 |
رواية لك ياذا الجمال اليوسفي الفصل الاول 1 بقلم فاطمة العبادي
#البارت_1.. #لك_يا_ذا_الجمال_اليوسفي
#بقلم_فاطمة_العبادي .
قراءة ممتعة كيكاتي 🖤 .
( سوو تاكات لصديقاتكم ++ لتحكمون ع قصة من اول بارتات هية مجرد بدايات )
تصويت + علقو بين فقرة وفقرة لطفًا
وساعدوني بنشر القصة ..
واتباد :- FFATEMA__
___
البصرة ... الجمعيات ..عام 2009 ، الساعة 11:35 ص .
كان يا ما كان في بؤس الزمان ..
وبحر الاحزان، في قلوب الصبيان يركد حنين الأمان
ويرتقص الكره برئات الأنسان ..
يزفروا سُـمً ، ينطقوا حقدً ..يرتجفو على ناصية الحب حزنًا ..
لكن .. حكمت عليهم محكمة الحب بالاعدام عشقًا حتى الموت .
... لججج درة يله اتأخرنة يله الله ياخذچ اريد مرة وحدة تخلصين من وكت جا انه بخير ساعة واكفة ع مراية تعدلين بشالچ .
طلعتلهة الهث من نزلة الدرج گلبي يدك بجدار صدرس بعنف ، وانه البس بساعتي السودة
درة ... ع كيفج وياي خية هوا وجهي ازرك ولابسة شال ابيض لازم اعدلة خوما كلشي بية عكس الأوادم .
ضحكت وارتفعت وجناتهة الوردية ودارت وجهة ومشت ..
درة ... شبيج وياي رهف شو تضحكين ما عاجبج .
التفتت علية وهية ترفع طرف حاجبهة وتقوس شفايفهة بمعنى ما عاجبهة وردت
... اي ما عاجبني انتِ تمشين سريع تاخذينة اخيذة وتوصلين بسرعة عكسي انه احب اتمشى ع راحتي .
درة .. جا طلعي قبلي .
قطبت حواجبهة بغضب وطبگت شفايفهة ضغطت عليهن بغضب و ما جاوبتني
اعرف قصدهة ، هية حلوة كلش ، عيون واسعة لونهن عسلي وبيهن بريق بالأخص بالضوة يصيرن مراية
وجهة حنطاوي مايل للسمار ، ملامحها جميلة بشكل لا يوصف
أنفم نحيف وطويل، شفايف ممتلئة، طولهة 165
جسمهة شوية مليان بس حلو وصاحبة خصر نحيل
جذابة بشكل عجيب، نظرة من عيونهة توكع اكبر واحد
لابسة صدرية زينة لا ضيكة ولا واسعة ، بس اكيد ما سترت مفاتنهة بشكل جيد
لأن انوثتهة الطاغية واضحة حتى من تلبس اوسع الملابس
قميص ابيض وشال ابيض، ترفع وتطلع شوية من شعرهة تكول اذا لبستة كامل يطلع شكلي نشاز .
تحب تمشي ع كيفهة بطريق المدرسة حتى تجمع اكبر عدد من المعجبين ، بجمالهة الخلاب وجسمها الأنثوي ..
ع عكسي تمامًا .. اني ذات بشرة سمرة داكنة ، بأختصار وجهي چنة چعب جدرية محتركة ..
خشمي چبير ، وضعيفة كلش عيوني شكلهن زين ينطلع بي لا كبار ولا صغار، طولي 160
واني منا ضعيفة چني عود بخور هذا ابو البزونة ..
امشي سريع بالشارع حتى اوصل للمدرسة باسرع وقت ممكن واشوف اذا عدنة واجب انه مادري بي احلة بسرعة بخمس دقايق
ما عندي اي هدف بالشارع
من كتلهة طلعي قبلي تضايقت لان بكل بساطة خالو "حُر" ما يقبل
غير اذا عرف هية طالعة وحدهة يطيح حظي
من هيج تنتظرني نطلع سوية بس اني امشي سريع اوصل قبلهة وهي تضل تمشي وتضحك ويا صديقاتهة بالشارع، ورافعات القمصان للعكس والايدين بيض يتبارجن وبيهن ساعات بألوان مختلفة ..والأكثر بيضة ..
اليوم ضليت اماشيهة لأن متأكدة ما عدنة حل انه مادري بي وبنفس الوكت مراجعة كل التحاضير
صارت جوكة بنات وهنة كلهن جميلات وانه بنصهن مثل الذبانة بنص الفراشات .
وصلنة للمدرسة نزلن قمصانهن والبنات اللابسات ساعات ملونة نزعنهن ضمنهن بالجنطة وطبينة للمدرسة ..
توجهنة لصفنة ، صف الخامس نزعت جنطتني خليتهة ع رحلة وطلعت كتاب الأسلامية اراجع لأن عدنة اول درس .
دقايق وفاتت المدرسة كلنة وكفنة كالت المراقبة قيااام
كلنة بصوت واحد اردفنة لا اله الا الله ..
سلمت علينة المدرسة ردينة السلام وكالت جلوس
اردفنة محمد رسول الله .
رهف قربت راسهة مني وهمست بأستهزاء
...هاي بعدهة ع سنة 1999 وين اكو طلاب اعدادية يكلولهم قيام وجلوس
وهمة يصيحون بصوت عالي لا اله الا الله محمد رسول الله .
لميت شفايفي للداخل امنع ضحكتي عن لا تنطلق وست سوزان تطلعنة من الصف رفس ..
فعلا احنة كبار وهية تريدنة نصيح بأعلى صوتنة مثل من چنة نسوي بالابتدائية ..
سمعنة صوت صيحتهة
ست سوزان ... ررررهف .
كامت رهف وردت متلعثمة ... نعم ست .
ست سوزان نزلت نظارتهة ع أنفهة وباوعت لرهف بغضب وهي تزم شفايفهة البرتقالية وكالت بغضب معاتبة
... امچ ما شافت شفايفج وردية من طلعتي .
رهف ... لا ست ما شافتهن جانت تطبخ بالمطبخ واني طلعت من باب الهول ..
رديت بكلبي جا وين تطبخ بالحمام طبعا تطبخ بالمطبخ .
مشت ست سوزان بأتجاهنة وتنورتهة البرتقالية تطلع صوت قماشهة لايلون وكفت مقابل رهف وكلتلهة بغضب دفين ... شنو ست رهف تستهزئين حضرتج ، طلعي كلينس ومسحي شفايفج لا ادزج للأدارة واخليهم يشوفون شغلهم وياج .
رهف ... ست ما استهزء وانه ما حاطة شي لشفايفي .
ست سوزان ... واصدك حجيج واجذب عيوني يعني طلعي كلينس ومسحي كدامي لا يصير الحجي وياج غير صارن عليج نقطتين
رهف رفعت طرف حاجبهة معاجبهة والبررود يعتلي ملامحهة بشكل فضيع كرصتهة بزرهة ما باوعتلي ولا كأن جاي اكرص بيهة جاوبت بكل ثقة ..
... وانه اصدك عيونج واجذب نفسي ست شلون حجي هذا مو ما حاطة شي هية كوة تردين تسويني مخالفة .
صاحت ست سوزان بغضب ... كتلچ مسحيييي
زمت شفايفهة بغيض ما تريد ينكسر خشمهة كدام الطالبات لو تبين الهن هية مهزوزة ضلت واكفة بدون كلام لأن تعرف روحهة اذا حجت تنفصل لسانهة ما يسكت ..
رفعت ست سوزان عودتهة الخشبية واشرت بيها ع باب و كالت بهدوء ... روحي للادارة وما تفوتين بدرسي بعد اذا ما جبتيلي ورقة من المديرة ، ضيعتي وقتي يلة تفضلي برة .
رهف ... زميت شفايفي بغيض وطلعت من الصف افور نار شابة بية امشي للأدارة وادردم وحدي ... ام تنورة البرتقالية تغار كاتلهة القهر جا وجهي احلى من وجهة العجوز العانس ميتة مني لان حلوة حمرتهة برتقالية عجوز النار .
لهناك وكفت ونرسمت ع وجهي ابتسامة خباثة وحجيت بيني وبين نفسي ... وليش حتى اروح للأدارة ما اروح وشنو يريد يصير خلي يصير .
لفيت ورجعت صعدت للطابق الثاني كعدت ع درج المؤدي لسطح المدرسة وضليت اباوع ع شارع لأن مبين و واضح ، سيارات تروح وسيارات تجي
صفنت بيهة ع حياتي صفنة طويلللة حد ما فززني من هاي الصفنة صوت جرس المدرسة .. يعلن انتهاء الدرس الاول
كمزت بفرح ونزلت الدرج ركض ، شفت ست سوزان طالعة وجاي تمشي لغرفة المدرسات فتت للصف والبنات التمن علية يسألن وينج
كتلهن ... كعدت ع درج اباوع ع شارع ..
درة ... جريت رهف من ايدهة وهمستلهة
... لج سجلتج غياب والله لو امي تدري تشوي ع ذاناتج بصل وياويلي اذا وصل الحجي الخالو حر يا ويلي بسسس .
سوتلي حركة بحلكهة بمعنى ما مهتمة ..
كمل يومنة ورجعنة للبيت جاي انزع حذائي ورفعت راسي شفت خالو حر واكف يسوي بميزانية الكهرباء بالكليدور حجيت بصوت يرجف من التعب
... الله يساعدك خالوو .
التفتت باوعلي ورجع يكمل شغلة ... ويساعدج خالو چا اختچ وين ؟ .
... بالرجعة كل وحدة ترجع وحدهة هية تمشي ويا صديقاتهة .
هز راسة بدون جواب فتت بدلت وغسلت طلعت كتبي ورتبت جدولي ، ونزلت ..
طلعت بوجهي كاتي زوجة خالو اسامة وكالت ... هااا درة انتة شيت شنت انتظرك انتة ساير تتأخر هواي .
... شسوي غير من يكمل الدوام اطلع شلون ترديني اطلع بكيفي وتعالي شوفي شنوووو جبتلج وياي ..
اشرتلهة تلحكني وركضنة ع درج طلعت الهة من جنطتي ثنين ككو شافتن وفتحت عيونهة بفرح كمزت عليه حضنتني وكالت بفرح ... درة انتة كريم اني اهبك .. باستني بخدي وكعدت تفتح بالككو
درة ... بالعافية اكلي من خيري بعد كلبي .
هزت راسهة وردت ... الله يعافيك .
درة … طيب لا
كاتي ...كلش تيب كلش انت تخبل
درة ... بالعافية شبعي بخيري
فتحتت دفاتي حليت واجباتي ورهف من وصلت غسلت ونامت .. من صار العشا امي صاحت من فوگ
يلة بنااات عشااااا عشاااااا تعالن يمة .
نزلنة نركض نتسابق ع ترس البطن .. خلصنة غسلنة مواعين سوية كاتي جانت كاعدة تاكل كليجة وراي شفتهة وشهكت من كلبي ، باوعتلي وترمش ببرائة
كتلهة ... ولج تاكلين كليجة وانتي بعدة طعم الككو الشتريتة الج من خيري بين سنونج .
كاتي ... درة خوفتني اني يجوع بطني يسوي ويييق وويييق يريد اكل .
درة ... تاكلين حريشي ولج ككوو ثننننييين اشتريلتج من خيري المفروض بعد ما تجوعين بس يااا ندااامة .
حجيتهة ودرت وجهي بزعل هية عافت الكليجة وكامت مقهورة كالتلي بحزن
... درة لا تزعل والله اقسد بعد ما اكل .
... لا كاتي لا مشكورة سهمچ وصلچ .
...سهي وسل الك انا ماتگيتك بسهم
حجيت بحزن وخيبة امل مصطنعة
...لا سهم الغدررررر گعد بنص گلبي ااخ يا زمن اااه اااه
سهم الغدر يجيك من اقرب ناسك
كاتي ...لا تسيرين شلب (جلب) انا اقسد والله اقسد
درة ...وفوگاها تقصدين ، يا نداااامة
كاتي ...ما اقسد درة هربطتني تهربط اسكت راه ابشي
عفتهة وراي واكفة تباوع ببرائة وصعدت خطية فطيرة كلش، كلت شوية واخذ جبس وانزل اكللهة ما زعلانة اتشاقة ..
طبعا كاتي اجنبية مو عراقية وبلكوة تعلمت تحجي عراقي ونص حجيهة مكلوبي
ممكن اليوم تگلي احبك باجر تكلي اكرهك عبالهة احبك
لان اكثر الكلام حافظتة حفظ ..
كعدت ادرس ونسيت كاتي ونسيت نفسي وغفيت ع كتب ، حسيت بدخول امي للغرفة شالت الكتب وحطت جوة راسي مخدة وغطتني دخلت بنوم عميق
فزيت ع صوت واحد يصيح بأسمي ، صوتة غريب ونبرتة اغرب كمت من مكاني باوعت لروحي نايمة بالكاع مو ع سريري تذكرت اني غفيت ع كتب
رهف نايمة بسريرهة
وكل عادة ناسية الشباك مفتوح، ومن اكللهة يابة انتي عايفة الشباك مفتوح تنكر وتضل مستغربة بس اعرفهة تمثل هية من تسوي شي غلط واكللهة تنكر ..
كمت ع كيفي الم شعري واتوجه للشباك صاحني الصوت نفسة ، قطبت حواجبي مستغربة هذا لا خالو حر ولا خالو أسامة جا منو !
السماء ملبدة بالغيوم الحمر، القمر شبه مخفي ليلة مظلمة مرعبة، الريح يطير الستائر ويعزف سمفونية اسميتها "أنين الأرواح" ..
سديت الشباك ونزلت امشي ع كيف كيفي اتبع مصدر الصوت، كل ما اتقرب ويوضح اكثر الزم كلبي بخوف
لا صوت خالو اسامة ولا حر معقولة حرامي ..!
امشي بخوف والصوت مازال يطرق مسامعي ..
ارتجفت من الخوف ، تقربت للمطبخ لكيت شباكة مفتوح وكفت اباوع ع حديقة الصوت جاي منهة
سمعت صوت تنهيدة يم أذني و حرورتهة لامست بشرتي ، ارتدم كلبي بأضلاعي ، كمزت والتفتت اباوع بالمطبخ مابي احد ..
حطيت ايدي ع رگبتي فركتهة بخوف، سديت الشباك وصعدت ركض للغرفة، دخلت جوة غطاي ارجف مثل السعفة الصوت غريب والصار بالمطبخ اغرب بعد ..وحتى شعوري غريب عبالك دخلت بغير عالم
رددت ايات بگلبي ورددت 100 مرة
( يا ابو الغوث اغثنا يا علي ادركنا ) يلة كدرت اغفة ..
كعدنة الصبح صلينة ونزلنة نتريك ، العائلة كلهم مجتمعين ردت احجي بس كلت هسة يضحكون علية اذا حجيت فضلت السكوت
كالت اختي الصغيرة ترف .. صخولة انطيني شكرررر .
خزرهة خالو حر وكللهة ... ترررف سالمين خالو ، ترة كلامج يجرح درة و اذا تصيحين الاختج هيج بعد ينكطع المصرف عنج اخلي امج تكطعة .
برطمت شفايفهة بزعل ونزلت دموعهة بسرعة
... هسة شنو حجيت يا خالو تقبلين اعيب عليچ ؟
هزيت راسهة بـ لا ..
... جا شلون تكولين لدرة صخولة مو عيب ؟ خلي ببالج حتى لو ما تقصدين تتنمرين عليهة هية راح تنجرح وكل الجروح قابلة للشفاء الا جروح الكلب تضل تنزف سنين ويمكن طول العمر ...
حجة هيج وتحسر ..نفض ايدة من الاكل وكال وهوا يكوم
يله تروفة اعتذري من درة وكليلهة ما تنعاد .
ترف وهي تباوعلي ببرائة ومبرطمة شفايفهة ... انه اسفة درة بعد ما اكلج صخولة .
تنهدت وابتسمت الهة ، خالو اسامة ارتشف شوية من الچاي وعينة ع خالو حر الطلع من باب الهول للشغل ..
حجة بضحك ... هسة درة وقابلة نكللهة صخولة هوا شحارك حمامة ؟
درة ... خااااالي بربك هذا هم حجي ما قابلة متحملة گوة عني .
كاتي ... اسامة عيب تهجين ع درة هوا هباب مو مثلج ما تهبيني ... ختمت كلامهة ودارت وجهة بزعل .
اسامة ... عفة عليج كتكوتي شلون ما احبج .
كاتي ... هوا جابلي ككو انتي ما تجيبين الايام .
اسامة ... اجي تعبان وانساج يروح روحي انتي ..
درة ... شعبالك خالي وكلت كاتي ثنين ككوايات الوحدة بربع يعني ثنين صارن بخمسمية مرتك بطنهة متروسة من حلالي .
اسامة ... وكلتي مرتي ككو يا ككو تردينهة تصير زركة ولج .
درة ... اي وترجعهة لبلدهة وهمة يشوفونهة صايرة زركة ويشمرونهة ع العراق .
كالت امي وهية تستفسر ... البارحة المطبخ متروس ريحة بيض خليت الشباك مفتوح لكيتة الصبح مسدود
التفتت عليهة ورمشت بعيوني ببرائة .. اني سديتة يمة
وعد ... اي هلكول لكيتة مسدود عبالي حر سادة ، يتنرفز من نعوف شباك لو باب مفتوح عبالك راح يطبون علينة حرامية ويكتلونة
تنفست براحة ورد خالي اسامة ... بس حقااا الكتل صاير بفلس، والحرامية لو يلكون جيس حفاظات هم يبوكونة
رهف ... اي جا الحفاظات يفيدن يحفظون جهالهم بيهن .
انسحبت من يمهم وصعدت اراجع دروسي ، طاحت ورقة سودة صغيرة من نص كتابي قطبت حواجبي مستغربة وشلتهة ، انه ماعندي ورق اسود وجانت كلش ثخينة چنهة كرت .
كلبتهة شفت مكتوب بيهة بقلم ابيض ..
( انتِ وقهوتي وجهان لعملة واحدة ، ليتني استطيع تقبيل شفتيكِ مثل فنجان قهوتي
فـ انا اقبلها كل صباح بشغف جنوني .. يا ليتني يا ليتني فقط ... لـ عطري . )
اعتلت علامات التساؤول والتعجب ملامحي ، عدت قراءة المكتوب اكثر من خمس مرات لدرجة حفظتة عن ظهر قلب ..
يا مجنونة كاتبة هذا الكلام ومخليتة بين اوراق كتابي
قربت الورقة شميتهة بقوة عطرهة كلش طيب يشبه القهوة صدك .
منو ممكن يكتبلي هيج كلام وانه وجهي ما يتباوع بي وخشمي عبالك باذنجانة ذبلانة ولاطشة بنص وجهي ..
قوست شفايفي بتعجب ، ماكو غير وحدة من البنات بالدوام كاتبتهة وحاطتهة تمقلبني ويمكن تستهز بية وتقصد بكلامهة انه سودة مثل القهوة .
كمت ضميتهة بنص دفتر مذكراتي جان لونة ازرك وبي وردة حمرة وقفل .. ضميتهة وطلعتلي ملابس سبحت وكملت راجعة بعدين نزلت اتغدة من كملت صعدت بدلت ملابسي لبست ملابس المدرسة
واكفة ارتب بشالي ورهف تصيح بعلو صوتهة يلة دررررررة اخرتينة يله .
ردت امي عليهة ... لج رهف بعد وكت صبري ع اختچ شبيچ ..
ضلت تتنهد بضجر معاجبهة نزلت اركض البس بجنطتي خزرتني وهمست من بين اسنانهة
... يله عاد .
كاتي ... درة اوگف .. اجتي تلهث حطت بأيدي ألف
... اشتريلي ككو من مدرستك هبيبي .
درة ... شنو نسيتي ككو امس بخمسمية ما غزر بيج ؟ صدك انتن حياية صفر مو بس شكولجن صفرة ولج بخمسمية اشتريتلج المفروض شهر ما تجوعين .
كاتي ... بلا زناخة درة هبيبي اريد اجمر .
درة ... اشتغل عند الخلفج
رهف ... درررة يله تأخرنة
درة ... اجيتتتت باي كتكووتة باي .
طلعت داومنة طبيعي ورجعنة ، جاي اصعد لغرفتي مريت من يم غرفة خالو سمعت صوت أنينة كأنه متوجع يأن بصوت مسموع
دكيت الباب ما رد ، رجعت دكيتة اقوى صاح بغضب عاررررم ... نااااايم .
كمزت بخوف واسناني انضربو واحد باللأخ وطكيتهة ركضة للغرفة ما تشوف بس غباري وراي ..
خالو حر مواليد 78 ، منفصل ، حنطاوي طولة 183 عائلتنة كلها طوال كل واحد جنة شبة ما كهرباء ..ملامح وجهة عادية بس الشي الوحيد الي مخلي مميز عن باقي خوالي الـ 4 هوا جرح كبير يبدي من خدة الأيسر وخشمة وطابر حاجبة من النص ويتوقف عند نص جبينة
عصبي بس متفهم
يعني يعصب عليك بس ميأذيك بدون ما يفهم
ومرات عصبيتة تسيطر علي وتفقدة اخر ذرة عقل براسة هنا يأذي المقابل بدون فهم
بس هذا الشي يصير مرات مو بكثرة ..
باقي خوالي ال 4 عدي وقصي متزوجين وعايشين كل واحد بيت وحدة وعدهم اولاد وبنات كبار وحتى اولادهم وبناتهم متزوجين
خالي اسامة عمرة 28 ..متزوج كاتي اجنبية كان هواي يسافر حبهة وتزوجهة هية مسيحية وعاشت هنا سنتين مسيحية بعدين أسلمت ..
عندي خالة وحدة اسمهة رغدة
وامي اسمها وعد ... مواليد 70
تزوجت سنة 90
وخلفت رهف سنة 92 وبعد سنوات طويلة خلفت ترف مواليد 99 ..
الماضي كان مؤلم جدًا .. وجيتنه هنا بهذا البيت صارت من بعد حروب طاحنة .. بس الحمد لله ع كل حال ..
ورة أسبوع كاعدة برحلتي اكل جبس واسولف ويا البنات ، وبحضني كتابي
عود اراجع بس وين عشتو اذا التمن البنات بعد منو يقرا حرف نضل نسولف ونضحك ونحش بالعالم ..
مروة كاعدة اتطبل ع رحلة وتغني واحنة نرد وراها ... عندي ديچ هلكبرة هلكبرة هلكبرة .. ياكل ويطبل ع طبلة ع طبلة
جبت الموس وذبحتة ذبحتة قدمتة الست سوزان ست سوزان يعيوني يعيوني لابسة القاط الزيتوني لابسة الساعة اللماعة وتسوة كل الجماعة .. صحنة هييييي
وضلينة نضحك حجيت انه ... هية ست سوزان تلبس تنورة حمرة تحط حمرة لون احمر
تلبس برتقالي تحط برتقالي .. تلبس برونزي تحط برونزي
تخيلن بس تخيلن تلبس زيتوني وتحط حمرة زيتونية وتدخل علينة چنهة فتون العلفي ...
مروة ... ويشوفهة المعرس ويشرد .
رهف ... بنات سكتن خل اراجع
مروة ... صلاوات على محمد تراجع هية منين طالعة الشمس خاف هاي مو رهف معقولة ...!!!
ضلينة نضحك ع رهف وهية ممهتمة تراجع مدري منين طالعة الشمس يمكن من وجه رهيفة
شلت كتابي اريد اراجع وطاحت الورقة السودة قطبت حواجبي بتساؤول انه مو ضميتهة
شلتهة من الكاع ومجرد باوعت الهة عرفت هاي سطور مختلفة ضميتهة بين وريقات كتابي بخوف
عن لا البنات يشوفنهة وكمت كتلهن
رايحة للحمام اذا اجت مدرسة كولن درة بطنهة توجعهة وراحت نقذني فدوة ..
مروة ... ليش شنو تسوين اخذيني وياج حبابة
طبكت شفايفي بخوف ما اريد احد يقرا هاي السطور خاف بيهة تقبيل ومدري شنو وتفضحني بس هية جرتني من ايدي وطلعنة
بطريقنة للحمام راجعت نفسي وكلت مابيهة شي اذا اشارك مروة بالجاي يصير
واكللهة هاي ثاني مرة توصلني هيج رسالة والمشكلة الكاها بنص كتبي ..
من وصلنة فتحت الكتاب وطلعت الورقة ارتجيت ع حايط اقراها وهية تقربت تكول هاي شنو
ما جاوبتهة وكملت قرائة السطور البيضاء الي تحمل معاني عميقة وامنيات كبيرة من شخص مجهول الهوية ..
( فاتنتي .. عطري .. يسعدني كونك تنصتي بشغف لصوت حبري ، هل يمكنني ان اكون حبه خال على كفك الأيمن لألتصق بكِ حتى الممات ؟ .. لـ عطري )
مروة ... ولج ضميهة هاي الرسالة منين لحد يشوفهة ويبلغ الادارة عليج هنوب يكولون درة تواعد زلم .
درة ... يمكن وحدة من البنات جاي تسوي بية مقالب .
مروة ... ولج هذااا خط وحدة من البنات دشوفي الخط دشوفي السؤال امداااني ولج هوا منين شاف الشامة بايدج و انتي ماتبين الشامة من لون بشرتج ..
حطت ايدهة ع حلكهة بعد ما انتبهت لهفوة لسانهة وضلت ترمش بقهر ورتفعت حواجبهة ..
حزت بخاطري وبلعت ريكي بقهر نزلت راسي اباوع ع ورقة وضميتهة بالكتاب ... اعتقد طالبة تسوي بية مقالب لا اقل ولا اكثر ع كولتج انه منين تبين الشامة من لوني شو زركة وخشمي متنحر وجهي يطرد النعمة مو عاد اكتسب حبيب .
مروة ... اسفة مو قصدي اكول هيج والله ..
درة ... لا عادي انه من طفولتي يسموني الزركة السودة ومرات الصخلة يعني متعودة ما اهتم .
غسلت وطلعنة لكينة عدنة مدرسة كنالهة جنة بالحمام وفوتتنة ..
مر اليوم والتساؤولات ما فاركتني ، منو صاحب هاي السطور القصيرة الي قلبت احوالي ..
جاي افوت للبيت وشفت رهف اليوم وصلت قبلي وفاتت قبلي اول ما فتت شفتهة واكفة ورة البيت بالختلة
صحت رهف ..
التفتت بكمزة واجت علية
... شتسوين خاتلة هناك
ردت بتلعثم وهي تشح بنظرهة عني ... شفت بزونة صغيرة ولحگتهة بس طفرت فوك الشجرة حرامات .
دنكت انزع بحذائي وسمعت صوت من وراي
صهيب ... هلا بناات عمتي راجعات من الدوام ..
التفتت علي .. هلا بيك هاي يمتة اجيت ما حسيت عليك من دخلت .
صهيب ... لكيت الباب مفتوح وطبيت ..
رهف ردت بصوت خافت ... هلا بيك صهيب شخبارك
باوعلهة وعيونة كادت تبتلعهة، توزعت نظراتة ع ملامحهة ورد بضياع
... بنصصص الخيررر انتي شلونج بت عمتي .
هزت راسهة وخدودهة صارن حمر ، رفعت طرف حاجبي وقوست شفايفي معاجبني وفتت للبيت ..
بيومهة صهيب تعشة عدنة وراح بعد ما لعبنة دومنة اني ويا ورهف وخالو اسامة ..
باجر جمعة كلشي ما عدنة ، لفيت وراسي ونمت من وكت .. حسيت بأنفاس حارة بأذني، وصوت يردف بأسمي ، مطيت روحي بالفراش وغمضت
كل بالي هذا حلم .. انضرب الشباك حيل من الهوى وفزينة انه ورهف مخروعات
باوعتلي رهف بخوف وهمست ... منو عايف الشباك مفتوح راد يوكف كلبي .
درة ... يعني اكو غيرچ انه نمت من وكت ترليون مرة كتلج سدي زين قبل لا تنامين ترة تفوت علينة بزونة تخلي طشارنة مالة والي .
رهف ... نجبي لا احط القن*** بحلگج كتلج اسدة ليش تضلين تمسلتين .
شمرت عليهة المخدة ركعتهة براسهة ..
... ادبسزز شنو تحطين القن*** بحلكي اذا ما اكول الأمي عليج حقيرة كومي سدي يله ..
كامت تتأفأف وسدتة رجعت تمددت بفراشهة واني تمددت مغمضة عيني ونايمة ع ظهري بكل اريحية
حسيت المروحة افترت وذبت علية هوى بارد
واحنة مطفينهة ... فتحت عيني شفتهة تفتر و واكف فوكهة عتوي اسود بس عيونة مبينة وتجدح ..
صرخت بصوت عالي وطفرت من الفراش .. طفرت رهف وياي وصرخت شكو اشرتلهة فوك كامت من مكانهة خايفة واجت يمي بأتجاه الباب
ردنة نطلع من الغرفة وانفتح بابهة بقوة ، ويا ما انفتح بابهة طفر العتوي ع كنتور ونزل ع ميز وركض طلع من جوة رجلين خالو حر بثواني .. خلا كمز وهمس بسم الله الرحمن الرحيم منين دخل هذا عليجن ..
ركض يطلعة من البيت من باب البيتونة واني بس اغمض عينة تجي صورتة براسي ضليت ارتجف بدون توقف وابجي
رهف ... يلة لا تصيرين زعطوطة وتبجين يمكن فات من الشباك .
... ولج شلون ما شفناه من سدينة الشباك وشلون صعد فوك المروحة ولج واكف ع ريشتهة وهوا جبير شلون ما نعوجت وطاح شلووون ..
فات خالو حر ... هاي لان تخلون الشبابيك مفتوحات يطبن البزازين يله رجعن نامن
باوعت بعيونة وجدحن مثل عيون العتوي رجفت وغمضت عيوني بقوة
طلع وسد الباب، تمددنة كل وحدة بفراشهة ترجف ..
النوم هجر عيني ، والرجفة سيطرت ع كل ذرة بجسمي ، أذن الفجر صليت وكعدت رهف ما قبلت تكعد شوية حسيت بطمئنينة ورجعت ونمت ..
كعدت الصبح ع صوت امي تصيح صار الدنيا ظهر ديله يله كعدن
كمنة بملل من فراشاتنة غسلنة ونزلنة انه عيوني نار ما اكدر افتحهن وحمر .. التمينة ع سفرة ريوك
ريوك كيمر وحليب واجبان .. وبيض للي يحبون البيض من الصبح
اني رفعت رداناتي شكلتهن وكابلت خالو حر ودست ويا بيض وباكلة بالدهن ..
رفعت راسي شافني ورفع طرف حاجبي بتساؤول
... ليش عيونج حمر وهافاتات ...؟
رمشت بعيوني ورفعت اكتافي واني احجي ... يمكن لان سهرت من ورا سالفة العتوي المسموط
حر ... يا عتوي؟
درة ... هذا الصاعد فوك المروحة همزين ما وكف كلوبنة انه ورهف ..
رهف ... رهف شنو عتوي شنو هاي عيونهة حمر يمكن مصخنة وتهذي
خالو مد ايدة ع خدي تحسسة بلطف وصوفر
... شابة ناااار هاااي
وعد ... وانه اكووول شبيهة جنهة سكرانة تروط
درة ... ما اهذي والله شبيكم الشباك انضرب حيل رهف مو انتي سديتي والنوب شفنة عتوي فوك المروحة وصرخت
باوعتلي بصدمة واتسعت عيونهة
... انةة? خاب هاي تهذي اخذوهة ضربوهة ابرتين خلوها ترجع صاحية ..
زميت شفايفي بغيض وحاجيت خالو حر
... انتة مو طبيت علينة للغرفة والعتوي فات من جواك ..
رفع حاجبة وكال ... لاا البارحة مارجعت للبيت ........
