 |
رواية لك ياذا الجمال اليوسفي الفصل الثامن 8 بقلم فاطمة العبادي
دكيت الباب مرتين تلاثة ما حصلت جواب ، فتحت الباب ع كيفي شفتة نايم ع ظهرة والغطة واصل لحلكة ويودي براسة يمين ويسار مثل الحلمان
فتت اباوع بهدوء بارجاء الغرفة ما شفت القرآن، فتحت الميز بهدوء كلشي ما لكيت
ضليت افر بعيوني محتارة وصارت عيني ع خالي كلت اكعدة
اذا ما احط القرآن جوة راسي انجن اليوم ..
وجان اكبر غلط اسوي بحياتي من تقربت من خالي حر وهوا نايم ..
وجهة مليان عرك، حجيت بهمس خالوووو خالووو حر اريد القرآن
اتأوه بألم عقدت حاجبي وحطيت ايدي ع راسة حاااررر شاب نار
شلت الغطة شوية عنة، وجبت وصلة وثلج وماي اسويلة كمادة
حطيتهة ع راسه وهوا اسنانة اطكطك و يون متألم
من شنو ما اعرف
ردت اكعدة، لان حرارتة ما تقبل تنزل
كلت اجيبله خافض حرارة اخلي يشرب ،بس هوا مو بوعية ويهلوس
جبت مخدة ثانية، رفعت راسة بايدي صار يم كتفي وحاولت احط المخدة الثانية جوة راسة
حسيت بي جر نفس قوي، ارتعش جسمي من شاربة لامس رگبتي ، توقعت اجة راسة بركبتي لان رافعتة انه ، بس جمد دمي من تبعتهة شفايفة طبعت قبلة رقيقة و همس بذبول .... يَ عطري ..
جمد الدم بعروقي ، وارتعشت كل ذرية، وحسيت بالاشمئزاز بسرعة ايديني نزلتة ع مخدة
وبعدة يهز براسة يمين ويسار ويهذي بصوت خافت
عطري، ااخ درتي ..
ارتديت خطوات قليلة للخلف، والخوف حاصر گلبي
ركضت للباب فتحتة وطلعت، وايدي حاطتهة ع كلبي .. فتت للغرفة كعدت ع سريري واباوع الايدي ترجف رجيف مو طبيعي
اسناني صارن واحد يطك باللاخ
احس الدنيا كلهة ضلمت بعيني، شلون صار هيج شلون خالي حر هوا ابو الرسائل
احس الدنيا وكفت، والعالم صار صنتة
حطيت ايديني ع راسي ونزلت راسي
فاكة عيوني ع وسعهن وعيوني تجري دمع بدون ما احس
شلون بجيت مادري ..
لا خالي لا انته ابوي واخوي وصديقي
انته السترتني من احتاجيت
ذرعانك صارلي وسادة بوكت التعب
يا ما شلتني ع متونك ، يا ما سهرت ليلك يم راسي بوكت مرضي
لااا تخررررب كلشي بنينا لاااا تخرب
اااااخ رررربي ساعدني، فدوة اروح الاسمك انه بس ساعدني وخليني اغمض عيني وافتحهة ويطلع كلشششي حلم، ما اريد اطلع مخدوعة بخالي حر ..
سمعت نقر خفيف ع باب الغرفة، كمت مسحت دموعي وفتحت الباب
شفتة واكف كبالي ، لابس بس برمودة للنوم
والضوة الخفيف خلاني اشوف نظرة عيونة الحمر
والعرگ الينزل من كل مكان
عقدت حاجبي بتساؤول، تمثيل ... خالي؟ شمگعدك بهذا الليل ..
مد ايدة لزمني من معصمي ، راد يجرني ضليت اماطل ... خاالي شبيييك
جرني حيل، طلعني من الغرفة، غلطي من خفت ماضليت احجي بصوت عالي واخلي رهف تكعد وخالي حر ينسحب ..
فوتني الغرفتة حيل ونتر ايدي نتر، شغل الضوة وتقرب مني بغضب
... شنووو جنتي تسوين هنااا شنو مدخلجججج لغرفتي بالليل
درة ... خااالي ردت اخذ القرآن بس ما لكيتة
حر ... ما تقربتي مني ما حجيتي وياي شي، ما لمستيني
هزيت راسي بـ لا
رجع كضني من زندي وجرني علي، صار قريب مني، لدرجة انفاسة تضرب بوجهي
نصة راسة يم اذني وهمس بغضب ... شسويتلللج احجي شنووو حاجيتج ..
درة ...اييي شبيييك ماحجيت شييي ماسمعتك جنت نايم
حر ...تراوااالي حجيت وطلع مني حجي حسيت حسيت
هزيت راسي بـ لا، وبعدت راسي عنه
اضطربت انفاسي وحسيت بشعور مقرف، ما اكدر اتحمل القرب هذا حطيت ايدي ع كتفة ادفعة ..
بس الدفعة صارت بنترة وغضب
عقد حاجبة، وهز راسة بأسى ... يااااا ماااا شلتج ع هذااا الجتف يامااااا تاليتج تعضييينة
درة ... شبييييك شنوووو عضيييتة شبيك انته
حر ... ممنتبهة الروحج بكل اتصال تكعدين تسولفين عن ولد اسمه همام ابن عمج ارفد
درة ... واذا .. هاي شجابهة ع هاي ، انه وين وانت وين
حر ... وين ما تكونين انتي انه اكون ..
حجيت بوجع ... اوووي خالي شبيييك
حر ... بيه عله ربت بنص كلبي وياچ ..
درة ... لا تحجي بالالغازززز احجي عدل
حر ... من يمته صرتي تعلين صوتج بوجهي هااا ولج ..
تأفأفت وحاولت افلت منه ، بس ما انطاني اي فرصة
كل ما احاول ابتعد يشدد لزمتة ع زندي ، يزفر غضب ، عيونة حمر من صخونتة مادري من عصبيتة
ودمارات جسمة كلهة ناطة وترجف ويا ..
دفعني ع سريرة ، كعدت عدل
وهوا بعدة كاضني من زندي ،حسيت اصابعي انغرزت بي رجع نصة راسة المستواية ، ضليت ارجف
... خالي شسوي شبيك
حر ... انتي شتشوفيني شنوووو جاي اسوي
درة ... تخوفني ، وخر
حر ... بعد لا تكليلي خالي .. أمرني بصرامة
درة ... بس انته خالي
خضني حيل وكال بغضب، مثل الخبال ...لا تكليليييي خالي لا تكليلييي خالي
نزلت دموعي مرة ثانية ، خايفة مرتجفة
...شنو تزرع تحصد، راجع نفسك وشوف شنو زرعت بية من انه صغيرة ليومك هذا ..
هاااااا ... شووو سكتت
صفن بوجهي شوية، ودفعني حسيت ايدي انملخت
همست بوجع ... ااخ خالي ..
لزم زندي بهدوء وكال ... عورتچ ..؟
هزيت راسي بـ لا .. ونصيت راسي
حر ... انطيتيني طينتي بخدي ، انه علمتج بس ما توقعت راح يجي يوم وتطبقين تعلومي عليه
وبدال ما تداوين كلبي المكطع، راح تدوسينة برجلج
وتمردينة مرد
ولچ مردتي افادي مرد ..
جم مرة كتلج انه، المحصول راح يكون حسب بذورج التزرعينهة بگلوب ناسج
ويامن طبقتيهة طبقتيهة وياي ..!!!
درة ...ربيتني مثل رهف وصرت اشوفك مثل ما رهف تشوفك ما ظنيت بيوم تدنه نفسك عليَ شگلتلك روحك
شنو احساسك من سويت هيج
حر ..
خاااب انتِ صرتي وسواسي، سمارچ هذا سمااارچ شيطاني الرجيم ، ما صرت اتعوذ من ابليس لا صرت استعيذ بالله من سمارج وعيونج، وصوتج وضعفج شعرج الطويل وايدينج الناعمة، والشامة الي بايدج
وأثر الجرح الي بزندج ..
كعد وارتجى كنتور وحط ايدة ع راسة ... شايفة من تخطفين من يمي، لو تكعدين يمي
ويتسلل عطرج الرئاتي ، شيصير بية ؟
درة ... شيصير ؟
حر ... أخدر .
درة انه كلبي بين ضلوعي ينبض بس غررريب ولا چنة الي ، كله ألج ..
كمت بهدوء ونفضت ملابسي وكتله ... راح اعتبر روحي ما سمعت شي وانته اعتبر روحك ما حجيت
وباجر نرجع العمامي وبعد ما اعتب هذا البيت
شال ايدة من راسة وحط راسة ع كنتور باوعلي بعتب وهز راسة ... براحتچ ، بس ذراعي راح تضل سيف تبتر گلب كل واحد غيري يفكر بيج ..
درة ...يعني؟
حر ...ما اتحمل اشوف گلب غيري يهواچ راح اخليهم يكرهوج ويمقتوج حد الجنون
حتى اضمن ماكو بشر غيري يحبج لو يلفت انتباهج احد كلهم لازم يواجهوج بالكره
درة ...بديت تصدمني ، صدمة اقوى من صدمة
حر ...طلعي من يمي
درة ...ليش منو گلك عاجبني اضل يمك هل طالعة خليك هنا وحدك راجع نفسك وشوف شسويت وشحجيت بلكي للصبح يرجع عقلك لمكانه
عقد حاجبة باوعلي بنظرة واحد متألم ..
طلعت وسديت الباب وراي، جانت الرجفة مسيطرة ع كل ذرة بجسمي، لفيت راسي بالفراش وارتج مثل النبتة الهشة بنص الريح اليعصف ..
بهاي الفترة احس الدنيا شدت حيلهة ولزمت سوط الحزن والصدمات، وصارت تجلدني بدون ميرفلهة جفن ولا يلين الهة كلب
عند عمامي جنت حزينة، وبائسة بسبب الغربة، احس روحي غريبة بنصهم ، رغم تعاملهم الحلو ودمهم الخفيف ..
وهسة طلع خالي حر صفح، احس بالقرفة كل ما اتذكر حجية وياي قبل دقايق وجسمي كلة يرتج بعنف، للصبح عيني ما غفت
كمت صليت وتبعتني رهف صلت ونزلت
الا اني ضالة كاعدة بمكاني انتظر طلعة خالي حر للعلوة يله انزل ..
بعد ماصارت بل9 وصرت متأكدة مليون بالمية، هسة خوالي رايحين للعلوة نزلت عيوني حمر واجفاني منفوخة بسبب السهر ..
صبحت عليهم، وصبيتلي كلاص جاي اخذتة بأيدي وجاي اصعد الدرج
التقينة اني ويا بنهاية الدرج
هوا جاي ينزل وانه صاعدة ، يفرك بجبينة وعيونة نفس عيوني مبين النوم ما زاير عينة والصخونة بعدهة اتدك بي
مادري شصار بية ارتعشت
نزلت راسي و وخرت عنة حتى نزل وانه اركض للغرفة، نزل خطوة صار ع باية الي انه بيهة حط ايدة ع محجر
عبالي لان يريد ينزل بس صدمني من صار وجهة قريب عليه و كال بصوت مبحوح من التعب
.... هضيمة صرتي راسج مااا ترفعينة بحضرتي، بعد ما جنت بيتچ التحتمين بي، و وجهي جان الأمان الج
شما شفتي مني البارحة وسمعتي من حجي
بس ثقي ما أأذيچ، ولج انتي لو تاكلين بفادي ما امنعج ولا اجيسج بريشة ..
ما رديت ولا رفعت راسي شال ايدة ونزل الدرج بخطوات متثاقلة ، ما ادري شصار بية بس حسيت بثكل بمعدتي من القرف ما جاي اتقبل كلامة وياي ولا بقدر شعرة ، حطيت الكلاص بالكاع وركضت للمغسلة حطيت اصبعي ببلعومي وتقيئت ..
اريد اخف احس روحي ثكيلة ..حسيت بحركته يمي مد ايدة شال ضفيرتي وكال ... لاه بابا شمتريگة من الصبح وهيج صار بيج .
درة ... متريكة قهر ومرض وسم من البارحة ..
حركت جتفي حتى ابعد ايدة عنها بس هوا ولا كأن اخذ ماي بايدة وغسل وجهي .... شنو احجيلي معدتج تحركج لو لعبانة نفسج، خاف عندج تسمم ..
درة ... لعبانة نفسي واحس بثكل بجوفي اريد أخف .
حر ... شنو متريكة
درة ... ما متريكة مالي نفس مسدودة نفسي عن كلشي هسة اذا اكل العسل يطلع بحلكي مر .
حر ... يعني متاكدة ما ماكلة بيضتين وكرصة خبز
درة ... لا وخرررررر
حر ... شمسويلج هسة ما تكليلي، امشي وياي تريكي
درة ... خالي ماااريد
حر ..بطليهاا هاااي
درة ...مو امشي بكيفك انه وخر ليغاد ميل عني اريد اتنفس خنگتني
حر ...خنگتچ؟
درة ...اي وجودك يمي خنگني ميل عني اريد اتنفس
ضل مغضب حواجبة ما حجة شي بس يباوعلي بتأني ومركز بكل تفاصيلي احسه يدرسني من جديد ..
درة ...روح عالج تفكيرك وياريت تعاقب نفسك على افعالك ومشاعرك شنو ازمة نسوان دنت نفسك على المربيهة؟!
حچيت متعجبة وبكل تهكم ..
غسلت وجهي مرة ثانية واخذت كلاص الجاي، ابد ما باوعتلة ولا شفت ردة فعلة كبل دخلت للغرفة وسديت الباب قفلتة خاف يفوت عليه ..
اول ما فتت لفت نظري شي غريب بزاوية الغرفة ، التفتت ولن اشوف الاطفال ثنينهم كاعدين بطرف الغرفة ومكرفصين ع نفسهة ..
درت وجهي، وهمست بصوت يرجف بسم الله الرحمن الرحيم
قريت ايه الكرسي وبعد ما باوعت ع زاوية
ضليت دايرة وجهي
واقنع بروحي هذا خيال مو صدك ..
رجعت باوعت ع زاوية الغرفة ما شفت شي ..
شربت الجاي صاير بارد ، وضليت كاعدة بالغرفة بس فتحت قفل الباب
تمددت حاولت انام غفيت شوية
وهاجمتني الاحلام ... واليوم اول مرة احلم بخالي حر ، شابة بي النار من جدمة للراس
ملامح وجهة مقتضبة، وزام شفايفة بغيض
ماعرف شلون ميزت وجهة بنص النار
تقرب مني راد يلزمني، وانتفضت، ما حسيت غير اشهك وارفع راسي
... رهف خوفتيني
رهف ... شسالفة وكت غدة يله امشي تغدي
نزلت تغديت بس هوا ما جان موجود والي عرفتة دايخ ونايم بغرفتة
امي كالت بتساؤول ... ليش نمتي
درة ... مو البارحة سهرت
خصمت عيونهة بشك وباوعت فوك ورجعت تاكل
بعدين سألت ... اليوم ترحن مو ?
رهف ... اي يجي علينة سداد شنو لازم ثقلنة عليج يمة
وعد ... لا والله اصلا انتظر نحصل بيت ووننجمع بروح، بس سألت هيج وبعدين عمامجن يردون مصلحتجن
رهف ... هسة صارو عمامي يردون مصلحتنة مو جانو مو خوش ناس
وعد ... انتن تضلن من دمهم ولحمهم، وهم عمامج بيهم طبع المن دمهم ولحمهم يموتون علي عكس الغريب يكرهونة ويمقتونه ..
رهف زمت شفايفهة ما عاجبهة حجي امي، كلش تغيرت رهف وصايرة شكاكة من ناحية امي وعمامي وتكول كلهم جذابين
كلهم ضامين سوالف علينه، وبالأخير راح نكرهم كلهم وشوفي ..
انه بالعكس ضدهة، صح مبين كلهم عدهم اسرار وضامين علينه هواي حجي، بس ما نكرهم بالاخير لان كلهم يحبونة
من امي الأصغر واحد بعمامي ..
العصر اجة علينة سداد، المسكين الصاك مبتلي بينة
صعدنة ويا، والأخ صح ثكيل بس مرات يستخف
جان لابس قميص سمائي وبنطرون
وفاتح القميص بس شوية
ومنا هوا اشكر ومرتب يلمع، وقميصة نظيف ومكوي ولا بي غلطة
تكول امير شارد من رواية ...
بالازدحام اجتي بنية صغيرة ، تقريبا عمرهة 9 سنين تبيع ماي
ومدتة اله جان تكلة ... عمووو اشتري مني فدوة لعيونك الحلوة ..
ضحك تكد خد وكللهة ... هذني بطاله الماي كلهن بشكد
ردت ... الف ونص
طلع خمسة وانطاها وكللهة انطينيا ، فتح باب السيارة واخذهن اسرع و حطهن بالسيارة وسد الباب مدت ايدهة انطتة باقي الفلوس
... لا عمو هذني الج
... لا عمي انه ما امد ايدي واكدي اريد فلوسي كلها بكد ذراعي ..
سداد ... زين اعتبريهة هدية من عمج ابو عيون الحلوة
... لا عمي
سداد ... ازعل ! راح اصير امر هواي منا ونصير اصدقاء
... انه ما اصاحب زلم عمي ، اخذهن
رهف طكتهة ضحكة و هوا اخذهن ما حب يحرجهة بعد ..
حب ينتقم من رهف كللهة ... عمي هاي مرتي شوفيهة مو حلوة اريد اطلكهة حقي لو مو حقي
... اي والله مزوركة
رهف بتذمر ... سدددااااددد
ضلينة نضحك والبنية راحت ورهف تشير روحهة وتركعهة
.... هسة ليشوفني ضاله عليك اخبل بس شوفتي عافية ، يالأشكر ويع وين اكو زلمة اشكر
شحلاته اسمراني ودمه حار هيج يفور ...
سداد ... ولج واريد اكلج ولج لساااانج لسااانج يبت عمي ترة تحجين حجي ع نيتج بس العالم تفسرة ع نيتهة يالثوووولة ..
رهف ... بعد انته شخليت ثولة و ولج تقبل اكلك ولك هاا واثول تقبل
سداد ... اكسر ضلوعج غير ..
حجاها منتفض ..
رهف ... جا اسكت لتكول عليه ، خوش حلوة هاي خله البنية تعيب عليه زروكة اصلا ماعدهم ذوق السمار من علامات الجمال ..
وها اني حنطية مو سمرررة
دارت وجهة زعلانه مكتفة ايديهة وتباوع ع شارع ..
وانة كاعدة وراهم بالنص اباوع ع عركهم ، واتثائب نعسانة
جان سداد يشغل اغنية ، ويغني وياها وهرجنة هرج
ومنج شي بعد منريد ، روحي يا حكومتنة
وجزنة من العنب كافي عمي نررريد سلتنة
شعب يحجي حجي هواية ماخذ راحتة وياية مو لعبة ترة هاية حكومةةة
وطك اصبع الزلمة ..
قبل لا تكمل الاغنية رهف نصتهة وكلتلة بتساؤول
... هذا الأسمة بارق الخطب درة شعجب لا يجي الكم لا شي اريد اشوف شكلة
سداد ضحك ورد ... الزلمة مقهور كلبة وزعلان من هاني ، ترة صعبة واحد ينرفض كبال كومة ناس
تخيلي هسة انتي كاعدة بين نسوان الهن مكانتهن كبار مثل الشيوخ الجانت كاعدة واصدقائة الحاضرين العقد ، تالي يجي خطيبج بملابس المدرسة يرفضج كدامهم
درة ... مقهور امداني وانه متوقعتة من ذاك اليوم الهذا اليوم شادلة وصلة ويردح لان رفضتة ..
سداد ... عود ليش؟
درة ... انتم اسم الله كلكم حلوين وانه مثل الذبانة بنصكم وماكو واحد يقبل يتزوج هيج بنية مو حلوة ..
سداد ... يعني هسة انتي مو حلوة ؟
درة ... انتة شنو تشوف
سداد ... بنية عادية ما بيهة شي اسمهة درة
ضحكت بخجل فلك هذا البسبوسة كال عليه حلوة ارتجيت ع كشن ورهف كلتلة
... حقا خطية انه شفت همام اخو كذا مرة، اكلك هذا ليش هيج مريض ليش متعالجونة ترة الولد مابي شي يعني مرض نفسي بسيط وقابل للشفاء منه ..
قوس شفايفة بمعنى ما ادري وما جاوب
الظاهر ناسين ما ملقنينة زين
لأن الاباء يخفون عننه اسرار
سكت شوية و كال ... مو كلشي اعرفة انه بس الشي الوحيد الأذكرى انه رجعت من السفر جنت ويا خالي بالأردن ، من رجعت لكيت همام متمرض وصاير يحجي ويا روحة هواي وحساس بسرعة يبجي قبل خمس سنوات خضع لعلاج ، وتحسن بنسبة 50%
رهف ... شوكت رجعت من الأردن ولكيتة مخبل
سداد ... بسنة 2^^^^ يعني ورة وفاة حلقومة
رهف ... دوختني سالفتة هذا الولد ، حجت وهية تلتفت عليه تباوعلي بحيرة ..
سولفنة سوالف عادية حد ما وصلنة ، نزل سداد وكال ... وبعد جم يوم تعال روح جيب نتائج الدكتورات
رهف ... ههههه واذا هلكد مستثقلنة رجعنة لبيت خوالنه
سداد ... لا بوية انتن الخير والبركة، البيت والسيارة الجن وانه الي العتبة
رهف ... اي هيج اريدك ..
فتنة للبيت نزع نظارتة، وتمغط عبالك واحد نعسان
سلمنة ع موجودين وبدلنة، التعويد شي صعب شكد ما راح نضل هنا راح نحسب روحنة غريبات ..
طلعت ملابسي من الجنطة، لكيت ورقة سودة ملفوفة بنص ثوبي عفتهة بنصة وضميتة بالكنتور
بيومهة تعشينة و ورة العشا تجمعنة كلنة بغرفة فدك وصرنة نحف ونشير تحضير لعرس هاني
فدك نايمة ونازعة هدومهة ومها تشير ظهرها الهة وانه رهف تشيرلي ايديني بس الصريخ وصل الاخل الدنيا
طبت علينه عمه نجوى ركض تضرب كف ايدهة بأيدهة الثانية وتكول بغضب وهية تخزر بينة ..
نجوى ... ولجن صوتچن هاي جارتي فطيمة تكول شنو هذا الصوت ، ردت اكللهة بناتنة كلهن حبلات بشعر وجاي يطلكن بس استحيت
صوتجن
كلنا گلنالهة خوش ..وضلينة نعصر بروحنة
مو شيرة وحفافة تكول ولادة ..
خلصنة بتعب وكملنة سوالف وسبحنة ..واجينة ننام جان التفكير مسيطر ع عقلي
احس روحي مشدوهة وضايعة مو سهل ة الصار وياي مو سهل
احس روحي ضايعة مني، وطريق الصح بعيد
وسلكي طريق ثاني راح يؤدي بيه الى تهلكة ..دعيت هواي انسى الصار واكمل طبيعي
بس كل شوية يرجع الموقف ينعرض كبالي، وادوخ واحس بالغثيان ..
وغيمة سودة تنزل ع عيوني وتعميهن لحضات ..
رهف ... قبل حنة هاني بيوم، كعدت الصبح نتساعد ع ترتيب البيت وتغيير البردات
عمة نجوى تريد كلشي مضبوط
عدا درة كلشي ما تسوي كاعدة تاكل وتباوع علينة وكل شوية تكول عفييية النادرات
رهف ... لو بيج خير كومي ويانه بدل الاكل
نجوى ... لا لا لا ما تكوم درة رچيچة اخاف عليهة اذا تطيح تنفصم ..
مها ... عمة والله عندج طائفية
رهف ... صدك عمة هاي عنصرية شنو احنة وحد
نجوى ... اي وحد هاي مرت حمودي ان شاءالله
حمودي ... يااااااا
نجوى ... وعلاااا
درة ... اكلك حمودي خوووطيبي شنو اسمك ما تشرفت بي الهسة احمد لو محمد
حمودي ... اسمي محمود
نجوى ... بنات العباس عليجن شوفنهم مو جنهم عصافير حب، يا يمة يمتة ازوج سداد وحمودي
رهف اذا تقبلين اخذج السداد واخذ درة لحمودي
وتصيرن خوات ابيت واحد شتكولين ..
جانت تحجي كل عقلهة ومقتنعة ضحكنة انه ومها
... شنو عمة مسوية مؤسسة وجاي تزوجين بينة هذا زواج مو ثوب نلبسة واذا ما عجبنة ننزعة
نجوى ... اووو هسة انه ما كلت زواج غصب كلت زواج زواج يعني من اذا انتن وافقتن وهمة وافقو ، نتوكل
رهف ... عمة سدي الموضوع انه رافضة لا تفشلينة انه وسداد
سداد ... ويجوز انه موافق
رهف ... يمتة اجيت انته
نجوى ... هلا بكمر بيتي
سداد ... هلا بيج يمة سمعت تردين تزوجيني
نجوى ... لا هيج خلي العروس توافق والنوب احجي وياك
سداد ... هلوووو وليش ما توافق تلگة احسن مني؟
نجوى ... لا انته خيرة الشباب
سداد ... تلكة اثقف مني ؟
نجوى ... لا، مدرس عربي ومثقف ودمك خفيف و واعي وتفكيرك منفتح ..
سداد ... تلكة احلى مني ..
نجوى ... لا بس هية هم حلوة ..
سداد ... تلكة واحد يحبهااا اكثرر مني
نجوى ... لا انته طالع ع ابوك وراح تعشكها مثل ما عشكني
باوعلي وضحك بفخر ويسوي روحة يرفع بياختة بس للأسف تيشيرتة ما بي ياخة
رهف ... لا تكشر لو ترغي ما أخذك ..
سداد ... وانتي لو تنبحين ما أخذج ..
دارة ... هذولي ديوچة عررب ما يتراهمون عمة عوفيهم وباوعيلنة انه وحمدمد مو لايكين سوية؟
نجوى ... اي والله شتكول سداد
حمودي ... اووو اكوم احسنلي الحجي وياكم لا يفيد ولا يجيب العيد، ما اتزوج ما اتزوج
درة ... اتشاقة وياك لا تخترع هههههههه ..
خطية الولد خجلتة درة، هو كلش خجول وهادء لدرجة ما تحسين بوجودة ، ومؤدب كلش
ماخذ صفات غيث
بينما سداد ماخذ صفات ليث بس سداد مؤدب ليث نازع المستحى ..
شلت سطل الماي وذبيتة وحطيت كل اغراض التنظيف سوية كلت المها عوفيهن وصعدي شوفي سفانة خطية بعدهة ممخلصة هية وفلك
وانه اخذ هذني للمخزن ارجعهن
طلعت من باب المطبخ ورحت ورة البيت ضميتهن بالمخزن، وطلعت عفتة مفتوح لان راح ارجع
صعدت اخذت الباقيات من سفانة وفلك ونزلتهن
طلعت ارجعهن للمخزن حسيت بحركة ورة الاغراض تقربت ع كيفي اتفقد حسبالي بزونة وجان يطلع بوجهي زلمة متلثم ماطالع غير بؤبؤ عينة
فزعت ونبلع صوتي ثواني وبعدها صرخت باعلى صوتي من شفتة يركض ويطلع من باب المخزن
والغبي راح ع حديقة مال البيت الكدام ركضت ورا
وصارت ويا وصولي طلعتهم ع صوتي نص من الاستقبال ونص من باب المطبخ لان جانت كعدتهم كل مجموعة بمكان ، وهوا واكف بس يحجي ويلهث ... ها ليث شلونك اجيت اشوفك
ليث ... هاا هلا هلا، رهف شبيج طفر عليج ابو بريص لو انكسر ظفرج
رهف ... لا لكيت ابو بريص عملاق بالمخزن جنة تمساح
احجي و أااشر ع ولد المغطي وجهة
ليث ... قصدج فالح
رهف ... يا فالح يا مالح هذا هذا خرعني لابد بالمخزن
فالح كعد ع سور الحديقة و لطم ع افخاذة ... يا خوية انه شااارد ومن طبيت الكم كلت اختل بالمخزن منا ع ما استرجع حيلي
نجوى بشهكة ...شصااااير يبوووي منوووو وياك ولك بس لا كاتلك احد
هاني .... لاااااا وتخربون عررررسي
ليث ... خاب دسكت ولك فالح طلع وجهك شمالك واحجي شمفين
فالح ... لا لا اذا اطلع وجهي تصير مصيبة، ولك صارت بية سالفة ما تنحجي
نجوى ... لا هذا كاتلة واحد وراح يصخم وجوهنة ولكم وين انلبدة وين هسة يجون الشرطة وين نضمممة
درة بهمس ... هذا فالح منو
فلك ... ابن عمي صادق شبيج هم ناسيتة ...
قوست شفايفهة وضلينة نباوع هوا ليث كلة بخوف احجيلي شمسوي ولك طركت كلبي
فالح ... رحت لهذا نستلة الحلاق طبيتلة وكتلة يخوي عندي عرس ابن عمي اريد اتطلعني مهند التررركي ..
هوا باوعلي منا ومنا وكال اكعددد اطلعك احلى منه
نجوى ... وما طلعك مثلة وطكيتة يبوووي متسوى يعمة، مو كلشي بالضرب لا تصير همجي
فالح ... هسة خليني اكككمللل
اي يمحفوضة السلامة كلي اكعد ع كرسي ومالك غرض
وهوا ما ضل شي ما جابة وحطة ع شعري وكلي غمض
ويجيب بهذا الشمع ويفرغ ع وجهي ويجيب ويفرغ ع وجهي وانه فرحان كلت راح اطلع مهند والبنات يتراجفن علية ..
وكلي ارفع حاجبك رفعتة واجة يحف بي كتلة عوف حاجبي كال لا بس اعدلة
هوا كمل وغسل شعري وكعدني كبال المرايه
ولك يليث يخوي اباوع الحواجبي جنهن حواجب وحدة كح** ، خوب وجهي انظف من وجه العروس
والطركاعة شعري اميشة الي
ليث ... اتصخم وجهك وتلطمت
فالح ... ولك مو هنا الطركاعة الطركاعة الزلم بالمحل كلهة تكلي شحلاتك صرت احلى من مهند
واجو يكلولة سوينلة مثلة
انه كيفت ونفخت ريشاتي ورجعت اتمشة وجار عيوني بغرور، جا صرت مهند
شو اباوع العالم تباوعلي عبالك بربوك عابرة من يمهم
كلت هذولي كاتلهم القهر جا صرت احلى منهم ..
وضليت امشي نافخ ريشاتي ومكيف
لمن طبيت ع امي ولن تلطم ع صدرهة وتكلي
طلعتك من البيت زلمة رديتلي كح***
ولك روح رجع وجهك القديم كبل لا يجي ابوك يعدمك بعكالة ..
تاليتي يكولون ابن صادق طلع نثية ..
اناخوك جريت الشماغ تلثمت بي، اضم وجهي من فضيحتي واجيت الكم البد عدكم ..وين اولي
امري صار مشكوك بي
رهف ... انزع خلي نحكم
عاط بية ... شنزع ولج ....!
ليث ... لا تصير مطي انزع الشماغ عن وجهك وشعرك وخلينة نشوف
هوا ذبة وعمتي كلتلة ... خاب روح رجع شعرك اسود لو زينة كرعة، وهاي حواجبك تحطلهن زيت الخروع شهرين وهم ما يطلعن
فالح ... شسووووي تورطت والله ابوي يذبحني بسجينة عمية ع قبلة اليهود
رهف ... سهلة تجيب صبغ شعر اسود وتصبغ شعرك وهذا الحمار الي بوجهك يروح بس حطلة عصارة بتنوسام منا العكب باجر ما يضل بي شي
واذا ع حواجب نزل شعرك عليهن مثل تسريحة التسعينااات هههههههههه
ليث خزرني ، رفعت طرف حاجبي بغرور وكملت ... اي سوي هيج واللحية الراحت فدوة لـ لميس يمهند
حجيتهة وفتت للبيت عمتي نجوى رزلتة ولحكتنة هية وباقي البنات ..
هاي جانت ايام سعيدة، كل خيط يحملة النه اليوم عبارة عن ضحكات تتعالى
اصوات الاغاني هرجت البيت
من بينهة
محمد وابن محمد شكو كلبي ونامو بي ..
جنت واكفة يم الأ بي ثري، واطك اصبع
حسيت بواحد همس بأذني
... والله جعفر وبت جعفر شگو كلبي ونامو بي ، يبوية شكد حبيتچ بهذا الشهر ..!
چن صدك شكيتي كلبي ونمتي بي ......
