 |
رواية بيت الخبازه الجزء الثاني 2 الفصل السادس 6 بقلم زهرة الرمان
استبرق
شفت بعيون العلويه وسيد موفق خوف على أمي مفقود بعيون اهلها
السيد حتى ما وكف بقى بگعدته
والعلوية لسانها ما بطل دعاء وترفع شويه من ربطتها وتنخى رب العالمين
خفت على صفا الي صارت مثل الثلج تسألني
أمي ما تموت ماتموت مو استبرق
لأ شبيج هسه تجيب طفل حلو
نص ساعه مقدارها الزمني عدنا سنه
طلعت الطبيبه ووجوهنا بوجها صار
الطبيبه
اطمأنو حمد الله على السلامه
العلويه
ركضت اشوف
سيد موفق
نسيت بثواني خديجه جابت همي صار اشوف خديجه
اريد اشوفها وبس ماتذكرت طفل ابد
ركضت صاحت ممرضه بس مره وحده تفوت
الممرضه
جيبي ملابس الطفله
استبرق
جنت جايبه بالجنطه خاوليات صغار وجرچف صغير
انطيته الهم
ودخلت العلويه
العلويه
ركضت على الطبيبه هاا دكتوره
الطبيبه
الحمد لله الطفله طلعت مابيها شي وآلام هم بخير بس نحتاج نخلي الطفله بالخدج وآلام تحت المعاينه شويه
العلويه
ليش شبيهم دكتوره
الطبيبه
الطفله تبقى بالخدج حتى نراقب وضعها افضل للطفل بهاي المرحله
وآلام محتاجه وقت شويه تنظيف ما بعد الولاده تعرفين
العلويه
أكدر اشوفهم
الطبيبه
الام بعدها بالصاله بس الطفله من يدزونها للخدج شوفيها
العلويه بقيت گبال الخدج لحد ما شفت طلعو الطفله وگالت بنت خديجه مزهر احس روحي طارت وي ايدها لافينها بچرچف
فتحت جنطتي بديت اسحب وانطي للمرضات بدون حساب اريد بس ينطني الطفله
حضنتها وبقيت اردد اللهم صل على محمد وال محمد
يا الله لك الحمد والشكر واعيد بيها
ومنو تگلي وإني انطيها بدون ما انتبه اشمها وارجع اگول الحمد لله
دموعي اريد اسيطر عليهن ماكدرت
طلعت والممرضه تكلي انطيني الطفله اوديها للخدج
لأ بس ابوها يشوفها
طلعت واكف موفق
موفق
طلعتلي انعام بيدها لفه الطفل
العلويه
تعال موفق شوف
موفق
قربت اديها على وجهي
وجهه صغير كلش واحمر كلشي بيها صغير وتفتح بعيونها وتسدهن
شي عجيب هاي قطعه مني أي منك موفق اسولف لروحي
الممرضه اخذتها گالت للخدج إني ما انطيت أي رده فعل سكتت تماماً بس خديجه ببالي
راحت وراها العلويه وحتى استبرق وصفا
تقربت لباب الصاله طلعت ممرضه
بلا زحمه عليج اريد اشوف خديجه
الممرضه
خديجه شنو
موفق
خديجه مزهر
الممرضه
بعدها تحت المعاينه الطبيبه يمها
موفق
ليش شبيها
الممرضه
ما اعرف هسه تطلع وتكللك
يلا انطيني فرحه ولادتها بسلامه
موفق اتلمس بجيوبي وماعندي محفظتي بالسياره ونازع حتى السترة
بعد شويه تعالي هسه ماعندي
الممرضه
اوو مفلسين
موفق
بقيت گبال الصاله وعيوني على اليطلع ويدخل اريد اتحرك ماكدرت
خديجه
ولادتي مو صعبه بس لأن ملفوف الحبل السري على رگبه الطفل
الطبببه وياها ممرضه
بثنين ملاقط وسحبوها إني اسمع
وشيگولن انفذ ورجليه يرجفن بالطلوگ واحس اريد افقد ماكدر اطلگ وتعيط الطبيبه عليه راح تخنگين الطفل وأرجع واوعئ شبيه هيج
لحد ما سمعت صوت الطبيبه كالت كافي كافي أحس ثكل راح مني اشو ماكو بچي
بقت تصيح الطبيبه على الممرضه انكتي اضربي اضربي
شويه وإني اريد بس ارفع نفسي حتى أشوف الطفل
ماكدر أحس انسحب للكاع والدنيا دوائر سودا صارت واصبر بروحي أريد اسمع صوت الطفل
بچه صرخه الطفل سمعتها وبعدين ماحسيت
الطبيبه
بسرعه الابره
العلويه
طلعوني من الخدج گوه شكد حاولت ابقى ما قبل طبيب الموجود
رجعت اشوف خديجه
لكيت البنات يمشون وراي وإني مادري بنفسي بوستهم امكم جابت احلى بنوته مثلكم
وصلت لكيت موفق يفتر
هاا
موفق
شهااا وين چنتي ما يقبلون نشوف خديجه جابت طبيعي لهسه شسوي جوه والطبيبه ما طلعت فهموني شصار على خديجه
العلويه
بقيت ادك بباب الصاله وكوه خلوني بباب الخارجي أدخل
اجت ممرضه
عيوني وين مريضتنه
الممرضه منو مريضتج
العلويه
خديجه مزهر
الممرضه إني طالعه حتى اصيح على ولي امرها
العلويه بادت رجليه
شبيها إني اختها
الممرضه هاج هاي ورقه لمصرف الدم بسرعه
صار عدها نزف
تحتاج دم الطبيبه جوه جاي تسيطر على النزف
العلويه
ليش نزفت شبيها
الممرضه
الطبيبه بعدين تكللكم حالتها استعجلي عيوني
العلويه
طلعت لموفق
هاي ورقه روح لمصرف الدم خديجه تنزف
موفق
شنو
تنزف
ليش ليش انعام
العلويه
ماعرف استعجل
موفق
ركضت لمصرف الدم
كال ماعدنه حالياً لازم تأمنون دم ماعرف منين
تخبلت خديجه تموت وهمه عدهم طبيعي ماعدنه دم
شنو ارواح الناس هيج رخيصه
ركضت للصاله
نسيت نفسي
دكيت الباب مال الصاله
وينج دكتوره
طلعت ممرضه
ماااكو دم بمصرفكم
تعالووو اخذو مني شنو ماتت عدله احجي
الممرضه
على كيفك أخي
موفق
اكلج أخذي مني دم وانطوها شنو على كيفك
الممرضه انتظر هنا هسه
العلويه
اجه من المصرف موفق مثل المخبل صار
يعيط على الممرضات ويسحب بالقميص ويعيط اخذواا مني دم وطلعوا زوجتي اشوفها
سحبت البنات خاف يخافن على امهن
رحت اطمأنه موفق اهدا هسه نتبرع الها
موفق
ما تشوفين أنتي مصرف المن مفتحين إذا ماكو دم
اجت ممرضه اخذته يتبرع
العلويه
توسلت بالممرضه ادخل أشوف خديجه
دخلت الممرات بيها كم مره التفتر وإلي بيدها مغذي والثانيه تصرخ
اخذتني كالت لاتخلين الطبيبه تشوفج بقيت من بعيد
خديجه على سديه والطبيبه بيدها قطع گطن وشاش كبيره وتنظف من الداخل وإني احس اقشعر جسمي
مشايفه هيج حاله قبل كل الولادات التصير اشوف بس من كاعده وخلص كل گرايبي وصديقاتي هاي أول مرة ادخل لهلمكان وتوقعتني الممرضه أعرف أو عندي اطفال
لأن سألتني خديجه كم طفل عدها كلتلها هذا الطفل الرابع
اباوع من بعيد اسمع الطبيبه عاطت خديجه خديجه اكعدي رضعي بنتج يلا صيري قويه
وإني اباوع جواها صايره بحيره دم وهوسه ماعرف شنو هاي المكان احسه يرعب
حسيت انين خديجه
اسمعه تكول بنتي وين اخخ موفق موفق بنتي بنتي وين
وج يمه مروه يمه
العلويه
خفت يمه شافت مروه بس لاتموت يمه
انتبهت الطبيبه
حجت وياي شعندج هنااا اطلعي اطلعي
تقربت عفيه إني اختها فدوه اريد اطمأن عليها بناتها بره وزوجها خايفين
الطبيبه
وإني هناا اريدها تطلع لعائلتها ماشوفين المريضه جايه عدها ولاده يادوب كدرت أتأكد أن الجنين بخير وجيبتها
العلويه
زين ليش صار نزف طبيعي كل وحده لو شلون
الطبيبه
حبيبتي الجنين طلعته بملاقط حتى اگص الحيل الملفوف على رگبته
الانسجه رخوه ماتقلص الرحم بسهوله بدت تنزف هاي الحاله إلا عدها فقر دم
محلله هي قبل هاي الفتره ؟؟
العلويه
تذكرت شلون صارت هواية احداث حتى ما راجعت طبيبه
كلت لأ
الطبيبه
النسوان يستسهلن الولاده خوش ماخذات قدوه أمي تربط بالثور وجابت وهاي تكلي أمي بالحشيش جابت ويومين وگامت
يعني ماعرف العلم يتطور والعالم يطور واحته نرجع ليوره
هاي الحروب والأسلحة خلت وأحد صاحي
على العموم عزيزتي
إني دزبت على مصرف الدم راح يجيبون بطل خلوه تحت الابط يمكم بعدين نديره الها حاليا سيطرت على النزف ابر وايدي على الأوعية ورب العالمين وگف الها
. خديجه كم بنيه عندج
العلويه
خديجه تحاول الطبيبه ترجعلها الوعي متريدها تفقد
تحجي وياها بين الواعيه والا
خديجه
عندي ثلاث بنات
الطبيبه
واجتج بنيه تخبل
رحت يم راسها بستها
خديجه منتظرينج بقيت امسح براسها
الطبيبه
حاولي تلفين شعرها إذا ملابس غيريلها
العلويه
مجايبين أي ملابس بس إني لابسه جبه عريضه فوكها العبايه نزعت العبايه وبديت انظف بخديجه ولبستها ونطتني گطن وشاش خليته الها
وهي گوه تحجي
كالت الممرضه ماطول كملتيهتا اطلعي هسه نخليها بسديه ونجيبها للغرفه
العلويه
طلعت ودموعي تصب على منظرها
مسحت وجهي وكلت للممرضه اريد اتبرع دم الها
الممرضه الرجال زوج خديجه تبرع والمصرف امن بطل كافي وزوج خديجه كال أنتي مريضه مايصير تتبرعين طلعت امسح بدموعي يم البنات طمنتهم على امهم واهدأت صفا
موفق
تبرعت وكمت كالت الممرضه ابقى شويه لأ ادوخ
كمت إني بگلبي نار اريد أشوف خديجه
مشيت شويه رجلي المضروب بيها طلقه الضاهر ما طايبه او دخت وفكري يم خديجه اريد بس اشوفها صرت اتخيل بعد ما راح اشوفها
وگعت على وجهي
استبرق
شفت عمو موفق اجه يمشي گوه
وصل قريب وكع ركضتله واخذت ايده وگومته
نكت نفسه
موفق.
جابو الدم
استبررق
أي هذا خليناه
جوه الابط يدفئ
طلعت العلويه ركض عليها عمو موفق
موفق
هااا انعام شفتي خديجه احجي
العلويه
غصه وخوفه
اطمأن موفق هسه يطلعونها الحمد لله احسن كالت الطبيبه
موفق
شوكت
العلويه
بس شويه كالت الطبيبه
شويه واخذوا الدم
استبرق
طلعوا أمي لافينها بعبايه بسديه بس كوه تباوع بالوجوه علينه وأحد وأحد وتدفع بيها المعينات
العلويه
ركض موفق وإني احجي وياه مادرا بنفسه
صاح خديجه من شافها
إني هم رحت وراها
استبرق
خلوها بغير غرفه وعمو موفق والعلويه وإني وصفا نمشي ونريد نلزمها
خديجه
حسيت لمن دارتني الممرضه وضربتني ابره اباوع على الحواليه بس الم بجسمي قوي بعدني بصاله الولاده الطبيبه يمي
الطبيبه
هاا خديجه
شلونج
خديجه
اريد افتح عيوني ماكدر اسمع الطبيبه لساني ثكيل وراها سمعت العلويه
تحجي وياي لمست جسمي حسيت يحركوني بس جسمي مبند
العلويه
خوفي على موفق إلي صوفر وشفايفه بيضه من الخوف وتبرع دم
وبين خديجه المنظرها يخوف
بقيت ابجي والوم روحي
جانت كاعده هي وبناتها لحيت عليها على منيتها بس لأ تموت لأن منظرها يخوف
مو كأن ساعه راحت للولاده منظرها كأن صار سنه بالمستشفى
خلوها بغرفه صديق موفق موصي بيها
المعينات راحو على موفق إلي يحجي وي خديجه وبناتها حواليها
بس موفق كاللهن ماعندي هسه هسه اجيب فلوس
اشرتله إني انطيهن
نطيت للمعينات وطلعن
بعدنه نريد نتأكد من سلامه خديجه
ودخلت طبيبتها
الطبيبه
سلام عليكم
هاا خديجه اكعدي بعد خلص الخفنه منه
موفق
شبيها دكتوره
الطبيبه
زوجتك صح ؟
موفق
نعم
الطبيبه
خديجه بطله والله تريد تعيش الطفل من صار ماتعبنه بس أول ما خلصنه من الحبل السري على الطفله
بدت تنزف خديجه
شلون نهر مو كأن هاي
صفا دمها بين اديه كلت رح ينفجر الرحم
من فقدت إني كلت ما تعيش
بس سبحان الله
اراده رب العالمين ترجعلكم
بالسلامه
العلويه
فضل تعبج مننساه شفت بعيوني شون تعبتي حتى ترجعلنه خديجه
الطبيبه
هذا واجبي بس المفروض تحاليل ببدايه الشهر التاسع هي هسه صار تقريباً ٨ايام التاسع ضهر بالسونار.وهي تكول حاسبه بعد كم يوم ادخل بشهري
على العموم الحمد لله على سلامتها.وتاخذ هذا العلاج إذا صار عدها الم عند الحاجه.واهم شئ بعد شويه يجيبون الطفله رضعيها يساعدج بتقلص الرحم وماده الساعات الأولى مهم للطفله
. العلويه
راحت الطبيبه وإني شفت موفق فاصل عن الكون وي خديجه
اخذت استبرق
تعالي بنتي نروح نشتري ملابس غيارات لامج وللطفله
طلعت مسلم برا جان كلساع يتصل واكله ابقى لأن تلفون موفق عندي
طلعت
مسلم اخذني لأي سوك قريب تندل
مسلم.. أي علويه
العلويه
طلعته إني واستبرق
اشترينه شغلات لخديجه والطفله
ووصيت مسلم يجيب أكل
خليت الاغراض بيد استبرق كلتلها روحي قبلي
سألت عن الطبيبه
لكيتها هي والممرضات الساعدنها كلت لمسلم جيب الاكل وراي
دخلت الوجبات للطبيبه والممرضات والمعينات أي شخص يمر مسلم اكله انطي وخليته يوزع المستشفى أكثريتهم وحتى بالكراج وصل الأكل
رجعت للغرافه لگيتهم جايبن الطفله بيد خديجه وكاعده
الحمد لله على سلامتج مبروك
خديجه
الله يسلمج تعبتكم
العلويه
شلون تكولين تعبتكم
أنتي الغاليه وجبتي الغاليه
ها موفق اذنت كبرت باذن الطفله
موفق
منتظرج تسمينها ماتقبل خديجه تسميها تكول العلويه تسميها
العلويه
لأ الاسم لأمها وأبوها
خديجه
اريد أنتي تسمينها شنو تتمنين يسمونج ام منو
العلويه
يعني خديجه هاي البنيه تصير بنتي
خديجه
انتي مو كلتي الطبيبه هاي أختي
هاي بنتج واعيش وياج بنتج وبنتي وأنتي أختي
العلويه بچيت خليت اديه على وجهي بجيت
استبرق
خاله منريد فال البچي خلصونه شنو تسموها
العلويه
ما بالي اسم ولا فكرت أصلا ليش مادري
اقترحوا انتم
صفا شنو نسميها
صفا
صديقتي اسمها لارا حلوه
وأنتي استبرق
استبرق
إني أحب اسم رقيه او زينب
وانت موفق
إني كلت فاطمه
العلويه
إني ببالي نسميها مروه ابقت بنفسج خديجه وراحت
خديجه
أن شاء الله عمرها وحياتها مو مثل مروه وتعب حياتها.بس ما گلتو إني شختار
العلويه
شنو الاسم إلي تحبي
خديجه
نسمي انعام
العلويه
هاا
خديجه
أي على اسمج
العلويه
لأ ماريدها مثلي
استبرق عمو موفق كال نفتح القرآن ويجي اسمها
وندك الباب الممرضه جابت لعمو موفق اوراق امي لازم يوقع
وقع وضحك
العلويه
ها
موفق
شوفي الطبيبه الولدت خديجه شنو اسمها
العلويه
قريت الاسم الاول هبه
موفق هااا شتكولون هاي الهديه هبه من الله
استبرق
والله حلو وخفيف النطق
اخذها عمو من ايد أمي گوه تريد ترضع
نراقب كل حركه الها
دخلت الطبيبه تشكرت من العلويه مافهمنه ليش
بس سألها عمو موفق
حضرتج اسمج هبه
الطبيبه
أي إني دكتوره هبه
موفق
البنيه سميناها هبه
ضحكت بفرح وباركت كالت تكدرون بليل تاخذونها
خديجه
طلعنه من كربلاء بشارع العام رفعت اايدي وگلت مشكوره يا ابن الزهره الحسين
مشكور يا أبو الفضل
وصلنه لبيتنه وجسمي يوجعني بس إني ما اضهر ماريد اخرب فرحتهم
لكيت العلويه مخابره ام مروان فارشيلي بالغرفه الجوه فراش كعدو يمي شويه
العلويه
موفق اطلع أنت والبنات شويه
موفق ليش
العلويه
روح اسبح وارتاح
بين ما ابدل لخديجه
طلع وعيونه عليها
خديجه
خلت العلويه الطفله على الفراش وخلت استبرق وصفا يمها
اخذتني للحمام غسلتني ونضفتني اكللها اكدر إني ماتقبل
لبستني وغيرتلي وإني خجلانه منها
لفتني واخذتني لفراشي
شويه وجابت معلاك وزلاطه بدت توكلني گوه إلا أكل
أول يوم تعبانه بحيث نمت
يكعدوني احس حتى ارضع الطفله وارجع انام لثاني يوم الصبح كعدت يربي شنو شو ما تبجي الطفله
لكيت العلويه يمي أول ما تبجي تكعدني ارضعها بس تكول اأء
بالنهار استبرق وام مروان وحتى السيد وصفا يمي
وبليل العلويه ما تركتني بيوم الثالث اخذتني للحمام اريدها تعيفني متقبل.الا هي تسبحني
غسلت
وما خليتها تدخل وياي
جابو سمچ اكلت خابرني قشعم يبارك اجت ام رحمن
خابرتني أمل وعرفت كالت كم يوم واجي
بيوم السابع
السيد ذبح عجل وأمر مسلم يوزعه.وبيومها
دخل يمي العلويه نامت بالنهار لأن طلع عليها تعب الايام الفاتت وإني أحس بيها ماتحمل تعب تكوين جسمها وبيئتها ترفه وما تتحمل.دخل موفق.ساعه ١
الضهر
موفق
شلونج خديحه
خديجه
بخير الحمد لله
اجه بقى يسولف وي هبه
باباتي يكللها يشم بيها ويكول اللهم لك الحمد والشكر
موفق
خوفتيني عليج
خديجه
كل الولادات هيج لاتخاف وكل الاطفال بهاي المرحله ينخاف علبهم لحد ما يطلع من بطن أمه
موفق
إني خوفي عليج أنتي خفت يصير عليج شي
متعرفين شصار بيه
خديجه
عرفت حالتك سولفولي البنات
موفق
لاتخوفيني عليج
هاي هيه بعد دخلتي هناا
.. خديجه
.اشر على گلبه وأخذ ايدي وخلاها على گلبه
توترت وخجلت
موفق
يأيابه على خجلج وعلى حلاوتج ما جنت ادري هيج شكلج يصير حلو كل وحده تولد تحلى
خديجه
هاا سيد خجلتني
موفق
بجت هباوي
اشيلها
خديجه
لأ إني اخذها وكفت اخذتها وخليتها بحضني
يباوع عليه وعليها ويبتسم
اتصلو عليه يردون يجون خطار يباركون اله
وبدوا اصدقاء يجون ويباركون وبعدين اجوا أهل سيد موفق
گرايبهم هواية اجو وسووا غدا الهم والعلوية تروح وترجع توصيني ممنوع تتتحركين وتعيفين البنيه وحده إلا أني لو استبرق يمها
واجت ام رضا وهلهلت ووجها بيها الفرح واضح وبچت وسكتتها العلويه
شالت الطفله يموفق خويه الحمد لله شفت الضنا الحمدلله
موفق
خويه وداعتج عندي ثنين بنات وجاب هبه الهن اخت.
هاي استبرق بنيتي الجبيره وصفا هاي حلاوه البيت
هنه مدارياتني الشرايج ملتهيات بهاي هلگدتودتها وصوتها يوصل لسابع جار
كلشي ما مفتهم من نسولني مايدرن عني
صفا واستبرق هنه اليه
أم رضا
الله يوفقن ويرضى علبهن ويسترهن
بنات اصل
خديجه تشركت منها.وخلت فلوس هواية للطفل وجايبه اليه قماش حلو
استبرق
هواية اشياء تعلمتها من العلويه.
وأول شئ وأهم شئ أن تتحكم بعصبيتها كدام أحد
خلتني قريبه عليها تأخذ رأيي تسألني عن اي حركه تسويها من ولدت أمي بقت توصيني على البيت على أي شيء او تنطيني تلفونها وتكلي اتصلي على فلانه تخيط كذا أو فلانه ادز كذا
هي انشغالها وروحها صار بالطفله تحتار شسوي وصت الها من الشمال سرير طفل قطعتين متحرك وكنتور وأشياء هواية تحتار شنو تسوي
وتفكر تغير غرفه المكتب مالت عمو موفق تسويها الها
لما أمي كالت إني اصعد لغرفتي كم يوم وتبقى الغرفه لهبه
موفق
هاا تريدن تهجولني يلشرايج
العلويه
ماريد هبه تفاركني لحظه
استبرق
اليوم اجن خوات العلويه وهي بقت توصيني لأ تهتمين لأي بشر يسمعج كلام
التشوه التشوفينه بعيونج شئ عادي وما ماخذ حيز
راح المقابل يشوفج بعيونج مو بعيونه تقديرج أنتي تسوينه مو همه يقدرونج
صيري واثقه وثابته بكلامج كأن هذا مو تشوه انما حسنه
رح تبثين للمقابل شي اسمه اقتناع
وبالغعل اختارتلي صارت ملابس انيقه ومرتبه وكدام الخطار تكوللهم هذني البنات اجو مو هيج.رب العالمين راد يعوضنه لأن محرومين
ما انطانه وحده انطانه ٣
واستبرق الجبيره
اجت بنيه وي ام ياس اخت العلويه
تفتر بالمطبخ شافتني ارتب بالمواعين ودخل عمو موفق
وهو هاي طبيعته يشاقيني ونتناگرر ويعيب عليه ونضحك
حقدت بقت تباوع عليه وعليه ووجها انگلب
أول ما راح أخذ چاي
گالت
شبيه وجهج شنو ابوج جان گصاب وطابر وجهج
ما جابوبت بس ابتسمت بوجهها طلعت
أول مرة ما اجاوب حبيت اعرف شعوري من ما ارد
رحت يم العلويه كلت إلا احرگ گلبها بقيت اتشاقى وياها ونضحك وهي العلويه من جابت أمي لهسه الضحكه ما فارگت وجها
وهاي البنيه عرفتها حفيده ام ياس رغم اكبر مني وطالبه كليه وهم مرتبه وشكلها حلو بس شبيها هيج اخلاقها
انتقمت وإني اضحك
خديجه
العلويه صار واهسها الطفله فصلت عن الدنيا كلها
ارضع الطفله بس الجهه اليمنى جف
اخذتني العلويه للطبيبه وشافتني
كالت ساعديها بمميه ووصت على حليب معين لان مجاي تشبع
جهزتلها العلويه تجهيز للحليب تعقيم
وهي تسوي المميه الها
يوم ورا يوم صارت الطفله بالنهار ارضعها بصدري وبليل يم العلويه بالمميه كلت خليها تفرح بيها
وصعدت لغرفتي والبنات صعدوا لغرفتهم
اجه موفق يمي فوگ
موفق
عليج الله هاي دگه أنعام ناقله هبه يمها وويص وويص اليل كله
خديجه
جان نمت بغرفه هبه
موفق
هاا اطرديني قصدج
خديجه
ضحكت لأ بيتك وين ما تدخل بس لاتتحجج بهبه
موفق
الحجي الصدك أي أول ما شفت هبه بمكاني اجيت أخذ مكانها
خديجه اكلج شي
خديجه
أي گول
موفق
سولفتلها عن علاقتي الزوجية وي انعام
خديجه
اعرف
موفق
شنو تدرين
خديجه
من اجت قنديل اختها صدفه وداعه بناتي صدفه سمعت
بس ما نطقت ولا حسستها ولا اريد احجي هم بيها
موفق يعني فسرتي تصرفاتها ولهذا چنتي تسامحين بغيرتها وتجاوزها عليج
خديجه
حقها تغار أنت ابن عمها وزوجها وانوب أنت دونا عن البشر حقاني حنين محترم
موفق وبعد وبعد
خديجه
شنو بعد
موفق مو تكولين حنين ومحترم وبعد
خديجه
يااا شبيك وضحكت
موفق
هذا عقلج الواعي وهدوء تصرفاتج واحتوائج للمقابل
اهتمامج بالتفاصيل طاعتج
جبرتيني إني إلي عايش بسوك وشايف وعايف
خليتني احبج خديجه
خديجه
حبك هذا لأن صرت ام بنتك ؟؟
موفق
لأ خديجه الحب انواع
حب العشره والرابطة الگرابه والمواقف الصعبه والاحترام هذا حب انعام بنت عمي وزوجتي ورفيقه شبابي وبينا مواقف صعبه وحلوه ومره وصعوبات
وحب ثاني جديد انولد هذا حب بدون استئذان بدون هيمنه وسيطره مثل الإحتلال
انتاقضت بيها
مبالاه وغيره
اشتياق لاحضان وابتعاد بتكبر
تناقض غريب
بس المحصله خلاني مثل التابع غصب
ضعفج مصدر قوتج إلي سيطر عليه
لأ مابيها مجال هاي أنتي خليتيلي سحر بالخبز الجنتي تخبزي اليه
أنتي أمريكا محتله
خديجه
بين الخجل والفرح والتوتر
گال مشتاقلج أمريكا
بعد ما العلويه صارت الطفله على طول يمها أحس نفسيتها وحتى صحتها اختلفت
تنطي صدقات عنها كل يوم صدقه تكول ابعد العيون منها
تخاف عليها بشكل مبالغ بيه تحلف لحد يبوسها تخاف على وجها واخذتني للطبيبه واخذتها ويانه لقحناها البنيه ورم اللقاح والعلوية مگايلتها وخايفه إني ادخل اطمنها
من ترتفع حرارتها تنخبص واعلمها وكأن هي الجايبه وأول طفل
موفق إذا گال أمريكا معناها مشتاقلي وافهمه ويبقى يغمز يستحي من استبرق وصفا وتحفظآ على العلويه
اليوم العلويه گالت اريد أخذ هبه واستبرق وصفا ازور الإمام الكاظم اوفي الدين ناذره
إني امل بايته يمي قبل ليله
راحو وبقينا إني ورا الغدا كالت اروح
لحيت تبقى يمي ما قبلت ومسلم رايح وي العلويه شلون تروحين كالت اروح متعوده اطلع وارجع وحدي تعلمت من العلويه
لكل قادم كرامه ولكل جاي علينه لازم نهادي وصوغه
هواية اجتني صوغات قماس وغراض انطيتها
راحت
قبل العصر بشويه اجه موفق
يعرف بالعلويه رايحه
موفق
يعني ضال البيت لمطيره مو
خديجه
يااا ياهي مطيره إني
موفق لأ إني وطارت بيه فرد طيره
خديجه
بقى يغني
ضل البيت لمطيره طارت بيه فرد طيره
وعاط تعااي امريكا ماريد غده
وراها غسلت وبدلت وهو يخابر
اجيت يمه
موفق
اكلج اليوم اتصل عليه وأحد اسمه أبو طه كال اخوج
خديجه
شنوو شعرفه برقمك وشيريد
موفق
شبيج خديجه هو اخوج لولا
خديجه
أي أخوي بس ماريده زين لأ تقربه ولا تتقبله ولا اريد أشوف ركعه وجهه
موفق
إني كلت كلمه للرجال بعد عيب
+
خديجه
شكلت
موفق
كتله تعال للبيت الرجال كلش محترم وأسلوبه. ما بيه شئ غلط شكله اطرده وهو يكول اخو زوجتي
خديجه
أي تطرده وكتلك اني مقاطعته
موفق
هذا لحمج ودمج واخوج
خديجه
وإني ماخذه قرار فلا تقهرني سيد ما يدخل لبيتي ولا اشوفه (*لأن اعرفه طماع وحقير وسمع بالسيد حالته المادية زينه واجه مثل الحربايه)احجي بگلبي
مرت ايام وايام وهدوء حياتي وي موفق إلي صار يحبني ويضهر حبه واضح ويحب البنات كلش
العلويه تعلقها بهبه يفوق المعقول بس علاقتها باستبرق كلش حلوه حتى وصلت مرحلة يتبسبسن بيناتهن ومن ادخل يسكتن
افرح لأن استبرق لكت إلي تثق بيه ويساعدها تغير حالتها النفسيه وتغيير شخصيته فضله للعلويه
رغم العلويه بعض الأحيان تبقى تركز وتضوج احس من موفق يصعد يمي بس تأخذلها كم ساعه وترجع
تعودت على طبيعيته حتى لو تغار بس ماتعرف الاذيه او الخبث
تحجي وتحسسني بغيرتها صرت من تحجي ما اضوج لأن وراها تبقى تتصرف بندم وحدها وما تكول أعتذر او شئ لا تجبر خاطري بطريقه غير مباشره
اليوم دخل موفق گال خوخه مچانت العلويه سامعتها قبل بس بينه يگلي خوخه أو خوخايتي
العلويه احسها ضاجت
وسوت مشكله بالغدا بدون سبب
صعدت شريت الملابس و الفراش على الشمس صعد موفق
موفق
زعلتي من كلام انعام
خديجه
لأ شنو عبالك صعدت زعلانه صدك جذب مراهقه إني ادخل بغرفتي من ازعل
صعدت شريت فراشنه وفراش البنات اليوم الشمس حلوه
موفق
أنتي الحلوه خوخه خوخايتي
خديجه
ليش ما تستر علينه يوميه وسويتلك سالفه خل المره صحتها زينه ماصدكنه طابت ضحك
سكتت ماشايف هيج شرايج حزب عليه صايرات
خديجه
دنزل يمعود يمها لاتضوج
موفق
ام گلب خلي هي صعدتني تكلي لاتنزل إلا وهي بايدك ددتعالي شويه الغرفه اصالحج ضوجتج العلويه
وانزلج بيدي مثل ما كالت العلويه
خديجه
يااا خلبني انزل وضحكت شجاك سيد مولاي
موفق
بس تعالي خلينه نتفاهم
خديجه
نزلت گوهةلازمه نفسي من الضحك
سويت نفسي ما ادري
وموفق نزل ياشرلها عود احجي وياها
العلويه
اعرف خديجه طيبه وزينه وأعرف موفق يحبها حقه جابتله بنيه وهو محروم وأعرف وياي ما مقصر ولا تغير ويحبني بعد أكثر من قبل
بس من اشوفه وي خديجه لو يقترب هواية احس اشتعل بس ما ابين
بس موفق كاشفني ويعاتبني
واكله صيحها نزلت كأن ماكو شي وتسالني وتسولف عادي
خديجه
خابرني اليوم موفق كال حضري غدا أنتي وام مروان عندي خطار
ومن يكول عندي خطار لازم
فخذ الخروف وياه دجاج وأكل مرتب
سويناه إني وام مروان وكمل دخل للاستقبال
واجه
موفق
بالمحلات ودخل بكر ابو طه اخو خديجه
وراد يشوف خديجه وبنات اخته وعارف صار عدنه طفله وصار عمرها اربع أشهر
كتله غداك يمنه واشوف خديجه
وهم تندل بيتها
خديجه
الله يساعدك سيد گلبي
وصخكت اكولها اله ببسكوت بيتي وببنه
موفق
هله بخوخايتي
خديجه
منو عدنه
موفق
مفاجأة تعالي أنتي واستبرق وصفا وجيبي هبه
خديجه
منو ماحب المفاجآت
موفق تعالي وتشوفي
خديجه
اخمن منو مثلا توقعت عمار بس هو يسأل وكال افرغ واجيكم منو
دخلت والبنات بعدهن فوك
شفت بكر
اجه عليه وبيدي هبه سلم
كتله
شعندك جاي أبو طه
أبو طه
إني اخوج وجاي اصالحج الحمد لله على السلامه
شو خليني اشوف الحلوه الجديدة
خديجه
سحبتها انطيتها لموفق
ليش جايني بكر لأ اريد اشوفك ولا إني اختك ولا وكفت على بابك مثل ما كتلي
موفق
خديجه شنو هذا الكلام أبو طه ببيتي
خديجه
وبيتي وكال لو تجدين بعد لاتوكفين ببابي وإني الاكلك هسه لاتوكف على بابي ماريد مباركنك ولا جيتك ولا سؤالك ولا الصله البينه
موفق خديجه هذا خطاري والرسول صل على محمدا وال محمد يكول لايدخل الجنه قاطع الزمي حدودج جاي يصالحج اخوج الجبير
خديجه خليني ادخل النار بسبب بكر
شتعرف انت عنه وتريد اصالحه ماااا بينه صلح
موفق اشششش خديجه اش يلا
خديجه
طلعت افور جسمي يرجف
ماكدر اكول لموفق هو إلي ضربني ووكع الطفل او راد ياخذ بيتي مني شنو اكله
لاحكني شيريد طلع موفق احاني
موفق
من انعام تصرفت خطا وي اختج أول زواجج
وكفت وسويت مشكله وكلت خطاري لو عدو يحترم فهمني لولا
خديجه
إلا بكر الا بكر
موفق
موو بكيفج أمشي يلا الغدا وتسكتين
خديجه
ماتحملت ومنعت البنات يسلمن تخبل موفق عليه شلون تمنعينهن ماتحترميني
راح بكر بعد ما كبب النار بينه صار زعل بينه يومين وهو ميحجي وياي
كعدت اليوم
وصلت للحمام ودخت ووكعت
