 |
رواية لك ياذا الجمال اليوسفي الفصل الرابع 4 بقلم فاطمة العبادي
جزءٌ يُقاوِم ، وجزءٌ مُنهار ، وَجزءٌ لا يُبالِي ، وَكُلّهم انا ..... درة .
حر ... خاب تسكت لا اترس حلگك تبن هسة تذكرت عندك خوات ؟ وزيد عليها توزع بيهن
تفضل يله تفضل بـلا مطرود ..
هاني ... اخوهن وغصبًا غ خشم اليرضا والمايرضا العجبك اهلا و سهلا والما عجبك ارگع راسك بستين حايط ..
جرة خالي من مقدمة تيشيرتة وركعة كلة خله هاني يسنح وصاح بي بغضب ... ك**** تدري بخواتك شنو ياكلن شنو يشربن تمرضن لو زينات ؟
منو احتاجت عملية ومنو تكفل بيها وسووالها
وين داومن ومنو اهتم بدراستهن ومصارفهن ودار باله عليهن ساعة يصيرلهن ابو وساعة يصير الهن اخو ، منوووو يشوفهن وهنة يكبرن كبال عينة مثل الورد يوم ورا يوم يزهرن .. ولك ابن ال.... قطع كلامة
... ليش تخليني اسب ابوك وهوا بگبرة ورجال زين بس عيبة الوحيد خلف عااار مثلك ، حرامات الله حاط بوجهك شااارررب ولو الشوارب مو مقياس للرجولة لأن لو مقياس للرجولة جان هسة انتة خيرة شباب العالم واشدهم غيرة وحرص ع عرضة ..
هاني أبتسم بأستهزاء وگال ... مبين خوش تحبهن من اول حجاية ضليت تذكر افضالك عليهن وتحسسهن بالذلة ..
اسامة ... اسكت لا اشك حلگك بالقندرة ، والله لو ما ابيتي جا عرفت شلون اربيك
حر بنفاذ صبر ... اذا ما تطلع هذاااا من كبالي اكسرة مثل فرهود الأصنگ واشوف يا كو*** يطلع ورا ويكول كسرت زلمتنة ..
اسامة ... كوووم لك
حر ... الكددديششش
اسامة ... كوم تفضل برة صاير زلمة الأفندي يوزع بخواتة ويقدمهن للعارات هداية
والله راسك نكسرة وراس العار الهديتلة درة ما تعرف منوووووو اووولاااد نووووفل
هاني ... حضرو روحكم جايب عمامي وشيخنا وجايكم باچر واشوف يا زلمة منكم يفك حلگة وياي وانه كاعد بنصهم
حر ... خاااب انته لو بيك خير وبيك خير جا ما تتحامة بحفنة زلم ولكككك صيرررر زلمة وتعال تواجه وياي صدر بصدر وكلييي شتررريد و ووين ناوووي توصل ، حتى اسرت حلگك .
هاني ... لا انتم ثنين وتتوحدون عليه خلي حجيكم ومزامطكم هذا يصير كدام عمومتي ..
حجاها وهوا يكوم وحجة بوعيد ... واعتدائك عليه ما اعبرة بسهولة ييييَ حرر
حر ... صدقة لله يمة فدوة لبزر النستلة ..
هز راسة بوعيد وحجة من بين سنونة بغضب دفين
... بسييييطة
طلع من البيت وانه بعدها عيوني تتابع خطواتة وعيوني مغرغرة ، ما اصدك شنو جاي اشوف اخوي الكل عمري ما شفتة جاي هسة من تالي يقدمني قربان حتى ينفع مصالحة ..
اعرف كلش زين شنو نيتة اذا ما يستفيد من هاي السالفة ما جان ذكرني وقدمني قربان لعار أسمة ابن عمي ..
اسامة ... حر انته شلون اتطك الولد وهوا ببيتنة ما يصير
وعد ... لا زين سوة عفية علي هذا حرام يتسمى اخو كفررر بالخوة ..
حر ... ابن اللذين انتَ شايفلك واحد ينطي بخواتة!
هذا اليوم انطا درة هدية باجر يبيع رهف
اسامة ... مع هذا مايصير اتطكة ابيتنة
كاتي ... اسامه هية رادت تضرب هر، ما تستهي ..
خالي عقد حاجبة وكللها ... منو الما تستحي
كاتي ... الولد هاي اخت درة راسهة مثل الگوري من تفور ..
اسامة ... اي صدك راسهة مثل القوري بس عيب المهم حر افضل يا اخي نحجي ويا عمامهم الكبارية احسن
خالي حر مسح ع جبينة بأطراف اصابعة وضل يزفر بغضب ، زم شفايفة بغيض وبانت عروك گصة ورگبتة صار يدخن
امي همست بخوف شبيك خوية
حر ... تؤ ما بية ما بية
دار وجهة اجة يصعد صرت بوجها انه، توزعت نظراتة الحادة ع ملامحي الخايفة وجر حسرة طالعة من نننصص كلبة ودار وجهة وصعد ركض ...
وعد ... اسامة ترة فرهود خطف درة يستاهل الصار بي بس هاني لا يطكة مثل فرهود ويكسرة ، طكة زينة وطكة شينة ويروح يصير شي بالولد ..
اسامة ... عساااا بالكسر، وهوا هذا شنو خنيثة طكة وحدة سنح هههههههههه
رهف ... بس ترة راسة مو مثل القوري هوا كلش وسيم ليش تعيبون علي
اسامة ... هلووو ،،، ما تنطي بأخوهااا
رهف ... شلوووون ؟!!
كاتي ... راسها مثل الگوري رهف هاي شگرة مو هلوة ههههههه انته اسمر وهية شكرة السمرة هلوة
اسامة ... همززززين انه اسمرررر يمة مرتي تدور سمران
لكزتة بكوعها بخاصرتة حيل صاح بويااا وكض خاصرتة
طلعت مني شهكة لا ارادية مصاحبة الدمع الينزل من مقلتاي بكسرة ، تقربت امي ربتت ع كتفي وكالت بصوت هادء بي رقة فراشات
... ذبيت حمايتجن ع رب العالمين ، لأن مابيدي شي گبال كومة زلم ..
درت وجهي عنها صعدت ركض دكيت غرفة خالي حر وفتحت الباب بسرعة سويت علي مداهمة ..
.... خالي لا تخليهم ياخذوني انه اذا اطلع من يمك معناها اتيه ومحد يحميني ..
گام من مكانة تقرب علية وكال وهوا يرفع طرف حاجبة ... درة اريدچ صلفة ويا كل واحد يأذيچ ، اريد لسانچ طويل ويجرح اريدچ لبوة بس لبوة صلفة ..
قطبت حواجبي باستغراب ... خالي تضحك عليه تريد العالم تكرهني ويكولون درة صلفة وما تستحي
جر نفس وغمض عينة بقلة صبر زفرة وكال ... تعالي درة ، جرني من ايدي طلعني صعدنة فوك السطح كعدنة بالفي كال
... شوفي اول شي ، تعلمي اليجرحچ جرحي بس هاا مو كل الناس لا بس الصلفين ويجرحونج دائما رديها الهم ..
درة ... شلون اردهة الهم انه فقيرة وما ينطيني كلبي أأذي الدودة شتحجي انته
حر ... اول شي راح اعلمچ شلون تخلين الناس تحترمج وتهابچ ومحد يتجرأ يفك حلكة وياج
صرت كلي اذان صاغية كتفت ايديني وضليت اسمع
هو يحجي وتفاحة ادم تصعد وتنزل، صوتة بي بحة
شاربة مبروم من الجانبين، ويا الأثر الصاير بنص وجهة، حسيت كاعدة كبال رجل عصابات جاي يعلمني طرق الأجرام
... اول شي، تحفظين سرچ وما تنطينة حتى الأمچ ، تكتمين كل تفاصيل حياتج، لا تسولفينهن الأحد ، مفهوم
... بس ليش هسة انته مو محمود صاحبك يعرف كلشي عنك
... احنة ببلد ما يعيب الزلمة بس المرأة ، هسة بالنسبة الي لو محمود يطعني بظهري ويفشي اسراري ما راح انهز، لان عالمنة ما تعيبني ع ابو انه رجال، بس انتي بنية ابسط زلة منچ تصير بيج لثگة ..
انطيج مثال، انتي صاحبة محمل وجبتي قماش حلو سادة صافي بي لمعة ومرغوب من قبل الشراية ، كل قطعة وحدهة
اجة زبون جاهل و وسخ ولمسهة بأيدي القذرة وصارت بالقطعة مال القماش طگعة او لثگة بس ما تروح
بعد يگلبهة واحد؟ لو يشتريهة؟
درة ... اكيد لا، بس خالو انه مو للبيع
حر ... لا انه ولا انتي للبيع الامثال تضرب ولا تقاس
وهذا مثالي ع نسوان والزلم
اي واحد يصير بي لثگة بعد محد يرغبة
درة ... ما فهمت زين هذا مثالك شجابة ع كتمان الاسرار او الزلات
حر ... درة انتي القماش الصافي، والزلة او السر الجبير هنة اللثگة
درة ... بلة انه ممسوية غلط وسري يخصني انه بس وبسيط ليش يعتبر لثكة
حر ... مرات سرچ الناس تشوفة مخالف للعادات والتقاليد وهنا راح يصير حالة حال الزلة
وتتسجل نقطة عليك
درة ... قصدك لثكة بقماش صافي
حر ... اي ..
درة ... بعد ما احجي اي سر لكائن من يكن ، ابد ابد كلشي اضمة بكلبي
حر ... شي ثاني تكونين هادئة تختلطين ويا الناس بس بهدوء ، لا تذبين ميانة زيادة ويا واحد
حتى ما ترخصين بعينة سواء كان رجل او بنية
يضل يشوف مالج قيمة ويمكن يشوفج ناطيتة قيمة اله زايدة ويتكبر عليج وهوا افرغ من النفاخة ..
لا تشيلين غيبة احد، لا تحجين ع اي مخلوق بظهرة دام ما مأذيج، مالج علاقة بأحد، ، عسا ما يك***
بس بنفس الوكت راقبي الناس، بس مو بشكل مبالغ بي اي شي تبالغين بالتفكير والاهتمام بي ينقلب عليج، لازم تعرفين نقطة ضعف كل واحد من حولچ
وما تخلينهم يعرفون نقطة ضعفج حتى ما يستخدمونهة ضدج
خل عندج ثقة بروحج الله ما خلق شي بيهم ونسة ما حطة بيج انتِ كاملة الخلقة، وعندج عقل واحساس
لا تحسسين المقابل بضعفج، وحاربي علمود نفسچ لو كلفج الثمن روحچ
درة ... يعني احارب هاني علمود ما ينطيني الأبن عمي ويذلني
حر ... اي وانه بگفاج لا تخافين ..
درة ... بس خالو انه كلش انقهر من يعيبون عليه صخولة .. حجيتها بأسى ونزلت راسي بكسرة
حر ... رفعي راسج يَ بعد راسي ، وسمعيني عدل ..
رفعت راسي بهدوء ، باوعلي برفعة حاجب حسيت بنظرتة غضب، ارتعد كلبي من شكلة الرجولي ونظرتة توزعت نظراتة ع وجهي بهدوء وارتخت ملامحة أنرسمت ع ملامحة ابتسامة جانبية ، حسيتة فصل ونسة الكلام اليريد يكولة بعدها اردف ..
... والكفل زينب تختلفين ابد ما يشبهنچ ..
عقدت حاجبي وحجيت بتساؤول ... منو هنة الما يشبهني ؟
... النساوين ..
ابتسمت بخجل وهمست شكرا خالي ، بعد عندك حجي لو انزل
اشرلي بحواجبة بمعنى روحي وسحب باكيت جكايرة ..
نزلت مطمنة افكاري شبه تغيرت
لكيت رهف ترتب حواجبهة كتلهة بلواكة ... اختي حبيبتي جميلتتتيييي انا وجهي الأن اصبح غابة متروسو شعرًا احفيني احفيني لكي عن الله ..
حفيني خية الج عند الله من زمن الطاعون ما حافة وجهي ..
حجت وهية مركزة بالمراية ... دقايق خليني اكمل، جنت احف وصيح هاني وعطلني الله لا ينطي
درة ... وين تحفين
رهف ... بغرفة خالي اسامة ، حجت وهية تباوع بتدقيق الوجهة خاف بي شعر ويخرب شكلها الجميل
كملت وكالت جيبي مخدة وتعاي اخذت مخدة وكعدت عليهة وتربعت
ضربتني ع جتفي ... درة المخدة الي انه احطها حدر *** انتي شعندج كاعدة عليهة
شلتهة وانطيتهة الهة بدون كلام خاف احجي شي وتگلب علية والنتيجة تكون طردي انه وغابات الأمزون الي بوجهي ..
سكتت وكعدت عاقلة خرطت خرطة من خدي وانه كمزت ليورة ، جرتني من ايدي وطكتني ع خدي راشدي بدون رحمة ... هاااي ليش بربوك
رهف ... علمود يخدر شبيچ خلي احف وشوفي
رجعت تحف صدك شوية الوجع ارحم ..
ضلت تحف بية كل شوية اكمز ، والطم ع زروري لو اعض بشفايفي
رهف ... حطي ايد جوة حاجبج والثانية فوگة علمود ما تنگرصين
نفذت حسب شوفي للي يحفن بس الوجع احسة يدك بكلبي ، تقريبا تريد تخلص وسمعنة صوت نقاش عالي بصياح شمرت الخيط من حلكهة وطفرت
رهف ... الله عركة مرة ثانية ..
كمت وراها ونزلت ركض، خالي عدي وحر يتناقشون عرفة بموضوع هاني ، الظاهر واحد من عمامي مخابر ع خالي عدي وكايلة باجر العصر انه واخواني وولدهم يمك بعدين عرفتة عمي خالد المتصل
رهف ... الموضوع مايفيد امشي نكمل تنظيف وجهج اشرف
عفناهم وصعدنة ، لكينة ترف نازلة هية ورزان بنت جيرانة جانن يلعبن بالصالة الفوك وراحن طلعن لبيت رزان ..
احنه الخوات ل3 عدنة 6 عمام وابونة سابع الأخوان ..
جبيرهم فاضل، متعجرف، طاغي، يشوف كل العالم بعين الصغيرة
ثانيهم أرفد
وبعدة ابوية جعفر
وبعده صادق و اسد الله، و جاسم وخالد الصغير
كلهم شايفين روحهم ع عالم، ماعدهم ضمير اعصاب، ميتحاجون بارود بسرعة ينفجرون
كلبي جان يدك بسرعة، وكل اجزائي ترجف
مدري شبية انگلبت احوالي رأس على عقب
حطيت راسي بالليل ع مخدة هستوني جااي اغفة
انرفس السرير من جوة ..
كمت بسرعة طفرت منة وگلبي ارتعد بخوف، دنكت اباوع جوة ماكو شي سميت بأسم الله ورجعت تمددت ، حاولت انام ماكدر بعد راحت النومة
كمت وكفت كبال المراية مشطت كوشتي وطلعت من الغرفة نزلت ركض للمطبخ سويتلي كوب حليب شربتة وصعدت ..
مريت من يم غرفة خالي حر لفتني منه صوت اشبه بالهمس ، تقربت من الباب حطيت راسي علي وسمعت صوت أنين كلعادة دكيت الباب صااح بصوت رجفني ... خلللوووونة ننام
ما تشوفون بس غباري وراي، موضوعة محيرني وانينة يكطع كلبي فتحت الباب غرفتنة وفتت لكيت شباك الغرفة مفتوح تأفأفت بضجر وركضت اريد اسدة
سمعت اصوات من جوة، باوعت للأسفل شفت بنية وولد يلعبون تطلع اعمارهم بل12 سنة هيج
مو اول مرة اشوفهم، ابتسمت ع منظرهم وطلعت نزلت اركض فتحت باب البيت وركضت للحديقة
شفتهم مسدوحين يحفرون، بالحديقة، ابتسمت وكعدت ع ركبي كبالهم ... شتسوون يا حلوين
باوعولي بنظرة خبيثة وما جاوبو، رجعو يحفرون بدون جواب ، عدت السؤال عليهم
جان يحجي الولد ... طلعينة ..!
مديت ايدي ويا ايديهم الي صارت تكثر تكثر تكثر، شهكت ورفعت راسي بقوة، باوعت داير مدايري نايمة بفراشي
كمت ع كيفي نزلت كلبي صار يرتجف ويرتعد
انفاسي ثگلت
ضاعت حقيقتي ويا احلامي، ما جاي اكدر اميز بين واقعي واحلامي
نزلت رجليني من الجرباية ومشيت بأقدام ترجف للشباك
فتحتة، داعبت نسمات الهوى الباردة وجهي المتعرق
اريد اباوع للكاع اخاف، همست بسم الله لا اله الا هو وحده لا شريك له
ونزلت راسي
اول شي شفتة نفس الاطفال كاعدين ورافعين راسهم ع شباكنة يباوعون بنظرة غضب وخبث ، ارتدم كلبي بجدار صدري سديت الشباك حيل بأيدين ترجف
وركضت جريت القرآن حضنتة الصدري وبقيت كاعدة اردد بسم الله الرحمن الرحيم وابجي بخوف
اذن اذان الفجر ، مثل الي تخدرت وغفيت بدون ما احس
ما كعدت الا امي صعدتلي وكالت وهية تندسني ... درة كعدي يمة دوام هاي اخر ايام كعدي وراج دوام
كمت من فراشي خدرانة وهمست صباح الخير
وعد ... صباح النور يلة يمة غسلي وجهج راح اطكلج بيضة اكليهة وفوتي سبحي علمود ما تتاخرين هسة بل10
هزيت راسي بـ اي وكمت غسلت وصليت ، كلشي صار بالليل شبه تبخر من راسي من اليوم قررت امشي بنصايح خالي حر
نزلت تريكت ويا كاتي وكمت غسلت مواعيني وصعدت سبحت، وانه بالحمام اسمع حجي تأفأفت بضجر عفية بيت بس مشاكل همة خوالي مو بالشغل شنو هاي الهوسة بعد ..
كملت سبح ونزلت حاطة المنشفة ع راسي واباوع محد طلع الصوت من الاستقبال ركضت اتصنط ويا رهف وهمست شكو منووو
رهف ... هاني وعمي خالد يردون ياخذونج
صعدت ركض خليت الشعري قراصة ولبست شالي ونزلت ركض ... ما راحو؟ طركاعة ع اعمارهم يردون يموتونة هذولي شبيهم شبيهم الله ياخذهم
رهف ... ولج جاي يتعاركون ويا امي وهية مدري شنو منتظرة ما تخابر خوالي
درة ... وين نقالهة خابريهم انتي
رهف ... ولج ضمتة بصدرهة تدري بينة احنة نخابر ع خوالي بس اوووف اوووف وهاي كاتي شريحتهة واكفة مابيهة رصيد
ضلينة نباوع بوجوه بعض بخوف، ثنيناتنة بملابس المدرسة رهف لابسة شالهة الابيض واني بس حاطتة هيج ع راسي حجة
جان نسمع صوت هاني يعيط ع امي ويغلط فتحنة الباب ودخلنة نركض ، هاني التفتت علينة هوا وعمي خالد
طفرت امي مثل اللبوة المجروحة وحطتنة وراها
... طلعن بنااات عوفني وياااهم
تقرب هاني كض امي من زندهة يريد يدفعة وهية ضلت تتدافع ويا ضلينة نرجف رهف صيحت علي لسانهة طويل ما تسكت
.... ولك ما تستحي ع روحك شطولك وشعرضك تدفع بأمي والله خالو حر جاي اله يكسر ظهرك
وعد ... رهففف سكتتتي بننناااات دخلن للبيت عوفني وياهم
رهف ... والله ما ادخل واريد اشوف شيسوي
طلعت رهف من ورة امي تتدافع ويا ... اطلع منااا احنة مو خواتك ولا نعرفك
كضها عمي خالد من ايدهة ودفعهة عنه
وعد ... خالد عوف بتي لا والخلقك اصرخ والم العالم كلها عليك
جرتهة من عندة تبجي وتصيح عليهم ... الله لا يوفقكم يخالد شردوتي بليلة ضلمة وتالي لحكتوني تردون تكسروني ببناتي
خالد ... خوية انطينة درة وينحل كلشي ،خلي البنية تاخذ ابن عمها وترجع المياه المجاريهة بعد عليش هذا التعالي والعناد منج ومن بناتج
درة ... ما امشي بكيفكم انه
ه
هاني ... لا والله بكيفي انه و ع مزاجي انه شو امشي وياي، حجاها وكضني من ايدي جرني امي ركضت كضت ايدة تدفع بيهة وتبجي ... عوووفهة ولك عوووف بتي هاااني
نتر ايدهة .. رفعت ايدهة ضربتة راشدي وضلت تدافع بي واني الوي بأيدي واصيح
... دعوووفني ادبسززززززز عوووفني والله خالي حرررر يموتكم والله ، يمة خابري خالي حبوبة خلي يجي
دفعهة هاني بكل قوتة طاحت ع كاع وجرني بكل قوتة يسحل بية، جان اقوة مني وكدر يسحلني سحل للسيارة وما اشوف غير عمي خالد مطلع رهف سحل و يكول لهاني ... ناخذهن ثنينهن فرد نوب
وامي من القهر تلطم وتصرخ وتدفع بيهم
تركض ع هاني تدفعة
وترجع ع عمي خالد، احتارت منو بينة تفك
واحنة نبجي
صاحت رهف بقهر ... يمة والله اطشرهم واطلع حيف كل دمعة طاحت منج والله والله
حجت بعناد
كفخهة عمي خالد ع راسهة والعجيب رجعتلة الكفخة برفسة ع رجلة بكل قوتهة ، تحولت وحش مو رهف الرقيقة صاحبة الانوثة الطاغية، والصوت الهادئ بالاضافة للشكل الي ما يمت للذكر او الاسترجال بأي صلة ..
صعدونة بسيارة عالية سودة وشخطو السيارة وطلعو وانه اتلاطم ورهف تصيح ودموعهة تصب
وهمة مبتسمين بأنتصار ..
العارات استغلو فرغة البيت واخذونة غصب
رهف ... حطيت راسي ع كشن كدامي وابجي وارجف، انقلبت كل موازيني ، غفت القوة بصدري وفز الخوف مرتعد من نفسة ..
السيارة تمشي، والرجفة ماخذتنة جريت نفس بنفاذ صبر ومسحت وجهي، السيارة جان بيهة من كدام كلينس مديت روحي من بينهم فزو باوعتلهم بنص عين وسحبت كلينس الي ولدرة مسحنة وجوهنة وضلينة ساكتات ..
امي جانت خايفة من هذا اليوم، ودوم تكول راح يجي يوم ويطالبون بيجن همة منتظريجن تشبن
بس ما جانت متوقعة هاااني هوا العار الراح يسلمنة ع طبق من ذهب لعمامنة العارات ..
اااخ ينار كلبي يابوية اااخ مدللاتك انذلن بفضل وليدك اخ بس ..
ورا طريق طويل ، نزلنة بفرع بي بيت عبارة عن قلعة
ويمة سيارات الدنيا ، بلعت ريكي بخوف وقربت راسي من درة
... يمصكوعة يمكن اليوم العرس عادة مشيرة لو لا
باوعتلي بخوف ولمت شفايفهة ضغطت عليهن و التفتت ع مجموع الناس
فتحو باب القلعة، البرة وفاتت السيارة للبيت
باوعت الرجلي هسة لو لابسة حذاء جا ركضت ع هذا الدرج المؤدي للبيت وطيحت حذائي من رجلي مثل سندريلا
باع الحظ حتى جابونة حافيات ..
باوعت داير مدايري الخضار، وترتيب الحديقة يسحر العقل وكفت السيارة ونزلو منهة همة
هاني فتح الباب وكال نزلن يلة
درة ... انه ما انزل
هاني ... لا تخليني هسة كدام ولد عمومتج افشلج وانتي عروس نزلي يلة
بوعتلة بعناد ونظرة قوة ما عهدتهة بعين درة قبل ، يمكن بين معدنهة الحقيقي وبينت قوة درة الماجنت اعرفهة وشايفتهة قبل ..
نزلت هية، ونزلت وراها ، نصيت راسي بأسى وعصرت روحي نزلت دمعاتي وضليت امسح بوجهي
مشة هاني للبيت مشينة ورا ، فتح باب طبينة استقبال جبير كلش، داير مدايرة قنفات ملكية
وبردات فخمات
قوست شفايفي باعجاب، والله ذواقين الهمج ..
مشنة بي وبعدهة انفتح باب الصالة الثانية ودخلنة ع خمس نسوان كامن مبتسمات واستقبلنة بالهلا
بوسنة واحنة بس جامدات
وحدة منهن جانت طويلة، عرفتهة زوجة عمي فاضل
وثنين چناينهة بس ما اعرف ولدهة زين
وثنين بناتهة
اخذنة كعدنة يمهن وقدمن النة ماي واحنة بس صافنات
درة قربت راسهة مني وهمست ... هاي البداية
والبدايات دوم حلوة، اكو جزء مظلم ومخيف ورة هاي الصورة الحلوة ..
قوست شفايفي بأعجاب كلامهة عجبني، باوعتلهن بعمق
عرفنة ع نفسهن الجنانين جانن
مها و سفانة
والبنات ذكرتهن من كالن احنة فلك و فدك
كبرانات ومتغيرات ما عرفتهن .. بس للامانة كلش جميلات ..
بعد صمت دام دقايق مرت عمي فاضل، نجوى حجت
... امجن شلونهة بنياتي شلون صحتهة
رهف ... الحمد لله
نجوى ... والله مشتاكين الهة الله يسلمهة راحت والروحة روحة، حجتهة وتحسرت بعمق
كلبت عيوني وضليت اباوعلهة بضجر حست عليه ضايجة منهة وضلت تسولف ويا جنانيهة واحنة بس نسمع
كامت مها زوجة الجبير حسب ما هية كالت
وحجت ... اخذجن لغرفة فدك ترتاحن بيهة امشن وياي بنات
سفانة ... همة ليش جايبيهن بملابس المدرسة هيج ؟
.... ما ادري سأليهن
نجوى ... ليشش؟ مو المفروض محضرات جنطجن هيج كال خالد
درة ... جابونة سح احنة والمخطوفات سوة الفرق بقضيتنة خاطفينة اهلنة
حجتها بأستهزاء ...
رهف .. كمت وكتلهة ... كومي درة نروح ويا البنية
مشيت ونزلت راسي الفرشة شتوية لونهة غامق ورجلي كلهة تراب صار اثر بيهة متت من الخجل الاحراج خلاني احقد ع هاني اكثر واكثر
رفعت راسي شفتهن كلهن منتبهات
.... عذرونة ترة جابونة حافيات سحل
نجوى ... يااا شمالهم ذولي، مها اخذيهن، فدك صيحي عمج خالد وعمامج خل يطبون نحجي وياهم شنو هاي التصرفات الهمجية ويا البنيات والله زحمة ..
فدك ... والله كولي بابا يلعب لعب بعمي وهاني سكتي حبابة لا تحجين شي كدامة
مشينة احنة وخليناهن يحجن، كلشي غريب
اسلوبهم، وتفاجئهم من منظرنة
حسيت اكو شي غريب وحلقة مفقودة بقصتنة
همة ما مجبورين هيج يتصرفون ويانة لو يمثلون كدامنة
غسلنة رجلينة ونزعنة شالاتنة عدلناهن خربن من السحل ، البنية مها كالت
... اجيبلجن دراعات احسن من هدوم المدرسة
... لا لا مانريد
مها ... هههههه هنااا من جهاز العروس بس الحلو هاني شايف رهف عبالة درة ويجي يكول مثل فلك
راحت فلك واشترت ع قياسهة وطولهة
تالي طلعتن مختلفات هسة يطلعن كبار ع عروس
رهف ... هوب لزمي بريك يا عروس اختي درة ما تتزوج فهمتو لولا هية مو لعبة عدكم وتتحكمون بيهة وتزوجونهة للي تحبون
وهاني وين شايفني هوا من شاف درة استغرب
باوعت الدرة بتعجب، رفعت اكتافهة بمعنى ما تعرف
رهف ... كلكم جاي تضحكون علينة
مها ... لا وموسى ابن جعفر ما نضحك عليجن هوا صدك اجة كال شفتهة واكفة بباب البيت تريد تروح للدوام مادري يهي منهن بس سمرة يعني درة و ع هذا الحجي وصفها مثل فلك طويلة وجسمهة بي ضخامة ..
زميت شفايفي بغيض ، وكعدت ع سرير البنية ما ادري شنو احجي، اذا هوا عبالة انه درة، شلون من شافني ما حجة شي
ومن شاف درة كال هاي هية اختي درة بأستغراب ..
حسيت روحي بدوامة، احس العالم صار كلة كذبة
راحت البنية ورجعت جايبة دراعات يجنن ، بس رفضنة نلبسهن
تنهدت بضجر وباوعت الوجهي بالمراية بالشال الابيض ليكول وحدتنة طالعة من الكبر بكفالة
والله زحمة العالم يشوفوني بهذا المنظر البشع والله والله
بعدت الدراعات من وجهي، وتعوذت من الماركات والمديلات
وبعد ما باوعت عليهن، وعيني ثبتت ع درة بس تباوع بضجر ع مكان اخير شي نطقت
... ما شاءالله غرفتهة تجنن والبيت كلة عجيب مثل بيوت الممثلين بالمسلسلات الخليجية
رهف ... اي اللهم صلِ على محمد والِ محمد صدك فد شي فخم، ذواقين بأختيار الاثاث الملكي وتنسيق الألوان بين الأبيض والرمادي والأسود
احس صاحب هذا البيت واحد اجنبي
مو عمي فاضل الفاصل المتعجرف
فضلو اله النار ياربي ..
درة ... سكتي لا يسمعونج عيب جانن حبابات ويانة زحمة يسمعنة نحجي عليهم
اندك علينة الباب، وطبت فلك كالت وهية تحط ايديهة ورة ظهرها وتتمايل .... لبسي عباية راح يجي الشيخ وبارق علمود يعقدولكم
