 |
رواية ليلة الحنة الفصل الرابع 4 بقلم بسمة البياتي
_ #لـيلـة_الحنـة _
_ (#
_ #البارت_الرابع _
__________________
محمد... علاء ششبيك بس لا رحت تعاركت ويا
ابن عمك بشرفي اذا مسويها ما ابقيك بالبيت
امجد.. لا عمي الموضوع مو يم رائد
... لعد شصاير ليش وجوهكم مگلوبة
علاء... مؤيد العامل الشاف زلال من رادوا يخطفونها
... اي شبي
... الكلب حاجي الشباب المنطقة والكل صاروا يحجون بالسالفة
... لا يا عديم الغيرة والناموس شحاجي لا تگول جايب طاري اختك بالموزين
... صديقي قبل شوية
گال سمعت خاطفين رضيعتك
من الصدمة ما عرفت شحجي سألتة منين سمعت گال مؤيد حجالنة
ماتحملت اخذت أمجد ورحت البيتهم اول ما صار گدامي دين ما ظل برإسي لزمتة دك بوكسيات لو ما تطلع أمه تبجي فلا اهدة
امه خبصت الدنيا
... الله اكبر عليك هاي جزاتة بدال ماتشكرة وتبوس رأسة لان نقذ اختك اذا لهسة رأسك مرفوع بفضلة
صدك لو گالوا سوي زين وذب بالشط
خير لا تسوي شر مايجيك
امجد... الفضل لله مو للبشر ولو شما صار رأسة يظل مرفوع خواتة علم واذا ماتعرفيهن زين خلي الناس اتگلج منو بنات ابو عادل
علاء... لك ناقص جامع الشباب ومخلي اختي موضوع حديثكم اتگللهم بنت ابو عادل انخطفت
ام مؤيد... قابل جذب مو رادت تنخطف
مؤيد.. يمة فوتي جوة علاء وامجد اصدقائي واني اتفاهم وياهم ماكو شي لايظل بالج
وكلام الله ماحجيت عليها بالموزين وما گتلهم خطفوها واذا مامصدگني جيب الحجة اذا بي خير يگول مؤيد گال اخت علاء انخطفت
كل الموضوع زلت لسان ما أدري شلون صار حجي گلت قبل جم يوم أثنين سكارة رادوا يخطفون البنية والحمدلله ملحگوا يصعدوها للسيارة من شافونة نهزموا
ادري بنفسي غلطت وشتحجي حقك ما ألومك
... جيب طاريها بعد ومحمد ادفنك وانت عايش
محمد.. جماعتك شيگولون
.. ما ادري كلشي ما أدري رإسي راح يطك من القهر تالي وكت نصير علج بحلوك اليسوة والمايسوة
أمجد.. أبن ابو الـ يحجي والخلقك نسويها
كافي لا تغث روحك
لا هي أول وحدة ولا أخر وحدة تتعرض الهيج موقف
محمد... حسبي الله ونعم الوكيل على كلمن يشوه سمعتها
يابة علاء لا كل سالفة والثانية تتعارك وتتضارب
مثل مگال امجد منو يسترجي يجيب طاريها
كلها جم يوم وتنسي السالفة
.. ما إگدر اوعدك الي إسمعة يحجي محد يخلصة مني
... يا ابني ترى كبرت بطل تهور
أمجد...لايظل بالك اخذها مني كلمة ما اخلي يسوي شي
... اامصيبة ادري بيك اضرب منه اثنينكم نفس الطبع تعلموني بيكم
امجد... ههههه هذا مدح لو ذم
... محشوم من المذمة يلا رايح انام لاتحجون للولد الله يرضى عليكم سدوا السالفة
... امرك عمي
زلال... جنت واكفة يم الباب سمعت كل الكلام
هسه عرفت انس منين سامع بالموضوع
معقولة أهل المنطقة تفكيرهم يروح البعيد . هزيت راسي بالنفي عشششتو على شنو يفكرون هو قابل شصاير اكثر من عامل شافوا بعينهم مصار شي
رجعت يم ليال حجيتلها گالت لاتخافين مثل مگال بابا كلها ايام وتنسي السالفة
الوضع صار هدوء والناس بعد مجابوا سيرة الموضوع اهلي شوية ارتاحوا خطية جنت اشوف التوتر والقلق بعينهم
اليوم من فتحت عيني الصبح سمعت خبر يغث
اهل مينا جايبين سيارة نقل اثاث
يعني هاهية صارت صدك وراح تعوفني
قبل لا يروحون أجوي ودعونا حضنت مينا وشبعنا بجي
حسيت دافارگ وحدة من خواتي
لو بيدها متعوف أيدي بالگوة امها جرتها وطلعت لان تأخروا ووراهم طريق طويل
تعاهدنا ادوم صداقتنا للأبد رغم بعد المسافة ونبقى نتواصل ومن يصير مجال نتشاوف
مبقى شي الموعد الدوام صارت بية خوفة لوبيدي اظل بالبيت ما اطلع
بابا حجة وياي وطمني گال من شنو خايفة أريدج قوية مامتعود اشوف زلال ضعيفة ومهزوزة وحتى تمطئنين أكثر
سايق يأخذكم من الباب ويذبكم يم الباب
وليال وياج
صح مونفس الطريق ولا نفس المدرسة لان مدرستي القديمة بس متوسطة مابيها عدادية
بس الخوف معشعش بداخلي موبيدي كلما اذكر الموقف تصير رعشة بجسمي وگلبي يدك سريع
ماما أخذتنا للسوك جهزنا ملابس للدوام
قبل الدوام بكم يوم انتقلوا ناس جديدين البيت اهل مينا القديم
ماما ومرة خالي طبخوا الغدة وأخذوا الهم متعودات اي جار ينزل جديد يطبخون ويأخذولهم يگولون هذا واجب وحق الجار على الجار
الظهر اهلي نايمين بس اني وحسوني ابن اخوية گاعدين
اندگت الباب
گلت الحسوني روح شوف منو
... وليش اني روحي انتي
... شششو جيب التلفون شوف بعد منو تنطيكيا
.... الا اگول الـ يمه عليج
... لك الباب راح تتكسر تطلع لا ابتلي بيك
راح وهو يدردم ورة شوية رجع گال مجدية بالباب جوعانة تريد غدة
هسه هاي شنطيها يومية كومة اكل يبقى اليوم على حظها كلشي مزاد من الغدة
كمت بحوشت بالثلاجة اكو فواكه انداريت صار گدامي ماعون متروس گليجة على الكاونتر محطوط قبل كم يوم ليال سوتها
مديت ايدي الجيب التراكسود
عندي الف خليتة ويا الكليجة
حسوني ماكو خامط التلفون ومنهزم
طلعت للحوش فتحت الباب مرة متربنة وشكلها تعبان ببدها مواعين
خليت الماعون بالصينية الشايلتها
عذريني خالة غدة مباقي
شو هاي صافنة بوجهي
العفوا بيج شي
... مشكورة عيوني هاي المواعين الكم دزيتولنة بيهن غدة رحم الله والديكم مقصرتوا وعاشت الأيادي
... هالمرة اني صفنت اخرسيت أريد الگاع تنشك وتبلعني على هاي الدكة المصخمة
يكسب أجر الي ينطيني حسوني بهالحظة حتى اشرب من دمه
بقيت امتمت هاا شنو منو ما اعرف شحجي
المرة خربانة ضحك
... هههههههه عادي حبيبتي حقج تشتبهين طامسة بالتراب اي احد بمكانج اذا شافني هم عبالة مجدية البارحة اجينا نظفنا البيت وعلى حظنا بنفس اليوم گبت عاصفة ترابية شكبرها البنات ناسيات الشبابيك مفتوحة اليوم أجينا لگينا البيت طامس بالتراب انظف واحنا بمكانة
.. اعتذر منج والله يساعدكم حتى احنا اليوم صبح البيت تراب خو الحديقة والحوش حدث بلا حرج
اعتذر مرة ثانية اووف كله من تحت رأس الشيطان حسوني گالي مجدية تريد غدة
... يلا فدوة مصار شي هاج المواعين الكليجة راح اخذها منظرها ميتفوت بس اخذي الألف
... عركت من الخجل اخذت المواعين سديت الباب وفتت اغم بروحي مدري اضحك مدري ابجي على هذا الموقف الزبالة
صار اركان گبالي مرتجي على الباب وجهة احمر من الضحك لا والحظ بس لا سمع
هاي شجابك شعندك وأكف اهنا
... سمعت بابكم يندك عبالي نايمين متسمعون
أجيت شفتج دتنطين أكل للمجدية هههههههههه
... اشششش فضحتني عزززا والله متت بدمي
غير حسون گال مجدية بالباب
... هو طفل ماعلية عتب انتي شبيج مثولة هسه المرة حقج متعرفيها زين مواعينكم مو يومية تطفحين بيهن شكو ماعرفتيهن
... ماعندي شغل وعمل أبقى مركزة بالماعون هي هم صوجها شكو مستعجلة جابتهن بسرعة جان انتظرت تسبح وتبدل وتجي
اجت طامسة بالتراب جبتها صايرة بلون الكاكاو
... يلا بالريش الحمدلله تقبلت الكلام بروح رياضية ومضاجت
... عزززا اسكت وخليها والله سمجة اذا سمعت تهججني من البيت باليلة ظلمة ويمكن أجي يمكم زعلانة
... ياريت احنا النربح
... هااا شتربحون
... شوفتج
... ظليت صافنة عليه وفاتحة حلگي هذا اركان لو مبدلي كلش متغير هالأيام
... الوو الصفنة مو الج
.. هاا ضحك عافني ورجع البيتهم
من الفرحة نسيت سوايتي المصخمة ويا الجيران الجدد
غلست ما حجيت الماما بس اوف من ليال خبصت البيت ادور ماعون الكليجة
ليال.. يمعودين وينة طار خوما طار بيدي خليتة على الكاونتر قبل لا أنام
زلال... يجوز الجهال ماكليها خبصتي نفسج عليها كومة اكو حبكت الا هذا تريدي
... الجهال كلهم نايمين وهذا محضرتة الصديقتي هسه اخوها يجي عليه
حسوني.. زلال انطتة للمجدية
زلال.. جيت والله جابك ششو تعال
ردت اضربة ختل ورة امه
شذى...مخبلة شمسويلج وجيتي طايرة عليه
حورية...زلال عووفي ياويلج اذا ضربتي
ليال...زين الماعون وين لاتگوليلي هو هم انطيتي هذا مالت السيت أموتج والله
... انحشرت بالزاوية مابيها مجال لأزم اعترف
... يم الجيران الجدد
حورية... بستغراب وشوداج عليهم
.. الظهر فد مرية أجت جابت المواعين
رغد.. شبسرعة ذبيتي ميانة وياها ورحتي انطيتها كليجة
... خررب حظي الاعوج بس يمي من يلزگون بشي بعد ما اخلص يوم موطة واليوم كليجة
ششوفي سمجة اسمعي مني أحسن ماتسمعين من غيري
حورية... ولكم گلبي وجعني صرت حافظة هالموشح أكيد وراه كارثة
... اذا تريدين تلومين أحد لومي ابن أبنج
اندكت الباب راح فتحها رجع گال مجدية بالباب تريد غدة
تدرين بية گلبي طيب. انقهرت عليها شلت ماعون لكليجة والف وديتة الها
ومن محاسن الصدف والحظ السعيد طلعت المجدية جيرانة السكنوا جديد
سمجة مثل عوايدها لطمت على خدها لطمة قوية الله يساعد خدها شابع لطم
... عزززا العزاني انفضحت گدام الناسس هسسسه شراح يگولون علينا جابولنة أكل عبالهم مجادي
... شنو هالتفكير ترى غلطة مطبعية اعتذرت منها وهي مضاجت بالعكس المرة حبابة ظلت تضحك وعجبتها الكليجة اخذتها
... گووومي من گبالي ما أريد اشششوف شكلج تعبت من طلايبج وحق الحق تعبت
... اوووي على اساس متقصدة عفتها تندب حظها طبيت للغرفة اخذت التلفون راسلت مينا
ثالث يوم بالتمام والكمان سمجة حكمت علية لأزم أروح وياها للجيران الجديدين رأسها والف سيف لأزم اعتذر بشكل رسمي
يمعودة يا ام الغيرة عدلي بدلي شيوديني وياكم
انتوا رايحين ترحبون بالناس اني شكو
ماكو دكت رجل اروح يعني اروح
بدلت وطلعت لگيت خالة كوثر وفردوس وبيبي وماما متحضرات مشيت وياهن
دكينا الباب رجال فتحة گال تفضلوا اوووف الي ذكريات حلوة بهذا البيت طفولتي كلها اهنا ويا مينا
فتنا للصالة انبهرت بيها ما شاء الله شنو هالذوق شنو هالترتيب مبينين ناس راقين ويحبون الفخفخة
اجت المرة المجدية عزززا الأناقة فول عطرها يسطر هاي يمكن كشخت حتى تشوفني هي شنو
سلمت ورحبت بينا
وكالعادة ماما وخالة كوثر گعدوا يرگعولي على ان طايشة وما افتهم واعذريها
اليسمعهم يگول منهزمة من الخدمة العسكرية ومسلمة الوطن للأعداء
اجن بنات بعمر وصال وشذى گعدن ويانة ورة شوية اجت بنية لخ كعدت يمي ظلينا نسولف
الحد ما ترخصنا وطلعنا
بيتهم حايط على حايط ويا بيت حجي صجمة جان گاعد بالباب عفتهم ورحت عليه
حورية... وووووين مولية رررررجعي وعوفي الرجال بحالة ششششلون مصيبة ياربي
... هسه اجي قابل راح اغتالة ارحمي اصبعج مو راح ينشلع من العض
ريسان... خير شكو لافيتني شرايدة
... يووو شششبيك ضايج ردت اسلم عليك يعني ميصير
... الله يسلمج يلا شوفيني عرض جتافج ما امن بيج
ادري بيج جنية
... والله مسكينة اني ماعندي حظ وياكم
الجيران قدمولي جكليتة وتنغصتها الك ششوفها ام الكاكاو الأصلية
ضحك واخذها من ايدي
... مرات تصيرين حبابة محد يلحگج ومرات الله يستر منج
... اي وهسه اكيد حبابة
عفتة ورجعت ماما وخالة صافنات عليه
هزيت راسي خير شكو
فردوس... فدوة العمرج اشگد نفسج طيبة
... اختج عبالها رايحة اسوي بالرجال شي هو المايعرفك مايثمنك
حورية...فوتي فوتي ما ادري منين تتعلم هالأمثال
... طبيت جوة جمعت البنات وگعدت احجيلهم على بيت الجيران
ولكم طلعوا ناسس طاكين كلهم شهادات ومناصب
الأم مدرسة والأب صاحب رتبة بالنظام السابق
عدهم ثلاث ولد بنات اثنين
الجبير مهندس بالنفط ومرتة هم مهندسة ويا
والوسطاني موظف بالبنك ومرتة محامية بس گاعدة بالبيت زوجها يغار عليها ميقبل تمارس مهنتها
والصغير ملأزم اول بالجيش
واختهم الجبيرة هم مدرسة وزوجها استاذ بالجامعة
والصغيرة تدرس طب
خطية هاي جنتهم مايصير عدها اطفال تراجع وماكو فائدة هم زين زوجها يحبها ومتمسك بيها يگولها مو مهم الأطفال اهم شي وجودج بحياتي
لمى... عرفتي كل هالمعلومات خلال نص ساعة وبگعدة وحدة
... هي جنتهم حجتلي
... والله لو اظل الف سنة مگابلتهم ما استرجي اسأل عن اسمائهم مو عاد عن تفاصيل حياتهم
... لان بومة
.. مو صوجكم صوج اليحجيلكم
بدأ الدوام وأخيراً صرت بالأعدادية نافشة ريشي طلباتي متخلص
من اگعد الصبح اخبصهم خبيصة
ليال... اگلج عيني اعتقد أنتي مشتبهة
.. بشنو مشتبهة؟!
... ترى رايحة مدرسة ودوام ودراسة الأعدادية حالها حال المتوسطة اليشوف خبصتج يظن منطيج منصب بالبرلمان
... تستهزئين مو شمدريج ما يجي يوم واصير نائبة بالبرلمان قابل هما احسن مني بشنو
شو هم جانوا طلاب مثلي
.. شوف اني وين احجي وهي وين تحجي
كملي ريوگ بسرعة راح يجي الخط
... الله عليج مرتبة لو لا
.. اي اي بس فضيني
... اوكفي خلي اقط سمجة
... مو اخذتي من بابا وعادل ششنو طلابة
... معليج قابل مأخذة منج
السايق دك هورن ليال عاطت
... ارتاحيتي هياتة اجة اسستعجلي
... اوووي لاتخبصيني ماعندي شي بس البس حذائي
كملت طلعت وياها صعدنا بالسيارة
وصلنا للمدرسة من أول يوم مليت مينا تركت فراغ جبير اشگد عندي صديقات بس ابد مو مثلها
من رجعنا نزلنا من السيارة
اكو ولد اول مرة اشوفة يمكن ابن الجيران الجدد المحروس مانزل عينة من ليال
هي ابد مترفع رإسها فاتت بسرعة
والله هالبيت مرزوق ياهو اليسكن بي لأزم ينعجب بنات أبو عادل هههه
الحالة تكررت اكثر من مرة كلما يشوفها يگصها گص
ليلو ابن جيرانة الظاهر يتقصد يوكف بهالوقت گدام الباب حتى يشوفج
... وشششعلية بي زلال سدي حلگج علاء اذا سمع تصير كارثة كافي علية رائد وطلايبة
عوفيني ملتهية بالسادس وضيمة
... اكلتيني وشربتيني على كيفج لايطگلج عرج
مو زين جاي انبهج ترى والله حلو ومرتب
... زززززززززلال وتالييييييي
... سديت حلگي بيدي سكت لاتعيطين اووي اشگد معقدة
ليال... اكذب اذا اگول ما منتبهة الهذا الولد اكثر من مرة يوگف بابهم وقت رجعتنا
من أرفع راسي أشوفة گبالي بسرعة اندار ما اريد اجيب الكلام الموحلوة الأهلي والروحي
ذبيت كل واهسي بالقرأية أريد اطلع معدل وانقبل كلية زينة
ما اريد مصيري يصير مثل أركان ظل يعيد ويزيد بالسادس وتالي شاف نفسه مو گدها راح اشتغل ويا عماد وامجد وعلاء
اليوم جمعة العصر بيدي كتابي ارجع للأمتحان
فاتت زلال تلعبلي حواجبها
خير شكو
... طرشة ماتسمعين الصوت
.. يا صوت
.. دگومي خاتون عنتر ابن شداد صاعد على الحصان وشاهر سيفة ويصيح
اما ليال او الموت بلا قيل وقال
... هاا شجاي تمسلتين منو عنتر وياسيف
... رائد رائودي جامع عمامج وخوالة ويمكن جامع زلم منطقتهم فزعة كلهم جايبهم وجاي
... ذبيت الكتاب من ايدي صدددددك گولي والله
... عززا جان فشختني مو هو راسي ناقص
اي والله گاعدين بالأستقبال
دكومي كومي سويلهم جاي
... شششلون ورطة هاي ششراح يخلصني من هالزگة
طلعت اركض فتت على ماما للمطبخ أخذت الصينية من أيدها خليتها على الميز
حاجيتها بصوت مخنوك راح تنطوني اله موو
... على كيفج بنتي منين جبتي هالكلام ولج زلال شگايلة الأختج مخليتها هيج تتخبل
زلال.. ماعندج غير زلال اذا تصير كارثة بالمريخ هم راح اتگولين كله من وراج
ليال... ماماااا فدوة جاوبي
.. شوكت فارضين عليكم شي حتى هسه نجي نفرض؟!
بمسألة الزواج محد بينا يدخل اذا مو بقناعتج ماننطيج لو تقوم القيامة عسى مايجيب العشيرة كلها ميأثرون علينا
...ظليت گاعدة على نار ورة شوية عمامي فات للهول صاحوني جيت يمهم
محسن... يا بنتي أبن عمج شاريج محد راح يحبج ويخاف عليج مثلة وهو اولى من الغريب من لحمج ودمج وافقي والتريدي يجرالج
... باوعت البابا ردلي النظرة بحنان اشرلي اجاوب
اخذت قوة من عيونة حجيت بحزم
ابن عمي على عيني ورأسي وأكيد مراح تندم التأخذة
الوجوه استبشرت بخير قبل لا اكمل
عمو ابو رائد گال الموافقة وأخذناخا نقرأ الفاتحة ونحدد موعد المهر
انصدمت هذا شبي
لحظة عمو ترى بعدني ممكملة كلامي
محسن... عبد خلي ليال تكمل اي عمو شردتي تگولين
... اعتذر منكم ما اگدر اوافق مامخلية الزواج بالي ورائد مثل أخوية ما إريدة لا هسه ولا بعدين خلي يشوف حياتة ولا يظل ينتظرني
عمو عبد عاط موگتلك هاي أكيد مخلية احد برأسها بنات المدارس كلشي يطلع منهن
محمد.. لهنا والزم حدك الظاهر هواي كبرت رإسك وحترمتك بناتي اشرف من الشرف
وعلى هاي احجايتك بروح اهلي لو ليال توافق اني ما اوافق ومن اليوم تحرمت عليك عتبة بيتي
... صارت هوسة بابا تعارك ويا عمو باقي عمامي كلهم صفوا ويا بابا ورزلو عمي عبد لان الحجاية الگالها جبيرة ومست كل البنات هما هم بناتهم بالمدرسة
عمي ظل حس على غلطة ظل يعتذر بابا ما قبل اعتذارة رائد مثل كل مرة ظل يصيح اخذها يعني اخذها تالي عمامي طلعوا سحل لان حيل تفشلوا من بابا
زلال... طگت روحي لو ما عيب ألزم عمي وأبنة واضربهم رأس برأس
يهدد وهو كفخة مابي كلما يجي ينسحل
طلعت اذب الزبالة باب الحوش شوية مفتوح
حجي صجمة واكف ويا هذا الولد الي لهسة ما اعرف اسمة
الحجي من لمحني اجة علية
شلونج يابة
.. هلا حجي مممم أكيد جيت تستفسر وأدور اخبار
... ناس هواي اجوكم وسمعت صياح ظل بالي خوما صاير شي
... اگول حجي من شوكت صرت اذب ميانة ويا شباب المنطقة وتوكف وياهم
... ليث خوش ليث
... اهاا اسمة ليث اكيد هالليث عرف نقطة ضعفك وجاي يداريك بالنمنمات
... زلزال جفيني شرج ولي ما أريد اعرف شي
.. لا لا اوكف شبيك بسرعة. تضوج
اجو خطابة على ليال
... يا ليال يا بوية وانطيتوها
.. ههههههه شبيك كمزت لا ما وافقت لاتخاف ماراح تنحرم من طبخاتها
... الله يبشرج بالخير ولو انتي بومة مابيج كل خير
... يراد هالمرة افشخك ببلوكة بلكي تفقد الذاكرة وتنساني
ولا اهتم الكلامي عافني ورجع وكف يم الولد
فتت على ليال للغرفة لگيتها تتنعوص وتندب بحظها ولمى تواسيها
احم ليلو عندي الج اخبار الا بشدة
لمى. زلال مدتشوفين حالها الله عليج عوفيها مو وقت سوالفج التعبانة
... والله مو تعبانة قبل شوية اجة حجي صجمة يشمشم اخبار
.. وهي ششسوي الحجي صجمة شششبيج بابا
... لج ابن الجيران الحلو جان واكف ويا اكيد الحجي راح يگلة جايين خطابة على ليال
.. هاا وأنتي اكيد مقصرتي كتيتي الأول والتالي للحجي
.. اي طبعاً حتى يوصل الكلام الليوثي
... منو ليوثي؟
... الحلو طلع اسمة ليث
ليث وليال الله حتى بالأسماء متراهمين
ليال..كافي لج عوفيني بقهري اصلاً اذا ظل رائد مجلب بية محد يدك بابي
.. دخلي يطير والله مسويلة اعتبار وهو فلس ميسوة
لمى... على گولت بيبي الحجارة المتعجبج هي التفشخج
.. يمل وداعتكم يمل بس صبروا شوية
ليث اختفى فص ملح وذاب
يوم يومين اسبوع وهو ماكو احس ليال ضايجة بس تكابر
كلما احاجيها اتگول وشسويلة عرفة ولفى حتى اضوج هم زين خلصت منه
المصيبة ابد ما اصدگها
اقل من شهر انصدمنة بجيت اهلة علينا يطلبون ليال.....
