 |
رواية بيت الخبازه الفصل السادس والعشرون 26 بقلم زهرة الرمان
بسم الله الرحمن الرحيم
السلام عليكم ورحمه الله وبركاته
#بيت_الخبازه .......#بارت٢٦
بقلمي *
ذا النون
صار واهسي اوكف بعيد عن بيت عمار وابقى اباوع عليهم بلكي استبرق تطلع
عجيب مايوم طلعت لمكان
قرروا اهلي عرس يوسف
كلت فرصة تروح غدير تعزمها او امي تعزمهم كلهم بلكي تجي
راحت أمي كالت زوجه عمار رايحين لبغداد ياخوفي بعد مايرجعون
لاكابل ببتكم صبح ومسيه
بلكت يشفق علي أهل الحميه
خديجه
طلعت إني وام رحمن لبيت السيد
دگينه الباب طلعت مره كبيره بس تشبه العلويه سلمنا
كالت تفضلو من عرفت نريد نشوف العلويه
إني مو أول مرة ادخل للبيت بس هاي الغرفه ماداخله بيها
غرفه چبيره كلش وبيها غرفة نوم بيضه حلوه حيل
بس العلويه على الفراش مو العلويه ذيج الاعرفها
نايمه كالت اختها
اخذتنه للصاله وبقيت ابجي بحرگه
الهه منزله بداخلي
اختها اسمها ام ياس
ام ياس
حبيبه لاتبجين لأن تزيد حالتها سوء إذا تشوفنه نبجي من تكعد أريدكم تغيرولها جو بسوالف وضحك هسه هي التحتاجه واحد يغير الها جو
خديجه
شنو حالتها مو شالوو الغده الدرقيه
أم ياس
أي بس تكتلات لكو على الغده جانت تختنك
طلعت اورام خبيثه
خديجه
كالت اورام خبيثه وبقت تبجي
وتسولف عن كرمها وأخلاقها وشلون تساعد الغريب قبل القريب
ماعرفت احجي إلا گلت
العلويه قوية وراح توكف على رجليها وراح أطيب
أم ياس
من حلگج لباب السما حبيبه
خديجه
بقينه تقريباً ربع ساعة ضيفتنا ام ياس
البيت هدوء توقعنه ماكو احد
نسولف طببعي بس إني سبطرت عليه العبره ابجي بحركه ما اتخيل العلويه تروح هيج
أم ياس
تعالو حبايب كعدت العلويه
خديجه
ابتسامتها إلي احبها تلگتنه بيها وبينت فرحتها من شافتني
العلويه
اليوم مطلوبتلج هديه ام رحمن على هاي الدخله الجايبه بيها خديجه
خديجه
بقت حاضنتني حسيت بضعفها وحبها سوا اريد اتمالك نفسي ما ابجي
تحضني وترجع تباوع بوجهي وتكررها بچت وإني انفجرت بالبچي
مسحت دموعي
علويه بنات أمي وابوي ما حسيت بحبهن مثلج
العلويه
أنتي اخت دنيا وعندي مثل ما احب ام ياس
وقنديل احبج. شنو هاي ليش مكلفه نفسج
خديجه
هاي اشياء بسيطه مو من قيمتج تدرين قدرج عالي عندي
ام ياس
الهديه غسل گلوب مو بسعرها واضن تعرفين العلويه تحب البخور بس حالياً منكدر نشعل لحد ما تصير احسن
خديجه
بقينا تسألها عن وضعها الصحي صوتها شويه بيه تغيير
سألتني شوكت اجيتي من كلت البارحه والعصر ارجع ما قبلت كالت اليوم تبقين
اريدج العصر يمي تجين
طلعنا إني وام رحمن اتصلت على عمار كتله اليوم هم باقين لايدز السايق
رجعت للبيت صفا واستبرق قشعم جايب ريوك وكاعدين يتريكون يم الزايره وضحكهم للباب
قشعم
خاله وصلتج لبيت ام رحمن ورجعت هنا ردت أحد يكعد ماكو رحت جبت مي وبقيت ارش كلهم كعدو
وتعالي تريكي ويانه
كيمر وصمون حار يلا
خديجه
ألف عافية على گلوبكم
سألتني استبرق عن العلويه
وانقهرت كالت اشوفها شخصية قويه ماحب تنكسر صورتها
وبچت
صليت صلاه الضهر وبقيت ادعي للعلويه تتشافى
ببيت الزايره احس بناتي مثل فراشات طايرات يفترن ويسولفن
الغريب استبرق مندمجه وي قشعم
صارت ب4ودكت العلويه عليه التلفون
الو
ها خديجه كون رحتي
لأ علويه شلون اروح موجوده
تعالي هسه اذا تكدرين
هسه صار
استبرق
شتريد يمه العلويه
خديجه
مادري هسه اروح واشوف
طلعت ووصيت قشعم لا تطلع خاله لحد ما اجي
وصلت لبابهم طبكت سياره بيها مسلم
بقيت بوگفتي مدنكه
سمعت شلونج خاله عرفته صوت مسلم
فتح الباب كال تفضلي فوتي
دخلت جوا من باب الصاله شفت العلويه اشرتلي ادخلي
مشيت على السريع نوعا ما
علويه ليش كايمه من فراشج
العلويه
اضوج من نومه الفراش تعالي تعالي
ما حجيت الصبح لأن ام ياس موجوده ردتها تروح وخابرتج
خديجه
كعدت يمها ولازمه ايدي
العلويه
خديجه إني هواية طلبت نفس الطلب بس هالمره اترجاج امنيتي اشم ريحه طفل قبل لأ اموت
سيد موفق طيب وأعرف وراي راح يتاذى محد اله اريدج اله واليه هلمره اترجاج
مو تكولين أنتي صاحبه فضل
آخر امنيه هي طفل اشوفه بيدي من موفق
خديجه
شكلها يكسر الگلب بس هاي حياه ماكدر لاجل الخواطر اغير حياتي واذي بناتي هو المني وبيه شفت بس الخيانه والاذيه منهم
عمهن وما شفت إلا اذيته على بنات اخوه
واخوي شفت الاذيه منه
شلون أأمن بالغريب صحبه العلويه حلوه صحيح وصاحبه فضل بس مو ارد الفضل اعرض روحي وبناتي لتجربه ماعرف تفشل او تنجح ما أعتمد على كلام وبس شعرف إني عن السيد هي زينه شمدريني بالعشره شنو هو شنو
يجوز تتشافى وتغار وانوب ابقى بس تجربه حتى يتشمتون بيه هاي إذا عافوني بحالي حامد واهله
انعگد لساني لا اكدر اضوجها وهي مريضه ولا اكدر اكول موافقة لأن إني ما مقتنعه
بقيت شويه
علويه انطيني وقت افكر
كلت اكسب وقت
العلويه
عليج بداعه مروه لاتأمليني بأفكر وابقى أتمنى وبعدين ترفضين
امرج بيدج ومحد اله حكم عليج يسجل كاع باسمج مهر حتى تضمنين حقج وحق بناتج شوكت ما شفتي العيشه ما والمتج كاعج تبنينها وتكعدين وها مؤخر رقم زين حتى تتاكدين احنه شارينج
خديجه
طلعت مثل المضروب على راسه
حسيت قنعتني ليش لا
شنو حرام لو عيب
حامد مايصلحلي ولا راح يأيس مني راح يبقى يزن ويون ويحشم حتى اقبل
وإذا ارفض راح يوكف حياتنه خاصه بناتي يخافن منه
وتصرف استبرق من كالت العلويه هي مخابرتها لأن خايفه عليج
وتكللها
استبرق
لحي على أمي خلي تتزوج تعذبت بسبب أهل أبوي
نريد نبتعد بس ببغداد لاحتنه عافيه وبس ببغداد اللكمه ما نغص بيها رغم الييت شبه مهدم ونشتغل خبز وتعب بس مرتاحين
خديجه
هذا كلام استبرق العلويه يدلل ان هي مشجعه العلويه تجي
رجعت سولفت ل استبرق وسألتها ردت اعرف رده فعلها هي وصفا
استبرق
يمه هايه ام قشعم من مات زوجها مو تزوجت أكبر منج متزوجه وعدها ضار كومه جهال ومن جار الوكت عليها اجت وكعدت يمه
وزوجها هذا مدللته وهو مقعد تكول من جنت بضيم ومحد اليه هو تزوجني ودللني ترد الجميل اله هسه بس عاشت وياه براحه سنين
من خابرتج العلويه كلت اكيد تكلج استبرق خابرت
ونزلت حياه ويقت تسولفلي
يمه إني مجرد بولايتنه كارهه روحي أهل أبوي
عقولهم قافله مثقفهم لا يحل ولا يربط
ونسولنهم الله مسلطهن على الزلم
والزلم تشوفينه تكولين هذا بس هوه وبس تالي قوته على الضعيف
يمه بس عمو عمار زين وسيف ابن حامد يشبهه بس لايحلون ولا يربطون
اطلعي منهم واخلصي
حامد يبقى وراج وانوب ايمان تعرف هسه هله هله تفرج امه الثقلين
خديجه
وأنتي صفا
صفا
إني أحب العلويه بس يعني تجيبن بنات وبعد ماتحبينه
خديجه
يمه شلون هيج فكرتي لأ يمه هسه مو احبج واحب استبرق ومروه الله يرحمها عمت عيني
نفس الشئ إذا الله قسم بطفل هم اخوانج
هسه أنتي تكرهين فضل
صفا
أي اخوج من ايوج
اليجون اخوانج من امج
اجه قشعم سولفتله
قشعم
خاله
اعرف بيت السيد من جنت بالابتدائيه جانت زايره سنيه ام صكر هنا معروفه وصاحبه واجب شلون عرفت ييت السيد جان ابوه عايش السيد وياه
يوم من الايام إني تنطيني زايره سنيه فلوس اعيث بيهن لو اشتري دعبل لو اسوي (ناشوكه --هي سنسله وقبضه خشب يشتخدمنها للقتال فنون القتالية بالصين واليابان )
فيشوفني ابو السيد السيد الچبير تشتكيله جانت زايره سنيه عني
تكله مبذر وما يقرا ومسربت
وهذني كلهن لان صغير وماكو خوف من أب او ام
صاحني كال اريد اسولفلك اسمه هو سيد لطيف
سيد لطيف
اكو جان رجال عنده ولد الولد ماياخذ الكلام گله ابوه اريد منك يوميه عشىر فلوس (عمله قديمه) تشتغل وتجيبلي عشر فلوس
الولد معتمد راح لامه لأن عاطفيه الام يتمسكن تنطي العشر فلوس يروح يخليهن بيد ابوه ياخذه ابوه للنهر ويشمر العشر فلوس بالنهر
يوميه هيج يسوي بس الولد ما يهتم لأن ابوه يذب العشر فلوس بالنهر
نفس الشئ يوم اجه لامه يريد فلوس كالتله ماعندي
خلص العندي اضطر يطلع للشغل
انطوه اجرته عشر فلوس اجه انطاها لابوه اخذه وهم ؤاحوا للنهر راد يشمرها كمز الولد لابويه شلون اتذبها من الغجر لهسه اشتغل وتذبها
ابوه گله لأن أعرف ذنيج من امك بدون تعب من اشمرهن ماتهتم
بس هاي العشر فلوس جاست ضلوعك لان بتعبك
قشعم
خاله من يومها تعلمت ان الفلوس عزيزه من الإنسان يتعب بيهن وتعلمت
ف الساده بهذا البيت يكولون عليهم شويه عص او حريصين لأ همه مو هيج بس الساده ذوله بهذا البيت زايره سنيه تسولفلي يخافون من وكعه حبه التمن ومن حرف الخبز يخافون على النعمه فلذلك زادت وزادت وصاروا عدهم حلال ومال. لان سيد لطيف اجت فتره ينطي هواية من فلوسع من أحد يسأله يكللهم ماريد اطول وگفتي يم رب العالمين عن وين صررفتهن خليهن يم اليتامى والمحتاجين واخلص وجان يزيد بعد أكثر
ولوما حافظ سيد موفق على هاي النعمه ماجان هسه أكثر بعد من حلال ابوه
فخاله إلي يخاف الله ماينخاف منه
وإلى متى باجر يتزوجن البنات ويلتهن وتبقين وحدج تحسبين الحايط جم طابوكه
خديجه
كلام قشعم والبنات والعلوية خلاني اقتنع نوعا ما بس عندي تخوف من حامد ورده فعله ما اعرف شنو يسوون اصلا حمويني احس انزل من نضرهم او يطالبون ببناتي
للصبح منمت صليت صلاه استخاره ونمت
هاا يمه شو بيدج مخيط
أي هذا المخيط اريد اسوي طبگ چبير
جابو لابوج وزنه عنبر ريحتها ترد الروح
اساعدج يمه
لأ يمه لأ ذيج الكلاده البسيها بيها شذىه زرگه تلوگلج
خديجه
فزيت
أمي أمي تحوك طبگ تلمست وين الكلاده شذرتها حلوه لوزه زرگه
لكيت التلفون يدك
عمار
ألو.ها خويه
عمار
ها ام استبرق شنو اليوم هم ما تجين ما خابرتي
خديجه
بعدني ما مستوعبه بيش ساعه هسه ليش
ونمت ورا الصلاة هواي باوعت حيل بالعشره ونص الصبح ونايمه تلفتت لأ استبرق ولا صفا
يمه وين بناتي
زايره سنيه..شبيج چنچ زبرنگه اطفرين هناك يم جشعم المگير مجابل حميده وجاعد يتنوع ببها
اكله املچ عليها امها ولت مايرضاش
خديجه
على منو خاله يملچ
زايره سنيه.
على حميده جا شنهي اضنج عدج راي غيره
خديجه
خاله لايسمعون بنيتي طفله وينها وين قشعم اخوها
زايره سنيه..لا طاگه وصايرلها ث.....ي
خديجه
يايا خاله اسكتي
زايره سنيه
خايبه انه بكدها واخذت أبو صكر شنهي وراسه رز وماش
(تقصد شعره بيه لون ابيض واسود)
خاله فدوه اسكتي الزايره تشبچ لحيه بلحيه يا صفا يا قشعم
كلت لعمار يدز السياره
وكلت للبنات تحضرن نروح
اجه السايق وسلمنه على قشعم وخالتي سنيه بقو عيونهم ورانا وخاله سنيه تبجي تريد صفا تبقى
بس حالتها الصحية احسن اطمأنينه عليها جنت متوقعه الكاها مواته بس الضاهر تتخربط وترجع هيج كال قشعم
وصلت للبيت لكيت سرئ توهم جايبن من اهلها
يومين وإني فكره تاخذني وتجيبني وما صحت فرصة نكعد إني وسرى
رحت للحضانه البوم ورجعت لكيت سرى جايه
سرى
ام استبرق اجه حامد وأنتي ببغداد
هو ورشيد
سألو عنج
خديجه
خير شعنده بعد حامد
سرى
لأ جاي هالمره غير شخص يمعوده بقيت اتصنط وما اصدك
خديجه
شبيه شنو تغير
سرى
ماعرف بس يريد يروح للعمره حتى من سأل عنج ما علق من عرف رايحه لبغداد سكت لهذا مستغربه
خديجه
خاف الهددوء الذي يسبق العاصفه
حامد
وصلت لببت عمار وتندمت لأ ما اروح ولا بعد أتوسل بيها
كافي
التفتت على أبو التكسي اخذني للسوك
طلعت للسوك قريب بيت عمار نزلت افتر بدون هدف
شغت رجليه خذتني لصديق يبيع قماش
مال دشاديش رجاليه
وابنه يمه مخلي مكينه خياط دشاديش
سلمت وكعدت
ابو تقي
هله وألف هله منو اليوم ذاكرنه حامد الداود
الله بالخير
حامد
الله محيي اصلك الله بالخير والعافيه
أبو تقي
شلونك شخبارك جنت تمر تفصلك دشداشة تجي نشوفك بديوان بيت عاتي هسه ماكو شنو
بس لأ تكلي اخذنلك مره بضحكه
حامد
لأ اخذت مره ولا طالع ولا مفصل دشداشة بس الطلايب
أبو تقي
خيرك أبو شكر شنو شو مغثوث
حامد
مهموم عباس (ابو تقي )مهموم
أبو تقي
سلامتك ولك شبيك
حامد
مابيه وصينه على چاي ورخيت راسي على الكرسي
أبو تقي
والله شلون ما اشوف كله بسبب مره اعرفك صار دهر
حامد
هي اكو مصايب بالدنيا غير من المره كله من وراهن
أبو تقي
شنو ام اولادك وياك
حامد
لأ
أبو تقي
لازم رديت لأيام العشك ولك
حامد
هو المفگور يفرح شبيك دومها عكس تريدها تجي عدله متصير
أبو تقي
انصحك لله الما يشتهيك لأ توصل يمه
والما يريدك لأ تذب نفسك عليه
حامد
اييي خوش
أبو تقي
اكلك إني وعلي العويمري
نروح راس الشهر للعمره امشي ويانه غير جو وارتاح إحسنلك
حامد
هيج تكول اشوف اوديلك خبر إذا انوي
خديجه
سولفت لسرئ عن العلويه بالتفصيل
سكتت شويه
سرى
والله أم استبرق إني اكلج إذا خوش ناس شكو بيها بعدج كله عمرج
٣٣يعني بدايه الثلاثين
شوفي حياتج ومو خساره بلكي البنات تتغير نفسيتهن هسه ماطول حامد يسمعن بوجوده هنه يخافن خطيه
العيشه مو مكان ومصرف
حاله بنتج استبرق زفت ولا دراسه
وهم احجيلج الصدك اكو أطباء يسوون عمايات الفلوس هم تفيد وتكولين حالته المادية فوك الممتازه بعد شمضيعه هنا
خديجه
يجوز ارد بالموافقه بس حامد خاف يسمع ويسويلي مصيبه
سرى
والله ما بنحزر بس محد اله حق تره بالزواج
خديجه
أخاف على بناتي ياخذهن
سرى
حامد حتى لو يكول اخذهن بس البنات ما يقبلن وما يكدر ياخذهن
خديجه
تهورات حامد تخوف وحده منهن خرب وجه استبرق
شلون إني حيل أخاف على بناتي صفا ماتتحمل لاصوت ولا صدمه
بقيت هيج وسرى كالت لعمار
دز عليه نزلت لعمار بس خجلانه كأن مسويه شئ عيب
عمار
أم استبرق
حجتلي سرى السيد بغداد معروف
وهاي حياتج إذا ترجعين لداخلي ماكدر اشوفج تتزوجين ثكيله على گلبي بس بحالتج
بناتج وأنتي بوضع ما يخليني احجي
ولا اكدر اكلج ليش ما تقبلين بحامد لأن أعرف ايمان وأعرف شنو ممكن يطلع منها
وحتى حامد عصبي وحدي مراح يتقبلنه البنات
بس بنفس الوقت ما اعارضج
إذا اقتنعتي وتبقين اختي
خديجه
لوما اعرف أنت أخوي ما اتجرا اكلك
لذلك بصرني عمار
عمار
ماعدنه حل إلا ننتظر يروح للعمره هذا احسن وقت بصراحه
وخلي الباقي عليه
خديجه
مراح يسكت ولا راح يعيفك
عمار
معليج خلي عليه
خديجه
بليل ودك التلفون رقم العلويه بعدني ما مجاوبتها بالرفض او القبول
بس استغربت بليل متصله
اجاني صوت رجالي
كعدت ويمي استبرق طفرت يمي وصفا من هالجهه
الو
نعم منو
إني سيد موفق حضرتج ام استبرق
أي إني
أم استبرق العلويه بالمستشفى تريدج إذا ممكن تجين إذا صعبه ادز سايق
لأ لأ باجر الصبح اجي