رواية لفي بيا يا دنيا الفصل الحادي عشر
باسل قام الصبح بدرى زى ماهو متعود ولولو زيه .. من غير كلام الاتنين لازم يبتدو يومهم بذكر الله وتأدية الفرض الاول الفرق إن باسل بينزل يصلى فى الجامع ولولو فى البيت يطلع يلاقى الفطار جاهز . ويقعدو مع بعض يفطرو ..
باسل وهو بياكل : ها يا لولو ها تعملى إيه إنهارده
لولو : ها أجهز شنطتى والجمل وأقوله نخ ينخ اركب يقلبنى لقدام أقع اخد أجازه
باسل : 😂😂😂 اقسم بالله انتى فقر .. دا تفكيرك عن ازاى تاخدى أجازه وها تجيبى الجمل منين
لولو بتاكل اللقمه وبتضحك : من عند ضاحى الجزار الا جنبنا حاطت الجمل بعرض الشارع ولو اتحرك يمين والا شمال ها يدوس على اتنين تلاته . انا بقى أجيب الجمل وأعمل رحله بيه بدال وقفته دى
باسل أتنهد : والله لو مش أكل عيشه كنت عملتله مشكله وكمان يعنى ها بيجيبه وقت بسيط ويمشيه
لولو : أه بيعرفنا أنه بيدبح جمال .. وأصلا اصلا الراجل دا شبعنا حمير .. الواحد من كتر اكل الحمير والكلاب قرب يسرسع
باسل : 😂😂😂 ما تظلميش على الصبح
لولو رفعت ايدها لفوق : الله اعلم يا بسبوستى أصلى عمرى ما شوفت صنمة الجمل والديل دايما الاقيه لازقه بمشبك فى الأخر
باسل ضرب إيد على إيد وبيضحك بصوت عالى : يابت أرحمى نفسك .. بعد كدا ها أجيبك من القسم من كتر التهيئوات الا عندك .. قعدتك على النت خربت دماغك دا لو حمار وربنا ما أسيبه غير ما أكله هو وولاده منه وأخليه عبره
لولو : أيوا طباخ السم بيدوقه هو لازم يسوى لحمه من الا بيبعها للناس قدامهم وياكلها لو ودانه طولت يبقى بيغشنا لو فضل زى ماهووو يبقى عليه العوض فى فلوسنااإ
باسل : بطلى هزار بقى ها تعملى ايه انهارده
لولو ؛ كلمت هدير مرات حاتم وطلبت منى إنى أروح لها أقعد معاها شويه
باسل : عشان كدا حاتم قالى تعالى نتغدى انهارده مع بعض
لولو : أيوا يا بسبوستى بنعمل مؤامرات عليك وانت نايم فى البلاله .. ياله وافق عشان اقولهم الخطه نجحت
باسل مسك خدها قرصه جااامد ولولو ماسكه إيده .. أه .. لاء بيحمر وبيفهونى غلط
باسل : وبعدين معاكى اتكلمى جد .. وقام وقف انا ها أقوم أعمل شاى باللبن واخدهم وأدخل البلكونه خلصى وحصلينى
لوو ديقت عيونها جامد وتخنت صوتها : انا عايزا نسكافيه المفروض تسألنى
باسل : وربنا منا عامل غير الشاى باللبن هى كنكه واحده وكوبيتين نصها هنا ونصها هنا وها تشربيه .. ياله خلصى وقام وبيعمل الشاى باللبن ولولو بتشيل الأكل الباقى وبتغسل الطباق ودخلت وراه البلكونه .. مدت إيديها خدت المج منه وهو بيقول لها بألف هنا قاعد بأريحيه وفارد رجله وبيشرب
باسل : فاكره المجات دى جبناها أمتى
لولو : طبعا هو دا يوم يتنسى نازله أجيب أوضة النوم رجعنا بمجين .. واحد ليك وبأسمك وواحد ليااا وحطت إيديها على بوئها ولولولولولوى ..
باسل : أمك فصلتنى فى اليوم دا . تقولى ودا بقى توفير والا نوع جديد من اوض النوم وانت ها تقعد فى واحد وهى فى واحد بدال السرير
لولو : هههههههه .. دوختنا يا باسل ومفيش حاجه عجباك وبتشاور على نفسها المفروض انا الا أختااارطلع كله فى الهوا الاسم العروسه هى الا بتجيب على زوقها وبنتخدع فى الأخر
باسل بغمزه وأبتسامه منوره وشه : وحشه
لولو : توء جميله جدا جدا وعرفت ساعتها ليه العريس هو الا بيختار
باسل : ليه
لولو : عشان انا مليش رأى ولا كلمه عليك لو ليا كلمه كان
باسل : ههههههه .. لولو
لولو : نعم
باسل : مش حاسه بحاجه كدا ولا كدا .. لا شفتك أغمى عليكى ولا طلبتى خروف مقلى ولا حاجه يعنى بقالنا أربع شهور مفيش بوادر جواز عليكى
لولو : خروف مقلى .. هما بيقلوه دلوقت .. مستعجل على إيه يا باسل مش لما الديون الا علينا تهدى ونسدها والا عيشتنا تبقى صاعبه وخلاص
باسل : يا حبيبتى كل واحد بياخد رزقه وانتى يعنى دخلتى فى علم الغيب وعرفتى إنها ها تبقى صعبه ما يمكن ربنا يكرمنا على وش العيل ونسد كل ديونا
لولو : طبعا أنا معاك بس انا خايفه يتأثر بسبب شغلى وطبعا شغلك مش الفلوس وبس يعنى فكر بمنطقيه شويه .. بامبرز وزن وإهتمام وحاجات خاصه بيه ولبس كل فسوه بتعدى عليه
باسل : سيبيها على الله .. أنتى آكيد بتاخدى أجازه وضع لو حصل يعنى الباقى قولتلك رزق وإحنا الحمد لله بنسعى مش قاعدين مستنين الا يصرف علينا
لولو : أكيد باخد أجازه او مش عارفه ما سألتش
باسل : أفهم من كدا إنك انتى الا مانعه الخلفه واتعدل وبتحذير اوعى يالولو تكونى بتاخدى حاجه
لولو قبل ما يكمل : لا والله ثم كمان من أمتى يعنى ها أعمل حاجه من وراك
باسل : أيوا كدا خليكى عقله عشان احبك وما أزعلش منك انا زعلى وحش وغبى
لولو : يوووواه جربته كتير وتقريبا معلم على كل حته فيااا .. وبتشرب الشاى
باسل : طب تمام .. حلو انك مجربه .. ها نروح لحاتم نقعد معاه شويه ونروح نسلم على بابا وماما وابوكى وامك عشان ها أسافر معاكى مش قادر اخليكى تسافرى لوحدك فى الظروف دى
لولو قامت وقربت باسته جااامد : ابوسك يا حلوه يا جميله انتى
باسل ضحك : وسعى يابت وأتلمى احنا فى البلكونه
لولو : انا قافله الستاره مليش دعوه وقعدت على رجله ولفت إيديها حوالين راقبته .. ممكن تبقى تكلمنى كل يوم
باسل بحب وهو محاوطها بايده : لو طقت فى دماغى ها اجيلك أشوفك كمان
لولو : انت مش ها ترجع هنا تانى
باسل هز راسه : لاء ها أقطع أجازتى وخلاص ابقى وسط الرجاله هناااك .. الحمد لله الأمور هاديه وربنا يكملها على خير ويهديها كمان وكمان نفسنا تنضف وتبقى أحسن وأمن مكان فى مصر كلها
لولو : تعرف إنى بقيت أخاف عليك قوى .. خلاص مش مهم انا ها أسافر لوحدى خليك
باسل رفع حاجب : هاتمنعى عنى قدرى لو قعدتينى هنااا ... لاء وكمان انا مش أقل من أى راجل واقف على رجله هناك 24 ساعه كل الا محتاجينه منك او من غيرك الدعوه .. إدعى مش ليا بس يا لولو لاء كلهم .. كل بيت فيه منه راجل هناك أخواتك جيرانك قرابيك او حتى ماتعرفيهوش إدعيلو عشان إحنا خلاص كلنا بقينا عارفين بعض اخوات بمعنى الكلمه
لولو بتأثر : ربنا معاكم وينصركم ويحفظ بلدنا يارب ويحفظكم والله يا باسل إلا تعبنى فى المهنه دى الا بشوفه والا شجعنى انتووو
باسل ضمها جااامد وباس راسها وضربها على كتفها : قومى رجلى خدلت خسى شويه
لولو اتعدلت وبعصبيه : والله منا خاسه هه وسابته ودخلت جوا وهو بيضحك عليها بيحب ينكشها جدا ..
مر الوقت بسرعه ولولو نزلت هى وباسل راحو لحاتم وهدير ..
هدير بترحيب شديد : اهلا أهلا .. قربت حضنت لولو وباستها .. وحاتم سلم على باسل ونزلو الأتنين ما قعدوش مع البنات
هدير بفرحه : أخيرا شوفتك
لولو : أيوا أخيرا
هدير : عامله إيه واخبارك إيه مبسوطه مع باسل
لولو بأبتسامه : الحمد لله كله تمام وامورنا ماشيه وفى نعمه .. بس قوليلى بقى عرفتى الا فى بطنك بنت والا ولد
هدير حطت إيديها على بطنها وأبتسمت : بنوته بس جميله قوى يا لولو
لولو بهزار : طلع لها فوينكات والا لسااا
هدير : ههههه لا لما تخرج بالسلامه بقى أدلعها وأعمل شعرها فيونكتين او ديل قطه ونعيش انا وهى الانوثه الا قربت تختفى
لولو : ربنا يقومك بالسلامه يارب
هدير : تعالى نعمل عصير انا خلصت الأكل وبيستوى نشرب حاجه على ما يطلعو ونتغدى
لولو : يا خساره بحب اعمل السلطه
هدير : قلبى ياناس تقوليش قلبى حاسس شيلت خضار السلطه وقولت اعملها لما تيجووو .
لولو : خلاص هاتيه ونقعد نعمله وإحنا بنتكلم
هدير : ماشى ياله .. وجابته وهدير بتعمل لمون زى ما لولو طلبت منها وبيشربو مع بعص ولولو بتقطع السلطه .. بس تعرفى انا تخنت قوى وحاتم كل شويه يقولى انتى تولدى من هنا وتخسى اللى تخنتيه
لولو بعياط مصطنع : انا باسل عايزنى اخس من غير ما اولد الجاحد حد يعمل كدا فى مراته
هدير : 😂😂 بس انتى جسمك حلو مش وحش
لولو : هو ها يقتنع مع الأياام ان كدا فله قوووى والحمد لله وانتى ما تحاوليش تعملى اى حاجه فى فترة الرضاعه عشان جسمك ها يدمر أصبرى لحد بعد الفطام وحاولى تظبطى أكلك مش أكتر واساسا انتى مش تخينه بمجرد ما تولدى جسمك ها ينزل على طول
هدير : ماما قالتلى كدا يارب ينزل يا لولو
لولو : ها ينزل ان شاء الله لا تقلقى والجرس رن .. اهو البهوات شرفت .. خليكى ها أفتح انا ولبست طرحتها وراحت فتحت .. جهزو السفره وقاعدين بياكلو باسل وحاتم مندمجين مع بعض وهدير ولولو مع بعض ترابيزة الانتريه عشان يبقو براحتهم .. خلصو الأكل وعملو قهوه الا طلوبها وقاعدين يتكلمو مع بعض ..
حاتم : أكيد خلاص ها تسافر
باسل : إن شاء الله مش ها أقدر أسيبها تروح لوحدها
هدير قربت عليهم ومعاها عصير : إتفضلو
باسل ؛ كفايه تسلم إيدك ها نودى فين تانى
هدير : بألف هنا .. معلش انتو مش عندنا كل يوم اللى انتو عايزينه كله تحت أمركم
باسل : الأمر لله تسلمى
حاتم خبطه على رجله : أستغل الموقف فى همه إنهارده والحمد لله
باسل : ههههه .. الله يكون فى عونها ويقومها بالسلامه
هدير ضحكت بدون صوت : قوله .. وراحت للولو كملو قاعدتهم مع بعض وراحو سلمو على أهاليهم ... يومهم خلص وأبتدى اليوم الجديد .. نزلو بشنطهم وأتوكلو على الله مسافرين مهما كان طول الطريق فا طولة البال والراحه مع حد حابب وجوده بيفرق معاك ..
باسل بيهز رجل لولو بايده : لولو .. لولو
لولو بنوم : هه
باسل باعتراض : هه إيه قومى أرغى معايا أعملى اى حاجه بدال مانتى فاتحه بوئك كدا وسيبانى لوحدى أكلم نفسى بعد كدا ها أقفلك النت باليل عشان ما تسهريش
لولو بتزق إيده : سبنى دلوقت عايزا أنام كمان شويه .. باسل وقف فى كامين والظابط واقف بيشوف بطاقة باسل والكارنيه بتاعه .. والناحيه التانيه عند لولو والقزاز مفتوح ظابط صغير واقف مستغرل شكل لولو مد إيده يشوفها نايمه عادى والا متخدره عشان بيشكو فى أى حاجه .. وبمجرد ما إيده لمست وشها .. لولو بعزم ما فيها ضربت إيده وبصريخ سيبنى أنام يا باسل .. باسل لف راسه بصلها وبص للواقف دا ومن صدمته من رد فعلها تنح
باسل بجمود : فى إيه
لولو باصله وباصه للجمبها من ناحية الباب : ماعرفش هو صرخ وخضنى فا صحيت
الظابط بيشاور على نفسه : أنااا
باسل : بغض النظر عن الا صرخ ومين خض مين عشان الكامين كله أتسرع دلوقت .. فى إيه
الظابط بص للقائد بتاعه : يا فندم بتاكد انها مش متخدره بس ضغط على وشها صرخت وبتقول أنا إلا صرخت
باسل : يعنى انا جمبك مش فى بلد تانيه قولى وانا أفوقها بمعرفتى
القائد : خلاص يا حضرت الرائد هو بيشوف شغله .. أسفين يا مدام
.. وباسل خد حاجته وكمل الطريق .. لولو مديقه عيونها وبصاله بخوف .. مدت راسها لقدام شويه
لولو : باسن
باسل نفخ : هشششش .. مش عايز أسمع حاجه
لولو : الله بقى انا مالى .. كنت نايمه فى حالى والله ما أعرف إيه جرالى .. صرخ الصرخه وحطت إيديها على صدرها أتخصيت أناااا
باسل ؛ هو انا بقولك عايز اسمعك أتفتحى وجيبى الا عندك وبعصبيه هو مين الا صرخ
لولو بتشاور بصباعها لقدام : هوووا
باسل شد صابعها وعضه
لولو مسكت إيديها : أعاااا .. ليه طيب
باسل : أنتى الا صرختى بجعورتك وبتجبيها فى الراجل كام مره قولتلك لما نبقى على طريق ما تناميش وخصوصا فى الكامين عشان التفتيش ومحدش يشك فينااا .. كام مره .. وحقه الراجل لو انا كنت نزلته وماسبتوش يمشى غير لما تفوقى وتقولى انتى مين وتبع مين ..
لولو : خلاص يا بسبوستى انا أسفه ها انام قبل الكامين وأصحى على الكامين
باسل : اااااه .. يارب أعمل إيه فى المهلبيه الا أسمها دماغك
لولو : 😂😂😋 كلها بالهنا
باسل شد راسها تحت دراعه وبيعصرها جااامد : طيب تعالى بقى وبيضغط عليها ..
مر الوقت والحمد لله وصلو أماكنهم بسلام .. لولو راحت السكن وباسل راح الكتيبه بتاعته .. بعد ما قعد يوصيها ويفهمها ويوعيها كتير ..
لولو خدت شاور وجريت على السرير نامت تلحق تريح قبل شقى الشغل وتعبه .. البنات راجعه من المشفى وقت راحتهم .. لقو لولو نايمه
سهااا : اااه لو الواحد فى نص حظك كنا أرتحنا
منى بصوت واطى : هششش بقى أسكتى مش عايزين مشاكل ما صدقنا الأمور اتصلحت
سها : أتصلحت قوى .. ولولو مفتحه عيونها ووشها عكسهم .. سامعه كل كلمه لفت براسها وبأبتسامه
لولو : حمدالله على السلامه يا بنات والله نورتو أستراحتكو .. واه يا سها لو على الحظ اوعى أبدا تتمنى حظ غيرك عشان الظاهر غير الباطن مش يمكن حظك احسن وبتستخسريه فى نفسك بكلمه ساعة غباء وأتكت على الكلمه قوى
سها : تقصدى إيه انا غبيه
لولو : أكيد غبيه لما ربنا يكرمك وتكونى فى مكان احسن وأفضل ومستوى أحسن وأفضل من غيرك وتبصى لعيشة غيرك ومش مالى عينك الا فى إيدك أكيد غبيه ... تعب بتعب .. شقى بشقى والحمد لله راضيه ومبسوطه طول ما ربنا بينعم عليا بالصحه تبقى الحياه حلوه .. بطلى سواد وأتقبلى غيرك ها ترتاحى ولفت وشها ونامت وما إدتهاش أى إهتمام وهى واقفه تاكل فى نفسها ..
المشهد أختلف تماما يومها الجديد ... لولو إنهارده ها تلبس رسمى .. المموه يعنى 😉 وبتظبط حالها وبتستعد فى نشاط وهمه .. نزلت وقفت فى الطابور عملت التمارين وجريت شويه .. وبعدين إنطلقت لعملها ..
دكتوره ماجده : لولو عامله إيه يا قمر
لولو بكل ترحيب وحب : الحمد لله يا دكتوره تمام .. انتى عامله إيه
ماجده رفعت إيدها : الحمد لله يا لولو .. أقولك على خبر حلو
لولو : ياريت مشتاقه للاخبار الحلوه خصوصا هنا
ماجده : أتخطبت وقدمت إيديها بتوريها الدبله والخاتم ... للدكتور كامل
لولو قربت حضنتها وبفرحه : مبروك الف مبروك .. ربنا يتملك على خير يا رب
ماجده ببتسامه : يارب يا لولو .. إدعيلى يطلع كويس ومايكنش زى طليقى الا خلانى على الحديده وسابنى بعد ما دمرنى نفسيا
لولو : إن شاء الله يكون أحسن ويعوضك صوابعك مش زى بعض ماجده : تفتكرى ها يبقى أب لبنتى
لولو : يعنى اكيد لو مش حابب دا ماكنش اتقدملك ولا أهتم
ماجده : أنا سلمت أمرى لله وقولت زى ما ربنا يريد انا راضيه إن شاء الله وطول الوقت بدعى ان ربنا يبارك إختيارى له
لولو : بس كدا أحلى حاجه عملتيها .. ربنا معاكى ويوفقك يارب
ماجده : يارب يا لولو وانتى كمان بتمنى ليكى كل خير .. وسابتها وراحت شغلها ولولو كذلك
لولو طالعه تجرى ورا طاقم العمليات وحاله من الأستعداد كبيره من الكل .. وواقفه قدام دكتورها الا بتفتخر بيه دايما محمد إلا بيطلبها بالاسم تكون معاه .. ساعه .. اتنين .. تلاته .. أربعه . والانفاس بتاخد راحتها وبيمسحو عرق وتعب كبير براحه وخارجين ورا بعض بعد ما خلصو مهمتهم ..
محمد : مالك يا لولو
لولو بتوهان : مش عارفه يا دكتور حاسه إن أعصابى سايبه من ساعة ما عملت التمارين الصبح
محمد : مره واحده كدا
لولو : لاء .. بقالى فتره بقاوم بس خلاص مش قادره
محمد : فى حمل
لولو كشرت : لاء ما اعتقدش ما ظهرش عليااا اى حاجه
محمد : هو دا كمان بالظاهر
لولو باحراج : يعنى .. مفيش حاجه او ما حستش بحاجه أمورى طبيعيه
محمد : طيب تعالى نقعد فى المكتب وناكل لقمه عشان ورانا عمليه تانيه
لولو بأستسلام وجوع : حاضر وفعلا راحو المكتب .. وسها مراقبها من بعيد ..
عليا : انتى ها تفضلى واقفه كدا
سها : الهانم الا اتجوزت واحد وبتلعب بالباقى ومأضيها محدش بيسألها واقفه ليه والا ماشيه ليه
عليا بتفكير : هانم مين
سها : لولو إلا انتو كلكو بتدافعو عنها
عليا اتنهدت : وبعدين معاكى
سها نطرت إيديها وبقرف باين على ملامحها سابتها ومشيت وعليا هزت راسها وراحت للدكتور محمد ومعاها دفتر
محمد : تعالى يا عليااا .. قربى مدى إيدك
عليا : بألف هنا يا دكتور
لولو : قسمت السندوتش الا فى إيديها خدى .. تعالى انتى أكيد جعانه
محمد شاور على الكرسى : أقعدى يا عليا كلى
عليا قعدت وبتاكل معاهم وبتتكلم
عليا بتضحك من كلام محمد : والله يا دكتور أنت مفيش منك بحب قوى كلامك والبساطه اللى فيك
لولو : وانا كمان والله
محمد : انتى تسكتى خالص
لولو : هههههه حاضر .. هو انت حاطت ايه فى السندوتشات دى
محمد بيضحك : وربنا ما حاطت حاجه انتو الا تعب اليوم أثر عليكو فا بتفكو شويه
عليا بطلت ضحك : اااه فعلا .. بصى بقى دا دفتر وفيه كل الا ها تمر عليهم ومعاد العمليه التانيه ليك .. الحمد لله مفيش حد تانى .. والمفروض الشغل دا متوزع عليا انا ولولو
لولو مدت إيديها وبتشرب لمون : ورينى كدا .. وبصت فى الدفتر ومحمد خده
محمد : خلاص انتى ولولو اتفقى ها تعملو إيه مع بعض .. طبعا ها تكونو معايا فى العمليه دى مهمه جدا ولازم تحضرو ها تتعلمو كتير قوى
لولو : تمام وبتقوم الف شكر يا دكتور على الأكله الجميله الا جت فى وقتها
محمد : بألف هنااا يا بنات . ياله عايزكم نحل معادنا الساعه سته .. ياله سلام وتليفون لولو رن ومحمد بصلها اول ما شافت التليفون وابتسمت وخرجت .. ردت على باسل ووقفت فى جمب بعيد قريب من الشباك وبصوت هامس .. الووو .. بسبوستى عامل إيه وحشتنى
باسل بعصبيه : انتى ها تودى بسبوستك فى داهيه ولولو بصت للتليفون وإحولت ورجعت تسمعه تانى
لولو : انا عملت إيه منا مسالمه أهو وقاعده فى حالى تنكشنى وتقولى انتى الا بتعملى
باسل ؛ مش قايلك حطيلى التليفون الصغير والكارنيه والبطاقه فى شنطتى ودتيهم فين قالب عليهم الدنيااا من ساعة ما ادتهملك فى العربيه
لولو برقت : اوبس . والله ماخدت بالى كنت فاكراك بتقول على شنطتى حجك علينااا يا شيخ العرب
باسل : اه يارب .. اعمل فيها إيه .. هاتعملى إيه بيهم يا مهلبية عمرى .. يا بلوظة حياتى يا خميره بيره عماللى فقاقيع فى دماغى
لولو : 😂😂 بسبوستى كفايه دلع يا حبيبى ها اخد منك على كدا
باسل ضحك : والله ماعارف اعمل معاكى إيه
لولو ؛ تعالى بسرعه خدهم واشوفك بس قبل الساعه سته ثم كمان انت مستنى من إمبارح للنهارده عشان تاخد بالك
باسل : ما ركزتش يا لولو كنت بعمل تمارين ونمت زى القتيل .. ولسا قايم عشان أروح اقطع أجازتى بدور على الحاجه مش لاقيها
لولو : خلاص ها أستناك اوعى تتأخر ماشى شنطتى معايا وفيها حاجتى
باسل : تمام ماشى .. ممكن اجيلك متأخر سيبك من دلوقت مش ها ينفع ها تخلصى الساعه كام
لولو : انا هنا مش ها امشى نبطشيه لتانى يوم
باسل : ربنا يعينك يا حبيبتى
لولو : يارب .. ياله سلام
باسل : مفيش بوسه
لولو بعصبيه : دا وقته يا باسل
باسل : أعوذ بالله منك وسكت كانه قفل
لولو اتنهدت وباست التليفون باسل بصوت عالى .. ماكان من الاول
لولو بخضه : باسل انت لسا معايا
باسل : امال انتى بتبوسى مين
لولو : 😂😂😂 سلام ياله بقى .. مع السلامه .. وقفلت باسل باصص لتليفونه وبيضحك : والله لتجننينى هو الا عملته فى أبويا وامى وأصحابى بيتردلى وإلا إيه وبيصفر جااامد .. أمكرم .. خد
مكرم : أيوا يا باشا
باسل : بتجرى ليه كدا
مكرم : حسام بيه سمح ليا أروح اتكلم فى التليفون وقالى عشر دقايق بس عشان الخدمه فا بدور على مكان فيه شبكه انت عارف بعد الخدمه الواحد ما بيحسش بروحه ولا بيبقى قادر يتكلم كلمتين على بعض
باسل بيشاور على المكان الا واقف فيه : دا حلوو قوى وها تمسع فيه احلى كلام وخبط على كتفه ربنا معاك يا بطل ويعينك مش متجوز جديد بردو
مكرم أبتسم : ايوا يا فندم عريس
باسل فرد إيده : وفرحان كدا ليه يا أخويا ومبتسم .. وعريس يا فندم . قابل يا عم وابقى قابلنى لو بلت ريقك .. وسابه ومشى ومكرم ضحك .. و اتصل على عروسته
باسل بيأدى التحيه : تمام يا فندم
القائد : أتفضل يا باسل .. اقعد .. انت رجعت ليه دلوقت
باسل : اهوو حكم القوى عشان مراتى تمريض عسكرى وهنا فى العريش
القائد أبتسم : ربنا معاكم .. مش عارف يابنى تتجوز واحده بعيده عن العسكريه انتو فى بيت واحد حرام
باسل ضحك : النصيب هى خلاص بتاعتى وانا الحمد لله مبسوط
القائد : طيب يا سيدى ربنا يبسطك أنت وهى
باسل : يارب يا فندم
القائد : فى مداهمه الرجاله إن شاء الله طالعينها بكرا ها تكون معاهم
باسل بتأكيد : إن شاء الله يا فندم .. معاهم طبعا بقولك يا قائد .. هو حاتم مش ها يرجع الحمد لله بقى زى الفل
القائد : إصابته قويه واكيد ها تأثر عليه فى الظروف دى وانت عارف لازم حركه وخفه شديده
باسل : هو الحمد لله كويس وبيتمرن وبقى أحسن من الاول و مصمم يرجع هنا تانى
القائد : يعنى ناس م بتصدق تخلع من هنا وينفدو بعمرهم وهو عايز يرجع
باسل : يا فندم محدش بينفد بعمره كلها بإيد ربنا سبحانه وتعالى .. المهم نعمل الا عليناا ادام أقسمنا على حماية بلدنا وحاتم مخلص قوى وبيحب بلده قوى
القائد اتنهد : والله يا باسل كل ما اشوف نماذج منكم وحبكم لبلدكم بدعى ربنا يصلح حالها عشان الا زيكم إنما الا كارهنها والله خساره فيهم أى شئ والمحبه مش كلام .. لاء فعل تعرف إنى اتعرفت على ناس بسيطه قوى وبحكم شغلك دا وبيخبط بالقلم على المكتب والمجندين إلا بيأدو خدمه وجابن من قرى ونجوع ا و حتى أى مكان وعيشتهم صعبه بمعنى الكلمه .. عندهم كميه حب وأمانه للبلد دى قليل تلاقيها عند الا عايش فيها بالطول والعرض وكل حاجه متاحه له ولما تكلمه يفضل يشتكى ويحسسك انه مش لاقى ياكل وناقم على كل حاجه .. انتو شباب البلد وسندها والعمود الا بيتحمل فوق طاقته عشان يشيلها
باسل أبتسم : فعلا يا فندم عندك حق .. بس مع إحترامى ليك الشباب فى اى مجال وكل مهنه مهمته صعبه والا بيواجهوه مش سهل وساعات من كتر الضغط بينفجر فا حرام نحكم على الظاهر ونقول مش بيحبوها اكيد بيحبوها ونفسهم تتغير للأحسن بس الطريق والاسلوب غلط
القائد : أكيد ودا حق اى حد عايش فيها بس انتو حملكو أكبر واقوى انتو حائط الصد الاول الناس فهمت دا أو لاء دى حقيقه ... وخدها قاعده فى حياتك الا عينه مليانه أحسن مليون مره من الا جييه مليان الفلوس دايما بتروح وتيجى إنما القناعه والرضااا مش دايما موجودين فى نفوس الناس ربنا يقويكم يا أبطال
باسل قام وادى التحيه : اللهم امين .. وخرج .. فضل يتمرن .. وماسك الطبنجه بتاعته وواقف ينشن على بعد كبير جدا .. جدا .. وبيعمل تمارين صعبه وبيجى على نفسه وهو فى وسط مجموعته ... وهنا مفيش فرق بين ابو طقيه وكاب او مجند كلهم واحد .. تفكيرهم خطتتهم ازاى يقتحمو .. ازى يتعاملو .. الاداء ها يكون شكله ايه .. خلص كل دا .. والوقت اتأخر .. وخد العربيه وراح للولو على المستشفى . دخل وسأل عليها وطلع فوق قابل ممرضه : لو سمحتى فين الدكتور محمد
البنوته شاورت : اخر غرفه على إيدك اليمين فى الطرقه يا فندم كمل طريقه خبط على الاوضه الباب كان مفتوح ربع فتحه ووقف مكانه اول ما الباب اتفتح وكل الا فى الاوضه ظهر بمجرد ما لمس الباب مابقاش قادر يتحرك ولا مستوعب إيه الا شايفه ولا عقله مساعده والدنيا وقفت فى لحظه
