 |
رواية ليلة الحنة الفصل السابع 7 بقلم بسمة البياتي
تقريباً بالتسعة اكثر الخطار، راحوا بس بقوا بيت خالتهم گاعده ويا النسوان مرجية ايدي على التخم رجعت راسي ليورة ما ادري شلون غفيت كعدت على هزة قوية من كتفي اخت ليث. الصغيرة گدامي خازرتني
خالتهم تضحك گالت خطية مبين العروس نعسانة واحنا طولنة يلا نروح
هما طلعوا من الباب لو القيامة قامت عمتي رجت البيت بصياحها
جمدت بمكاني مصدومة مد أستوعب شبيها وشنو البدر مني خلاها هيج تتعصب معقوىة لان غفيت قابل متقصدة
...بعدج بسم الله مصارلج ساعات من طبيتي البيتي وبديتي بمكرج وخباثتج بس لا عبالج هاي حركاتج تعبر عليه
لج سسسسسمعي هذا مو بيت أهلج الفگر
اذا عدكم متستقبلون الخطار اهنا الخطار تخلي على رأسج فهمتتتتي لو اعيد
... حجيت بغصة اهلي شدخلهم وتحجين عليهم
ماكو خطار يطلع من بيتنا ضايج لو مأخذ على خاطره ترى اهلي أصحاب واجب واهل كرم
.. اي واضح خليني سساكتة ششفت بعيني شلون ذيحتوا روحكم على الفلوس
... على صوت صياحها فات عمي والولد
أبو مازن... أيناس خير شبيج؟!
... تعال شششششوف مرة أبنك المحترمة بنت الأصول فشششلتني وفششلت اختي
خلتها تأخذ عائلتها وتطلع مغثوثة
ليال... دموعي تجري دافعت عن نفسي بيأس والله ممتقصدة ليششش متصدگين
عمتي خبصتهم تعيط وتغلط حاولت ابرر موقفي بكل الطرق ماكو فائدة
عمي صف ويا مرتة وليث ساكت كلمة ما احجة عيني عليه أريده يدافعلي لو بكلمة ابد ماكو
واكف مثل الصنم الحايط يرد وهو ميرد
مرة ابنهم الجبير نقذت الموقف
گالت
واذا غفت شكو بيها البنية وتعبانة الخطار استلموها من الصبح لهسه
من المغرب عيني عليها بالگوة فاتحة عينها هي عروس مكانها غرفتها مو تگعد تجامل هذا وذاك
مازن...العتب مو عليها العتب على ابنج عايف عروستة من أول يوم
اذا خطارج ما عدهم احساس هي شدخلها
مو البارحة جانوا حاضرين وباركولهم بعد ششكو
امششي أخذ مرتك ترتاح واعذرينة خيتي
طلعنا احنا الـ منعرف الأصول مو انتي
... عمتي كامت تكمز من كلامهم
ما أنتظرت أسمع شي ثاني عفتهم وصعدت تمددت بالفراش دموعي تزخ
أجه ليث راد يحضني دفعتة رجاءً عوفني
... حبيبتي لاتكبريها مرة جبيرة واذا حجت عليج شكو بيها اعتبريها امج لاتظلين على اقل شي تبجين
... لو شي يستوجب مجان انقهرت
معقولة اتعمد انام حتى اطرد الخطار تفكيرها ابد مو منطقي أبتعد ليث ما اريد احجي
... وين اروح مششتاقلج عمري
... هه اي واضح مشتاقلي من الصبح عايفني ما فكرت تجي تشوفني لا گلت هاي شسوت مسوت اكلت شربت شلون تصرفت بأول يوم الها ويا ناس غربة متعرفهم ولا تعرف اطباعهم
... شسوي خرب شرفهم مفگو ياخة مني
كلما احاول افلت يجون وجبة ثانية اضطر اجاملهم واگعد
... حيل مقهورة منك لو ما اخوك ومرتة جان لهسه عمتي ترزل بيه وانت بس تتفرج
... اهووو شلون بله مراح تفض تبقين تعيدين وتزيدين بالموضوع
... لا اعيد ولا ازيد اريد انام نعسانة
.. تصبح على خير
... وانتي من اهله
زلال... مكان ليال فارغ بابا وماما گلبهم طاگ عليها عبالك بعد بحياتهم ميشوفوها
للأمانة حتى أخواني ضايجين
لمى أجت باتت يمي بمكان ليال
لمى.. زوزو زلولة زلززززززال
... رفعت رأسي الخاطر الكعبة شكو
ترى نعسسسانة وخري
... خالة گالت گعديها تتريگ وياج
... صغيرونة ماتعرفين تتريگين لو مستحية لأزم واحد يگابلج
.... دنجبي صوووجي اني موقرتج
گلت خطية دام الصمون والكاهي بعدهن حارات
اگعدها تتريگ اعرف بيها تحب الكاهي والگيمر
... شلت شعري من وجهي اوكفي گايمة لا تروحين
... طاح حظج ساعة اگعدج متقبلين من سمعتي بالأكل صار عندج نشاط
... على كلشي اتلاعب الا على الأكل هذا خط احمر
... ديلا رايحة احمي الجاي أكيد برد
بسرعة غسلي وتعالي
... گمت غسلت ورحت للمطبخ گابلت لمى وگعدت أكل
ما عرفتوا ليال اشگد تبقى بالفندق
شذى... وشمعرفنة خوما نروح نسألهم الصبح عمة أخذت لعيالها الريوگ
... وشششكو تأخذلهم بنتها ومو هناك
المنو مأخذة للقفاصة حتى تطفح
انرگعت بقبغ علبة الشكر انداريت على ماما
ششكو تضربيني حجيت شي غلط قابل جذب مو قفاصة
حورية... وروح ابوية اذا مانلصمتي اجي افرك حلگج بيدي غلط على الأكبر منج ما أريد اختج صارت منهم الخاطرها تحترميهم
...عوجت حلگي ديلا عاد على اساس هما اشگد محترميها
.... ششجاي ادردمين
... سسسساكتة مدتششوفيني جاي اكل بهدوء
.. عبالي
... بعد محجيت شي حتى ماما لا تضوج
بس موبيدي كرهت هذولة الناس ما اگدر اهضمهم
العصر رحت البيت خالي يم لمى بيبي گاعدة ويانة
أركان.. بيبي أريد ازوج توسطيلي يم الحجي محد يگدر يقنعه غيرج مو يگولون ماتجيبها غير نسوانها
... كلنا اندارينا عليه واكف يم الباب أيدة بجيوبة
نورية... بعد سراك ما جاي خلي يزوج امجد عود الله كريم
... وابقى انتظر شوكت المحروس امجد ياخذ هاي البومة
... مشكلتك ان عجبك لو ما عجبك لأزم تنتظر ادري شفنطك بالزواج هسه
... اجة گعد يم بيبي حاوط كتفها بيده
اركان...هي الأعمال بالنيات ونيتي دومها صافية
لهذا قررت اكمل نص ديني واكسب اجر وعند الله لا يضيع أجر المحسنين
لمى. راح تتزوج لو تجاهد اعمال ونيات وتكسب اجر خير خو ماكو شي
... راح اضحي بشبابي واخذ زلزال بربج هاي تضحية لو مو تضحية
زلال... هذا عود صدك يحجي لو يشاقى
نترت تضحي بششنو يمه ششنو كاتلة روحي عليك وما ادري بنفسي
... وكحة ولسان الي يأخذج لازم يحسب احساب الضغط والسكر الراح يشكلن عنده مستقبلاً هاي اذا ما اجه أجله بسكتة قلبية
نورية.. يمه شو اكلتنة حاصل فاصل اكو عاقل هيج يخطب
.. اني لو عاقل اورط روحي واخطب زلال
... لا عاد صدك زودتها مو قحط زلم وأخذك عميييي دطير
لمى... ههههه بربي فلم حرام عليك راح اطفرها مو تخطبها
... زلول ماتزعل مني مو صح
... اشششش صوتك ما أسمعه
نورية.... اركان حاجيني اني صدك رايدها لو شقى
... وربي صدك ليش متصدگون
زلال... من حلف دخلت بحالة صدمة وذهول ولمى كذلك
لمى... وصاحباتك وين صفى بيهن الدهر؟!
... طارن ويالملومة الدين يگول الأقربون اولى. بالمعروف
نورية... امشششي منا نعلعلا ضميرك
زلال...عفتهم وگمت صاحوا وراي وين رايحة يمعودة ولا انداريت اسمع بيبي ترزل اركان
صح معجبة بي وتمناه بس مو معناها يهيني ويجرحني
عندي كرامتي فوك كلشي
باليل اجت لمى تبات يمي دخلنا للفراش دنام
گالت
ترى اركان من صدك رايدج حتى خالة كوثر عرفت
... خلي يولي لاجيبلي طاريه
... شششوف الجذابة مو جنتي ميتة بي شو من صارت صدك كمتي تتعززين
... اني عزيزة من گاعي مو بدوره الي يريدني يخليني تاج على راسة ويطلبني مثل العالم والناس مو يهيني ويستهزء بيه
...يوووو زلال قابل جديدة عليج سوالف اركان ترى هذا طبعة محد يعرف صدگة من جذبة من شقاه والله من طلعتي بيبي لعبت بي طوبة
وخالة من سمعت هم غسلتة قاط ثاني
... حل يستاهل حتى بعد لايعيدها
صدك انتي وامجد شوكت تنفك جبستكم ترى طولتوها
...اوووف قابل بيدي الظروف دائماً عكس ويانة
كلشي متوقف على جية بابا مو تدرين
.. اي ادري بس أبوج هم مصخها معقولة ميگدر ياخذ اجازة شهر على الأقل صار سنتين شنو ممششتاقلكم
.. خطية لاتظلمي گلبه طاك لو بيده يجي اليوم گبل باجر بس شيسوي شغلة نحس اذا اجه ينطون مكانة الغير واحد ويضيع تعبه
... الله يساعده هم تعب وهم غربة
... اي والله
.. لج خاف مزوج على امج ياغافلين الكم الله
... هههههه لايمعودة شنو السالفة بابا فقير ماعنده هالسوالف هو وماما مخلصيها مكالمات
...هو يدري امجد رايدج شلون مامن مخليكم تبقون بيت خالو
...عنده ثقة بتربية خالي ويعرف امجد شنو
امجد كم مرة اتصل عليه طلب منه يستعجل بالجية حتى نعقد ونلبس الحلقات
يعني اني وامجد تقريباً مخطوبين مع ايقاف التنفيذ
.. حلو هاي مع إيقاف التنفيذ
... اني ما مستعجلة بس امجد كاتل روحه يريد نزوج ونستقر
.. يمعودة هم زين ابوج تاخر حتى تكملين دراسة
اخاف الخبل اذا اخذج يبطلج
..لا لا أبد ما فديوم طلب مني ابطل ولا عنده اشكال بهالموضوع وهي اخر سنة الي بالمعهد مامعقولة يگلي لاتكمليها اذا عقدنا
... ابتسمت اشگد ادفعيله
... احبه شعندي غيره
... فدوة تستاهلون كون تسوون عرس يونس اشبع بي رگص مو مثل عرس ليال كلشي مافهمنا منه
.. ههههه ليش ليال هم تحسبة عرس هذا كارثة من كوارث العصر والزمان
.. اي والنبي
ليال... ثاني يوم گعدت الوضع عادي وعمتي فاردة وجهة
الخطار اليوم هم استلمونا من الصبح للمغرب
بصراحة تعجبت اليشوف كرمهم ويا ضيوفهم وشلون يستقبلوهم ويحيرون شيقدملهم ولا كانو هما نفسهم الي لعبوا بينا طوبة بالخطوبة وبالعرس
اذا هيج عدهم الخطار مهمين لعد بالحفلة ليش خلوا اكثر الناس يحجون ويطلعون جوعانين
افتر رأسي
ليث باليل حب وغرام وسهر للصبح يطلع النهار بح بعد ما اشوفة
اهلي ثالث يوم أجوي خطية كومة هدايا جايبين ماقصروا وياي لا بالخطوبة ولا هسه
سبعة ما سوينة
الصبح ليث طلع ويا اخو نزلت جوة عمتي بالمطبخ تحضر الغدا
وكفت يمها گتلها خلي اساعدج واذا يعجبج اني اطبخ
أيناس... لا ما أريد الطبخ عليه روحي ساعدي ورد ونظفي البيت وياها
... طلعت من المطبخ ورد حبابة ولسانها حلو بسرعة توالمنة كملنا الشغل
اجوي الولد صبينا الغدة الطعم ابد معجبني
مامتعودة على هيج طبخ ماما نفسها بالأكل فد شي وبـ شهادة الجميع تتفنن بالأكل واحنا طلعنا عليها حتى نسوان اخواني تعلمن منها
حتى الجاي هي سوتة مقبلت احد غيرها يسوي ورد الظاهر تعرف طبعها بس اني لان جديدة حسيت بالأحراج من رفضت اسوي وبنفس الوقت استغربت شنو فلمها
من صعدت الغرفتي سألت ليث
عمة ليش متقبل احد يساعدها بالطبخ؟!
... ما أعرف
.. هاا اي زين
.. حبيبتي اريدج تسمعين كلامها شوفي ورد شلون كاسبتها انتي هم شسوي سوي مثلها ما أريد مشاكل اني اروح عشر ايام وارجع عشرة اريد بهالايام ارتاح مو بوجهي للمصايب وگالت امك وعملت مرتك
... على كيفك يمعودة شسألتك حتى هيج تجاوب
... كلامي ما اله دخل بسؤالج من هسه ردت انبهج حتى لايصير قال وقلت بالمستقبل
... ممم ماشي اني هم راح التهي بالدوام ما اعتقد عندي وقت للعركات والطلايب
.. نعست تعالي الحضني اريد انام
..دخلت الحضنة ورة شوية نمنا
العصر من گعد سبح بدل وطلع نزلت جوة محد ماكو بس ورد
ورد... مسوية جاي واكو كعك تريدين وياي
.. ابتسمت اي
كعدنا ناكل ظلت تحجيلي عنهم وعن اطباعهم
الى ان بدت تحجيلي عن اطباع عمتي ظليت صافنة عليها
... عمتي تحب تبقى هي رقم واحد بـ حياة ولدها
وتكون هي الأمر الناهي والكل بالكل
اكيد اليوم استغربتي ليش متقبل تطبخين وهي طبخها مو هلكد؟
... اي والله حتى سألت ليث گال ما اعرف
...بكل بساطة تغار ماتتحمل ابنها يتعلق بمرتة اكثر منها متتقبل يعوف طبخها ويأكل من ايد زوجتة ويمكن يفضل طبخها ويمدحها
... هههه صدك تحجين ابد ممعقول
.. اي والله ليش متصدگين
.. وتتحمل تتعب وينكسر ظهرها بوكفة المطبخ وهي بهالعمر بس في سبيل ابنها مايحب طبخ مرتة اكثر من طبخها هاي المرة ابد مو معقولة تفكيرها فاول
... اي هههههه وياريت لو تعرف تطبخ كضت حياتها بالوظيفة من طلعت تقاعد احنا وگعنا بيها الغدة عليها والعشا اكل خفيف او جاهز
.... عندي سؤال ثاني وهم ظل بنفسي اتمنى لو اعرف جوابة
... اي عمري سألي ولاتخجلين
.. ليش من خطبتني بالكوة جهزتني وحتى العرس مدري شلونة داشوف هما مو هيج ماعدهم بخل ويصرفون ليش بس عليه بخلو
... يمعودة الشغلة صارت عناد بعناد عمتي من البداية مرادتج اله لان خطبوج اول مرة ورفضتي حزت بنفسها على شنو شلون ترفض ابني مرة ثانية من تقدملج هي مرضت
ومن صارت سالفة اختج بمحل الصياغة حقدت عليكم اكثر
جانت ناوية تسوي عرس فخم سماح لعبت بعقلها گالت مثل ما استحقرج عند الصايغ رديها الهم
وفعلاً قنعوا الولد هنا يرتبن مراسيم العرس
عمة كلفت ابن اختها هو يرتب كلشي ومثل ماشفتي النتيجة
مازن وغيث تخبلوا وتفشلوا بيوم العرس اصدقائهم وعوائلهم حاضرين نفضحوا گدامهم
من زفيناكم للفندق ورجعنا للبيت يوووو صارت مشكلة شكبرها
ما سكتوا الى ان شافوها رادت تتخربط
... تصدگين بديت اخاف
.. لا يمعودة كلشي انتهى بوكتة لا تفكرين
. ان شاء الله مايصير شي لان فعلاً اني ما احب. المشاكل
قبل لا تخلص اجازة ليث بيومين باليل سهرانين گال
.. شنو رأيج من اداوم تروحين البيت اهلج ومن ارجع ترجعين
... ليش عود؟!
.. ماتكيفين
.. بلي اكيد افرح بس استغربت ليث ما أريد مشاكل ويا عمة هي بالكوة تقبلتني
... يابة مشاكليش هي بنفسها گالت خلي تروح
لان امي وابوية ميگعدون هواي بالبيت بس يبقى غيث وزوجتة اكيد مراح تأخذين راحتج وياهم
.... هااا اذا هي كالت اي ياريت
.. ماشي حبيبتي جهزي نفسج عگب باجر قبل لا اطلع اخذج الهم
... ههههه هو الباب كدام الباب عادي اني اروح
.. لا مترهم لأزم اسلم عليهم
.. ماشي عمري براحتك
زلال.. مجطولة على ظهري مخلية رجل على رجل بيدي تلفون ماما والهيتفون باذني مندمجة ويا الأغنية صار خيال كدامي رفعت راسي عاا ليال
كمزت عليها حضنتها
... ههههه بالقرآن مشتاقتلج
.. يوووو اني اكثر
هم زين جيتي
... اوكفي خلي اشوف ليث راح لو بعده
.. ليش وينة
.. ويا بابا والولد بالأستقبال اجة يسلم عليهم قبل لا يلتحق
.. اهاا اوك شوفي وتعالي
طلعت ورة شوية رجعت بشريني تباتين لو ترجعين
... مممم بكيفج
... اذا بكيفي ما اريدج تروحين
... لعد ارتاحي باقية على كلبج عشر ايام الحد ما يرجع ليث
. گولي والله وعيالج شلون قبلوا
.. اي والله هما گالوا روحي عادي عدهم
.. والله زين هاي اول شغلة حلوة عجبتني بيهم
ماما من سمعت استغربت
ليال گالتلها
اهله يطلعون وليث يعرف مراح اخذ راحتي بوجود حماية خصوصاً اخوان زوجتة واصدقائة هواي يجون عليه
حورية... اذا برضاتهم احنا نكيف البيت فارغ بدونج
.... حضنتها فدوة العمرج والنبي گلبي طاك عليكم عبالك صار سنوات مشايفتكم
زلال... ماما ظلت تستفسر عن اوضاع ليال سألتها عيالج شلونهم وياج وهي اتكول الحمدلله زينين
كافي حجي ترى جعت شوكت تصبين الغدة
حورية...همج بس على بطنج حركي ايدج ساعدينة مو بس كاعدة
... لو ادري فلا احجي
ليال.. صبوا الغدة اكلت الحد ما بطني وجعتني
من يوم زواجي فقدت طعم الأكل الطيب حتى الجاهز ما احبة واصلاً من اگعد وياهم استحي اكل نص بطني وأگوم
زلال... أركان من يوم الحجى هذيج السالفة كلش تغير عينه صارت وكيحة من يشوفني لأزم يذبله كلمة يخجلني بيها
ما اگدر اصدك هو رايدني لان ادري بي مينحز ما اريد اعشم روحي على الخالي بلاش
امتحنت بالدرسين والحمدلله گدرت اشيلهن وانجح صرت خامس بدة دوامي قبل دوام ليال
لان هي اول مرحلة كلية يتأخرون يلا يداومون
رجعت من المدرسة تعبانة گعدت اتغدة شو سمجة مگابلتني وگاعدة مدري شلون تباوعلي صرت اضرب اخماس بأسداس معقولة اني مسوية شي وناسية حاولت اعصر دماغي وافكر لا والله ممسوية شي شبيها
خير ششبيج مو راح اغص باللكمة نظرتج تخوف تحسسني مسويتلي مكسورة وما ادري بنفسي
حورية.. كملي اكلج وتعالي للغرفة
.. ياساتر صارت بيها غرفة نسسدت نفسي ارتاحي
غسلت ورحت وراها ليال تخابر رجلها من شافتنة سدتة
حركتلها راسي بمعنى شكو
العوبة رفعتلي حاجبها وابتسمت بخبث
تحجوون عاد لو اصعد أذب نفسي من السطح واخلص منكم ششنو هالرعب هذا
حورية... والله يمه تدرين بنفسج عرمة ومصايبج هواي وتخافين
.... اي بسس هسه ممسوية شي
... ليش ما حجيتلي على اركان
.. هاا ليش شبي اركان
... هم غشمت روحها مو محاجيج گدام امي گايل اريدج
.. گعدت بالگاع مديت رجلي وخليت ايدي على گلبي
الله اكبر عليكم علمود المصخم اركان ترعبوني حتى غداي عفتة هسه شراح يحمي الي
ليال... ههههه شدعواج هلكد خفتي على گولت ماما مكسوراتج هواي
... سسكتي انتي الثانية مناقصتج
حورية... ليش منو الأولى وهي الثانية
... انييييي الأولى كافي عاد ششجاج اليوم بس لا عبالج من تسوين هيج وياي اخاف وانسى الموبايل والله فلا اتنازل عنه يا اني ياهو
... ششوف اني وين احجي وهي شجاوب
... اي ادري بس حبيت انطيج خبر اخاف بالج تتراجعين عن كلمتج
وبخصوص ابن اخوج ششمعرفني كلامة صدك لو جذب هو يطب ويطلع يشاقيني
... زلال هيج سالفة مابيها شقى
... هااا يعني صدك يريدني
.. اشوفج كيفتي
... لا هيج بس اريد اعرف
عافتني وطلعت هسه اني شفتهمت منها شوخبصتني وتالي قبل لا تنطيني الزبدة طلعت
ليال.. خالة كوثر اليوم حاجتها گالت اريد زلال لاركان ما اقبل تنطوها الأحد غيره
عاد بيبي گالت ذاك اليوم حاجاها كدامي
.. كمزت گرصت ليال من خدودها يااااي يعني صارت صدك وراح اخذه
هلا باليلعب جوبي هلا برجال الجوبي كلووشش
.. عززا صوتج ششجاج تخبلتني لاتكيفين منو يگول ينطوج
... عفية لاتخربين فرحتي ليش مينطوني
.. ما أدري اركان طربگجي وطايش مو مال زواج وانتي لهسه بالأعدادية
.... بلكي خالي يأثر عليهم حتى لو بس يخطبني هم ميخالف
... ان شاء الله حبيبتي
.. شو محضرة غراضج وين
.. فد شوية اروح باجر ليث ينزل
.. اهااا يوصل بسلامة
قبل المغرب راحت ليال
ماما خلتها سكتة بعد محجت بالموضوع
جنت طابرة من الفرح
اكو مرأية بالهول واگفة گدامها ناثرة كفشتي بيدي زيت الشعر
الشعر الحرير ع خدود يهفهف ويرجع يطير الششششعر الحرير
شذى.. مغرب راح ياذن حررررام
بعدين هو وينة الحرير لوما صارلج ساعة تلطشين بي بالزيت
... ما اجاوبج لان مبسسوطة اووي والشعر الحريرررررررر دشششوفي يخبل صح بي كسرة بس ناعم على عنادج
رجعت اغني الششششعر الحرير فتحت ايدي على وسعهن طار الزيت وصار طشارة مالة والي والكزاز بكل جهة
رغد.. خلي الشعر الحرير يفيدج ههههه امسحي الزيت ولمي الكزاز الجهال لاينجرحون
... اعوذ بالله مو عيون ليز مايخلون الواحد فرحان
لازم ينبصون
جبت وصلة المسح لملمت الكزاز وكعدت افرك
انگلبت من عبد الحليم الشادية وهي تغني والله يازمن
مسحت شلون مجان فتت للغرفة ربع ساعة وسسسمعت صووووت طبااااااه واااااااااخ
ركضت فتحت باب الغرفة ومديت راسي لگيت اخوية حبيبي عماد الحباب مجطول على ظهرة بالگاع ورجلة دم
خطية بالگوة كام يعرج ولأزم ظهرة
عماد... صدك جذب الگاع كلها زيت وكزاز هو هذا. تنظيفكم لو جاهل واكع ومجروح وين يتحمل منووو ذاب الزيت اهنا
... وكفت گبالة اكوو غيرهم جهال عادل القرودة
شذى فكت عينها خزرتني
شذى.. اعذرني خيي مثل مگالت الملاك زلال بعد هما قرودة
زلال... خوما متوجع بـ علاء ولا بيك
بنفس اللحظة انكفخت على راسي عززززا هذا علاء ششجابة
رغد.. طاح حظج صارلة قرن واكف اهنا
علاء.. بيمن ولج
.... ترى گلت لا بعلاء ولا بيك شو سمعك صاير نص ستاو
... اگلج اني بعمرج؟ لاعب وياج بينا ميانة
تعبت انصح وماكو استجابة ارزل وماكو فايدة امد ابدي جلدج مدبغ شششلون وياج بلكي الكي الحل عندج نوريني
... الحل اداريني وتهتم بأختك الصغيرة البارحة قبل لاتطلع گتلك جيبلي جبس وعصير گلت ماشي من رجعت ايد ورة وايد گدام والله ششنو نسيت
صير مثل عادل وعماد مايطبون للبيت اذا مو بيدهم شي الي
يحظي المن تجمع شو لا زواج ولا مسؤولية
علاء.. هاي البنية عجزت وياها تاكلني بالسانها
روحي من وجهي
... صار تدلل عفتة وانهزمت
ليال... من رجعت للبيت عمتي مدري شبيها كل شوية وگايلة شعجب رجعتي جان بقيتي الباجر ويا جيت ليث
گتلها عادي ماكو فرق اذا هسه او باجر
ردت اصعد ابلش ارتب غرفتي وراية هواي شغلات واريد احضر نفسي صارلي عشر ايام هاملة روحي
شو هاي لزگت بيه طلبت مني اساعدها بالعشا لان سماح وزوجها اهنا
ورد مستغربة اكثر مني
كمت اشتغل وياها جيبي هذا وودي هذاك
والمصيبة زوج سماح فد عوينجي گبر لفة عود استاذ بالجامعة تهي بهي
ما اطيق اظل گباله ياكلني بعيونة
كملنا العشا وصبية وراها طلبت مني اغسل المواعين وانظف المطبخ
الحد ما دخلوا ناموا اني اشتغل هلكت
كملت وصعدت ارتاحيت شوية بعدها بديت ارتب الغرفة
الگاع فارشين بيها كاربد ماكدرت اكنسها بالمكنسة الكهربائية لان صوتها عالي زحمة كلها نايمين يفزون على صوتها جبت فرشة عادية ونزلت اكنس بيها مسافة قليلة بين الكاع والجرباية خلال ما انظف الفرشة طخت بشي جوة الجرباية من الحافة مديت أيدي
بالزاوية اكو شي سحبتة صندوك صغير
ظليت افر بعيني واذني هذا شنو وشجابة جوة الجرباية معقولة ليث مخلي
شلتة ووكفت كعدت على خليتة بحضني من فتحتة الصدمة تضاعفت ذهب شششنو هذا ومنين اذا
الـ ليث شعنده يخلي اهنا خو يضمة بالكنتور ويقفل عليه
اريد اركز وافكر ماكو عقلي وكفت گلبت بالذهب
مو شوية وقطع ثگيلة لحظة احس بروحي شيفة كم قطعة منهن طلعت تلفوني اگلب بصور العرس ومثل متوقعت عمتي لابسة منهن......
