 |
رواية ليلة الحنة الفصل الرابع والعشرون بقلم بسمة البياتي
أمجد _ومن مرة وحده انعجب بيج وقرر يزوجج؟!
زلال وين حلقتج؟؟
_من الخوف لزمت اصبعي غطيت مكان الحلقة
هاا ما أدري يمكن واگعة مني
_واگعة منج لو متريدييييييين تلبسيها
حتى لحد يگول مزوجة مو هو هذا تفكيرج أنسسسسة زلال لو غلطان
_برطمت أكيد غلطان قدمتلة ايدي هاااك شششوف شگد ضعفانة وين توگف الحلقة بيها
اذا مفكر ما ألبسها حتى يگولون ممزوجة والله مو صح
_راح اقدر الأنتي بي وأعديها ألج وربج زلة صغيرة منج تعمين على روحج وحتى الكلية أحرمج منها
هسه تروحين دورين الحلقة وتلبسيها لا انتي ولا غيرج ما اقبل يصغروني وينزلون من قيمتي
_ دموعي تنزل بهدوء، يحاسبني عبالك مسوية جريمة لو رايحة للكلية علمود الشباب
خليت عيني بعينة صارلك ساعة تحاسبني زين حلقتك وين؟!
_ لا إله إلا الله بابا لاتقارنين نفسج بيه أنتي بنية ومحسوبة عليه الحجاية التمسج تمسني
_اي طبعاً يمك حلال ويمي حرام
گمت وگفت على العموم اوك الحلقة وراح البسها اكو اوامر ثانية
_أمششي جيبيلي مي بارد احترك دمي من سوالفج ومن رزايل خالج مگعدني مثل الطفل گدامه يحاسبني والأضرب يباركلي
يگول مبروك مرتك جاييها خطابة گرت عينك
_ وعاد أنت مقصرت گبل جيت عليه ودك رزايل
عفتة وطلعت ضايجة منه فتت للمطبخ شفت لمى واگفة بالطارمة بيدها التلفون تخابر
رحت للثلاجة طلعت مي صبيت بالگلاص
امجد اجه انطيتهيا قبل لا يرفعة يشرب لمح لمى جمد بمكانة عينه عليها وهي كذلك عينها عليه
عيني تفرفر بينهم
دموعها نزلن وشفايفها ترجف وهو
عبالك مضرب طلقة بنص گلبه حتى رمش مايرمش
صارلة ساعة يحاسبني ويلقيلي محاضرات وبس شافها نسى وجودي
موووو عطشششان متشرب
صحى على صوتي مجرد قرب المي من حلگة ونزلة من ايده خله الگلاص على الكاونتر وطلع بسرعة
وهي على نفس، وگفتها تمسح بدموعها عفتها وطبيت للغرفة الدنيا طالعة من عيني
ليال_هااا شششبيج خوما رزلج؟
_عادي تعودت
ليال_ فاتت لمى عيونها حمر
وزلال وضعها مدري شلونه
خالة نترت بعصبية ويييين جنتي
لمى_ فارس اتصل طلعت احاجي
._وششكو خلقتج مگلوبة؟!
ليال _ لمى بسرعة باوعت بتجاه زلال تلعثمت گالت
هااا صار سوء فهم بيني وبين فارس
اما زلال ما أدري شدور بالمجرات
شدورين طرشتينا بالجاق وجيق
_حلقتي
فردوس_ خرب ضميرك امجد أكيد هو حكم عليج تلبسيها يابنتي من الأساس ليش نازعتها
_أيدي ضعفانة وتوكع مني خفت تضيع
هيانها لگيتها
ليال اخذتها لفتلي بيها تيب ابيض بين ما أبدلها
_ لاتبقين هاملة نفسج رجعي اكلي شوفي شلون ضعفانة
_ لا هالأيام احسن من قبل
_اي عفية
_ظلينا گاعدين بعد لا اني ولا لمى نطقنا بحرف
ثاني يوم هي وخالة رجعوا لبيوتهم
الأيام تمشي ووضعي ويا امجد نفسه
خالة كوثر بدت تضوج وهالشي حقها تريد تشوف أبنها مستقر وعنده عائلة بسبب زواجه مني حياته شبه متوقفة
مرات افكر احاجي حتى ننهي هذا الزواج
لكن من اشوف وضع اهلي اتراجع
هما بيا حال انوب اني ازيدها عليهم وافتح على نفسي أبواب جهنم من القال والقلت
ركزت على دراستي وذبيت كلشي وره ظهري
وين تصفى خلي تصفى
رجعت من دوامي تعبانة تغديت لفيت رأسي ونمت
من گعدت الوجوه متبشر بخير
هااي شكو
رغد_ شذى مدري شبيها صارلها يومين مو على بعضها واليوم لا نزلت جوه ولا احد شافها
باقية بدون ريوك وغدة صعدنا نشوف شبيها
ماقبلت تحجي ويانه ومن شكلها مبينا شابعة بجي
_عزززا هاي الثانية شجاها شنو انحسدت
زين عادل مگال شبيها
رغد_ هو الثاني هم مايتحاجى عمة سألتة گال ماكو شي وعافها وطلع
ليال_الظاهر اكو مشكلة بينهم
زلال_لا بربج شلون عرفتي أحد گالج لو غششيتي الجواب
_شششكو شبيج شغشيت
_سألي روحج ترى ميحتاجلها ذكاء أكيد متمالخين
اريد اعرررف السبب مو جاية اتگوليلي الظاهر اكو مشكلة بينهم
_اذا هما ميريدون يحجون شنو نجبرهم
والله حلوة هاي
_شذى الثاني يوم هي بالغرفة لا أكل ولا شرب
ماما خطية متگدر تصعدلها دزت عليها ما قبلت تنزل وعادل كلما تسأله يگلها عوفيها طبها مرض
ثاني يوم نزلت شذى مبدلة وبيدها جنطة جلبنا بيها يمعودة وين رايحة ماما توسلت بيها وهاي معاندة اتگول اخوي بالباب أريد اروح الأهلي
اخذت وياها عبودي وسارة لان صغار بجوا عليها
وحسوني وسىرور بقوا يمنا
كل هذا واحنا مثل الاطرش بالزفة
عادل المغرب رجع ماما جلبت بي گاللها عوفيها تروح يطبها طوب
حورية_ادري من شوكت صاير تضم على أمك
احاجيك جاووبني مرتك ليش طلعت زعلانة بحياتها ممسويتها ادري ششجاكم ماتگلي
عادل_ شذى تعافت وصار ماتعجبها عيششتي خلي تظل على أيد اخوانها ونسوانهم
_تريد تقنعني هاي زعلتها بدون سبب
قابل ما أعرف مرتك أدري بيها بنت أصول ومايطلعها من بيتها غير شي جبير
_يمه فدوة العينج سدي السالفة مشكلة بيني وبينها حتى ماتستوجب احجي بيها لاتغثين روحج يومين وترجع أعرف بيها
ليال_ عادل مانطانه لا حق ولا باطل باس رأس ماما وصعد الغرفتة
سرور _بيبي اني اعرف ماما ليش زعلت اذا احجيلج الله عليج لاتگولين البابا اني گتلج
حورية _ تعالي يمي احجي ولاتخافين محد يجيب طاريج
_سمعت ماما تحجي الخالة اتگلها عادل يريذ يأجر بيتنا صارلي سنين انتظر شوكت يكمل البناء.ومن كمل ماراح اتهنى واستقر بي يگول بعد ما اگدر اعوف أمي خواتي
حورية_ هااا اهنا الحجي خوشش يمه يلا روحي ادرسي ولاتحافين محد يگول الأبوج أنتي حجيتي
ليال_ هاا ماما شراح تسووين
_ من ينزل احاجي خوما اظل ساكتة البنية حقها
تضوج جهالها كبروا جم دوب تظل محصورة فوگ
حقها تريد تأخذ راحتها
من هاي عادل ما حجالي يدري مراح ارضى على تصرفة
_ وره العشا ماما فتحت الموضوع ويا عادل
ظل يفر بأذنه
_هي حجتلج مووو بسسسيطة اني موو وصيتها تسد حلگها وتسكت
_لاتأخذني بصوتك المرة لا حاجية ولا فاكة حلكها عرفت والسلام
جاوبني ليش تريد تأجر بيتك وتنطي بيد المؤجرين يلعبون بي طوبة
_مامحتاجة مرتاح اهنا وما ناوي اطلع حتى لو تطرديني
_يا أبني اذا علمودنا قابل شكو علينا
علاء ويانة زلمة طول بعرض شنو مو بعينك وهاينه خالك بيتة حايط على حايط ويانة
ترى ماراح تعوفنا بصحراء
_راح أبوية أجي اني هم أعوفكم حتى أرضي الخاتون
_الي رباه محمد مستحيل يعوف أمه وخواتة لان ربه زلم ينشد بيهم الظهر ويعرفون مخافة الله وبارين بأهلهم
هذا يبقى بيتك وتجي وكت اليعجبك
يا أبني فكر بحهالك ما شاء الله حسوني وسرور كبروا هم يحتاجون غرف خاصة بيهم وشذى
تريد تلبس تريد تأخذ راحتها قابل تگضي عمرها عايشة ويا عيالها توكل على الله حبيبي روح البيتك الله يجعلة عتبة خير عليكم
وربي يرضى عليك دنيا واخره مثل ما گلبي وگلب أبوك راضين عليك
ليال_عادل اختنك وعيونة دمعت لزم ايد ماما يبوس بيها
ثاني يوم رجعت شذى جانت خجلانة متگدر ترفع عينها بعين احد بينا ماما من شافتها هيج حاجتها
گالتها يمه الله يشهد ما ضايجة ولا زعلانة منج
اني مرة مثلج هم عشت ويا عيال وتمنيت يصير عندي بيت وأستقر
وادري بيج قصرتي على نفسج حتي يكمل
البناء
شذى_ عمة وداعة جهالي السويتة مو لأن كارهة عيشتي وياكم لو شايفة منكم شي موزين بالقرآن باليوم احمد الله الف مرة الله
رزقني هيج عيال
بس والله گلبي مانطاني يأجر البيت كلشي بي على ذوقنا استصبعتها على الحاضر يجي المؤجر يدشنا واكيد مراح يهتم بي مثلنا
_صح محد يلومج عينك على مالك دوة محد يخاف على حاجتة غير التعبان بيها
ليال_الحمد الله وأخيراً انتهى الخلاف وبدت شذى تجهز البيتها
بيبي جانت تخابر خالة من سدتة گالت الماما
فردوس صارلها فوك الأسبوعين بالشقة وحدها عاطف مسافر وعايفها
_وليش ما أجتي شنو محتاجة عزيمة مو وصيانها من يروح تجي اهنا
_ اتگول استحيت لشوكت اظل من بيت البيت من وره سوالف عاطف التعبانة
_ماما تعصبت لزمت التلفون اتصلت عليها ورزلتها گالتلها جهزي نفسج المغرب علاء يمر عليج يجيبج
خالي من سمع هم رادها تروح البيتة عاد ماما گالتلة خليها يمي هو اني منو عندي
ليال_من يوم التخرجت واني حايرة أريد أشتغل اعين نفسي واعين بنتي صح اخواني ممقصرين
لكن لشوكت أظل أخذ منهم كل واحد بيهم عنده مسؤولية برگبتة عادل بيتة واطفاله وهم ينطي الماما مصروفها ومصروفي
وعلاء متكفل برغد ومحمد وباقي مصاريف البيت من غير علاج ماما والأطباء
خالة من أجت اشترطت تبقى بس تساهم بالمصروف
طلبت من علاء يشوفلي مختبر اشتغل بي
الأفندي رفض يگول وظيفة اهليه انسيها
يريد حكومي وهو منو محصل الحكومي
زوجة مازن اخو ليث دوم تتواصل وياي أهلها عدهم هواي معارف طلبت منها بلكي تگدر تشوفلي وظيفة گالت والله راح احاول بس لازم تصبرين
عرفت منها ليث صار عنده ولد ومتخبل عليه يحير شيسويلة وشيجيبلة
بداخلي انقهرت وهي حست بيه
_ليش ضجتي معقولة بعدج تحبي وتفكرين بي
_الله عليج الي مثل ليث هم ينحب ويستاهل وحده تفكر بي وتنقهر عليه
_لعد شبيج
_ضجت على حظ بنتي زين هي مو بنته معقولة گلبه ميرف عليها مايصير عنده. فضول يشوفها هي ششنو فرقها عن أبنه
_اخاف اگولج شي وتنقهرين بالزايد
_لا يمعودة على شنو انقهر
_ليال ليث شكوكي من كثر مكسراتة وسوالفة الطايح حظها ماعنده ثقة حتى بنفسه
وهاي عمتي اكبر حية
من طلقج وتنازل عن الطفلة لعبت بعقلة لعب بحيث خلتة يشك بأبوتة الها وسماح اتگله اذا هي حتى عزيز جانت تتحارش مو بعيد من جنت تخليها تروح يم اهلها شسوي ماتسوي
لهذا السبب حتى اسم بنتة مايطيق يسمعة
_أختنگت بعبرتي همست ماعندي غير الله هو يأخذ حقي منهم حسبي الله ونعم الوكيل
سديت التلفون واني ميتة قهر بقيت أسبوع متسممه كلما اذكر كلامهن أشب نار واطفى
تالي سلمتهن بيد الله
باليل خالة طلعت تحجي ويا عمو عاطف وزلال دتدرس واني بفرأشي بيدي التلفون اتصفح بي وصلني مسج من رقم
تنهدت
(هلو ليال شلونج ممكن اخذ من وقتج دقائق مو أكثر اني رائد)
جاوبت
(هلا رائد الحمدلله زينة هذا رقم منو واني شطلبت منك أخر مرة؟!)
_( أخذتة مخصوص حتى أراسلج
ليال لاتسويها فد مرة والله مطالب منج لا علاقة ولا حب كل الأريد بين فترة وفترة اطمئن عليج وأعرف أخبارج)
_(وشراح تستفاد اذا طمئنيت عليه وعرفت اخباري رائد احنا مو اطفال ولا عبالك بهاي الطريقة راح تگدر تتقرب مني ويصير، حب بينا)
_( هسه قابل گايلج أريد أستفاد واذا وأثقة من نفسج وتدرين مراح يصير شي شكو خايفة)
_(لحظة عيني ومن شنو أخاف ترى بس حبيت انطيك علم)
_(ماشي صار معلوم وداعة أمي مرايد منج شي
اعتبريني صديق أخ ابن عم شتعتبريني اعتبريني عمي والله راضي المهم تجاوبيني وماتتخبلين وتالي تحظريني)
_(رائد ليش مجاي تفهم صداقة بيني وبينك مستحيلة فرضاً اخواني عرفوا ليش تخليني وتخلي نفسك بهذا الموقف؟! وأمك والله اذا درت تجي النص بيتنا تفضحني فضيحة
اترجاك لاتخليني بهيج موقف وداعة بنتي مو ناقصة والبيه مكفيني)
_( ليال الي يمسج يمس گلبي وروحي بيش تريدين احلفلج ما راح اتجاوز حدودي ولو بدر مني شي غلط شتسوي بيه حقج
ولاتخافين تلفوني محد يلزمة)
_صفنت ويا روحي گلت بيني وبين نفسي مخسرانة شي واذا راسلني هو يبقى أبن عمي
(تمام رائد موافقة وذكر اذا كلامك معجبني بنفس اللحظة انطيك حظر)
_(ماشششي متفقين اوعدج مراح أأذيج او أضرج)
_(اوك)
ظل هواي يحجي عن حياتة شيسوي ميسوي بيومه امور عادية
لا إرادياً حسيت بالرحة وفكيت شوية حجينا هواي الى إن گعدت غزل جان الوقت متأخر ترخصت منه طفيت التلفون ردت انام مگدرت
عندي خوف من المجهول خايفة اذا احد عرف ننفهم غلط وتصيرلي مشكلة من جوة الگاع
سمعت الاذان گمت توضيت صليت وجيت نمت
ثاني يوم الظهر عمتي اتصلت گالت فدشوية اني وخواتي راح نجي عصرية يمكم
زلال من گعدت من النوم ماما گالتها امشي روحي البيت خالج كلما يجن يلگن اهنا والف سؤال يسألن شعدها زلال وليش كلما نجي نلگيها عدكم خوما عدها مشاكل ويا رجلها
_اهووو والله حلوة هنا ششعليهن بيه
_يمه لاتشلعين گلبي خو اخير مرة سمعتي عمتج من گالت اكيد مامتوالمين تلگين امجد نفس اخو النهزم
امششي روحي كوثر هسه تجي ما أريد يحجن گدامها ويغثنها
زلال_رحت البيت خالي وصال دتسوي جاي بالمطبخ
_فوتي ليش واكفة وتفرفرين بعيونج.
_شو البيت هدوء لعد وينهم
_وليد وخالي قبل شوية طلعوا عدهم شغلة
وخالة كوثر بالحمام ورجلج نايم بالهول
شعجب جيتي
_عماتج هسه يجن نهزمت منهن
ديلا جوعانة حضريلي شي ويا الجاي
_هذا الجاي حار عندج أيد وصبي النفسج اني وخالة رايحين يمهن
_وتعوفوني وحدي؟!
_ليش وحدج امجد اهنا وريم هم موجودة روحي گعديها بغرفة خالي
_لا عوفيها صبيتلي جاي سويتلي لفة جبن گعدت اكل فاتت خالة
من تشوفني اهنا تكيف گالت من يگعد أمجد صبيلة جاي.
المسكينة گوة تريدنا نتقرب من بعض
راحن هي ووصال ظليت گعدة بمكاني
طبت ريم تفرك بعينها
هلو زلولة لعد امي وين
_بجيبي شنو زلولة ترى اني خالتج مو اختج
العوبة تعلگت برگبتي ووگعت الخدي مطك
وووووخري شبيج جلبتي مثل الجرادة
_ غير احبج ززززززلولة الحلووووة
_اششش عمج نايم مالي خلگ يگعد ويطلع خبالة عليه من يشوفني يتلبسة جني
_لا شيگعده الليل كله سهران ويحجي بالتلفون
_شمدريج
_نزلت عطشانة وسمعتة جان گاعد بالأستقبال ويحجي بصوت ناصي
_هااا ماعرفتي ويامن؟
_مو اخاف اگلج وتزعلين
_عششتو من شنو ازعل يلا گولي ويامن يحجي
_ويا فد بنية بس ما اعرف منو هي
حتى حجة عليج
_لفة الجبن طلعت من خششمي مدري شجاني صرت نار ششحجة
_لا تتعصبين
_مامتصخمة احجي عاد
_لا ششوفي والله تعصبتي
_انطيني الصبر ياربي لج لاتخليني اسبج واسب عمج احجييي شگال عليه
_يگلها حبيبتي بس اخلص من البلوة المزوجها اجي اخطبج ونزوج
_انييي بلوة شششو وخري دفعت ايد ريم المحاوطة رگبتي طبيت للهول مبطوح على بطنة ورايح بسسسابع نومة
هزيتة من ظهرة بثنين أيدي فز مخروع
_شششبيج
_گووووم طلگني
_صفن بوجهي نص وجها مطبوع مال مخدة احمر وعيونه تجدح گام لحيله لزم أيدي ولواها
ادري هذا مو جان نايم وبالگوة گعدتة منين أجاه هذا النشاط
بأيدة الثانية اشر على رأسي
_اهناااااا ششششكو عقل لو قندرة ليششش هلگد تحبين تنهانين هاي حركات المزعطة ماتمششي يمي شكم مرة گايلج اجفي شششري ما أريد أأذيج
_هد أيدي راااااح تكسسسرها انيي بلوة طلگني شششكو مبقيني على ذمتك
_الحمدلله تعرفين نفسج بلوة
تريدين تطلگين؟
_اي
_صار بس بالأول أريد اعرف شنو الخلاج تفكرين بالطلاگ بهذا الوقت بالذات؟
_رحت گعدت گبالة حتى تخلص من البلوة وتأخذ حبيبتك الي تكسر بيه گدامها
_احلف عليج مو عاقلة حبيبتك ششنو
_ايبااااه شگد فقيييير أي بعد بعد غشششم روحك
_زلاااااااااااال احجي عدل
_خفت من صياحة ترى محجيت شي غلط لعد البارحة مو للصبح تحجي وياها وتگوللها بس اخلص من البلوة اخطبج
عقد حواجبة
_منو هي بابا شششبيج مخبلة وناوية تخبليني وياج
_ررررريم تعالي
وگفت بالباب ومدت راسها الضحكة من الأذن للاذن
البارحة عمج ويامن سهران وشگال عليه
ريم_وشمعرفني اني نايمة من وقت
_طگگت عيييييوني للللللج ريم احجي لا أبتلي بيج
أمجد_تعالييييي جنية ششمسوية
ريم_ههههههههه لو مخليني أروح العيد ميلاد صديقتي مو احسنلك
زلولة الله عليج لاتقصرين
زلال_ ظليت مصدمة معقولة هاي الزعطوطة ضحكت عليه امجد گاملها وهي صارت اسرع من البرق عافت البيت وراحت البيتنا
هي گدرت تنهزم هسه اني ششلون انهزم
_طاح حظج بنت أختج تضحك عليج
_والله هاي تربيتكم روح حاسبها مو جاي عليه
_هسسسه شششسويلج أشرب من دمج لو أكسر رأسج هذا الي نايم بي مطي
ششجاج بهالظهرية
_ترى عصر مو ظهر عماتي يريدن يجن
قبل جيتهن جيت اهنا حتى أخلص من سوالفهن
صدك خالة گالت من يگعد صبيله جاي
تريد
_روحي صبي صار عندي وجع رأسك
_طلعت اركض حميت الجاي وصبيتلة
انطيتهيا نظراتة الي قاتلة لو بيده يأكلني
_عماتج شبيهن وياج
_حشريات كلما يجن ويشوفني بيتنا يگرعن راسي شعندج دوم بيت اهلج شو اختج وصال مانشوفها بكد مانشوفج
والاضرب طلعلي بسالفة جديد
_ياسالفة؟
_يگولون صارلج شگد مزوجة ليش لهسه مصار عندج حمل ادري منين يصير من الهوا
امجد لوما شوية يغص بالجاي
سكتنا أثنينا اني صفنت وهو صفن ويمكن حتى الحيطان صفنن ويانه على الواهس عزززا هاي شحجيت وشجفصت
بدون ما انطق انسحبت بهدوء من الهول وطلعت اركض رجعت البيتنا وحلفت بعد ما اوصل اهناك ريم من شافتني ختلت يم ماما
ليال_هاا شكو شو تتحلفين بريم من بعيد وهي خانسة يم ماما
_اليوم اهلس اعطوبها الچلبة
وصال_خير شمسويتلج
_دگت دگة النواقيص ميسووها
وصال _عزززا ششمسوية احجي
_من وراها ردت انگتل من امجد الحقيرة سوتلي فلم وخلتني أصدك
حجيتلهن سوالفها شو هذن خربن ضحك
تضحكيييين يعني عاجبج تصرفها هاي عليمن طالعة برعة ووكحة
ليال_ههههههه ابد مطالعة عليج
وصال_والله ياعيني خالي ووليد يصيحوها زلال الصغيرة نفس اللسان والوكاحة انتي متعبة ماما وهي متعبتني
زلال_عود صدك تحجين هو وين اكو افقر مني
_لا يابوي وين اكو عوزج جناحات وتصيرين ملاك
_ما أجاوب علاج الجاهل التجاهل
وصال_زززززلال منووو جاهل
_انييييي انيييييي زين جاهلة وستين جاهلة حتى ترتاحوون
ثاني يوم من رجعت من الدوام لمى موجودة
دخلت للغرفة أبدل شفت جنطة كبيرة
مديت رأسي من الباب شفت رغد اشرتلها تجي
_هاا
_لمى شو شكلها مدري شلونه ششبيها وشنو هاي الجنطة
_متعاركة ويا رجلها وزعلانة
_كذذذذذذب گولي والله
_اي والله شششبيج انصدمتي
_لا من شنو انصدم بس استغربت الأعرفة رجلها وعيالها كلش زينين وياها
_والله ما ادري هي المشكلة بينها وبين زوجها مانعرف علمود شنو من أجت تبجي اتگول الأمها ما أريده خلي يطلگني وابوها من سمع كل شوية يتصل متعصب يگول خلي ترجع البيتها ولا تتخبل
ومن الصبح لهسه على نفس الرنة
_تحسرت ما أعرف شبيه وليش گلبي انقبض حتى غدة شگد جنت جوعانة ماگدرت أكل
ليال حست بيه بيه سألتني گتلها تعبانة ونعسانة
زعل لمى خلاني أشك بنفسي اني عندي مشاعر اتجاه أمجد شلون صار هالشي وشوكت ما أدري
غيرانه والغيرة دتأكل بيه
عيني مراقبتهم هو اذا سمع صوتها او لمحها
يفقد الأحساس والشعور يتوه وبعد ميندل دربه.
وهي دموعها تنزل غصب عنها
لمت نفسي اني ليشش هيج ماعندي شخصية ودوم گلبي يدك للميستاهلني ششنو الشفتة من امجد حتى احبه
شو كلامة وياي بالمثاقيل لو يتأمر لو يتعارك
والله الحد يومنا هذا من يحاجيني من طارف خشمه
اني لعبت بالنار ومثل ما لمى انجوت بيها
بيوم الحبتة اني هم راح انجوي وأشرب من نفس الكاس........
