 |
رواية ليلة الحنة الفصل الثاني والعشرون بقلم بسمة البياتي
كم هو مؤلم فراق الأحبة وما أصعب العيون حين تنظر مودعه،
تختلط مشاعرنا بالبكاء والأنين،
ويحترق القلب حسرة وألم،
ونشعر بالاحتراق قد وصل لحناجرنا،
يمتنع الكلام من الخروج،
وتصبح أنفاسنا مختنقة لا ندري ماذا نفعل أن أردنا الكلام لا يخرج سوى همسات غير مفهومه متقطعة بأنين.
غزل نايمة بالغرفة سمعتها تبجي ليال گالت روحي جيبيها طبيت للغرفة شلتها ثواني وصوت الصراخ ترس أذني
لا الكلمات ولا الحروف تعبر عن الصار بيه بالحظها
شلون نزلت غزل من أيدي وطلعت أركض ما أدري
وصلت للطرمة لگيت ماما باب الحوش تريد تطلع ولازميها
رغد گاعدة بالگاع وتلطم على وجها وهاي عمتي ششجابها وليش دتبجي
عطت بصوت هز البيت ولكم ششششششششكو بابا ششششبي
محد يحجي ولا جاوبوني ماما طلعت تركض
مرت خالي وشذى طلعوا وراها يريدون يفوتوها جوة الجيران كلهم التموا
جريت ليال من هدوووومها لج أحجي مو راح اموت
ليال_ بشهكة ما ادري والله ما أدري عمة فاتت من الباب تبجي التمينا عليها نريد نفهم شبيها گالت ششنو ماتدرون محمد و عماد مسوين حادث وهسه هما بالمستشفى والدنيا مگلوبة اهناك
زلال._ كمت الطم على وجهي واصرخ ما ادري منو لزمني
الله عليكم گولولي عايشششين ومابيهم ششي
بابااااااا ويييييينك فدوة اروح الطولك تعال لا تحرررمني منك
ليال_بيتنا نگلب گلاب اقل من ساعة واقاربنا كلهم اجوي مسستحيل هيج يتلمون اذا ما صااير شي المصيبة نسأل محد يجاوب تگطعت گلوبنا من البجي والصراخ ماما أكثر من مرة توگع تتخربط
بنتي ما أعرف عنها شي ولا أدري وينها
لهناك وجابولنة ابشع خبر لا عقلنا يگدر يستوعبة ولا گلوبنا تگدر تتحمله وتتقبله عماد الحنين أبو گلب الطيب الشهم صاحب الغيرة وابو وگفات الحلوة احزام ظهر امه ومرتة وخواتة مات راح بالمحة بصر
راح وعاف ام مفجوعة
رمل زوجة شابة
ويتم طفل مالحك يشبع منه
ابد ابد مانگدر نتقبل خبر موتة بهالسهولة
گالوا الضربة اكثر شي جاية بي من لحظتها مسلم امانتة اما بابا بالمستشفى بين الحياة والموت
ماما ماگدرت تتحمل الخبر نفس اللحظة وگعت
وبعدها بساعات احترگت روحنا ونزف گلبنا بالخبر الثاني راح سندنا الأب الحنون الي بعمره ماكسر خاطرنا ولا بيوم غثنا جانلنا ونعم الأب
بيوم واحد خسرنا أب واخ لو نبجي بدال الدموع دم هم مانوصف الدنعيشة
من البجي والصراخ راح صوتنا وذبلت روحنا
ليل طويل متروس وجع وحسرات شينوم العين وشيسكت القلب المفطور
زلال نايمة جفي بفرأش بابا حاضنة دشداشتة
وتون صوتها اختفى
رغد بعد ما شفتها وما أدري عن حالها شي
الفجر صارت خبصة برا گالوا جابوهم
طلعنا نركض للطرمة الباب مفتوحة على وسعها
طببوا بدال التابوت تابوتين
هذا أبوية جابوا مشيول على الجتاف الي جان هو يشيلنا على جتافة
وذاك أخوية أبو طول الحلو بس هسه
مداشوف طولة نايم بنص خشبة
لحد يحجي عن الوجع مثل هيج وجع ماكو مثل هيج حرگة گلب ماكو ناررررر مشتعلة بصدورنا شيطفيها
فتحوا بابا الأستقبال وفوتهم نزلوهم للگاع
ماخلونا ندخل من طالعوا الزلم گالوا خلي النسوان يفوتن يودعوهم
طبينا نتراكض اني وزلال ووصال نمنا فوگ تابوت بابا ورغد على تابوت عماد نحير نحجي ويا منو لو نودع منو
زلال تصرخ بصوت مبحوح تريد تشوف بابا الولد
ميقبلون گالوا مغسليهم ومكفنيهم مايجوز
حتى من شوفتهم وهما جثث هامدة حرمونه
زلال_باباااااا گوووووم لاتعوفني مو تگول أنتي عزيزة گلبي أخذ عزيزتك وياك ولاتعوفها
عماااد ليششش أنت رحت ليشش مو أني حاجوني للتبقووون ساكتين
أضرب على التابوت وأهز بي أريدهم يتحركون
أريد ارجع اسمع انفاسسهم
أريد يوگفون على طولهم ويگولون هذا شششقى ردنا نختبر معزتنا عدكم
ما أعرف منو أجه شالني من فوگاهم وطلعني
ارفسسس أريد أرجع عووووفوني راح يأخذوهم يخلوهم جوة التراب
تعبت گلبي صار ستين وصلة من اللوعة فقدت وعيي
من صحيت كلشي منتهي حبيبي وأخوي الحنين مأخذيهم
ليال_ نصبوا الفاتحة اني وخواتي بعالم ثاني
لمى أجتي ومن يومها غزل يمها خلف الله عليها هي أداريها
سألت على ماما ومنو يمها بالمستشفى
لمى_ ماما وياها
_شلونها عرفت ردت احجي ماگدرت بالكوة نطقتها عرفت بابا هم راح
لمى _ ما أدري والله ما اعتقد گايللها وضعها بعده تعبان
ليال حاجي زلال بلكي تخلي مي بحلگها صارلها يومين ماتقبل لا تأكل ولاتشرب
_منوو اله نفسس شحجي وياها ليش اكو كلام ينحجي بعد هاي كسرتنا
_شدي حيلج مو النفسج الخاطر خالة وبنتج
_ الجنت قوية بوجوده ومشدود ظهري بي راح
ثالث يوم أجت خالة من المستشفى وخالة كوثر راحت بمكانها
هي وعماتي حجوا ويانة هواي وبالغصب اني ووصال خلينا شي بحلگنا وهالشي مو النفسنا
اني الخاطر بنتي ووصال الخاطر اطفالها
اما زلال منتهية حتى اليحاجيها متجاوبة
الرابع يوم وهي نقطة مي ممدخلة الحلگها
نايمة بالفراش واكثر الوقت نلگيها فاقدة الوعي
راحوا جابولها مغذي شكلولها من صحت وشافت الكانونة بيدها شلعتها وخلت الدم يفور
علاء وعادل برا بالفاتحة مانعرف عن احوالهم شي
رغد حالها نفس حال زلال أبن عماد متعلق بابو
كلما يسأل عليه خلي الصغير والكبير يبجي
خامس يوم عماتي گالن صيحوا أمجد يحاجيها هو رجلها بلكي يگدر يأثر عليها
اووف اليدري يدري والمايدري لايدري
باليل ما أدري منو منهن دزت عليه
فات للغرفة لمى وخالة فردوس وعمتي والبنات موجودات راد يرجع يطلع
عمة أخذت البنات وطلعت لمى گاعدة بصفي ما اعتقد شافها وحتى لويشوفها مراح يتأثر مصيبتنا اعظم من سالفتهم
امجد _ فتحي عيونج خلي احاجيج
سحبها من أيدها حيل مابيها خالة خلت وراها مخاد استندت عليهن
امجد_ اذا گطعتي الأكل والشراب شراح تستفادين؟ بنظرج هذا الشي راح يرجعهم
زلال_ خليت أيدي على أذني اشش اسسكت لاتحجي شي ما أريد اسمع
_مو كيفج غصب عنج عبالج بهاي الطريقة تموتين وترتاحين لا غلطانة راح تتعذبين بالحياة وبعد الموت عمي وعماد مكانهم الجنة
اما أنتي الدتسوي انتحار وتعرفين الينتحر وين مكانه
_ابجي بصوت عالي أريدهم ما اگدر اعيشش بلياهم امجددد أريد بابا
ماتوااااا بسببي اني السبب بكلششي ديصير
فردوس_صدك كذب أنتي ششعليج هذا يومهم
امجد_ لا اله الا الله بنتي ششبيج شنو بسببج؟!
زلال_ بابا جان مثل الورد كلشششي مابي تمرض من قهرة عليه
لوما مأخذة أخوك وعايفني بذاك اليوم جان بابا ما شكى من شي ولا احتاج يروح طبيب ويموتون بالطريق
عافيتة راحت من قهره عليه
امجد_ هذا يومهم خلصت خبزتهم من الدنيا
حتى لو مامتمرض هم جان طلعوا وصار الي صار
كافي تحملين نفسج فوك طاقتها
_والله أزوجتك علموده ردت يرتاح وترجعلة صحته
جنت خايفة عليه وعلى ماما وعلاء
وهسسسه شششنو بابا عافني وعماد ويا وماما بالمستشفى والله اليعلم تعيش بعد هاي خسارتها لو....
فردوس_اششش عماتج ونسوان عمامج لايسمعن ستري علينا وسكتي ترى گلوبنا مو حمل حجي هذا وذاك ومغثة
_لزمني من كتفي وهزني بعصبية
_ اصحيييييي على نفسسسسج أبوج وعماد خلص راحوا والميت ميرجع وامج هسسسسه عينها عليكم تتقوى بيكم اذا تريدوها ترجعلكم سساعدوها واوكفوا وياها بهاي محنتها
تريدين تعرفين عمة ششششبيها
فردوس _ كافي امجد مد تشوف حالها
_لا عمة ضروري تعرف
عمة حوربة نضربت جلطة وصارلها ايام بين الحياة والموت
اذا من صدك تريديها تگوم بسلامة ساعدي نفسج وسندي امج اما اذا متهمج ابقي مثل ما انتي ومن تشوف هذا حالج لاتتصورين راح تبقى عايششة
ليال_ گمت وگفت هسسسه تاخذوني الها ماما مجلوطة وماندري بيها عزززززا بعيني
وصال گالت اني هم أروح
أمجد عاط بينا گعدواااا وسسسكتوا وين موليات
وضعها اليوم احسن بيكم خير
ششدوا حيلكم وساعدوها تعدي محنتها
سسسمعي زلال اذا أسمع ممأكلة هالمرة اني أبتلي بيج
زلال_ من الصدمات أحس گلبي مات گمت ما انطي أي ردت فعل
بحيث شال گلاص المي شربة الي بدون ما احرك ساكن كأني غايبة عن الوعي وبس عيوني مفتوحة
يمكن اليسمع يگول أكيد هاي دتبالغ لكن قسماً بالله مد احس بشي بحيث جابوا أكل يشربوني الشوربة صرت ما أگدر اگوللهم لا لو احرك اطرافي وأبعدهم عني
أستمريت أيام على هذا الوضع
ليال_ خلصت الفاتحة وكلمن رجع البيتة
ماما محد قبل يأخذني الها اليوم راح يطلعوها من المستشفى
جابوها للبيت ياريت لو ميتة ولا شايفتها بهذا الحال خلال أيام كبرت عمر ثاني فوگ عمرها
بكرسي متحرك علاء يدفعها وحدة من اديناتها عوجة وحلكها هم معوج
ياربي هسه اني أبجي عليمن
على هذا الحال الوصلتة أمي
لو على أبوية الي لهسه ريحتة بالبيت وصوتة الدافي يرن بأذني
لو اخوية الي خطفى الموت بعز شبابه
فاتت جوة ماتگدر تحجي بس الدموع تصب محضريلها سرير بالهول علاء شالها نومها بي
حجت بكلمات مامفهومة
علاء يحاول يفهم شريد بالگوة عرفنا تريد محمد أبن عماد اخذنا الها بالأيد الثانية لزمت رأسة خلتخ على صدرها وتون
نورية_ اخذوا منها گلبها راح يوگف
علاء دموعة تزخ حضن محمد أخذه وطلع
اني ووصال گعدنا يمها نبوس بيدها ورجلها
وصال_ابوسس رجلج رحمي بحالج وحالنة لاتيتمينا انتي هم لا تشوفيني بهذا عمري وعندي اطفال بالقرآن بالياج أضيع
ليال_ هذا البيت واكف على شعره لاتهدينا علينا
بيبي نورية فكت صدرها ورفعت رأسها صاحت بعلوا صوتها
نورية_ يا رب الكرم والجود انطيها الصبر
_ وره شوية أخذت علاجها ونامت
زلال بهيج مواقف ماتطلع من الغرفة ويمكن هذا احسن شي الها والنه
اذا تشوف حال ماما وتعرف بيها مشلولة الله اليعلم شراح يصير بيها
گاعدة ويا خالة فاتت لمى ضايجة
فردوس _شبيج
_ بابا دمرني كلما يشوفني شعندج باقية ليش مارجعتي عبالك جاية اتونس
رايح متصل على فارس محرضة عليه حتى يجبرني اروح
فردوس _ وليش ساكتة ماحجيتلي
_انتي بيا حال واصلاً مجنت متصورة يسويها ويتصل على فارس
خابرني ضايج يگول عمي ليش هيج حجة صاير شي
الي فهمتة من كلامة ملعب گلبه
_ شششو گعدي اذا ما اطلع حرگة گلبي بأبوج فلا اتسمى بأسمي
ليال_ ليش حجيتلها مبين طلعت تتعارك
_من ضيمي فاض بيه وبعد ما اتحمل من اول يوم الفاتحة اسمعة وساكتة
بس مال يعلم فارس عليه لا لهنا وبس
_ ايوج هم مدري شجاه الله يهدي
_ ليال أريد احاجي زلال لكن اخاف ترفض
_ لا يمعودة شترفض اصلاً بيا حال حتى تفكر بزعل
_هاا يعني عادي
_اي عادي
_ولو مو وقت هذا السؤال
شسمة
_شنو
-هي وأمجد ليش لهسه مامتممين زواجهم
_ فعلاً مو وقته واعتقد انتي تعرفين هما ليش تزوجوا
لمى سكتت بعد مجاوبتني راحت يم زلال
وهذيج لهسه فاصلة عن الحواليها وبس عيونها تتحرك
باليل جيت يمها مسحت على رأسها
زلال گومي ماما تريدج
_ما أگدر اطلع اخاف ما اسيطر على نفسي گدامها
_ لأزم تتقوين همست زلال من تشوفيها لاتخلين منظرها يهزج كوني قوية الخاطرها
_رفعت رأسي شصاير شبي منظرها
_حجيت من بين دموعي ماما انشلت غصيت بالبجي
زلال دفنت رأسها بالمخدة وصارت تصرخ بصوز مكتوم
كافي شششحجيت اني
_يا قوة الدتحجين عنها ليال أريد اموووت تعبت اريد ارتااااح ادعيلي امووووت وأخلص
_لاتخليني اضربج على حلگج موو كافي الراحولنة لاتجيبين طاري الموووووت الخاطر الله
مسحت دموعها اخذتها من ايدها وطلعنا
من شافت ماما للأسف ماگدرت تتمالك نفسها حضنتها وظلت تصرخ بحضنها وماما مفرفحة
بالگوة سحبناها منها طلعناها من الغرفة
خالة فردوس وكوثر اجن رزلها ومن شافن وضعها صار فد مرة سكتن
زلال _ حلمانة حلم يخبل من كثر السعادة جنت بعز نومتي ادعي مايطلع حلم لكن من فتحت عيني وشفت نفسي بغرفتي خابت أمالي دموعي تجري
البنات التمن عليه
عيني أجت على خالة فردوس عفت الفراش زحفت عليها لزمت أيدها
خالة فدوة اخذيني البابا
اخذتني الحضنها
_بسم الله حبيبتي وين أخذج
_وخرت راسي من حضنها خالة فدوة أريد اروح اشوفة هو گالي تعالي مششتاقلج
والله العظيم هو گالي
ليال_ خلي واحد من الولد يأخذنا للمقبرة اني هم اشتاقيتلة
_لا اله الا الله
خلي اطلع اشوف منو موجود
زلال_ رجعت خالة گالت يلا بسرعة قبل لا تگعد حورية ايهاب راح يأخذنا
لبسنا الصايات وطلعنا رغد فرفحت تريد تجي بس متگدر لأزمة عدة
وصال هم اجت
من وصلنا للمقبرة واشرولي على مكانهم تخبلت صرت اشيل من تراب قبرهم واخلي على رأسي
نجرح صوتي من البجي
بابا حبيبي مو گتلي مشششتاقلج هايني أجيتك يلا گوم أرجع وياي
عمااااد گووووم وگوم بابا وياك لاتبقون اهنا
عماد حمودي يريدك كل شوية يبجي عليك
كووووموا ماما تعبانة جانت مسنودة بيكم من رحتوا وگعت ونششلت
ليال_ اني وصال نايمين على قبورهم مانگدر نحجي
نسمع زلال وگلبنا يريد يوگف بالگوة طلعونا من المقبرة
كلما يمر يوم الجرح يكبر والأشياق يسلب روحنا
دوامنا هملنا
اهل الولد الدعم سيارة عماد يومية يمنا يريدون يحلوها عشائرياً ينطون فصل ونتنازل عن أبنهم
لا اخواني ولا عمامي يقبلون
النذل الضربهم سكران وكاسر عليهم بحيث السيارة مطبوگة عليهم
علاء اخير مرة طب عليهم بالسلاح گال اذا بعد شفتكم اكتلكم اهنا وافوت للسجن يم ابنكم النذل واهناك اخلص عليه
من خوفهم بعد محد اجه وعفنا القانون يأخذ مجراه
ماما يومية نسويلها علاج طبيعي بالبداية رفضت
من شافت حالنة سكتت لكن اعرف داخلها رافض الحياة
كلامها شوية احسن من قبل وأيدها يادوب تحرك اصبعها اما رجلها كلش منتهيات
المغرب اجه عمي منير گعد ويا عادل وره شوية گبت العيطة
عمي طلع متعصب وعادل فات وهو يفور
حورية_ شصاير عمك شرايد
عادل_عميش يمعودة هذا عدو مو عم جاي يريدنا نتنازل عن الولد ما ادري شمنطينا وجاي يرد يقنعنا
حورية_ حسبي الله ونعم الوكيل
بعد ترابهم ماناشف نساهم وصف ويا كتالهم
_ماما ظلت تبجي وتدعي عليه
خالي من سمع تخبل
خابر عمي محمود وحجالة
خالي خطية حاله أمر من حال ماما بالأسبوع مرتين ينذب مستشفى من حزنة على بابا وعماد
والمصيبة الي محسوب علينا عم الله يعمي عيونة من كيفة رايح للمركز يگلهم اني اخو المرحوم
ورايد اتنازل
عبالة الشغلة لعبة گايليلة مو انت صاحب الدعوة
حتى تگدر تتنازل
علاء من سمع رايحلة البيتة كاتلة كتلة مدمي.
والحقير رايح مشتكي على علاء ومقدملهم تقرير طبي
الشرطة رايحين للمعرض مأخذي مناك
الدنيا نخبصت
خالي وعمامي البقية والولد كلهم هدوا عليه وهذاك الناقص معاند گايل اتنازل مقابل انتوا هم تتنازلون عن الولد
اكو هيج حقارة باع دم أخو وابنة علمود الغريب وأكيد مو لله بله مبين منطي فلوس
ماما ماتدري علاء مسجون
امجد رايد يرجع يهد على عمي الولد مانعي
وتحت ضغط وتهديدات عمامي واقاربنا
يلا رايح متنازل
وطلع علاء
اضطريت أرجع اداوم الأجازة خلصت وغيباتي صارن هواي هاي أخر سنة الي مو مال أتركها
زلال رافضة اداوم
حورية _ ليش ما أشوفج اداومين
زلال_ الدوام ما طاير عود على السنة التجي الله كريم
_ ليش تريدين تعبيني زلال اذا تحبين أمج داومي ابوج راح واني مادايمتلج
وأخوانج حتى لو هسه بظهرج مصير الدنيا تلهيهم
أريدكم تعتمدون على روحكم وماتعتازون أحد
أريد من انام بصف أبوج وأخوج أرتاح وماتظل عيني عليكم
_مووووت مووووت كافي فدوة كافي
يامستقبل هذا التحجين عنا من بعدكم
ضعت بموتت بابا لاتضيعين الباقي مني
ميخالف اداوم بسس تستمرين بعلاجج
ماما أريد ارجع اشششوفج واكفة من جديد
_حورية تبجي وتمسح بدموعها والله لو عليه اليوم گبل باجر ادعي الله يأخذني يمهم
الواگفين بعيني أنتي وليال ومحمد
_حضنتها وشبعت بجي قررت أرجع اداوم
لوبيدي ما اطلع من هاي الغرفة واهسي مكسور من الحياة كلها بحلوها وبمرها
داومت ويا ليال الأسود مغطيني من فوك ليجوة
حتى داخلي مفحم من الحزن
صار خمس أشهر على. موت أحبابي خمس أشهر
ونار فراگهم مراضية تطفى بالعكس دتزيد
رغد صار فترة من كملت عدتها المسكينة صايرة جلد وعظم اليوم المغرب امها وأخوانها اجوي
ومبينا جيتهم ورأها شي
أمها گالت رغد العدة وخلصتها لأزم ترجع البيت اهلها متجوز بقيتها بهذا البيت الناس والگرايب اكلوا وجهنا
حورية_ ماظلي من ريحة أبني غير ابنة ينطيج گلبج تحرمين ام ملجومة منه
_ أم عادل والله لو عليه فلا أجي اخوانها مايرضون
وأبنكم دوم نجيبة تشوفوا الدنيا ماتگاطعت
شلون نحرمكم منه نبقى أهل ان شاء الله
الراح جان عزيز علينا مو بس عليكم
زلال_ اخوانها نفس الكلام حاجينا العادل وخالي
ماما تخبلت حاضنة محمد وتبجي رغد توسلت بأمها ماتريد تروح والأم رفضت تخاف من ولدها أخذوهم وراحوا
وماما تخبلت عبالك هسه رجعوا جابولها خبر موت عماد
تمرضت واحنا داخلين انذار من الخوف
شهرين وهي تون وتنوح عليه من نجيبة تشبع بجي وهو هم متعلق بينا
اليوم گاعدين فات علاء شايل محمد وجها أحمر مبين متعصب
حورية_ منو جابة وشنو هاي الجنطة
علاء_ أخو رغد وصلة وراح
گال الولد يبقى ابنكم مانگدر نتحمل مسؤوليتة
وأختنا اجت قسمتها نريد ننطيها......
