 |
رواية ليلة الحنة الفصل الثالث 3 بقلم بسمة البياتي
_ #لـيلـة_الحنـة _
_ (#بقلم_بسمة_البياتي) _
_ #البارت_الثالث _
__________________
ليال... ماما فدوة الطولج لاتكبريها ماكو شي شوية وتلگيها گدامج قابل جديد عليج سوالف زلال أنتظري بس شوية
.. أگلها گلبي نار اتگول أنتظري مامرتاحة وروح أبوي مامرتاحة
شذى.. عوفيها بلكي نص الطريق وتتلاگة وياها
... رادت تطلع فاتوا علاء وعماد
عماد.. عباتج على رأسج على خير وين طالعة بهالظهرية
... دزيت زلال تجيب النتيجة راحت والروحة روحة
علاء... تفضل شوف سوالفها ومن احاسبها كلها تحجي عليه
شذى... على كيفك هي متأخر راحت
علاء... فوتي يمه اني رايح اشوفها بس جيبولي مي بالأول گتلني العطش
حورية.. اجي وياك
.. وين ابقي بالبيت أجيبلجيها وأجي
.. ما امن بيك خاف تمد أيدك عليها
... لا إله إلا الله مو اني عدوها وخايفة عليها مني
ليال...بهالأثناء فاتوا بابا وعادل أستغربوا وگفتنا بالحوش
بابا من سمع زلال ماكو انخبص حالة امر من حال ماما
راد يطلع يروح المدرستها علاء ما قبل هو راح
وصل للباب دك تلفونة
بالبداية جاوب عادي ثواني وشكلة تغير گام مايعرف شيحجي اشر الـ عماد وطلع شبه يركض
دم مابقى بينا ماما بدون كاف نون صرخت والله بنتي بيها شي بابا وعادل طلعوا وراهم
طلعنا للباب اخواني صعدوا بالسيارة وشخطوها بابا ملحك يروح وياهم فقد گام يركض ورة السيارة وماما گعدت بالگاع تلطم
بيت خالي على الصوت اجوي
خالي والولد بس يريدون يفهمون منه شي مايگدرون
رغد جاوبتهم زلال راحت للمدرسة ولهسة مراجعة اجة تلفون الـ علاء اخذ الولد وطلع يركض وعمي لحكهم مشي
امجد.. أتصل على علاء ميجاوب دك مرة ثانية
صاح هاي وينكم شصايررر؟!
.. مكمل كلامة سكت طلع للباب بـ أستعجال
اهنا تأكدت اكو مصيبة خالي لزم امجد يستفسر منه وماما گابلتة وكل هالحجي بالباب أجة حجي ريسان وگف وياهم هو هم مستغرب وضعنا
أركان أشر گال يابة هذيج سيارة عماد
ومن وصلوا يمنا المنظر ما اتمنى عدوي يشوفة
زلال بحضن عادل وجها احمر مايبين من الدم بابا لأزم ايدها ويبجي
نزل علاء قميصة كله دم فات يركض ماما من شافتها ملخت روحها فتحت باب السيارة وصعدت وياهم
طلع علاء بيدة منشفة ناوشها الـ عادل خلاها على رأس زلال حرك السيارة مشى بيها سريع
خالي وولدة لحگوهم بسيارتهم
كل هذا واني واكفة على صفحة عيني تفتر بينهم راحوا وبعدني على نفس وكفتي ما وعيت غير لمن لمى سحبتني من ايدي دخلتني جوة
الجيران القريبين كلهم واكفين بابنا يستفسرون
بيتنا انگلب عزا خالة كوثر وخالة فردوس لحگوهم للمستشفى
لمى.. بشهكة وبجي ليال ليش ساكتة الله عليج مو وكتها إنتي هم تخوفينا
... ششفتيها سابحة بالدم جانت ماتتحرك
ماتت موووو احجي وابجي بصوت عالي
.. لا اسسسم الله الله لايگولها
شذى.. گولي يا الله لاتفاولين عليها عايشة مابيها شي منا لشوية يجيبوها ويجون
... منين سمعتي هما گالولج لو دتحجين هيج حتى طمنيني
فاتت وصال حضنتني نبجي اثنينا
هسه حسيت بـ ماما من گالت گلبي نار
بهالحظة گلوبنا محترگة حرگ الوقت مايمشي الدقيقة تمر علينا دهر
نخابر محد يجاوب زاد الخوف عدنا ليش ميجاوبون ليشش لطفك ربي
ورة وين خالة فردوس ردت صوتها مبحوح. گالت لاتخافون مابيها شي رإسها هواي نازف ضروري تبقى بالمستشفى تحت الملاحظة
أبد ما قتنعنا بحجيها نبرة صوتها اتگول عكس هالكلام
بيبي اجت يمنا تنوح وتبجي خفنا لاتتخربط وين نحير بيها والولد كلهم مو هنا
گنالها خابروا طمنونا الحمد لله مابيها شي لاتخافين جرح صغير برأسها
صار المغرب واحنا على نفس حالنة والجيران يرادلهم گلب ممدشن يجون دك سوالف ويريدون نأخذ وننطي وياهم
احنا بيا حال المي ماحطينا بحلگنة وحدتنا اقل دفعة توگع من طولها
انطينا علاج البيبي خطية وأخيراً گدرت تغفة
وصال جانت تخابر من نهت الأتصال عيونها دم فاتت للغرفة لحگنها
گاعدة بنص الگاع عاضة أيدها وتبجي بحرگة
گعدت گبالها لساني ميطاوعني اسأل شسمعت وهيج انهارت
لمى.. وصال زلال بيها شي بداعة جهالج احجي لاتسكتين
وصال... عزززززا بعيني ششحجي زلال لهسة مگاعدة فاقدة مخليها بالأنعاشش ولكم سسسمعتوا ششحجيت زلال بالانعاش
ليال.. سديت أذني وصرخت كاااافي لاتكملين
بسرعة رغد خلت ايدها على حلگي قبل لا بيبي تسمع
رغد... ما اوخر اذا ماتسكتين بيبي نورية اذا سمعت تروح بيها
... هزيت راسي ودموعي تجري
شذى... وليد مگالج ليش هيج صاير بيها مدعومة لو شنو والأطباء شيگولون على وضعها؟
وصال... بنبرة أنكسار رايدين يخطفوها
... كلنا بهتنا صحنا بصوت ششنو ششجاي تحجي
شذى... يمعودة كملي منو وشلون
وصال... سيارة بيها اثنين يم الساحة رايدين يخطفوها عمال ديشتغلون بيت قريب سامعين صوتها طالعين السا... من شايفين العمال ذابيها على كوم بلوك وطابوك ومنهزمين الوكعة قوية الضربة جاية بنص رأسها
رغد.. يعني ممسويلها شي
... لا الحمد لله مملحكين
واحد من العمال من المنطقة صديق علاء
عارف هاي اختة متصل علية
شذى. .. والمجرمين وينهم لزموهم لو لا؟
... گايلين ملحگنة صعدوا للسيارة ونهزموا
رغد.. زين الرقم الصخام مأخذي لا
.. ما أدري ما سألت اني بيا حال منا وضع زلال ومنا ابوية وأمي اثنينهم متخربطين
اريد اروحلهم وليد ميقبل يگول المستشفى هوسة
ليال.. الله عليج گوليلي اكو إمل تگعد
... بقت يم رب العالمين ان شاء الله الخاطر كسرة امي وابوية مايفجعهم بيها وترجع تفتح عينها
... اوووويلي ربي ااااخ البارحة أجت نامت بحضني أخير كلمة گلتها الي أحبج
اذا صارلها شي اموووت مرادت تروح بالقرآن مرادت ماما جبرتها
شذى... اششش لاتكملين هذا قدرها عمة شعليها أكيد هسه دتلوم بنفسها اذا سمعتج تتأذى أكثر
وصال.. . كلامها صح لزمي لسانج
... عفتهم رحت توضيت صليت ولزمت القرآن اقرأ
بلكي گلبي يبرد وأرتاح
ساعة تسعة وليد وخالي ومرة خالي جابوا بابا وماما سودة عليه شحالهم بالگوة يمشون العيون مورمة من البجي
ماما مثل متوقعنا تاكل بنفسها وتلوم بروحها
وبابا لأزم گلبة ويون عليها
وليد گال بالگوة جبناهم بلكي يرتاحون ويأكلون لكمة
جبت عشا صبولهم
خلينا الأكل محد مد ايدة نتوسل وماكو فائدة
بابا فرش السجادة يصلي ويبجي كمل ظل گاعد وبيدة السبحة دموعة مانشفن
وماما بعالم ثاني تصفن وترجع تضرب على رجلها وخدها وتصيح اني الدزيتها
مرة خالي انطتها القرآن گالتها قري ترتاحين ويبرد صدرج
للساعة وحدة باليل هذا حالنة وعلى نفس گعدتنا لهناك وطب وليد صاح عمي گرت عينك گعدت عزيزة گلبك عمة گعدت زلال والله گعدت
بابا وماما اثنينهم نزلوا سجدوا من الفرح يبجون بصوت عالي
محمد...شوكت تجي
.. الوكت متأخر لأزم تبقى ويسوولها فحصوصات والله مابيها شي لايظل بالكم
حورية. اخذوني الها ما ابقى اهنا
ليال... اشگد حاولوا يمنعوهم مافاد تالي اخذهم وراحوا
زلال... وجع برأسي مينحمل عيني ما أكدر افتحها
اسمع اصوات ما اميزها
ورة شوية اجاني صوت عادل اخوية من سمعت صوتة حسيت بطمئنينا وگلبي ارتاح
بعد فترة فتحت عيني خالة فردوس يمي
من بديت اوعى وأكدر احجي عرفت اني بالمستشفى اذكرت الصار بية من جروني للسيارة بيني وبين الضياع شعرة
بهالحظة أجتني رحمة ربي سخرلي العمال من سمعوا صراخي طلعوا من البيت
الأنذال من شافوهم من بعيد بكل قوتهم دفعوني للگاع انضرب راسي بشي حاد وقوي شوية شوية بديت افقد وبعد مدريت بشي
عيني أدور على بابا وماما اريدهم وينهم
سألت خالة عليهم گالت بالطريق هسه يجون
من شفتهم روحي ردتلي عبالي بعد ما أشوفهم وانحرم منهم
بقيت بالمستشفى الثاني يوم هواي سوولي فحوصات الرأسي أريدهم يطلعوني أكره ريحة المستشفى
ماقبلوا گالوا أصبري اليوم هم ثالث يوم يلا طلعت
ليال.. واكفين ننتظر جية زلال خالي وبابا كل واحد جاب خروف يذبحوا على سلامتها ويوزعوا للفقراء
گالوا أجتي نزلوها من السيارة علاء شايلها بعدها لهسة دايخة ووجها اصفر تباوع علينا وحدة وحدة
ماگدرنا نسلم عليها لان هوسة من دخلوها جوة يلا تقربنا منها وأخذناها الحضنة ارتاحت شوية وبعدها استلمت ماما
...هاا سمجة شفتي شصار بية اگلج ما أروح اتگولين غصب عنج تولين
... ساعة السودة لو مگصوص لساني ولا دازتج غصب
.. طلعت ناجحة حتى لاتطمغيني وتهددين تضربيني گدام الناس لو ميتة جان جابولج شهادتين شهادة النجاح وشهادة الوفاة
... يومي گبل يومج الله يأخذ عمري على هالدكة
زلال... لا اسم الله عليج فدوة اروحلج يلا لاتنقهرين راضيني بهدية وأنسى
.. صيري زينة أخذج للسوك التأشرين عليه اشتريلجيا
... خوش حجي وعندي شروط
فردوس... ههههههه وگعتي بيد الماترحم شراح يخلصج من طلباتها وشروطها منا السنة راح تتذكر الصار وتلومج علية
... خليج محضر خير خالة سكتي خليني مستغلة الوضع
وصال... عاد محد يلحگج بهالامور استاذة
زلال.. دكافي خلي احجي مو راح انسي
شوفي سمجتي بعد ما اريد تحاسبيني على النجاح ترى الدنيا ماتسوة
... يا ماما غير رايدة مصلحتج اريد افرح بيج وبتخرجج
... مو اذا تبقين تلحين راح اتخرج من الدنيا
... بسسس زلال لاتحرگين گلبي
... شسويلج غير انتي متغيرة عليه من صار عندج احفاد حبيتهم وفضلتيهم عليه هما الهم الدلال واني الي الرزايل
... محد يأخذ محبتج انتي قطعة من روحي وگلبي
شذى... والله عرمة انوب اندارت على جهالنة
...هذا الحجي الج والوصال ضبوا جهالكم مو انتوا امهاتهم شكو مشاركيني بأمي
نورية...لو لسانها مضروب بدال رأسها جان زين من گعدت لهسه مابقت احد يتعب عليها
يمه المريض ينام يرتاح مو يدور سوالف عتيكة
.. اي صح تعبانة يلا الخاطرج راح انام
ليال...من خف الأزدحام على زلال واكثر البنات راحن يساعدن بالطبخ
جيت تمددت بصفها وحضنتها فتحت عينها وضحكت
... والله زمن انتوا ادورون حضني مو اني اركض ورأكم اي ست ليال بس لا أنتي هم نسيتي شلون بالگوة خليتني أنام بصفج هذيج الليلة
... يبوووووو علينا ترى اني مو ماما تاكليني حاصل فاصل مششتاقتلج عوبة الغرفة مهجورة بدون وكاحتج
...ممم حتى تعرفون قيمتي وبعد من اگلج خلي العب بشعرج ماتضوجين
... عمي توبة بطلت ماضوج والله ماأضوج
اوووف زلال والله روحي راحت من شفتج سابحة بالدم
... يلا بالريش الحمدلله عدت وراحت
اگلج مينا واهلها رجعوا من النجف لو بعدهم كوومة مشتاقتلها. العوبة
... لا ما اعتقد لو جايين اول الناس يجون يتحمدولج بسلامة
... هاا اي صح
اركان..الله بالخير شلون صرتي
... من اشوفة لا أرادياً أبتسم
الحمدلله من الله بخير
... ادري بيج مثل البزونة بسبع ارواح واني كيفت عبالي راح اضرب لحم بفاتحتج
ليال.. اركااااان اسسم الله بيش طالبها عابت حتى عابت الي يسمعك يگول محروم لحم
... جاي احاجيها شكو تكمزين من يمج قابل ماكل بفاتحتج
زلال... ليش ماتتوكل انت واحنا نترس بطونة بفاتحتك
.... شوفي لسانها عمي اني المريض مو هي
ليال. .. مالي خلگ مداهركم اگوم اساعدهم بالطبخ احسن
اركان... خفتاً وراحة
اي زلولة راسج شلونة خوما يوجعج
.. معليك بي قبل شوية جنت تريد تاكل بفاتحتي
.... دنجبي جاي اشاقيج لا تصيرين حقنة
وين تولين وتعوفينا شيسوة بيت عمتي بدونج
... حرت وياك ما أعرف صدگك من شقاك
... لا جديات بربي خفت عليج اسأليهم ظليت بالمستشفى علمود شگولتج
... يا امة الأسلام تنقص شي اذا كملت جملتك بدون مغثة
... بصراحة وياج ما أكدر وداعة هالخشم
... گرص خشمي دفعت ايدة
شششبيك شاد ويا خشمي مو كرهتني بي
... غير حلو يعجبني اگرصة
يلا رايح محتاجة شي
.. سلامتك عافني وطلع بالقرآن هذا الولد حيرني ساعة يضوجني ساعة يمدح ساعة يتغزل أريد افهم اني شنو بالنسبة اله ما أعرف
على گولت ليال اكيد يعتبرني مثل أختة هالشي ميقبل غلط
ليال.. طلعت للمطبخ سمعت عمتي تسأل ماما
على ذولة الرادوا بخطفون زلال
... جان بلغتوا الشرطة وانطيتوا اوصافهم
... نفس اليوم بلغنا والشرطة سألين العمال گايليلهم مو من المنطقة ما نعرفهم وما گدرنا نميز شكلهم لان بسرعة صاعدين للسيارة
... والرقم ممأخذي؟
.. لا گالوا ملحگنا يمعودة حتى لو مأخذي ويعرفوهم هم مراح يحجون وكتنا مو خوش وكت الناس تخاف من العداوات وكلمن يگول ياروحي خصوصاً هما عمالة وشغلهم اهناك
مايريدون يجبون شبه على روحهم ويفتحون عين المايخافون الله عليهم
... حجبج ذهب على گولتج هسه گاعدين ببيوتنا وقافلين بوبنا وهم ممأمنين
الحمدلله الله حمى زلال منهم
... (باست ايدها وجه وگفى) الف الحمد لله
الشرطة حجوا ويا زلال قبل لانطلعها من المستشفى انطتهم اوصاف واحد منهم والثاني ماگدرت تميز شكلة لان مجتفها من ورة
بلكي يلگوهم ويخلصون الناس من أمثالهم
... ان شاء الله
ليال... خطار رايحين جايين تعبنا مانعرف طعم الراحة غير وقت النوم
اخواني راجعوا بزلال طبيب اختصاص جملة عصبية والحمدلله الفحوصات نظيفة
لمى... زوزو احزري منو يريد يفوت يشوفج
... بفرح مينا رجعت
... لا مو مينا حجي ريسان هو والدة بالأستقبال
اترخص من عمي يريد يشوفج
رغد.. ولج والله لو تشوفين حالة انكسر ظهرة عليج يومية يجي يسأل صدك لو گالوا البزون يحب خناگة
... ابتسمت عدلت گعدتي خلي يفوت
طب وجهة يضحك باسني من رأسي وگعد بصفي
... شلونج يابة الحمد لله على سلامتج
... الله يسلمك حجي گالوا حجي ريسان خايف عليج ومشتاقلج
...اي شلون أنتي مثل بنتي ولو مرات الله يچلبج
... اني مجلوبة خلف الله عليك
... مرات مو دائماً
جبتلج شلون عنب ورمان تازة گطعتهن من الشجر البحديقتي يستاهلن حلگج
... بربك حجي احد گايلك محرومة عنب ورمان شو احنا هم عدنا بالحديقة حرك جيبك المن ضامهن شدات على گلبك تاليهن يروحن الأصحاب النصيب وأنت ظل اقتصد
... غراب البين بيش طالبتني لا بارك الله بالسانج
وهاا شفتي شلون أشور لا عبالج نسيت من فشختيني
.. عزززا جاي تشمت بية ولا غزرت بيك الكيكة
... ما رايد منج شي لا خلفت عليج
... هيج صارت بسبطة ليال مسوية كيكة وكومة اكو حلويات جابوهن الي فلا انطيك منهن
... قدمولي من جنت بالأستقبال
... ماشي حجي ماشي واني خابصة نفسي وگاعدة افكر بمصلحتك وجاي ادورلك عروس
... هااا منو هي
... شو گلبت وحتى نبرة صوتك تغيرت
لا تباوع صفح مو ليال
... گاعد تقشمريني مو
.. لا لا شنو رايك بـ بيبي نورية شوفها جنها غزالة تلوگلك ومنا هي متعقدة من الزلم راح تمشيك على الصراط المستقيم
اشو هذا صفن على بيبي وگام يلعب بلحيتة عزززا بس لا صدگني اااخ منك يالساني والله بيبي لوتسمعني تنعنع ضلوعي
من طلع حجي ريسان استلمتني ماما
... موعيب اتگولين للرجال هاي شجايب وحرك جيبج
هسه شيگول علينا فگر وموتينج من الجوع
فوك ما تشكري زين من عندة جاي يطمئن عليج
... رجعت حليمة العادتها القديمة مو على اساس بعد متحجين عليه ولا ترزليني بعدني بالفراش ورأسي ملفوف گلبتي عليه لعد من اصير زينة شسوين
مينلأم الي گال ابو طبع اسأل عن سلامتة
... سوالفج تبط المرارة وتحجي الأخرس
.. سسسكتت بعد ما احجي حتى ترتاحين
سكتت شوية وجان اندار على بيبي
بيبي حضري نفسج يمكن منا اليومين يجي حجي ريسان يخطبج
فردوس... مو گلتي راح اسكت شحجاج
... اي هو سكتت بس هالمرة احجي ما أريد بيبي تنصدم
حورية... شمصخمة انوب هواي تبسبستي ويا
... ما حجيت شي بس گتلة شنو رأيك اخطبلك بيبي نورية
ماعون فواكه گدام بيبي ضربتني بالتفاحة هم زين ما اجت براسي على الجرح
شبعتني غلط من تعبت صاحت جيبولي علاج الضغط صعدت ضغطي
ورة يومين متمددة بحضن ماما
رغد من دراسها للصالة گالت زلال شوفي منو أجتج
رفعت رأسي مينا وخالة ام انس وجنتهم يبووو اشگد مشتاقتلها اجت سريع حضنتني وتبجي
... ياعمري هاي شصاير بيج
... انجبي على اساس هلكد مهتمة ابوية الجان زعلان وميحاجيني
خالة تقدمت علية بوستني
گعدنا شوية وياهم بعدين اخذت مينا وفتنا للغرفة
مينا... ما گدرت احجي اهناك والله مزعلانة بس ضايجة لان راح افارگج تمنيت تصيرين الأنس وتجين ويانة
... هوووب هوووب دوسي بريك اووكفي شنو تفاركيني شنو تجين ويانة شجاي تمسلتين
... بحزن زلال اهلي باعوا البيت راح نرجع للنجف
... هاي شششوكت شو محد يدري وابوج هسه حن للنجف صارلة عمر اهنا
.. اي هو يگول كبرت وولدي كبروا اريد ارجع المحافظتي بين اهلي وگرابتي لشوكت انظل اهنا مقطوعين من شجرة
... دموعي نزلن لو مجاية احسن ولا جايبتلي هالأخبار واني شسوي بدونج وين أگدر اتحمل فراگج وأنتي صديقة طفولتي
... والله حالي نفس حالج بس شسوي هذا قرار ابوية واخواني ايدوا ليشش موافقتي على انس ليش
... شوافق كل عقلج اعوف اهلي واعيش بغير محافظة امج ليش مگالت هالكلام من اجت تخطبني فرضاً وافقت
... مقررين من تم الموافقة وتصير گعدة ابوية والزلم يحجون ويا اهلج ويقنعوهم
... تحسرت يعني هاهية راح تروحين وبعد ما اشوفج
... راح انظل نحجي بالتلفون وانتي كلما تجين تزورين نتشاوف بالأمام
... ما اگدر اسيطر على دموعي صار عندي وجع براسي من القهر
... انس من سمع الصاير بيج تخبل لو يندل عنوان ذولة المجرمين يشرب من دمهم
... بهتت هااا انس شمدري بالصار بية
... ما ادري منو گايلة
... صفنت معقولة اخواني لو ولد خالي حاجيلة
لان محد يدري ردت انخطف الكل من سألوا گالولهم من راجعة من المدرسة دايخة من الحر وواگعة
... هااا وين صافنة
... ماكو شي شوكت تشيلون
... قبل لايبدي الدوام
... لج عوبة مو تصادقين غيري وتنسيني
... ابد والله مستحيل انساج
مينا وخالة ام انس گعدوا. شوية وراحوا بقيت ضايجة ومختنكة مجاي اكدر اتخيل ما أشوفها بعد
قبل المغرب سمعنا صوت صياح بالحوش طلعنا نشوف شكو
امجد وأبن عمي متلازمين واحد واگع للخ دك بوكسيات ليال واكفة تبجي
طلعوا الولد بالگوة فاككوهم
رائد... لو اعرف انهي عليها وما أخليك تأخذها
امجد... لك يا عار الزلم اخذ منو لاتجيب طاريها على لسانك ياسگط
بابا وخالي صاحوا بيهم سكوتهم
خالد... فوتوا جوة لاتفضحونا گدام الجيران
... بالمدافع فوتوهم
بابا سأل شصاير
نط رائد بنت عمي ورايدها محد اله حق بيها أكثر مني
علاء كمز علية لزمة من ياختة وهم صار ملاطخ وبالف يا الله بعدوهم عن بعض
بابا سأل امجد علمود شنو تعاركتوا
... فتت للحوش لگيت هالعار ساد الطريق على ليال
حجيت ويا مثل الاوادم گتلة اطلع من الحوش واذا تكرر هالمنظر ادفنك اهنا
شو هذا گلب الأمة بنت عمي وأريدها ولا عبالك تأخذها
... رجعت الهوسة من جديد واخواني هالمرة كلهم هدوا على رائد بالكوة بابا وخالي وعمي ابو رائد منعوهم
هذاك غير يسكت ماكو خبص الدنيا اريدها. وأريدها وماتصير الغيري
عمي بدال مايسكتة يگول البابا ليش ماتنطي ابن عمها احق بيها من ابن خالها
محمد.. جم مرة حجينا وگلنا ماكو قسمة ليال مموافقة خوما اجبرها هذا زواج عشرة عمر مو لعب جهال
رائد.. ماتريدني خووش خلي الكل يسمع ليال اني ناهي عليها وفنة اليوصل بابكم ويأخذها
علاء... صاير رجال وتنهي ششو تعال
... يبوووو علاء وعماد لزموا رائد ووين اليوجعة الحد ما خلصوا من ايدهم صار جنازة
عمي اخذة يسحل بي وطلع زعلان
ليال فاتت للغرفة مگطعة روحها من البجي
لمى... بس لا خفتي من تهديد هذا المخنث لج بنتي المثلة ميخوف دجاجة
ليال... زهكت وطگت روحي ما اريدة خوما كوة
وكف كدامي بالحوش اريد افوت ميخليني احبج وامووت عليج واخذج يعني اخذج
من امجد تعارك ويا عبالة بينا شي
زلال.. شيفكر خلي يفكر طز بي المهم انتي تعرفين نفسج
... خايفة من عندة لا من صدك يدمرني ويظل طول العمر يلحكني
.لمى...لاتخافين عگب هالگتلة بعد ولا يستجري يجيب اسمج على لسانة
احس هذا اليوم كلش مشؤوم طلعوا علاء وامجد باليل من رجعوا الوجوه متبشر بخير
محمد... علاء ششبيك بس لا رحت تعاركت ويا ابن عمك بشرفي اذا مسويها ما ابقيك بالبيت
امجد.. لا عمي الموضوع مو يم رائد
... لعد شصاير ليش وجوهكم مگلوبة
علاء... مؤيد العامل الشاف زلال من رادوا يخطفونها
... اي شبي
... الكلب حاجي الشباب المنطقة والكل صاروا يحجون بالسالفة.....
