 |
رواية ليلة الحنة الفصل الخامس 5 بقلم بسمة البياتي
ليال... بيدي صينة التقديم اكثر شي يزعجني هاي الفقرة اي خطابة يجون حتى لو متصير لأزم تفوتين تقدميلهم الضيافة و يشوفوج
اتنفس بقوة خوف على ارتباك على خجل
لمى.. فضيها عاد راح تبقين مثل الصنم واكفة
.. اي اي رايحة لاتخبصوني مشيت بخطوات بطيئة فتت للأستقبال سلمت وفتريت عليهم بالصينية ايدي ترجف هم زين ما گلبت العصير فوگاهم
من الأرتباك حتى مانتبهت منو موجود
ردت اطلع استوقفني صوت بنية يمكن بنتهم الجبيرة
... ليش الأستعجال ابقي خلي نشوفج
... باوعت بتجاه ماما اشرتلي بعينها بمعنى ابقي
گعدت بصف خالة فردوس منصية رإسي وألعب بصابعي
أمهم بدت بالكلام المعتاد الي اي ناس تروح تخطب تگولة
... اذا صارت من نصيب أبني مراح نقصر وياها وطلباتها مجابة بس شغلة وحدة من هسه أريد نتفق عليها قبل لا يتم كلشي حتى الكل يصير على نور وميختلف الكلام بعد الزواج
كوثر... نسمعج ام مازن .
... مثل مگلت قبل شوية كل طلباتها منقصر بيهن بقت شغلة السكن
أبني اريدة يمي ليال اذا صارت جنتي ما اريدها تفكر بالعزلة نهائي طول ما اني عايشة بيتي هو بيتهم
حورية...مسألت العزلة احنا ماندخل بيها ولا ضميرنا يقبل نحرض بنتنا تزن على رجلها يعوف اهلة
الي اريدة البنتي تعيش مرتاحة ويا ناس يخافون الله بيها ويعتبروها حالها من حال بناتهم
وحتى الأمور المادية ماتهمنا الفلوس ماتكبر بخت
المهم اخلاق الولد وتدينة الي ما عنده مخافة الله مراح يخاف الله بيها وما أمن على بنتي ويا
... من هاي الناحية اطمئني الحمدلله ولدي ينضرب المثل بيهم والصغير قبل الجبير يحمد بأخلاقهم تگدرون تسألون وتتأكدون
اكيد اهنا محد يعرفنا لان جدد على المنطقة
ننطيكم عنوانة القديم وسألوا براحتكم
... ان شاء الله استشير ابوها واخوانها ونأخذ رأيها ونردلكم جواب
.. براحتكم عيوني ننتظر جوابكم
ليال...بقوا يسولفون بشغلات عادية مگدرت ابقى حيل خجلانة ترخصت وطلعت ورة شوية راحوا
زلال.. فتت للغرفة أكمز واهوس
عروستنا جكليتة حامض حلو باكيتة
كللللللوووووووششش سسسو درب الأخت البنية خلوها تلعب جولة وهلا وهلا وهلا
ليال...الله عليكم هاي عاقلة
رغد... توج تدرين بيها فيوز
زلال... الي يرگص ويهوس مخبل اختي وفرحانة بعرسها عدكم اعتراض
وانتي بطيخة صيري حبابة حتى لا نتخارب
ليش تخليني احرض اخوية يزوج عليج
... حتى اشنقج انتي واخوج بنفس الحبل
.... هسه ما اگدر احاجيج كاسرة گلبي لان حامل ومنفوخة باقي شوية تدعبلين بالگاع
... يمه يمه اشگد حنينة هاي كاسرة گلبج وهيج بودج تفترسيني
لمى... كافي خلي نحجي بالمهم ليلو شنو رأيج
بالولد ترى خوش قسمة ربي يكتبها إلج
... ما اعرف شي لحد يسألني
.. ايباه عود اني فقيرة لاتكلموني اخجل
... ليش دتحسسوني عندي شي ويا واعرفة من سنين
لمى. لا مو هذا قصدنا بس هو صارلة فترة عينه عليج معقولة مصار عندج اعجاب بي
... هواي شباب يوكفون يم المدرسة ويباوعون يعني هم معجبة بيهم!!؟ على هذا حجيكم عندي درزن
والأهم من هذا كلشي قسمة
... والله هاي محد يأخذ منها لا حق ولا باطل
زلال... ورة العشا قبل لا ماما تفتح الموضوع ليال طفرت للغرفة بحجة تقرأ
تفاجأت بجواب بابا من ماما حجتلة
بدون تفكير رفض وهالشي مو من عوايدة
هو بالمرتبة الأولى عندة رأينة ابد ميتخذ قرار نيابة عنه
اخواني التزموا الصمت
حورية... يارجال انطي صبر شبسرعة رفضت غير تأخذ رأي ليال وتسأل عن الولد القسمة زينة
ماتنرفض
... تعرفين شي واني اعرف شي فكري بيها
اخوية ما صارلة شهر من رأدها لرائد وشوفت عينج صارت سالفة شكبرها
يرضاها ضميرج بهالسرعة ازوجها واخسر اخوي للابد اذا جيني للحق رائد مابي قصور
عبدالله صح لسانة فالت بس الحق ينگال
ينشد بي الظهر واذا صارتلنة مشكلة هو وولده اول الناس يوكفولي
اني منطي عهد للبنات مانطيهن غصب وما اتراجع بكلمتي الحد ما الله يأخذ امانتة
وبنفس الوكت صعب هسه اوافق على زواجها خلي تكمل السادس وعسى وعل رائد يزوج ويفك ياخة منها
عادل...يمه سمعي من ابوية والناس ارفضيهم
ترى ماتسوة نتخارب ويا بيت عمي علمود بنية
.حورية...هذا هو التشوفوا من تتصل أم مازن ابلغها بالرفض
..عاشت أيدج زين تسوين
زلال... ضجت على ليال حتى لو متعترف أدري بيها جانت فرحانة ومتصورة بابا يوافق
مقهورة لأزم الگي احد اتعارك ويا
درت على علاء
اي استاذ على شو محد سمع حسك.
.... خير؟!
... ايباه اذا الجيران اجو على زلال ينفتح تحقيق واستجواب
واذا اجو على ليال كلش عادي حتى متشارك بالكلام
حورية... شششحجاج تنقصين شي اذا تبقين ساكتة شذكرج بهالسالفة
... سوالف ابنج وياي ماينسن
الله اذكرت أغنية ماينسن طعناتك انت والزمن زدت الجرح فوك الجرح شششششششكراً الك
جريت اخر جملة بصوت عالي وعيني على علاء.
الي صافن علية والله هما كلهم صافنين علية
علاء.. وسسسسم ابليسسسس مايلحگج لا رزالة تفيد لا كفخ گوليلي ششششنو علاجج
... عزززا شو هذا تعصب انوب بابا ضايج ماحجة شي عافني وراح عود جنت متسبعة بي
هاا ماكو شي بس حبيت اذكرك لان انت بذات تحب ليال أكثر، مني
... امشششي انخمدي نامت عليج طابوگة
... الله يساعد عماد شلون تحمل يبقى تسع اشهر وياك بنفس البطن
عماد... هههههه استري على نفسج وامشي نامي اذا گاملج ماعلية بيج مو تگولين مگالي
..؛ خرب كلهم تبرو مني صارت السالفة صدك عفتهم وفلتت.
ليال من ملامحها الظاهر عرفت ردت احاجيها
گالت سدي، الموضوع كلام بابا صح شلون اقبلها على نفسي يخسر اخو بسببي
... اووووف منك رائد كلام ليال صح من گالت
رائد راح يوگف حياتي
ورة كم يوم ماما بلغتهم رفضنا گالتلهم ليال تريد تكمل ماتفكر بالزواج هسه
انسد الموضوع والولد بعد ابد ما شفنا مگام يوگف بابهم
عمي أجة أعتذر من بابا رجعت الأمور طبيعية بينهم
التهينة بالدراسة ليال ماتطلع من الغرفة غير للضرورة حيل تعبت كلما اتخايل نفسي اروح للسادس وحالي يصير نفس حالها يبوو اسخن هو الرابع شالع گلب گلبي مدري شلون راح اطلع منه
رغد زوجة عماد جابت ولد هذا أول طفل الهم بقت يم أهلها الحد ما ترجع عافيتها
كملت امتحانات اخذت النتيجة مكملة بدرسين يلا الحمدلله اكمال ولا رسوب
بدت امتحانات ليال سمجة دخلتنا انذار ماتقبل نوصل للغرفة ونزعجها
الحد ما كملت الخاتون اكلنة تبن بدالها
ليال... تعبت واجتهدت وحالياً انتظر احصد ثمار تعبي خايفة الدرجة محد يحسها غير طلاب السادس مثلي كلما يقرب موعد اعلان النتائج اموت حتى شهيتي للأكل انقطعت وضعفت
اهلي يحجون علية يگولون على كيفج ويا روحج
أنتي سويتي العليج ان شاء الله تعبج ميضيع
الكلام سهل شيقنع گلبي الخايف
انوب الي زاد الطين بله وخلى خوفي يتحول الرجفة ورهبة من بابا گال ابو مازن
قبل شوية حاجاني باجر يجي ويا گرابتة علينا
ماما مثل كل ام عراقية أول شغلة فكرت بيها تسوي حملات تنظيف للبيت
اما اني سرحت روحي انتقلت الملكوت ثاني معقولة بعده رايدني زين هو شيعرف عني اشو المرات الشايفني بيهن ينعد على الأصابع ليش هلگد متمسك بية
وياترى شنو رد بابا الهم زين عمي ورائد اذا سمعوا شراح يسوون الف سؤال وسؤال يدورن براسي ما الهن اجابة لأزم انتظر واشوف الراح يصير
ما ابالغ لو گلت متت بدمي من سمعت بابا متصل على عمامي واحد واحد طالب منهم يحضرون ومن بين المدعوين عمي أبو رائد
اجة اليوم المنشود حضروا عمامي كلهم وياخالي والولد
أجوي بيت ابو مازن جايبين زلم كووومة اكثر من ساعة هما گاعدين ما نگدر نوصل يم باب الأستقبال حتى نسمع علاء حذر البنات الي توكف يكسر رجلها
من راحوا عمامي بقوا ويا بابا وخالي الصوت مرة يعلى ومرة ينصى الى إن طلعوا ماما وبيبي راحن يستفسرن
ربع ساعة واجت ماما علية للغرفة
حورية... ليال الجماعة جايين يخطبوج الأبنهم حاجين ويا ابوج وعمامج
بالبداية عمج عبد معترض بس بعدين عمامج حاجين ويا گايلية مو من نصيب ابنك حرام توكف بقسمتها
الولد المتقدملها خوش ولد واهلة ناس محترمين عوفها تروح الصاحب النصيب
گايللهم هذا هو الله يسعدها واذا خايفين من رائد انطيكم كلمة مراح يسوي شي عوفوا علية
يابنتي القرار صار ألج توافقين او ترفضي
بكيفج ولا تجاوبيني هسه لان أخوانج يريدون يروحون يسألون عليه بمنطقتهم القديمة حتى نطمئن اكثر فكري براحتج
ماما عافتني بصدمة معقولة بهالسهولة خلصت من رائد مجاي أگدر اصدك
أخواني هواي سألين عنه بمنطقتهم القديمة الكل يمدح بيهم
صار لأزم انطي جوابي زلال ولمى موعن أذني
من اول يوم يريدن انطي موافقتي
فردوس.. امج رادت تجي تسألج كتلها عوفيها اني احاجيها ادري بيج خجولة حتى من امج تستحين مو مثل هاي الوكحة
زلال... يا حظي النايم بالتراب حتى أنتي تحجين عليه متوقعتها منج ام لمى
... يا بنتي قابل تاهمتج
... ما أرد هو السمج ماگول مذموم
ديلا عاد انطقيها للدرة وانطي الجواب مو طلعتلي شيبة بگلبي من برودج
فردوس... معليج بكلام العوبة لا تخليها توترج
ليال...جسمي نار من الخجل افرك أيد بيد
هاا يعني شسمة بكيف اهلي
... لا ماما شنو بكيفهم هاي حياتج مو حياتهم
زلال... اول مرة اعرف بيج فطيرة مع احتراماتي الج
... منو الفطيرة هاي علية
... اي اي عليج جاي اتگلج بكيف اهلي معناها موافقة واذا متصدگين ابصملج بالعشرة
خالة هاي حركات البنات من يستحن يگولن بكيف اهلي
لمى الله يساعدج على امج
... ماتصيرلج جارة عرمة منو يگدرلج اني خالتج مو صديقتج وين احترامج
... مو گتلج مع احتراماتي يعني احترمتج قبل لا احجي ديلا. روحي گولي السمجة ليال موافقة
... امج الها قصر بالجنة من ورة وكاحتج
ها ليال ابلغها الموافقة لو شنو
... يا الله راح الطم بعدها دتسأل
... زلاااااااال كافي خلصتي الگلبي ساعة السودة الجيت اسأل
ليال.. حتى انهي الملحمة گتلها هذا هو خالة موافقة
باستني بخدي وراحت لمى وزلال رادنها من الله كامن يردحن
لمى.. ملابسي قديمة يرادلنة نزلة للسوك
زلال... اي والله محتاجة كوومة اشياء اخت العروس يابة لازم اطك
ليال...اضحك من گلبي على سوالفهن مخبوصات اكثر مني
ماما ماترتاح اذا ما تأخذ الموافقة من لساني وتسمعها بأذنها
ريحت گلبها گتلها موافقة
ماما گالت بيت ابو مازن دزولنة خبر يريدون المشية والعقد خلال هالأسبوع
اعترضت ردتها بعد استلام النتيجة اريد اتجهز واني بالي مرتاح
بابا گال هذا الصح مثل متحبين
بعدها بأربع أيام علنوا النتائج على النت
طلعوا درجاتي ناجحة بمعدل 87 واكيد هذا المعدل راح يدخلني الكلية الأتمناها علوم بايولوجي
فرحتي بنجاحي اكبر من فرحتي بالخطوبة والزواج
أهلي قبل لايتم كلشي شرطوا عليهم اكمل كلية وهما معترضوا
بديت اجهز للعقد رحت ويا خالة والبنات للسوك اخذت فستان مرتب يؤالم هيج مناسبة
بيوم المشية عمامي وعماتي كلهم اجوي
بداخلي خوف لا رائد يسويلة مصيبة
وصال گالت ارتاحي الولد مسافر الأربيل مامتحمل ييقى اهنا بيوم خطوبتج
انقهرت عليه الحب من طرف واحد يذبح
صح مامجربة هالاحساس بس شفت زلال شلون تتأثر من تسمع اركان مصادق وعندة حبيبة
دعيت اله ينساني ويعيش حياتة
بدلت ورتبت نفسي اخذوني گعدت بالصالة
وره شوية أجوي اهلة واقاربهم البيت انترس
زلال... هاي شنو عبالي الشارع راح ينسد بالجكسارات والنسوان راح يطبن يمشن مثل السلاحف من ثگل الذهب الي لابساتة
لمى... لعد شگد سطحية وعقلج صغير
ليش كل المثقفين وأصحاب الشهادات ينگطون فلوس بعدين مو شرط العشيرة كلها يطلعون نابغة وشهاداتهم بطولهم
.. هااا اي اي ادري بس لاتنسين اهل ليث واخوانة كلهم موظفين وامهم وابوهم عدهم تقاعد
... روحي سأليهم شگد عدكم فلوس وليش اقاربكم مو مثلكم والله يا الله بكلشي لازم ادققين وحاشرة خشمج
.... اووووي يعني ميصير واحد يحجي البداخلة
سسسكتت حتى تبرد
صاحوا ليال عقدولهم كملوا رجعت المكانها
ام مازن.. عيوني ام عادل ليث يريد يفوت يلبس خطيبتة الحلقة
ام عادل... الحلقة؟! شوكت اشتريتوها مو على اساس اليوم بس مشية وعقد
... احنا ملمومين ملمومين خلي نسويها خطوبة وتلبيس حلقات
الحلقات اليوم اخذناهن واذا مصارت عليها من تروح تأخذ باقي الذهب تبدلها
... هااا ماشي
زلال... ماما ضاجت لان مو هذا الأتفاق
رغم هذا مشت السالفة وگالت خلي يفوت.
ليال...من گالوا ليث راح يفوت مدري شصار بية لزمت أيد وصال
.. شبيج يمعودة أيدي اريدها ليش هالخوف ترة مراح يأخذج البيتهم هسه
... فقدت حساسة النطق ما أگدر اجاوب فات ليث ولا رفعت عيني عليه سوولة مكان گعد بصفي
اجت اختة انطتة علبة الحلقات أخذ ايدي لبسني الحلقة حيل جبيرة تزحلگ من اصبعي
اخذت حلقتة ايدي ترجف ردت اوكعها بالگوة خليتها بصبعة
حجة بصوت ناصي إرفعي رأسج صرت زوجج مو غريب
باوعت علية مبتسم رجعت نزلت راسي
رفعة بيده باس گصتي اريد تنتهي هالطقوس لان معت من المستحى
هو هم ما الح وياي سكت بعد ما حجة شي اقل من دقيقة وطلع
وأخيراً بدوا الناس يروحون جنتهم قبل لاتطلع طلبت رقمي انطيتهيا سلموا عليه وراحوا
زلال...خالة كوثر ضايحة ودردم
جيت انحشكت بينهن اريد افهم شبيها
كوثر... وين راح كلام امه اول ما أجت شتريد انفذ وكل طلباتها مجابة وتالي ماتالي جايبين 500 الف للملابس وين تخليهن الملابس البيت لو الطلعة لو النوم والمكياج
حورية... شسوي استحيت منهم هسه شيگولون ماعدها ملابس ويريدون يجهزوها برؤوسنا
.. لا اله الا الله صدك تحجين حورية هذا واجبهم كل اليزوجون لأزم يجهزون من زوجتي ولدج
هم قصرتي ويا نسوانهم
... ميخالف هما يريدون يجبون ذهب زين ويسوون عرس جبير مراح نوكف وياهم على فلوس الملابس ان شاء الله ابوها مايقصر وياها
... بكيفج بنتج وانتي ادرى بمصلحتها
زلال... خالة سكتت بس معجبها كلام ماما
باليل جاي احجي الـ مينا على الخطوبة دك التلفون على الانتظار رقم غريب طنشت وكملت سوالف
اسمع صوت طن وطن رسائل ومكالمات
كتلها راح اسدة اشوف منو خبص الدنيا
سديتة فتحت الرسائل
الووو ليش مجاوبين ويامن تحجي
اني ليث
ليال جاوبي
خررب اشتغلت الغيرة بس لا عبالة ليال دتحجي دك التلفون فتحت الخط
بصوت خشن قبل لا يسلم گال
التلفون انتظار ويامن جنتي تحجين
... وعليكم السلام اني الحمدلله زينة
اما ويامن جنت احجي ويا صديقتي مينا الي انتوا اشتريتوا بيتهم
والأهم من هذا اني اخت ليال اسمي زلال
اششو هذا ضحك بصوت عالي
... واخيرا تعرفنة هلا بزلال ههههه دوم أسمع عنج
... مجنت ادري بنفسي هلكد مشهورة
منين سامع ومنو حاجيلك
.... من المجدية هههههه وحجي ريسان دوم يذكرج بالخير خصوصاً على الفشخة البرأسة
.... عزززا بعينك حجي صجمة ولا تگعد راحة
... حجي صجمة ههههههههههه حلو هاللقب
.. خو انت اگضيها ضحك اگلك ذيج خطيبتك تريد تحاجيها لو لا
... شلون ما اريد وينها
... مديت التلفون لليال هاج خطيبج يريدج
شو هاي كمزت
.. ششششنو وينة
.؛ بالتلفون يعني وينة قابل بالغرفة
.... اخذتة من ايدها خليتة على أذني اسمعة يضحك بالگوة طلعت مني الووو
بطل ضحك جاوبني بهدوء
... يصير نسوي العرس باجر
.. هاااا لا لا ششنو هاي
.... هههههههه على كيفج يابة دنشاقى
... الأرتباك سيد الموقف بهالحظة شگد حجة
يادوب اجاوبة بكلمة او كلمتين
.. فرق بينج وبين زلال فرق السما عن الگاع
هي جريئة ولسان وانتي خجولة وهاي احلى صفة بيج
... ابد محبيت يأخذ نظرة محلوة عن زلال بسرعة جاوبتة دفاع عنها
ترى زلال مو ويا الرايح والجاي تتلاسن وتذب ميانة
لسانها بس ويا التعرفهم
... لا تضوجين كلامي مو ذم بالعكس كل وحدة بيكم الها صفة وللعلم الحديث وياها مينمل سوالفها تفوت للگلب بدون ستأذان
...ظلينا نحجي شوية من شاف صعب ياخذ وينطي وياي عذرني گال الأيام الجايات هواي ان شاء الله تتعودين علية
سديتة منه انداريت لگيت لمى وزلال ضاربات عكس وصافنات علية
لمى.. سويتي عندي حموضة وجالي ادري تستحين ومعذورة بس مو هالثخن
... واحد لا اعرفة ولا يعرفني بين يوم وليلة صار خطيبي واول مرة نحجي شتريدون اسوي أگضها حياتي وعمري واحبك
.. لا طبعآ مو هيج احجي كلام عادي افتحي مواضيع لاتظلين مرتبكة
... عوفج منج ولج جنية شحجيتي ويا قبل لاتنطيني التلفون واساساً شلون تجاوبين على رقم غريب
.. خابر لگاه انتظار ظل يدز رسائل وحدة منهم كاتب اني ليث محبيت من اول يوم يدخل الشك الگلبة جاوبتة گتلة اني اختها جنت احجي ويا صديقتي
... مممم تمام يلا كافي لغوة خلي انام
بعد العقد بيومين حجة ويا اهلي علمود عقد المحكمة
گاللهم اجازتي راح تخلص اريد اكمل العقد قبل لا التحق وبعدها كملوا التجهيز براحتكم
اهلي ماعدهم اشكال وافقوا
وفعلاً بدينا بمعاملة الزواج سوينة فحص وبعدها عقدنا
التحق ليث امه اتصلت على ماما گالت باجر نروح نشتري الذهب خلي تجهز نفسها
ماما ماگدرت تجي وياي كلفت خالة فردوس ووصال هما يجون
رحنا اني وياهن وامه وأختة اهلي متفقين وياهم
اخذ ذهب بأربع ملايين
اخذوني الصايغ هما يعرفوا
خالة معجبها ذهبه بس سكتت گالت يلا ليال اختاري
جنت اي شي أأشر علية يطلعون بي عيوب الدنيا
وشكو شي تعبان يگولن اخذي منه
اكثر من مرة خالة نترت بيهم وماكو فائدة زهكت اريد بس ارجع
اخير شي امة گالت المفرد محلو اخذي هذا الطقم قبل لا اجاوبها راحت للصايغ تتعامل ويا ودفعت الفلوس
خالة ماحجت گالت خلي نرجع ويصير خير
الطريق كله خالة ووصال روحهن بخشمهن
وحقهن ناعم حيل وخفيف طبينا للبيت خالة انفجرت
فردوس. حورية سمعينيييي ترى بنتج مو زايدة عليج بقيها يمج احسن ماتنطيها الهيج ناس
... على كيفج اهدي وفهميني شصاير
... شفهمج اخذونة الصايغ معرفتهم الذهب مالتة عاوي گلت ميخالف ومشيتها
بنتج شتريد يصيرن براسها صاحبات ذوق وميخلنها تأخذة تالي متالي أمة مشت البراسها واخذت على ذوقها طقم عبارة عن زبالة المحل ارخص واحد تنفخي ينگطع
حتى مكلفت روحها تسأل عجبكم لو لا
بالقرآن حورية اذا انطيتها الهم فلا عندج عقل......
