 |
رواية لك ياذا الجمال اليوسفي الفصل الثالث عشر 13 بقلم فاطمة العبادي
رواية #لك_يا_ذا_الجمال_اليوسفي
بقلمي ... #فاطمة_العبادي
_______
ارتجف كلبي و ارتعش جسمي ، ما لكيت روحي غير ابتسم ابتسامة صفرة و اكللهم بضحكة
... هههه المبايل انطانياه خالي حر وكال علمود تضلن ع تواصل ويانة ويمكن هوا لو امي يخابرون .
عمي فاضل باوعلي بشك وكال ... كومي جيبي وتعالي نحجي ويا خالج نسلم علي
كمت وانقطعت المكالمة ، رحت شفت المبايل همزين انه احذف كل المكالمات
بأيدي ورجع دك .. فتحت خط وحجيت بهمس
هاا خالي همزين انطيتني مبايل من شفتك اليوم يم المدرسة ، علمود اتواصل وياك و ويا امي ..
حجيت وانه اطلع ، هوا لگفهة بسرعة و رد بس جان صوته مرررهق الى حد فضيع
... اي وعد تستحي تخابر ع مرت عمج ، وهسة راح احطلهة الرقم وتضل خابرجن علي ..
درة ... اي مشكور
عمي فاضل سوالي بأيدة حركة بمعنى جيبي
... عمو فاضل وياك
مديتلة المبايل ورجعت كعدت اكل حتى ما يشك بية واكون طبيعية
فاضل ... الووو ياهو حر؟
سكت سمع المقابل و رجع كال
... يا هلا ومرحبا شلونك شلون صحتك شخبارك
... ههههه البنيات زينات ردت اجيبلهن نقال بس كلت يلهيهن عن دراستهن ويلتهن يخابرن
... ههههه اليوم ناطي الهة يعني
... هاا خوش حجي بعدهة ما كلتلي شايفتك يم المدرسة وناطيهة نقال ..
... شعجب اليوم مااار صوبنة
سكت شوية وطولت صفنتة
ونوب كال
... الله يرزقك ... سلملنة ع اهل
الله وياك ..
سد الخط وشمرة بحضني
... لا تلتهن بي درسن
درة ... لا عمو شلون اعوف الكتاب ههههه
تنفست براحة اخيرا رجع كال ... شعجب ما كلتيلي ناطيج مبايل
درة ... عمو انته شفت روحك شلون صيحت جمدت الدم بعروگي
فاضل ... وانتي دامج تدرين بروحج ما مسوية غلط ليش تخافين و يجف الدم بعروكج ؟
الما مسوي غلط ما يخاف
درة ... عمو انه اهابك الهذا السبب ارتبك من تصير كبالي
هز راسة برضا و تلملمت سالفة المبايل ، لو ما فاهمهة هوا جاننن صارت مصيبة ونزلت ع راسي
وهسة صار المبايل مكشوف وعلني ..
ما انكر شلون خفت والدم ضل ينضخ بقوة و ارتجت كل اعضائي ..
خلصنة اكل و شربنة چاي ، وبعدين كمنة ندرس كل عادة ، ورا ساعات اجت فدك دكت الباب وفاتت
شلنة روسنة من الكتب وباوعنة عليهة بغضب لان عدنة كومة دراسة
فلك ... يبوووي شتررردون
فدك ... ابوية يصيح لدرة بالأستقبال كاعد ينتظرهة
رهف ... عزة بعينج شيريد منج عمي
درة ... وين ادري
فدك ما كلج شنو يريد مني
رفعت اكتافهة و قوست شفايفهة بمعنى ما ادري ..
رمشت بعيوني بخوف ومن طلعت رهف همست
... عمي فاضل دوم يعرف اشياء تخصنة احنه نفسنة ما نعرفهة
بلعت ريكي وعفت كتابي وكمت رحت لعمي فاضل دكيت الباب و فتت، جان كاعد وكاض بأيدينة عكازتة وعينة عليه اول ما فتت ، حاولت ما ابين خايفة حتى ما يلزم علية لزمة لو يحس بشيء غريب
أشرلي براسة ع مكان بصفة و رحت مثل العاقلة كعدت بي حجة هوا
... شلونج درة
درة ... زينة عمي الحمدلله
... شخبار دراستج سمعت عنج كلش شاطرة سداد يمدح بمستواج هواي
درة ... اي عمو الحمدلله احب ادرس وافهم بسرعة
... عفييية شلون حبيتي الدراسة هيج
ابتسمت وجاوبتة ... خالي حر جان يدرسني ويشجعني ويضل ينصحني ويرسملي المستقبل ع قمم النجاح بألوان زاهية ، علمود احلق و اوصل للقمة
فاضل ... للقمة؟
درة ... اي هوا هيج يكول انتي طير يحلق و وجهتة النجاح ، راح توصلين دامچ تحلمين
فاضل ... يعني هوا علمج تحلمين ليش ما علمج تحققين گبل
درة ... كال نحلم بالأول وبعدين نسعى لتحقيق احلامنه ..
اذا نحقق وندرس ونجتهد بدون حلم ما ننجح ..
فاضل ... خوش والله معلمج ومشجعج دراستج هية تفيدج ابتعدي عن باقي السوالف ترة ما تفيدج
وضيفي ع هذا انه هنا ولي امرج ، يوم الي تغلطين مرة ثانية ما راح اغفرلچ
و راح اعاقبچ بأسوووء شي ممكن يخطر ع بالچ .
كل الي يغلطون عندي يتعاقبون
ناري من تلهب تحرك الأخضر واليابس !!!
الحجي مو بس وياج ، ويا كل الموجودين هنا
من ابني ليث
لرهف .. !
انتي بالذات يتيمة الام والأب واخاف الله بيچ لا تخليني انجبر بيوم و اشمرج للنار بأيدي .. !!
درة ... بس انه يمتة غلطت ؟ علمود تكلي تغلطين مرة ثانية ..
فاضل ... غلطتي يوم الصعدتي يم حر وحجيتي ويا بموضوع لا يخص امج ولا يخص خوالج
وغلطتي يوم القبلتي المبايل بدون ما تجين وتكليلي ولا حتى كلتي الأختج وبررتي موقفج
حلو هسة الموقف الصرتي بي من جنة ع اكل ؟
درة انتبهي من اليوم وصاعد ..
شبكت ايديني بقوة وانفاسي اضطربت جاوبتة وانة كلشي بية يتلعثم
... عمو انه سالت ع امي وخوالي واذا متصدك سألة لخالي حر
فاضل ... روحي كملي دراستچ وخلي حچيي ترچية معلكة بأذنج ما تنزعيهة بس من تقررين الحداد ع روحچ ..
درة ... زين انته ليش هيج ما تتفاهم هاا لا تخليني مشدوهة وتعبانة كلي شنو صار
وبعدين انه بس سألت عن احوالهم انته ليش متصدك ولا تقبل تسمع مني
فاضل ... انه صدك ما جنت كاعد وياكم بس اعرف شني يدور براسج من وجهج ، حفظتج بأول يومين
انتي شفافة وكلشي بداخلج امبين ع وجهج
اكدر اقراج بكل بساطة ..
كمت ع كيفي وهمست بكلمات مبعثرة
... بس هاي المرة ما قريتني زين ، من رخصتك رايحة اكمل دروسي
فاضل ... اخذي راحتج بنيتي ..
درت وجهي وطلعت اجر بذيال الرهبة الصابتني و اصبر بروحي ما ابجي ، بلعت غصتي و فتت للغرفة
البنات رفعن روسهن و باوعلي بنظرة معناها
شنو راد منج
درة ... يكول سداد يمدح مستواي الدراسي و شلون لازم ادرس وانطاني عمو محاضرة ع المستقبل الزاهر وخلاني احلم و كال رجعي حققي .
رجعت ادرس بس اجذب اذا كلت بالي ويا الكتاب ومنتبهة
عقلي بوادي وعيوني بوادي ثاني
عيني ع كتاب وعقلي ويا خالي حر اريد اخابرة اسألة ليش مخابرني و شنو راد مني بس كلت خليهة بالليل ادزلة رسالة ..و اسئل شبي ..
شفت عندي موضوع مجاي افهمة بالعربي حاجيت فلك ... الموضوع ما جاي افتهمة دخت بله شوفي
فلك ... اذا انتي ما تفهمينة انه شلون افهمة ؟
باوعتلة شوية ورمشت بعيونهة بثول
فلك ... خلي اروح لسداد اكلة يدرسنة الموضوع هوا وانتي رهف فاهمتة لو لا؟
باوعت علينة بصفنة و كالت ... اي فاهمتة بس مو كلش بعدين اسويلة مراجعة
درة ... والله جذابة انتي مو زينة بالعربي ليش تكولين فاهمتة بعدين اذا فاهمتة فهمينة وياج احسن ما نروح لسداد ونشلع كلبة
رهف ... اوووف جذب جذب بس ما اريد اروح السداد استحي
درة ... بكيفج والله
رهف ... باعي من يفهمج حبابة رجعي فهميني الموضوع اعتبري روحج تراجعين
درة ... اي خوش امشي فلك روحي صعدي شوفيلنة صينية البسبوسة شتكول بلكت الله ماعدهة شي وتجي تفهمنة
وهاا اذا سئلج منو ومنو كليلة تلاثتنة حتى رهف ويانة
عادي خلي ينزل ونصدفة ههههه
فلك ... راح اصعد حضريلنة كلشي
رحت صعدت طلقة لغرفة سداد دكيت الباب دكتين وصاح تفضلللل
طرش أذني، فتحت الباب ومديت راسي
.... سدودي اخوي الغالي حزام ظهري ونظر عيني ماعندك وكت تفهمنة الموضوع ترة ما جاي نفهم محتاجينك حباب
سداد ... فلك عندي تصحيح اوراق ليش ما حجيتي مساع
فلك ... سداد حبوبي والله لا انه ولا درة ورهف فاهماتة وتلاثتنة محتاجاتك هسة
باوعلي بتفكير ورفع حاجبة ... يعني هسة رهف ، هم تريد افهمهة وياجن
فلك ... اي منتظرات جوة البنات
سداد ... خوش نزلي والحكج
فلك ... لا اضل يمك رجلي ع رجلك ما انزل وحدي
سداد كام للميز رش عطر وكض المشط وكال
... ولج خليني ابدل شنو ترديني انزل هيج
باوعتلة صدك لابس برمودة فوك الركبة وفانيلة داخلية خجلت و حسيت الخجل اعتلى كل انش بية
همست بخجل
... اسفة ما انتبهت
عفتة وسديت الباب و مشيت مريت من يم غرفة هاني وفدك وحسيت كلبي نغزني
جانت اصوات ضحكهم عالية و واضحة ، يتشاقون ويضحكون سوية ..
اختنكت وحسيت الهوى شح عني ، اختفت البهجة من ع وجهي وحل محلهة الحزن والانكسار الي جنت ضامتهن بين اضلاعي ..
فتحت الباب وفتت للغرفة شافت درة وجهي الحزين وكالت
... بس لا ما قبل
فلك ... لا لا راح ينزل بس شوية، انه ضجت لان بعدني ما مكملة وعندي هواي دروس
جنة دنحجي وسمعنة صوت فالح اجة
رهف ... استلم اجت العطلات
فلك ... اجت لميس ههههههههه
درة لميتي الكتب
درة ... اي هذني
رهف ... هذا اذا خلاجن فالح تفتهمن شي
فلك ... اطيح صبغة غير
امشي درة امشي هسة سداد ينزل
اخذنة كتبنة وطلعنة للصالة شفنة فالح جاي و ويا همام، رفع ايدة لوح لدرة و كال بصوت هادء
شلونج حلقومة ..
درة عقدت حاجبهة بأستياء و كالتلة بحزم وهية تبعد وجهة ... انه مووو حلقومة
فالح ... ولك يالأغم هاي ككوة مو حلقومة
همام ... حلقومة
فالح ... مالت عليك و على ويهك
نزل سداد من الدرج وصاااح بصوت عالي
هاااا النووواقيص هنانة اليوم
فالح ... اي جايلك بمصلحة اريدلك تحفلي وجهي
سداد رمش بعيونة بصدمة ورفع حواجبة
... شنو لازم عجبتك سوالف نستلة ، شعدك عدنة ولك ارجع الأهلك ..
فالح ... ولك اريدك تحفني وحمس الحمسك
فلك ... تحجي كل عقلك خبل ..
فالح ... شنو شايفتني لابسة دشداشة مشككة وشعري كوشة وارعص مو كدامج زلمة صاحي وشحلاتة ..
كعد وحط رجل ع رجل وحجة برهاوة
... يله حبيبي جيب البكرة وتعال اخذلي خيط عدل لحيتي
سداد ... كول اخذلي خيط من البداية شنو تعال حف وجهي ، اكعد تاني اريد ادرس البنات هنة اولى بخدماتي .
فالح ... اي عادي اكعد انتظر شعندي لا ماما ولا دادة
فلك ... سداد استعجل
فالح ... انتي شمالج وجهج يلطم جنج عجوز مضيعة صخولهة خاف مريضة ؟ .
ابتسمتلة مجاملة و همست بصوت مرهق ... ما تشوفني اصحة من الحمار و اطربك
شحيت بنظري عنة ، ما يدري بية انه معتكفة ع نفسي بمدائن الذكريات القاسية
وحتى الغصة صارت تبجي ع كلبي، الي شمرة الزمن قتيل على نواصي البؤس ..
ما يدري شكد دعوات وكعت من عيني دمعة قبل لا تنطقهة شفايفي مرتجية و منتظرة الأستجابة
وهسة انتهت .. وصارت ماضي ..
افكاري مشوشة، عواطفي مرهقة، تجربة حب من طرف واحد قاسية وشائكة
خضتهة وانه اتنفس الوجع بعمق
وطلعت منها ممزقة مهشمة، كل اجزائي المبعثرة هشة ..
تنهيدات ، آهات ، دموع تجول بجوفي تأبى الخروج
افرطت بحبي بجنوني بهيامي ، افرطت بحنيني واهتمامي
حتى صرت لا أبالي ..
كعدنة بالكاع احنة بسطنة بكتبنة وكعد سداد فتح الكتاب وصفن علينة
رفعنالة روسنة وصاح بصوت عالي
... يله رهف وينج
فلك ... رهف ما تريد تدرس تكول مفتهمة عوفهة تولي ويله درسنة ماعدنة وقت بعد
باوعلنة انه ودرة وفك حلكة
رمش بعيونة وجرر حسررة عميقة تعبر عن ميبة آماله ، لمينة شفايفنة ونزلنة روسنة ع كتب، فهم احنة سوينالة فخ علمود يجي يدرسنة بدون تذمر ..
بدأ يشرح النه وفالح حاط ايدة ع خدة وصافن ويانة ومن يكول فهمتن ؟
فالح يكول ... نعم استاذ عاشت ايدك
نرفع روسنة كلنا نباوعلة ويأشرلنة بمعنى كملووووا
كملنة دراسة وبعد ماعدنة شي طبكنة كتبنة ، وضلينة كاعدين
درة ... سداد باوع علينة وكال جيبلي خيط بنات
كامت فلك جابتلة بكرة واجت هوا كطع الخيط وسواه ع شكل مكص وضل ياخذ خيط لفالح يحطط لحيتة، هوا يحف وفالح يلطم ع فخذة
... احتركت صفحتك نستلة شلون من حطلي شمع اتذكر متت وجع وردت اصرخ بس هيبتي ما سمحتلي وكرامتي كلت تنمسح بيهة الكاع اذا صرخت ..
سداد ... يم نستلة تتحمل ويمي تصير رچيچ
جر حسرة وكلة ... انه يمكم اصير رچيچ كلش رچيچ .
سداد باوعلة واخذلة صفنة بوجهة جن جاس شي من لوعة فالح الما تنحزر
فالح ...اوي داده اوي نزول عليك فالح ، شني مورطك منو ضاحك عليك وكايلك اخذ خيط
فلك ...شگد جبان ، خليك رجُل قوي صلب
فالح ...شنهي يبا؟ رجل قوي صلب؟ شني هاي النوب عوفي الثقافة احجي مثلنة حجي معدان
گولي زلمة حوك ..
فلك ...شحجيت هسة نفس المعنى
فالح ...يبا انه معيدي ما افتح حچيچ مال مايعات
سداد ...سد حلگك
فلك ...گله سد منگارك لأنه لقلق مو بشر
سداد ...عيب لچ ابن عمچ هذا
فالح ...انته شلك شغل القاضي راضي بت عمة وتمون الا تحط روحك
همام ...اگلك فلوحيييي ...جر الحجاية جر
فالح ... عيوووون فلووحيييييي
همام ... يگولون الحلقوم صاير غالي
فالح ...لأن حطو علي ككو هههااهاااي
سداد ...سرسرية سكتو ولك فالح تقرب شبيك قوي گلبك صير زلمة لا تضل رجيج
درة ...امشي فلك نروح للغرفة
همام ...لالالالا حلقومة ضلي نشوفچ ، سولفيلي؟
درة ...شسولف؟
همام ... عن شعرچ الطويل مثلًا ...شهگت مصدومة وحطيت ايدي على حلگي
فالح گال بمكر ...وصلنة للشعر شدها ولك شدها
سداد ...هووووب هوووب خاب انته اصحة مني ومن ءفليح ، لو تسد حلگك لو تولي للأستقبال
همام رمش ببرائة وسكت .. والقران هذا صاحي لا مريض نفسي ولا شي
كملة وراح رهف مدت راسهة من الباب وكالت
لميس راحت يله تعالن كابلتنة وكعدتن ما تكولن اكو بنية هنا محتاجة تشرحلهة
سداد ... ما اجيتي افندية
رهف .... تأفأفت بضجر ودخلت للغرفة الوب ، ما فاهمة شي واريد درة ترجع تشرحلي
دقايق وفاتن يضحكن من جوة لجوة
... شبيجن شارگات الحلگ من الذان للذان منو سولف نكتة
درة ... لا خية محد هيج بيناتنة الموضوع مو يمج
رهف ... تعاي شرحيلي يله اريد اكمل دراستي
كعدت واجت شرحتلي الموضوع بسرعة فات العقلي فيت ، خلصت شرح وراحت كملت دراستي وراجعت
رتبت جدولي و كمت بالليل بعد ما الكل نام اخذت ملابسي وطلعت امشي ع للحمام .
سبحت ع راحتي بماي دافي حسيت اعصابي رخت ، ضليت جوة الماي لحد ما حسيت كل شي بية ارتخى ، لبست ملابسي و لفيت الخاولي ع راسي
وحطيت اطرافة ع رگبتي خاف اصادف احد ..
وبالأخص من حسيت بحركة يم باب الحمام حسيت واحد من الولد كاعد ، طلعت و فعلا جان سداد فاتح المغسلة و واكف ، شافني بالمراية و أبتسم تك خد
ارتفع حاجبة و باوعلي بمكر ، شحيت بنظري عنة وخليت ملابسي بداخل السلة
ما حسيت غير صار وراي
وهمس بصوتة العذب "شنو مزعلچ رهبتي"
رهف ... مخبل ... !!!
رديت بأستغراب من همستة الغريبة ..
سداد ... اتسألين المجنون كيف فقد عقله بين رفه جناحيكِ .
رهف ... هذا البيت مو المدرسة استاذ ... عيبت علي مديتلة لساني ومشيت بهدوء ما حسيت غير يلزم ايدي بسرعة وجرني، شهكت مرعوبة نزل راسة بسرعة طبع قبلة جوة اذني وابتعد
بس شصار بية روحي كلها راحت، كلشي بيه تلعثم
اتبعثرت الكلمات بين شفايفي و ارتعشت ..
جريت ايدي منة بس ما عافهة ضل كاضهة ومبتسم تك خد لبسني سوار بايدي وكضهة قوي عصرهة
جريتهة حيل ما عافهة ... ضليت ارجف
خجل ، خوف ، حب استغراب
كل المشاعر اجتاحتني بهاي الثواني ما حجينة شي جانت عيونة تسولف قصة بعدهة ما بدت ..
رعشت شفايفي، وقشعريرة بدني الخدران من قربة، وتلعثم رموش عيني اضطراب انفاسي المتصاعدة
كلها تسووولف .
النجمات الما شافن يشهدن ، الكمر الما شاف يشهد
نسمات الهوى الجانت تمر بيناتنة تريدنة نتقرب اكثر واكثر ونتشابگ بعمق ..
حسينة بخطوات ع درج عاف ايدي ومشيت بسرعة للغرفة بدون ما التفتت ..
ولا انه حجيت ولا هوا حجة اي حرف ، صوت عيونة كافي
تنفست كل نظرة بدرت منة
وهوا تنفس كل رجفة تسللت لجسمة من ايدي ..
فتت صافنة شلت المنشفهة وضليت امشط وانه ابتسم وحدي مثل المجنونة
نشوة الحب ، اكبر من كلشي جانت
نار الغيرة طفت
ونار العشگ وچرت
واخ يا گلب العاشگين من يچودر الليل ، نصير نتنفس عطرهم من بعيييد ..
رفعت ايدي باوعت للأسوارة ، جانت ذهبية يمكن ذهب لأن عليهة رقم ، شوية عريضة وبيهة احجار لونهن لازوردي ، شكلهة حلو نازلة منهة سلاسل ناعمة .
لزمتهة وصرت اتحسسهة بايدي و رحت فتحت الشباك ضربني الهوى البارد جمد اطرافي بس كلبي محتاج فضاء واسع يحلق بي
مو غرفة بأربع حياطين ..
حسيت كلبي فرد جناحاتة وراح يحلق مثل الفراشة يحتسي عبق الايام السعيدة .. بايام ربيعية زاهية ..
ابتسمت اساريري وانسكب الفرح بگلبي ، حطيت اييدي ع مكان البوسة جانت خطف بس احس شفايفة بعدهن يلامسن بشرتي ويقبلهن بهيام و ولع .
حسيت شي نزل ع راسي قوي صحت اووووي
درة ... و وجعوي و12 مرضوي سدي الشباك ونامي شنو سحير الليل ما تنامين خفاااش وسدي الشباك .
كمت سديت الشباك وانه ابتسم ما رديت عليهة ، تمددت بفراشي شالت راسهة وكالت بتساؤول وهية تشيل الغطة عني ... تضحكين خير
رهف ... فرحانة لان كملت دروسي .
درة ... عفية
عافتني ودارت وجهة نامت ، غمضت عيني وبعد احلامي سعيدة وطويلة غفيت، كعدت الصبح صليت وبدلت عدلت شالي ورشيت عطرر نزعت الاسوار ضميتة ولبست ساعتي بدالة
اريد اطلع وخجلانة، خدودي محمرة و عيوني تضحك
هسة اذا اباوع بوجهة انفضح ، سميت بأسم الله وطلعت شفتة يم السيارة باوعنة واحد بوجه الثاني وضحكنة
ياربي شكد شفافين احنة وكلشي واضح ع وجوهنة
همزين محد موجود بس انه ويا والبنات بالسيارة .
فلك دايرة وجهة ع درة ويسولفن
همست صباح الخير
حك حاجبة و رد ... صباح الورد والعسل والأسمر الي يموت وبوسة ترد الروح للميت .
رهف ... عيدهة مرة ثانية وشوف الا اخليك تتفل ضروس .
سداد ... اذا هيج راح اخلص كل اسناني واصير اثرم
بدل ماكول رهف احبج
اكلج رهف احبششش
... حبتك حية ام راسين هههههه
عفتة وصعدت بالسيارة، صعد اخذنة للمدرسة ، اول حصة لأستاذ فاقد
فات وكلنا جفلنة
طلعنة كتبنة وحل تمارينة وكعدنة عاقلات
دار ع سبورة يكتب اتجرأت وحدة من البنات وكلتلة ... استاذ شفت اوراقنة مال امس
فاقد ... شككتهن عدا ورقة نسمة ضلت ماخذة 10 وراح تنزل درجة الشهري الهة
نسمة ... بس هذااا ضلم استاذ
التفتت عليهة رافع طرف حاجبة وكللهة بحزم ... درس الج هذا حتى تبطلين حركاتج الصبيانية
نسمة ... اسفة استاذ والله ما تنعاد غلطة وسامحني عليهة .
فاقد ... افكر .
نسمة ... يعني تسامحني استاذ وما تنزلي ال 10 بدرجة الشهري .
فاقد ... الله كريم .
نسمة ... يعني ما تنزلهة استاذ اريد جواب شافي .
فاقد ... صفررر .
نسمة ... ابو فاضل عليك !!! .
ضج الصف بالضحك ومن بينة استاذ فاقد ضحك وكال
خلص راح اسامحج هاي المرة بس ثقي المرة الثانية احطلج 10 .
انتهة اليوم حالة من حال كل الأيام ، ويوم يتبع يوم ويوم يتبع يوم
والايام تمر طبيعية، امتحنة نصف السنة هنا امي كالت تعالن ضلن يمنة كل العطلة تونسن
انتفضت درة وكالت لا مستحيل ما اروح اريد ادرس
جانت ترجف و ما تقبل تروح
درة ... ما اريد اروح اريد اكعد ادرس عود من اكمل السادس اروح .
رهف ... اكلهة امي تريد تشوفج تكلي من اكمل السادس
درة ... عفتهة وكمت فتت للمطبخ يم عمة نجوى ومها وسفانة ما اريد اروح
حد هسة اتذكر ذيج الليل من طلعت رهف للحمام و خابرتة جان يرعد و يزئر بية كـ الأسد الغاضب ..
خلاني ارتجف وانام بصعوبة، كال بكل غضب
""دررررة اندمچ وحك كل ذرة حب الج بكلبي اندمچ""
خفت كلش و رفضت اروح ما اريد التقي بي ، بس من ضلت رهف تلح قررت اروح لان اضل البنية المشتاقة الأمها
لازم اروح اشوفهة ، ما اخذت جرعات صبر كبيرة تساعدني ع فراكهة ..والبعد ..
حضرت ملابسي ، وخليت رهف تحفلي وجهي
وكفت كبال المرايه فليت شعري وجبت المكص
لميتة وبترت شعري حد عنقي ..
شافتني رهف وشهكت مخروعة
... سويتي بووووي يالمصخمة بترتي بترررررر الله يبتررر راسج ولج الناس تكتل روحهة حتى تحصل صبع من شعرج ..
درة ... ما احبة رهف احس كلبي هسة ارتاح وانفاسي انتظمت من شفت وجهي بالشعر القصير .
فاتت فلك شايلة سلة الملابس وتدردم
... لميت كل الملابس هذا اتك منو اسود شافة سداد وكال هذا ثوب منو
كتلة مال رهف
كال .. هية شعدهة تلبس هذا الثوب مال النوم
كتلة شعليك بيهة هاي سوالف نسوان وعفتة ومشيت
رهف ... رمشت بعيونهة بخجل وراحت اخذت الثوب من بين كل الملابس و ضمتة بالكنتور
خدودهة صارن حمر
فلك ركصت بحواجبهة و ضلت تتغمز والنوب اتسعت عيونهة مثل الشافت شي خرعهة وشهكت مصدومة
... كااااااصة شعرررررررچ يممممةةةةة خطيبة حمووودي كاااصة شعرهة لحكي لحكي لحككيييي يبوووووو هضيمة هضيمة ..
درة ... الله ياخذني شبيكم عوفوني اريدة قصير
فاتت عمة نجوى ايديهة كلهة طحين وحجت بغضب
شبيج انكرصتي تصرخين شصااار يهي تكهربت
باوعت ع رهف وباوعت باتجاهي وعاطت
.... صخااااام الصخمج نجوى كااااصة شعررررج
درة ... اي عمة الله عليج مو صرت حلوة ؟
نجوى ... صرتي صخلة لاحسهة الطلي ..
ولج ااااخخخ كوون اكضج واموووتج اااخ اااخ والله ماخذتج لحمودي وصايرة جنتي ومسوية هيج الا ابتر راااسج ورا شعرررج ..
هزيت راسي بغرور وكتلهن ... اخبل صرت انتم مقهورين مني لان ما تكدرون تكصون شعركم
هزيت جتفي وحطيت قراصة بشعري وهنة صافنات علية ، لبست حجابي وضميت شعري بعلاكة حطيتة بجنطة ملابسي اخذة الأمي الي يمكن تشوفة وتنجلط ونركض بيهة للأنعاش ..
نجوى ... والله لو بتي الا افصمج ع هاي سالفتج
فلك ... چنتچ هية فصميهة شمتانية والله انحرك كلبي ع شعرهة
رهف ... بربوك ما تنكدر رعنة شلون كصتة ع الاقل لو رايحة للصالون .
ما رديت عليهن ، رحنة لخوالي ..طول الطريق ايدي ع خدي صافنة ع طريق .. احس كلبي معصور ومنتظرتني مصيبة ، حاولت قدر الأمكان اتجاهل هذا الشعور بس جان محاصر كلبي وضاغط ع انفاسي ..
وصلنة لبيت خوالي ، نزلت من السيارة ونزلت رهف وراي كضيت جنطتي بأيدي ورفعت راسي اعاين للبيت ، انفتح الباب قبل لا ندگة
اجت عيني بعين خالي حر ، فتح الباب ع وسعة وكال ... يا اهلا و سهلا ...
وبدأأأت حكايتنا.....
