 |
رواية لك ياذا الجمال اليوسفي الفصل الثاني 2 بقلم فاطمة العبادي
#البارت_2 .
{ خَلَقَ الإنْسَانَ مِنْ صَلْصَالٍ كَالْفَخَّارِ وَخَلَقَ الْجَانَّ مِنْ مَارِجٍ مِنْ نَارٍ }
أرتجــــــــاف الاجفان
في كُل مرٕه أضن فيها أنني هُزمتُ تَخرِج
مَني أمرأه قويه بعَزيمه حَديديه تُعيدنيٍ
إلى الساحه قَمرا مُضيئاً يَبدو أنهُ لايُليق بي
الأنطفاء ...
.
.
اصابتني الصدمة والذهول، شي لا يعقل لأن اني شفت كلشي بعيني وعشت كل المشاعر والاحاسيس
من المستحيل تكون حلم، او تخيل ..
نفضت الافكار من راسي ورمقت خالو حر برمق حزين وحيرة ، قطب حواجبة مستاء وكال وهوا يحث امي تكوم بسرعة ... ام رهف كومي بسرعة هاي تهذري لا يروح يصير بيهة لو تشمر .
كامت امي بهمة تغسل وصاحت ع رهف تحضرلهة عبايتهة وجواريبهة ، باوعت لخالو بنظرة معناها مابية شي اني صدك داحجي مو اهذي .
بس ما اهتم كام من مكانة ولزمني من ساعدي كومني شفايفي ترجف وعيوني تتنقل ع وجوه بحيرة ، باوعت الأيدة الحنطاوية المزينة بخاتمين وهية لازمة ايدي السمرة وتنهدت بضيق
اخذني للمغسلة غسلت وغسل وجهي وايديني حد العكس جنت مدنكة وتفكيري كلة يم الصار البارحة يمكن صدك مصخنة وبسبب الحرارة ضليت اتخيل لو احلم وعبالي صدك ..
رفعت راسي شفت خالو لام شفايفة للداخل وضاغط عليهم، يباوعلي بخوف حسيتة مصدگني بس ما يحجي همست بصوت يرجف ... حالو مصدگني .
رفع طرف حاجبة بس واضح علي الارتباك بعدها كال ... لا درة انتي حارة كلش يمكن تحلمتي وعبالج صدك لا تنسين العام شصار بيج هههههه اجيتي نمتي بحضني عبالج انه امج شوفي الصخونة وين توصلج .
ضحكت بخجل وجناتي صارت حارة، شحيت بنظري عنة خجلانة ... خالو لا تذكرني والله اخجل واتمنه اختفي اتبخر ، ياكاع انبلعي وشكيني ..
عقد حاجبة مستاء وكال ... وتالي وياج انتي
ارتديت خطوتين للخلف خايفة
... شبيك خالو شحجيت انه؟ حتى تعصب علية خوفتني والله .
حر ... لج خالي الفاضج صايرة مو حلوة وتنطقين كلمات مو حلوة للبنية يعني وين اكو بنية تكول يا كاع انبلعي و .... زم شفايفة وقطع كلامة ما كمل ..
تذكرت اني شنو حجيت وهمست بخجل ... صاعدة ابدل خالو ..
عفتة وراي وصعدت اركض ، باوعت ع مروحة والشباك وتنهدت ، فتحت الكنتور طلعت عباية خليجية لبستهة ولبست شال اسود لفيتة بأهمال حواجبي كثيفة ممحفوفة وطويلة وشواربي مثل المراهق الهستوة خاط شاربة .. يمة الرحمن طلعت جني الساحرة الشمطاء ناقصني بس مكنسة واسوية طرن طرن واطير من الشباك ..
نزلت اخذنة خالو حر للمستشفى قاسو ضغطي وشافو سخونتي ضربوني ابرتين وكتبولنة ادوية
خالو راح يجيب الادوية وامي راحت تمشي ماتدري وين رايحة بس ما حسينة غير احنة برة المستشفى التفتت ع امي وتخصرت
... هسة خالو وين يلكانة بربج يمة هاي شلون صايرة طلعتينة من المستشفى ..
حطت ايدهة جوة ذقنهة وكالت ... يااااا شمدريني كلت نلگة الصيدلية بالباب ..
درة ... يمة هاي مستشفى مو دكتور اخصائي وتطلعين تلكين الصيدلية برة .. اخذت نفس عميق وزفرتة
... هسة شنو يفكنة من خالو ..
رفعت عبايتهة وكالت ... شمالج يمة ضلي هنا هسة ارجع لنفس المكان لطلعنة منة واتاني خالج من يجي اجيبة واجي عليچ .
عافتني وراحت تمشي بسرعة وعبايتهة مطيرة وراها جنهة باتمان ..
تأفأفت وضليت واكفة ضايجة ..
ورة دقايق سمعت صوت من وراي يحجي بنبرة تساؤول ... درة ؟
لتفيت وشفت صاحب الصوت صهيب ابن خالي قصي عبالك جنت ضايعة وهسة لكيت واحد من اهلي كتلة بفرح ... صهيب شتسوي هنا ..
ضحك ورفعلي اللاب كوت مدري شسمة وگال ... لج صيدلاني واسمي شكبرة ودراستي تهد الحيل وانتي تساليني شتسوي هنا والله بيج ابرة تخليج فاقدة اسبوع كامل .
ابتسمت ابتسامة صفرة وحجيت بتعلثم ... شمدريني .. غير من زود فرحتي بشوفتك تلهفت ..
رفع طرف حاجبة وتقرب مني اكثر ... وليش انتِ متلهفة ع شوفتي ؟ وفرحتي لدرجة نسيتي سبب تواجدي هنا ..
يحجي ويحط عيونة بعيوني رمشت بعيوني من عرفت هذا قصدة بس لا تحبيني رفعت طرف حاجبي مثل ما هوا سوة وكتلة بجدية ونبرة تعالي
... جنت واكفة وحدي وخفت الصراحة والعالم رايحة راجعة احس روحي مثل الضايعة لهيج من شفتك فرحت عبالك وحدة شافت اخوها وهية بنص الخطر .
ضحك وعض شفتة الفوگ بحيرة ونظراتة تتوزع ع ملامحي، بعدهة جر نفس وگال
... تدرين رهف احلى منج بهواي لوحة من الحسن والجمال سبحان لخلقهة وكسر القالب ، بس ماشايفة روحها مثلج ترة بس الله الجبير لا تتكبرين علينة ..
باوعتلة بنص عين وجريت عيوني، شحيت نظري عنة ونطيتة ظهري بدون ما ارد .. هوا بدأ يتواقح وياي انه مالي غرض ما تحرك ضل واكف وراي يستشيط غضب ثنيناتنة شفنة خالو وامي خالو جان عاقد حواجبة بغضب من شاف صهيب ضحك ... همزين صهيب يمهة
صهيب ... شلونك عمي، شفتهة واكفة وحدهة واجيت وكفت يمهة شلون تخلون بنية شابة واكفة بنص الزلم وحدهة ، ترة اولاد الحرام هواي لو تمر من گدامهم صخلة هم يصجمونهة
حر بصدمة ... بس لا واحد صجم درة ؟ وينة والله الا اردة لبطن امه عديم الغيرة .
صهيب ... ع كيفك عمي ليشوفك يكول موگف نانسي عجرم هية كلهة درة شاربهة اثخن من شاربي ليشوفهة يكول ولد ولابس شال ..
رمقتة بغضب دفين، خالو حر جرني من يمة وكلة
... لا تخليني اوكلك تبن اليتحرش بوحدة من بناتة خل يحسب الله ما خلقة .
صهيب هز راسة وابتسم ابتسامة هادئة ورد بصوت هادي كلش ... والله عمي افتخر بيك انه جا صنت الامانة وما فرطت بيهة ..
خالو حر جر عيونة بغرور وكلة ... لا تتلوگ يلة وعد خلينة نروح طولنة واليوم معزوم ع غدة ... التفتتلي واردف بحنية ... خالو خو ما بعدج دايخة ، حجة وهوا يتفحص حرارتي
صهيب ... اذا مصخنة وجايبهة ضاربهة ابرة تحتاج وقت حتى تنزل مو صبغ ساعة ..
وعد ... هم صدك ..
حر ... عود صار صيدلاني وضل يفيك بروسنة وينطينة دروس بالطب ..
وعد ... هههههههههه لو مخابرينة جاي شايفهة بالبيت احسن
خالو مارد توادعو ورجعنة للبيت ..
صعدت للغرفة تمددت وغلبني النعس نمت بدون اي تفكير احس جسمي كلة تخدر ..
نايمة وغاطة بنوم عميق حسيت ايد تتسلل ع خصري بخفة، تؤوهت بنعس، ااااااا ، وبين الوعي ولا وعي سمعت ضحكات اطفال حولي رمشت بعيوني، مثل لقطات مقطعة قصيرة ، شكل المروحة .. غمضت ورجعت فتحت ضلت تفتر بكل سرعة وترتج
ما ردت اغمض بس كلشي صار خارج عن ارادتي وغصب عن عيوني غمضت، الي ذهلني هوا حتى عيوني تمردت ع ارادتي .. فتحت عيوني وطلو وجهين بنية ولد واكفين يم راسي ، مبتسمين ابتسامة خبيثة وعيونهم نفس عيون العتوي تجدح ..
صرخت بأعلى صوتي ييييممممةةةة رررررهف ... كااااااتـ ..قطع صوتي ايديهم وهية تخنكني وتقطع نفسي
شهگت شهگتين، ونزل من راس البنية دم طاح ع وجهي فزيت وفتحت عيوني ع وسعهن واني الهث ..
اتلمس روحي وجهي مبلل عيون كل عائلتي محاوطتني ..
تنفست سريع امي تبجي ورهف تبجي وكاتي تهمس ببرائة ... درة كلبي راح تسير (تصير) مخنوگة ؟
امي لازمة ايدي وتهمس ... سودة علية بنيتي وجهج صار ازرك ..
خالو حر رفعني وخلة ايدة ورا ظهري وكال ... تنفسييي
أسامة بخوف وحنية ... لا حر امشي ناخذهة للمستشفى وجهة ازرررك ننتظرهة تموت ..
كاتي ... درة يموت ليش بعدة سغير (صغير) ما صار عجوزة ..تحجي بخوف
خالو حر كال ... راح اشيلهة انطيني عباية اذبهة عليهة ..
ايدة حاوطت ظهري والثانية صارت جوة رجليني وشالني ... لا تخافين خالي هسة اخذج للمستشفى ويردون بيچ النفس ، شح عنج الهوى؟
أنيت كـ جواب احس صوتي مكتوم ولساني معقود افكار متضاربة بعقلي والخوف سيطر عليه بعد الشفتة ..
كلة ذرة بجسمي ترتجف، وغادية عرگ من راسي لكعب رجلي ..
راد يطلعني من باب المطبخ ورنت ضحكة الطفلة باذني لزمت ركبتة بقوة وغرزت اظافري بيها وصرخت ... نززززلنننيييي نذذذذل نززززلني الله لا يرضاااا عليك ابن الكلب شلووون تكتلني وتمشي بجنازتي بصلافة عينك ما شاااايفة ..
وكف متصنم جرت دموعي وضليت ارفس وادفع بي بقوتي وهوا كاضني بقوة خاف اطيح متمسك بية .. ومتصنم وعيونة تباوعلي بدهشة همس برجفة ... شبيج يبعد خالچ ؟! ..
... لاااا تباااوعلي بهاااي الصلاااافة واننننتتتت سجينتك بعدهة تحزززز بنحرررري عوووووووفنننننييييي
نزلو يركضون واني تخبلت والحجي يطلع من لساني بدون ارادتي، تكسرت العبرات بصدر خالو حر وغص بدمعتة ما اعرف شلون هذا الجملود انهزز بمجرد ما غلطت علي ..
يمكن بينة وبين نفسة يكول ما يسوة رباي وتعبي تالي بلحضة كلشي تبخر ، ويأبى ان يصبح غيمة تنزل غيثها الحنين ليلامس قلوبنا المتصحرى ، فـ تزهر !
وعد ... صخخاااام الصخمج وعد البنية تسودنت ..
فقد السيطرة علية وطحت من ايدة انضرب راسي بحافة الكاونتر شاغت روحي وصرخت بقوة واني الزم تيشيرتة ... خاااالييييي ااااااخ ..
ما حسيت غير الدم نكع ظهري رجع شالني وصاح ع امي وخالو اسامة خذوني ركض صعدوني بالسيارة وامي تخلي كلنس ع راسي وتضغط علي واني ابجي بنحيب ودموعي تهل ع خدودي والطركاعة خشمي لازم يشاركني بحزني ويضل يصب بوفائة ما شفت ..
وصلنة للمستشفى وراسي كان مشكوك ويحتاج خياط خيطو الي بس شاغت روحي اصرخ والطم ع رجليني من الوجع الى ان امي كضتني ..وتبجي وياي اخير شي خالو كللهة لا تنوحين وياها شجعيهة
اخذ ايديني من بين ايديهة ولزمهن بقوة ... خالي انتي سباعية هنة تلث خياطات هااا أهااا خلصوهن .
اسامة ... صخولة وكفتي كلوبنة ع بختج صخونة وصريخ وخنكة ووراها راسج تشكك .
خالي حر رمقة بغضب دفين ورجع يعدل بشالي ويكول يلة نطلع علمود ترتاح راحت روحهة ..
كمت ع حيلي الكاع تفتر بية، باوعت لخالي حر تنهد وابتسم تك خد وكال ... بعد شسوي مكتوب علية اضل شايلج وافتر بيج ..
ابتسمت وباوعتلة بخجل لان غلطت علي بس ما اتذكر شنو حجيت بالضبط ! هذا الامر حيرني
شالني وامي تلف بعبايتهة وتعض بشفتهة وتكلي ... طيحتي روحج بروحج همزين بس راسج تشگك جان صخمتي وجهج يمصكوعة ..
خالو حر خزرهة لأن عدهة قصد عيب، دفنت راسي بكتف خالو من كد الخجل، مادري منين اطلبهة اليوم الدنيااا كلهاا ضدي ،حتى امي اووووف ..
وصلنة للبيت مددوني بالصالة ارتاح ونخفضت الاصوات ترف طلعت تلعب ويا رزان صديقتهة وجيرانة بيت بيوت بالطارمة اما خالو عاف العزيمة وضل مگابلني يحطلي كمادات لان حرارتي ماجاي تنزل .. امي كالت بحيرة ... يمكن البنية مضرورة شتكول ناخذهة السيد يقرا عليهة ..؟
انتفض خالو وزم شفايفة بغضب ... لا خرررافات ما اخلي الدجالين يخبلون البنية وهية بعدهة طفلة حرام عليه اخطي هيج خطوة ..
وعد ... يااااا ليشششش تحجي هيج مو هوا الجن والسحر موجود ويجوز دايسة ع كاع بيهة عمل ونضرت وهذا الشي ينعكس ع نفسيتهة وتضل تتخيل اشياء تخوف وبسبب تخيلاتهة تتمرض لأن تنرعب ..
حُر ... وعد سدي الموضوع ، كعد بالكاع وغط الوصلة بالماي والثلج وعصرهة وحطهة ع ايدي .. وشلون ايد يممممة يا كاع انشكي وبلعيني ضعيفة و ماكلة اظافري بأسناني عالستهم علس ما ضال بيهن بحيث اللحم طافر وسمرة وما مسوية شيرة لان الشعر هستوة يطلع حسيت وجهي زادت حرارتة من ورة الخجل ..
وعد ... حر لا تعاند هاي عندك خرافات جا انتَ والكافر سوية ممطلع ع كتاب الله وشايف آياتة شنو بيهة ، انه اكول ناخذهة لسيد لو شيخ يقرا عليهة هلبت الله تسترجع وعيهة ما تشوفهة هية مثل الما واعية ..
حجت كاتي بنبرة بكاء مصطنع ... وعد شعري ينزل بالهمام اخذني سيد يگرا عليه اني مريض ..
حر ... حتى الاجنبية علمتنهة ع سوالفجن مال الدجالين
كاتي .. هر انتي ما رحتي سيد اني رحت وسرت زين. وسارت اسامة حبابة ..
فر ايدة وضحك باسهة وحطها ع جبينة وسألني ... خالي بعدج مختنكة؟
هزيت راسي بـ لا
... ليش غلطتي عليه شبيج جنتي بوعيچ ؟
لميت شفايفي وضغطت عليهن بخجل هزيت راسي بـ لا ..
جر حسرة وشال منشفة ثانية صغيرهة غطهة بالماي وطلعهة وامي كالت ... رايحة لبيت اسعد اشوف ام علي شلونهة تقصد اهل رزان جيرانة ..
هية عافتنة وطلعت وكاتي راحت تكمل طبخ ..
حجيت بخوف ... خالي انه يمكن متلبس بيه جن حتى من حجيت جان الوضع خارج عن أرادتي وسيطرتي نطقت كلام مو منطقي ، وعيب ..
وكفت حركتة لحضات غمض عينه وفتحهة وكال بحزن ... الجن ما يتلبس الانسان خالي ماكو عالم اثبت هذا الشي حد الأن ..
حجاها وذب حسرة شكبرها طلعت من نص گلبة ..
درة ... وانته ليش تتحسر شنو بس لا تحبلك جنية هههههه لا ترة صدك انه شفت جن
حر ... خالي سمعيني زين الله سبحانه وتعالى خله بينة وبين الجن حاجز ما ينشال الا بالأخرى حسب كلام العلماء والحقيقة الي توصلو الهة ..
الهذا السبب مستحيل يتلبس بالأنسان لو الأنسان يشوفة ..زين سمعي الآية
بسم الله الرحمن الرحيم
{ خَلَقَ الإنْسَانَ مِنْ صَلْصَالٍ كَالْفَخَّارِ وَخَلَقَ الْجَانَّ مِنْ مَارِجٍ مِنْ نَارٍ }
من نار يعني طرف لهبها وهوا يكون شفاف غير مرئي بهاي الحالة الجن ما ينشاف حاله حال الشيطان ..
هسة انتي من تسوين عمل حرام ما يرضي الله تكولين الشيطان وسوسلي مو صح
درة ... اي هوا صح الشيطان يوسوس للأنسان ..
حر ... وانه ما كلت غير هذا الحجي الجن بكل انواعة ممكن يوسوسلج ويخليج تشوفين اشكال بشر لو حيوانات بس ما تشوفين شكلة الحقيقي هذا الشي مستحيل ..
درة ... اذن بهاي الحالة ممكن اشوف حيوانات ويأذوني
تنهد صفن شوية وكال ... الجن مثلنا بيهم المسلم المسيحي النصارى واليهود والكفار ، الهذا السبب اذا الله ورطج ويا جن كافر مثلا يأذيج
بس شلون تتورطين بهذا الجن المؤذي؟
من احد يسويلج عمل شيطاني ويفتح عليج ابواب جهنم بالدنيا انتِ هنا راح تموتين موتة بطيئة
لأن اكو جن كلش مؤذي ..
درة ... بس احنة طول عمرنة يخوفونة بالجن يعني كلة يأذي؟ لو بس الكفار ...
حر ... لا مو شرط مو كلهم مؤذيين
سمعي هاي الآية وَأَنَّا مِنَّا الصَّالِحُونَ وَمِنَّا دُونَ ذَلِكَ" (الجن:11)
يعني بيهم الزين والموزين ..
على كلً انتي حالتج مرضية مو يم الجن لا تخافين واعتقد بسبب الحرارة والخنكة شبه فقدتي الوعي الهذا السبب غلطتي علية.
درة ... زين نكدر نحجي ويا الجن هم يحجون لو لا
قبل لا يجاوبني فاتت امي وكالت بصوت عالي
.... من رخصتك حر جبت ام فلاح تقرا ع درة المرة تريد تفوت
وكف ع حيلة بغضب وعقد حاجبة، قبض ايدة وعيونة ضلت تجدح خزر امي وهية فشلتة كبل دخلت المرة وخلتة يطلع مجبور ..
فاتت هية مرة حلوة دبدوبة لابسة شيلة سودة وحاطة دنبوس ذهب ، رزنة وجهة ابيض يضوي وابتسامتهة ويا الخطوط الي بوجهة كانها حضارة عراقية قديمة ..
قرأت ايات قرآنية ع راسي و ع كلاص ماي وخلتني اشربة ، فعلا حسيت روحي ارتاحيت ..
مر اليوم واخذت اجازة يوم الاحد والاثنين ع الاقل يتشف جرح راسي وارتاح
التخيلات اختفت بس بقت الاحلام السيئة مرافقتني لدرجة صرت اكره الليل
حطيت القرآن جوة راسي ..
كعدت الصبح يوم الاثنين غسلت وتريكت ، وصعدت ادور ع مزيل الشعر مال رهف اريد احطة الايديني لان الشعر طالع بيهن هاي فوك فشلتي كدام خالي من حطلي الكمادة ..اجيت ادور مزيل بدل ما اشيل الشعر بشيرة ..
مالكيتة تضايقت، تخصرت ونفخت بضجر
بهاي الحالة لازم انتظر رهف ترجع وتطلعة الي وين ضامتة مادري ..
نزلت كابلت كاتي وكعدت وكل شوية اكللهة كولي صيوان .. ( ابن خالي اخو صهيب كلش اكرها )
وهية تكول ... سيوان ..
ارجع اكللهة كولي صيوان صاير صبورة يابسة
تكول سيوان سايرة سبورة يابس .
اكزكز عليهة بودي اكضهة واكلهة تنكرط كرط
رجعو خالي حر واسامة من العلوة ، تعبانين غسلو وامي وكاتي صبن غداء بهاي الاثناء اجت رهف هم غسلت
وترف بيها دوامهة عصري هية رابع ابتدائي تغدت وراحت ..
من كملنة غدة صعدت رهف ترتاح لحكتهة كتلهة وين مزيل الشعر ايديني صارن غابات الامزون اريد انظفهن واسويلهن حررررق ..
رفعت راسهة باوعتلي بأستهزاء وكل عقلج تردين انطيج؟ انتي تخلصينة
... بس شوية احط بس الايديني حبابة شوية ..
... ما انطي ولاااا نگطة ولي ..
لفت راسهة تريد تنام كعدت يمهة اتوسل
... رههههف بعد عيني كعدي انطيني نص العلبة وانه انطيج فلوس
مدت ايدهة وكالت ... ورقي بالأول ورقي
تأفأفت وكمت طلعت فلوس من مصروفي وحطيتة بأيدهة
وكفت ع حيلهة تلف بشعرها وهي كاضة التجة ام الورد الاحمر بأسنانهة ... جيبي علبة فارغة اول شي احطلج بيهة نص ما أأمن انطيج العلبه كلهة ترجعيهة الي فارغة واني مشتريتهة للحالات الطارئة ..
... اهوووو ترررة ذليتيني انطيتج فلوس نص العلبة صارت حلالي
دورت الهة علبه فارغة مالكيت بس قوطية نيڤية بيهة شوية كالت امي ضحكت ضحكة شيطاني ولمعت عيوني بوكاحة ..
جبت كلينس وطلعت بي النيڤية وذبيتة بالزبالة مسحت العلبة وصعدت الهة ركض
... يلة ولج استعجلي عندي دراسة باجر اداوم
حطتلي نص العلبة اخذتهة وفتت للحمام اريد انزع هدومي وصاح خالو حر من فاااات للحمام مو هسة عفتة محد بي مبين علي عصبي ومستعجل
حطيت ملابسي بايدي وطلعت باوعتلة ببرائة وهمست ... ها خالي ما عبالي تريد تفوت
... مستعجل درة طلعي خلي اسبح طلعي .بسرعة ..
ركضت لغرفتنة وهوا فات للحمام كعدت انتظرة تقريبا اقل العشر دقايق وسمعت صوتة يصيح
رهف كمزت من فررراشهاا طلعنة انه وياها ركض نشوف خالي واكف ويهلس بشعرة ويطيح بأيدة شعر لطمت ع صدري وعطت ... عززززة شبي شعرررك
امي وكاتي صعدن ع صوتة يباوعلي مصدومات
وعد ... ياااا شبي شعرررك
وكف وزم شفايفة بغضب بعدهة صااح
... منوووو حاطة مزززريل الشعررر بقوطية نيڤية ..
كاتي باوعتلة ورمشت ببرائة وهية منا بيضة وخديداتهة حمر بنص خوفي ردت ابوسهة
وامي كالت مادري منو منجن بنات
رهف باوعتلي بشك وخصمت عيونهة ..
بلعت ريگي بخوف وهمست برجيف ... خالي انه ..... قاطعني
... عفية علللييييج يعني هسة اروح للحلاق واكلة طك شعري صفر اذا كال شبي اكللة غسلت شعري بمزيل بت اختي ..
لزمتني الضحكة لميتهة وكتله ... وانتة ما شفت العلبة مو مال شامبو
حر ... شمدررريييني شفتتت ماكو شامبو دورت العلب فتحت هاي لكيت كريمهة وردي واعرف النيفية بيضة كلت هذا لو شامبو لو صابون سائل بالحالتين ينفع جبتة وحطيتة ع راسي عفتة وغسلت جسمي من اكض اشعري ضل يطيح بايديني .
... مالي ذنب انه لو حاطتة بعلبة شانبو جا كلت اي حقك تصيح علية بس بهاي مالي ذنب
وعد ... جا انتة خوية ما شميت ريحتة قوية
حر ... ما شميت مستعجل اااخ .. عافنة وفات لغرفتة يرعد
رهف .. لو تموتين ما انطيج بعد
وعد ... ههههه فشلتنة ولجن بعد لا تخلن هيج سوالف بالحمام
ركضت للحمام اشوف حاطة كلة لو مخلي منة هم زين ضال كريم يكفي ايديني ..
بعد ما شفت خالو لليل يلة، شفتة فات من باب المطبخ لابس تيشيرت ازرك قاتم نص ردن بهذا البرد ، ومزين شعرة صفر صاير اكرع، تلقائيا ضحكت بصوت عالي وتلاحكت روحي حطيت ايدي ع حلكي التفتت وهوا رافع طرف حاجبة مستاء
... تضحك تضحك بله هسة من احطهة وادفنهة بالحديقة اكو احد يلومني ؟
خفت رجعت راسي ليورة ولميت شفايفي ..
رهف ... خالووووو والنبي شكلك صاير يجننن بعد ضل هيج كل ما يطلع شعرك طگة صفر اويلي طالع صينية بسبوسة لو بس الله يهديك وتجي تاخذني من يم مدرستي مرة اريد اكشخ بيك الله عليك
البس اسود اذا ردت تجي ..
فر ايدة وقوس شفتة معاجبة وصعد باوعتلهة ومديت لساني ..
... تستاهلين فشلج ..
... طمام عار يطمج اختج انننه تتشمتين بية
الحاصل مر اسبوع والوضع طبيعي الى ان لگيت رسالة ثالثة ، تحمل سطور ذهبية للمبدع كاظم الساهر
قيصر الحب والاحساس، رفيق سهراتي وحبيب گلبي الأول والأخير ، فرحت بشكل لا يوصف هاي المرة وبعدت خوفي من هذا مجهول الهوية
مكتوب بيهة ..
( لـ عطري .. وعيون گلبي ..
امشي بهداوة يا حلو دربك خطر
خوفي ع خصرك لا تميل وينكسر
امشي بهداوة .. عيني امشي بهداوة
امشي بهداوة
.
.
امشي بهداوة واحسب حساب الحسد
ملك الاناقة جننت نص البلد
محور المقطع الاخير وكاتب "يااا اسمر ويلي ياا نار الشگر" )
قربت الورقة من صدري ضميتهة وصحت اووووف اوووف منووو صاحب هذاا الذوووق الرااقي ااخ منو
احساس ورقي وفوك هذااا خط حلوة ويسميني عطري وهسة كاتب عيون گلبي
طبت رهف خلت طشاري ماله والي ضميت الورقة بنص الكتاب ورجعت اقرا
خصمت عيونهة بشك وتقربت حاطة ايدهة ع خصرها وتهز بروحها
... ليش ارتبكتي ونگلبت احوالج شنو ضميتي طلعي اريد اشوف
سويتلهة تؤؤؤؤ ما ضميت شي ورقة امتحان ماخذة بيهة 70 ومتضايقة منها كلش
رهف ... ام بخت تسعينات ترگع وماخذة 70 تبجين جا مثلي اكتل روحي ع 60 تجي 56
... لو تكضين كتابج بكد ما تكابلين المراية جا هسة انتي اشطر وحدة بالصف بس اسم الله عليج تموتين ع تسخت والكسل اااخ لو خالي يدري بيج مرات تضلين برا المدرسة تفترين بالمحلات حد ما يدك الجرس يله تشرفين الا يعلكج بالبنكة ..
جرت حسرة وبوزت
... ترة مخنوكة حقي اسوي هيج اريد اشوف العالم
تدرين درة راح اكسر حصالتي واشتري مبايل عاجبني يكون عندي مبايل
... شتسوين بي ترة ما يخلونج تحطين بي رقم كل من هب ودب بس رقم امي وكاتي وخوالي حتى الصديقااات ممنوع ..
... لا مو منوع انه اقنع امي اااخ بلكت اصاحب واعرس طكت مرارتي ماكدر احط مكياج براحتي ولا اطلع براحتي
... هذاا سقف احلاممممج؟
هزت راسهة بـ اي وهية تبتسم وخدودهة موردة بفرح فريت ايدي وغميتهة
... جاا هج امداج ..
رهف ... تعاركنة شوية انه ودرة وبعدهة تمددت بفراشي اريد انام واحلم اشتري مبايل بلكت صهيب يصارحني اووف لو يخطبني
حلو يجنن وشخصية ومؤدب كلشي تتمناه البنيه بي
وهوا نظراتة الي كلها اعجاب
اذكر مرة طالعة من بيتنة للمدرسة وهوا شافني تصنم بمكانة يباوعلي مبتسم
ومرة اجالنة جنت لابسة دشادشة جوزية كلي
... لبوووووة
اووف لو الله يكتب من نصيبي يا صهيب وتصير رجلي اووف لو بس تصير الا اعيش ملكة بحضنك
هوا شنو اريد من الدنيا غير حضن صهيب وشهادة السادس
غفيت وفزيت ع صوت الباب ينفتح شلت راسي من المخدة شفت درة لابسة ثوب النوم البنفسجي وشعرهة مكفوش جنهة طنطل
صحت ولج درة وين مولية لا يشوفج واحد من خوالي وتنگطع خلفتة من الخرعة
التفتت تباوعلي بنظرة حقد خبيثة ، عدل كعدتي وكتلها ... شبيج مطنكرة خاف احجي وياج وتضلين تزگطين ..
ما حجت شي ودارت وجنة تنزل، كمت من مكاني بخوف شبيها هااي يمكن تحلم، مشيت وراها تمشي بهدوء وتتلفت
شافت تيشيررت خالو حر مشرور ع محجر الدرج جرتة وفاتت للمطبخ اني امشي وراها بهدوء
فتحت جرار الكاونتر طلعت مگص وكصتة، بعدها ضلت تشكگ بي بايديهة بكل هدوء
التفتت ولا باوعتلي ولا كأن شافتني فتحت باب الهول وطلعت للحديقة ضلت تحبي ع ركبهة وتتلمس بالكاع غرزت اصابعهة بالتراب وضلت تحفر بغضب
حجيت بخوف دررة؟ شتسوين ولج تعاي اسم الله حلمانة يمكن
التفتت شافتني فزعت وكامت ركض ع باب الطارمة
تريد تفتحة حسيت الوضع غريب صحت بأعلى صوتي .... دررررررررة ولج تتعاالي
فتحت باب البيت وركضت بالشارع ........
