 |
رواية ليلة الحنة الفصل الثالث عشر 13 بقلم بسمة البياتي
#لـيلـة_الحنـة
_ #البارت_الثالث_عشر _
__________________
ششششكو ليش عايفيني وحدي احجوا شصاير ليش الكل طلعوا بـ أستعجال
شذى... هااا ماكو شي امشي زلال بدلي دنرجع
... ماتحملت گعدت بنص الگاع صرخت لج احجيييييي مو گلبي راح يوگف.
بنت عمتي رادت تگومني دفعت أيدها
ما اتحرك منا اذا متحجون
شذى... اذا حجينا راح تتخبلين وماتنطين مجال نفهمج
... ضربت خدي قوي ابوووووس أيدج ارحميني وانطقي
... عمي متخربط ومأخذي للمستشفى
... باباااااااااا گمت بكل سرعتي مشيت خطوتين تعثرت بالبدلة ووكعت
...على كيفج مابي شي لاتخافين بس اهدي يمعوووودة سسمعي مني زلال مابييي شي
... ما أسمع ششتكول امشي واتعثر أريد اطلع
ذبيت الكعب من رجلي ركضت
لمى وزوجة ايهاب تلگوني اريد اطلع خارج القاعة لزموني كمت ارافس واصرخ
عوووفوني بابا ششششبي الله عليكم ششششبي لاتگولولي مات اموووت وره والله امووووت
عفتة مابي شششي والله مابي شي قبل لا اطلع باسني وحضني
عززززززا بعيني بسس لا جان يودعني
كمت الطم على خدي فرفحت
لمى... والله عايششش لا تفاولين عليه ششجاج زلال الخاطر الله فوتي بدلي خلي نروح
... اخذوني سحل بدلولي وصلت مرحلة حتى ايدي ما أگدر احركها
كملت طلعت اركض اشرولي على. سيارة حتى مانتبهت منو اليسوق
الطريق كله انوح كلما اتخايل بابا صايرلة شي وبعد ما اشوفة گلبي يصير نار
وصلنا للبيت الباب مفتوح طبيت اركض
نلكتني ليال غاصة باليجي
لزمتها وووينهم ليش ماكو احد بابا شششبي مااااات مووووو ماااااااات وعافنيييي
... لا أسسسسم الله
الله لايگولها بالمستشفى والكل راحولة
.... مجاي تكذبين عليه مو بداعة غزل بابا عايششش لولا
.. هزيت رأسي بمعنى اي
... أريد اروحلة ما ابقى لحظة اهنا
رغد.. الزلم كلهم اهناك مباقي احد بالبيت منو. يوديج فدوة گعدي
... اذا وضعة زين ليشش كلهم بالمستشفى
احجوا الصدك كاااااافي كذب بداعة كل عزيز احجوا الصدك
ليال... وغلاتة عايش بس وضعة حرج
... ششبي ليش هيج صار عفتة مثل الورد
ليال. اشرت للبنات بعيوني لاتحجون شي
كلشي منعرف يگولون من كيفة واگع و متخربط
... روحي لايبة ما اصدگهم اكوو شي ضامي
اريد اطلع ميخلوني
كعدت بالطارمة گابلت باب الحوش انتظر جيتهم
فاتت ام سعيد وگفت تحاجي شذى
... هاا بشري شلونه وضع ابو عادل
سعيد اتصل على الولد محد يجاوب
... ما ادري احنا هم نتصل ميجاوبون
.. الله يرده البيتة سالم بحق محمد وال محمد
يمه زلال ليش گاعدة اهنا فوتي جوة لاتنقهرين
محد خسر غيره تتعوضين بالاحسن منه أن شاء الله
.. رفعت راسي دموعي تزخ هاي ششجاي تحجي
ليش اكووو شي بالدنيا يعوضني عن بابا لو صارلة شي
شذى... مو وقت هالحجي هي بيا حال بالها يم عمي
... الله يگومه بسلامة الخاطرها
امانة اي شي تحتاجون دگو الباب ولاتستحون
.. تسلمين ندري بيكم متقصرون
ليال. خليت أيدي على حلگي واصرخ بصوت مكتوم
لمى. عزززا ليال ششصاير عمو خوما صارله شي
ليال... شيصير بعد راح نتعزى ولج
خابرت وصال صوتها رايح من البجي
ماما وخالي وبيبي وخالة كوثر كلهم متخربطين ومدخليهم مستشفى
وكله كوم وبابا كوووم حالتة خطرة بالانعاش
صاير عنده سكتة قلبية
لمى. الله لايوفقك اركان موووت الكرفك يا عار
البقية وضعهم ششلونة
.. ما ادري زلال خوما حست بشي
... ام سعيد رادت اتكت الأول والتالي هم زين شذى تلحكتها
... مصيرها تعرف فهميني ششلون راح تتحمل هيج خبر قبل ساعة جانت اسعد وحدة بالدنيا
اذا عرفت تدمر
.. زلال قوية لاتخافين عليها اهم شي عدها صحة عمو
... ياقوة التحجين عنها وهي انكسرت بهيج يوم ومن منو من أقرب الناس الها ابن خالها الجان بمثابة سند الها
زلال.. كملوا ليش سكتوا
ليال..بهتنا ضاع الكلام منه
لمى...ماكو شي دنحجي على عمو
زلال. شبي أركان؟
ليال... مابي شي
... لييييييييييال تحجين لا الم العالم عليكم شششششششبي اركان
... الكل فاتوا على صراخها بعد مانگدر نضم عليها اشرت الـ لمى تحجي ما اگدر اجاوبها
الشهگة گطعت گلبي
لمى... أركان النذل منهزم.
... ششنو يعني منهزم هااا ششنو منهزم
ومن منو ينهزم!! مني؟؟ من عرسنا؟!
.... أي من الظهر مختفي محد يندل دربه
يدورولة ماكو يتصلون تلفونه مغلق
وره المغرب متصل على أيهاب گايلة لادورولي
بعد ما ارجع وما أريد اعرف احد بيكم
الولد متخبلين عمو محمد من سامع مامتحمل وواگع
زلال...حرف ما گدرت انطق لزمتني راجفة صرت اطك سن بسن عيوني غوشت واذني صوفرت
ليال... وگعت بالگاع ترجف مثل السعفة ثواني وفقدت الوعي
مظلت عندي طاقة گابلتها وملخت نفسي
وين ننطي وجهنا تعبنا يارب تعبنا
يگعدوها ماتگعد
شذى... لمى امشششي شوفي أحمد وين خلي يطلع للشارع يجيب تكسي
ليال كافي بجي ترى مناقصين انتي هم تتخربطين مو كافي النايمين بالمستشفى انوب انكملها بيج
بنات شيلوها طلعوها للحوش بين ما البس جبتي
رغد.. ويامن تروحين؟
.... أخذ احمد وياي بلكي واحد من الولد يتلاگنا اهناك
لمى... حجي ريسان راح يخلي ابنة ياخذكم
ششذى انتظري اجي وياج
... يلا امششي
... البنات شالوها طلعوها برا
الحجي وابنة ينتظروهم بسيارة
اريد اروح وياهم ما أگدر مابقى بيه حيل
زلال.. نسيت كلشي عبالي نايمة بيتنا فتحت عيني ضوا قوي عكس عليهن رجعت غمضت
سمعت صوت لمى اتگول اي الحمدلله گعدت
رجعت فكيت عيني باوعت داير مدايري نايمة على سدية بردهة
بدت ذاكرتي ترجعلي گلبي انقبض رفعت ايدي فتحتها أريد اتأكد
اي هيانها أيدي محناية لهسه الحنة بيدها بعدني مغاسلتها
اي أيدي ملطخة بالحنة لا لا هاي مو حنة هذا دمي السفحة أركان
أبن خالي اليوم نحرني بدون مايرفلة جفن
شذى.. شلون صرتي شبيها ايدج ليش رافعتها
... اليوم حنتي مو؟!
لمى... عزززا زلال ششبيج
.... سديت ايدي ما أريد أشوفها انداريت أيهاب موجود
بابا وين؟
أيهاب.. الحمد لله وضعة احسن لاتخافين عليه عمي قوي يعديها بسلامه ان شاء الله لايظل بالج
... أريد اشوفة
..لازم تكملين المغذي ضغطج نازل
من يطلعوا للبيت تشوفي
.... ردت اشلع الكانونة شذى لزمت ايدي
.. دخيل ربج لاتتخبلين بس كملي هذا البطل مابقى شي راح يخلص
... حاولت اگوم منعوني بطلاع الروح يلا كمل اجة الممرض قاس الضغط بعده نازل
راد يشكلي البطل الثاني مقبلت
من لوعتي خليت قهري بالولد ردت اتعارك ويا
أيهاب گاله انطينيا بالبيت انشكلة الها
الكانونة بقت بيدي گمت بالگوة امشي لمى ساندتني
رادوا يطلعوني برا المستشفى
صرخت ما اطللللللللع
شذى. صوتج هاي مستشفى اذا سمعوج يطردوج
... أجة رائد وگف ويا ايهاب
ؤائد.. . ليش واكفين اهنا
ايهاب... معاندة ماتقبل تروح تريد تشوف عمي محمد
رائد.. زلال أرجعي للبيت مامسوح احد يفوت عليه ولزلم كلهم اهنا وين ناخذج بنصهم
.... بجيت بشهكة الله عليكم أخذوني اشوفة والله گلبي راح يطك عليه حررررام عليكم
ايهاب. .. امششي وياي
رائد.. وين ماخذها كل عقلك
.. ماتشوف حالها امشي زلال
.. من بعيد شفت أخواني
رجلي بالگوة شايلتني عادل گاعد من شافني وگف اجة بتجاهي
وصلت يمه بدون كلام حضنته ضميت رأسي بصدره وأشهك
باسني من راسي حجة بصوت مخنوك
.. لاتبجين وداعتج مابي شي
... أريد اشششوفة الله عليك خليني أشوفة
... ممنوع الدخول للعناية رجعي للبيت وأرتاحي من يگعد ويرجع للبيت أريدج تتلگي من الباب صحتة ترجعلة بشوفتج واكفة على رجلج
.. علاء جان گاعد بالگاع وايده على رأسة گام من مكانة اجة عليه
اجت عيني بعينة عيونة دم
اخذني الحضنة رجعت ابجي اقوى من قبل
علاء.. مو رجال ولا عندي غيره اذا ما حاسبت الگ.. على كل دمعة نزلت من عينج وعلى وگعت أبوية ونومتة اهنا وين يروح مني ألزمة يعني الزمة
.. رفعت رأسي عليه كلشششي ما أريد من الدنيا غير شوفة بابا واگف على طولة
عادل.. بدال البجي ادعيله يطلع منا سالم
.. يارب الخاطر حبيبك محمد شافيلي بابا اخذ من عافيتي وانطي
اضطريت أرجع بدون ما أشوفة كلشي بيه تعبان گلبي وعقلي وجسمي دموعي تنزل بهدء
جسمي نحل والدوخة زادت
ما حسيت شوكت وصلنا للبيت لو شوكت وگفت السيارة
لمى.. زلال يلا ننزل وصلنا
.. هزيت رأسي بدون كلام مدتلي أيدها لزمتها ونزلت خطواتي ثقيلة حالتي تشبه الجثة المفارگتها روحها بس جسدها يتحرك
فوتوني جوة تلگتني خالة فردوس
اخذتني الحضنها بجيت بصمت
همست بأذني
أياج تضعفين أهلج عينهم عليج منج يستمدون قوتهم اذا نكسرتي راح تكسريهم
... ماما شلونها
... قبل شوية طلعناهم فوتي موجودة جوة
... دخلنا للهول ماما وبيبي كل وحدة متمددة بطرف
من شافتني رفعت راسها فزت بخوف
.. ششبيها زلال مو گلتولي نايمة شنو هذا حالها وين جانت
... رحت عليها حضنتها بكل قوتي بادلتني الحضن الكلام خلص بهاي اللحظة دموعنا هي التحجي
أسمع ضوت الكل يبجون يا الله الهدرجة حالتي تكسر الخاطر
حورية.. يمه من عمري على عمرج اني مو خوش ام وروح أبوية اني مو خوش أم ماعرفت احميكم واختارلكم الصح
... حجيت بشهكة ما أريد شي غير شوفتكم بصحة وعافية
أركان نعال وراح مايهمني
وخرت من حضن ماما زحفت لفراش بيبي بستها من گصتها سحبتني الحضنها لسانها ثگيل ماتگدر تحجي السكر صاعد عدها
رجعت لفراش ماما گتلها أريد انام يمج
تمددت وياها بالفراش خليت رأسي على صدرها ماطولت دقائق نمت
شذى... أيهاب انطاني بطل المغذي دام نامت خلي نشكله ألها
.. خاف تفزع ما عولنة نامت اذا تظل گاعده تفرفح من البجي
... لا مراح تگعد بالمستشفى انطوها مهدئ اكيد بده مفعولة
ليال... نايمة مثل الطفلة شكلولها المغذي ماحست
لمى.. شوكت طلعوهم لعد خالي وخالة كوثر وينهم
... قبل لاتجون بنص ساعة جابوهم
خالة كوثر بيتها خواتها يمها
وخالي بعده بالمستشفى رادوا يطلعوا مقابل يگول ما اطلع اذا مو ويا محمد
.. اوووف زين صحتة شلونها
.. وليد يگول كل شوية يتخربط دكت ابنه الناقصة راح تجيب اجله
.. نسوان عمامج شو ماكو
. راحن بس عماتي بقن
. اهاا اي زين
زلال.. گعدت نص الليل كمت من يم ماما طلعت من الهول فتت للغرفة البنات بعدهن گاعدات
وصال. هااا حبيبتي شلون صرتي
. مابيه شي بششروني بابا شلونه
.... الحمدلله حالتة مستقرة
ليال...وين رايحة
.. اغسل
... رحت للحمام كملت وگفت كدام المغسلة فكيت أيدي شفت الحنة ششطت فتحت بوري المي افرك بيها أريدها تروح ما أريد اششوفها
لزمت الصابونة اغسل وماكو فايدة تعبت
لمى... ششجاي تسوين أيدج مكان الكانونة نزفت
.. احجي وابجي خلي تروح ما أريد اششوفها
لزمت ايدي
وووخري عوفيني اغسلها
.. عززززا لج هاي حنة مو صبغ ششيروحها
بنات وينكم يمعودات
اجوي يركضون
وصال...شكوو
...تريد توخر الحنة ايدها دتنزف ومدتعوف الصابونة
وصال لزمت وجهي حبيبتي باوعيلي متريدين الحنة مو
. دموعي تجري هزيت راسي بمعنى اي
... هذا هو تعالي وياي للغرفة اوخرها ألج
.. گادتني من ايدي مثل الطفلة
ليال.. همست الوصال شلون توخريها
... اش لاتسمع جيبيلي جف
... وين الكي جف كلهن مشيولات ويا الهدوم الشتوية
رغد... عندي ردن خفيف البسة من البس دشداشة نص ردن يغطي نص كف الأيد
اجيبه يفيد
.. اي جيبي
جابتة رغد
زلال.. هذا ششنو دتضحكون على عقلي لو شنو
.... البسي يغطي الحنة وبعد متشوفيها ماكو غير حل
...ماشي
.. جوعانة نسويلج شي تاكلي
. لا ما أريد جسمي بعد متكسر اريد اتمدد
ليال... عيني عليها للصبح تتگلب
طلعت سويت ريوگ محد اكل بس عماتي
يووم كئيب بابا وضعة مومستقر لازم يظل يظل بالمستشفى زلال سمعت تخبلت
للعصر سمعنا مصيبة جديدة من مصايب أركان
مو يشتغل ويا امجد وعلاء وعماد
محضرين فلوس يجيبون بيهن بضاعة أركان يندل مكان الفلوس قبل لاينهزم بايگهن مخليهم أيد وره وأيد گدام
وكل هذا يهون بالنسبة للدكة السواها بزلال عافها بيوم حنتهم يا نذل ماتريدها عوفها قبل الحنة وافسخ
مو بهيج يوم
مر خمس أيام على وجود بابا بالمستشفى
خمس أيام واحنا عايشين بعذاب توتر وقلق وخوف
خمس أيام ماضگنا بيهن طعم الراحة والنوم
بيتنا صار مزار ناس طابة ناس طالعة. ماكو بحلگهم غير دكة اركان الناقصة
الخبر ماينضم شلون انضمة وهو عافها بحنتهم
الجيران الأقارب كلهم موجودين سمعوا وشافوا بعينهم
بده التأليف والحجي كلمن يحلل ويتوقع على مزاجه
احنا بيا حال مو مال نگعد نتعارك لو نتناقش
مرت خالي بسبب سواية أبنها ما الها عين تجينا
أخواني ماعافوا المستشفى
يحون يادوب يغيرون ملابسهم يسبحون ويرجعون
علاء يمشي ويتحلف بأركان
ماما تحير تخاف على منو على بابا النايم مستشفى لو على زلال وكسرتها
لو علاء وتهديده لايروح بساعة غضب يلگي ويكتلة ويضيع نفسه بدم هذا العار
سادس يوم الأطباء سمحوا الباب يطلع
عمامي نسوانهم وولدهم كلهم يمنا
جابوا بابا قبل لايفوت ذبحوا ذبيحة على سلامتة
شوفتة بهذا الحال ملختنا صاير هلگدوتة ولا عبالك نفسه هذا الهيبة صاحب الجتاف العريضة
ظهره منحني والوجه تعبان
محضريلة سرير بالهول تمدد عليه
خالي وولده ماكو سمعت خالة فردوس گالت عمامج متلاغين ويا ولوما شوية يتضاربون وياهم
اااخ منك اركان عساك لاتهنيت هسه صرت متأكدة علاقتنا ويا بيت خالي مراح ترجع مثل قبل جنا گلب على گلب بيتنا هو بيتهم وبيتهم هو بيتنا
بابا وخالي اصدقاء من الطفولة مايوم تفارگوا
وانعادت نفس صداقتهم بين اخواني وولد خالي
لكن بسبب شخص بايع ضميره للشيطان انهد كلشي بالحظة
طبينا سلمنا على بابا
حجة بصوت تعبان وين زلال
حورية... موجودة خابصة الدنيا عليك لوبيدهل من اول تظل يمك بالمستشفى
شلونها
... الحمد لله زينه لاتخاف عليها
... طلعنا من الهول لان صار أزدحام
فتت على زلال للغرفة گاعدة وحاضنة رجلها بثنين ايدها
بابا اهنا شو مجيتي سلمتي عليه
... بحسرة مو هسه بعدين
.. لعد منو خبصنا حتى يشوفة
گومي ترى سأل عليج
.... ضميت رأسي بين رجلي وبجيت
.. لزمت راسها رفعتة اروحلج فدوة لاتبجين
الحمدلله بابا صار زين
... خايفة
.. من شنو
... اذا شافني ينقهر ويرجع يتأذى
.. خوما تبقين العمر كله خاتلة منه
مصيره يشوفج وتشوفي احجي ويا ارفعي معنوياتة لاتخلي يلوم نفسه وينقهر
.
.. الله كريم عوفيني من يروحون الزلم اطلع
.. ماشي مثل متحبين
عفناها براحتها خليها من تكون مستعدة تروحله
التهينا بالخطار
لليل ناس رايحين جاين خطية بابا تعب وضعة مو مال يگعد ويا خطار صح متمدد بفراشة
بس هم يتحرك كلما يطب احد لأزم يسلم عليهم ويجاملهم بالحجي
انتبهت حتى بابا بعد ما سأل على زلال ولا گال أريد أشوفها الظاهر مو بس عدها شوفتة صعبة
عنده هم شوفتها بعد اصعب
عمامي سلموا وراحوا بقى عمو عاطف گاعد ويا بابا وأخيراً تنفسنا براحة
زلال...اگلج لمى بابا تعشى لو بعده
... اي الولد جبروا يأكل علمود العلاج
... وهسه نايم لو گاعد
... گاعد
.. منو اهنا
.. بابا وبيبي وامي واهلج
.. ماشي گمت بكسل وگفت گدام المرآيا عدلت شعري وجهي ذبلان ما اعتقد اكو شي يخفي التعب الظاهر عليه
فتحت الباب وطلعت گلبي يرجف ايدي ورجلي بعز الصيف قالب ثلج
گمت اتنفس قوي اريد روحي تهدء سميت باسم الله
مديت رأسي للهول
رسمت على وجهي أبتسامة مصطعنة
سمعت اكو ممرضة حلوة مگابلتك وگاعدة
اي حمودي بشرني شوكت تأخذها على سمجة
بابا رفع رأسة بتجاه الباب مجرد عينع لمحتني
دار رأسة اجتافة صار تهتز بجة اي بابا حبيبي ونور عيوني ديبجي ااااخ تمنيت اموووت قبل لا اشوف دمعة من دموعة
فتت بسرعة گعدت بطارف الجرباية لزمت كتفة
بابا الله عليك باوعلي احجي وابجي
درتة عليه وحضنتة
فدوة العمرك لاتأذي روحك باوع هياني كلشي مابيه لا نقصت أيد ولا رجل
وصحتي تمام
طز بالـ يريد يروح درب الصد لا رد محد يموت وره احد
الشي الوحيد الي يموتني شوفتك بهالحال
محمد... كلشي جرالج بسببي عبالي فاهم الدنيا صح واعرف مصلحتكم ذبيتج وذبيت اختج للنار بيدي ما صارلي درس من كسرت اختج كملت عليج ودمرتج
...احنا بشر مو ملائكة علمنا على گدنا شمعرفنك بدواخل الناس
... محد غلطان غيري من خطبج وثقتي بيه
وبـ ختياري كلامج يرن بأذني انتوا ادرى بمصلحتي وشوفت عينج هاي النتيجة الأب سند وحزام ظهر سندكم كسركم يابة
.. لاتكووووول هيج لو جنت ما أريده ما اوافق لو تنطبگ السما على الگاع واني اعرف محد بيكم راح يجبرني بابا لاتأذي نفسك مرضك ونومتك بالفراش هدن حيلي
وبعد لاتگول انكسرتي اني ممكسورة
العدها اهل مثلكم واخوان مثل اخواني ماتنكسر
تدري بابا اني قوتي منين اخذها
والله منكم حتى من اشاغب واسوي مصيبة
ما اخاف لان ظهري قوي بوجودكم
...كبرانه ما أدري الزمن والمصايب هي الكبرتج تعالي يا روح أبوج وعافيتة
... مسحت دموعة وحضنتة
المواجهة صعبة بس لا بد منها ظليت گاعدة يم راسه الحد ما نام
المصيبة حتى اخواني عينهم ماتجابس يخلوها بعيني و يگعدون گبالي ليششش يلومون روحهم والغلط مو بيهم الغلط بيه
اي الغلط بيه وين جان عقلي بيوم الحبيتة وانعجبت
بي
الغلط بيه مو بيهم كلشي صار من أيدي
مجبورة أكتم همي بگلبي مجبورة اضم حسرتي الشاكة گلبي مجبورة اظاهر بالا مبالاة مجبورة مجبورة اي على كلششي صرت مجبورة
حتى دموعي مجبورة احبسهن
الليل ومخدتي شهادات على عذابي
اركان بجاني بدال الدموع دم
اتمنى اشوفة لو مرة وحده بحياتي وسألة ليش سوة بيه هيج
لو عدوتة هم ماله حق يغدرني بهاي الطريقة
والله والله لا اني ولا أهلي مأذينة بشي
شلون گدر يجازي حبنا اله بالطعن
ليش ماعافني من وقت ولك أركان ليشش
حسبي الله عليك
حسبي الله على ظلمك وغدرك
حسبي الله الـ عافيةٓ بابا الراحت بسببك
حسبي الله لدموعة الغالية النزلن بسبب حقارتك
حسبي الله الـ لوعة گلب ماما كلما عينها تجي بعيني
حسبي الله الـ دمار صداقة عمرها سنين وتفرقة بين عائلتين
واخيراً حسبي الله الـ سمعتي الصارت علج بحلوك الناس بسبب فعلتك
ليال.. ورة المغرب طب عادل من برا شكله ميتفسر بوجهة فات الغرفتة شذى لحگتة ورة شوية رجعت ادردم
ششبيج
... اخوج ما ادري شبي احاجي ميجاوبني
من لحيت عليه عاط بيه گال لوطلعين لو تسكتين
هاي أول مرة بحياتة يعلي صوتة ويحاجني بهذا الأسلوب
...لاتلومي كلنا اعصابنة مشدودة ونعارك ذبان وجهنا من يوم عملت أركان
.... والله مزعلانة ازعل من روحي وما ازعل منه
بالي يمه أريد اعرف شبي وشنو الغاثة هالشكل
... الله اعلم
فردوس...شوفي نايم لو گاعد أريد افوت احاجي
.... عفتة گاعد
.. راحت خالة عليه
وكفنا يم الباب نسمع
فردوس... أگدر ادردش وياك شوية لو أأجلها بعدين
... فوتي خالة
... يصير اسألك شبيك وشنو المعصبك هالشكل
.... البيه ماينحجي سالفة تجر سالفة ومصيبة تجر مصيبة الله وكيلج گلوبنا تعبت نرگع سالفة تطلع الأضرب منها
... واني هذا الجابني سمعت شغلة واريد اتأكد منها يمكن نفسها الـ مخليتك نار كبرة
... شسمعتي؟!
... احجيلي واذا نفسها اگلك هي لو لا
... عقيل أبن حجي ريسان قبل شوية لزمني
حاجاني گال ما اعرف شلون أبدي بالموضوع
سألتة خير شصاير
گال جم واحد بلا ذمة وضمير نازلين حجي بسالفة رضيعتك واشكال السوالف مألفين
فردوس.. نفسها سالفتي سمعتها من ام سسعيد
... ادري الناس ششبيهم تخبلوا عافوا ذاك العار وجلبوا بزلال
... ششراح تسوي
... ما ادري منا صحة ابوية تعبانة ومنا علاء متخبل مخلص النهار يفتر يدور للنذل
اذا سمعوا يتخبلون بالزايد
... ما أدري شگلك كلمن يحجي عساها بحظه وبخته
ليال. طلعت خالة شافتنة واكفين
جريتها من ايدها لان مافهمت شي
خالة شنو الموضوع والناس اشديحجون على زلال؟!
.... يمعودة جم واحد زايعتة الگاع گام يألف من كيفة
يگولون اكيد ابن خالها عافها بسبب الحادث القديم
يجوز متعرضة للأغتصاب واهلها ساكتين وقبل العرس مصارحينة مامتحمل ومنهزم.....
