 |
رواية لك ياذا الجمال اليوسفي الفصل السادس 6 بقلم فاطمة العبادي
انطعن وجه درة بعد ما سمعت كلامها وردت منتفضة ... يا بارق كل عقلج تحجين انه ما اتزوج ما اريد، فرت كف ايدهة ودارت وجهة وهمست بغضب ... يردون يزوجوني غصب عني والله لو تموتون ما امشي بشوركم وقرارتكم ..
فلك اتسعت عيونهة وضلت تباوعلنة بشك وكالت ... بس همة كاعدين بالديوان ومنتظرين الشيخ يعقد ع اساس انتي موافقة وجاية برضاتج
رهف ... ليش انتي ما سمعتي مو كلنالكم جابونة سحل غصب عنه. ولا درة ولا انه نتزوج واحد منكم ننتظر خوالنة يجون ونرجع لبيتنة ..
فلك ... بس زحمة كبارية العشيرة كلهم كاعدين علمود المناسبة شنگللهم ؟ بنات انتن اشوفجن متربيات ع انفتاح ورأيجن هوا الاول والاخير هناك
واذا رفضتن محد يحجي حجاية لان متعودين ع اخذ راي البنية بالمرتبة الأولى
بس هنا الوضع غير، هنا نص الناس راح يعتبرون رفض درة لبارق بيوم العقد عار، ويعتبروهة صلفة و وكحة وبسرعة يطش صيت وكاحتهة وتصير علج بحلك اليسوة والمايسوة ..
درة صاحت بنبرة قهر والدموع تهل من عينهة بغزارة ... انه شللليييي غرض بالناس اذا شافتني وكحة لو عاااقلة انتم يعني احطممم مستقبلي واتزوج واحد ما اعرفة علمود لا يذيع بين الناس بت جعفر عرمة ..
فاضل ... يخسى ليكوووول ع بت اخوي عرمة ..
باوعنة ورا فلك الكمزت خايفة، فات عمي فاضل بأيدة عكازة لازمهة للكشخة، طويل القامة شعرة أبيض ويتخللة بعض الخصلات السود
الزايد شكلة هيبة و وقار .. عندة شارب كثيف
لابس دشداشة وعكال وبشت رغم هوا مو شيخ عشيرة
بس لان رجال جبير والكل هنا يحترمة ويقدرة ، واله هيبتة الفارضهة بجبروتة عليهم ..
زميت شفايفي بغيض وباوعتلة بحقد مفرط ..
فهم نظرتي ورفع حواجبة بتحدي ... ما تسلمن ع عمجن بنات
درة الفطيرة رادت تمشي تسلم علي عن قرب لزمتهة من ساعدهة ورجعتهة المكانهة وعيوني ثابتة بعيونة
حرب النظرات كان صوتهة عالي، سهام العتب والحقد والكراهية كادت تقتل كل الموجودين بهذا البيت
بعد ما حسيت بضعف كبال نظراتة شحيت بنظري واردفت بهدوء ... لا تتوقع نقابلكم بـ احترام وتقدير بعد ما ذليتونة ودستو احترامنة بنعلكم ..
عمي طلعونة من بيتنة مثل المخطوفات بنص صريخ امي وبجينة
حافيات، وخايفات وماندري وين ماخذينة
والمن وهبونة هداية او بالاحرى قدمونة قرابين حتى يخدمون مصالحهم ..
عقد حاجبة بأستغراب كملت كلامي الخلاه ينتفض ... وداسو بيت خالي وهوا مابي زلمة بس نسوان وهاني وخالد اخوك تعدو حرمت البيت
وهاي مو هينة بالعشاير وعليهة كعدات وفضايح وفصول ..
ضرب عكازتة بالكاع بقوة، وصاح بصوت مستنكر رج اركان البيت ... شلوووووون؟!!!!
رهف ... مثل ما سمعت درة مموافقة ع زواج اصلا وين اكو بنية هسة تقبل ينطونهة هدية وين عايشين انتم ?
فاضل ... هديتيش؟
رهف ... هوا هاني مو ناطي درة هدية لبارق
فاضل ... ماكو هيج حجي انننه خطبتهة من هااني لبارق وهوااا كال اروح اخذ شورهة واجاكم كبل 3 اشهر، وكايلية البنية راضية بأبن عمها ..
وامس راح هاني يكللهة حضري روحج للعقد وانتم كايلية جاهزين، ورهف تجي ويا اختهة هنا بعد شني؟
درة ... لا مو هيج هوا امس اجة وتعارك ويا خالي حر وكال بعظمة لسانة انطيتهة هدية الابن عمي وقبلهة، واليوم اجو ثنينهم جابونة لهنانة غصب ..
أشر براسة نطلع وكال ... امشن وياي للديوان ..
درة ... صخام ليش
فاضل ... امشن ومالجن شغل ..
مشينا وراه، طلعنة من الباب الاول وفتنة بالباب الثاني ديوان جبير ومتروس زلم، ارتجفت ويا رجفة جف ايد درة الحاضن ايدي
توجهت الانظار النه باستغراب وغضب
لأن من عادات اهل المضايف الديوان ما تدخلة مرأة
كعد عمي فاضل ... والكل يسأل ومعاتب ... منو ذني البنات ..
فاضل ... بوية هذني بناتنة بنات جعفر اخوي الله يرحمة
ادري هسة تختاضون عليه، والديوان ما تطبلة مرأة بس هاي عدكم مو عندي
انه اليوم موكف بنيات اخوي گبالكم ، علمود انشدهن عن رايهن ، طبعا البنات زغار ويتيمات ما اريد اكسر بخاطر وحدة منهن
لهذا السبب حجايتهة راح تصير الاولى والاخيرة وكبال كل الحضور
بوية درة، هاي جتافي الأبو فاضل ما ادري جايبيجن غصبًا عليجن، ولا ادري هاني شحاجي وشمفين
والكل هنانة شهود ع صار كبل 3 اشهر
احجو يا جماعة انه مو خطبت البنية البارق
الكل كالو اي، بأصوات متفاوتة وسكتو
فاضل ... هذا الصدك، وهذا هاني وهذا خالد انتم شحاجين ?
نصو روسهم ، ماردو
صاح مو احجي وياااكم
جفل هاني ورد بصوت متعلثم ... عمي تدري انه ما احبن حر ردت اكسر خشمة
فاضل ... بخووووواتك تكسرررر خشمة
هاني ... يضلن خواتي وانه اولى بيهن
فاضل ... يا جماعة الخير هاني جابر اختة وجايبهة وهية ما راضية
بوية درة احجي انتي راضية ببارق ابن عمج ?
هزت راسهة بـ لا بس يا دوب انه اليمهة شفتهة
رجع كال احجي بصوت عالي نريد نسمع
رفعت راسهة وكالت لا ما موافقة ..
فاضل ... سداد اخذ بنات عمك للبيت ..
اجة ولد لابس بنطرون وقميص سود اشكراني رفع ايدة بمعنى طلعن طلعنة انه ودرة بس عدينة باب المضيف كمزت بفرح وكتلهة ... شفتي وجهة شلون صار
سداد ... احم تفضلن خواتي
عافنة يم الباب وراح دخلنة للبيت، يم النسوان
وهنا صارت هوسة بالديوان، كله عتب ولوم ع هاني
وعمي خالد
ابتسمت بأنتصار ونفخت ريشاتي زين وطلع شي بي خير من عمامي، هذا الموقف يمكن راح يخليني انزع شوية من الحق اللابسة كلبي ويتباهة بي ..
لهناك وگبت الهوسة من برا الديوان، وحدة باوعت للثانية بخوف، جفوف ايدي احتضنت ايد درة
استمد منها القوة وانطيهة دفئ يداعب كلبهة المرتجف
غوركت عيونهة، والدموع تلالي بعيونهة وبدات تغزو رموشهة المتقرحة من كثر البجي، اجتي نجوى زوجة عمي وكالت بضحكة مصطنعة بنص وجها الأصفر من الخوف ... امشن بنياتي للغرفة ارتاحن هذول هوستهم ما راح تخلص، فدك فلك تعالن كعدن ويا بنات عمجن بوحدة من غرفجن سولفن وياهن ونسنهن خطية خافن ههه
ختمت كلامهة وقهقهت بخفة، عبالهة تبين النه ان ماكو شي بس وين انه لكفتهة وكتلهة وانه اكوم من مكاني واتقرب منهة ... اجو خوالي صحيح ؟
ارتبكت وشحت نظرهة عني ..
نجوى ... لا لا لو اجو خوالج ما تصير هوسة شسالفة انتن ما جايات بيت ناس غرب بيت عمجن واكيد خوالجن يعرفون هذا الشي ويقدرونة ..
بس هذول يتعاركون ويا هاني وخالد بسبب چذبهم ..
فدك ... يمة وانتي ما قصرتي من ساريرتيهم اكبر غلط
حجتها بغيض امها زمت شفايفهة بحزن وكالت بنبرة قهر
... والله كسر خاطري شسوي وجاريتة يله مصار شي هاي ابوجن تفهم والبنية رفضت بارق بعد شنو ..
درة ... وكفتنة يم الزلم بالديوان شكبرها ودمعتي وكسرة كلبي وخوفي وخوف اختي وصريخ امي من طلعونة، هذا كله وما صار شي جا انتم "الشي" عدكم شنو ؟
دم ..! لو طرد ام هية وبناتهة بالشارع بنص الليل ...؟
عقدت حاجبهة وكالت بغيض ... اي ماصار شي مادام محد خسر ، بنات لا تسمعن حجي امجن ترة تلعب بعقولجن وتألف اشياء عجيبة غريبة ، خجلت من كلامها وانه زميت شفايفي بغضب ردت انهد بس هي كملت
... لان تحبجن تريد تحبنهة بس هية وتضلن يمها
مرات احنه الامهات ننجبر نجذب ع اولادنة علمود نضمن حبهم النه وبس وما نخسرهم
رخيت ايدي القابضتهة وحثيت درة تكوم ... امشي ويا البنات جوة نرتاح ..
فلك ...فدك اخذت البنات يرتاحن بالغرفة ، باوعتلهن بقهر وتحسرت
امي باوعتلي ورفعت حاجبها بمعنى "شكو"
فلك ...يمه انتي شلون تسايرين هاني وتكولين الابوي انه ادري بالسالفة
هسة شيفكج من زعل ابوي
نجوى ...وعبالج مشت على ابوج؟ فرت ايدها
لج يمة ابوج ماتفوته فايته من نظرة عيوني يعرفني جنت اجذب علمود تتوزع الرزالة واللوم بين هاني وخالد وبيني
فلك ...الله يساعد گلب عمة وعد خابروها ، معقولة ماكو واحد منكم عندة رقمها يطمنها على بناتها
نجوى … هي عمتج وعد خلت خيط وصل؟ خلت درب رجعة؟
ابد والله كطعت فرد نوب وهاي سنين الله كلها خيالها ما شفناه
وابوج يتواصل ويا قصي اخوها يجيبله اخبار البنات حتى المصرف ترجعة علينا وتكول ماريد شي منكم
فلك ...حقها اذا هيَ شايفة الضيم هنا
خزرتني بغضب ...ماقصدي من عندج اعرفج شنو تفهمين قصدي زين ترة اني مو طفلة وجنت اشوف كلشي بعيوني واسمع وافهم
عمة وعد جرعت المر هنا وتهددت وانحطت على رگبتها سچين ، وبراسها نحط مسدس
مو زين ومنها ما هجت لغير دولة لو غير محافظة وضلت بالبصرة
نجوى ...شبيدي عليها يمة مالي ذنب
مها ...رهف رهف وينج
عفت امي ومشيت للمطبخ شفت مها وسفانة يباوعن من الشباك
ركضت باوعت وياهن شفت زلم ثلاثة وياهم ثنين شباب يمشون بهمة واحد منهم رفع ايدة سكت ابوي ومشة
و واحد عندة شارب شوية كبير بالعمر مبين هذا قصي الضابط
سلم على ابوي وحجة ويا عرفت من ملامح وجهة جان يعاتبه وابوي واضح استحة منه
التفت الثاني ابو شارب الاكرع حط ايده على خاصرته ، عاقد حواجبة ويباوع على ابوي بغضب
حسيته راح يهجم ويتعارك ويا
مها ...خرب بعرضهم هذول والله شخصيات
سفانة ... باعي ذاك شلون يخنزر ، هذاك حـر الدين نوفل
مها ...منين تعرفينه فلك طرج
سفانة ... غيث سولفلي عنه ورواني صورته يگول علي زلمة كلف بس عندة ماضي اسود من ليل الشتا
فلك ...طلعو حرامات شفتن ابو قميص الابيض شكد حلو وشخصية
مها ...اي ولج مادري ماعرفته هذا اظن ابن اللواء لان واگف يمه ويهدأ بأبو كل ما يعصب
طبت امي عاضة اصبعها طفرنة ثلاثتنة وحدة ركضت للطباخ وسفانة شردت من المطبخ وهي تحجي
سفانة ...نسيت الهدوم بالغسالة
واني ضليت بمكاني
صاحت بغضب ...فشلتنة بلا شافوجن
...مظلل يممة وين يشوفونة
...كلشي يصير خاف يشوفون يمة منجن رعنات صلفات
خزرتنة انه ومها وطلعت مها ضلت تضحك وراحت طلعت وراها تحجي وياها تغير الموضوع حتى تنسيها الموقف والتوتر ..
انفتح باب المطبخ بنتر ودخل هاني يرعد ، وراح گبل صعد
بنفس الوكت الشباب برة يتحاجون واسمع بارق يهدد معصب وينتر بيهم
بارق ...الحيوان خلاني بموقف محرج بنص العالم انه اعلمه اذا ماحطيت رجلي بنص صدرة وكسرت ضلوعة
غيث اخوي رد ... صلي على محمد ماصار شي الغلط الاكبر غلط عمي خالد غير هوَ الجبير مدرسه ومعلمة ولاعب برأسه
بارق ...ليش هاني عايزة كبر الخايس الساقط بس والله اكسر خشمة وحق هذاااا الله اكسر خشمة
نتر روحة من غيث ، واجة بأتجاه المطبخ دخل للسنك فتح الماي حط رأسه جوا
ركضو سداد وغيث عبالهم راح يصعد الهاني
غيث من شافة هيج اشر برأسه لسداد ، سداد هز رأسه واجاني همس
...وين هاني
خفت احجي اشرلته بأصبعي فوگ تخطاني وراح صعد
طلع بارق ينفض بشعرة عاقد حواجبة وشياطين الدنيا تطفر فوگ رأسه
رجع شعرة ليورة نزل الماي على عنقه مسحه بكف ايده
انتبهتلة كاشخ لابس ساعة حلوة وخاتم
ودشداشة بية ناصعة ، العطر يفوح منه .. محلق شعرة
خفيف من الجوانب ومن فوگ شوية عالي
محدد لحيته
ويخزر بعيونه الواسعة ،، مسح طرف خشمة بأبهامة وطلع مبايله من جيبة
ضل يخابر المكان فرغ ضليت بس اني ، هوا واكف يم باب المطبخ
ضل يحجي ويا رجال ماعرفته منو لان ما ذكر أسمه
وصوته ناصي ، بكل فضول تقربت من الباب وحطيت بالي يم صوته
سمعته يگول للمقابل ..
_راح ادمرها ، دم ابچيها خل تصبرلي والله ما اطلع زلمة وابن ابوي اذا ما شفتها محطمة گبالي
رهف ..
فتنة للغرفة، وكعدنة نرتاح، صار الليل عشانة وصل للغرفة طبعا غدة ممتغديات احنة
اكلنة شوية ودرة ضلت تبجي وتنهك جنها حمار وانه اكرص بيها
... شبيج تبجين شنو محد ياذينة هنا يومين ويملون من عدنة ويشمرونة ع بيت خالي مثل قبل شبيج
درة ... ليش خوالي ما اجو
رهف ... اجو قبل لا نفوت لهاي الغرفة بس والله جذابين ما يقبلون يحجون انه سمعت صوت خالي قصي
درة ... اي بس مايكدرون ياخذونة لأن احنة عد عمامي وهنا العشاير تحجي، والقانون ينفذ
يعني حتى لو خالي قصي سوة بلاغ او فد شي لان هوا ضابط ويعرف بس راح تفوقة العشاير
ويكولون بناتنة واحنه اولى بيهن
رهف ... اي اعرف خوالي هسة مابيدهم شي علينة بقت يم ذولي همة ومروتهم لو قدرة تحملهم بزر غيرهم .. اوووف ..
حجت وهية تقوس شفايفهة بأعجاب ..
درة ... وهذولي عمامي مبين عليهم مو قليلين شر ، هذا القصر وهذولي الزلم العدهم يسدون عين الشمس ممعقولة كلهم هيج خرطي، مبين بيهم هواي واصلين لو علاقاتهم واسعة ..
همست ... ممممممم، وباوعت بأرجاء الغرفة وابتسمت ابتسامة جانبية ..
ابد ما تقربو منه ولا حجو ويانة. يعرفون احنه فايرات من الغضب، وحجايه منهم وحجاية من عدنة تصير مشكلة وعركة شكبرها ..
فلك كالت ... انا وفدك ننام هناك بغرفة وانتن اخذن راحتجن هنا لا تستحن ..
وجابت النة فراش لان سريرهة نفر فرشناهن واحد يم الثاني وتمددنة انه ودرة ..
جابت النه عمة نجوى ثنين دشاديش قماشهن خفيف وكالت ... ع اساس هذني ملابس الدرة العروس بس يله هية قسمة .. حجتهة واعتلى الخجل ملامحها ..
اخذناهن لبسناهن انه شوية صارن ضيكات عليه و ع درة كبار
لان اني ضخمة، وكل غراضي كبار عكس درة ..
فتحت شعري ومشطتة بأصابعي ، نثرتة ع ظهري وباوعت لروحي بهاي الدشداشة
ع بختكم هسة لو جايبيلي ثوب داخلي "اتگ" لان تضاريس جسمي ذيج هية مبينة، وصدري اخ يصدري لو بس يصغرررر انه بخير ..
انسدحت وكلت الدرة بهمس خجلانة ... انه مارحت للتواليت من الصبح
درة ... حتى انه ولج شنو ضالة اعصر بروحي، هسة اذا واحد كركرني ابو** ع روحي
رهف ... خل ينامون ونطلع ندور ع تواليت وهم نغسل وجوهنة
درة ... يمكن يم الحمام الغسلنة بي مساع
رهف ... اي انه هم كلت هيج، خل نصبر يبوي راح اموت محصورة كلش
درة ... اذا تحجين حجاية زايدة بعد ابو** مو تكولين
حطيت اصابعي ع شفافي وضحكت ... فلشج كووون
تمددت يمي وكالت بهدوء ... شو هذولي مبين عليهم حبابين واااخ موقف عمي مساع خلاني احس بالفخر
وبنفس الوكت خايفة منهم
رهف ... وهاي زوجة عمي خلوقة حتى مساع من حجت كالت لا تصدكن امجن تألف وبعدين غيرت كلامهة علمود ما تخلينة نضوج من امي
وكالت لان تحبجن وتريد تحبنهة هية بس وتضلن يمهة ..
بعدين يبين كلشي، صبري وشوفي ..
درة ... ضلينة متمددات نسولف شوية وسكتنة هدأت اصواتهم وسكنت روحي، الخوف كلة تبخر من رفضت بارق كدامهم كلهم
اكيد ما راح يتراجعون بكلمتهم
بس الحيرني هاني وكذبة، شنو سالفتة وليش يكره خالي حر! وهوا اصلا مايعرفة الخالي عن قرب ومابينهم مواقف وصار سنين ماشايفينة
وعمة نجوى ليش كالت انقهرت علي ، ليش هاني كاسر خاطرهة؟ شنو السبب
وشنو قصدت من كالت امجن تألف وتجذب عليجن؟
اكيد اكو شي ورا هذا حجيهة
تذكرت من رفضت بارق كبالهم كلهم، اتمنه اعرف شكل بارق ومباعتلة تمنيت اعرف در فعله من شاف خلقتي بالحجاب الابيض وانه ابجي من عيوني وخشمي، وانهك مثل المطي
يمكن كال الحمدلله ماخذيت هاي ولو بيدة جا كام يهلهل بنص الديوان
ضحكت وانه اتخيل بارق زلمة جبير ولحيتة وشواربة وفوكاها وكف يهلهل بنص العالم
شوية وغفيت ، من التعب والتفكير
رهف ... درة شنو نمتي ، ما ردت
ولج درة محصورة منو يروح وياي حبابة امشي القرآن عليج
تونونت بضجر وغطت راسهة، كمت جريت شالي حطيتة ع راسي وفتحت الباب، البيت صنتة كلهم نايمين
رجعت ع درة ... ولج درة كعدي لا تتحلمين وتبول*** بفراش العالم ، وتنتحرين من ورة الفشلة يله حبوبة يله كعدي
ما كعدت، تأفأفت بضجر وطلعت رحت اشوف البيبان مسدودات
استحي ادك واحد من البيبان وأسأل منو هنا ..
ضليت واكفة تقريب الخمس دقايق كلت لو اكو واحد هسة طلع لو سمعتلة صوت ..
دكيت باب واحد منهن ع كيف، ما اجة جواب كضيت اليدة ماال الباب وفتحتة ع كيفي، همزين طلع هذا التواليت
دخلت وقفلت الباب باوعت سراميك تواليتهم انظف من مرايتي ... هزيت ايدي.
استخدمت الحمام وطلعت ، باوعت الدرج طويييل وملفوف، فد حلو
اخذني الواهس ردت اصعد بس استحيت
مشيت بأستقامة وصلت للمطبخ، مساع دخلتلة بس ماشفتة زين
هذا المطبخ لو عندي اطبخ بالحديقة علمود ما يتوصخ ..
ما شاءالله لو هيج البيوت لو متنراد ..
اجة صوت رجوالي من وراي كلة نعس ... فلك سويلي كهوة نعسان بس ما اريد انام ، واستعجلي فدوة ..
ابتعدت خطواتة، ضليت واكفة صافنة شسوي مو فلك انه!
يعني حجي مها صحيح جسمي نفس جسم فلك
جانت اضوية البيت خافتة يمكن الهذا السبب ما ميز بيني وبين فلك ..وانه ناطيتة ظهري
باوعت بأرجاء المطبخ شفت دله صغيرة وغراض كهوة بصينية فضية مرتبات، حطيت الدلة بيهة شوية ماي وشوية كهوة
وخليتهة ع طباخ، كلبت بالاغراض ادور ملح واضوك كل شي ابيض الى ان لگيتة
جبت صم بايدي وذبيتة بالدلة
انتظرتهة تفور ، طفيتهة وانسحبت ع اطراف اصابعي بدون ما احد يشوفني ..فتتت للغرفة ودخلت جوة فراشي اضحك بمكر وخباثة
هسة هذا يضل يشعل وينعل من يشربهة ..
غمضت عيوني غفيت بعد ما حسيت بشي الى ان الصبح طالع عليه ..
خيوط الشمس الذهبية تتوغل للغرفة وتنشر ضوئها داخل الجدران الأربعة ..
باوعت ع جهتي الثانية درة كاعدة همست صباح الخير
درة ... صباح الخير كومي وياي اغسل وافوت للحمام راح يطگن محاليبي شنو هاي
رهف ... شكد كعدتج بالليل ما كعدتي
درة ... ما حسيت غفيت
كمت لميت شعري ورفعتة بالقراصة ورجعت شلت الفراش ولبست شالي ... يله نطلع
باوعتلي من فوك ليجوة وكالت ... ثوبج حيل ضيگ رهف *** مبين وصدرچ وخصرج ذااااك هوا يصيح الأمه وابو يشبه قبضة الخنجر
رهف ... هي راح انغر، ههههه امس مو جابت البنية دراعات وينهن
باوعت ع مكان ... ها ذني ع كرسي
مشيت اخذت وحدة وبدلت ردت البسهة ، جانت طويلة وعريضة بس مخيطة منا ومنا
بحيث الي يلبسهة يصير مثل الخفاش
... اكلج كل عقلج البس هاي اطلع جني الواط واط، بس اربع ايديني واطير والله استحي
درة ... لا شبيج زينة والله لبسيهة اذا ماطلعتي تجننين ، مو امس عجبتج
رهف ...هسة غيرت رأيي بس راح البسهة شسوي اهم شي انستر مثل البشر
درة ... بشعرج الطالع من الحجاب
تأفأفت ولبستهة وهم جانت ضيكة بس الفرق قماشهة ثخين، وبيهة منا ومنا جوانب مثل الجناحات

ضحكت ع روحي شوية وطلعنة، شفناهم فارشين بالكاع وكاعدين عمي واربع شباب والنسوان العرفناهن، واطفال ثلاثة صبحنة عليهم ومشينة للحمام
غسلنة وفتنة للحمام، ورجعنة ردنة نفوت للغرفة بس صاح عمي ... وين بنات تعالن بوية تريگن ويانة
التفتت باوعت بوجهة، نظرتة اليوم لطيفة عكس نظرة امس أشرر گباله ع مكان وكال تعالن ..
حجت درة من مكانة ... لا ما نشتهي اكلو انتم بالعافية
كضيتهة من ساعدهة وكتلهة ... انتي ما تشتهين انه جوعانة
ضحكو همة وانه جريتهة من ايدهة تقدمنة كعدنة يمهم ع سفرة الريوك
هستوة جاي يصبون ريوك، باوعتلي درة بمعنى الشنو الجاي ترسمين ؟ ونظراتهة كلها عتب
رفعت انفي بغرور وما انطيتهة اي رد فعل، انه بيني وبين نفسي ما احجي مخططاتي مو النوب احجي البشر ثاني ..
رفعت راسي ع شباب الاربعة اريد اشوف رد فعلهم بلكي اعرف منو منهم البارحة خربط بيني وبين فلك ..
بس للأسف ماعرفت
اجت خطوات من ورانة، محد اهتم
الى ان صبح علينه التفتت علي ورمقتة بحقد وغضب
هاني اخوي عار الزلم، رفع حواجبة ثنينهة وصار يقلد لوحلي بمياعة ودزلي بوسة هوائية ..
فاضل ... لا تستفزهة هاني هاي بداخلهة كشمه لا تفز وتمرعدنة تمرعد ..
قطبت حاجبي بتساؤول وكتله ... وشنو الكشمه؟ بس لا جاي تغلط عليه
فاضل ... الكشمه انثى الفهد ههههه شلون اغلط عليج وانه من امس لليوم خايف لا تفز الكشمة البداخلج وتفترسينة كلنا ..
ابتسمت بهدوء وكلت بدلال ...
... لا تخاف انه الليفة ..
هاني ... ما تعض عمي هاي بس تنبح
فاضل ... احترم روحك هاني لا تخليني اكوملك هسه
هاني ... سكتت سكتت عمي ،كعد يم فدك وحاجة واحد من الشباب ... شلون صارت معدتك ولك
حجة واحد باوعتله، باوعلي بطرف عينه وكلة ... زينة مابية شي مثل الصل لا تخاف
نجوى ... اسم الله يمة شبيك ليث
حجة بهدوء بس يشدد ع كلماته بوضوح ...
ليث ... والله يا يمة البارحة اشتغل ع حاسبة وتعبان والنومة بعيني ضليت اغفي
نزلت للمطبببخخخ .... سكت لحضات وكمل
سويتلي كهوة وطفيتهة ورحت اكمل شغلي
نسيتهة واجيت لكيتهة كلش باردة
فرغتهة بالكوب ..
سادة مررررة علقم، وسووودة مثل كلوب ذولاك الناس، حجاها ورمقني بنظرة سريعة ..
وصكيت عليها كلها، شفطت الكوب شفط بدون ما احس بمرررارتهة .. وكلبت معدتي وضليت اذب من راسي والليله ماكدرت انامة الوب ..
ضليت اكل ورافعة خشمي بغرور، ومبتسم بشماته ما اعرف شنو بيه بس تونست لان اذيت واحد منهم ولو شي بسيط ..
نجوى ... انه جم مرة كتلك قلل كهوة مو زين عليك بس وين انته عقلك قافل
مها ... ليش ماكعدتني ولا ادري بيك لو ما هاني سائلك جا مادريت
ليث ... شسالفة شبيجن هوا موضوع بسيط
فاضل ... ليث سلامتك و غيث بوية ، مرتك تريد تروح الأهلهة خطبة اخوهة ليش ما مخليهة مو خطية
غيث ... سفانه يمته خطبة اخوج ؟
ردت بأرتباك ... عكب باجر
باوع الابو وكله ... وانه كتلهة ترحين باجر وهية الخطبة عكب باجر
فاضل ... خوش حجي وديهة عكب باجر الصبح
سفانة ... بس عمي ....!
فاضل ... غيث وديهة عكب باجر الصبح مو باجر
حجاها وهوا ينفض ايدة من الريوك ويكوم
رد غيث بحاضر ...
مشة طلع عمي امهم حجت ... زين يسوي سفانه جم مرة حذرتج وكتلج اذا تردين شي لا تجذبين مو هذا رجلج كايلچ باجر يوديج ليش تجذبين ع عمج وتكليله ما يقبل يوديني هاا، تستاهلين
حذرتج ونصحتج شكثر مايفيد وياج ..
هية سفانه ضلت تبجي وكامت من الريوك غيث ابد ماحجة ويحجي ويا سداد
هسة عرفت الجبير ليث رجل مها
والثاني غيث رجل سفانة
وبعدين سداد بس الصغير ماعرفتة، وماعرفت اسمه الا لمن كلولة حمودي
عرفت هوا حمودي بس حمودي احمد محمد ما ادري ..
كلهة طلعت الاشغالهة وكفت يم عمة نجوى بالمطبخ وكتلهة ... عمة شوكت ترجعونة لبيت خالي
نجوى ... والله يعمة مادري بس ما اظن هاي المرة ترجعن عمامجن مايرضون يردوجن هنا، ويكولون وعد اذا تريد هم تجي هنا تعيش معززة مكرمة
واحنة نفتحلهة بيت بيناتنة ..
رهف ... امي تكرهكم ماتجي
عمة نجوى انصدمت من صراحتي وكالت ... ادري بيها تكرهنة ادري بس هية تضل هنا فترة ع ما يفتحولهة بيت
رهف ... صراحة عمة انتم أذيتو امي وما اتوقع تقبل تجي هنا
فكت عيونهة بصدمة واشرت ع روحها
... احنه أذينة امج؟ خاب بيناتنة العباس ما طكيناها بريشة !
رهف ... لا تحلفين عمة نسيتي من طردتوهة بنص الليل ووياها 3 بنات، المهم عمة ما احب احجي بهيج موضوع وافضل ترجعونة يم خوالي وامي
نجوى ... ما طردناها رهف لازم تتأكدين قبل لا تحجين الشي
درة بهمس ... رهف عيب يومين ثلاثة وراجعين يمكن ليش تسوين مشكلة
رهف ... عمة انه ماضيكم مايهمني عليه بالحاضر الصراحة ما اريد اضل هنا اريد ارجع واختي هم
احنة صعب نتأقلم، ومو من هذا النوع ابد
كعدتنه هنا ممكن اتعبنه
نجوى ... بعد الاختيار بيد امج تقبل تجي هلا بيها انحطكم بعيونة ما تقبل تجي انتن هنا تضلن عمامجن مستحيل ينطوجن بعد وانتن تعرفن السببب كلشششش زين ...
رهف ... اعرف هذا الشي اوووف
نجوى ... عيب بنيتي
رهف ... شنووو
نجوى ... تتأفأفين من واحد يحجي وياج مايصير
رهف ... خلص فهمت ..
مها ... اليوم الغدة ع ذوق البنات شنو تحبن
درة ... براحتج حبيبة
مها ... اسوي برياني لحم تاكلنه مو
هزينة روسنة بـ اي ..
اخذتنه عمة نجوى للحديقة كعدتنة وضلت تسولف ويانة، وتحجيلنة عن مواقف عمامنة وطيبتهم واخلاقهم فهمت الموضوع تريد تكبرهم بعينة ... وتزيد فضولنة بالتعرف عليهم لان مانذكرهم زين
وما نتطرق المواضيعهم الهذا السبب شبه ناسينهم
فات ولد من البيت يمشي وينتر ويتعارك ويا الهوى عمة نجوى صاحت ... همام عمة همااام
وكامتلة تحجي ويا وهوا يشمر بأيدة
شكلة مرتب وحلو ، اسمراني وملابسة مرتبة
طول وضخامة
بس مبين مو بعقلة ..
حجت ويا فات للبيت ورجعت .. كعدت كبالنة وكالت
... همام ابن عمجن ارفد
رهف ... خبل ؟
نجوى ...خطية بي حالة نفسية، هذا الولد عمرة 14 طفل وحب بت عمجن اسد الله حلقومة عمرهة 13
كبرو سوية، يلعبون سوية، ياكلون سوية
يوصلهة لمدرستهة ويشرد من دوامة ويرجعهة بالحلة
حلقومة جانت كلش حلوة الهذا السبب نسميهة حلقومة، دبدوبة ومرتبة ونازكة
شكرة وشعرهة طويل، عبالك ملاك ، يوم ورة يوم كبرو سوية همام تخرج من كليه القانون
وهية مرحلة ثالثة تربية ...
صادف اخر ايام رمضان، وجاي يسوون كليجة العيد
جابت الصينية تريد تحطهة بالأوڤن وثوبهة مبدلل
مادري شلون لگفتهة الكهرباء، وذبتهة ميتة بساعتهة خطية الله يرحمهة ..
حبيبتة وصديقتة، واقرب انسانة ع كلبة ماتت
دخل بحاله حزن واكتئاب
گابل المگبرة، يبجي ويضرب براسة بالكبر
و ع هاي الرنه، الى ان تفاقمت حالتة وصار يحاجي طيفهة مثل ما هوا يدعي ...
القصة مالتهم بدت قبل طلعتجن منا ترة! بس انتن صغار
درة ... ومن ماتت البنيه احنة وين شو هاي ما اذكرهة البنية
نجوى ... انتهت من انتن عند خوالجن، حلقومة ورود اسمها شسالفة ماتذكرينهة
درة ... يااا ام عيون الزرگ
نجوى ... اي هية الله يرحمها
رهف ... امين ..
درة ... عمة احنة من رحنة چنة صغار ونسينا اشكالكم وناسين فلان ابن منو ..
يعني لو كايلة ورود وبس ما جان عرفناهة بت عمي اسد
جنه سألناج هاي بت منو ..
... حقجن والله ..حجتهة وتنهدت
درة ...هنا اختلطت الاوراق علينا كلنا .. صرنة ما نعرف منو الصادق ومنو الكاذب
والكل يدعي انههم يحبونة ويردون مصلحتنة وأمانة
وكفت ع ناصية ذكرياتي، اقلب بصفحاتي القديمة
احاول الگة زلة بماضيي تكشف الحقائق بس للأسف مالكيت
بعد ما صار الكل حنون، تاهت علينه وما جاي اعرف منو الممثل ومنو الشخصية الحقيقية
وان كان هناك ممثلين فـ هم بارعين جدا لدرجة
صرت اشوف الحيرة بعيون رهف من تحجي وياهم ..
شوقي لبيتنة ولكاتي وامي وخالو حر، كان هوا القشة الي كسررت ظهر الجمل
حسيت روحي ضاقت، وشبه بديت اتمرض
بساعة وحدة بس رجعت التخيلات لراسي والاصوات تطرق اذني من اماكن بعيدة ...
رهف ... شفت وجه درة انطعن اخذتهة للغرفة كتلهة نامي ارتاحي لا تتحركين منا خليج بالغرفة نايمة احسن الج وجهج صار اصفر ليمونة
انتي شبيج بساع تتمرضين
درة ... حظي حظي ..
كعدت يمهة شوية والنوب طلعت يم النسوان لان مليت وهنة الصراحة حبابات وسالفهن حلوة رغم اعرف كل سوالفهن تمثيل
وما يمت للطيبة بأي صلة
واحدهم بحفل تنكري، ومنتظرة تنتهي الحفلة وتقع الأقنعة وتبين الوجوه الحقيقية
متاكدة راح ينملي المكان ثعالب مكارة وافاعي سامه ..
بدو الولد يرجعون من دواماتهم وهذا همام المخيبيل بعدة كاعد ويحجي ويا عمة شوية، ويصفن شوية ويضل يحجي ويا روحة ...
مها وفلك وفدك ضلن يصبن غدة وانه رحت اغسل ..
حجة واحد من وراي ... يالفوصة انه اعلمج
درت وجهي وحجيت بفهاوة ... شنووو ؟
ليث ... تعرفين قصدي كلش زين خلي يكون بعلمج انه انسان معدتي ما تتقبل اي شي ، بعد لا تعيديهة وتمرضيني مثل البارحة
رهف ... البارحة ؟! اخي انه حتى ماعرفك
احجي بفهاوة ..
... انه ليث فاضل ، من البصرة
... وانه رهف جعفر من زحل
... هلا والله اتشرفت، انتم بزحل كلة هيج تلبسون
... قصدك لبس الخفافيش هذا؟
... لا اقصد ليل نهار حاصرين روحكم بالهدوم الضيكة خطية اجسامكم تحتاج تتنفس ..
... ما فهمت
... ثوبچ ضيگ كلششش
... الفضل يرجع للجابني هنا طبعًا وما جابلي ملابس وشدعوة حضرتك نظراتك هيج وسخة شيل عيونك
... ما باوعت وسيد سامي
... وشمدريك ضيكات اذا ما مباوع شوف اذا الگفك تباوعلي اسويك وصلتين
رفعلي طرف حاجبة ... سويني وصلتين عاجبني اجرب الحياة و انه ع شكل قطعتين
... دمك ثكيل ما تضحك
... شعندي وياج ماكاعد اشاقة بس ردت احذرج علمود ما تلعبين ويا الليث بعد
... ما لاعبة وياك عرف ولف شخاطة غلف
حجيتهة ومشيت انطيتة نظرة برائة وفتحت باب الغرفة وابد متوقعت اكون غلطانة بالغرفة لان غرف فلك وفدك وحدة بصف الثانية
شهكت وحطيت ايدي ع حلكي وانه اشوف هاني شابك فدك وطايحلهة بوس ،هم شافوني ونصدمو
وبنفس الوكت انطلقت صرخات درة و صوت همام من الغرفة الثانية ..........
