 |
رواية ليلة الحنة الفصل الرابع عشر 14 بقلم بسمة البياتي
_
_ #لـيلـة_الحنـة _
_ (#بقلم_بسمة_البياتي) _
_ #البارت_الرابع_عشر _
__________________
ليال.. ليش انعدمت الرحمه من گلوب الناس
ليش يعوفون الظالم ويصير هو أبو الحق ويلزمون ياخة المظلوم فوك أذيتها يأذوها بحجاياتهم
بدال مايذموا هو يذموها هي
بدال ما يدعولها بالتعويض يكملون عليها ويشوهون سمعتها
اذا بقى أمل تعيش حياتها عادي وترجع تزوج وتنسى
بهاي افعالهم بعد محد يدك بابها
فردوس... الله بالمرصاد حقها مايضيع ولو بعد حين وشكو واحد حجة راح يتلكاها بعرضه
من دق باب الناس دق الله بابه
وأركان عاش بالحيلة والمكر والغدر
والخلقج مراح يتوفق ويتهنى واله يوم يشرب من نفس الكاس الشربة الزلال وعود گولي فردوس گالت
شذى...لحد يحجيلها خطية الـ بيها مكفيها
فردوس.. اي احسن حتى الحورية لاتحجون
سودة عليه هي بغير شي گلبها خلصان
ليال... عده هاليوم بهدوء
ثاني يوم گبت العيطة علاء سمع حاجين على زلال عقل ماظل برأسة شاط من الغضب عاف البيت وطلع عماد وعادل لحگوا
بابا لونه انخطف تلحگنا بالعلاج قبل لا يوگع علينا
زلال حتى دموعها نشفن هلگد ما بجت
زلال.. ششذكرهم بهذيج السالفة لو هذا حظي الذكرهم حتى تلتم عليه من كل النواحي
العمال مو ششافوا بعينهم مالحگوا يصعدوني بالسيارة
ترى والله حررام عليهم هذا ظلم تعبت ياربي تعبت
حورية جرت دشداشتها من يم صدرها رفعت رأسها ودعت
...كلمن أذها وحجة عليها كوووون يتلگها بعافيتة دعوة أم محترگ گلبها على بزرها ربي لاتردها
ليال.. بيتنا نگلب گلاب خالي أجة مايگدر يرفع عينه بعين أحد بقى اقل من ربع ساعة ماتحمل وراح
وليد وأمجد طلعوا يدورون للولد
للعصر فات عماد مخبوص ماما تلگتة من الباب
... وين صرتوا ليششش ندك متجاوبون اخونك وين
... على كيفج ما أريد أبوية يسمع
.. لك يمه ششصاير لاتعلعل گلبي
..علاء تعارك واخذوا للتوقيف
... ماما كمت تلطم على رأسها عماد لزم أيدها
... شششحجيت ليش تخليني اندم لان گتلج
... ليشش سجنو
..تعارك ضرب واحد من شباب المنطقة على رأسة خلى دمه بطولة
فردوس... الولد خوما بي ششي
... عار لاتخافين عليه مايموت رادها من الله حتى يأخذ فصل ابن الكلب وين مايگعد يحجي على زلال
... شراح تسوون
..ان شاء الله نحلها المهم لاتخلون ابوية يحس
... لليل ننتظر وماكو خبر
الولد واهله معاندين ميتنازلون
عمامي اجوي بابا من شافهم عرف ظل صفنه تجيبه وصفنه تودي وكل شويه يفرك مكان گلبه
ماما من شافت وضع بابا
تمالكت نفسها وصارت هي تهدي بي تگله
علاء سبع ماينخاف عليه وكلها بس هاليلة وباجر ان شاء الله يطلع گلبي بارد عليه اني ام وحساسي ميخيب
الحمدلله كلامها جاب نتيجة وعدت الليلة على خير
ثاني يوم
أجه خالي گال رايح للجماعة اني احلها
أعرفهم شيريدون وشنو من يشر هما عوفوهم عليه دواهم يمي
ليش بكيفهم غصب عنهم يتنازلون وهما اليعتذرون
صح الأجواء متوترة بين خالي وبين عمامي
بس بهالظروف مو مال عناد ومشاكل
گالولة نجي وياك
ظلينا گاعدين على نار الى إن رجعوا
حورية... هاا بشروا راح يتنازلون لو لا
خالد...الحمدلله كلشي انحل راحوا يتنازلون
بالأكثر منا الساعة تلگين علاء واكف گدامج
ليال... هم ونزاح من گلوبنا
عماد حجالنة گال بالبداية عاندوا وصياح وغلط
يگولون تنازل مانتنازل
يجي شيخنا وگرابتنا ونحلها واذا ماعجبكم
يخيس أبنكم بالحبوس راد يكتل ابنا قابل هينا
عاد خالي ماقصر گال خوش حجي دام رايديها تنحل عشاير وفصول احنا الها
راح نجيب شيخنا ونخليها تصير گعدة مقابل گعدة وكلمن يأخذ حقة
أبوهم... وشني حقكم بله
... ابنك ذم بنتنا وطعن بشرفها وعدنا بدال الشاهد عشرة وياحجي ابو طالب
على كلشي ينسكت الا الشرف يلا يا جماعة خلي نروح ويصير خير ان شاء الله
الرجال كام يطكطك من الخوف حجي مايعرف يحجي يحير شيسوي
ماخلانه نطلع يتوسل ويعتذر لو ما شويه يبوس الأيداي
سبحان الله البشر شگد عينه وكحة
قبل ثواني شاف نفسه هو صاحب الحق
حتى تفاهم مايتفاهم لسانه شطولة ومتأكد خوف على أبنه لا ابد كل هالهوسة حتى يحصل جم فلس
ومن اندارت السالفة وشاف نفسه راح يوگع بيها صار جريذي
محمد.. الحمدلله فضت على خير بلكي هذا درس العلاء حتى بعد ميتهور ويفكر بعقله
ليال.. طلع علاء من فات لا سلم على خالي ولا على الولد
حقده زايد على اركان اكثر من قبل
بابا وماما اشگد حجوا ويا اشگد نصحوا ماجاوبهم مكتفي يهز رأسة
مثل الواحد اليأخذهم على گد عقلهم
صار الليل گاعدة ارضع غزل
زلال ساكتة الحايط يحجي وهي متحجي
لمى وخالة فردوس يومية ويانة بالغرفة
اليوم ماكو المغرب عمو عاطف اخذهم الشقتهم
من سافر عمو شقتهم سكن بيها اخو الصغير جديد مزوج
الشقة مؤثثة كامل خالة ما أجة من گلبها تبيع الأغراض وتأجرها تخاف يجون ناس عدهم اطفال يدمروها امنتها عد حماها
وحماها البارحة يلا عاف الشقة
زلال... ليال
.. عيوني
... اركان لنهزم ويمكن بحياتي بعد ما أشوفة
شلون راح اگدر اطلگ منه ما أريد اظل على ذمتة
اكرها امووت منه
... تحسرت اكو شي مگنالج عليه اخاف من تسمعي تضوجين
.. ابتسمت بقهر بربج ليش اكو شي اقوى من الصار بيه احجي لاتخافين سدج امين مظل شي يأثر بيه
... أركان بيوم المتصل على أيهاب بيوم الحنة
بالتلفون رامي عليج اليمين
... غمضت عيني مو قهر اشمئزاز وقرف
طاح حظي بيوم الحبيتة
... بيج شي
.. لا اگلج يصير واحد يطلگ بالتلفون
... والله مدري من يومها مخبوصين محد دقق بالسالفة
.. زين صدك بابا يريد يبيع البيت
... هاا منين سمعتي
...ترى بعدني عايشة وياكم اهنا واعرف شيدور بالبيت ما نايمة على اذني
... اي علمود علاء اذا ظل تصير عداوة بينا وبين ابن ابو طالب.
...ليال گوليها لاتخافين مراح اتأثر مو بس علاء السبب بابا يريد يأخذنا وننهزم بسبب الحجي الطلع عليه
... لايصير عقلج صغير الجيران كلها يعرفونة
ويعرفون تربيتج محد مصدك ولا راح يصدگون الي طلع الحجاية جم شاب طايح حظ لا شغل ولا عمل گاعدين بس يگصون بالرايح والجاي
... ماشي
انطيتها ظهري غمضت عيني أهلي ادمروا بسببي
حتى بيت طفولتنا راح يخسروا
نمت والحسرة بگلبي
الصبح طلبت من وصال وليال يروحون يجيبون ملابسي القديمات فقط قطرة من الجهاز ما اريد
حلفت اذا جابوا احرگة
ليال...خالي ومرت خالي رادوا ناخذ جهازها والذهب حتى الغرفة
ماما أجت ويانة گالت زلال ماتريدهن ومحمد هم ميقبل نجيب شي منهم
خالد... اقلها اخذي ذهبها
.. والله خوية حالفة تذبة بالشارع گالت انطوا الأمجد وعماد يعوضون خسارتهم بي
... مستحي منكم عيني ما اگدر ارفعها بعينكم
اركان كسرني مو بس كسر زلال
جنت اتباهه بتربيتي تالي طلعت ما عارف أربي
.... لاتحجي هيج انت شعليك شمدريك بنواية ابنك ولدك البقية متربايين احسن تربية والكل يحلف برأسهم
ليال... لمينا اهدوم زلال اخذناهن ورجعنا
خالي من سمع بابا يريد يبيع البيت وحاجي ويا عمي يلگلنا بيت أجار بين مانبيع هذا ونشتري
تخبل اجة على بابا يتوسل بي بلكي يتراجع
خالد...محمد فكر بيها بالعقل اذا بعت البيت وشلت راح تثبت على بنتك التهمة
والمامصدك راح يصدك ويگول لوما الحجي صح مانهزموا
ليش تكبر راس جم واحد زبالة
محمد.. اكبر غلط اذا اظل اهنا خليني احافظ على عائلتي گبل لا يفوت الأوان الحجاية مراح تنسي وزلال تظل تعاني منها وعلاء ادري بي مايسكت.
ذاك اليوم الله طلعة منها سلامات مو كل مره تسلم الجره
.. ومن تشيل علاء راح يسكت وينسى؟
.. بلكي تهمد ناره
... خالي گام حضن بابا وبجى
گال برئ من اركان اليوم الدين اني وكوثر صحنة الحشى منه يحرم عليه بيتي طول ما اني عايش
حتى گبري اوصي مايزورة
بابا طبطب على جتفة بدون مايجاوب
خالي لليل كلش متخربط والولد مأخذي للمستشفى
اليوم أجت خالة فردوس ولمى
گعدنا كلنا يم زلال نحاول نضحكها ونخفف عنها بلكي تطلع من جو الكأبة
دك تلفونها صفنت بي سألتها منو؟!
هزت راسها بمعنى ما ادري
... بس رقم
... خالة فردوس گالت جيبي اني آجاوب
زلال لونها تغير يمكن گلبها حس منو صاحب الرقم
خالة بس گالت الووو وجها انعقج معالم العصبية بينت عليها
...لك يا ناقص يا عار هم الك عين وتتصل الله لايربحك سبيت الأمة
.. اشرنة الخالة تفتح مايك
اركان...صار الي صار لاتعاتبوني ولا اعاتيكم
... صح والله حتى العتاب ماتستاهلة المثلك حرام بي الكلمة
...اهلي شلونهم
... شگد عينك گوية بعدك تسأل عليهم
... عمة دخيل الخلقج كافي مامخابر حتى اسمع رزايل ومواعض
... من الأخير شرايد
... احاجي زلال عندي كلمتين وياها
زلال... صوته سوه عندي لعبان نفس
اريد اذب من رإسي بس ابد مو وكتها مراح تتكرر مثل هاي الفرصة لأزم احاجي اريد اجوبة الأسألتي
اخذتة من أيد خالة
هلا بأبن خالي هلا بحامي عرضي
هلا بالزلمة الشهم صاحب الغيرة والشرف
... زلال صدگيني مو نيتي أأذيج الصار غصب عني
... ههه جديات واوو غصب عنه اي مو هجموا عليك عصابة وخلو المسدس برأسك گالوا لو تعوفها بحنتها لو نموتك
... خلي اگول الكلمتين العندي واروح مناقص ملامة. ووجع رأس
... مرة وحدة بحياتك صير رجال وجاوبني على اسألتي هذا ابسط شي تقدمة الي بعد سوايتك وياي
... ماشي اسألي
... ليش عفتني بالحنة هاا ليش اختاريت هذا اليوم بالذات ماتريدني ليش ماعفتني من قبلها
من الأساس ليش خطبتني ولك ليشش
... لا زلال لاتحاسبيني وحدي حاسبي ابوي واخواني هما السبب
... والله خوووش حتى تطلع منها تذبها برأس أبوك واخوانك
.. اخير مرة اگلج اذا تظلين تحجين مدري شلون كلام اسده وأروح
... اي كمل
... بفترة الخطوبة شفت نفسي ما اگدر أكمل وياج ردت افسخ حجيت ويا أبوية گلب الدنيا فوك رأسي شلون تعوف بنت عمتك تريد تصغرني گدام محمد تريد تصخم وجهي غصب عنك تكمل
بقيت فترة ألح بدون نتيجة هملت الشغل
طگت روحي وكفت گدامه وحاجيتة بصراحة
اني وزلال منتراهم اذا اخذها مراح أسعدها وگلبي عد غيرها
.. مصدومة خالي جان يعرف وجبر اركان يكمل وهو مرايدني
لا وطلع ابنه يريد غير وحده
همست مينا موو
اجاني صوت بنية
.. هاي ششنو اركان منو هاي مينا
... اششش بعدين احجيلج
.. دفضها عاد ترى طولت مو هذا اتفاقنة
زلال. منوو هاي
... زوجتي فرح
.. . ما ادري اضحك لو ابجي
ها يعني هاي الساق.. الدمرتني بسببها
فرح.. .. لج حيييييوانة ماكو سسسا... غيرج
اركان... فرح بسسسس
زلال لزمي لسانج ولاتتجاوزين
.. حمش موبيدك كمل اريد اسمع جريمتكم للأخير
... بيومها من اعترفتلهم احب غير وحده انخبص البيت اخواني سمعوا تعاركوا وياي وطلعت زعلت
... يعني من ضربوك مو علمود الشغل
... لا طبعاً
بقيت زعلان بيت ايهاب فكرت بيها شفت الزعل ميصرفلي اضطريت ارجع وأساير أبوية
.. الله لايوفقك بدال هاي الهوسة ليش ما أجيت اعترفتلي جان بلحظتها نهيت كلشي وخلصتك من الخطوبة
... عبالج مافكرت حاولت وماگدرت اذا احجيلج راح انطرد واطلع ايد ورة وايد گدام
العندي والماعندي. صرفتة على الخطوبة
أبوية حلف يتبرئ مني وفلس ماينطيني
گلت ابقى واحاول اخربها بلكي الرفض يجي منكم
ضميت المستمسكات وهم مفاد
.... حتى سالفة المستمسكات طلعت كذب عفية عفية كمل
... شكمل طلبت دين بأسم اخواني محد انطاني ومصارتلي فرصة غير يوم الحنة من التهوا گدرت اخذ منهم
... حسسسبي الله ونعم الوكيل
كذب لاتكذب لاتگول ردت اطفرج والرفض يطلع منج
هواي صارت عراقيل وانت محضر جواب الكلشي
تذكر اخواني من صار عدهم شك بكلامك بسالفة شهر العسل بالشمال واحنا لا عقد ولا انت عندك مستمسكات
گتلهم صديقي دبرها عنده واسطة انطاني ورقة اكدر اسافر بيها ومن نروح ناجر شقة منحتاج عقد
جوابك حاضر لان مخطط تنهزم بيوم حنتنا حتى تكسرني
... والله العظيم مو صح مامخطط ردت فلوسسس الولد مايعوفون الشغل بالأيام الأعتيادية
بيوم الحنة التهوا وگدرت اخذهن
.... تحلف بالله ليشش انت هم تعرف الله وتخافة
بفضلك صرت علج بحلوك الناس طعنوني بششرفي من افعالك
گلي يا كتاب ويا دين يرضى السويتة بيه
عمري ما ابريك الذمة راح اظل طول عمري ادعي عليك
ششرايد ليش اتصلت
... ما أريد يصير اشكال بطلاگنا ردت تسمعها بنفسج
... هه من التدين راح نجي نصلي على ذيالك
اشكال ودين وحلال وحرام
فرح.. ترى خرطت هواي بعد ما اتحملها طلگها أريد اسمعها
زلال... طلعت مجبور تتصل حتى تريح گلب المدام
اركان رمى عليه اليمين اكثر من مرة وسدة
راحت قوتي غصيت بالبجي
ليال... وصال عافتنا وطلعت خالة راحت وراها
وره شوية ماما فاتت
اخذت زلال الحضنها تهديها
زلال... شششفتي سواية خالي يعرف ابنة ميريدني وجبره يكمل
... سمعت يمه سسمعت
ليال ابقي يمها رايحة البيت خالج
وره نص ساعة رجعت لمى
ليال.. هاا شصاير
.. يبوو علگت اهناك
.. تعاركوا
.. لا خالة بقت تعاتبهم
گالت تدرون بأبنكم مو ادمي ليش ورطتوا بنتي بي اجه گالك ما اريد ليش مافسخت
لو عندك بنية ترضالها هالذل
خالد.. وروح أبوية مامتوقع يدك هالدگة گلت اكيد من يزوجون ينصلح حاله
هو من البداية كتل روحة حتى يخطب زلال ما معقولة بين يوم وليلة ينفر منها ومايريدها
... مارادها وعافها ومحد تأذى غيرها محمد ولولد لو يعرفون يتخبلون والخاطر العشرة الـ بينكم ما راح احجي شي
ليال...اي احسن ماتحجي مو ناقصين مشاكل
فاتت وصال عيونها حمر
اشرت شبيها
لمى بهمس تعاركت ويا وليد
.. يووو ليش وليد شعليه
وصال... ششلون ششعلي جان يدري ومحجالي لو گايلي والله فلا اسكت واني اجي الأبوية احجيلة كلشي و اخربها
... يمعودة العتب و للوم بعد ميفيدن الصار صار
ماما مقبلت تحجي شي البابا بس گالتلة اركان مخابر زلال وراجع مطلگها
علاء اجة أخذ التلفون من زلال وطلع
ظال يفتش على صاحب الرقم وروح وتعال تالي طلع الخط كلك مابي اسم والخط انغلط ورة مكالمة اركان وزلال مباشرتاً
وضع علاء زاد عن حده همل نفسه وهمل شغلة
يطلع من الصبح يرجع باليل مايسمع من اي احد
مصادق ابن عمي وهذاك هم متهور مثله
گاضيهايدور على اركان
من يطلع الحد مايرجع ماما وبابا ايدهم على گلبهم
اشگد بابا حاجاه گالة عوفه مسلمينا بيد الله هو يجازي
يگول أبد لو اني لو اركان اذا ما اشرب من دمه ما ارتاح
يجي يوم يوگع بيدي قابل يظل العمر كله مختفي
واحنا يومية على هالرنة مهبوطين
عادل عرض بيتنا للبيع
على أساس ندور بيت اجار الولد ماقبلوا گالوا
من ينباع البيت نآخذ ملك وننتقل مو نظل يومية شايلين من مكان المكان
بيعة البيت طولت ياهو اليجي يكسر بالسعر بابا لو بيده ينطي
عادل وعماد ميقبلون
بده الدوام زلال هالسنة سادس
واني بعدني مرحلة ثانية
زلولة كومي بدلي نأخذ ملابس للدوام هسه خالة فردوس تجي تاخذنا للسوك
... ما أريد روحي انتي
.. ششنو متريدين معقولة زلال تگول على الملابس لا
... اي شسوي بيهن مراح اداوم
.. عززا لا لج لاتگوليها سسسادس ومداومين
ترى البعمرج هسه كلية
.. واذا سسادس ما اداوم لاتعبين نفسج
تريدين اداوم والكل ياشرون عليه ويگولن ششوفوا هاي العافهة خطيبها بيوم حنتها
لو يگولون اي هاي البنية الخطفوها واغتصبوها وابن خالها من عرف عافها اي عافها شيسوي بيها طلعت معيوبة
... بسس اششش لاتكملين ينگص لسانه اليحجي كلمة انتي اشرف من التحجي
... حجوا وداعتج حجوا ولهسه يحجون لانكص لسانهم ولا صارلهم شي
فدوة ليال خلي همي بگلبي ولاتفززين جروحي
... شبعت بجي اجت خالة حاولت تقنعها نفس الجواب ماما گالت عوفوها براحتها لاتضغطون عليها
زلال ام روح الحلوة ادمرت ابد مو نفسها القديمة
نطوت على نفسها كلامها قليل على گد السؤال والجواب
اهلي اليشوفهم مايعرفهم من القهر عليها ومن الخوف على علاء گمت اتمنى ينباع البيت بسرعة ونشيل منا بلكي ترجع السكينة لگلوبنا ونرتاح من الهموم شويه
زلال... اسمع ريم تتوسل بأمها تريدها ترجع للبيت
ريم... ماما شوكت تجين والله بابا خطية مقهور
وجدو وبيبي مريضين
.وصال.. معليج لاتدخلين الموضوع بيني وبين ابوج انتي مو صغيرة ديربالج على جدج وبيبيتج
.زلال. وصال لشوكت تظلين زعلانة وليد شعلي تعاقبي خالي مرادهم يحجون خوما يعصون كلامة
.... بحياتة ماضم عليه ششمعنى هالموضوع ششمعنى لان بي طيحان حظج سكت ماحجة
... والله حتى على خالي وخالة كوثر مزعلانة ولا ضايجة منهم لان اعرفهم شنو واعرف شگد يحبوني السووا علمودي مجانوا متوقعين اركان واصل مرحلة من النذالة يعوفني وينهزم
رجعي الخاطري
حضنتني وبجت
... اووووف ششكاسرني وشاك گلبي غير خاطرج
والله احسج بنتي مو اختي حالج حال ريم الصار بيج دمرني
.... فدوة العمرج لاتبجين اختج قوية وراح تتعده كل هذا بس احتاج وقت.
... إن شاء الله حبيبتي
.. ديلا رجعي ترى بابا والولد بدوا يشكون يگولون وصال ليش زعلت أكيد اكو سبب قوي مو مشكلة عادية لان يدرون بيج بحياتج ما اجيتينا زعلانة
. ماشي لعيونج راح ارجع
... ياعمري
ليال... اليوم مدري شنو السالفة عمامي واحد وره للخ ديجون فاتوا للأستقبال گعدوا ويا بابا
رغد.. جيتهم مو خالية الله يستر
عماااد عمااااد اوكف متعرف عمامك شعدهم منجمعين
... علمي علمج يلا سووا جاي
.. ماشي
ليال... وره شوية فات خالي وولده وياهم عمو عاطف زوج خالة
لا اكيد اكو انه بالموضوع
رائد...شلونج ليال
.. انداريت على صوتة ها هلا رائد الحمدلله انت شلونك
... على الله
هاي بنتج
.. اي مدلي ايده رادها انطيتهيا بوسها من خدودها
.. ما شاء الله عليها تنحب وماتستغرب
.. اي صح جداً هادئة
همس بصوت مسموع بنتج بعد كلشي بيها نسخة منج
اخذتها من أيده فوتتها للغرفة يم زلال
ما اريد اخذ وانطي ويا ويرجع يتأمل
شفت ماما بالمطبخ
ها ماما معرفتي هاي الجمعة على شنو
.. لا والله طبيت سلمت وطلعت
حضروا الجاي بدل السوالف
زلال.. لو البيت يحترك ما الي شغل ولا عليه
اباوع الغزل صرت اتمنى لو ارجع العمرها وبعد ما اكبر ولا اعيش العشتة
ليال.. ويامن تحجين
... ويا غزل حبيبة خالتها شوفي شلون صافنة عليه
... متعلقة بيج
... اي فدوة العمرها
اگلج شصاير برا
... وين برا
.. يعني وين خارج الغرفة
منو هنا
... هاا عمامنة وخالي والولد وعمو عاطف
. خير ان شاء الله
. مراح تسألين ليش جايين
.. بكيفج اذا تريدين تحجين احجي
... عليج
... هههه اكيد عليه وهم تنعاد سالفتي شنو الجديد بالموضوع
.. لا هالمره الموضوع يختلف
.. من اي ناحية
..تنفست قووي زلال جايتج خطابة......
