رواية بنت عمتي الفصل السابع بقلم جمانه السعيدي
#بنت عمتي
البارت السابع
#جمانه السعيدي
ثائر....اول سنه مرام داومت كليه صيدله كان سنة ٢٠١٧
وتحديدا هاي السنه اني فتحت مشروعي
ابيع اجهزة موبايل وايباد وكارت شحن وخط انترنيت
بهاي الفتره كانت هاي الشغله احسن شغله
لان الانترنيت صار سنتين من انتشر بلعراق
والعراقين متعجبين ومتجهين علي بشكل مو طبيعي
خصوصا العراق جان عايش عزله دوليه عن العالم بسبب الحكم السابق
رغم راتب عمو سلطان ماشي الله يرحمه وتستلمه عمتي
بس اني كنت متكفل بكل مصاريف مرام بلكليه
واي شي يحتاجو بلبيت اني حاضر اجيبه قبل لا يطلبو
اخذت مرام وجهزتها احلى ملابس وارقى الاحذيه
وجبتلها موبايل حديث
وسحبت خط نت للبيت
كلما اشوفها فرحانه كلبي يفرح وياها
جمانه السعيدي
بس اني قليل اتواجد بلبيت مو مثل قبل
بس بليل اشوف مرام يعني اطمن عليها وهاي هي
لان تقرا كلية الصيدله حيل صعبه
ومحتاجه تركيز
واني احاول اخليها تركز على دراستها
ولو مشتاق للعرك اني وياها بعد ماكو مشاكل كل واحد مشغول عن الثاني
شغلي خير من الله واني عندي واهس للشغل مو طبيعي
بعد اني صرت مسؤل عن عائله
عمتي ماتحرك عود بلبيت اذا ما تسئلني
اذا تريد تطلع الاي مكان تستأذن مني
اذا مرام تريد هي وعمتي يطلعن حتلو للطبيب يسئلني اذا اقبل لو لا
عمتي شكبرها عمرها صار بلستين وما تطلع اله تاخذ الأذن مني واوافق يله
هذا الشي خلاني اصير حريص عليهم اكثر
لان احس اني المسؤل عنهم
هاي الامانه الي عافها اليه عمو سلطان لازم احافظ عليها
بيوم تفاجئت خالي مهند جايني المكان شغلي
اني وأهل امي اكو قطيعه بينا لان همه ابد ما سئلو عني
من مات ابوي
ولا اهتمو الامري من امي عافتني
بيت عمتي ولا مره اجا اي احد منهم يطمن عليه
ولو بلجذب
وكانما ما صدكو يخلصون مني
جمانه السعيدي
بس اني رب العالمين رحمني بعمتي وعمي سلطان
هم كانو السند والعائله بلنسبه اليه
المهم اني كاعد سمعت السلام عليكم
رفعت راسي خالي مهند كبران ومتغير حيل
وكفت وسلمت علي
ثائر...تفضل اهلا وسهلا
مهند...الله يسلمك
ثائر. صحت على جاي وماي
...شلونك ابو احمد اريد اكله شلونك خالي ما تطلع من الساني لان اني مااحس بي خالي
مهند...الحمد لله انت شلونك شغلك شلونه
ثائر...الحمد لله ماشي خير من الله
مهند...اليوم جايك بموضوع شويه محرج
ثائر...تفضل
مهند....امك
ثائر...استغربت امي شبيها امي
مهند... اني علاقتي بامك مو قويه تعرف هي تتعمد تخلق مشاكل وياا ام احمد
لمن قسمنا البيت يله خلصنا من هاي المشاكل
اني مشغول بلدوام
اجي تعبان ما اتفقدها دائما ايجوز بلاسبوع او اسبوعين
اشوفه مره بلصدفه واسلم عليه
امك مو زغيره حتى اقلق عليها
جبيره عمرها فوك الخمسين
يعني مو شابه واركض وراها تعرف تتصرف
واني كنت مطمن من هاي الناحيه
ثائر....اي كمل قلقتني امي شبيها
مهند...اكتشفت قبل يومين امك مزوجه بلسر لا اني ولا خالك خالد ولا اي احد يعرف
واحد وصلي الخبر اليوم رحت واجهتها
مانكرت تكول اني جبيره واعرف اتصرف
اني مو معترض على زواجها بس الزواج اله اصول
غير يجي نتعرف علي نسل منو ابن منو
لا والمصببه ازغر منها بعشرين سنه
وعطال بطال هي الي تصرف علي
كل هذا بجها والمصيبه الاكبر
تنتضر يصير اليل ودخله للبيت والصبح يطلع من بيتنا
انت يعجبك هذا الكلام
الناس شتكول علينا الناس جاي تشوفه يدخل للبيت يتسيحب ويطلع الفجر مثل الحرامي
يعجبك هذا الحجي
ثائر...ابد مااستغرب هذا الشي من امي
طول عمرها انانيه تحب بس نفسها ابدل ما تحاول تصلح بيني وبينها ونتجمع سوا
جاي تدور علاقات على كبر
جمانه السعيدي
ثائر...اني شنو المطلوب مني
مهند...تجي تخليلها حد
ثائر...تعرف اني علاقتي باامي مو تمام ومستحيل تسمع كلامي
مهند...والحل شنو
ثائر.. اذا انطيك حل تسوي
مهند...اي اكيد
ثائر...لازم تجبرها تبطل من هاي السوالف انت خلي كامرا على الباب وراقبها من تطلع ومن تدخل
خلي يكون عدها علم انت جاي تراقب حركاتها
لو تهددها تطلع من بيتكم خليها تمارس مراهقتها
بعيد عن البيت ليش جايبتلكم السمعه الموزينه
لازم امي تختار واحد من ذني الخيارات
واذا عاندت طلعها من البيت حتلو بلغصب
مستحيل راتبها يكفي تدفع ايجار ومصاريف معيشه
وتصرف على حبيبها
من تشوف نفسها بهيج ماازق هي راح تبطل وحدها
صدكني لو جايتني وكايله اني كبرت اريد اعيش وياك
مااعوفها بس اني اعرف امي زين
بس تلكه بديل عني راح ترجع تعوفني مره ثانيه
كبرت وما بطلت سوالفها ابد
مهند...ليش ما تجي وياي اني وياك نحجي عليه
ثائر...امي واعرفها مستحيل تتقبل كلامي
على فكره قبل اكثر من سنه لكيته بمطعم وياا واحد
وهددتها بيك
توقعت خافت وراح تبطل بس ابو طبع ما يبطل طبعه ابد
مهند...اريد رقم تليفونك حتى اتواصل وياك
ترا تصرفات امك ما تأثر علينا بس لا تأثر على سمعتك
انت هم انت ابنها
أثير...اني محد يعرف هاي امي
كلها متوقعه عمتي امي هلكد ما عشت بيت عمتي
مع ذالك ماا قبل امي تصرف تصرف اي تصرف غلط
احاول احميها من نفسها لان ماتعرف تتصرف
جمانه السعيدي
ثائر...رجعت بيومها كلش ضايج ماكدرت مااحجي العمتي الي صار
لان كلبي محترك
امي مزوجه ولد بلتلاثين اكبر مني بشويه
وعايشه قصة حب
وتصرف علي من راتبها ودخله للبيت مثل الحرامي
لو اليه سلطه عليها اله اذبحها
يمتى تعقل ياربي هاي مصيبه مو ام
ورا اربع ايام خالي اتصل عليه كال خليت كامرات بلباب
وهددت امك لو تطلع من البيت وخلي تسوي اي شي يعجبها مااريدها تشوه سمعت بيتي
لو تبطل من هاي السوالف
كالت اي اطلع اني ماسويت شي غلط مزوجه على سنة الله ورسوله
اتصلت بزوجها بلتليفون كدامي
خالي ...بس اتصلت اني فتحت الحاكيه حتى اسمع رده عليها
..
كالته تعال احجي وياا اخوي يريدني اطلع من البيت
تعال اجرلي بيت نكعد اني وياك بي
لو تعرف شكالها
ثائر... اي الهيبه شكال
خالي... طلكها بلتليفون يكله شلون اطلعين من البيت
ترديني اصرف على وحدا بكد امي
لو تبقين بيتج وتنطيني نص الراتب ونبقى على هذا وضعنا
اجيج بس بليل وماااصرف عليج فلس احمر
لو اطلكج وكلمن يروح بطريقه
اني ماعايز مشاكل
قفل التليفون بوجها وبمكان ما تعتذر من الشي الي سوته كامت تحجي عليه
تكول انتم لا ترحمون ولاتعوفون رحمة الله تنزل
بيش مااذيكم هو لو الله تدمرون حياتي يله ترتاحون
خالي...اذا تردين زواج ماعندي مانع خلي يجي يخطبج
وبدون مهر بس كدام العالم
مو بلسر ويتختل مثل الحرامي
اني خليت كامرات اي شي اشوفه بعد خارج الادب
ما تلومين اله نفسج
اطردج طردت الجلب من البيت وما يهمني
لان انتي كمتي ما تحترمين اي احد
عفتها وطلعت
ثائر.. خوش اسوي ابو احمد امي تحتاج واحد يوكفها عد حدها لان تخبلت رسمي
امي ما تقبل تحترم نفسها لازم كل فتره تغثني
مدري ادعي عليها مدري ادعي ربي يهديها
وصلت مرام للمرحله الثانيه بلكليه
بعد مانجحت من المرحله الاولى وجبتلها كلاده ذهب هديه حتى اشجعها على النجاح
واني هم شغلي خير من الله
ربي فاتحها عليه من أوسع الأبواب
جمانه السعيدي
تحديد قبل نص السنه شهر ١٢ تقريبا
رجعت للبيت لكيت عمتي نايمه ومرام منتضرتني
اتعجبت لان لكيتها منتضرتني
لان هي من بدا الدوام لليوم مااشوفها اله قليل
اني اطلع الصبح وماارجع اله بليل
حتى الضهر ماارجع للبيت
لان مسافه بعيده واضيع وقت بلاش اطلب غدا من أي
مطعم قريب وخلاص
بس بالنهار اتصل على عمتي تقريبا مرتين اطمن عليها
واتصل على مرام خاف محتاجه شي اجيبه وياي من ارجع
حتى بلعطله من نجحت مرام
الصبح اطلع وهنا نايمات وبليل من ارجع
يكون بينا كلام بسيط وعادي واكون تعبان اريد انام
لان الصبح اطلع للشغل
المهم رجعت لكيت مرام منتضرتني
ثائر...هااا شكو
مرام...منتضرتك
ثائر .. كولي حبيبتي محتاجه شي
مرام...تعال بغرفتي مااريد امي تسمع
ثائر.. هااا يعني سر
مرام...اي سر
رحنا اني وياها بغرفتها
مرام ...اكعد
ثائر... كعدت خير احجي
مرام...اكو موضوع اريد اخذ رائيك بي
ثائر....خير
مرام...هذا الموضوع مهم بلنسبه اليه وانت اقرب واحد
القلبي ومااثق باي احد غيرك
اريد رائيك لان احتاج استشير احد يفتهم
ثائر.. احجي شكو
مرام...اني احب واحد وياي بلدوام وهو يحبني
من العام صارحني بس اني كنت متردده وبعدني
حزينه على بابا
بس هو لان يحبني صبر عليه
والسنه رجع فاتحني بلموضوع مره ثانيه
هو خوش ولد بس مو نفس مرحلتي هو السنه مرحله اخيره
الصراحه اني عاجبني كلش كعدنا اني وياا كم مره وحجينا
يعني مواضيع عامه
سئلني على عائلتي وشلون عايشين
احنا تبادلنا الأرقام وكاعد نحجي سوا
شنو رائيك انطي فرصه لو لا
ثائر...صافن عليه شلون تحجي عنه وعيونها تلمع
مرام تحب تحب واحد غيري
مرام الي ربيتها على اديه تحب واحد غيري
لا وجايه تاخذ رائي
مرام....هااا شكلت شو سكتت
ثائر....تحبي
مرام...اي احبه اموت علي هو خوش انسان وينحب
اذا تريد تجي وياي للجامعه
تتعرف علي هاا شكلت
اني حجيتله عنك كتله اي شي مايصير بدون موافقة ثائر
ثائر. كنت اسمع قبل واحد يكول انعصر كلبي
بس ما فهمت معناها اله بهاي اللحظه
اني هسه انعصر كلبي
حبيبتي الي ربيتها على ايدي واني انتضر تكبر
وتصير من نصيبي
تحب واحد غيري
ليش ما حبتني بيش هو احسن مني
يمكن السبب مني اكيد اني السبب
ليش بقيت ساكت كل هذا الوقت وماحجيت
اثول اي اني اثول وغبي كنت خايف اشغلها عن دراستها
لمن اجا غيري وحطم احلامي
اريد اعرف يمتى وشلون
هاي حبيبتي الزغيرونه شلون تصير الغيري
حسيت جسمي صخن ونفسي تلعب
الدنيا صارت سوده بعيني
مرام تحب واحد غيري