 |
رواية بيت الخبازه الجزء الثاني الفصل التاسع عشر بقلم زهرة الرمان
رشيد
حتى لوبيتها برأيك طبيعي شابات ببيت مع رجل غريب
عمار
أي طبيعي امهن صار شكد من ماتت هنه يمه وزوجته جانت مريضه وإلي راعتها استبررق
هاي استبرق إلي جانت لسان وعصبيه وبيها كل العبر ببيته خلاها تدرس وتنجح وطالبه كليه وشايله مسؤوليه نسوان كاعدات على حيلهن مايكدرن
وكله بكوم وورثوها هذا الرجال شنو عمها خالها وخلولها من حلالهم حالهن حال جهاله
فد يوم أنت واحد من الناس انطيت عشر آلاف وكلت حتى لو صدقه خليت بيد بنات حاجم ويتيمات لا راتب ولا معين بس امهن تصرف علبهن وبسبب حامد إلي راد يتزوجها بيت السيد ما استغلوا ضعفها وحاجتها ولمن انحجز بيت حاجم منو انطاهن وفك الرهنيه
لأن منطي لنفسك عذر ماعندي وإني كذلك وهذا واثق نفس الشئ
اما أبو شكر هدالها جرح بوجها بقت سنه يمكن ماتشوف أحد منه تشوهه وهم هذا الإنسان هو وزوجته عالجوها
هذا القدمه الغريب
وهذا إلي قدمناها منو كفته تدك يا أهل يا عمام
2
واثق
إني بالنسبة لي اشوفهن عايشات احسن عيشه مو أكل ولبس لأ والله احترام وستر
رشيد
وشتكولون لاخوكم
والناس القافله هناك
عمار
اكلك استبرق بقت يمي سنه عليك الله هم أحد منكم شافها
شنو الناس معيشينهن
رشيد
مادري اعرف حامد يربطنه ربطه العجول بكاع بيت خليف
عمار
أي لأن ننطي رگابنه حقه يربطنه
رشيد
شلون نعصيي وهو مريض وعصبي
عمار
احنه تلاثه نكله مسجلين بيت باسمها وتدرس وكاعده واحنه نتناوب نروحلهن ونشوفهن
واثق
شبيك عمار
بصوت ناصي
تدري بحامد مشكلته سيد موفق يكرهه
عمار
فهموني شنكول للرجال كاعدين بييته صار ساعه
رشيد
اكو حل بس كون يقبل..
واثق
شنوه
رشيد
يقسم البيت مثل ما كال السيد يصير بيتين
ونخلي عزيزه تجي تكعد وياهن وهم اخوهن يربى وياهن فضل
عمار
خاف عزيزه ماتقبل
رشيد
عزيزه إني اقنعها بس هسه نعرض الموضوع على السيد ونشوف جوابه
عمار
اتصلت على سيد موفق إلي ترك الاستقبال وراح خلانه نتناقش
موفق
شببج عمو إني مخليهم يحجون ويسولفون وبعدين اكللهم ما يطلعن البنات.
اها ابو فاطمه
جاي
روحي استبرق ولا تجين يم عمامج لحد ما اسمع منهم
استبرق
رجع عمو للاستقبال بيدي صينيه الاستكانات الفارغه غسلتهن واسولف وي روحي واتخيل عمو حامد يجي ويتعارك وي عمو موفق وعمو موفق مريض ويتخربط واكول اسم الله اسم الله ياربي من عندك اريد الحل
موفق
إني موافق اقسم البيت
وحتى لو كلكم تكعدون وياها ماعندي مشكله لأن البيت بيتها
رشيد
احنه ممنونين منك سيد
موفق
المنه لله أخوي وهذا بيتكم بأي وقت هله بيكم
استبرق
سلمنه عليهم قبل لايرحون وما گالو شي أول ما طلعوا عمو سولفلي مقترحهم
يعني معقول عمه عزيزه تقبل تجي
موفق
أي أحد شبيج خليهم ماعسى كلهم يجون
المهم انتي وصفا تبقن هنا
عزيزه
جا خويه وميثم
رشيد
يا ميثم عزيزه ترا لا عبالج مادري مرته شسوي بيج الف مره كتلج تعالي يمي وابقي تجين اسبوع ومن يجي ميثم تنسين كلشي
هالمره خليهم يعرفون أنتي التركتيهم
مو تكولين ما أفرق بين اولاد إخواني
بنات اخوج هسه بس ما تروحين أنتي وفضل يمهن حامد يجيبهن ويسويها قضيه شرف وعرض
ويبيع شرفيات
وهو زهگهن بعيشتهن
لأ اطيك ولا اخلي رحمه الله تجيك
ميثم بعده صغير اشو بيتج هوه خلي كاعد بيه وجهاله هم كبروا وهم تربين وتتعبين هناك استبرق هي إلي اداريج
عزيزه
ماضل للسنه لفضل خله يخلص واصفي كلشي هنا بس شلون بيه على فراگ ميثم
رشيد
والله خويه ما طمع مرت ميثم بيج إلا بسببج لأن تعرفج تخافين على شعور ميثم وتستغلج وتتصرف غلط لأن ما تگليله
استبرق
عمو ضاهريا يبين تجاوز حزنه بس أي موضوع ينفتح او سالفه يبقى ساكت وصافن بعدين يلا ينتبه
مقسمين وقتنه إني وصفا من نرجع ما نخلي وحده نهائي
خابرني قشعم اليوم
قشعم
استبرق شنو سيد موفق ما گلج وين راح
لو رجع بالبيت ؟؟
استبرق
غير أنت تاخذه وين يروح وين راح من طلع وياك
قشعم
كال خليني ب.. .. ... .....
وروح وكتله ارجعلك كال أي هسه رحت ما لكيته
استبرق
يااا قشعم خابره وأسأل هذا الرجال الراحله
قشعم
الرجال كال ما دخل يمي ابد تركته بباب المحل ورحت
استبرق
قشعم دوررره يمعود
وين راح معقول راح للمقبره لأ لأ حلف اخذجن إذا اروح بعد
يجوز يتفق ع هذا الحاجز يقطع البيت
للمغرب صار عندي هيستيريا وقشعم ما كعد ماخلا مكان مادوره واتصل ويكلي من احصل خبر اكلج يربي انفجارات وعبوات وين رحت عمو
صارت ب٨بليل ودخل عمو موفق
ركضت إني أصلا كاعده بالمطبخ كبال شباك البرا
عمووو وين جنت
موفق
شبيج بنياتي
استبرق
ماعرف ليش طاحن دموعي
عمو خوفتني عليك مو تدري الوضع مو زين لأ الشوارع ولا الناس عمووو تلفونك مغلق
موفق
اهدي اسم الله اسم الله يلا اسكتي حضنتها
تعالي
كعدتها على الكرسي وكعدت
رحت لبيت ام رضا كلت بلكي ياسين عنده صديق يسوي قاطع بدون بنيان
مالگيتهم بس مرته وام رضا مموجوده طلعت لموسى بن جعفر
اشو نعست غفيت بالمضيف وبقيت نايم مادري وتلفوني خلص شحن ما نايم هيج من اشهر
استبرق
عمو الله يخليك إذا تروح لمكان مره ثانيه بلغني حت لو ادز مسج
موفق
بعد ابوج يا بنياتي الحنينات
وداعتج ميصير ييه شي إني يمكن نحس خليت نسواني يفاركني ويتمت جهالهن
استبرق
لاتكول هيج عمو أنت الخير والبركه ماعدنه غيرك
موفق تدللين
اليوم هبه ساكته شعجب
استبرق
لأ تفرح هسه تجي تعوص من الباب
اخذها قشعم يشتريلها
لسانها شطوله سوت بقشعم فلك
موفق
بعد ابوها احسن خليها
حامد
وعمير راح وياكم
رشيد
أي
حامد
يعني انتم صدكتوا سمه البيت باسم استبرق هيج لله بلله هذا يريد يخلص من الضرائب
رشيد
لأ أبو شكر لأن ميريد يفرط ببنات حاجم
حامد
هلگلتها يلعوج بنات حاجم مخلينهن يمه شنو ماعدكم ناموس ولكم زلمه غريب شتكول العالم علينه شامرين لحمهم
رشيد
وشبيه لحمنه بأمان الناس شعدهم يمنه عيشوهن من مات ابوهن الناس
الناس سألوا عليهن من مرضت مروه الله يرحمها
الناس التكول عليهم اكلونه وشربونه من مات حاجم خويه
بنات اخونه اليسئلك عنهن ثنينهن كليات
وعمتهن يمهن ماخليناهن اقسام داخلية
كاعدات ببيتهن ويمهن اخوهن هم بادي يشب صلوات
حامد
وموفق
رشيد
خويه مو كلنه يقطع البيت ادري نطلبه بطلابه
حامد
شنو نخلي انوب اختنه يمه
واثق
صدك جذب أبو شكر
خويه تره عزيزه عمرها دخل على ال٦٥ سنه اكبر من السيد
بكد اخته
حامد
شنو اكبر منها
رشيد
گلت اوووو و كمت وصلت لباب الصاله خويه أنت تضوج من السيد على شنو تعقدها متحتاج هيج
حامد
انچب منو هو واضوج منه
واثق
والله عمي رجال والنعم منه خير وصاحب واجب وسيد جده محمد ماجنت شايفه قبل
حامد
بالعافيه يلدثو انت معلم رحتلي اخذت خلود وشهرتني عدك حمايه على عرضك
رشيد
أبو شكر خويه خلص تخلص هاي السنه الدراسيه وتروح عزيزه
حامد
وشلون رضت عزيزه تعيف ولايتها
رشيد
رضت هم بنات اخوهن ذنيج أنت شحارگ گلبك هسه مو لأن بنيات اخوك وتخاف من الغيبه إني هم ما ارضى إلا راسك مرفوع وانت چبيرنه وكلمتك تمشي على الكل
وإني غايتي فضل يعرف خواته ويتعلم شلون يحميهن وبعدين من يكبر بعد موفق ما يضل يمهن
حامد
غبران ثنينكم وعمير راس البلا
واثق
شو اكلك سحبتني وطلعتني شفتهمت قبل لوشنو
رشيد
قبل بس اخوك عنده كبرياء ميحب يكول أي
يغلط بس لأن حمدت بيه شويه ترتيبات
سكت هو سمع ثنينهن كليات هدأ جان همه يضلن بلا دراسة كل العبر بيه بس مايقبل بنيه ماعدها شهادة
واثق
شخصية عجيبه شخصيته حامد
رشيد
خلي بكل شخصيه بس يفك ياخه من هلموفق إلي ما يطيقه
استبرق
فرحت بمقترح رح عمه عزيزه تجي يمنه وفضل
فضل صحيح اخونه بس ما اعرف هسه شنو شخصيته بس مازال يم عمه عزيزه معناها زين
بس تخلص هاي السنه الدراسيه لأن ثالث متوسط
وزاري
موفق
شوف قشعم إني غرفه العلويه كافيه عليه بس الترك الوراها اريد ابني بيه حمام وباب يطلع على الباب الخارجي ويمها يصير الاستقبال نبنيها
حتى من يجي خطار كبال غرفتي
وخلص حتى يصير دخلتي وطلعتي من غرفة العلويه
والباب الداخلي بالبيت اخلي للبنات وللجهال إذا يدخلون عليه
استبرق
عمو ترا كافيه غرفه الجهال على عمه عزيزه وفضل شعدهم
موفق
لأ بنتي الاستقبال جبيره تكفي لعمتج واخوج وياها
وراح ما الغي الباب الخارجي أخلي ومن ورا ع الفرع افتح باب للاستقبال ولغرفتي
يصير وكأن مشتمل استقبال و غرفه وملحقات الصحية
استبرق
مابين كملت السنه الدراسيه كمل البناء لعمو.
حامد
أنتي رايحه لبغداد مو ورا هذا النهر
هذا موفق ماله دخله عليكم ولا اله لازم بيكم سمعتيني
عزيزه
خويه مو بنو وعدلو وعزل الزلمه
رشيد
اقفلي الغرفه البيها غراضج استبرق كالت جهزنهاها غرفتكم لأ تجيبون غراض السيد مرتب الكم الوضع
حامد
وشنو السيد يصرف علينه مانريد
رشيد
ماايصرف هنه غراض ببيتهم. خلوهن لعزيزه وفضل شبيك خويه نقل غراض من محافظة لمحافظة ورقه وعمليات
الزلمه يريد يسهل الامور
طلعنه إني وعمار
وحق الله حامد يغار من سيد موفق
وربي
عمار
شبيك رشيد شنو يغار
رشيد
ولك دسكت هو غير ليومك يروح لگبر خديجه الله يرحمها ويبچي عليها من كثر ما بقت بنفسه موتها من السيد
عمار هسه شنو هلحجي
رشيد
مابيه راحت المره وبعده حاقد على سيد موفق
عمار
خلي بس يسكت منهن شحصلن من عمامهن بس هالنسب الطايح حضه وشكالو الناس وشحجو الناس حامد بعصر قبل الاسلام عايش بعده
رشيد
شبيك إذا يشد حيله حامد يصير إنسان النيادرتال يطك حجر بحجر يشعل نار
تخيل ويلبس وزرهه صوف على خصره ويلزم عوده منبله
عمار
خرب بليسك شبيك اليوم شماكل
رشيد
والله مخلمه وهسه كون استكان جاي يعدل الراس اكلك باجر انتم تروحون لبغداد
عمار
شو صارت تروحون مو تروح وياي
رشيد باجر اگص غراض للمحل وابن واثق حسام ع يوم ادفنه
عمار
شبيه
رشيد
ولك مطول شعره وفارگه وجل وسناسل يلبس برگبته چنه بنيه گوه يتحرك
ما يساعد بالمحل لأ العالم توكف وساعه مايمشي أحد إلا أني واكف على راسه وواثق اكله علگه فلقه وصوندتين وربك يمشي على الصراط المستقيم
عمار
وشنو الكتل يعدله
رشيد
والله يعدله لأ حجي فاد ولا تقنيع فاد ولا اطمع فاد. هذا دواه شلون عسكرية صدام صمونه چنها طابوكه ويصرعه بالخمسه بعز البرد وتكله البس واطلع عرضات وملغطه بلطين ومن يزل فلقه وزيان وسجن
شهر يصير انعم من الدخن ويصير رجال شنو القسوه ما تسوي رجال لأ تسوي
عمار
لأ القسوه هسه هم متفيد
لو واثق مقربه اله من عمر صغير وين يروح ياخذه يسمع رأيه ما يخوفه حتى ما يجذب يفضفضله
جان ما احتاج قسوه
جان كبر سليم هسه ألف عقده بيه
ولا تگلي صغار شبعنه كتل وصرنه زلم المعلم يكتل والاب يكتل والجار يكتل
كل واحد ربت بيه عقده واغلاط ما تتصلح بس اندثرت بشخصياتنه
خاوي ابنك يصدق وياك تقسي عليه يشوفك جلاد الابوه فرض بس حب الوالدين ماتفرضه علبهم تصرفات التفرضهن
إني ابوك تعال غصب حبني لأ مستحيل
صغار يخافون منه بس بداخلهم ميحترمون
بس يدج ريش الحلال بعد ما يشترونه بفلس
بس إذا زرع بكلوبهم محنه ومحبه لومهما بعدوا يردوله
رشيد
ولك عمير على گوله حامد صاير خوش تتفلسف هاي من قدمت دراسات وانت صرت خوش تحجي
عمار
الدنيا أكبر مدرسه تعلم بس شهادتي أريد اعدلها بالوضيفه اجو زعاطيط بدون خبره ويتامر علينه علمود الشهاده الصارت رخيصه بلا تعليم حقيقي
استبرق
خابر عمو عمار كال باجر نجي
عمو موفق كمل كلشي ونقل غراضه وصارت غرفه عمه عزيزه وفضل كامله
قشعم
شلونك سيد
موفق
هله قشعم
قشعم
اجه عمار وخطاره
موفق
خوش حجي
استبرق
مجنت اتوقع فضل هيج شكله نسخه ثانيه من أبوي
دمعت من شفته ولا كأن خلود جايبته بقيت أتأمل مشيته وملامحه حياء أبوي من يدخل مكان كلشي بيه أبوي
وعمه عزيزه لابسه نظارات كلش تعبان شكلها
دخلت أول ما حضنتني بچت
عزيزه
والله ياعمه مو جفه بس مايعنني رجليه
استبرق اخذتها من أيدها وسلم فضل
فضل
شلونج استبرق
استبرق
أهلا شلونك أنت ادخل ادخل ما حت صافحني استحى وإني هم اكو حاجز من يمه كأن شخص غريب
عمو موفق بالاستفبال كعد يمه عمو عمار وفضل
صفا أكثر خجل بعد مني وي فضل
تغدوا وكملوا وعمو عمار راح
وبقى عمو موفق بالاستفبال الجديدة
وفضل وعمه عزيزه دخلتهم بغرفتهم صفطت ملابسها بكنتورها واجيت أخذ جنطه فضل
فضل
لأ عوفيها إني ارتبها
استبرق
براحتك
عمه من تحتاجين شي إني هنا اسمعج
طلعت
عمو موفق يمه هبه وعلي يلاعبهم بغرفته
عمو اخذهم تنام
موفق
لأ عمو روحي إذا عندج شغل كملي يمي الجهال وطلعي النفايات
استبرق
خليتهم يمه وصفيت المطبخ ونظفته ورحت قريب لغرفه عمه عزيزه
سمعتهم يسولفون رجعت
صار أكثر وقت عمو موفق لو يطلع وإذا بالييت هم يأخذ الجهال ويروح يتسوك من محلات قريبه
يخاف على قشعم اوضاع الشارع صايره تخوف انغجارات وعبوات وقتل
صفا تستحي حتى توصل يم عمه عزيزه بس إني بديت من أول يوم
سويتلها ريوك قبل عمو موفق تريكت وتلاعب ب علي وهبه عمه عزيزه بوجها فد شي يخلي الجهال يحبونها
توكلهم بيدها وإني اباوعلها
فضل يبقى نايم للضهر ومن يكعد يطلع برا للحديقه شويه يلا يأكل بس ما يحجي ابد
استمرينه هيج هدوء عمو رشيد خابرني سألني عن فضل
كتله كاعد وساكت
صار بالضبط اسبوعين عدنه عمه عزيزه
كعدت الصبح على صوت عمه تسولف بالتلفون دكيت الباب ودخلت
عزيزه
ولك يمه هي مو حبله شلون تاخذهه للشمال جا الشمال طاير خلها تجيب واخذهه
ميثم
هسه أنتي عدج لو اداين
عزيزه
ماعدي
ميثم
خوش يلا مع السلامه
عزيزه
الله ولحد وين اروح يربي
استبرق
صباح الخير عمه
عزيزه
هله يمه
استبرق
اسويلج ريوك
عزيزه
والله عمه علمتيني على الكعده وإني ما متعلمه تنجابلي صينيه كبالي هذا الدلال التالي اجاني
استبرق
غير عمتي أنتي ومريضه مفاصلج
عزيزه
تعالي خل ابوسج شوكت هيج صايره ولج جنج مو استبرق ألف رحمه لروحكم يا خويه وخديجة
استبرق
عمه اكلج شي
عزيزه
بعد عمتج وگلبها گولي
استبرق
عمه تصدكين حتى العلويه علمتني الله يرحمها وعمو موفق إني الله خلالي ثنين اباء وثنين امهات
عزيزه
ألف رحمه الله على اهلهم
استبرق خليتها تتريك وطلعت اكمل شغل
كم يوم واجه فضل
فضل
اكلج استبرق اريد اروح للسوك
استبرق
أي قشعم موجود ياخذك
فضل
اريد اروح وحدي
استبرق لا فضل الوضع هنا ابد مو زين انفجارات وتخوف مو مثل ولايتنه
سكت وشويه وسمعت عمه عزيزه وفضل يحجون بصوت عالي بس ما رحت يمهم
ايام وهيج الوضع اسمعهم يحجون بصوت عالي بس ما ادخل
لحد ما اليوم دزيت ريوك فضل الضهر
لكيته كاعد وضايج
فضل
اخذي الأكل ماريد
عزيزه
لاتضل مطنكر أكل
استبرق
هاا عمه شبيه فضل
فضل
مابيه
عزيزه
احجي بصوت ناصي
استبرق
طلعت من الغرفه
سألني عمو موفق عن فضل
موفق
ها استبرق شنو انطباعج على فضل
استبرق
ما مبين شئ
موفق
جاي اشوفه أكثر وقته منعزل وضايج خاف جابريننه يجي يمكم
استبرق
والله عمو مادري بعد كم يوم وصار تقريبا شهرين اجه عمو عمار وياه ميثم
بس مافهمنه شيريد
دخلت سلمت علبهم. ولكيت فضل يجمع بغراضه
ها فضل وين
عمار
عيفي خل يروح يم عمه حامد هو دواه
استبررق عمو شنو الموضوع
عمار
يريد يطلع ويطب مايعرف الكعده بالبيت
استبررق
طلعت من غرفه عمه عزيزه دخلت للمطبخ اجه عمو موفق سولفتله
موفق
سهله روحي سويلي درب إني احجي وي فضل
استبرق
دخلت يمهم كلت عمو موفق يريد يجيكم
كالو خلي يتفضل
موفق
السلام عليكم شلونكم
أبو فاطمه إني سمعت فضل يريد يرجع وياكم
أبو فاطمه
أي والله سيد
موفق
فضل باباتي أنت مشكلتك هنا ماعندك لأ اصدقاء لأن عمك خلاك يمنه امانه وهذا عمك إني بأجر الولد اندعم تعارك
انفجار شكول الكم طلع يدون مادري
حتى المدرسة قشعم ياخذه ويجيبه
فضل
ارجع وياك عمو
عمار
بكيفك ارجع
عزيزه
وإني شلون
عمار
أنتي تبقين ذني البنات بحاجتج
فضل
إني أريد أمي عزيزه
عمار
أنت تلعب ماكو تبقى هنا يم عزيزه أو ترجع وحدك وبانه
فضل
هنا ما يحلوني اطلع ولا عندي أصدقاء
موفق
فتره وتبدي المدرسة ويصير عندك اصدقاء حالها حال ذيج المدراس
استبرق
بقى بس شكله ضايج وما يتحاجى
واستمرت حياتنه لحد ما جه الدوام وعمو عمار نقل فضل بمدرسه يمنه
داومنه كم يوم واليوم كعدت الصبح لكيت فضل بالكراج
كتله تعال تريكه
فضل
ماريد ومتا وهيج إني أخذ صفا واخذج لكلياتجن
استبررق
شنو
فضل
شنو تخلون قشعم ياخذ صفا
استبررق
هذا الكلام مو من حقك تحجي بيه وقشعم كرايبنه
فضل
عيب حتى لو كرايب
استبرق
وهم الجكاير عيب فهمت..
