 |
رواية ليلة الحنة الفصل الثاني 2 بقلم بسمة البياتي
#لـيلـة_الحنـة
#
#البارت_الثاني
__________________
... هااا يعني مو انتي المقصودة خووش
زين أم انس ليش اجت تخطبج الأبنها؟.
... فكيت عيني وحلكي فهيت هاا شوكت أجتي!
... هم گولي ما أدري
... حيل زودها طگت روحي
ووومنين أدري ششنو عايشة بنص بيتهم لو سارحة بيهم كافي عاد ماماااا لشوكت تبقين ساكتة دتسمعين كلام ابنج لو لا.؟!
... على منو جاي تعيطين ليش تخليني اكسر سنونج بنص حلگج
حورية...علاء جوز منها ردت تحجي وياها وحجيت كافي يزي عاد لو كل بنية من يجوها خطابة اخوانها يفتحون تحقيق ويشكون عدها شي ويا الولد الناس بعد تبطل متزوج ومحد يروح على أحد
زلال... اختنگت بعبرتي كمت اريد اطلع فات عماد
عماد.. شصاير من باب الحوش سمعت صوتكم
... ردتها من الله احد يحجي حتى اطلع
الـ بگلبي عبالك قنبلة وانفجرت بجيت بصوت عالي حضنت عماد ودموعي تزخ
... منو وياج ليش تبجين لك علاء شمسويلها
علاء...سوالف الزعل والبجي ميوكلن خبز عندي خلي ترجع المكانها وتجاوبني لا اجرم بيها
حورية..الله اكبر بعد منا وجاي نمنع الناس ادك بابنا وتطلب وحدة من بناتنا حتى ترتاح
عماد... منو جاي على منو فهموني؟؟؟
.. ام انس العصر أجت طلبت زلال لأنس اخوك سمع ثبرني ثبيرة ليش اجتي وشمعنى زلال
زلال.. وخرت رأسي من حضن عماد حجيت بشهكة لا مو بس هاي علاء جاي يتهمني عندي شي ويا أنس ويگول الموطا انذبت ألج
علاء راد يگوملي ختلت ورة عماد
وماما صارت گدامة
ماما تعضلي شفتها تريدني اسكت علگت بينهم
شوية ويضاربون
عماد.. وصلت بيك تتهم عرضك لك شوكت يصير برأسك خير وتبطل شك
شلون تقبلها على روحك حاط اختك وتحقق وياها لو اختك عوجة مجان اجو طلبوها على سنة الله
علاء.. لاتحجي شي مصاير ماتهمتها سألتها بهدوء غير تنجب وتجاوب مثل الأوادم
... تعال فهمني شلون استنتجت الزقنبوت انشمرت الها
... من طلعنا لمحت خيال من جوة بابهم
... طاح حظك وحظ تفكيرك المريض
لان أنت اعوج وشكو وحدة عوجة مصادقها صرت تشك حتى بخواتك
زلال... شفت المشكلة راح تكبر بينهم
وجهت كلامي الـ ماما
بلغي خالة ام انس رفضي گوليلها زلال مموافقة
عفتهم يتصايحون وطلعت
ليال... ليش ما گتيلة مينا دزتها واخوها مستحي يدك الباب ذابها من السياج
.. بله ماتسكتين هو بغير شي خبل ومايتفاهم بس لا عبالج اذا حجيت راح يقتنع بهذا الكلام الـ مثلة الشك معشعش برأسة لو احلفلة بكل الكتب والمقدسات مراح يصدگني
... هاا اي والله صح
من يجي بابا لاتحجين شي مانريد مشاكل
.. الخاطر عماد راح اسكت لان مقصر بي
.. گوليلي رفضتي انس خوف من علاء لو انتي ماتريدي
.. لا شجاب الخوف بالنص أنس مو فارس احلامي
.... تهي بهي على اساس فارس احلامج ميت عليج هزيت ايدي عفتها وطلعت
... ظليت بالغرفة زعلانة
وكت العشا بابا دز ليال عليه ادري اذا ما أكوم وياها راح يجي للغرفة
هم زين علاء مموجود طالع
ورة العشا ماما گالت البابا اجو بيت ام انس خطابة على زلال
محمد.. وينها وين الزواج خليها تكبر وتوعى ما اريدها بهالعمر تنكفخ بالمسؤولية دام خشمي يشم الهوا رايدها تشبع دلال
... اشكد حبيت كلامة عيوني لمعن فرح حضنتة
بابا حبيبي الله لايحرمني منك ومن حنيتك العدها مثلك شسوي بالزواج
محمد.. لا بابا لازم يجي يوم وتزوجين هاي سنة الحياة اني مدايملج
بس مو هسه أول شي اريدج تأخذين شهادة وتعتمدين على نفسج
حورية.. دخلي تطلع من الثالث بالأول
زلال... بمشواري الطويل هي سنة وحدة الرسبتها بثاني متوسط راح اتظلين طامغتني بيها والله حرام اشو متحجين على ليال مو هم عدها سنة رسوب لو اني راس أبوية أگرع
حورية.. هاا محمد اشو تضحك عجبتك سالفتها
... والله يامرة سوالفها عسل على گلبي الرسول وصفهن ( المؤنسات، الغاليات)
... عليه افضل الصلاة والسلام
عاد هي گول وفعل مونستك كل مصيبة تسويها شكبرها وانت مكيف عليها
ليال... باوعت الزلال بغضب لج عوبة ليش اني شوكت رسبت ترى تركت سنة بسبب الوضع مو راسبة لان كسلانة
... اي نفس الشي المهم رسبتي
...ما اناقشج الحجي وياج ميفيد رايحة انام
... الحمدلله انسدت سالفة انس والموطا الگشرة
مينا گالبة خلقتها علية من يوم بلغناهم بالرفض اخابرها تحاجيني كلمتين تترخص وتسدة حتى على حنة أبن خالي ما أجتي عفتها براحتها
أدري ما عدها صديقة غيري تزعل شوية وتالي ترضى
الحنة صارت تجنن شبعنا رگص وونسة
ثاني يوم العرس بالقاعة الحاضرين ماكو غربة اقاربنا وأقارب العروس لان ما شاء الله أمجد وعلاء لوبيدهم حتى احنا البنات يمنعونا من. الروحة
طول الحفلة عينهم على ميزنا ياويلها التتحرك من مكانها
لمى.. والله ميصير هيج تكسرت من الگعدة أريد أكوم افتر ارگص اصخم
ليال...بيج زود گومي دشوفي أمجد شلون عينه عليج
... صدگتي راح اگوم الله وكيلج اني وحدة بوخة ماكو فعل بس حجي
مابية حيل يزعل انوب شيقنعى
زلال... جديات لمى شلون تحبين أمجد قحط زلم لج بابا هذا مايتعاشر
... انجبي وين اكو بحنانة ترى غيرتة وخوفة من حرصة علينا هالشي يزيد رجولتة مينقصها
... بالخير عليج الظاهر تحبين تگومين بكفخة وتنامين بكفخة
... لا والله مستحيل يسويها ويمد ايده حقج الظاهر متعرفي
... وهل يخفى القمر شو من فتحت عيني للدنيا هما گدامي بس باقي يجي يعيش بنص بيتنا محد خرب عقل علاء غيرة
... وليش متگلبيها وتگولين علاء، هو الخربة
...غراب يگول لغراب وجهك اسود
... ديلا عيني على الأقل احسن من ابو عين الزايغة شوفي شلون مگابل بنت خالة العروس
.. تحسرت وشسويلة
... ايباه شوف البراءة على أساس ما أعرف گلبج يتكتك عليه
... خلي يولي ميستاهلني
سكتنا ثنينا جنت ضايجة وهسه ضجت اكثر طلعت مو بس اني منتبه على اركان عينه تلحك بنت خالة العروس
ورة شوية اجة گعد يمنا
أركان... لمى شايفة ذيج البنية اذا جبتيلي رقمها ألج هدية دسمة
لمى.. عشششتو هاي العايزة اركض ورة البنات اخذ ارقمهن الحضرت جنابك بطل هالسوالف وركز بـ متحاناتك والله اذا هالسنة هم رسبت خالي يعلگك بالبنكة هاي ثالث سنة ألك بالسادس
... طاح حظج عود ردتج عون
زلولة ادري بيج گدها بشرفج صادقيها وجيبي الرقم
... نترت بغضب واني شششعلية عاجبتك روح بنفسك اخذه
... وشكو متعصبة
... لا متعصبة ولا بطيخ
... ما اريد لا خلفت عليكم اني أخذه
صدك شنو رايكم بيها بربكم مو أحلى من هاي البومة
... ادري بي يحب يداهرني بس مو بيدي انهضمت من حجايتة ويمكن بسبب الغيرة صرت حساسة حالياً واحد اذا طخني ابجي
لمى.. عابتلك شجاب الجاب هذيج طامسة بالمكياج
ليال... گوم منا شعندك مگابلنا
اركان... هم صدك شعندي مگابل ثلاث بومات
لمى... زوزو لاتضوجين مو تدرين بي دهري انتي بالذات يحب يضوجج
والنبي تخبلين معليج بكلامة
... العبرة خانكتني اذا احجي راح أبجي بقيت ساكتة
الحد ما خلصت الحفلة طگت روحي
ومن يومها كمت اتجنب اركان اذا يفوت المكان ما ابقى بي ومن عرفت ورة العرس ماخذ رقم البنية وديحاجيها كرهتة بالزايد حتى حجي ما احاجي بس الكلام الضروري على گد السؤال والجواب
قبل النتائج اعصابي مشدودة خايفة وضايجة
ما أعرف شسوي أريد شي التهي بي وبنفس الوقت افرغ شكو طاقة سلبية عندي
رحت الأبن خالي أصغر مني بسنتين طلبت منه يسويلي مصيادة من هاي ام لاستيك وخشب مثل القوس مال ايام زمان
أحمد.. شسوين بيها
.. ضايجة اريد اصيد عصافير
... اركان عندة كسرية أجيبها الج
... لا خلي يولي ما إريد شي منه
تعرف تسويها لو لا؟
... اي أعرف
... خوشش أريدها جبيرة ومن تجيبها لاتخلي احد يشوفها
... ماشي
.. ثاني يوم جابها الي الظهرية الكل نايمين طلعت للحديقة خليت كرسي وتعلگت مثل القردة على الحايط ختلت بين اغصان شجرة النبگ
باوعت حجي صجمة گاعد بالفي
عفية رجال بعز الصيف وظهرية مايفوت جوة وجمالة گلاص الجاي بيدة
الناس على المبردات والتبريد ومحموسين وهذا ولا يتأثر حط الگلاص بالگاع خلى ايده على خدة وغمض
شلت حجارة نشنتها علية وضربت وگعت بصفة خطية فز يدور بسرعة ختلت
امداني ولا اعرف انيشن عدل هو بهالعمر ويجيبها فيت بالمكان اليريدة
خبلتة اضرب وماتجي بي وهو يعيط ويغلط
اخير شي اجت بگصتة اشو هذا عاط خلى ايدة على وجها وتمدد بالگاع عززا بعيني هي حصوة خوما طلقة شجاه نزلت اركض طبيت جوة ضميت المصيادة بملابسي وختلت بفراشي المشكلة نعست ونمت ولا أدري بعد شصار
گعدت العصر شميت ريحة كيك رحت للمطبخ
الله اجة بوكتة جوعانة
ليال... ناس تتعب وناس على الحاضر تأكل
... محد جابرج تسوين لهذا سدي حلگج وسكتي
رغد...لج دريتي
.. خير شنو
.. احمد فاشخ ححي ريسان ومطلع دمه
... اختنگت بالكيكة عززا جنت ناسية
شمدريج احمد ضاربة
.... شايفين مصيادة بيدة
..... عزززا خطية
... اي والله خايف من الدم واكع متخربط
... منو خايف من الدم
... غير حجي ريسان
... هااا اي وهسه شلونة
.. مابي شي جرح صغير
.. لعد شكو متخربط
... مو داگلج رجال جبير مهبوط وهو يخاف من الدم مامتحمل واكع
... بعدنا نسوالف اندكت الباب قوي راح عماد يفتحها فات حجي صجمة ملفلف گصتة عبالك مضروب صاروخ ظل يعيط ويصيح يريدون يفهمون شي ميكدرون ماما طلعت
من شافني مديت راسي صاح
اليوم انعل والديج
عماد... خليني محترمك ديربالك تعيدها لو سامعها من غيرك اطلعة منا جنازة
... انتوا خليتوا بيها احترام بيكم خير ربو هاي الجنية كلمة ورد غطاها جيبو عمامكم ونجيب عمامنة كل قطرة دم نزلت من راسي راح تتحاسبون عليها
حورية... وبنتي شدخلها بدمك شششبيك شايش فوك رؤوسنا
... كل المنطقة تشهد هي هددتني واني لمحت الطابوكة انشمرت من بيتكم
زلال... طلعت وكفت گبالة
مع الأسف عليك حجي ابد مامرجية منك شلون تتوقع اضربك وانت تدري بية اشگد احبك واحترمك وانت مامحلفني حبك يكمز بگلبي منا ومنا ويلعب جوبي
... لا حب ولا بطيخ اسويها گعدة يعني اسويها گعدة وافصلكم
عماد... لا اله الا الله اي والفصل ننطيك مرة موو
... ما اريد الوكحة هاي تموتني نفس اليوم احذ ليال خوش تطبخ
حورية... شتحطلها وطيب هسه هذا شتحجي ويا
زلال.. مقهورة منك حجي واني الثولة من سمعت بيك مفشوخ شبعت بجي ووصيت ليال تسويلك كيكة ادري بيك تحب الكيك من ايدها
... هااا ترى اني ما متأكد لان ادري بيج ماتسوينها يمكن جهال ابو سعيد المجلوبين هما فشخوني
زلال.. يلا ميخالف مقبولة منك عزيز وغالي تمون عليه يلا حجي دام اجيت فوت شلون مسوين جاي مهيل ويا الكيك يستاهل هالحلگ
شو هذا ما صدك كتلة فوت فات قبلنا اريد افلت انلزمت من ياختي ماما عضت أيدها بكل قوتها
عماد... فهميني شسويلج رجال بگد جدج تفشخي لو صاير بي شي
اهنا اكوو عقل لو نعال ( ضرب على راسي)
حورية... اليوم ما ابقي شعرة براسج راح اموت ناقصة عمر من وراج
زلال... اشك هدومي ما ششافوهم يبگون يشوفهم يتقاسمون مووو راح يسمعكم واني بالگوة سكتة
عماد... خلي يطلع واني اعلمج
... ماما انطتني كرصة وفاتت لزمت زندي افركة من الوجع
ليال... هاي شوكت طلبتي مني أسويلة كيك
.. ترى مناقصتج
اگلج وين رايحة
... يعني وين اخذ كيك البيت خالي
.. اوكفي البس نعالي واجي وياج طلعت اركض فتنا الحديقة بيت خالي من الباب المشترك بينا
جانوا هستوهم ديشربون جاي سلمت عليهم وسألتهم على أحمد خالة كوثر، گالت بغرفة بيبيتج
عفتهم ورحت علية
خالد... عاشت ايدج بعد خالج بكلشي معدلة هنيال اليأخذج
ليال... خجلت من كلامة همست بالعافية خالو
كوثر.. اوووف ليال اشگد تمنيت تصيرين من نصيب أيهاب
ليال...يبوو لو ادري ولا جاية
ايهاب حالة من حال اخواني مريم خوش بنية الله يسعده وياها
خالد... كلشي قسمة يامرة
ليال.. خالة هواي لحت حتى تأخذني اله وكل مرة تطلبني ارفض ولد خالي حالهم حال اخواني نفسي متتقبل احد بيهم رابين سوة احس روحي عندي ثمن اخوان مو ثلاثة وهما معتبرينا خواتهم يحاسبونة ويتحكمون بينا لا احنا نضوج من هالشي ولا اهلي يزعلون
ويمكن لان ماعدهم خوات لهذا يعتبرونا مسؤوليتهم
خالي عندة خمس ولد
اختي وصال صارت من نصيب وليد ابنة الجبير
مرة خالي خطية جانت هواي تتعب ومتلحك على طلباتهم تركض منا ومنا
وصال تكره الدوام
كملت ثاني متوسط وبطلت
خالي رادها الوليد اهلي گالوا اذا هي توافق گبعوا واخذوا
وفعلاً صارت من قسمتة وأم اطفالة
وصال نادرة مثل ماما شالت بيتهم شيل
خالي ومرة خالي روحهم بيها ياويلة وليد اذا زعلها
وهي كذلك تموت عليهم تصيحهم ماما وبابا من تحجي اتگول اني الله منطيني اباء اثنين وامهات اثنين حتى جهالها صاروا اعز من ولدهم
زلال... طبيت للغرفة احمد المسكين متمدد وصافن على السكف
هههههه گالوا معلوس بدالي
أحمد... غير من ورة سوالفج لو ادري بيج تضربين الرجال فلا اسويها الج
... ليش سكت ومكتلهم المصيادة الزلال
... لا خطية انوب يحجون عليج
.. گرصت خدة يمه فدوة للـ يخاف عليه
ولك خوما ضربوك
... لا بس رزلوني ومنعوني من الطلعة والمصروف
... عزززا شدعوة عليهم گوم ومعليك اني احلها اخذتة من أيده وطلعنا
شافوا وليد وأمجد صاحوا عليه
وليد... گتلك لاتشوفني وجهك اياني واياك تعتب باب الحوش اجنزك
زلال.. ابو ريم على كيفك هو شمسوي وهيج دتحاسبة
أمجد... زلال لاتدخلين
... ترى مو هو الضربة
أمجد.. بشك لعد منو؟!
... هااا اني المصيادة جانت الي
... والله من البداية شكيت بيج بس جذبت روحي لك ارعن من سألتك المصيادة مالتمن ليش مگلت الزلال اكيد مشترك وياها
زلال.. لا لا والله العظيم ميدري راح اضرب بيها حجي صجمة
وليد... لشوكت تبقين جايبة الاهانة الروحج عقل ريم اكبر من عقلج
لو جاية الحصوة بعين الرجال وفاگستها شجان سوينة ماتگدرين تگعدين راحة اخوانج وينهم عنج
خالد.. كافي وليد عوفها بابا زلال غلط السويتي رجال جبيرة حتى لو مأذيج واجب تحترمي لايصير عقلج صغير يابنتي ليش اجيبين الحجي الموحلو الروحج
... دنگت راسي خجلانة اسفة خالو بعد ما أعيدها
امجد... الي يشوفوها هسه يگول اشگد فقيرة وتسمع الكلام
زلال.. متعودة على رزايلهم ابد ما ازعل منهم
خلصتوا لو بعد
وليد..الوكحة بعدها تجاوب
...ابو ريم شجاك عليه اليوم گلت بعد ما اعيدها كافي ترى راح ازعل منك
خالد.. گعدي يابة معليج بيهم
وصال.. والله الحجي لو يدري انتي ضاربتة يهجم يطين عيشتج
ليال... يدري وأجة يهدد ويغلط وتالي گدرت تقشمرة بالكيك
وصال...هههههه ما اعتقد راح يعديها بسهولة
ليال... جان يريد نحضر عمامنة يدور فصل
خالد... هههههه انا خوك
زلال... يريد ليال فصلية لان خوش تطبخ
خالة كوثر غصت من الضحك
بيبي هزت ايدها گالت هالشويب يعرف يختار
همست الوصال لعد خالة فردوس ولمى وين
...معزومة بيت حماها ورة المغرب ترجع
... فات أركان شعرة مهوس من النوم گعد بصفي گرص خدي دفعت أيدة وخرررر قحط مكانات جيت گعدت يمي
... بومة ششبيج متتحاجين وگالبة الخلقة صار جم يوم
... كيييفي ميعجبني احاجيك معليك بيه
... غير افهم من شنو زعلانة
... مزعلانة
... ولج خاف لان گلت منال أحلى منج
... عوجت حلگي حافظ أسمها
لا على شنو ازعل اصلآ كلامك ميهمني
... هههههه والله من هاي زعلانة
... گرص خشمي ويضحك
... اشاقى وياج تروح فدوة الهذا الخشم المدوحس كم زلولة عدنا هي هاالوحدة وخبلة
... وششششبي خشششمي تكوم منا لو اني اگوم وبعد ديربالك تحجي وياي
الكل اننبهوا علينا دنتناگر خالي حجة عليه گالة ششبيكم اليوم وياها قبل شوية اخوانك وهسه أنت
... لا تبليني قابل شمسويلها جاي اشاقيها هو منو بينا يستجري يحاجيها
صدك زلولة شوكت النتائج
... يمكن باجر
... عاد شتتوقعين حمامة لو بومة مثلج
... غراب مثلك مو داگلك معليك بيه
اروح البيتنا ولا أظل مگابلتك
ثاني يوم نزلت النتائج علاء گال اني اطلعها الج
بقيت الوب لزمني مغص كل شوية رايحة للحمام
المغرب من رجع گال دورت اسمج ملگيتة
تنفست براحة همست بگلبي هففف كون متلگة ثاني يوم على اساس يرجع يدور نسى
حورية... سمعيني لج باجر من الصبح أخذج تجيبين نتيجتج لا عبالج تقشمرينة وتظلين مغلسة
... منو المغلس اني لو ولدج كم مرة گتلهم طلعوها يگولون يوم نسينا ويوم اسمج ماكو
... اي ماصار، شي باجر نروح ونجيبها
.. هاا اي خوش بطني رجعت مغصتني من الخوف
باليل أتگلب بفراشي مجايني نوم مدري شجاني
گمت من مكاني اندحست ويا ليال بفرأشها
ليال... دخيل ربج رجعي لفرأشج بالقرآن شعري متگطع متقصف من ورأج
... مايجيني نوم بمكاني والله بس ألزم شعرج ما أجره
... اريد افهم شنو هالسولة الطايح حظها بله من جنتي صغيرة عاذرينج اغلب الأطفال هاي حركتهم اما انتي بكلشي عكس الناس كبرتي ومبطلتيها
... كافي ترزلين اتحمليني بس هاليوم بين ما اتصالح ويا سمجة وأنام يمها
.. الله يساعد ماما عليج
اگلج اذا هلگد تخافين من النتائج ليش ماتقرين سنة كاملة مگضيتها تسخيت ووكت النتيجة شوية وتموتين
.. ترى حتى الشاطر بيوم استلام النتيجة يخاف هذا شي لا أرادي
... ممممم اي أدري بس وضعج يختلف كسلانة ودورين نجاح
... لا والله مو كسلانة اقرأ على گد النجاح عيني متروسة ما أدور شي عالي
... دنامي نامي عندج جواب الكلشي مو عقل داهية
...هو ابو المثل مينلام من گالها
... اي بالخير وشگال
... كلشي مگال الرجال متلفلف بالبطانية ونايم قابل شتريدي يگول بهاليل
... امداني صوجي والله عايفة نومتي ود اخذ وانطي وياج
... حضنتها شسوي مو بيدي احبج
... والله مكارة
... الصبح كل شوية مگعديني حتى اروح للمدرسة
ليال... گوووومي ماما تعصبت
.. بس شوية والله نعسانة حرام عليكم
.. لونايمة من وقت مجان هذا حالج
اوووي، اني شعلية أدزلج ماما تگعدج بطريقتها
.. غطيت رأسي مجاوبتها ظلت ماما تصيح وتستريح واني مغلسة ماگعدت غير ساعة ١١
حورية.. عبالج اذا گعدتي متأخر مراح ادزج يلا بسرعة بدلي دنروح
... المدرسات ميبقن الهيج وقت قابل خوما دوام كامل ويبقن للظهر
... هذا الحجي ميوكل خبز تروحين يعني تروحين يمين عليه اذا طلعتي راسبة گدام عباد الله انزع البرجلي واضربج
... ترى زهكت كرهتيني بعشششتي شكو هلكد متحملة عليه ما أريد لا تجين وياي ولا هم يحزنون اروح وحدي اشرفلي
... لج وين مولية رايدة الصبر منك رررررربي
... والله اذا جيتي وياي فلا ازحزح منا
... طبج طوب امشششي ولي وحدج المهم تجيبين النتيجة وتجين
... طگت روحي شلون مجان غسلت وبدلت
اووف هسه لو مينا هنا وكتها تولي البيت جدها
الطريق كله معبسة وادردم وصلت للمدرسة الباب مفتوح واكو جم طالبة خرب حظي شمبقيهم لهسه
لكيت صديقاتي اثنين ماخذات نتائجهن ناجحات
فتت للمعاونة اقدم رجل وأأخر رجل
من الخوف گتلها صباح النور مدري شگاعد امسلت
انطيتها اسمي وكفت انتظر يمكن شوية ويغمى عليه
رفعت راسها گالت ناحجة الضحكة ترست وجهي لوبيدي اكمز من فوك الميز واحضنها انطتني درجاتي صح كلهن تايرات بس الف الحمد لله راح اخلص من رزايل ماما وهالمرة اني اصير ام الراهي عليها بسيطة سمجة شراح يفضج مني اليوم
طلعت بشرت صديقاتي صارت عندي طاقة ولا اريد ارجع للبيت رحنا اشترينا وظلينا نفتر بالصفوف عشششتو عود صرنا حنينات واحنا بايام الدراسة مانطيق الصف
صارت ساعة ١٢ ونص واحنا مراجعين
شذى.. اگلج ليال عمة شبيها ماتقبل تفوت جوة گاعدة بالطرمة بهالحر معقولة هلگد خايفة من نتيجة زلال
... والله مدري اني هم حاجيتها متقبل تفوت
ورة شوية طبت توضت وصلت الظهر
كملت ورجعت النفس مكانها
ماما فوتي جوة والله حارة تصمط اهنا
... البيت خنگة احس حياطينة تاكلني
... اسم الله عليج شجاج
.. ما أدري روحي لايبة
.. علمود زلال
... هي ليش تاخرت صوجي سمعت منها وما رحت وياها
.. لاتخافين هي للـ ١١ونص يلا راحت يجوز تنتظر المدرسة لو التهت ويا صديقاتها
... ناوشيني العباية اروح عليها ما اتحمل اصبر اكثر
زلال... سلمت على صديقاتي ورجعت طايرة من الفرح لوبيدي اركض
اكو ساحة كلها بيوت هياكل مكامل البناء ومواد بناء سمنت ورمل وبلوك
لأزم افوت مناك ماكو غير طريق ومتعودة طول السنة نروح ونجي منا
دنيا ظهر وحارة طير طاير ماكو
صارت كدامي سيارة مانتبهت منو بيها جانت واكفة وصوت المسجل عالي
داعبر من يمها انفتح الباب ونزل رجال يطلع بالأربعين عمره عيونة حمر وشكلة مدري شلونة مشيت سريع بس اريد اطلع منا
وكف گدامي
حجة وهو يجر بالحجاية
وين يحلوة تعالي اوصلج
نترت شكرآ بيتنا قريب ردت افوت منعني دك ناقوس الخطر عندي رجعت ليورة ردت اركض بـ تجاه المدرسة انداريت واحد ثاني واكف وراية تقريباً نفس عمر هذا
انرعبت راسي يفتر يمنى ويسرى اريد المح بشر يخلصني منهم تقدموا علية صرخت بعلوا صوتي ركضوا علية واحد لزمني من ظهري كتفني والثاني نزل لزم رجلي انشاليت من الگاع ارافس واصرخ أخذوني بتجاه السيارة......
