 |
رواية ليلة الحنة الفصل التاسع عشر بقلم بسمة البياتي
حورية... لمى حاجيت أمج وقنعتها وبقى قرارج اذا وافقتي هي تساعدج وتقنع ابوج
لمى. مافهمت بشنو قنعتيها؟!
.. نجي نخطبج الأمجد هاا يمه شگلتي؟
بنتي ليش ساكتة لاتخجلين مني
...خالة بدون زعل كلش متعجبة من تصرفج
.. حقج يمه ستغربين اني فهمت أمج زلال وأمجد زواجهم ورق وبس واذا وافقتي اتحملي هالوضع سنة مو اكثر الحد ما يطلگون
لمى.. ما أريده وماموافقة أمجد من اليوم الأرتبط بي
بـ زلال أنتهى بالنسبة الي وكل اليجمعني بي هي صلة القرابة لا اكثر ولا اقل
.... متأكدة من هذا جوابج
... أي أكيد وداعتج خالة لوبعد يصوغني من فوك ليجوه بالذهب ما أريده ياريت بعد ماينفتح هذا الموضوع وياي
... مدري شگلج يبقى القرار الأول والنهائي ألج
.. أي طبعاً شناقصني وأخذ واحد ماعنده كلمة مثلة الحمدلله انكشفت الوجوه قبل لا اتورط
وأصلاً متقدملي شخص من معارف بابا ودأفكر إوافق عليه
... هذا هو حبيبتي الـ بي خير الله يقدمة ألج
زلال... رفض لمى صدمني مامتوقعة راح ترفض عبالي تكيف وترگص بجفية
ماما سدت الخط من عصبيتها اكو مخدة بصفها شالتها وضربتني بيها
عضت أصبعها
... اااخ منج ومن سوالفج التعبانة
صرت هلگدوتني من ورأج
ليال.. لا تزعلين الصوج مو بيها بيج أنتي لهسه ممستوعبة شلون طاوعتيها واتصلتي
صايرة دايرة ام تخطب الزوج بنتها ومهما كانت الأسباب لو لمى موافقة بربج الناس والأقارب اذا سمعوا شيگولون ماطول شهر ونزل ضرة عليها ومنو الضرة بنت عمتة الثانية وبهذاك الوقت
هم يرجعون يحجون ويشوهون سمعتها
ونرجع نفس الطاس ونفس الحمام
حورية... هذا الحجي احجي الأختج مو الي
صار يومين خلصت گلبي وموعت اذاني احجي انصح اذن من طين وأذن من عجين
گلت اخابر وأسمعها بأذنها رفضهم حتى تجوز وتسد السالفة
شذى... ياا عمة فرضاً وافقت شلون تجازفين
... وروحه الأبوي أدري راح ترفض لمى تربية فردوس طالعة على امها بكلشي نفس قوتها وشخصيتها ترضى بالمووت وماترضى ينكسر خاطرها وتنجرح
زلال.؛ كافي شششبيكم كل الداسوي علمودهم
القهر وتأنيب الضمير راح يموتوني لحد يلومني على تصرفاتي لان متحسون بالد احسه
حورية.. وهاي لمى رفضت سدي السالفة ولاتظلين مجلبة بيها انتبهي الروحج ومعليج بغيرج
... ماما عافتني وطلعت البنات اكلن گلبي اكل اخير شي عطت بيهن حتى يسكتن
باليل تقريباً ساعة ١١ بيدي تلفون ليال اگلب بي جهازي من اخذه مني علاء بيوم الأتصل أركان بعد ما رجعة واني هم غلست ما طالبتة بي
ليال غيرت حفاظة غزل وراحت تغسللها بقيت وحدي وره شوية رجعت گالت
ليال... عيني خاتون أمجد يريدج گال صيحيها الي
... گلبي عصرني ششنو وينه وشرايد مني
... شمعرفني قابل احقق ويا واگله شرايد منها
يمكن طلع للحوش روحيله
... اهوووو لبش مگتيلة نايمة يعني ابتليت صرت على ذمتة كل شوية سلام عليكم وين زلال تعالي زلال
... والله ياعزيزتي محد ضربج على أيدج وگالج وافقي احمدي ربج مطالبج بحقوقة وعايفج تبقين اهنا
... ترى فهمت مو كل شوية لأزم اذكروني دفرت الغطى تهي بهي كلهم صايرين محامين دفاع الأمجد أفندي
طلعت دورتة بالبيت ماكو لگيتة واكف بالحوش بعز البرد ويدخن
اندار عليه وجها وعيونة دم ما أدري عصبية لو من برودة الجو
بلعت ريگ رجعت خطوة ليوره
هاا ليال گالت ردتني
انطاني ظهرة گال امشي وياي
متت خوف ششنو وين أروح يمعود اوگف وحاجيني
ماسمعني فتح باب المشترك وفات الحوشهم
متبسمرة بمكاني مدري أروح وراه لو استر على ريشاتي وأرجع لفراشي
اخاف اذا مارحت يتعصب مني يعاند ويأخذني غصب اعيش بيتهم فوضت أمري لله ولحگتة
لگيتة وأگفلي بالمطبخ حجة من بين اسنانه
... لاتحتبرين صبري من اگلج تعالي تنجبين وتجين بسرعة
... عفية أمجد شبيك متعصب هياني مو أجيت بعد شكو
... امششي صعدي گدامي
.. بخوف وتلعثم
.. هااا ششنو وين أصعد
.. الروح اهلج امششي لاطلعين صوتي
... مشيت گدامه اطك سن بسن من الخوف أمشي واتعثر حاصرتني البجية دخيلك ربي بيا عقل قبلت أخذ هذا الخبل اذا ما خبلني ويا مايرتاح
صار گدامي فتح باب الغرفة وأشرلي أفوت
من صدك تصرفاتة رعبتني نشف دمي وريگي يبس صارت عندي دوخة ولعبان نفس
طبينا للغرفة بس طبگ الباب تقدم عليه جابني براشدي فر رأسي فر من الصدمة والجفلة عطت وبسرعة سديت حلگي بيدي
راد يرجع يضربني انهزمت من گدامة لزگت ظهري بالكنتور غطيت وجهي بكفوف أيدي احمي منه
غصيت بالبجي عفيييية شششبيك شمسويتلك وتضربني
أمجد.. منوووو أنتي وتدخلين بحياتي نبهتج لاتتصرفين من ورأيه لو لااااااااا تالي وقت يجي عاطف الكلب يرزلني من وررررررأج طفل لو مراهقققققق وحاسبة روحج ولي أمري ررررايحة تخطبيلي بدون علمي
هسه لو أشرب من دمج هم ما ارتاح
... الخوف زاد حيل مابقى بيه گرفصت بالگاع
عمو عاطف رايح مرزلة
امجد الله عليك اسسسمعني
.. بنت ال ششششسمع انعل ابو هيج قسمة
.. والله علمودكم بالقرآن السويتة علموووودكم
ردت اصلح الخراب الصار بسببي وارجعكم البعض
ادري بيك تحبها وهي تحبك واني خربت علاقتكم
ردت بسس افهمها زواجنا شكلي على الورق وبسس ماكو شي بينا وكلها فترة ونطلگ
... انعل أبوج لا بوها لابو الساعة العرفتكم بيها
بسسسيطة اني ألج يعني لو مأخذج من البداية جان نجبيتي وسسكتي مووو
... هذا شجاي يحجي گاعدة هو فوگ رأسي يحجي من بين اسنانة رغم صاير نار مايگدر يعلي صوتة حتى لايسمعون يسب ويغلط اول مرة يسب اهلي كرهتة كره العمى
والمصيبة بسبب خوفي منه ما أگدر اجاوبة
دنگ عليه جرني من شعري سحلني بالگاع
من القوة حسيت فروة رأسي راح تنشلع وتجي بيده لزمت ايده اريده يهدني لوبيدي اصرخ بعلوا صوتي لكن اخاف تصير مشكلة بسببي
رفعني من شعري وذبني على الجرباية
وصار فوگايه تخبلت مد استوعب الديسوي
ووووخرر لك شششجاي تسوي
ضربني على حلگي
... اذا سسمعتلج صوت ادفنج اهنا موو هذا التريدي حتى تسسك
... عززززا بعيني عزززززا والله بعد ما اعيدها ولا ادخل الله عليك عووفني بداعة خالو عوفني
اجر ياختة التراك لابسة گلادة انجرت ويا احس شگت رگبتي يريد يجر ملابسسي لزمت أيده
كافييييييي كافيييييي الخاطر الله كافي ووووووخر لاتصير حيوان
رفع رأسه كفخنة على رأسي اكثر من مرة رجع يضربني مثگل ايده احس دماغي تحرك من مكانة
وخر مني
... ولييييي من گبالي اذا تبقين دقيقة وحده ما أضمن الراح اسوي بيج
... ماصدگت گالي روحي گمت من الجرباية
طلعت اركض ما اشوف دربي من الدموع اركض واتعثر على الدرج اريد بس انهزم من هالبيت
رجعت البيتنا حافية
هم زين الكل بغرفهم فتت للغرفة غاصة بالبجي
ليال... فاتت زلال تشهگ وتبجي الشعر مكفوش وجها احمر گعدت لحيلي من الصدمة
ذبت روحها بفرأشها خنگت وجها بالمخدة وتبجي بصوت گعدت يمها جريتها ششششبيج شنو هذا حالج شمسويلج الحقير احجي بدون بجي
.. حضنت ليال راااح اموووت فهميني بيا عقل اخذتة
... احجي شسوالج ضربج
.. هزيت رأسي بمعنى اي
... شنو السبب ولو ماكو سسبب ينطي الحق يضربج
... عرف ماما محاجية لمى علموده
... منين عرف؟!
.. عمو عاطف متصل عليه ومرزلة
....وذاااك اللخ على ششششنو يرزلة استغفر الله استغفر الله
... اني ليشش غبية هاا گوليلي ليشش غبية
موتة روحي من القهر عليهم وهما شايلين خشمهم عليه
هذيج تبجي وتدعي وتصيح ما اسامحها لو اكوت
وهو ميت بلياها
ومن اريد اجمعهم لمى والله ما أريده وكرامتي وهو شوفت عينج شسوى بيه
مسحت دموعي قوي لهنا وبس طز بيهم طبهم طوب على شنو قاهرة روحي وشايلة هم هذا وذاك راح اعيش النفسي وبس أرجع مثل ماجنت مو اني الأضعف وانداس
..زين تسوي لشوكت تظلين هاملة روحج والمرض يأكل بيج فكري بنفسج وبس وخلي بالج امجد هو الأجه عليج مو انتي الرحتيله
... برطمت بس والله أذاني الحقير
.. رگبتج مجروحة
... نگصت بالگلادة مديت أيدي الرگبتي الگلادة ماكو اكيد بقت اهناك
...شو دخت عمو عاطف شكو يخابر امجد ويحجي عليه ترى الموضوع جان كلام نسوان
ولمى رفضت وأنتهت السالفة
... والله ما أدري الله اليعلم شگايله مخلي هيج يتخبل لج من عصبيتة راد
... راد شنو
.. عضيت شفتي بخجل شسمة راد يتمم زواجة مني حتى بعد لا اگول زواجنا على ورق واتصرف بكيفي
... صدك تحجين لعد شلون عافج
... هو تصرف بعصبية ويمكن من حس على روحة ما گدر أساساً هم هم ما اله نفس بيه
... ما ارتاح اذا ما اعرف شبيهم بيت خالة اوگغي خلي اتصل
... عزززا لا فدوة انوب هم يگولوله ويرجع عليه
.. اششش معليج
شلت التلفون أتصلت على خالة صح الوقت متأخر لكن أعرف بيها ما تنام من وقت زلال تكمز من الخوف
فردوس.. ها ليال
.. هلا خالة
.. شعجب ذاكرتني هيج وقت خوما صاير شي احجي ترى انهبطت
... لا لا يمعودة ماكو شي لاتخافين عندي استفسار صغير ماگدرت انتظر للصبح وأدري راح الگيج گاعدة
... نعلعلا أبليسج نشفتي دمي
... هههه صايرة خوافة
.. اي والله من المصايب الدتهف علينا من يدك تلفوني الزم گلبي
مگتيلي شنو موضوعج
... بصراحة عتب
... يووو ياستر عليمن تعتبين يولي
.. عليج العصر من ماما اتصلت علمود لمى وامجد
وحاجتج وبوقتها اخذت الجواب والموضوع انسد وراح صح لو لا
.... أي آكيد وبعد محد حجة بي
.. لا خالة الظاهر مانسد عمو عاطف متصل على امجد ومرزلة
...بتعجب شوكت متصل؟!
...استغربت معقولة متدري بتصال زوجها
.. الوو. وينج ليش سكتي
.. موجودة بلي خالة متصل وحاجي عليه وقبل شوية اجه امجد نار وشرار اخذ زلال كاتلها كتلة مبهذل حالها وهي هاليومين يلا شوية رجعت توكف لحيلها بعدها لهسه مريضة
ترى هي لوما تحب لمى وتحس بتأنيب الضمير وتريد تجمعهم مجان خطت هالخطوة وللعلم امجد مايعرف شي
... ماشي حبيبتي زين گتيلي اني اتصرف
اما بخصوص تصرف زلال أكبر غلط وامج شلون طاوعتها يعني امجد ميدري ويريدن يخطبنلة
.. صح غلط لكن هنا واثقات امجد يريد لمى وعلى هالأساس تصرفن
... لا ميصير ما ادري ليش عد اهلج الزواج لعب
ومايصيرلهم درس انطوج انتي وفشلتي بحياتج
جان لأزم يصيرلهم درس
زلال ما خاشة بالعمرين على الأقل لو منتظرين تدخل كلية مجان صار كل هذا
.. والله صح لكن شنسوي الكلام بعد ما ممخ فائدة گولي الأختج العوبة تبطل طيش
ولاتتسرع ترى ماكو عاقلة تخطب الرجلها حتى لو مجانت تريده
... بلكي يصيرلها درس
.. ان شاء الله
يلا حبيبتي تصبحين على خير
.. وانتي من اهل الخير عمري
زلال... الظاهر ماعدها علم بمكالمة زوجها بس لا راح تتعارك ويا من صوتها مبين تعصبت وانوب عمو يرجع يتصل على امجد واني ابتلي
... لا مايتصل لاتخافين
الموضوع انسد وراح يروح الأمجد ليش شو من رجع من السفر كلش متغير وشايف روحه
...ششعلينا بي
تمددت بفراشي رأسي يوجع من كفخات المايتسمى
الحقير غلط على بابا طاح حظه
... زلال من قبل لا تاخذي تدرين بي عصبي. وهو علاء يحاسبوج على الصغيرة والكبيرة
مو عاد هسه صرتي على ذمتة أكيد راح يتشدد أكثر حاولي قدر الأمكان شيگلج نفذي
صح ما راضية يضربج لكن حقة يضوج
لابيها ولا عليها عمو عاطف يروح يحجي عليه والله اليعلم شمسمعى مخلي هيج يثور
... گتلج بعد فلا عليه خليهم هيج يظلون يتحسرون على بعض من بعيد ذولة مو وجه نعمة
... كافي نامي واني هم خلي انام ورأية دوام
.. ثاني يوم گعدت ولا عبالك صاير شي تصرفت
عادي أمجد بعد ولا شفتة
العصر دزلي گلادتي بيد ريم بنت وصال
السخيف گاطعها لأزم يأخذوها للصايغ
ليال... الأيام تركض ركض بدت أمتحاناتي
غزل عد ماما و زلال هما قايمين بواجباتها وهي هم كلش متعلقة بيهن لهذا كرست وقتي للدرأسة الحد ما كملت هلكت والحمدلله گدرت أنجح صرت مرحلة ثالثة
اليوم العصر عمامي ونسوانهم وعماتي وبناتهن عدنا البارحة باليل بابا شوية تخربط لهذا اجو يطمئنون عليه
عمة ام رائد هي وزوجة عمي محمود صايرات دهن ودبس ميتفارگن
وداد طول الگعدة عينها عليه مدري شبيها
أجت گعدت بصفي گالت عفية ليال خلي نگوم منا أريد احاجيج
اخذتها ورحنا للغرفة زلال موجودة ويا بنت عمتي
من شافتهن ظلت ساكتة عرفت ماتريد تحجي گدامهن همست الزلال اخذي فاطمة وطلعي
زلال... ليش هاا ليش والله فلا اطلع
... اهووو لاتصيرين طفلة ترى مالي خلگ
.. ماشي لاتضوجين تعالي فاطمة نروح للمطبخ نشرب جاي
ليال... اي وداد يلا احجي زلال راحت
... هاا بس امانة لا تضوجين
.. يمعودة ليش شصاير حتى أضوج احجي عادي عيب خطار بيتنا لأزم ارجع اگعد يمهن
... أنت صدك عندج علاقة ويا رائد وراح يأخذج
.. عيوني صارن بگصتي ششششنو لج علاقتيش احجي عدل لا اطيح حظج
... عفية لاتتعصبين الله عليج سسكتي والله مو اني گلت
.. اللهم طولج ياروح روحي طكت اذا ماتحجين اطلع بنص الهول أصيحج واخليج تحجين گدامهم
گامت تبجي وترجف
... عفية سكتي والله مو اني الحجيت
مرة عمي گالت شاكة رائد عنده شي وياها وهي ماتخلي يخطب وداد
ليال اني احب رائد وأريد عمة گلت وهو راد يخطبج بس من اطلگت ليال غيرتة
.. نگص لسانج ولسانها ولسان كل وحده تحجي وتطعن دكافي الخاطر ربكم يعني نلگيها منكم لو من الغربة ياهو الجاي ناهش بالحمنا
لو اريد رائد وعندي شي ويا مجان رفضتة ويمكم جان هسه زوجتة
گومي روحي
... عفية ليال لاتحجين
... وداد طلعي من گبالي
مسحت دموعها وطلعت بقيت گاعدة بمكاني ارجف الله يأخذني اني اكبر غبية شلون اخذت وانطيت ويا بالكلام من رأسلني شششلون
أكيد حاجي الأمه
زلال... بسم الله شبيج راح اطگين شصار
.. عوفيني بضيمي
.. يمعودة احجي لاتعوفيني احلل بكيفي
... اني وياج ليش هيج حظنا هاا گوليلي ليش
.. هاا شلون يعني
.. لا مسويات شي ولا غلطانات بشي نخاف الله وما اعتقد مسويات شي يغضبة
ليش ننطعن بأغلى شي عدنا
.. عزززا منو طعنج
... تدرين زلال قدرنا متشابه اطلگت لان ليث شك بيه
وانتي اتزوجتي لان الناس ماعاوفج بحالج
... نرى سسطرتيني هسه غير تفهميني شبيج
... مرة عمي المصون رايحة البيت عمنا محمود گايله اشك ليال عدها علاقة برائد تخيلي وحده مطلقة وعدها علاقة ششراح يألفون ويحجون عليها
... خرررررب اذا هسه اطلع اهلس عطوبهن واخلي ضيم گلبي بيهن هم احد يلومني
... سسكتي ومعليج اني اتصرف خلي يروحن ويصير خير اهم شي بالأول اتأكدة من شغلة
.. ششنو هي
.. بعدين تعرفين لاتستعجلين
بقيت بالغرفة زلال يمي
زلال.. يمكن راحوا خلي اشوف طلعت للمطبخ شفتهم بالحوش رجعت للغرفة
.. هاا راحوا
.. اي
.. شلت تلفوني فتحت الحظر من رقم رائد اتصلت عليه
بسرعة جاوب عبالك جان منتظرني
... ليال مامصدك انتي دتتصلين
... عبالي صار برأسك خير واني ظالمتك
تبقى طول عمرك نذل وتافه
....لهنا وحدج كلمة زايدة ادوس على گلبي العايشة بي واجي انعل يومج
... هم عندك لسان وتحجي گلبه العايشة بي
والله يا الله
.. لاتكفريني بهالمغربية بابا شششبيج
... تغششم روحك متدري شبيه
كبرت راسك وجاوبتك تروح تفضحني وتگول عدها علاقة ويا لك هاي يا علاقة
.... يا علاقة شششبيج تخبلتي والمنو حاجي
... أمك. رايحة البيت عمي محمود گايلة ششاكة رائد عنده علاقة باليال امك اذا ما شايفة شي لو سامعة ماتحجي هالكلام
... منو گالج امي هيج حاجية
.. مو مهم منو المهم هذا كلام امك جان استحيتوا ولكم اني محسوبة عليكم
... اول شي وربج ماعندي علم بكلام امي واذا متصورة حاجيلها بخصوص مراسلتنا انتي غلطانة
واذا مفكرة شايفين كلامنا بتلفوني هذا هم تفكير غلط وربج نفس اللحظة حذفتهن
ولو نفرض شايفيهن مابيهن شي بالعكس ماحصلت منج غير الرفض
اما بخصوص كلام امي ويا بيت عمي معليج اني اتصرف
... تنفست قوي جنت اتمنى يكون هذا جوابة والحمدلله ارتاحيت
لا خلص لاتحجي شي اذا رحت تعاركت راح يسألوك منين عرفت واذا گلت من ليال راح تثبت التهمة عليه
... مرة عمي محمود تحب القال والقلت اذا سكتنالها هي مراح تسكت ووين ماتروح تحجي بيج
... اي ادري راح احاجي ماما تتصل على ابوك
وانت من تسمع منه عود اتصرف
.. ماشي نص ساعة وخلي تتصل بين ما ارجع للبيت
زلال.. فاكة حلگي منين جابت رقمة وشنو متراسلين حتى اني دخت وشكيت بينهم علاقة
.. وين صافنة
.. تعرفين وين فهميني شنو الموضوع
.. حجيتلها كلشي حتى لاتگرع رأسي
قبل لا اطلع اصيح ماما هي فاتت متعصبة
حورية...جان استحيتوا حابسات روحكم اهنا
والبيت متروس حرت شجاوب من رادن يسلمن عليكم قبل لا يروحن
ششنو يمه صغار ماتعرفون الأصول
ليال... لا اسلم ولا اريد اشوف خلقة زوجات عمامي
... ليش ولج
.. حجيت الماما كلام وداد
خابري عمو ابو رائد خلي يوگفهن عد حدهن
واذا سأل منين عرفتي لاتجيبين طاري وداد لتن تخاف گولي ترى السالفة متنضم
خطية ماما وجها صوفر اخذت التلفون گالت سدوا الباب لا أبوكم يسمع وهو منا مريض
اتصلت على عمو حجتله كل الكلام
حورية... يرضي منو الديصير بناتي لابيهن ولا عليهن كل يوم والثاني الميخافون الله جايبيهن بالطاري والله اذا محمد والولد سمعوا تصير موخوش
ابو رائد... خيتي ام عادل احسبيها عليه وامسحيها بوجهي وحق ليال اني اخذة وشحدها بعد التجيب طاريها بكلمة من هاللحظة اعتبري السالفة انسدت وام رائد حسابها وياي
... لا ابو رائد اني ما اريد تتعارك وتسوي مشاكل المهم تكف لسانها عن بنتي ترى والله البينا مكفينا
ليال.. ماما نهت المكالمة گالت سدوا الموضوع ولاتحجون الأحد الله يجفينا شرهن
باليل رائد دزلي رسالة كاتب
( أخذنا حقج وزيادة شحده بعد اليجيب طاريج وياريت بعد اذا صار شي او سمعتي شي ماتحكمين بسرعة تأكدي بالأول وبعدين سيئ الظن والأزم تعرفين مو رائد الي يضرج )
كتبتلة
( اعتذر على تجاوزي لكن الأيده بالمي مو مثل الأيده بالنار بعد كل الصار بينا صرت اتوقع كلشي وما استبعد احد لان مرات الطعنة تجي من القريب قبل الغريب)
دزيتها من تم التسلم حظرتة
زلال.. قربت العطلة تنتهي قررت هالسنة أرجع اداوم
امجد من يوم الضربني بعد ما شفتة اذا اسمع صوتة بيتنا ما اطلع من الغرفة الى إن يروح
خالة فردوس خلال هالفترة مرتين أجتي
واكيد لمى مو وياها
عرفت بيها بيوم التصلت بيها ليال من سادتة متعاركة ويا عمو عاطف حتى رايده تعوف البيت وهو باقي يتوسل بيها
قبل فترة واحد من معارفة متقدم الـ لمى وهي موافقة واكيد ابوها مشجعها
لكن خالة رافضة
خالة گالت الماما لمى طالعة من تجربة وهاي الفترة مو واعية القراراتها تتصرف بـ ندفاع ما اگدر انطيها اذا ما اتأكد اتجاوزت الماضي وراح تگدر تتقبل شخص ثاني
تفكير خالة كلش حلو
مو متسرعة وتفكر بحكمة
ليال.. باجر الصبح نروح ناخذ ملابس
.. شو الصبح ليش مو العصر الجو حار وين اتحمل
... وصال ماتگدر تاخذنا العصر
.. اهووو وشراح يگعدني من وقت
... مشكلتج لأزم تكعدين اذا مارحتي تظلين بدون ملابس مدرسة
حورية.. موتنسين تگولين الأمجد
.. غمضت عيني أنتي گوليلة
...لا اگول ولا عليه منج اله
... اهوووو قابل ششراح يصير اذا گتيلة بدالي
بعدين ابنج شكو مجلب بتلفوني اخذه والأخذه اخذه
.. شكو ساكتة وهسه يلا حجيتي على العموم من يجي اخلي يرجعلجيا
.. اي خوش
بقيت ضايجة ما أريد احاجي ما اگدر انسى السواه بيه لليل واني لساني مايطاوعني ابلغة
ليال... امجد ويا الولد بالأستقبال روحي سويلهم جاي وبدربج گوليله على الروحه
.. كلها تصيح گوليله عبالك رايحة الديسكو
ماعليه روحي انتي سويلهم
... گومي لج أريد انيم غزل
.. هففف رحت حميت الجاي وصبيتلهم
لگيت بس علاء وامجد عماد ماكو انطيتهم الجاي بدون ما اباوع بوجه امجد
علاء.. باجر أخذلج خط جديد وانطيج التلفون
.. اي خوش مو تنسى ترى اريده
امجد.. وهي شسوي بي؟
.. حجيت بضيق اخابر صديقاتي يعني شسوي بي
.. وششكو گالبه الوجه وتحجين من وره خشمج
امششي جيبه اني اخذلها خط
... علاء گام طلع عزززا هذا وين ولى مو قبل دقيقة جنت احجي بزود لان هو موجود
امجد...عدلي اسسلوبج لا اعدله ألج بطريقتي
.. مامسوية شي انت تريدها من الله حتى ترزلني
... اششش يلا ولي من گبالي
... شگد سخيف
باجر أريد اروح للسوك ويا ليال ووصال
... شعندج؟
.. اخذ ملابس مدرسة
...ماشي
...علاء رجع عفتهم وطلعت طيارة الحجي ويا يخنگني
ثاني يوم رحنا أخذنا ملابس امجد جان منطي فلوس الوصال تنطيهن الي ايباه عود مسؤوليتة وكذا
... ليال اليوم أول يوم دوام اجه الخط اخذني
متعودين اول يوم نقضي تسخت منأخذ محاضرات هواي
گعدنا اني وصديقاتي بالقاعة گالوا اجه الدكتور
...فات الأستاذ عدلت گعدتي
صارت القاعة هدوء
من شفتة تصنمت بمكاني عيوني تشخصت عليه ما اگدر ارمش ما أكگدر أتحرك ما أكگدر اتنفس آحتاج صعقة كهربائية ترجعني لوعيي
لا أكيد هذا حلم
فزيت على حركة صديقتي وهي تهز كتفي تسألني
... شبيج؟ لج سدي حلگج لا يروح ينتبه ويطردج مو من أول يوم تموعين
.. اباوع عليها وارجع اندار عليه
لا هذا مو حلم شجابة ليش طلع گدامي بعدها جروحي مطايبة بعده گلبي ينزف
ليش كلما اريد ابدي من جديد يصير شي يرجعني النقطة الصفر
حبست دموعي نزلت راسي ضميت روحي وره الطلاب الگدامي ما اريده يشوفي
أعرف هالشي مراح يطول مصيرة يعرف بوجودي لكن بهاي اللحظة وهذا وضعي ما اريده يلمحني
القدر هالمرة وگف الجانبي أجه استاذ ثاني حجة ويا وطلعوا خارج القاعة
بسرعة اخذت جنطتي ومشيت صديقاتي يصيحن وراي مالتفتتلهن
مديت راسي خارج القاعة
واكف بعيد ومنطيني ظهرة اخذت الأتجاه الثاني مشيت سريع او بالأحرى ركضت
أطلقت العنان لدموعي صارن يتسابقن على النزول فعلاً الدنيا صغيرة والمنحوس يبقى منحوس
دخلت للحمام غسلت وجهي الف فكرة براسي ششجابة هو لا بجامعتنا ولا اختصاصة نفس اختصاصي
طلعت امشي سمعت صوتة ورأيه وگفت جامدة
اخاف اندار اكرها واكره الساعة العرفتهم بيها كل أذيتي بسببه هو الهجم بيتي
عزيز.. وين تردين تنهزمين؟
.. انداريتله نعم ششرايد
.. هذا استقبالج بعد كل هذا الغياب ترى جاي مخصوص علمودج ودخلت للقاعة ادورلج
.. شششتريد مني مكفاك السويتة بيه ششجابك اهنا الخاطر الله ششجابك
.. انقلت الهاي الجامعة تعودي راح تشوفيني هواي كلما القلب يشتاق تلگيني گدامج
ولو يصير اغير اختصاصي وأجي ادرسج كان سويتها
.... الله ياخذك اياك تقترب مني مفهوووم الگدامك مو ليال القديمة نصيحة اتكفى شري
صفن عليه گال فعلاً مو ليال القديمة زايدة جمال وشراسة
. ردت اروح صاح عليه وين بعدني ممكمل كلامي
الصبر ياربي نعم ششتريد
... أريدج ومستعد أحصلج بأي ثمن وهالمرة صعب تفلتين مني أعرف الصار ويا اختج
ما اعتقد يعجبج يكون مصيرج نفس مصيرها
بكلمة مني اخلي سمعتج على كل لسان وحتى الجامعة احرمج منها
... من الخوف والرهبة والصدمة أريد أرمش ما اگدر
.. گدامج أسبوع وتنطيني جواب يا تطلعين وياي
ياتعرفين اليجرالج...
