضح أساساً أنتي ششدخلج ششحامي حمامج اطلگ ابقى منو انتي وگاعدة تحاسبيني
_شششگد وكحة وبرعة هيييي هاي الخبصتي نفسج عليها حتى تصير جنتج والله لو وحدة من جنايني اهججها باليلة ظلمة
.
كوثر_كافييي استهدوا بالله يمه زلال عيب هالحجي سسعاد مو بگدج
زلال_اذا هامها عمرها ومكانتها مجان ادخلت بشي ميخصها هه لو جنت وحده من جناتها تهججني اي فعلاً اني مو وحده من جناينج الشبعات ادمغ والله ثم والله خالة واگفة بعيني
لهذا راح اسسكت
وتريدون اطلگ حاجوا امجد مفهوووووم
خليت وحده صافنة بوجه الللخ كمت طلعت أسمع سسعاد تعد وتصف وخالة كوثر تسكتها ووصال تتعارك وياها
رجعت للبيت ميتة ما باوعت بوجه احد على السريع فتت للغرفة ذبيت روحي بفراشي وششبعت بجي أجتي ليال وراها فاتت خالة فردوس ولمى
فردوس_ششبيها زلال خوما تعاركت ويا الخبل
ليال_لا مو ويا أمجد
سعاد اخت خالة كوثر سمعتها كلام يسم البدن
_ششحجت؟
_زلال منتهية من البجي حجيت الخالة تخبلت رادت تهد عليهن
لزمتها لا عوفيها زلال ووصال ماقصرن بيها
زلال _بشهكة لاتروحين خلي تولي الي غثني تحاسبني على المصروف الينطينيا خالة بالقرآن مارايده منه ودوم ارفض بس هو يصير اعصاب
بالگوة ينطينياهن
_ليششش مقهورة غصباً عليه يصرف عليج
لعد بس يعرف يحاسبج على الصغيرة والكبيرة
لاتروحين لاتجين لاتلبسين
زلال_ باوعت بتجاه لمى وحجيت بس يجي اگله يطلگني وخلي يروح يأخذ بنت أبن خالة خابصيني بهالزواجة الكشرة عبالك شششوف مأخذة منو
هالورقة التجمعني بي هم ما اريدها أساساً بالنسبة الي لا تقدم ولا تأخر
لمى عينها تشخصت عليه لوبيدها تسألني عليها
فردوس_منو هاي وشنو ياخذها
ليال_ والله سالفة تضحك بنية عمرها ١٥ سنة يريدون يأخذوها اله
_منو من البنات؟
_اسماء بنت حارث اذا تعرفي
_يااا صدك تحجين
_أي والله
زلال غطت رأسها خالة غافلتنا وراحت البيت خالي لمى وجها مغلتم وروحها طافرة
رجعت خالة گالت لعبت طوبة بكوثر ظلت ماتعرف شتحجي تتوسل اسكت تخاف لا خالد وامجد يسمعون واختها العار من زلال مرزلتها ووصال هم متعاركة وياها طالعة زعلانة
زلال_ ظليت الليل كله ألوب افتر بالبيت ما اگدر انام من القهر
شگد جنت تعبانة لان گاعدة من الصبح وداگة كومة شغل الحد ماظهري انكسر لكن من سمعت كلامهن حتى التعب گمت ما أحس بي من قهري
اتخذت قرار بيني وبين نفسي بس أشوف امجد
اطلب منه يطلقني وانهي هذا الحب قبل لا احد يعرف بي وادوس على گلبي
الصبح بالگوة گمت من فراشي عندي دوام
وما اگدر أغيب عندي محاضرات مهمة
الجو يگص گص من البرد باليل جانت تمطر
وهسه بس هوا قوي
صارلي اسبوع من نزعت الأسود بسبب ماما توسلت بيه ماگدرت اعترض الخاطرها
لبست تنورة رصاصي وبدي ابيض ثخين وفوكاه سترة بلون التنورة رغم البرد ما اتحمل البس قمصلة ثخينة
گعدت يم الصوبة ماما وبيبي گاعدات
خطية جانت قبل هي تسوي الريوك هسه متگدر
خالة متعودة تگعد من وقت علمود ادز وسيم للمدرسة لهذا هي تسوي ومرات اني
فردوس_بعدج ضايجة
_لا مابيه شي
_لعد ليش مجاي تتريگين
_اأسم الله عليج وجع عندي بظهري ذبحني احس البرد كله بي
_ اخاف موعد الدورة
_لا لا بعدلها أسبوع موعدها مضبوط
_ هاا خوش لعد شربي حليب يدفيج
_من لا جارة شربتة نفسي متريد
اجة الخط صعدت للسيارة
احنا اربع بنات اني ووحدة من منطقتنا واثنين نروح ناخذهم من منطقة ثانية نفس طريقنا
بين ما افتر على البنات الوجع زاد وصار عندي لعبان نفس انوب الطسات دمرتني اكو نفق نفوت منه يصير بي نزلة قوية يومية من نفوت منه احس گلبي يصعد وينزل والا شوية صرتي تنشلع
من فتنا سريع
ثواني وحسيت بحرارة من الهبطة والصدمة نقطة دم مظلت بوجهي لزمت التلفون ايدي ترجف كتبت الصديقتي كاعدة بصفي يمكن اجتني الدورة لج شسوي
هي هم احتارت ماتحملت ابقى گاعدة اخاف ملابسي والمكان الگاعدة بي يدمرن وهذا السايق رجال كبير ونقناقي غير يفضحني لان كلش مهتم بالسيارة
. گلت الصديقتي راح انزل بلكي اتصل على اهاي يجون عليه ومن اندار شوفي تنورتي
گلت للسايق اوكف وهذا ولا عبرني
يگلي وين اوگف لاتسويلي سالفة
شلون ورطة صديقتي عاطت بي نفسها دتلعب راح تتقيئ بالسيارة
هذا من سمع كلامها بسرعة وگفها فتحت الباب ونزلت
صديقتي اشرتلي برأسها بمعنى ماكو شي
گلت للسايق روح هسه أتصل على اهلي يجون عليه
راح وعافني الجو بارد وصبح الشارع شبه فارغ بس سيارات اريد ابجي وين أولي
مداكدر اوگف أول يوم من تجي هواي
راح انفضح
اكو بالشارع بين الجزرات الوسطية مكان بي العاب أطفال زحليگة ومرجوحة وگدامهم مسطبة للگعدة والاطراف زرع نينيا عالية
عبرت وجيت گعدت گمت أبجي من كل گلبي موقف صعب ومحرج بشكل فضيع استحي أخابر علاء لو عادل عزززا شگوللهم وانوب من يشوفوني شسوي
ما أعرف شنو الخلاني اتقبل احجي الأمجد واخلي هو اليجي عليه ولا هما
اتصلت واني دموعي تتسابق حتى تنزل مسستحية والله مستحية
گال الو سكتت حتى ما اگدر انطق
_الوو زلال ليش ساكتة تسمعيني لو لا؟
_حجيت بصوت يرجف أي أسمع
_شبي صوتج جاي تبجين؟! أنتي وين بالبيت
_گمت ابجي بصوت عالي هو سمعني تخبل بس يريد يفهم شصاير وياي عاط بيه گال بطلي بجي وفهميني شبيج
_اني بالشارع قريب من الجامعة عفية تگدر تجي عليه
_ليش بالشارع صاير شي؟ دليني مكانج بالضبط
اني قريب منج هسه أجي
_دليتة وبقيت انتظر صوتة جان بسيارة يعني مو بالبيت عززا اذا احد ويا شسوي وهو اذا شافني شلون والله صعبة بحياتي ممتعرضة المثل هيج موقف هي من تجيني حتى خواتي ما أخليهم يحسون بيه
عشر دقائق ورجع اتصل گال اني بالشارع انتي وين
ححيت بتلعثم عفية خوما اكو احد وياك
_لا تخبلينيييييي شششصاير وهلگد خايفة ماكو احد وياي يلا وينج
_انطيتة اوصاف المكان الگاعدة بي سمعت صوت سيارة تمنيت الگاع تنشك وتبلعني
وگف گبالي ظليت منصية رأسي وأبجي
_راح تفهميني شصاير وياج وليش گاعدة اهنا لو اظل أضرب اخماس بأسداس
_اني طلبت من سايق الخط ينزلني اهنا ماگدرت أداوم
-مريضة؟
_هزيت رأسي ودنگت ابجي
_زين ليش كل هذا البجي يلا گومي الجو بارد اذا بقيتي تتمرضين بالزايد
_سديت حلگي وخشمي بيدي وبجيت بصوت هو واكف گبالي مصدوم ومستغرب وضعي
_تعبت هلگد ما اسألج شبيج الكلام بالگوة اسحبه من لسانج يعني معقولة كل هذا البجي بسبب المرض
_عضيت شفتي مسستحية لساني ميطاوعني
همست ما أگدر أكوم
المصيبة هو مجاي يفهم البيه
_شوو نطيني أيدج اساعدج
_يبوووو عليه يبووووو ترى اگدر امشششي
_ومحمد طگت مرارتي شششلون بلوة لج الناس راح تلتم علينا وسيارات رايحة جاية كووومي وفضيني
_أنت ليشششش مجاي تفهم هااااا مسسسسستحية ما اگدر أكوم
_من شششنو غير افهم
_يبوووو ملابسي من وره....
ماگدرت اكمل وهو وأخيراً فهم سكت يمكن خجل مثلي
_خرررررب غيرتج لعد شششطلعج من البيت لو واصلة للجامعة والطلاب ششايفيج
_لاتحاسبني قابل ششمعرفني مجنت متوقعة تجي اليوم لان مو موعدها هسسه شسوي شلون اگوم
لابس سترة نزعها انطانياها گال لفيها على خصرج
لا ما أريد اني هم ثولة ليش مانزعت سترتي من البداية
_شششجاي تسوين اخذيها وخلي نمشي
_ما أريدها نزعت سترتي ولفيتها على خصري هو خلى سترتة على جتافي لان جنت ارجف
وصلنا للسيارة اول مرة أشوفها هاي مال منو اخاف اصعد وهم تدمر
_سيارتي صعدي ومعليج يلا عاد
_ خليت السجل وگعدت عليه شغل تدفى لهسه إرجف بردانة ومستحية
ظلينا ساكتين
_زلال شعجب اتصلتي عليه اني؟
_ هسه غير يسكت هاا والله ما أدري
أستحيت من اخواني وحتى منك مستحية بس حسيت انت ارحم منهم
هز رأسة وبعد مجاوبني وصلنا للبيت دخلت جوة وهو راح
البنات گاعدات بالمطبخ يتريگن
ليال_يووو هاي شرجعج وشبي وجهج احمر
وشنو هذا حالج
_اششش لاتسأليني نحطيت بموقف ازبل من اازبالة
لمى _ششصاير اوگفي وين رايحة
فتنا وراها للغرفة من ذبت سترتها فتحت عيني
هاي شنو عزززا لاتگولين هيج شافوج بالكلية
_لا نص الطريق خليت أبو الخط ينزلني
ليال _لعد منو جابج وهاي سترتمن
_امجد
_گولي والله
_اي والله شبيج انصدمتي لعد خوما اخابر علاء
وگفت ابدل لمى عافتنا وطلعت
رحت غسلت وجيت للفراش تلفلفت بالبطانية
اليوم الصار بيه يمكن هذا درس الي حتى اعرف قيمة العقد البيني وبينا دوم استهزء بي واوصفة بالورقة اگول لاتقدم ولا تأخر
مجنت اعرف هاي الورقة هي رباط مقدس
من وگعت بموقف محرج ماگدرت التجئ الأخواني والتجأت اله حتى لو مامكشوفة عليه
لكن بالحظة حسيتة ستر وغطا عليه
هلگد ما بردت لزمتني فلونزا نمت بالفراش لا اكل لا شرب انتهيت
ثاني يوم باليل بعدني بالفراش فات امجد
من شفتة غطيت رأسي
_شكو مغطية رأسج
_هاي شششجابك ناوية منا الشهر ما اشوفك وجهي
ضحك گال مصيبتج عويصة المشكلة كل شهر بنفس هذا اليوم لا أرادياً راح أذكر
فتحت عيني يمكن عرگت من المسسستحى
عزززا امجد
_گالوا مريضة سلامتج محتاجة شي
_الله يسلمك لا تسلم
باوعت عليه تنهدت امجد تذكرت من وعدتني شوكت ما طلبت منك اطلقني راح تنطيني حريتي
_أي صح
_ وهسه أجه وقتها أريد اطلگ..........
