 |
رواية لك ياذا الجمال اليوسفي الفصل التاسع 9 بقلم فاطمة العبادي
... والله جعفر وبت جعفر شگو كلبي ونامو بي ، يبوية شكد حبيتچ بهذا الشهر ..!
چن صدك شكيتي كلبي ونمتي بي ..
باوعت صفح، شفت سداد مكشر بوجهي كتفت ايديني وكتلة بغضب ... شگو كلبك بخناجر كون كول أمين
سداد ... هههههه وسيد سامي انتي مو مال غزل ، مسترجلة عبالك شايلة تفگة وتطلقين الرصاص من بين شفايفج بدل الكلمات المعسولة ..
رهف ... خليت الدلع والكلام المعسولة الأهلة روح بابا روح
سداد ... وين اروح واكف حالي حال الأوادم شنو انه وحد لو ابن البطة السودة .
رهف ... هي هي هي متضحك دمك أثكل من دهن السيارات مو خفيف ابد وخر ..
سداد ... وجع كون مو كلت هاي خطيبتي وراح تصير مرتي المستقبلية خليني شوية اتغزل واكسب كلبهة قبل الخطوبة
بس وسيد سامي انتي مو ماال غزل ..
رهف ... اكلك شو انته صدكت روحك روح ما اخذك عاابت ..
ضل يضحك وحك طرف حاجبة وكال ... اتشاقة وياج رهف ..
التفتت شفت ليث يخزر
.... اخوك شبي وياي عبالك طالبني بطلابة
سداد ... غير انتي حاطتلة ملح بالكهوة وسيد سامي لو ما بعدج جديدة جا ركضج ويا خيل الحمزة ..
رهف ... والله بعد اذا اعبر من يمة ويبسمرلي الا اصلخة راشدي اقوة من راشدي الحمزة ..
ها بما انك ذكرتني بالحمزة ..
شوف شوف شلون يخزر بينة شوف عبالك عجوز مأكول عشاها ..
سداد ... اجت حجاية هالكبرها بس ماكدر اطلعهة
فات مالح للبيت حاط الشماغ ع راسة ،وجهة طالع وردي وحاجبة خيط ع كولتة جنهن حواجب كح*** ، حجيت بصوت ناصي بس سداد يسمعة
....اجت لميس
باوعلة سداد وثنيناتنة ضحكنة ، اجت عينة علينه شافنة نباوعلة ونضحك ، لمينة ضحكتنة وسداد سوة روحة يطك اصبع وانه ضليت اصفك چني وحدة مسودنة ..
ما نحس غير فالح گبالنة واكف ... هااا ولكم تحجون عليه
انه انسحبت من يمهم
وكعدت يم البنات
اسمع فالح يكول لسداد ... حطلي ساجدة عبيد اريد اركص
سداد ... ولك هية مال ركص انته زلمة وشاربك اثخن من شارب كشخيل
فالح ... ولك منيلي شارب ما تشوف وجهي وجه نثية والله تقهر بيه احسك تفتح جروحي وتترسهن لمندوزي
سداد ... هوا الشارب حلا مراه والله لو فلك عدهة شارب ازينة بالقندرة يله خيتي لا تنغثين .. اقصد خويه انته زلمة قوي ما تهزك دكات نستلة الحلاق ..
فالح ... العباس عليك هسة هذا الوجه كبالك وجه زلمة ؟
سداد ... لا لميس بس يعني انته بعدك زلمة
فالح ... دحطلي ساجدة عبيد خوية حطهة وهذا الشماغ هك اخذة والله لا عمييي فااااضل يخوووفني ولا صويدددق
ع اساس صويدق بزمانه ما جان يربي زلف ويلبس بنطرون من حدر جنه دجاج معمل مكوم ..
مها ... فالح يمعود ارجع لبسه شايف روحك انته والله لو انه بمكانك البس قناع هههههه
رهف بهمس ... جنة ديج هراتي مهلوس وضال بس عرفة ..
مها ... ولج لا يسمعج هههههههه
رهف ... اوووو وخل يسمعني ما تشوفين خلقتة شلون كالبهة الحلاق
مها ... هوا شنو توقع من راح لحلاق اسمه نستلة ..
وهنا والله جاب عمي فاضل يفوت للبيت، لابس ع راسة عرقجينة ودشداشة بيضة ناصعة، بيدة عكازته الما تفارك ايدة، يمشي ويحاجي عمة نجوى
... عزمتي كل نسوانكم؟ خاف نسيتي وحدة وتضل تشارهج
نجوى ... كلهن عزمتهن لا تخاف الوضع كله مضبوط ميه بالميه
التفتت وصار بوجهة فالح، الجان واكف مثل الطفل العاقل بالمدرسة
مكتف ايدينة ويباوع ع عمي بوقار وبجدية بدون ضحكة او اي تعبير ثاني
عمي فاضل فك حلكة وهوا يباوعلة
عمتي نجوى خرطت خدهة خايفة عمي فاضل يرزل فالح ..
فاضل ... ياهووو انته؟
فالح ... مهند عمي
فاضل ... ولك شمسوي بخلقتك؟ ياهو ضاحك عليك
فالح ... غدروني عمي
فاضل ... ياهو غدرك؟
فالح ... نستلة الحلاق عمي
فاضل ... استغفر الله واتوب اليه من كل ذنب ولك عمي ياهو مسوي بوجهك وشعرك هيج
فالح ... انضحك عليه عمي
يحجي وبعدة متخذة وضعية الطالب العاقل ويجاوب بأجابات مختصرة
عمي طكت مرارتة رفع العكازة وكلة والله اكسرك اذا ما تحجي
فالح فتح ايدة ومدهة ... بس عودتين عمي لا تعورني
فاضل ... لا اله الا الله وحده لا شريك له راح يجلطني ولك احجي عدل
فالح ... شمسوي مو هل واكف عاقل، كتلي اكسرك مديتلك ايدي وسهلت عليك الضربة
وجاي تسألني واجاوبك
فاضل ... فهمني شلون ومنو مسوي بخلقتك هيييج ولك تخزينة بنص العالم شيكولون ولددددنة مخنثين
فالح ... رحت للحلاق نستلة علمود اصير مثل مهند التركي وهوا سواني هيج
فاضل ... يعني هسة انته مهند ؟
فالح ... لا عمي كح** شريفة ..
فاضل ... ولك عييييييب عليك عيييييب مسووووي برووووحك هيج
فالح ... شمسوي وعيب؟ شنو مصلخ وطالع بالشارع
فاضل ... وهذا شعرك ابو الميش وحواجبك ولك فالح عيييب
فالح ... هم كاال عيب يا جماعة تشوفوني نازع هدومي؟ نازع الشورت ؟
فاضل ... امشي اطلع بره
فالح ... والله بيت عمي وبكيفي ظ
فاضل ... بالحنة والعرس ما تطلع يم العالم تضل هنناااا كاعد يم النسوان
فالح بفرح ... الله العباس عليك صدك اضل يم النسوان
ليث ... خلينة نروح لنستلة كلنااا سداددد ..
فاضل ... مستهترين امسربتين، هاي النثية تاخذونهة ترجعونهة زلمة لا والحسن ما اخلي يحضر لا حنة ولا عرس ولا عزيمة ثاني يوم ..
فالح ... يابه مو هاي البنية حلت المشكلة بعد المن طالع بالشارع
فاضل ... اخذو للحلاق يسويلة حل اخذوووو راح يموتني شكلة يفشل مادري شلون متحمل واكف گباله
فالح ... استر عرضي الله يستر عليك
وخليني بالبيت وهاي البنية حلت المشكلة يحجي ويأشر عليه
فاضل ... رهف ؟
فالح ... اي كهف حلتهة كالت اصبغ شعرك اسود ونزل شعرك ع وجهك علمود تتغطة الحواجب واللحية بعد شسويلهة ما تطلع بس حمار الوجه يروح بعصار بت النسوان ..
رهف ... بتنوسام !
فالح ... اي ماعرفهة جيبولي صبغ اسود يله سداد حباب
فاضل ... طالع من ارجع ما اريد اشوف هاي النثية كبالي
حجاها وطلع، عاد سداد كله رايح اجيبلك صبغ اسود وانه جبتلة عصارة قدمتهة اله وكتله تفضل حط الوجهك منها كلي شكرا ست كهف
اجتي عمه نجوى انطتني مبايلهة كالت امج ع خط تريد تحجي وياجن
اخذت المبايل وفتت للغرفة اسلم عليهة لكيت فلك كاعدة بغرفتنة تبجي من شافتني مسحت دموعهة وابتسمت رفعتلهة حاجبي بمعنى شكو
كال بهمس ... ع فدك ههههه
ابتسمت الهة عود راح تتزوج هنا وياها بنفس البيت ماعرف ليش تبجي هيج .. ماله داعي
ولو هية الأخت نعمة عظيمة، ما يعرف قيمتهة الا الماعندة منهة
هية البلسم ع جرح ، والنسمة الدافية التنعش الكلوب ..
تعثرنة الحياة وايد الخوات تنتشلنة من أرض البؤس الوكعتنة بي ..
كالت امي ان هم عازميهم وراح يجون يحضرون العرس ومن هذا الحجي ونهينة الاتصال ..
طلعت للمطبخ عزلت المسواك ويا سفانة وجان يفوت فالح شاف جدرية جبيرة ع طباخ جنة طابخين بيهة عرنوص ، فتحهة وشاف عرنوص كال ..
فالح ... وواووووو عرنوووص بالجدر وينوووص
هذا مستوي لو لا ..
رهف ... لحگتنة ع عرنوصاتنة اي مستوي شوية ونطفي ، اطلعلك واحد ؟
فالح ... شكرا ست كهف بس انه ما احب واحد يخدمني اعتمد ع نفسي
سفانة ... كون يسمعك غيث ويكعد يذكرك بأيام طفولتكم من جنت تتعاجز تشتري ماي لو كيكة وتكعد بالرحلة مثل الأمير وهوا يروح لشباك الحانوت الجنة ضريح والوادم كتلة علي يحارررب طووول الفرصة علمود يشتريلك ..
مها ... لو من جان يتعارك ويروح يشتكي لرجلي ليث عاد ليش يركض يكتل المتعارك وياهم فالح حتى لو هوا العايل، والاستاذ جان يوكف مثل الامير
فالح ... ذكرتني بماضيي الله لا ينطيجن ، بطلت حتى عرنوص ما اريد
يحجي وهوا يفتح الكاونتر وياخذ صحن غسلة وطلع ثنين حطهن بالصحن وطلع كعد ع سور الحديقة ينفخ ع عرنوص لأن حار وياكل
... اكلجن هذا شافط
مها ... شايفتة هذا اليضحك ويحشش وكلشي يكلبه نكتة اذا طكن فيوزاتة لازم يضرب واذا ضرب يدمي
متشوفين من اجة عمتي لزمت كلبهة عبالهة كاتل احد
رهف ... ما فهمت شلون يعني يضرب المقابل
مها ... لو المقابل لو روحة ، مرة اختة وامه غثنة كلش وسون سالفة بدون علمة هوا ما يقبل بيهة ورافضهة رفض قاطع
عصب والشيطان البراسة كعد وتفرعن
لا ينطي كلبة يمد ايدة ع امه ولا ع اختة
ولج رهف ضل يطك ويرفس بالحايط ويعض بصابيعة كلبهن زرك، ايدينة ورجلينة تعورن من كد الطك بالحايط
و لو تعارك ويا زلمة لو مو اخو يكضة يقضي بي التوبة
رهف ... هذا مريض !
سفانة ... لا مو مريض بس هوا اذا عصب معناها المقابل مسوي شي جبير وفالح ما يغفرلة
لان مو بسهولة يعصب
قوست شفايفي ورفعت حواجبي
... شافط والله .
يوم الحنة بالليل ، بدينة تحضير ومكياج
حطيت النفسي ورجعت مكيجت درة انه اعرف اخلي مكياج زين عكسهة متعرف
درة ... حطيلي حمرة لون احمر
رهف ... علمود تطلعين مطي ماكل رمان كعدي وسكتي
كلبت وجهة ما عاجبهة
مكيجتهة مكياج هادء يلوك الهة، ولبست فستان طويل وبي فتحة للركبة مثل فساتين الكاوليات
لونة فاتح وبي خرز من يم الصدر و ردانات كيبور
ولبخت جسمهة بودر بس خليت شي خفيف، علمود يتوحد لون جسمهة ويا وجهة
وكفت كبال المرايه باوعت النفسهة وحسبة تاخذهة والثانية تجيبهة، مهمومة ما اعرف شبيهة
لمست شعرهة وضلت تباوعلة بتفكير مطول وبعدهة همست ... خليني اگصة
رهف ... علمود امي تنحرج سكتي سكتي يمة منج
درة ... يكول احب شعرج الطويل وسمارج وشامة ايدج
خليني اكصة
رهف ... منو يكول ولج
نزت وضحكت بهدوء ... اشاقة ثول بس اريد اكصة شوية
رهف ... نووو نوووو
عفتهة وبدلت لبست فستان قصير لونة اسود من جوة ورصاصي من فوك، ردن طويلة
بس صدر وظهر مكشوف
وكعب عالي اسود ..
التفتت الدرة باوعتلي وانه باوعتلهة وضلينة صافنين بوجه بعض دقايق، بعدهة كالت درة
شلون نطلع انه استحي
... ولج حتى انه استحي خلينة نكعد من يجي احد نطلع ويا ..
درة ... خوش حجي
فلك ...
فتت ع غرفة البنات ابجي واناشغ شافني كامن ثنينهن وحجن بصوت واحد
... شبيييج
تمددت ع سرير وكلت ببجي
... موووو حلوووو عليه فستااااني مو حلوووووووووو
رهف ... والنبي انتي خبلة لج فستانج يجنن اذا تلبسينة اتطلعين صاروخ روسي وخصوصا انتي جسمج حلو
شلت ايدي من ع عيوني صدك تحجين ?
رهف ... اي والله لا تتخبلين كومي عدلي مكياجج وبدلي واذا ما طلعتي احلى وحدة بالحفلة ما اتسمة رهف
باوعت عليهة من فوك ليجوة، لابسة فستان قصير كاعد ع جسمهة كعدة وحدة تكول مفصل خصوصا الهة، وملامحها حلوة ويا المكياج صايرة لوحة فنية مرسومة بأيد ابدع الفنانين
ودرة كذلك حلوة بس مو مثل رهف هاي رهف اتطيح الطير الطاير من السما
كمت اخذت الفستان باوعتلة، ورجعت الحسرات تزدحم بحنجرتي، والاهات تشك صدري وتطلع
يااا ربي احبه ما اكدر اتخيل باجر ينزف ع اختي شمرت الفستان ورجعت اشهك وابجي من كل كلبي ..
رهف ... اسم الله فلك تخبلتي؟ انزع فستاني تلبسينة؟
فلك ... ما اريد بجيت وصار وجهي مو حلو ما اريد شي بعد ياربي ليش انه هيج حظي ليش جبتهة من صغر سني متمرمرة
درة ... ترة كبرتي الموضوع والله السالفة ما تسوة
حجيت هيج وحسيت لفحة هوا حارة لسعت ركبتي
التفتت مثل المجنونة، بس ما لكيت احد وراي
ما انتبهن التصرفي الغريب الحمدلله
فلك ...رهف توسلت بية وضلت تقنع بية ان اني حلوة والفستان حلوة
بس نست حظي اگشر ومصخم وقبيح
شمرلي الطعم ، جكليتة حلوة ركضت وراها بـ برائة طفلة، مجرد صارت بأيدي وقضمت منهة قطعة صغيرة ، انتشرت مرورتهة بريگي، ما كدرت اذبهة ونجبرت اتجرع مرورة الباقي منها، جانت علللقم ، ونزلت ع كلبي مثل الحمم البركانية ..
وحرگتة ...
كمت لبست الفستان واخذت نفس عميق داويت بي جروحي لفترة محدودة ، غسلت وجهي ومكيجتة مرة ثانية .. كل شوية تتضخم حنجرتي من فرط التنهيدات غير الدموع الأحسها تتصارع بمقلتاي حتى تهطل ع خدودي المتقرحة من كثر الدمع ..
رهف ... همست لفلك
... ولج راح تتزوج وياج بنفس البيت شبيج انتي تخبلتي بس تبجين
هزتلي راسهة بـ اي وسكتت ..
والله هسة لو تعرس درة ما ابجي هالكثر
تونسنة وركصنة حنينة العروس وخنصر العريس وانتهت الليله
لبست صايتي فوك فستان الحفلة وحطيت الشال ع راسي وطلعت للحمام الساعة بل1 والبيت مابي ولا نفس، كملت سبحت غسلت ملابسي بأيدي وحطيتهم بسطلة
لفيت راسي بالمنشفة وطلعت نشفتهن
صعدت ع كيفي بدون ما اطلع صوت للسطح، وشريتهن ع حبل، ونزلت
بنهاية الدرج صار بوجهي سداد وليث يردون يصعدون
استحيت لان لافة المنشفة ع راسي وملابسة شال
هم سوولي طريق وانه طفرت من يمهم ..
سمعت سداد يكول لاخو ليث بهمس ... تموت تموووت
ليث ... انجببب لك !
سداد ... قصدي شريف وسيد سامي
فتت للغرفة نمت بعد تفكير طويل ومماطلة ويا نفسي، كعدت ثاني يوم ع صوت الاغاني
باوعت الساعة بالعشرة كمت غسلت وصبيتلي جاي البيت مكلوب فوك حدر ناس
كلة بنات عمامي ونسوانهم وباقي القرايب من بنات خال وخالة
صار بيناتنة سلام فقط
هم ما يتدخلون بشي ولا يسألون هواي
نصهم مسلمة عليهم بالحنة فـ ارتاحيت منهم والنص الثاني طاح نص من خدي وانه اسلم عليهم
ودرة الملعونة غلست
بين تحضير ومكياج ولبس وشغل صار العصر
واجة العريس صعد الغرفتة لبس وكمل ونزل
فلك ... نزل گبال عيني ، تتبعة النسوان والولد من الاقارب بالهلاهل و الهوسات انطش الجكليت وطاح ويا طيحة دموعي
مسحتهن وشحيت نظري الجان ثابت علي
جريت نفس، وضليت اهلهل وياهن و ع هوساتهن ادبك وياهن وانه حاطة الشال ع راسي وجسمي الطالع
يمكن اصعب شعور ممكن يعيشة الانسان هوا يشوف قطعة من كلبة تروح منه ..
هوا شلون صار قطعة من كلبي! شلون تعلقت بحبة هيج مادري مادري
من يوم فات الهذا البيت مضروب ومكسور الجناح، طاح كبالي والي شمرة صاح بغضب عارم
... ابن الچلاااااب ما اررريدك تررررجع البيتي ضل يم عمامك خلي يلمونك ، جان يقصد هاني
اذكرت ايديني ركضت حوطتة من راد يهد ويضرب الزلمة الي طلع بعدين خالة
وابجي واصرخ ... بووووووية الحك بووووية
طلع الزلمة من عتبة الباب وهذا التفتت عليه شافني ومسح خشمة بأبهامة من الدم وكال
... وانتي ليششش راسج مفرع كدام هذا الخر**
بوكتهة عيوني جحضت مصدومة هذا منو؟ ما عرفتة
لطمت ع خدي والله لو ابوي واخواني يعرفون انه الرعنة حوطتة بأيديني علمود ما يهد يذبحوني
ركضت للبيت وطلع ابوي بوجهي باوعلي وباوعلة وصاح بخوف ... هاااني هاااني
ركضلة بهمة وانه تصنمت بمكاني، من عرفت هذا هاني ابن عمي جعفر الي كان البيت دوم بسيرتة هوا وخواتة لـ3
حب عذري انزرعت بذرتة بداخلي، ويكبر ويا هاني كبال عيني، جنت اتعلم اطبخ علمودة حتى اسبق امي للمطبخ واطبخ الأكله الي يحبها
هوا يغسل ملابسة بأيدة، اركض اخذهن اكويهن وارتبهن واعلكهن بكنتورة
ارتب اغراضة
وابدل فرشة سريرة كل اسبوع واغسل القديمة
حالة من حال اخواني الممتزوجين
بس لا هوا مو مثل اخواني
اخدم اخواني لأن هذا واجبي اتجاهم
الا هوا اركضلة قبل ليغص حتى اكسب حبة ..
جنت دوم اصيح الأمي واخليهة يمي واستشيرهة من اريد اسوي تغيير لغرفتة
اكللهة ... ليش منغير البردات بغرف الولد صارن قديمات
وهية توافقني الرأي وتاخذني للسواك اختار بردات تلاثة اله والأخواني، علمود ابعد الشكوك عني
داريتة مثل الماي بالصينية حتى امي ونسوان اخواني صارن يشكن، بس انه كتلهن مثل اخوي اذا ما تردن اخدمة انتن خدمنة
هنة يستحن عاد كالن هم حقج اذا مو انتي تسويلة الي يريد منو يسويله خطية ..
هاني يكبر، والحب يكبر ويا
لدرجة حسيتة صار جزء مني لا يمكن ان يتجزء
عيوني تلاحكة مثل ظله
وعيونة! تلاحك اختي ، حبهة لدرجة ينسة روحة من تكعد كباله عبالك ماكو احد بهذا الكون غيرهة ..
يدقق بأصغر تفصيل من تفاصيلهة، يروح للزيارة او للسوك ويشتري هداية للكل
هية يجيب الهة احلى واحسن شي ..
نفضت الافكار من راسي من شفت امي يمي وتحجي وياي وانه بالي مو يمهة
... فلك شبيج يمة مو اكلج زحمة ضيفي النسوان ماي عيب
... وين الماي
... بغرفتچن
رحت طلعت الماي وقدمت للعالم
الزفة صارت نطلع من بيتنة للصالون نجيبها ونجي
لبست صاية وعدلت شالي
جنت اجلد بروحي جلد واحس حتى الهوى خانگني
طلعنة جوكة مال بنات انه ورهف ودرة ومها وجمانه بت عمي صادق
حچت جمانة ، بلسانها الي يرتل
جمانة ...شـ شـ ووفنهم شـ شـطالعين ولد آل نع نعمان
رهف ...اي بوياي بوية كلهم لابسين بناطيل ، وقمصان نص لون سمائي ونص بيجي فاتح
وكلهم طوال وحلوين
بله هاي فكرتمن
مها ...فكرة بارق يبوي راح ينحسدون ولدنه كون يقرون المعوذات
رهف ...انتن شوفن الفلك عمامي عود هذول الشياب كلهم دشاديش بيض وبشتات لون نيلي وعگل
عمي شنو هاي انه هناك ماشوف هيج جنت محرومة
درة ...اوي اوي عثرت
لزمتها فلك ...طركاعة ناقصج طول لابسه كعب
اجة فالح يركض ورا بارق
بارق مخنزر ويعض اصبعه ويصيح ...عرضنة راااح شرفنة ضااااع ولچن لفن رواحچن
فالح ...اهلس شاربي؟ لا الله عليچن اهلس شاربي؟
لفن رواحجن لبسن العبي والصايات عدل
جمانة ...شـ شـ شنسوي هوى عـ عـ عالي
فارق ...اهلس شاربك هذا عرضك تطشر بييي فيطي
وسوا حركة بحلگه بمعنى مايفيد
فالح ...ولج جميننننه شفتي نستله طير شارررربي وعبالج صار الوضع فيطي وبعد ماكو زلمة على راسج
لفييي روحج
رهف ...خذيتونة حاصل فاصل غير الهوى يطير العبي شنسوي وين السيارات صعدونة يلا
بارق ...وين موليات رجعن الزلم يباوعولجن
درة ...لو تكطع رجلي مارجع
فالح ...خوية بارق خل نصعدهن ورا الزفة نهلس شواربنه بعد مالهن فايدة صارن شعر زايد
درة ... وانته منيلك شارب
خذونه صعدونه بالسيارات اشوفه يضحك ويطك اصبعتين كاعد يسوق ويمة ابوي بالصدر ، تنزل دمعتي وامسحها بأصابعي واگلهم دموع الفرح هاي هلت
مو انه التذرف دمع الحزن بزفة اختها ..
مرت ساعات العرس اختي جانت فرحانة، وانه اتلوع
حتى صرت احسدهة ع ضحكة التطلع منهة وانه كلبي ينزف ألم وجرحة صوتة عالي ...
من زفوهة، ابد ما تقربت منهة ولا حجيت وياها
وهية مستغربة
ماتدري يومية من تخابرة يمي بالليل وهوا فوك وتحجي وياي ويتغزل بيهة وهية تجاوبة انه شنو يصير بيه
احط راسي بالمخدة وابجي بخنكة عن لا يطلع صوت شهكاتي وفدك تعرف سري وتفسخ خطبتهة وتدمر كلشي
وتكسر كلبهة وكلب هاني حتى ترضيني ..
ما تحملت اكثر ، غمضت عيني وذبيت روحي بحضن رهف وهية ضلت اتطبطب ع خدودي وتحاجيني بصوت عالي
سويت نفسي تخربطت، ومن فتحت عيني كلت يمة راسي اخ راح اموت
... تعبت من هوسة العرس اخذنهة ترتاح ..
صدك خذتني رهف وبت عمي صادق "جمانه" وفوتني للغرفة ساعدتني رهف بدلت ملابسي ووجابت كلينس مبلل مسحت مكياجي قفلت الباب وتمددت غمضت عيوني ، ونخيت الله والأثنى عشر معصوم تمر هاي الليلة عليه بخير
احس عبالك واحد حاط كلبي ويرفس بي ، ما تحملت صوت الهلاهل العلى من فات هاني يزفونة
غصيت بعبرتي، كعدت لميت رجليني الصدري وضليت اشهك واضرب ع راسي بهستيرية
ياا ربي والله احبه مايطلع من كلبي عبالك كلبي انخلق حتى يحبة ويصير متيم بحبه
ضاگ نفسي ، اختنكت وهوى الدنيا كلهة ما يكفيني لطمت ع رجليني وحجيت بشهكة بصوت يهمس
... كاافي تهلهلن كافي ولجن كلبي بين اضلوعي جااي يتكطع ...
ربي موووتني موووتني وبرد كلبي المايقبل يهيد ..
وبدمعة عين خجلانة بسبب خيانة غير مقصودة الأختي الشالتنة بطن وحدة وتقاسمنة الخبزة واللكمة
وتنهيدة تجرح حنجرتي، وحسرة تنغز بكلبي ما تقبل تطفة، يتمرجح الحزن بكلبي
وتتكسر احلامي وتحترك كبالي الى ان تتحول رماد تمحي عصفة ريح "غفت عيني"
( العندة حب يكتل كتل عود ليش يتحول طفل ما ينام الا بسوالف دافية ! . )
هذا حدي لهذا اليوم حبايب كلبي لان الله شاهد مريضة وما اكدر اتعذر لازم اكتب بأي شكل
من الصبح الهسة احاول وهذا الطلع وياي
