 |
رواية ليلة الحنة الفصل الواحد والعشرون بقلم بسمة البياتي
عمو عاطف شمسويلة وهيج حارگ گلبه
امجد أبد مو واعي لهذا يحجي براحتة يسب ويغلط المشروب كلش مأثر بي
حركاتة نبرة صوتة تمرد الگلب
فات علاء انداريت عليه يباوعلي بـ عصبية
علاء_ شعندج اهنا امششي الغرفتج مدتشوفين طايح حظه ومايدري بالدنيا طشت لو رشت
امجد_هييي گوا** غير مرتي رب الحلو قابل فايت ولگيها بحضني
زلال_ عزززا بعينك امجد هذا ششجاي يخرط
علاء_ تولين مناااا لا أبتلي بيج خبصتي روحج حتى تأخذي هااااج استلمي
_ على كيفك والله بس اسألة يجاوبني وأروح
ما الكي احسن من هاي الفرصة اذا صاحي لو اموت مايحجيلي
أمجد_ بنت ** شايفتني اطوطح
اني اصحى منكم كلكم
علاء_ اي يابة احنا السكارى شلون يخليني فوك هاي حالتة اكمل عليه
زلال_ دكااافي اذا تظل تحجي هو هم يغلط
علاء گعد مقابيلنا يفور من العصبية
انداريت الأمجد
يلا كمل عاطف ليش ما خلاك تأخذ لمى
_لأن أكبر گو** وساق** واني مو من مستواه
حافي راح اعيش بنتة بالفگر
_ عگدت حاجبي هذا شديحجي شلون يعني مو من مستواه؟!
_ اركان العار من باگ الفلوس صفيت على الحديدة
هههههه كله منج شلون قبلتي تأخذين هذا السرسري المسربت
_فسمتي السودة
_عاطف من شاف المعرض فرغ بضاعة مابي
تخبل يومية سلام عليكم ولافيني باع دمه
وكل جيه لأزم يسممني شراح تسوي ومنين تجيب اذا يبقى هذا وضعك ما اگدر انطي بنتي الواحد حافي يموتها من الجوع
وكل جية نفس الأسطوانة
جنا موصين بضاعة ولأزم نستلمها
زين منين نجيب والفلوس بح ماكو طلعت فلوسي الجامعهن الزواجي وبعت السيارة وليد وايهاب وعماد هم ساعدوا وستلمنا الطلبية
هسه غير الكلب ابن الكلب يفك ياخة مني ويسكت لا مو بالحيف طلعلي بسالفة السيارة
خليت فلوسك وانت اصلاً شريك وشراح تحصل
واذا جيت اتقدمتلها وين تگدر تجهزها
ما كفاه الحجي يمي رايح لاعب بعقل لمى
خابرتني ناصبة مناحة ششلون تصرف فلوس زواجنا انت شعليك وليش تدفع هلگد
گتلها يابة العار الباگهن اخوية ويشتغل يمي لعد منو يدفع علاء وعماد مو كافي عليهم الصار بأختهم
ومن الأساس عماد ماقصر بشي
أسبوع وهي تبجي تريد ارجعهن هي من صفحة وأبوها من صفحة كرهوني بعيشتي بالگوة قنعتها وسكتت
طلبت منها نگطع مهر والعرس من الله يرزقني أكمل جهازها وأخذها
گالت لا ما أگدر تريد الناس اتگول عليه مأخذة واحد حافي ههههههه نفس حجاية أبوها
اصبر من تجمع نزوج صبرنا هواي هسه هم نصبر اذا أجيت بابا ماينطيني
كتمت بگلبي وسكتت
يومين ولفاني أبوها الناقص
گال ياريت تصرف نظر عنها بصراحة حتى لو عندك ما اگدر اطمئن نطيتها ألك مو بعيد تسوي بيها نفس السواه أخوك اثنينكم نفس التربية ونفس الدم متأكد طالعين على جدكم مو عاف بيبيتكم واخذ غيرها
وياريت تصير رجال وتنسحب من حياتها خلي عندك عزت نفس وكرامة وهذا كلامنا ما أريد أحد يعرفة
_وتركتها الهذا السبب؟!
_لعد تريدين أبقى وياها واني بعينهم اقل منهم صح احبها وشاريها بروحي بس مومعناها انذل واسكت من توصل الكرامتي انعل أبوها لا بوها عشيرتها
والأهم من هذا عفتها الشي يسوى
انتي التأذيتي بدون ذنب
وصديق عمري الجاي يضيع گدام عيني
_لا أمجد أبد مجان لأزم تسمع منه هي تأثرت بكلامة اكيد بدون قصد جرحتك
علاء_ ليش ماتنجبين دخلي بنية وأبوها يگولولي هيج ومحمد اشرب من دمهم
_عززززا صاير تحب الأجرام
ردت اگوم من گدام امجد لزم أيدي
_ تعالي نامي بحضني
_عيوني اتسعن متت بدمي لا هذا أكيد تخبل
والله من يصحى ويوعي للسواه يمكن يضرب نفسه طلقة
علاء گومي للللللللللج
امجد_ لك *** رجال ومرتة شكو گاعد بنصهم
_ سحبت ايدي قووي عفتهم وطلعت أركض
رجعت لفرأشي مگدرت اقرأ من القهر
ثاني يوم امجد من الصبح طالع
خالي يومين بقى زعلان منه وهو حتى رجعة للبيت مارجع ثالث يوم وليد حاجي ويا وجايبة مخلي روح على خالي ويعتذر منه
أسبوع وأجتنا خالة فردوس وضعها أبد مو طبيعي
اگلج ليال معرفتي خالة شبيها؟!
_ زعلانة ويا عمو عاطف عايفتلة البيت
_عااا شصاير انوب وشعجب مراحت البيت خالو
_ والله مدري
_ وره شوية فاتت الغرفتنا ماما گعدت وياها
سألتها عن سبب الخلاف
_شحجي وشگول كل البلاوي تجيني من جوة رأس عاطف لعب بعقل بنتة يغافلني ويظل يزن براسها لو يأخذها يم خواتة ويستلموها يقنعن بيها
حورية_ وروحه الأبوي كلشي مافهمت لمى مو زوجتك واستقرت الله يسعدها بعد على شنو تتعاركون
_ ششستقرت صارلها اسبوع لا أكل ولا شرب وليل ونهار تبجي من ثالث يوم زواج
يومية ياخذوها يشكلولها مغذي
_ يا ساتر هاي عين ماصلت على النبي قل أعوذ برب الفلق
_لا وداعتج مو عين هذا اسمه تسرع وطيحان حظ الف مرة حجيت عوفها مو وقت زواج خليها تنسى دك رجل الحد ما لعب بعقلها
وكل شوية جايتني تگلي موافقة اريده ليش دتوگفين بقسمتي سنة كاملة اني وياها معارك
عبالها الزواج سهل بدلة وحفلة وهاهي ومن تنجمع ويا الأمور راح تمشي
عادي ويجوز فكرت بزواجها راح تنتقم من....
_خالة ماگدرت تكمل اكيد قصدها تنتقم من امجد تحرگ گلبه مثل ما حرگ گلبها
حورية _ لعد ليش قبلتي
_داگلج زهكت بساعة غضب گتلهم شسوون سووا واي شي يصير مالي علاقة
وهاي النتيجة
والمصيبة عاطف ميعترف بغلطة يگول عادي منا الشهر حياتها تستقر لان بالبداية وممتعودة على فراگنا تأثرت وتعبت
زلال_ لوبيدي اخلي كل خياسات رجلها بيدها
لكن سكتت مو مال ازيد الطين بله
ليال_ خالة بقت يمنا باليل متمددين ودنسولف زلال بالأستقبال دتقرأ
سألتها لمى ليش حتى علينا متغيرة بخطوبتها وعرسها حسستنا احنا غربة وعماتها وبناتهن هنا وبس والله حسينا نفسنا حالنة حال
اقارب العريس مانعودلها شي
_ عماتها مسويتلها غسل دماغ يحشن برأسها
واذا احجي وامنعها منهن تتخبل تتصالف وياي اتگلي على الأقل اهل ابوية احسن من أهلج
ماغدروني ولا طعنوني ولا شفت أذية منهم
_يعني بسبب امجد وزلال كرهتنا كلنا وطلعنا مأذينها شنو هالتفكير احنا شلنا دخل
_ اني هم زهكت وتعبت حجيت بالعيني وأغاتي مفاد صيحت وتعاركت هم مفاد وهاي نتيجتها طيحن حظها يومية تخابرني تبجي تلوم نفسها لأن ماسمعت حجايتي بس بعديش
_زين رجلها شلونه وأهله شلونهم اخاف مسمعيها شي يغث
_والله كلمة الحق تنگال الولد وأهله درة مال الله رغم هاي سألتها شلونهم وياج بقت تمدح بيهم اتگول يحيرون شيسوولي حتى لا اضوج وأبجي
_الله كريم بلكي بمرور الأيام ترضى بقسمتها وتگعد وتسكت
زلال_رجعت من الأمتحان مسطورة باليل بس ساعتين نمت
لفيت رأسي ونمت ماگعدت غير العصر ولوما جوعانة هم ما اگعد
طلعت غسلت وجهي وجيت للمطبخ حميت الأكل صبيت وگعدت اكل
رغد_ صوت عمو عاطف بالحوش
_ گلت بگلبي لا هلا فات للهول گعد وياهم
اسمعه يقنع بخالة حتى ترجع مسوي روحه ملاك
شلت المواعين غسلت أيدي وجيت گعدت وياهم
فردوس_ اي شي يصير ويا لمى انت المسؤول
عاطف_اليسمع يگول هاي مو بنتة ويكرها
لمى تزوجت بمواقفتها محد ضاغط عليها
وفارس خوش ولد غير بنات يتمنون هيج قسمة
زلال_اي واهم شي جيبة مليان مو حافي
كلهم سكتوا وصفنوا عليه
عاطف_لا بنتي مو مهم الماديات اهم شي الولد محترم واخلاقة عالية الفلوس ماتشتري السعادة
_ هواي ناس فاقدين الأحترام حالياً والمصيبة بس الله ينطيهم ويصير جوة اظافرهم طحين
يتفرعنون على الناس ويصيرون هما وبس
بابا من بعيد انطاني نظرة سكتتني ادري كلامي ممترابط ومالة علاقة بكلام عاطف لكن موبيدي لأزم ابرد گلبي
عاطف ضاج
تراضى ويا خالة وراحوا
كملت امتحاناتي لكن ما رتاحيت شلت هم النتائج
عرفت من ليال
لمى وضعها شوية احسن
امجد لا أشوفة ولايشوفني حتى ميجينا الظاهر ماله عين بعد أخر، موقف صار من جان سكران
جيرانة السكنوا جديد صارلهم كم يوم بيتهم خبصة ناس طابة ناس طالعة والبارحة سمعنا صوت صراخ يجي من بيتهم
الفضول أشتغل رجعت حشرية مثل قبل سألت أحمد وحسوني ميعرفون
اليوم من الصبح جابوا سيارة كبيرة حملوا اغراضهم وراحوا
يبو اليوم اذا ما عرفت شكو اموت
طلعت الظهرية فتحت الباب مديت رأسي حرامات حجي صجمة ماكو أكيد فات للبيت من الحر
ظليت رايحة جاية
للساعة اربعة يلا طلع بيده كوب الجاي والمهفة
هم زين ماكو احد برا شغلت الماطور اخذت الصوندا فتحت الباب وطلعت
حجي ريسان_ من شفتج وشفتيني بيت أهلج
_انت گلتها بيت أهلج يعني مو غربة قابل گاعدة على گلبك بعدين خطية ماما والبنات تعبانات جيت أنظفلهم
_الفاهية صايرة نادرة
_اهووو شراح يفضها اليوم اگلك حجي بيت أبو جاسم شو ذولة هم شالوا شنو السالفة
_بيتهم بي جني
_جسمي ارتعش وهو يحجي ويشرب بالجاي ولا عبالك
عزززا تحجي صدك لو جاي تخوفني
_ شعندي اخوفج البيت مسكون ياهو اليگعد بي يأذوا ماتشوفين محد يقاوم
أبو جاسم گال خبلونا باليل يجفصون فوگانة
الغراض تطشر من وحدهم البوب تنفتح وتنسد
بنتهم طالعتلها وحده شعرها طويل ولابسة اسود تخوف البنية من شايفتها رايدة تتخبل
_ يمه گمت اطكطك من الخوف ابلع بريگي وعيني على البيت كلما الهوا يحرك أشجارهم افز
اگلك حجي شو تحجي براحة ولا خايف وانتوا حايط على حايط ماتخاف يطفرون من بيتهم على بيتكم وهاي الجنية ام الأسود تحبك وتتزوجك
_ اليگابلج يتعود على كلشي ماكو جنية غيرج
_ خلف الله عليك مشكور حجي
طبيت للحوش سديت الباب داطفي الماطور
سمعت صوت وراي گال شسوين
گمزت كمزة من الخوف شوية وگلبي يوگف
انداريت عماد خازرني
_ششمطلعج للباب أنتي ماتوبين
_ماظل بيه حيل اجاوبة خليت ايدي على گلبي وگعدت تربعت بالگاع ظل صافن عليه
_عود خايفة لوشنو ومن شوكت انتي تخافين
_ عبالي جني اجه من بيت أبو جاسم اذا ماتموتوني ماترتاحون
_فضولج كاتلج لأزمة الرجال واگعتلة تحقيق
_غير ردت أعرف ليش محد يبقى بهالبيت خوما اظل على عمة عيوني بربك تعال گومني ولاتحجي شي گدام علاء وامجد.
اجة مدلي ايده وكفت
_يعني خايفة من امجد وعلاء ومخايفة مني
_ذولة عكرة روحهم بخشمهم أنت حباب وطيوب وين اكو منك
_خوش تصبغين دخلي اشوفج بعد بالباب عود ذاك الوكت گولي حباب
_ما اطلع بس اسكت فتنا جوة
گال گدام ماما والبنات
_خطية زلال طلعت عايفة بيت رجلها ويومية تجي تنظفلكم
حورية _خلي بالأول تناوشني كلاص مي عود بعدين تنظفلنا
_ لأزمة حجي ريسان وتحجيلة على ندارتها
زلال _كافي ترى راح ازعل مصدكت سمعت شي وجلبت بي
ظلوا يرزلوني الحد ما ملوا وسكتوا
يبو من اجه الليل اطك سن بسن من الخوف
نص الليل رحت نمت بحضن ماما
بيت أهل مينا القديم صار حديث المنطقة يسموو بيت الأشباح حتى اليفوت من يمه لا إرادياً يقشعر بدنة محد يقبل يشتري أو يأجره
الناس تحجي اشكال هذا اليگول سمعنا صراخ وهذا اليگول شفنا ضوا يشتعل ويطفى
واكو اليگول لمحت خيال من سوالف الناس حتى السبع يخاف
قبل جنت رايحة جاية البيت خالي باليل هسه لو يگصبوني ما اوصل الباب المطبخ وحدي
ومن انام لو بحضن ماما او انحشك باليال وغزل
اليوم موعد النتائج يمه شصار بحالي صار عندي مغص من القلق والتوتر
أيهاب أبن خالي هو طلعلي النتيجة نجحت محد مصدك معقولة زلال تنجح من السادس من اول سنة وأول دور مدري شبيهم شادين وياي
معدلي لابأس بي 67 ردت تربية بلكي تطلعلي
رغد_ بنات عندي خبر حلو
ليال_شنو هو
عماد باجر يأخذنا الأربيل نروح من الصبح ونرجع المغرب
زلال_ عاااا احلفي
_اي والله شذى تجين ويانة
شذى _ لا يمعودة القرودة مالتي غير يخبلوني ويطلعون الونسة من خشمي روحوا انتوا الله وياكم
حورية_ قبل لا تتحضرين احجي ويا امجد بالأول
_اهوو يا طرگاعة الماتخلص اوك بعدين اخابره
فتت للغرفة اتصل عليه يطلع تحويل وبعدين خارج نطاق الخدمة
يعني من احتاجك تغلق التلفون ششلون بلوة
رجعت الماما گتلها امشي وياي البيت خالي قبل لاينامون امجد تلفونة مغلق وحضرت جنابة مديجي اهنا مثل قبل
_مالي خلگ نعست اريد انام روحي انتي قابل صغيرة وما تندلين الدرب
_شششنو اروح وحدي صدك تحجي فرضاً طلعلي الجني
_ اخذيها كلمة من أمج لاتخافين من الجني
قابل غبي ويتبالش وياج
_سسسمجة هاي شكو شو حسيت دتقصفيني
گووووومي لايروح يطلع لوينام جريتها من أيدها
خطية تمششي وتسب بيه
بيت خالي كلهم گاعدين وامجد وياهم متمدد على التخم والتلفون بيده
سلمنا وگعدنا
وجهت كلامي الأمجد اتصلت عليك تلفونك مغلق
جاوب بدون ميباوع اتجاهي
_لا مغالقة
_رفعت حاجبي لعد ليش يطلع تحويل وبعدين خارج التغطية حاظرني؟!
_ششعندي احظرج يمكن اشارة ماكو
_اي يجوز باجر عماد يأخذنا الأربيل المغرب نرجع
رفع راسة مدري شلون باوعلي
گال
_اي وبعدين
_شنو بعدين غير دانطيك علم
_تنطيني علم! خووش لا ماكو روحة
_رجع يتصفح بتلفون ولا كانوا بشر كدامة لو بيدي اشيل صينية الأستكاين ونزلها برأسة
شششنو لا ترى والله ضايجة صارلي كومة مطالعة ونفسيتي تعبانة من ضغط الدراسة والأمتحانات
ماماااا احجي ليش ساكتة
حورية _ منج اله لا ادخل ولا عليه
_متت قهر محد بيهم حاجاه حتى خالي ساكت
ذولة شبيهم شگد حجيت ولا يسمع مني اصلاً ممعبرني
عفتهم وطلعت وصلت للحوش صار البيت المسكون كدامي عزززا
سسسسسمجة وينج شنو طابتلج الكعدة مو نعسانة وبالگوة جبتج
_شبيج صايرة بارود
_اصلاً بعد لاتحجين وياي
_اي ذبيها برأسي اكو وحدة تستاذن من رجلها مثلج نروح الأربيل ونرجع المغرب من امداج
_لعد شگله قابل اطبك أيد بيد مثل الهنود وانزل على ركبتي واتوسل بي
تعالي گوليلي هو من شوكت يعترض مو گالي المهم تنطيني خبر مگالي تعالي توسلي بيه حتى اوافق او لا
_ لا دوخيني عندج حجاية روحيلة مو مطلعة سباعيتج يمي
_عافتني وراحت نامت طبيت للغرفة مختنگة مم القهر
ليال_خيرج رحتي بحال وجيتي بحال ثاني ولو الكتاب مبين من عنوانة
_شششعليه بيه هاااا شششعليه ترى كل اليربطني بي ورقة وبس خلي ينگعها ويشرب ميها
_هاي الورقة عقد زواج يعني رباط مقدس
بهذا العقد الله حلله الج وحللج اله
_ كافي مناقصة مواعض
._لاتضوجين اني هم مالي خلگ اروح
_يوو وأنتي ششعليج روحي وتونسي وجيبلي شي بطريقج مو تجين ايد وره وأيد گدام
_لج والله مو علمودج اني من البداية ما حابة اطلع شفتج مكيفة علمودج معترضت
_ميخالف اذا تحبيني روحي اذا بقيتي والله احس بالذنب اما امجد بسيطة خلي يصطبرلي
بالگوة گدرت اقنع ليال تروح ثاني يوم راحوا مارجعوا غير وره المغرب
اما اني ظليت طول النهار مبوزة مو علمود الطلعة وانما ضايجة من امجد ما أريد يتحكم بيه ويخنگني
ليال_ والنبي ولاتونست تمنيتج ويانه
_ ياعمري ان شاء الله نعوضها غير مرة المهم حصلت هدية راحت كل ضوجتي هههههه
ليال_وضع زلال وامجد لا يسر عدو ولا صديق
لا هما المتوالمين وعايشين سوى ولا هما المنفصلين وفاضيها
زلال بعدها صغيرة وادري بيها بسرعة تتألف لو بس شوية يحاول وياها ويتوددلها بس شگول
الحجارة ارحم منه حتى ميباوع اتجاها لمى مسيطرة على كل شبر بي
طلعت القبولات زلال راحت تربية والله معجزة بالنسبة النا زلال وصلت للكلية
اني هاي السنة الأخيرة الي داومت اول ايام والحمدلله مرتاحة لا بعد شفت عزيز ولا شافني
بابا وضعة كلش قالقنا دوم مريض هواي يصفن بوجوهنا نظرتة تملخ
زلال ترجع من الدوام تگابلة وتگعد
الف مرة وصى اخواني عليه وعليها من يحجي هيج يخلينا نتخبل ونشبع بجي خصوصاً زلال تحضنة وتفرفح
زلال_مافرحت لا بقبولي بالكلية ولا بدوامي باليوم اموت الف موتة من اشوف بابا تعبان ومريض كلامة سكاكين ويذبحن بيه
اليوم العصر عماد اخذه للدكتور عنده مراجعة ماما رادت تروح ويا عماد ما قبل
فات العصر وهما ماكو صار المغرب وخلص وهم مابينوا نتصل على. عماد ميجاوب
وراها بشوية انغلق تلفونة تخبلنا
اتصلنا على عادل وعلاء هم ميجاوبون كمية الرعب العايشين بي مينوصف مگابلين باب الحوش وگاعدين ننتظر والتلفونات بيدنا
غزل نايمة بالغرفة سمعتها تبجي ليال گالت روحي جيبيها طبيت للغرفة شلتها ثواني وصوت الصراخ ترس أذني......
