رواية ليلة الحنة الفصل الثالث والعشرون بقلم بسمة البياتي
حورية_ منو جابة وشنو هاي الجنطة
علاء_ أخو رغد وصلة وراح
گال الولد يبقى ابنكم مانگدر نتحمل مسؤوليتة
وأختنا أجت قسمتها نريد ننطيها
_صايرة دايرة سسنة رجلها بعدها ماطالعة وينطوها بعدها ريحة الغالي تارسة فرأشة
ومرته تروح الحضن غيره ولك يمه وووووووين رحت وعفت وليدك نحرم منك وهسه أمه هم حرمتة منها
ليال_التمينا على ماما نريدها تسكت حضنت محمد وظلت تنوح وتبجي
صدمة لا على البال وعلى الخاطر
معقولة رغد تسويها وهي جانت تحب الگاع
الـ يمشي عليها عماد الله يرحمه وين راح ذاك العشق بسرعة نسته ونست دلاله
ابد ما اصدك رعد قابله اكيد ضاغطين عليها
والمصيبة روحها بـ محمد ششلون فرطت بي بسهولة
وسط هاي الهوسة دك تلفوني رغد تتصل
زلال_ هاي هي مو؟
_اي
_شوفيها شتريد وفهمي منها شو مدتدخل عقلي رغد بهالسهولة تنطي محمد وتقبل تتزوج
حورية_ انطيني احاجيها
_فتحت الخط قربتة من ماما
رغد صوت بجيها شعلوا
حورية_ ليش يمه هاي تاليها تفرطين بأبنج ما راح اگلج شلون هان عليج عماد شمايكون بعدج صغيرة ومن حقج تشوفين حياتج
بس يايمه هذا ضناج قطعة منج تريدين تيتمي منج وانتي عايشة
رغد_بشهكة عمة وروح حبيبي المالحكت اشبع منه وداعة محمد أخذوا مني بالقوة
صار كم يوم أخوية مرتضى شوفني الويل ضرب واهانة حار شيسوي بيه
كل هذا حتى أخذ اخو الحية مرته
_ امج اخوانج البقية وينهم عن الديسوي بيج؟!
_محد يدخل ما أدري شلون گادر يقنعهم
عمة بالقرآن اذا صارت صدك احرگ روحي والحك عماد وأبني امانة يمكم ادري بيكم راح تربوا احسن تربية
ليال_ررررغد لا تتخبلين أياج تسسسوينها
حورية_ أذكري الله لاتخلين الشيطان يوزج
_ماكووو غير حل بسسس فهموني يرضي منو الديصير بيه فوك كسسرتي اخوية ديكسرني حتى يرضي زوجتة.
اخوها اكبر مني بـ ٢٠ سنة مزوج ومرته متخلف
عباله اذا أخذني راح اترس حضنه جهال والله ثم والله امووووت وما اخليهم يمشششون البرأسهم
حورية_ رغد سسمعيني شيلي سالفة الموت من رأسج احجي ويا اهلج بهدوء طلبي منهم يصبرون عليج الحد ماتطلع سنوية عماد خلي بس هالجم شهر يجوزون منج وبعدها يحلها الحلال بلكي نقنعم بين يوم وليلة الله يغير من حال الحال
_ واذا اصروا ينطوني هذاك الوقت شسوي؟
_تفائلي بالخير
_راح احاول وياهم واذا بقوا على نفس قرارهم
لاتلوموني على الراح اسوي ومحمد يمكم انتوا اهله متأكدة راح يربى بالعز والدلال
_ سديت الخط باوعنا الماما
شراح تسووين اذا اخوها مصمم ينطيها وزوجتة تحش برأسة وين تگدرين تقنعي يلغي الموضوع
وهاي رغد خوفتني مخليه الأنتحار برأسها
حورية_دگيلي على خالج خلي يجي رايدتة بسالفة
زلال_ ليال فوتت ماما الغرفتها وره شوية اجه خالي فات يمها وسدوا الباب
بقينا وحدة صافنة بوجه اللخ ماما على شنو ناوية
أخذت محمد عشيتة وخليتة بحضني أريده ينام
ميتة قهر عليه شنو ذنب هالطفل يبقى من أيد الأيد گام ينعوص يريد إمه بالگوة قنع ونام
خالي أجه وراح وما عرفنا ماما شرادت منه
ثاني يوم ما داومت علمود محمد متنحس گعد من النوم يبجي ما اگدر اعوفة ومنا ماما المسكينة
ماتگدر تهتم بي مثل قبل نظرة الأنكسار بعيونها ادري بيها تحس بالعجز حتى من نساعدها بفوتة للحمام لو تبديل او سبح او وضوء تشبع بجي
والصبح من نروح للدوام عدها استعداد تبقى الحد ما نرجع بدون حمام
شذى تحاول وياها ماتقبل لهذا گمنا نوصي وصال تجي عليها
كم مرة ردت اترك الدوام متقبل تگوم تبجي اتگول صرت عالة عليكم وبسببي حتى دوامكم تريدون تعوفوا
لهذا اسكت واتراجع عن قراري
مر اربع أيام محمد شوفنا الويل على رغد
وهي تتصل تشبع بجي محاجية اخوها الحقير مايقبل ينتظر وره السنوية
اليوم العصر اتصلت گالت جيبوا محمد وأخيراً اقتنع
من سألناها شلون قنعتي
گالت حجيت بجيت لطمت توسلت ماكو نتيجة
تالي جبت نفط وذبيتة على روحي گدامهم ردت اشعل الجداحة جيتوا عليه لزموني
گتلهم عادي هسه گدرتوا تمنعوني وراها مراح تگدرون
خايفين من تهديدها گايللها ماشي نصبر الحد ماتطلع السنوية وبعدها غصب عنج تأخذي
عادل ودالها محمد لكن ابد مارتاحينة
وره السنة هم يرجع ينحرم منها ويرجع الضيم
گاعدين نتعشى فات علاء فك بالسما وفك بالگاع الشرار يطاير منه
علاء_ييييمه هاي من صدك تحجييييين ودازة خالي يقنعني بدييييينج بششششششنو اقتنع
اخذ مرررررررت أخوية
عادل _ بعد اذا عليت صوتك عليها ادفنك بگاعك عندك حجاية احجيها مثل الأوادم لاتأخذنا بصووتك العالي
_امة الأسسسسسلام يگلي احجي بهدوء
تريدنيييييي أخذ رررررررررغد مرت أخووووونا
جاي تفهم عليه لو لا
_وششكو بيها الخاطر أبن أخوك
عاجبك هذا حاله من أيد الأيد حتى أخوك بگبره مراح يترتاح وعائلتة متبهذلة
نورية_وليدي فكر بأبن اخوك قبل لا تفكر بنفسك امك ما كفرت تريد مصلحة هالمسكين
حورية_ البنية متأذاية أخوانها لا ذمة ولا ضمير
وأبن أخووووك شنو ذنبه يعيش بعيد عن امه أجه يمنا جم يوم فرفح عليها يا أبني ماطالبين منك تأخذها وتخليها بحضنك
كل الرايدي تعقد عليها ونرجعها اهنا
ريح گلبي الله يريح گلبك
_اطلبي روحي ماتغلى عليج وترخص التراب رجليج
الا هذا الطلب المووت اهوون منه ما اگدر اطيعج بي
ليال_ علاء دفر الباب برجله وطلع ماما
گالت گوميني فوتيني للغرفة
طلبت منها ترجع تكمل اكلها حتى تأخذ العلاج ما قبلت
عادل _ يمه ليش غاثة روحج صبري منا الجم يوم وداعتج اني وخالي والولد نقنعة لاتستعجلين
_ماما دموعها تجري ما جاوبت عادل أخذتها للغرفة انطيتها العلاج عاندت متأخذة
لساني تعب هلگد ما اتوسلت
ياربي نلگها منين ولا منين المصايب نازلة على. هالبيت مثل المطر
طلعت من غرفتها زلال شالت الموعين راحت تغسلهن
شذى_شلونها عمة
_ ماتقبل تأخذ علاجها عفت بيبي يمها بلكي تقنعها
_ الله يساعدها بلكي أخوج ابو رأس اليابس يوافق رغد وين اكو منها أخلاق وجمال وبعدها صغيره احسن من الملطلطات اليعرفهن
زلال _مديت راسي من باب الطبخ للهول
هووب هووب دتحسسيني اذا اخذها زواجهم كامل
_ أدري بالبداية راح يكون الوضع صعب بس بمرور الأيام كلشي يتغير سامعة هواي قصص
وشايفة بعيني بمرور الأيام يصير تعود ويعيشون سوى وحتى يخلفون ويصيرلهم اطفال
_شو باوعي بعيني ليش داحسج خايفة
_ ياااا عززا من شنو أخاف
_تخافين اذا علاء رفض يقترحوها العادل
گولي كذب
_هم عايزة حتى اششرب من دمهم لاعيني واثقة من عادل ميسويها
ليال_كافي زلال لاتروح تصدك دشوفي وجها صار، نومية
شذى_اگوم انوم الجهال احسن الله وگعني بحلك زلال بعد شيفضني
زلال_ تحسرت سدج امين لا ظل واهس قبل ولا الي خلك المناگر زلال اندفنت ويا أبوها وأخوها الگدامكم جسدها بس
ليال_اششش الله عليج سكتي الگيها منج لو من ماما لو من وضع علاء ورغد كافي گلبي صاير عطابة من القهر
_سكتت شريد اجاوب حتى الكلام خلص رجعت للمطبخ اغسل المواعين
فات أمجد
_شلونج؟
_الحمد لله
_علاء وين اتصل عليه ميجاوب
_طلع زعلان
_اكيد ابوية محاجي
_أي واجه صاير نار تعارك ويا ماما وعادل وطلع
_ما أدري شگول من ناحية انطي الحق شلون يگدر يأخذ زوجة اخو
عماد مو بس توأمة نصه الثاني وصديقة ماراح يتقبل يأخذ مكانه
ومن ناحية الطفل وأمه كاسرين خاطري
_ لعد وفر على علاء شلعان الگلب وأخذها أنت
_بابا أنتي ليششش تحبين تنهانين
ولو مو صوجج صوج الكلب أبن الكلب الموقرج واكف يحاجيج
_عزززا شگد خبل سب روحه هم زين ما جابني بدفرة
ليال_ ماما حاربت علاء بصحتها تركت علاجها الأكل بالبجي والتواسيل يلا تقبل تخلي بحلگها شوية صحتها ادهورت
بيبي تعاركت ويا علاء هلگد ما گلبها محروك عل ماما شالت عوجيتها وضربتة بيها
وهو بس الله يعلم الديصير بي
الله لايحط أحد بمكانه
يطلع من الصبح مايرجع غير نص الليل.
شهر كامل واحنا على هالحالة خالي يجي بلگي يشرب ماما علاجها
رغد الحد هسه ماعدها علم بالموضوع
اكيد اذا عرفت نفس الصاب علاء راح يصيبها
طلبوا منا محد يحجيلها شي الى أن نأخذ موافقة علاء
اليوم الظهر رجعنا من الدوام هو موجود بغرفتة ماما گالت أخذيني اله
فتحت باب غرفتة ودخلتها بالكرسي المتحرك
جان متممد من شافها گعد
صارت مقابيلة لزمت ايده ونصت باستها خلتة يتخبل سحب أيده منها نزل على ركبتة وحضنها ويبجي مثل الطفل وهي كذلك
_ليشش يمه شيلتيني هم كسر جتافي
احلفج بروح الغاليين اعفيني من هالسالفة
وكلام الله ما اكدررر
_وغلات الراحولي كل الرايدتة منك تعقد عليها وبس اذا بيوم خلفت كلامي وجيتك طلبت منك تكمل زواجك منها شيل نعالك وضربني
_ علاء باس راسها گال حششاج يمه انتي تاج رأسي التريدي يجرالج
البيني وبينها عقد وبس لا عليه بيها ولا عليها بيه
نظرتي الها ماراح تتغير تبقى مرت عماد الأخر يوم بعمري واريدكم تفهموها هذا الكلام
والعقد مو هسه بعد سنويتهم
_ ماما كيفت مثل الهم ونزاح من گلبها بوستة من خدودة وراسة
_الله يرضى عليك ويريح گلبك وبالك مثل ما ريحت گلب امك وخليتها تطمئن على أمانة اخوك
_طلعنا من الغرفة وهسه أجه دور رغد اوووف هاي الثانية اذا سمعت شراح تسوي
ماما أخذت التلفون حجت وياها
ومن سمعت كلام ماما تخبلت سدتة بدون ماتسمع للنهاية
ويومية على هالرنة مابقى احد ما حجة وياها وهي رافضة
اخير شي ماما گالتلها هذا هو براحتج
أزوجي أخو مرت أخوج ومحمد جيبي يمنا
كل السوينا علمودج ماردنا تنحرمين من محمد
واذا اخذتي علاء على الاقل لا راح يدور حقوق ولا يجبرج على شي
وره يومين اتصلت رغد تبجي گالت موافقة وشرطها جان نفس شرط علاء ماعليها بي ولا عليه بيها
خالي اخذ عمامي وراحوا الأخوانها الوسطاني من سامع ماقابل
لكن اخو الكبير مسكتة گايل مو خبصتنا تريدها تتزوج مو حلوة گعدتها بالبيت وهي ارملة
علاء احسن من اخو مرتك راح يربي ابنها وياها بدال ما الطفل ينحرم منها
الأهل كلهم موافقين على علاء لهذا اخوها مگادر يعترض وصار الأتفاق بعد السنوية يعقد عليها ويجيبها
زلال_ خلصت محاضرات من وقت قررت اتمشى الكلية ليال صديقتي گالت اخذيني وياج
رحنا اني وياها من وصلنا
باوعت بالحديقة ماكو اتصلت عليها مجاوبت أكيد بالمحاضرة
گلت الميس تعالي نگعد اهنا
وره شوية اجو شباب وگفوا قريب منا من لطلطتهم سبحان الله مبينين مرحلة أولى مشايف وشاف
يحجون بصوت عالي الي لفت أنتباهي واحد گال اليوم الغراب العطشان جاي اهنا يمكن ضيف مشايفة قبل
صفنت منو غراب العطشان عزززا العزاهم بس لا اني لان فعلاً من السواد لابستة طالعة عبالك غراب
ميس الفطيرة خلت أبدها على حلگها وبس كتفها يهتز من الضحك
وسسم على شنو تضحكين
_لا هيج ههههه
الثاني جاوبه لا يمعود الأسود سيد الألوان مسامع من لبس السواد سبى العباد
مابيها مجال اكيد اني المقصودة بس هذا ارحم من صديقة ابو غراب
ابو غراب سمع ضحكة ميس گال ما جنت ادري دمي هلگد خفيف واضحك
هي الدنيا طالعة من عيني وهذولة نزلوا دوسة ونص روحي صارت بخشمي
لمحت ليال وصديقاتها اجني من بعيد
ندهت ميس گووومي راسي انسطر حمار حجا صارلة ساعة يجوعر بصفي
ميس طكتها ضحكة فضحتنا الأدبسز.
_هيووو انتي منو حمار
_انداريتلة نعم رايد شي وشلون عرفت انت المقصود
_ مايردالها ذكاء اكيد عليه احترمي نفسج لا اخليج فرجة للطلاب
_رحم الله امرئ عرف قدر نفسه
اگول هي الماما من جابتك هم گالولها مبروك اجاج ولد وهو انت ريحة الرجولة مابيك
راد يهد عليه صديقة لزمة ليال اجت بسرعة زميلاتها وحتى زملائها اجوي صارت هوسة
ليال_ ششكو شبيهم وياج
_لاتربية ولا اخلاق عبالك گاعدة بكوفي مو حرم جامعي عيني عينك يتحارشون
_شششايفة نفسج شوفة هو منو اليتحارش بيج دباعي شاربج اثخن من شاربي
_ اي صح وهذا دليل انو بيه رجولة اكثر منك
_بنت القندرة تعالي اشوفج منو المابي رجولةة
_من غلط على بابا ردت اموت
يا كلب ياحقير تغلط على منوووو ولك تروح فدوة للتراب النايم بي
ليال_ زلال تهستر تريد تروح تضربة بجت من كل گلبها زملائي واكو شباب من غير مراحل كلهم ماقبلوا عليه
لزموا من ياختة حتى ضرب ضربوا
بالشافعات طلعت زلال من الكلية اخذتها بعيد گعدتها جبتلها مي صديقاتي وياي معافوها الى أن هدءت رجعنا من الدوام ظلت ساكتة ادري بيها مغثوثة وكاتمة بگلبها
ومن بعد هاي المشكلة طلبت منها ماتجي الكليتي اخاف عليها من المشاكل
بدت الأمتحانات الحمدلله كملناهن على خير
القسم مالتي سووا حفلة تخرج ما شاركتهم ولا حضرت منو اله نفس للفرح المهم اخذت شهادتي وهاهي
الأيام تركض ركض كلما تقرب سنة بابا وعماد وكلما الصدور تضيق حال علاء بالضيم
ورغد كلما تتصل صوت بجيها يگطع الگلب
وماما على حطت ايدنا اي تحسن ماكو جسدها مديستجيب للعلاج ولا للتمارين
وهذا حالها ديأثر على نفسيتنا ونفسيتها
زلال_ راح يصير سنة كاملة مششايفتهم سنة بأيامها ولياليها وفصولها الأربعة مشايفة بيها احباب گلبي ولا سامعة صوتهم ماكو يوم ما ابجي ماكو يوم ما أحلم بيهم ماكو يوم ما اتمنى
لو اروح انام بصفهم بابا ترك فراغ بداخلي وحزن مابعده حزن
اليوم السنوية اخواني وخالي ماقصروا جابوا ذبيحة سووا غدة وزعوا للناس
اقاربنا كلهم يمنا من الصبح احس اليوم كانما أول يوم فاتحتهم شبعنا بجي والعصر اخذونا للمقبرة الولد وصونا مانسوي شي لا عياط ولا بجي بصوت علمود ماما هاي اول مرة تزورهم
شگد جانت تتوسل يأخذوها الهم منقبل نخاف عليها
رحنا وشفنا اسمائهم على شاهد القبور اويلي شگد صعب هالأحساس
والإصعب كاتمين الحزن ومانگدر نطلعة
ماما ماتحملت عشر دقائق وتخربط الولد اخذوها للمستشفى رجعنا للبيت مرعوبين خوفنا عليها طغى على الحزن للمغرب يلا رجعوها
لا ايد ولا رجل والعيون حمر من البجي بالعلاجات يلا نامت
اليوم موعد العقد علاء من گعد ميتحاجى لو ما وضع ماما يمكن يحرگ البيت فوك رؤوسنا
الحد ما صار العصر الف مرة بطل وتراجع
اخير شي خالي رزلة يلا سكت
اجوي عمامي والولد اخذوا وراحوا
المغرب رجعوا ورغد وياهم يبوووو شصاير بحالها
ضعفانة والعيون داخلات نگرة وجواهن اسود
سلمنا عليها ياهو التحضنها تشبع بجي راحت الماما ونفس الحالة طكت بجي بحضنها
علاء اصلاً ما فات للبيت من الباب وطالع ويا امجد عمامي هم راحوا
خالي كعد ويا ماما وبيبي
گال من عقدولهم خواتها مهلهلات
مخلين الكل يضوجون
وسامعنا صوت رغد يمكن تعاركت وياهن
أمهم قبل لا نطلع گالت لاتلومون بناتي السويينا حتى الجيران يعرفون رغد اليوم زفتها
ممجاوبينها ماخذين رغد وجايين
أخوها گايل خلال هالأسبوع نريد عقد محكمة
عاد عمي محمود وخالي محاجين علاء حتى عگب باجر يأخذها يعقدون
رغد صعدت الغرفتها وبعد مانزلت عفناها براحتها أكيد مشتاقة الذكرياتها ويا
لمى دائماً تجي ويا خالة صداقتها رجعت قوية ويا ليال
اما وياي تتصرف برود والكلام شبه مقطوع بينا
اني هم مالي خلگ اصالح واتوسل هو هدومي العليه مطايقتهن مو عاد ابقى ابرر الهذا وذاك
اليوم العصر أجتي ويا خالة وجنا كلنا ملمومين.
فردوس_ زلال شوكت تنزعين الأسود السنوية وطلعت حبيبتي مايجوز تظلين لابستة هلگد
هذا كفر وجزع ترى الحزن مو باللون
_ ما أگدر تعودت عليه هي حياتي من گاعها طفت بقت على لبسي
_گولي يا الله بعدج صغيرة ليش هالحجي
رغد هالكلام يشملج أنتي هم
رغد_لا أبد مستحيل اذبة لحد يطلب مني هالشي فدوة تركوني براحتي
_خالة كوثر وبيبي هنا هم حجن علينا
ما اگدر اسمع منهم أبد گلبي مينطيني انزعة
ليال ووصال لان عدهن اطفال من طلعت السنة حجوا عليهن بالگوة نزعنا لان گالوا موزين على اطفالكم
ليال_استغليت الكل موجودين گلت الخالة فردوس
اليوم اجوني خطابة على زلال
الكل صفنوا بوجهي ومن ضمنهم زلال
كوثر_ يااا هاي العايزة منو هما ومنين شنو مايدرون بيها مزوجة؟!
_اليوم صديقتي اتصلت بيه عدنا زميل جان ويانا بالقسم رايح حاجي وياها حتى تجي تحاجيني
يمكن شايفها وياي من جنت اداوم
من گلت الصديقتي يمعودة زلال مزوجة
گالت الصوج منج ليش مگايلتنا اختي مزوجة
كتلها مصار موضوع حتى احجي
عاد رايحة للولد مبلغتة
زلال_ الحايط نطق اني منطقت
خالة كوثر من ملامحها مبين ضاجت بقت شوية وراحت
خالة فردوس ولمى اليوم يباتون يمنا لان صارلهم هواي مبايتين اهنا
اما بيبي من يوم وفاة بابا وعماد انتقلت يمنا ماتريد تعوف ماما
من فتنا للغرفة عطت على ليال
شششكو تحجين گدامهم هسه يگولون زلال ملطلطة وتفتر منا ومنا
_على كيفج يمعودة وداعتج بقصد حجيت بلكي الجبل يتزحزح متاكدة هسه خالة تگلة
_لياااااال بالقرآن مالي خلگ للمشاكل
وهذا زميلج شيعرف عني وأجه يدور زواج
_والله يا زلولة تذكرين بيوم التعاركتي خليتي القسم كله يحجي بيج بسوالفج وشخصيتج
_شششخصية بدون زحمة هاي ياشخصية شششو واكفة اتعارك مو داخلة حوار ثقافي
ومناقشات سياسية واجتماعية
وبيومها ذاك النذل شبعني اهانات
_الظاهر وكاحتج عجبتة حقج ماشفتي روحج شلون مسحتي الگاع بالولد شوية ويريد يبجي
من غير الكتلة الحصلها من الشباب
_ فاتت لمى سكتت مگدرت أجاوب
باليل ماما وبيبي نامن من وقت
اني وخالة والبنات گاعدات بالغرفة نتعلل
هيج گعدات صارلي هواي مفتقدتها
اللمة الحلوة شوية تنسي الهموم
ليال_ لملوم شعجب لهسه ماكو شي بالطريق
_ احنا منريد بعد وقت لاحگين على الدوخة
دريتوا بابا راح يرجع يسافر
_يتونس لو ششغل؟
فردوس _ شغل صديقة متوسطلة وراح يجددون العقد ثلاث سنوات
زلال_احسج ضايجة
_ما عاجبتني روحتة عدنا خير من الله وهنا دخل شريك ويا اخو الطمع الزايد محلو
شذى_ اعترفي ام وسسوم اخاف غيرنا عليه متريدي يروح
_ لا والله ابد اصلاً توسل بيه اروح ويا مقبلت علمود دراسة وسيم واساساً وين اگدر اتحمل اتغرب ثلاث سنوات
زلال_ وصلني مسج من امجد
مكتوب ( تعالي للأستقبال) فركت وجهي بيدي
باوعت الليال بحقد الظاهر فهمت عليه لعبتلي حواجبها وضحكت
ذبيت التلفون من أيدي گمت بغضب
ليال_ هاا خير وين رايحة
_ الجهنم تجين وياي
_ هههههه لا حياتي هذا جهنم خاص بيج اني شلي دخل
_لاتضحكين بالقرآن ترى ابتلي بيج
فردوس_ششكو يمعودات
زلال_ اسألي بنت اختج سسسوالفها التعبانة ماتطلع غير براسي
عفت الغرفة مشيت للاستقبال واني ادردم
هسه خالة كوثر شدعوة عليها راحت گالتلة اي اكيد رايدني علمود هالسالفة ماكو غيرها
لمى_ ششبيها اختج شو طلعت تفور
ليال_ ترددت احجي ما اريد اغثها وبنفس الوقت ما أريدها تظل تفكر بي وهي على ذمة غيره
أمجد دز عليها يمكن خالة حاجيتلة على سالفة العريس
_ هااا وهو شكو يضوج مو زواجهم شكلي لا بينهم حب ولا غيره
فردوس_ بله ماتسكتين ترى تبقى مرتة وعلى ذمتة اي رجال اذا سمع احد رايد زوجتة او متعرضلها ينجن
وزواجهم يجي يوم يتم وتدرون بيه بحياتي ماگلت شي وطلع غلط
ليال_ خالة تقصدت تحجي هيج گدامها
لمى شكلها احتقن والدموع تلالي بعينها
ردت اغير الموضوع سألت خالة
ترى هالمرة من يروح عمو نريد تبقين اهنا مو بيت خالو
_الله كريم خلي يسافر واشوف شلون تصفى
زلال _فتت للأستقبال امجد گاعد وبيده تلفونة
من شافني بدون مايحجي اشرلي اگعد
من يستخدم هذا الأسلوب اعرف راح تصير كارثة
بلعت ريگ وجيت گعدت
_منو هذا الخطبج؟!
_ششمعرفني لا شايفتة ولا اعرفة
_اذا مشايفتة لعد شلون شافج؟
_ما أدري اگلك امجد لاتسوي روحك غيران عليه
وضايج هو شنو البينا حتى تگعدني هاي الگعدة وترعبني
_دوم تلفين ودورين وترجعين النفس النقطة ششكو البينا وزواجنا ورق
والله حلوة اذا زواجنا ورق معناها استهتري وطز بالگو*** الي على ذمتة كم مرة گتلج دامج گدام الناسسسس زوجتي تحترمين نفسج وتنجبين ششوداج الكلية اختتتج
_لاتگول مستهترة ما اسمحلك والله ممسوية شي وهي مرة وحده الرحتلها
_ومن مرة وحده انعجب بيج وقرر يزوجج؟!
زلال وين حلقتج؟؟ ......
