 |
رواية لك ياذا الجمال اليوسفي الفصل التاسع عشر 19 بقلم فاطمة العبادي
في طفولتنا نخشى النوم ، خوفًا من الكوابيس ان تهاجمنا
عندما كبرنا .. صرنا نخشى فتح اعيننا خوفًا من تحققها ..
انضغط نفسي ، وروحي العزيزة صارت تفرفح لا ضلت دمعة بعيني ما ذبيتهة ولا ضلت حسرة ما جريتهة وخنگتهة ايدة المحطوطة ع حلگي ..
اول شخص فكرت بي و خفت منة وعلي هوا سداد
لو يعرف بأخو يحبني وهيج يسوي وياي شنو راح يكون موقفة؟
صعبة مو صعبة من تشوف انسان قريب منك اتأمنلة وتحبة وتحترمة يجي بيوم من الأيام يطعنك بظهرك غفل ..
رفستة برجلة ضحك وبرزت اسنانة الناصعة قرب راسة من اذني همس بخبث
... انه مو بس امنع علاقتكم انتي واخوي لا عندي استعداد احبلچ علمود اخذچ ثقي بمحمد اسويهة ..
غمضت عيني اشمئزيت و تكهربت من كلامة لدرجة بعد ما اكدر افتح عيني تعبت بهاي الدقايق لحد ما بية اضل فاتحة عيوني ..
العيش على قيد الخوف دقايق كفيل بأن يخلي اقوى انسان ممكن ينهار ويفقد سيطرتة ..
طبع قبلات متفرقة ع عيوني و باس دموعي بهدوء وهمس ... راح اشيل ايدي اذا صرختي ما انزل الا وانه محبلچ .
هزيت راسي بـ اي بدون ما افتح عينة حسيت بأيدة ارتخت ع شفايفي ويتعمد يتحسسهم قبل لا يشيل ايدة
حطيت ايدي ع شفتي ترجف وفتحت عيوني باوعتلة بخوف
دنك يلم الملابس من الكاع وينفضهن من التراب ويخليهن بالسلة بدون ما يباوعلي ..جر حسرة
ما اعرف صحوة ضمير لو ندم ، الي خلاه يتحسر
ضليت امسح بدموعي بسرعة وارجف رجيف مو طبيعي جريت نفس قوي داريت بي خوفي وسجنتة بصدري ..
رفع سلة الملابس وكال نزلي يلة اذا كلولج شبيج كليلهم عثرت وطحت ع سطح ..
ما حسيت غير رفعت ايدي وصفعتة ع وجها بقوة عقد حاجبة و الشرار ضل يتطاير من عيونة ..
اخذت السلة من ايدة و كتلة بغضب
... عسا نار كلبي بيك ما تتهنى بحياتك ان شاءالله لوثتني يا قذر .... لا تحسب الله ما يشوف الحوبة تبطي بس ما تخطي ..
تفلت علي و درت وجهي انزل ..
رجليني تنردم وحدة بالثانية ما ادري شسوي و شنو احجي ، توجهت الانظار الي
شكلي مبينة باجية ومبهذلة
وحظي صاررت مها بوجهي و سألتني بقلق ... ليش تبجين خية اسم الله
رهف ...عثرت وطحت ع وجهي لأن الضوة خافت وجنت مستعجلة
مها ... اسم الله الدنيا مغرب مو زين كون سميتي بأسم الله من طحتي وتعوذتي من بليس .
هزيت راسي بـ اي .. ومشيت
اتمنى يرجع بية الوقت ليورة و اكول اسم الله ع وكعاتي ، و اتعوذ ابليس
اتمنة ..
امنيات قيد الرجاء ينادي بيها كلبي يومية ويتمناها
اصعب شي واكبر غلط من نعيش برقعة الماضي و نتمنة يعود بينة الزمن حتى نصحح اغلاطنة او نتجنبهة
بدل ما نشتغل ع حاضرنا ومستقبلنة ونداري تصرفاتنة و ناخذ العبر من اغلاطنة السابقة ..
انه مو رهف انه صرت كهف مضلم كئيب مرعب .. بسبب ليث
وبداخلي اخفي وحوش قاتلة
ضلمت اقرب ناسي بسببي ..
و اولهم درة، من فاتت للغرفة شافتني افتح شالي وامسح بوجهي بشكل هستيري وابجي بحركة كلب
اتقربت مني وكالت
... شنو وين تعورتي ؟
ما جاوبتهة احس روحي ما اكدر احجي لساني انعقد والخوف اخذ حيفة من شجاعتي
رجعت سألت بخوف مفرط ونبرة الاهتمام مغلفة صوتهة ... ولج رهف شبيچ خوفتيني خاف صار بيج شي .
رديت عليهة بغضب وانه اصك ع اسناني ... لا تصيرين لزكة لا تصيرين لزكة ما بية شي انتي ما عندج احساس واحد ما يريد يجاوبج اجفي شرج ..
فكت عيونهة وحلكها و ضلت تباوعلي متفاجئة عبالك بس انه عندي جرح بداخلي
وشايلة هم
نسيت وراح من بالي ان كل واحد كبالي عندة جرح لو تعرى كبالي جان عرفت شكد الحياة نصفتني ، ومدتلي حبال الأنقاذ المتينة الي همة يتمنوهن ..
جنت مخيرة اكدر ببساطة اختار بين اروح لعمي واشكيلة عمايل ابنة او اختار المكوث بحزن وخوف واكتم الموضوع بداخلي ..
جنت مشتتة ، تفكيري اكثر شي بسداد اذا وصل الموضوع اله راح تصير مشاكل يابو مشاكل وتنسد سالفتنة قبل لا تنفتح حتى ..
قررت اصبر شوية وانتظر نفسيتي ترتاح بعدين اقرر احجي لـ عمي لو لا ..
حطيت ايدي ع خاصرتي وبقيت اقضم بأظافري بخوف مفرط و قلق ولعبانة نفسي من جسمي الي لمسة
اتمنة اصب ناااار ع جسمي واحركة وامحي اثار لسماتة منة ..
رجع انفتح باب الغرفة ردت اعيط بس بلعت لساني و سكتت من شفت عمة نجوى تفوت وتباوعلي بقلق بعدهة سألتني وهية تتقدم بأتجاهي وتتفحص شكلي بنظراتهة القلقة ..
نجوى ... مها كالت طايحة وتبجين خو ما تعورتي ؟ شيوجعج ..
دمعت عيوني و حجيت بكسرة ... اي عمة تعورت و وجعي راح يلوحكم ..
عقدت حاجبهة متسائلة و ما لكت جواب او يمكن ما فهمتني وضلت تفتر حولي تتفحص جسمي و تحجي بنبرة حنونة ... الدنيا مغرب انه شمالني صعدتج والنوب طحتي مو زين استغفرالله
بسم الله الرحمن الرحيم اعوذ بالله من الشيطان الرجيم الله يبعد عنج كل شر .
رهف ... واذا طحت المغرب شيصير؟
شهكت وحطت ايدهة ع خدهة ... اسم الله يتلبسج جن
رهف ... ويمكن يتلبسني الحزن .
نجوى ... بكل الأحوال هوا ضرر بس ان شاءالله ماكو شي لا تخافين انه من خوفي عليج احجي هيج .
ضحكت وكالت
... خطيبة ابني شلون ما اهتملج واخاف عليج لأن اذا اتأذيتي وليدي يتأذة وياج
اعرفهم ولدي من يعشكون مخابيل و واحدهم محبوبتة تصير دلالة
لو مسها الهوى يحس و يضل يرجف عليهة
وان جان يشوفهة تتأذى يتأذى وياها لا اضعاف
و ان دمعت عينهة طاح كلبة ابير القهر والضيم
اذا ضحكت ينبلج عندة الالهام ويصير يتفنن بشغلة و حياتة وعشگة .. و يضل يرسم أيامة ويلونهن بألوان ضحكاتهم ..
رهف ... عمة باگو الوانة غفل ..
عقدت حاجبهة و كالت ... ليش متشائمة يمة بعدج صغيرة والدنيا توهة تضحكلج ..
غوركت عيوني و سكتت لحضات، حطت اصابعهة جوة حنجهة و صارت تباوع علية بتساؤول خصمت عيونهة وصارت تدرس شكلي
مدت ايدهة حطتهة جوة حنجي ورفعتة ... سداد مضوجج ؟
هزيت راسي ب لا
نجوى ... چا شمالچ ..
رهف ... ما اريد سداد عمة ما احبة
نجوى ... ماكو شي جبر بس احنة ملاحظين انتي هم تردينة خوب عمج فاضل كالهة مبينين ثنيناتهم هاوين ويستحون يكعدون كبالنة تفضحهم عيونهم .
نزلت راسي وتنهدت بضيق ... لا احبة صدك احبة بس ما اريد اتزوج فكرة الزواج تخنكني ..
نجوى ... وليش تخنكج يمة ترة الزواج حلو
تأسسين بيت وعائلة
بس تحتاجين انسان يقدرج ويحترمج ويحسسج بمكانتج المهمة بحياتة او بالمجتمع
هاي انه جنت مثلج من خذيت عمج فاضل خلاني اغير رايي تردين الصدك
جنت اشوف وجودي مثل عدمة
بس من خذاني وصار يحسبلي الف حساب وخلة الناس تشوفني مثل ما هوا يشوفني
ناجحة و سباعية ، وحياتة ما تكتمل بدوني وانة مهمة بحياتة والعنصر الأساسي بيهة
كلشي تغير كل نظرتي تغيرت عن الزواج
وعلمت ولدي يصيرون نفس ابوهم
كون لو خذو مرة يعشكونهة
وان عشكوهة ما يشوفون غيرهة و يصعدونهة للعلالي
رهف ... مادري عمة خلي اكمل السنة ويصير خير
نجوى ... ان شاءالله خير ، الله كريم ..
رهف ... والنعم بالله
طلعت من الغرفة وهية تحجي بسرعة
شلون نسيت اكول لسفانة ما تكثر ملح ! بس لا اتفشل كبال العالم ...
ارتفعت اكتافي بتنهيدة و رجعت غمضت عيني وطبق رمشي المبلل بالدموع ع جفني المتقرح
من كثر ما بجيت بحركة وقبضت ايدي وفركت عيوني ، انطرحت ع سرير و عقلي لا يأبى النسيان ولو لثواني معدودة ...
اريد الصار يروح من راسي بس ثواني اريد ارتاح بس ثواني كلبي احسة يريد يوكف بس ماكو يا حيف بس يا حيف ليث يطلع منة هيج
وانة متوقعتة انسان ثكيل وزين وكلبة طيب
الي يشوف احترامة لزوجتة ودلالة الهة ما يكول يطلع منه هيج ولا حتى يشك 1% ..
قررت اتظاهر بالقوة واطلع اصير كبالة واحسسة ان اني ما خايفة منة ولا ما يهمني شنو يريد يسوي خلي يسوي
بس ارجع واكول انة عايشة ويا بنفس البيت ويكدر يختلي بية الف مرة باليوم ..
الزلمة اذا حط بنية براسهة وراد ايفرهد سترهة راح يفرهدة
لو مو تقفل ع روحهة غرفة، لو تجيب قوات سوات بكبرهة وتحطهة تحرس بباب البيت ..
خوفي من ليث فاق الحدود مو طبعي الخوف ، انة متعودة كوية وما اخاف
بس هذا نيتة ع شرفي
مو نيتة يضرب ويأذي مستعدة اتحمل
ولا حتى خطف وقتل وتهديد
هذا شرفي
كل هذني اتحملهن الا فقدانة ..
خصوصًا اني بنص مجتمع الشرف عدهم بين افخاذ النساء ، اذا نزلت قطرات الدم قبل الدخلة بأي طرررريقة كانت!!! ينزل الشرف وتتبدة الأخلاق، تنحط روس ناس بالطين وتنقطع رؤس ناس اخرى ، بس عادي اعضاء الرجال تكون متاحة للجميع
لان هوا رجل ! ..
كمت مسحت وجهي و جريت الكحل كحلت عيوني و حطيت حمرة خفيفة ابتسمت ابتسامة جذبية كبال المراية شفت شكلي زين ما يخوف .. و طلعت
حاولت انسى او اتناسة الصار
وصرت اتنقل بأرجاء البيت بكل خفة و غرور مثل فراشة حرة الوانهة زاهية
تمتص عبق الزهور، وتنثر الوان الربيع
بس نست وراها ايدين الصياد الناوية تفرهد جنحانهة و تنثر الوانهة بأرض الرماد القاحلة ..
ورة العشا سويت جاي وصبيت للزلم سداد واكف بالمطبخ بحلكة كومة حجي بس ما يكدر يحجي لأن فلك واكفة
هية حست ع روحهة وطلعت
اجة بحجة ياخذ الصينية ورفع ايده هفة ع وجهة وعض شفتة بأعجاب
سداد ... اويلي اسمر والعيون وساع امكحلة ياويلي يابوية ، الف رحمة ونور تنزل ع روحك عمي ع هاي الخلفة لو باقي عدل الا اشيلك ع راسي وافتر بيك حتى رجلك ما اخليهن يلوحن الكاع .
رهف ... مجنون ... ههههههه
سداد ... تنعتني بالمجنون ! الا تدري بسحر عينينها ارهقني الا تعلم ان سلاسة كلماتهة العذبة اذابت قلبي
اذبتِ قلبي عشقًا، و استوطنتي عرش قلبي ملكةً ......
جنت اضحك خجلانة و متفاجئة هذا بس احاجي شي يضل يألف بس فززني صوت ليث وهوا ينتر بي
ليث ... جيب. الجاي شمالك واكف بنص النسوان و ثول حتى ثول .... جان يحجي بغضب دفين
اتخصرت و التفتت علي سداد كلة ... شبيك بلعتني واكلتني اصبر يكمل الجاي واجيبة
ليث ... اريد اشرب ....
سداد ... روح للملاهي اشرب شعندك جاي للمطبخ
زم شفايفة بغيض وكال ... لا تخليني امسح البيت بوجهك سداد احترم نفسك ..
سداد ... شايفني كطعة مسح امشرشبة ، يا اخي روحي يكمل الجاي واجيبة واجي لا اتعبك ولا اتعبني
ليث ... اريد الجاي ينصب هسسسسة
حجاها وضرب الكاع برجلة ودفع صحن ع كاونتر حيل وطك
سداد ... شنو سالفتك ليث مفطوم خو ما مفطوم
ضل يزفر بغضب ويحجي بوعيد
... راح اجي اموتة وسيد سامي
ضل يحوم بالمطبخ فاير ، انه صافنة علي
ليث ... روح ولي انه اجيبة شوف ابوي خاف يريد شي وانتي اذا كمل صبي
حجاها وهوا يكعد رفع سروال التراك و ضل يباوع ع باب بغضب
سداد قوس شفايفة ما عاجبة و طلع
انة التفتت طفيت القوري و شلتة حطيت الاستكاين كبالة والشكر وجبت الچاي شايلتة بايدي حطيتة بطرف الطاولة وباوعت بعينة
رفع طرف حاجبة وباوع ع صالة ورجع باوعلي بسرعة رفع حاجبة مرة ثانية بمعنى شبيچ ..شنو
حطيت ايدي يم قوري الجاي و همست ... مكروه ، انعال برجلي ما اخليك ..
دفعت قوري الجاي وطيحتة بحضنة ، انكلب علي رأسًا ونزل الجاي من اسفل بطنة حد رجلي ، انعفس وجهة بألم بثواني و طفر من مكانة مفزوع وصاح بألم اااخ بوية
حطيت ايدي ع حلكي وكتلة ... غير تشيلة زين شلون اتگلبة ع روحك يا ليث انتة طفل خو ماا طفل
بس هذا كلة بسبب عصبيتك الزايدة ع شنو مادري ..
ليث ... خرب غيرتج بت الكواويد اااخ بوية ، شاف امة اجت تركض ع صوتة و مها والموجودين زم شفايفة بغيض وكال
انه اعلمج بسيطة
وجهة انصبغ احمر وروحة فرفحت من الوجع مبين كل معالم وجهة انعقجت وصاك ع اسنانة بغضب وألم بس والله ولا كسر خاطري ولا شي ..
نجوى ... يااااا ياااا بس لا الجاي حار شلون طاح عليك
ليث ... من شلتة انكلب مادري شلون ما منتبه
راح اصعد اغسل وابدل
نجوى ... ولك هدومك اتدخن من الجاي امشي للدكتور شي
ما رد عليهة وصعد يركض باوعتلي وكالت شبي
... عمة مادري شال القور شو ما حسيت غير صرخ التفتت لكيتة يكمز من الوجع لان الجاي هستوة امطفيتة كلش حار ..
سداد ... شبي ليث يصرخ
حجة واجت عينة ع كاع
... لا تكولين جافي الجاي الخبصني علي
رهف ... وازيدك من الشعر البيت چفاه ع روحة وحرگ روحة وجهة صاررر احمر فرفح خطية اووف كلة من تسرعة وعصبيتة ، خطية عمة لحگي شوفي ما يستاهل ليث ..
ضربت كف ايدي بباطن ايدي الثانية و زميت شفايفي بأسى ..
جبت وصلة ونظفت المكان نزل هوا و لحكة سداد فاتت مها عيونهة حمر دم من البجي
كتلهة ها شصار ليش تبجين
مها ... ولج متعور لو شايفة شصاير برجلي بلكوة قنعة سداد ياخذة للمستشفى يحتاج تعقيم وتضميد الحرك قوي ..
رهف ... خطية والله
مها ... هوا شلون احترك ما شفتي
رهف ... والله خية ما لحكت استوعب كلشي صار بسرعة بسرعة انه بنفسي انصدمت
مها ... هوا الله يسلمة مطيور ما ادري شبي يريد كلشي بسرعة ما ينطي صبر حتى الروحة اكيد جارة حيل و هل انچفة علي ..
رهف ... قضاء وقدر خية شتسوين حظة
يلة شما كان الحرق مؤذي يضل اهون من التحركهم النار وتاكلهم بدقايق بحيث ما يلكون شي باقي من ارواحهم غير رماد منثور اتطيرة نسمة هوى ..
مها ضلت تتأفأف وتحجي ع تسرعة وخبالة وانه بداخلي اضحك بشماتة
حركتة حرك
حتى خلف يمكن بعد ما يخلف انكطعت عندة ..
والله ساعات ورجع صدك يكولون متأذي كبل طفرت للغرفة بدلت وتمددت بفراشي ، كضيت المبايل الصاير علي عرك انة ودرة
وافقت تنطيناه ل11 ونص و من 11 ونص الهة
هية تلعب لعبة بي الهذا السبب اخذتة انه بالاول لأن مو دائما العب
كل عادة دزيت رسالة لسداد
"انه كلش مشتاقتلك بس هسة راح انام لا ادز شي خاف درة تشوفة عيب"
ورة دقايق كتب ... " نوم العافية ع عيونج الحلوة ياريتني المخدة واشتم انفاسج حد ما تنملي ريتي "
رجع كتب "يا يمة ياريتني الغطة واتمدد وياج من الطول للطول والامس كل انش بيچ"
ضحكت بخجل وما رديت ، وهوا بعد ما دز يمكن كال المبايل بيد درة
ردت اشوف رسائل من سداد حتى شوية انسى الخوف
بس وين هيهات حذفتهن وشمرت المبايل ع درة و غمضت عيوني
اول ما غمضت عيني عقلي ضل ايألف سيناريوهات
وكل واحد بيهن فلم رعب بحت
حتى الصار ويانة ببيت خوالي ما خلاني اخاف بكد السيناريوهات الي الفهة دماغي .
لا ضل موت ما تخيلت ميتة
لا ضل قتل ع ايد سداد ليش ما ادري وسداد شعلي هم ما ادري
وساعة ع ايد ليث
وارجع اتخيل عمي فاضل يكتلني بعوجيتة
والله لو يخلي براسي طلقة ولا يكتلني بالعوجية زعم توجع مبينة ..
والنوب من اتخيل انقتل ع نص واكطع الخيال لأن ما اعرف شيصير ورة ما اموت
وساعة اكول ليث ايشوه سمعتي ورة موتي ويجيلي العار وانقهر
واتذكر انه ميتة وبالكبر بعد شلي غرض بالعالم عسما يحجون بية 3 وجبات باليوم
غفيت بعد تفكير طووووووويل اخذ نص حيلي وهدة هد ...
درة ... اباوع ع رهف بس تتكلب ما ادري اذا نايمة لو كاعدة
طلعت كتابي درست شوية و رن المبايل برسالة
عرفتة هوا
اي ماكو غيرة
يراسل مرات قليلة وبهيج اوقات
صارلة كم يوم ممراسل لو مخابر اتوقعت اليوم لان باجر عطلة ..
شمرت القلم والكتاب ، طار العلم والقلم بالهواء
و ركضت كضيت المبايل فتحت الرسالة فعلا جانت منة ومحتواها
" مساء الخير "
اي طبعا ثكيل ، ما عندة سوالف مال املطلطين ويكعد يريد اخابر واسولف ويا لنص الليل
يا دوب كل اسبوع مرة لو مرتين يسمع صوتي ويطمن ويوصيني اهتم بنفسي ودراستي وصحتي ويروح .. بعد ما نختم المكالمة بقبلة ع سماعة المبايل وضحكة خجل مني ..
كمت رمشتلة لان ماعندي رصيد خلصتة ويا صديقتي امس نحجي بالدراسة وخلص
الرصيد بلوة
جان يخابر
حطيت الفون ع أذني وتحمحمت
سلم هوا بالسلام عليكم ليكول داخل ديوان مو جاي يخابر بنية يحبهة بنص الليل ..
رديت عليكم السلام
حر ... عاش من سمع هالصوت الحلو
درة ... يعني هسة انتة عشت ؟
حر ... انه من زمان تقمعني الدنيا وتشمرني قتيل ع جرف الهاوية و تمرين ابالي واعيشن ..
حسيت رهف كلبت شكيت بيهة كاعدة سكتت
وهوا ضل ساكت ما حجة شي
تمددت والمبايل ع اذني
استحي احجي ويا
بعدنة بأول الطريق ، هوا يبادر ويفتح حديث انة لا ما اكدر
ما جنة قبل نكعد نختم السوالف ونكوم
حر ... تدرين اليوم لكيت بيت للبيع راح اشتري قريب من شط العرب حلو وبنائة حديث
درة ... ايي؟
حر ... انتي شنو رأيج شنو تحبين ؟ البيت اريدج تعيشين بي وياي
درة انة اريد ابني احلامي وياج جنت اخاف احلم هسة لا حلمت وراح ابني
كليلي انتي تحبين البيت يكون بريف لو بالولاية
وين ما تحبين انتي انه اروح
سكتت ما حجيت، يحجي بنبرة واحد تعبان ومجاي يعرف يربط الكلمات ولا حتى يصنع جملة
تنهدت ولاحظت رهف هواي تتكلب كمت ع اطراف اصابعي فتحت الباب وطلعت البيت هادئ كلهة نايمة
ختلت جوة الدرج ورديت بهدوء
... اذا انتة هسة بديت تحلم انة استحي من روحي من اذكر الصار واذكر وين جنة و وين صرنة
حر ... النوب؟
درة ... اي والله فد اخجل حتى الروحي بالمراية ما اباوع، وكل ما ينذكر اسمك اصير كتلة من النار
من كد ما تتدفق الحرورة بدمي احس راح احرك الكاعد اكبالي ..
حر ... والله يدرة انه ازيد منج بس همة مايدرون احنة عشنة بذاك الشكل الخجلانين منة
درة ...بس احنة ندري ندري
حر ... هههههههههههه اي والله نسيت بس انة واحد كواد ونفسي دنيئة شلون اتجرأ اعشقج
شلون سويتهة
حاقد ع نفسي والله
تخيلي انة وصلت مرحلة اريدج وما اريدج
درة ... لا بالله ؟ ورة ما سلبت گلبي مني تكول ما اريدج
حر ...فدوة لله شكد خوثة لج خالووو اقصد متفشل من روحي متفشل
بنية اجيتي وصرتي بين ايديني، داريتج
وداويت جروحج، شلتج ع متوني
درستج و اهتميت باخلاقج وشخصيتج ودراستج
والي يسألني اكللة بت اختي و بت اختي
تالي اطيح هيج طيحة
كال بقهر وخنيك اااااااااااخ ويمكن عض اصبع السبابة
درة ... احسن شي لا انتة الي ولا انه الك محد يقبل كل واحد من عدنة يروح بدرب وبعد لا اجيلكم ولا انتة تخابر علية
حر ... هلو وهاي شنو النوب جديدة والمصحف انتي تمسلتين مااعوفج خالي لو يكطعوني وذر
ضحكت بهدوء وهمست ... عليك سوالف اتدوخ اكبر واحد ، جا ليش احبك انه لان خبل وتحبني بخبال
حسيت ايد انحطت فوك ايدي وسحبت المبايل ، اتجمد الدم بعروكي ورجفت اعضائي بلحضات
فكيت عيوني ع وسعهن بخوف وانة التفتت واشوف عمي فاضل يحط المبايل ع أذنة ...
