رواية قدري أنت الفصل الرابع الجزء الرابع بقلم نجمه براقه
الفصل الرابع}
عبدالرحمن: هشوف هقدر اجي امتي ، المهم انت خلي بالك ولو في حاجه كلمني
سمير: يا عبدالرحمن انا مش عارف امشي الشغل ولا قادر علي اي حد من اللي شغالين لوحدي ، هتقعد عندك تعمل ايه تاني
عبدالرحمن: يعني ايه مش قادر عليهم ، شد نفسك يا سيمر واي واحد يغلط وميشوفش شغله يغور ويجي بداله عشره ، معنديش لعب في الشغل
سمير: اذا كان انت نفسك بتلعب
عبدالرحمن: قولتلك مليون مره متنساش نفسك يا سمير
سمير: اسف
عبدالرحمن: ماشي ، انا هشوف الدنيا هنا وهقولك هاجي امتي.. بس اتعب معايا شويه
سمير: حاضر… بس هو ايه اللي بيحصل عندك مخليك قاعد لدلوقتي
عبدالرحمن: مفيش حاجه مهمه
سمير: ومن امتي انت بتسيب الشغل علشان حاجه مش مهمه
عبدالرحمن: عادي يا سمير… بعدين هقولك.. يلا بقا اقفل
سمير: ماشي
عبدالرحمن: سلام ( أغلق الخط لينظر إلي ميار التي تقف عند الباب) واقفه عندك ليه ما تيجي تقعدي
ميار: مش جايه اقعد … انا جايه عشان اعرف هتمشي امتي
عبدالرحمن: زهقتي مني
ميار: انت عارف بسأل ليه
عبدالرحمن: لا مش واخد بالي
ميار: علشان يقين يا عبدالرحمن… وعشان مينفعش تقعد هنا ولا تبات
عبدالرحمن: وايه اللي جد ما انا كنت ببات عادي قبل كده
ميار: بلاش لؤم يا عبدالرحمن.. الوضع دلوقتي اتغير، وابوها و عمها مش مرتاحين لوجودك
عبدالرحمن: محدش فيهم اتكلم انتي لوحدك اللي مش عاوزاني
ميار: اعتبره زي ما تعتبره، المهم تمشي بسرعه
عبدالرحمن: ماما… انا هريحك… انا مش همشي من هنا غير ويقين معايا
ميار: تبقي بتحلم ، يقين مش ممكن توافق تجووك
عبدالرحمن يبتسم علي جمب شفتيه بخبث: موافقتها متهمنيش في حاجه
ميار: يعني ايه.. هتجوزها غصب
عبدالرحمن: اه
#يقين
في وسط حيرتي وتفكيري في المشاكل اللي بتتحدف عليه من كل اتجاه لقيت عبدالرحمن جايلي وانا قاعده في الجنينة وبيقعد قدامي ببروده وهدؤئه اللي اتعودت عليه في الفترة الاخيره
#بقلم_نجمه_براقه
عبدالرحمن: سيبتي الشغل وروحتي فين النهارده
يقين: نعم؟! وانت عرفت منين
عبدالرحمن: مفيش حاجه ممكن تتخبي عليه، انا بعرف اللي عاوز اعرفه
يقين باشمئزاز: ولما انت واصل قوي كده، معرفتش روحت فين ليه
عبدالرحمن: ما انا عرفت ، بس كنت عاوز اسمع منك
يقين: حد قالك انك بقيت مستفز
عبدالرحمن: وحد قالك اني بقيت بعشقك
يقين:
عبدالرحمن: مش مصدقه
يقين: لا
عبدالرحمن: المهم ان انا مصدق ، وقريب هخليكي تصدقي انتي كمان.. لما تكوني مراتي
يقين: ههههههه والله بتصعب عليه… بس خليك كده لغيت ما ترضا بالامر الواقع
عبدالرحمن: بحب قوي نبرة التحدي اللي في كلامك .. بتحمسني اكتر
يقين تنهض: اتحمس براحتك كل ده هيطلع علي فشوش ( قالتها واستدارت لتذهب)
عبدالرحمن: خليكي كده لغيت ما تصحي وتلاقي نفسك مراتي… صدقيني ما هتحسي غير وانتي لابسه الفستان الابيض ليه انا
يقين تنظر إليه: ههههههه ماشي بتوفيق يا عبدالرحمن
مع اني واثقه ان مستحيل اوافق عليه او ان حد يقدر يغصبني بس ثقته في نفسه وهو بيتكلم خوفتني، وحسيت انه ناوي علي حاجه انا مش فاهماها
#عبدالرحمن
صبرت عليها سنين وكل يوم اقول هتوافق هتوافق، وهي بردو بتعند، متعرفش ان كل حاجه ليها نهاية حتي صبري ليه نهاية، ومتعرفش انها بتضغط علي زرار التحدي عندي وانا بعشق التحدي، وعندي اموت ولا اخسر اي تحدي ادخل فيه، و اول جوله في التحدي ده ، ان يكون بينها وبين ابوها عِند وخلاف دايم، والباقي مكنتش مرتبله وجالي علي الجاهز
#مؤيد
كل يوم بتزيد رغبتي اني اعرف انا مين ومع زيادة الرغبه دي بشوف احلام كتير ان انا لقيت اهلي، ايوه الاشخاص اللي بشوفهم مش فاكر اني شوفتهم قبل كده.. بس بيحفزوني اكتر اني احاول اقنع ماما توافق، بس ازاي اقنعها وهي مجرد ما نفتح السيره تنهار
#بقلم_نجمه_براقه
مؤيد: ماما ( حدثها أثناء شرودها في النظر لصور انس ف يكرر منادتها لترفع جفنيها ف اذا به يرا احتشاد الدموع في عينيها)
مؤيد: انتي بتعيطي
سعاد بدموع: لا
مؤيد يجلس بجانبها: احنا مش قولنا بلاش تبصي لصور عشان بتتعبي
سعاد بدموع: متخافش عليه، هزعل شويه وبعدين ارجع زي الاول واحسن امك ست قويه
ضم رأسها لكتفه: طبعا ياحبيبتي.. انتي قويه ومش ممكن حاجه تقلل من قوتك دي، بس علشان خاطري خلي نوال تخبيهم، بدال ما تزعلي كل ما تشوفيهم
سعاد بدموع: لا.. مش هبعده عني تاني.. انس هيفضل معايا لغيت ما اروحلو ( تنظر إليه لتتابع بعد صمت دام في تفحص وجهه ) انس.. كنت عارفه انك هترجعلي.. كنت عارفه ان مش ممكن تهون عليك امك
مؤيد: اكيد … نامي حبيبتي.. يلا ارتاحي
سعاد بدموع: مش هتسيبني صح
مؤيد ياؤم نافيا: لا مش هسيبك، في حد يسيب امه بردو
سعاد تلمس وجهه وتتطلع إليه ف تنساب دموعها علي وجتنها بشكل متواصل: مش هتمشي؟!… هتفضل معايا؟!
مؤيد يمسك يدها ويقبلها: ايوه.. مش همشي خالص.. نامي انتي تعبانه
كل مره بحاول اتكلم معاها بتعجزني قبل ما افتح السيره ومش عارف اخرتها ايه. هفضل عايش كده ولا هيجي يوم واقدر اعرف انا مين
#وائل
بعد ما اصتلحنا انا وبابا بقا ياخدني معاه كل مكان عشان يعرفني علي صحابه وشركائه ويرجع ياخدني ويعرفني عليهم تاني لغيت ما حفظتهم كلهم وعرفت معاهم كام عيل وكام شركه وكام بنت… وهنا مربط الفرص ، بناتهم! ، ليه بقا؟! علشان بابا مُصمم اني اتجوز قبل ما اسافر، لدرجه انه قالي هنعمل حفله ونعزم فيها كل صحابه ومعارفه وبناتهم علشان اختار منهم علي اساس اني امير وهيجمعلي بنات المملكه اختار منهم ، ولكن انا رفضت ف قالي ماشي فض مجالس وخلاص ، ولكن انا متأكد انه مش هيسكت ، والنهارده بعد ما نهينا جوله في شركة احدي شركائه اللي بصدفه عرفت انه عم نسمه قبل دخولي لمكتبه بخطوة، كنت هرجع بس بابا مرضيش وصمم اني لازم ادخل معاه، ولما دخلت لقيته راجل محترم وكمان صعيدي ولهجته صعيدي ورحب بينا كويس ومقابلته كانت لطيفه وكنت هحبه ، بس لانه عم نسمه ده في حد ذاته كرهني فيه، ف قفلت معاهم وسيبت بابا معاه وخرجت من الشركه وبره المدخل شوفت نفس البنت اللي شوفتها في الجامعه قبل كده
#بقلم_نجمه_براقه
ملك باندهاش: انت هنا
وائل يبتسم: اه
ملك بإبتسامة: بتعمل ايه هنا؟!
وائل: كنت جاي مع بابا… انتي اللي بتعملي ايه هنا
ملك بعد تفكير: جايه لبابا بردو ، اصله شغال هنا
وائل: شغال ايه ، اوعي تقولي صاحب الشركه
ملك بإبتسامة: لا شغال في الارشيف ، وانت باباك بيعمل ايه هنا
وائل: شريك لصاحب الشركة
ملك باندهاش: هههههه اه… تمام قوي… انا ملك
وائل: وائل
ملك: وائل ايه
وائل بغرور مصتنع : وائل بهجت مصلحي.. ابن رجل الاعمال بهجت مصلحي… اكيد تعرفيه
ملك بذهول: انت اخو رحاب
وائل: ايووووه اخو رحاب.. تعرفي رحاب انتي.. شوفتك وقفتي معاها في الجامعه المره اللي فاتت
ملك: اااه.. بقا هي دي اختك
وائل: اه
ملك بإبتسامة: اهلا وسهلا بيك.. تشرفنا
وائل يرفع حاجبه: الشرف ليه… لو احتجتي اي توصيه علي ابوكي بلغيني… انا وائل بهجت مصيلحي ابن رجل الاعمال بهجت مصليحي
ملك: ههههههههه وليه بترفع رقبتك وانت بتقولها
وائل بغرور مصتنع: علشان انا وائل بهجت مصيلحي ابن رجل الاعمال بهجت مصيلحي ههههههه
ملك: ههههههههه تشرفنا… انا بقا ابويا شغال في الارشيف مش من مستواكم يعني
وائل: ههههههه بهزر معاكي.. انا تشرفت بيكي
ملك بإبتسامة: الشرف ليه متشكره
وائل: عفوا.. شكلي هشوفك تاني
ملك بإبتسامة: افتكر كده
وائل بإبتسامة: حلووو…. يلا بقا مش هعطلك ، باي
ملك بإبتسامة: باي
وائل: باي ( قالها وهو يضع نظاراته ومن ثم يذهب لتنظر اليه بإبتسامة حتي صعد سيارته ف ينظر اليها نظره اخيره ويرفع يده بالتحيه ثم ينطلق )
بنت عسوله قوي ودمها خفيف ودي حاجه بتثبت ان رحاب اختي ذوقها زبالة في الصحاب وبدال ما تصاحب دي وتمشي معاها رايحه تصاحب المعقده
#ملك
اتفاجأت لما عرفت ان هو نفسه اخو رحاب اللي حكيتلي عنه نسمه بس كانت مفاجأة غير متوقعه وجميله في نفس الوقت، وشكلها كده مش هتكون اخر المفاجأت
#بقلم_نجمه_براقه
« داخل المكتب»
ملك بإبتسامة: ازيك يا عمو
بهجت بإبتسامة: اهلا ملوكه عامله ايه
ملك بإبتسامة: بخير الحمدلله… ازيك يا بابا
بُراق: مفيش فلوس
ملك: ههههههه طيب رد السلام الاول
بهجت: هههههه ابوكي فاهمك
بُراق: اصلها مش بتيجي اهنه غير علشان الفلوس
ملك: هههههه طيب والله ظالمني وبجيلك لما بكون عاوزه العربيه ساعات
بهجت: هههههه طلعت ظالمها يا بُراق
بُراق: حقك علينا يابوي… بس مش هتاخدي العربية افرض اتقلبتي بيها
ملك: لا ما انا مش جايه عشان العربيه
بُراق: أمال جايه ليه
ملك: جايه عشان الفلوس ههههههه
بُراق: شوفت مش قولتلك … خدي ادي الكارد ولو صرفتي اكتر من 200 جنيه هدفعهملك في القسم
ملك: ههههههه اشهد هيودي بنته السجن علشان 200 جنيه
بهجت: خدي الكارد بتاعي ولا يهمك
بُراق: انا بهزر معاها… خديه وترجعهولي قوام
ملك بإبتسامة: حااااضر
بُراق: بتكلم جد يا ملك
ملك: حااااضر قولنا
بُراق: هنشوف
ملك بإبتسامة: شكرا يا حبيبي… عن اذنك يا عمو
بهجت : استني
ملك: نعم
بهجت: الاسبوع الجاي عاملين حفله ابقي تعالي انتي ونسمه وماما مع بابا
بُراق: حفلة ايه دي
بهجت: حفله بمناسبة رجوع وائل
ملك: وائل؟!… مين وائل يا عمو
بُراق: ولده
بهجت: زي ما قالك… وائل ابني كان مسافر ورجع قريب
ملك: اه… مكنتش اعرف ان حضرتك مخلف غير رحاب
بُراق: طلع مخلف، بطلي رغي وروحي
بهجت: هيجو ماشي
بُراق: ان شاءلله
ملك بإبتسامة: ان شاءلله
#نسمه
بالليل كنت معديه جمب اوضة عمي ف سمعته بيتكلم مع غاده عن الحفله اللي هيعملها عمي بهجت وعن شكه في سبب الحفله دي.. وهو انه بيدور علي عروسه لابنه، وكان متحمس وهو بيتكلم عنه وبيقول انه شاب مجتهد ولو واحده فينا عجبته هتكون محظوظه.. الموضوع ده استفزني قوي وخلاني رجعت الاوضه متنرفزه ف لقيت ملك قاعده علي السرير ومبتسمه
#بقلم_نجمه_براقه
ملك: ماااالك
نسمه: مفيش
ملك: كده مفيش… انطقي
نسمه: عاوزه ارجع البلد كام يوم بابا وماما وحشوني
ملك: دلوقتي؟!.. مش لسه كنتي هناك لما عمك طلع من السجن
نسمه: عادي اروح تاني… هخلي عبدالرحمن ياخدني
ملك: بت انتي ، قولي في ايه
نسمه: بصراحه كده انا سمعت كلام معجبنيش بالمره
ملك: كلام ايه
نسمه: انا مقصدش اتسنط بس سمعت عمي بيقول ان عم بهجت هيعمل حفله عشان يلاقي عروسه لابنه… امير حضرته والسندريلا هتروحلو
ملك: ابنه؟!… بجد؟!… تصدقي ولا مره شوفته
نسمه: لو هتروحي الحفله هتشوفيه بس انا مش رايحه
ملك: طيب ومالك متعصبه كده… هو انتي ليكي كلام معاه
نسمه بربكه: لا.. وانا يكون ليه كلام معاه ليه… معرفهوش اصلا
ملك: طيب ومتعصبه ليه
نسمه: عشان حجة الحفله اللي هيعملوها… وشكل عمي متحمس للموضوع.. ولو شافك وعجبتيه واتقدملك عمي هيوافق
ملك تبتسم: بجد… بس لا … انا صاحبة القرار وانا اللي اوافق وارفض
نسمه: اوعي توافقي.. ده ولد مش كويس
ملك: طبعا مش هوافق ، ولا هروح الحفله
نسمه: احسن وانا هتلكك وارجع البلد يكون خلصت الحفله دي
ملك: تمام روحي
#بقلم_نجمه_براقه
امبسطت ان ملك مش هتروح ومش هتديلو فرصه انه يختار بينها وبين غيرها.. وانا بنسبالي مستحيل كنت هروح، وفعلا اتصلت ب عبدالرحمن علشان ارجع البلد ف قالي انه هناك ومش هيقدر يجي دلوقتي ولما قولت ل عمي براق قالي لا امتحانات الترم قربت وبعدها هنروح كلنا.. وسد ليه كل الطرق اللي تخليني اقدر اروح وعدت الأيام وجه يوم الحفله وانا عملت عيانه وبموت علشان مروحش وملك قالت انها رايحة تجيب كتاب مهم وبعدين هتروح تذاكر مع صحبتها ومش هتقدر تحضر الحفله.. وفي النهايه عمي اطر يروح مع غادة لوحدهم وباظت خطتهم ههههههههه
#وائل
بابا جه قبل الحفله بيوم وفاجئني ان بكره في حفله وان ناس كتير هتيجي واني لازم اكون موجود وفعلا حضرت وبدات الناس تتوافد ، كلهم من صحاب بابا و اولادهم وصحاب رحاب اللي انا متأكد انه هو اللي قالها تعزمهم.. بس شكلها نسيت تعزم المعقده وملك.. مشوفتش واحده فيهم في الحفله… حتي بُراق ومراته جم لوحدهم من غير بنتهم اللي قالي عليها بابا
رحاب: بتدور علي مين
وائل: مش بدور علي حد… بس كويس ان صحبتك المعقده مجتش
رحاب: والله البنت كويسه بس طيبة زيادة وبتتاثر باللي بيتقال
وائل: طبعا انتي هتقوليلي علي تاثير اللي بتقوليه
رحاب: هههههههه ووووائل خلاص ايه ده
وائل: خلاص.. بس ياريت متتعمقيش معاها قوي عشان متتعديش منها
رحاب: ما خلاص بقا من وقت اللي حصل واحنا تقريباً مبنتكلمش
وائل: احسن… اممم. وملك صحبتك مجتش ليه
رحاب: انت شوفت ملك؟!
وائل: اه شوفتها رايحه لابوها شغله
رحاب: اه… ده اكيد لما روحت مع بابا لعمي بُراق
وائل: اه… هي مجتش ليه
رحاب: جت شايفاها من شويه بره بتحوم في المكان وشكلها خايفه تدخل
وائل: اها… طيب.. صحبتك بتشاورلك من الصبح
رحاب: اهااا ههههههههه طيب يسهلو… اروح اشوف صحبتي
وائل: اااه روحي شوفي صحبتك
#بقلم_نجمه_براقه
مشيت رحاب وانا خرجت ادور علي ملك ف لقيتها واقفه بره وشكلها متردده تدخل ولا لا
وائل: مدخلتيش ليه.. ولا خايفه
ملك بإبتسامة: مش متعوده علي الحفلات دي
وائل: طيب وجايه ليه لما انتي مش متعوده
ملك: فرصه وجاتني ارفض ليه
وائل يبتسم: تفكير سليم… طيب تعالي جوه شوفي الحفله
ملك: لا انا كنت همشي دلوقتي
وائل: لو مدخلتيش انا هزعل
ملك: مش هقدر ، بصراحه كده جايه ومحدش يعرف
وائل: وانتي خايفه ليه.. دا انتي رايحه حفله عزماكي عليها صحبتك
ملك: مفيش الكلام ده، بابا يدبحني
وائل يبتسم: طيب خلينا هنا
ملك بإبتسامة: ماشي خليني شويه وبعدين همشي
وائل: اوكي… اممم حلو فستانك
ملك بإبتسامة: ميرسي
وائل: وانتي صاحبة رحاب من امتي علي كده
ملك: لا احنا مش صحاب ، زمايل وبس
وائل: غريبه
ملك: ايه الغريب
وائل بخبث: انك جيتي الحفله وانتو مجرد زمايله… ولا في سبب تاني كده ولا كده خلاكي تيجي
ملك بإبتسامة: لا عادي… حبيت اغير جو
وائل: تغييييري جووو؟! اه… ماشي
ملك: ههههههه طيب انا لازم امشي بقا
وائل: لسه بدري
ملك: كويس كده، قولت لماما مش هتأخر
وائل: طيب يلا هوصلك
ملك: لا مينفعش.. انا هروح لوحدي
وائل: هوصلك وانزلك بعيد عن بيتك
ملك: ماهو…
وائل: ماهو ايه… يلا هوصلك
ملك بإبتسامة: ماشي
وصلتها لقريب بيتهم ونزلتها مكان ما طلبت ومعرفتش بيتهم فين بالضبط ، ولصدفه ان المكان اللي وصلتها ليه قريب جداً من شقة مؤيد ف بعد ما نزلتها ومشيت انا سيبت العربيه وروحت مشي نحية الشقة ، وانا في طريقي قابلت المعقده وهي بتقرب بحذر ناحية سور من الشجر، مفهمتش ايه جابها هنا ولا اهتميت بالسبب بس وقفت اشوف بتعمل ايه، وبعد تربصها لحاجه ورا السور ده، قرفصت علي رجليها وبقت تمد ايدها لحاجه وفجأه مدت ايديها الاتنين وطلعت بقطه صغيره شكلها عيانه وقلبت من واحده معقده لواحده كوريا كلامها مش مفهوم
#بقلم_نجمه_براقه
نسمه: مسكتك مسكتك….. حبيبتي انتي كميله … رجلك بتوجعك… يااااحرام… تعالي جيبالك اكل ( وضعتها علي الارض ف اخرجت طعام من حقيبتها لتطعمها واثناء نظرها إليها ومسح راسها بلطف لمحت قدمي وائل علي بعد مسافه لترفع وجهها ببطئ وعندما تراه تنهض ف فزع )
نسمه: انت
وائل: اه انا.. في شارع الحكومه عندك مشكله
( قالها لتبعثر نظراتها بارتباك ومن ثم تخطو للامام ليقف امامها ويمنعها من المرور لترفع جفنيها وتنظر إليه بتوتر)
وائل: مجتيش الحفله ليه… كانت نقصاكي علشان تشوفي الفسوق اللي كان هناك… تصوري كانو مشغلين اغاني
نسمه بربكه: عديني
وائل: الشارع واسع عدي من اي ناحية ( قالها لتتجه يمين ف يذهب خلفها، ف تعود يسار ليلحق بها ايضآ ف تقف ملجمه امامه)
نسمه بخوف: عديني
( راء الخوف في عينيها ليتابع بهدوء دون المحاوله لمضايقتها)
وائل: نسيتي شطنتك ( قالها لتنتبه ف تدير رأسها ف تجدها هناك ف تعود بالنظر إليه)
نسمه: شكرا
( عادت لتاخذ الحقيبة ومن ثم تذهب ليوقفها صوته )
وائل: ياترا هاخد ثواب علي الحركه دي ولا بردو هولع وانا نايم
نسمه تقف وتجيبه دون النظر اليه: الله واعلم ، يمكن انت اقرب لربنا مني بس بنسبالي ، ف انا بكرة الناس المؤذيين اللي زيك ، ف حركه زي دي مش هتشفعلك عندي
وائل: وعلي كده انتي بتكرهي نفسك… مانتي كمان مؤذيه
.تستدير وتنظر اليه: ليه اكره نفسي ، وانا امتي اذيتك ولا اذيت غيرك
وائل: طبعا اذيتيني ، ولو انتي مأذتنيش كنت زعلت ليه.. الاذيه مش بس بالافعال ، الكلام كمان بيأذي.. وانتي لسه قايلاها انك متعرفيش اذا كنت أقرب لربنا منك ولا لا.. افرضي بقا ربنا بيحبني ومرضيش بوجع قلبي بسبب كلامك… ساعتها هتولعي وانتي نايمه صح؟!
نسمه: الله أعلم… علي العموم انا بعتذر واتمنا تغفر ذلت لساني ( وائل يبتسم لتتلاشا ابتسامته سريعآ عندما تكمل) لكي لا يكون بيننا عند الله لقاء
وائل باشمئزاز : مسامحك من قلبي وياريت ميكونش في لقاء لا دنيا ولا اخره
نسمه: اتمنا
#نسمه
بعد ما خرجو روحت شقة مؤيد نضفتها و ولعت بخور ، وبعدين رجعت وفي طريقي قابلت الشيء اللي ساب حفلته وجه هنا لسبب الله واعلم بيه، لا وكمان بيطول لسانه، حقيقي عمري ما كرهت حد في حياتي قده واتمنا تكون اخر مره اشوفه فيها
« منزل براق»
ملك: مسكتك… كنتي فين؟!
نسمه تفزع: ياشيخه حرام عليكي خوفتيني
ملك: كُنتتتتتي فين يا نسمه؟!
نسمه: ايه كنتتتتي فين دي، هكون فين يعني ، روحت شقة مؤيد ورجعت
ملك: شقة مؤيد؟! ابو معرفتك يا شيخه ، دا قولت البنت اتخطفت
نسمه: يخطفوني يعملو بيه ايه
ملك: يعملو بيكي ايه ههههههههه.. الا يعملو بيكي ايه دي
نسمه: بتضحكي ليه
ملك: بضحك علي عبطك.. ايه يعملو بيكي ايه دي.. عمرك ما شوفتي واحده بتتخطف لتجاره باعضائها ، او اغتصابها مثلا ، بلاش دول ، عمرك ما شوفتي امير بيخطف اميره علي حصانه الابيض
نسمه: هو في حد دلوقتي بيمشي باحصنه
ملك: لا
#بقلم_نجمه_براقه
نسمه: امال ايه الهبل اللي بتقوليه ده… اي رغي وخلاص
ملك: عندك حق، اصل انا متاثره بقصص الكارتون قوي… تصوري النهارده عملت فيها سندريلا، بس جزمتي موقعتش ولا رقصنا سوا … لكن ساب معازيمه وجه عندي يا بت ، وربنا ساب معازيمه وجه عندي ، لا وكمان وصلني بعربيته
نسمه: هو مين
ملك: ههههههه وائل بهجت مصيلحي ابن بهجت ميصلحي رجل الاعمال المعروف ههههههههه وربنا حتت سكر
نسمه: ميييين؟!… نعم ياختي مين ده اللي وصلك وعملتيلوه سندريلا
ملك: وائل بهجت مصيلحي ابن بهجت مصيلحي رجل الاعمال المعروف… ههههههههه قالهالي تلات مرات بنفسه الطريقه.. وانا قررت اتجوزه علشان خفت دمه
نسمه: تتجوزي ده… هنخسر بعض لو فكرتي بس… ده طاغي و قليل الاد…..
ملك بماقطعه: نسمممممه وحيات ابوكي يا شيخه تبطلي عادتك المنيله دي.. انتي جميله ودمك خفيف ومتدينه بس بتسيء الظن قبل ما تعرفي الناس ، الواد قمر وانتي متعرفهوش علشان تقولي كده
نسمه: ربنا لا تاخذنا بما فعل السفهاء منا… موفاقكي في كل اللي قولتيه ، بس يابنتي انتي مش قولتي مش هروح.. ايه وداكي
ملك: هفهمك
نسمه: فهميني
ملك: عارفه الولد اللي قولتلك عليه قبل كده انه موز
نسمه: انهي فيهم
ملك: اخر واحد
نسمه: اه مالو
ملك: اهو هو ده نفسه وائل بس مكنتش اعرف انه اخو رحاب
نسمه ببلاهه: هه… كملي
ملك: ولما روحت من كام يوم لبابا الشغل شوفته نازل وتعرفت عليه ف عرفت انه ابن عمي بهجت اللي رد عليكي لما اتصلتي ب رحاب
نسمه: وبعدين
ملك: وبعدين مقولتلهوش اني بنت براق وفهمته اني بنت موظف هناك
نسمه: بتكدبي؟!
ملك: لا مش بكدب ، انا بس كنت بتسلي.. بصراحه كده نفسي اشوف هيعمل ايه لما يفهم اني بنت غلبانه
نسمه: ده اسمه غش.. وحتي لو عجبتيه وانتي غلبانه وجه اتقدم هيكون موضوعكم ابتدء بالغش والكدب
ملك: في ايه يابنتي ده لعب ومسيره هيعرف.. ده لو اهتم بس وسأل هيعرف فورا اني بنت بُراق… انا مش بغش يا نسمه
نسمه: وانا مش شيفاها غير كده … ومش هو ده اللي مزعلني دلوقتي.. انا اللي مزعلني انك سمحتي لنفسك تروحي وانتي عارفه ان الحفله دي علشان يختار… هو لو مجالكش لغيت عندك يبقا في داهيه
ملك: علي فكره انتي مزوداها قوي، الموضوع مش أكتر من تسليه بنسبالي، لا انا رايحه اجمع عريس ولا اخدعه
نسمه: جايز… انا داخله انام
ملك بتذمر: في ايه ، لا بجد في ايه.. كل كلمه اقولها تطلعيني اني كفرت.. كل حاجه بعملها بطلع بعصي ربنا … دي مش عيشه دي… انا بكره فيكي الحته دي يا نسمه… حاولي تبطليها كلنا فينا عقدنا ومحدش هيستحمل كلامك
نسمه: انا مقولتش انك كافره… بس انا مش حابه اللي عملتيه… لا كدبك عليه ولا انك سمحتي لنفسك تعرضي نفسك علشان يختار… اصل امير حضرته وبيختار من الراعيه بتاعته
ملك:
نسمه: كلامك مش عاجبك طبعا…. تصبحي علي خير يا ملك « تركتها وعادت غرفتها لتجد عدة اتصالات فائته من رحاب لتترك هاتفها وتجلس بجانب قطتها تداعبها حتي اتاها اتصال اخر منها »
نسمه: السلام عليكم
رحاب: وعليكم السلام ده اولا ، وزعلانه منك جدا ده ثانيآ
نسمه: ليه كده
رحاب: علشان مجتيش
نسمه: ما انتي عارفه يا رحاب ان انا مليش في الجو ده
رحاب: اشمعنا ملك ليها في الجو ده… والله ساعات ما بصدق انكم قرايب
نسمه: مش لازم نشبه لبعض علشان نكون قرايب
رحاب: اه بس انا كان نفسي تحضري معايا
نسمه: اعوضهالك في عيد ميلادك ان شاءلله
رحاب: عييييد ميلادي؟! احنا فين وعيد ميلادي فين
نسمه: ههههههههه في فرحك طيب ( كانت تتحدث لياتي وائل ويقف بجانب رحاب وينظر اليها وهي تتحدث معها)
رحاب: فرحي؟!… انتي عاوزه تشليني باين… لا والله بجد زعلت منك.. وبعدين مش بتردي عليه ليه من بدري
نسمه: كنت بعيدة عن التليفون
رحاب: طيب ما تيجي نكمل الحفله مع بعض.. ونبي
نسمه: حفلة ايه انا بنام اصلا
رحاب: طيب والله والله والله زعلانه منك
نسمه: متزعليش.. حقك عليه
رحاب: بردو زعلانه… تصبحي علي خير
نسمه: ياااابنتي استني
رحاب: نعم
#بقلم_نجمه_براقه
نسمه: متزعليش.. بكره نخرج انا وانتي نتغدا بره واعوضك عن الحفله دي تمام؟!
رحاب : مش تمام اوي ، بس ماشي ، موافقه
نسمه بإبتسامة: ماشي حبيبتي… يلا تصبحي علي خير
رحاب: وانتي من اهل الخير
وائل: ما عنها ما تيجي ، انتي عملالها قيمه ليه
رحاب: انا مش عارفه انت كارهها ليه.. والله نسمه دي عسل
وائل: عسل اسود
رحاب تبتسم: لو عينك مراحتش ناحية ملك كنت قولتلك جرب تقرب منها وانت هتحبها غصب عنك
وائل: احب مين؟!… المعقده دي؟!… ده من سابع المستحيلات..( يتابع بإبتسامة) انما ملك.. جميله .. رقيقه.. دمها خفيف..( يتابع باشمئزاز) مش تقوليلي المعقده دي
رحاب: ههههههههه طيب والله نسمه اجمل منها، بس الفرق ان ملك بتهتم بلبس وشعر ، عكس نسمه بسيطه في كل حاجه
وائل: يابنتي الموضوع مش موضوع جمال ، الحكاية كلها في النيه ، النيه بتبان علي الوش ودي نيتها سوده، بنت حقوده وكارهه نفسها
رحاب تبتسم: طيب تدخل معايا في تحدي
وائل: تحدي ايه
رحاب: انك تتعرف عليها من قريب والتحدي انك متحبهاش و تصرف نظر عن ملك وتطلبها هي
وائل: ده حتي ان وافقت.. دي هتعرف عليها ازاي.. وهي لا بطيقني ولا بطيقها
رحاب: اتحجج و روح بيت عمي بُراق ( تفكر للحظه ثم تتابع بعبث) لا لا مش هينفع حرام
وائل: ايه هو اللي مش هينفع
رحاب: كنت هقولك تخطب ملك علشان تقدر تختلط بيهم وتروح بيتهم كل شويه بس كده هنجرح مشاعر ملك
وائل: ملك مين… وانا اعرفها أصلا
رحاب: متعرفهاش ازاي.. امال ملك اللي عجباك دي مين
وائل: ملك صحبتك… معرفش ملك التانيه
رحاب: يابني مش انت قصدك ملك اللي كانت هنا من شويه
وائل: اه هي
رحاب: اهي هي دي بقا ملك بنت عمي بُراق
وائل بصدمه: ننننعم… مين دي اللي بنت بُراق.. دي قالتلي ابوها شغال في الارشيف
رحاب: تلاقيها بتهزر
وائل: بتهزر… ماااشي… انسيلي المعقده بتاعتك دي… وهاتيلي رقم ملك دلوقتي
رحاب: هتعمل ايه
وائل: ادهوني بس
رحاب: ماشي هبعتهولك في مسج
وائل: تمام ( قالها وذهب بعيدا ليتصل بها ف تجيبه بعد لحظات)
ملك: مين؟!
وائل: حضرتك الانسه ملك بُراق
ملك: ايوه انا.. مين معايا
وائل: طيب ليه التحوير ده… انا وائل ياستي
ملك: ههههههه وائل.. انت عرفت رقمي ازاي
وائل: عرفته من مطرح ما عرفته.. انتي ليه بتحوري عليه ومقولتيش انك بنت بُراق من الاول
ملك: ههههههههه اسفه بس انا بحب المغامرات شويه
وائل : قصدك الحوارات مش المغامرات
ملك بإبتسامة: لا أبداً والله… كل الحكاية اني كنت عايزة اعرف رد فعلك
وائل: رد فعلي ااااها…. طيب لينا لقاءت كتير نعرف رد فعل بعض فيها
ملك بإبتسامة: ازاي يعني ، مش فاهمه تقصد ايه
وائل: هتفهمي بعدين… تصبحي علي خير
ملك: لا استنا… فهمني الاول
وائل: هتفهمي بعديييين..باي
******
#مؤيد
صحيت بالليل مفزوع بعد ما ختمت حلمي بسقوطي في حفره ضلمه بعد ما كنت ماشي وسط ناس وبدور فيهم علي اهلي وبسألهم انتو تعرفوني علي امل ان حد فيهم يقولي انه يعرفني وفي اخر الحلم قبل ما اقع في الحفره شوفت ناس بتضربني فوق دماغي وعقلي قالي ان هما دول اللي ضربوني في الحقيقه، بس المره دي شوفت شكلهم، ايوه معرفهمش في الحقيقه ولا اعرف ان شكلهم كده فعلاً ولا لا، لكن كان فيهم واحد بيحوش عني، وافتكر ان هو ده نفسه صاحب الصوت اللي اتردد في عقلي اكتر من مره وهو بيقول قتل لأ ، بس في حاجه محيراني، الشخص ده مين وليه مانقذنيش لو مكنش عاوزني اموت ، وياترا كان مصيره الموت ولا لسه عايش.
بقيت افكر كتير وكل اللي كان شاغل تفكيري هو الشخص ده لغيت ما جه علي بالي سؤال، وهو ان مش يمكن يكون هو اللي انقذني فعلاً، وبعد تفكير جه علي بالي شريف، وقولت لو اللي اتردد في عقلي صح وان شخص فيهم مكنش عاوزني اموت ف اكيد حاول ينقذني، ف ليه ميكونش الشخص ده هو شريف ولو هو شريف ف اكيد كان يعرفني قبل كده.
افكار كتير جت في دماغي بخصوص شريف والحادثه عمومآ و معرفش اذا كانت صح ولا غلط بس خلتني اقوم من مكاني واروح اوضة ماما اللي لقيتها صاحيه وبتبص قدامها بخوف من حاجه غير مرئيه و وشها عرقان بغزاره ، ف قربت منها ومسحت علي وشها وبقيت اسالها في ايه ولكن مجوبتنيش وفضلت ساكته شويه لغيت ما هديت واطمنت بوجودي، ولما رجعت اسالها مالها قالتلي مفيش حاجه وبعد ما يئست انها تقولي فيها ايه، سألتها علي شريف
#بقلم_نجمه_براقه
سعاد بتوتر: مالو… م مالو شريف
«مؤيد يقص عليها ما جال في خاطره»
سعاد: لا طبعاً مش شريف اللي انقذك ، انا والسواق اللي شيلناك لغيت العربيه ، شريف مكنش يعرفك
مؤيد: وانا بقول كده، بس هي افكار جت في دماغي ف حبيت اسالك
سعاد: ميعرفكش
مؤيد: طيب مفيش اخبار عنه خالص
سعاد: لا ، معرفش عنه حاجه
مؤيد: طيب مش هتقوليلي انتي مبلغتيش عن اختفائه
سعاد بربكه: لانه اكيد مشي بمزاجه، هو كان قايلي قبلها بفتره انه عاوز يهاجر، وانا مدورش علي اللي ميدورش عليه
مؤيد: معقول؟!، ببساطه كده؟!
سعاد تبعثر نظراتها: اه
مؤيد: طيب يا ماما…( يتابع بتردد) اقولك يا ماما طالما حضرتك هاديه دلوقتي، انا كنت عاوز اتكلم معاكي في حاجه
سعاد:
مؤيد: ماما انا والله مش هسيبك حتي لو عرفت مين هما اهلي.. بس نفسي اعرف انا مين، ارجوكي يا ماما
سعاد:
مؤيد: ماما علشان خاطري، انتي ام واكيد حاسه باللي ممكن تكون حاسه بيه امي دلوقتي
سعاد:
مؤيد: ماما ، انتي مبترديش عليه ليه
سعاد:
مؤيد: ماما
سعاد ٠
مؤيد: ماما في ايه ( ينظر لموضع عينيها ويتابع) بتبصي علي ايه
سعاد:
مؤيد: ماما مالك، انتي كويسة طيب، ماما
سعاد: شريف
مؤيد ينظر لموضع عينيها: شريف؟! فين ده
سعاد: اهو مش شايفه
مؤيد: ياماما مفيش حد غيري انا وانتي، شريف مش موجود
سعاد بإبتسامة: بس انا شايفاه ( تنظر خلفه بعينين متسعه ليدير راسه بقلق ف تتابع ) اهو وراك، … عاوز يقتلك
مؤيد ينهض وينظر حوله: ماما متخوفنيش، مفيش حد
نوال تأتي: في ايه ياحبيبي مالك، ايه جايبك هنا دلوقتي
مؤيد: جاي اشوف ماما… انتي شايفة حد في الاوضه
نوال: سلامتك يا حبيبي… مالك
مؤيد: لا مش انا، ماما بتقول ان شريف معانا هنا وانا مش شايف
سعاد: شريف يا نوال… شريف عاوز يقتل انس، بس انا مش هخليه.. هاتيلي المسدس
نوال: انس حبيبي روح نام هي تعبانه ومش عارفه بتقول ايه
مؤيد: هو في ايه يا نوال، انتي تعرفي حاجه
نوال: هيكون في ايه، مانت عارف حالتها، يلا ياحبيبي روح دلوقتي
مكنتش فاهم مالها، وافترضت ان دي هلوثه بسبب الحاله اللي بتجيلها ومشغلتش بالي كتير ورجعت اوضتي مسكت تليفوني اقلب فيه شويه واثناء تصفحي للفيسبوك ركزت مع صور الأشخاص اللي عندي اللي عددهم كان لا يتعدا ال 100 صديق، كانو كلهم حاطين صورهم الا انا محططش صورتي لسبب انا نفسي معرفهوش، وبعد تفكير قررت احط صورتي يممممكن حد يشوفوها ويعرفني ، وفعلا حطيتها ، وبقيت كل شويه افتح واشوف اذا حد علق باي حاجه تخصني ولا لا، ولكن مكنش فيه غير تعليقات من الاشخاص اللي عندي واللي هما زباين المحل وصحاب ماما بيقولو فيهم منور يا انس، وتعليق لندي بتقولي فيه “مين الحلوه اللي انت حاطط صورتك عشانها مقولتلهاش ليه انك خاطب ” ف حذفته ودخلتلها خاص اهزقها علي التعليق ده
#بقلم_نجمه_براقه
مؤيد: مش هنعقل بقا
ندي: كنت لسه هبعتلك علشان اتخانق معاك.. ممكن اعرف مين الحلوه اللي اقنعتك تحط صورتك وانا اللي بزن عليك تحطها من اول ماعملت الفيس وانت مش موافق
مؤيد: حبيبتي التانيه
ندي: انس والله هصدق ، متهزرش
مؤيد: ما تصدقي… طب تصدقي بالله لو انتي قدامي دلوقتي لا اضربك قلمين علي وشك علي التعليق الزباله ده
ندي: متاخدنيش بالصوت وفهمني مين اللي اقنعتك احسنلك
مؤيد: احسنلي؟!
ندي: اه احسنلك
مؤيد: طيب روحي نامي يا ندي الله يهديكي ( بعتلها كده وخرجت من الشات وانا متنرفز منها وهطق وتاني يوم روحت المكتب لقيتها قاعده مكاني ورافعه رجليها علي المكتب وبتبصلي ببرود)
مؤيد: ايه الجنان ده ، انتي دخلتي هنا ازاي ومين سمحلك
ندي تنهض وتقترب منه: ليه ؟! وهو حد يقدر يمنعني ادخل مكتب خطيبي ، ايه؟! خلاص مبقتش طايقني ومش عاوز تشوفني ولا ترد عليه ( قالتها لتمسك ربطة عنقه ف يقف امامها متذمرآ ويتنفس بضيق وهو يشيح بنظره بعيد عنها لتمسك فكه وتعيد وجهه إليها) مش طايق تبص في وشي كمان
مؤيد يبعد يدها: نددددي
ندي ببرود: قلب ندي
مؤيد: متعصبنيش
ندي ببرود: انت اللي بتعصب نفسك وبتجيب لنفسك المشاكل لما بتزعلني
مؤيد: اااااالصبر من عندك يارب قبل ما اخلص عليها
ندي: ااانس متسوقش فيها ، مش عشان باجي علي نفسي واصالحك تتمرع عليه
مؤيد: متصالحنيش تاني، سيبيني اتفلق
ندي ببرود: متهونش عليه (دار وجهه عنها بضيق لتطبع قبله علي وجنته ف يقبض علي عنقها فجأه ويلصقها بالحائط لتنظر إليه بإبتسامة وهي تنتقل بعينيها في تفاصيل وجهه اثناء اقترابه منه)
مؤيد: عاوزه ايه ، ها
ندي بإبتسامة: مش عاوزه حاجه، اااابعد كده ( همت ان تبعده ليثبتها اكثر ويزيد في اقترابه )
مؤيد: اششش اخرسي، انتي اللي بتبدئي
ندي: انا ببوسك بوسه بريئه انت اللي نيتك مش نضيفه
مؤيد: وااااااللهي
ندي: واللهي
مؤيد وهو يقترب منها: طيب ما انا كمان قصدي بوسه بريئه انتي اللي نيتك مش نضيفه
( قالها ليزيد في اقترابه لكي يُقبلها وهو يغلق عينيه وقبل ان تتلامس شفتيهم تتردد في مخيلته لقطات سريعه وغير مفهومه من موقف مماثل حدث من قبل ف تتسارع انفاسه ليرفع جفنيه سريعآ ويبتعد خطوتين للخلف)
ندي: مالك
مؤيد: مش عارف ، في حاجه غلط
ندي: يعني ايه
مؤيد: زي ما يكون ده حصل قبل كده بس مش فاكر، عقلي مش مجمع
ندي تنتقل بعينيها بين عينيه: حصل قبل كده؟! .. يعني ممكن يكون عملت كده مع واحده غيري
مؤيد : معرفش… مش عارف حاجه وعقلي مش مجمع خالص، انسي
ندي: انسا ازاي؟! انت بتقولي ده حصل قبل كده، يعني ممكن يكون في واحده غيري
مؤيد بتوتر: معرفش ، معرفش حاجه خالص
ندي: طيب يا حبيبي مش مشكله
مؤيد:تمام ، يلا روحي دلوقتي عاوز اشوف شغلي
ندي: ماشي حبيبي، باي ( قالتها واخذت حقيبتها وذهبت فوراً دون اضافة شيء اخر بخصوص ذلك ليجلس علي مقعده ويحاول تذكر ما حدث وبعد محاولات كثيره لتذكر لم يستطيع ان يستحضر شيء اطلاقا
