 |
رواية ليلة الحنة الفصل الثاني عشر 12 بقلم بسمة البياتي
_ #البارت_الثاني_عشر _
_________________
.. عدلت گعدتي يعني توقعي صح اكو شي
احساسي مايكذب
اي اسمع كمل
.... قبل لا انطق حرف أريدج تعرفين الكلام الراح اگولة صار قبل خطوبتن
... اي أي احجي عاد
...اني وياها يعني جنا
... جنتوا شنو لاتجر وتعر بالحجي گولها من شنو مستحي عندك علاقة وياها مو؟!
... صح
... غمضت عيني أطلب الصبر من الله أعرفة أبو بنات وممبقي وحدة تعتب عليه بسس ويا مينا لا ماجاي أگدر أصدك
.. ليش سكتي زلال من نخطبنا الماضي تركتة وراي علاقتي بيها أنتهت قبل الخطوبة بفترة
... اششش الخاطر ربك اسكت ويااا مينا صديقتييييييي ليششش ما حجيت من البداية
وهي ليش سكتت
ويكون بعلمك مينا لا دازتلي مسج ولا شي
أرتباكك هو الخلاني أشك بيك اتوقع بينكم شي
... يعني مينا ماحجت
... لا ما حجت لان جبانة اكتفت بالسكوت ورافضة ترد على اتصالاتي
انت واحد حقير ونذل تدري بنفسسسك لو لا
نفسي لعبت منك ومنها ضحكتوا عليه
لو ادري بعلاقتكم ولا اقبل بهالمهزلة
... كافي انطيتج مجال هواي ديربالج تتجاوزين
من البداية تعرفين بيه عندي علاقات قبلج
ورضيتي نرتبط
اذا مينا ولا غيرها ششنو الفرق؟!
داگلج علاقتنا انتهت قبل الخطوبة
جنا ندري من البداية علاقتنا فاشلة اهلها ماينطون الغربة
زلال الماضي شي خاص بيه ما الج حق تحاسبيني عليه
... هلگد ما شايطة لزمتة من ياختة
بعد ما أريدك ولا طايقتتتتتتك ساعة السودة القبلت بيك
لزم ايدي دفعها عافني وراح
ركضت للغرفة دخلت بفراشي غطيت رأسي شبعت بجي
مينا بعمرها ما ضمت عليه شي شمعنى هذا الموضوع سكتت عنه
اي اكيد تسكت لان جانت حاسة بيه معجبة بأركان
ااااخ مجاي أگدر اتقبل السالفة اكيد بعدها تحبه
ليال.. كشفت رأس زلال جاي تبجين؟
... رجعت جريت الغطا عووووفيني بهمي ما أريد احجي
.. كل عقلج اعوفج شصاير؟!
.. رفست الغطا ششيصير اكثر اليوم اكتشفت خطيبي جانت عنده علاقة ويا اعز صديقاتي
... عزززا مينا لو غلطانة
.. اي هي لج من انخطبت مادري شصار بيها اتصل متجاوب واليوم الله راد يكشفهم
كلما اجيب طاريها گدام أركان يرتبك بگت لسانه زاع الأول والتالي والمصيبة هو ابو الراهي يگول ما الج حق تحاسبيني على الماضي
... مينا أهلها متشددين شوكت تعرفت عليه وحجت ويا وحبتة
واذا تجين للحق كلام اركان صح الماضي شي خاص بي انتي عليج بالحاضر والمستقبل
.. شششلون ما عليه اذا جان الماضي يخص صديقتي والله السالفة متنبلع ما أگدر اهضمها
.. ما اعرف شگلج اني بالذات ما أگدر اقدملج النصائح والحلول لوبية خير جان نصحت نفسي قبل لا أوگع بيد ليث وأهله
... ما اريد شي خلي انام طز بي وبيها
كذب ولا گدرت انام كلما اتخايل شجانوا يحجون وشلون يتغزل بيها وتتغزل بي واتخايل حالها هسه شلون ضايجة ومقهورة اشبع بجي
أخذت موقف من اركان حاول يراضيني بكل الطرق جنت قافلة التهيت بالدراسة بلكي انسى
وما افكر بيهم
وطبعاً الكل صفوا ويا وطلعوني الغلطانة. على أبو شنو الماضي ما ألج حق تزعلين منه
وصديقتج هي بنفسها گايلتلة حتى لو تقدمتلي أهلي مينطوك
انلصمت على حلگي وسكتت رجعت احجي ويا بس شي قليل مو مثل البداية
اليوم سبت وصال وخالة فردوس گالوا بدلي ننزل للسوك نكمل نواقص الجهاز
أركان استغل الفرصة گال أجي وياكم
الطريق كله مجلب بيدي يحاول يضحكني
اركان... بووووومة تعبتيني فهميني شنو اليرضيج حتى أسوي
... منو گالك زعلانة عادي كلشي مابية هياني داضحك ششوف
طلعت سنوني
... هههههههه ضميهم خاف الضحكة تنگلب عضة
تدرين مال شنو هسه
.. شنو؟!
... حفرة وننبطح اني وياج بيها يابوي هالمرة راح استغل الفرصة وأشبع حضن وبوس
... فلا تستحي عاجبك ننفضح گدام الامة العربية
... الله وكيلج من الجفاف افكاري شطحن
... خبل
.. مخبل بيج
... ديلا كافي خالة ووصال ضاجوا من وراك مجاي تخليني اختار شي
فتنا المحل عطور اكو بنية وولد يشتغلون بي
اجت البنية تساعدنا واركان راح للولد
وصال... بهمس اگول هاي بنية واحنا بنات امده حظي
زلال... اي والنبي لج تجنن
عززززا بعينها شنو متخاف على نفسها تشتغل بالمحلات اهلها ميخافون عليها
فردوس.. الله اعلم بـ ظروفها لاتحكمون بدون ماتعروفون شي عن حياتها
زلال.. اختاريت كم عطر البنية عافتنا راحت يم اركان واجة الولد يحاسبنا
صفنت عليها تتمضحك وتسبل بعيونها
رحت وگفت بصفة
يلا كملت لو لا
... اي يلا
....طلعنا واني افور
اركان. ششبيج گالبة الخلقة
.. يعني متعرف
.. ومنين اعرف هو منو يگدر يحزرج كل شوية بمزاج
.. اسكت الله يخليك اسكت ترى واصلة لهنا وأشرت على خشمي
وصال.. شبيج زلال الولد مامسوي شي عيب تحاجي بهاي الطريقة
... لا يابوي ممسوي جاي اتبلى عليه
اركان...مو وووووضع هذا طگت روحي من اسلوبج الخايس
حرت والگو. حرت ما اعرف شلون اتعامل وياج
فردوس... صدك جذب صوووتكم احنا بالشارع راح تلمون الناس علينا
ماما زلال احجي شششنو الغاثج
... مشفتوا شلون واگف ويا البنية ودك سوالف وضحك عبالك يعرفها صارلة الف سنة ولا احترم وجودي من الأساس
هي مو شغلها تبيع للنساء ومخلين ولد للرجال شششكو ولت يمه
اركان... اجت عرضتلي كم عطر يعني اگلها لا اعذريني خطيبتي ما تقبل احجي وياج
اذا ضحكت هاي مشكلتها مو مشكلتي المهم اعرف نفسي واعرف شلون حاجيتها بكل احترام
.... سكتت خالة رزلتني ورزلتة
أركان هواي راح يتعبني ما اتوقع يبطل عين زايغة كذاب الي يگول الزواج يصلح الرجال ولا اصدك بهاي المقولة
مشاكلي ويا أركان زادت خصوصاً من بده يتمادى مايعجبة أظل بعيدة عنه يتذمر من الحواجز المخليتهم بينا
بيوم گاعدين سوة فجأة سحبني عليه وباسني ردت ادفعة مگدرت ايده تجراءت أكثر تخبلت رفستة برجلي فعتة وگمت
شششبيك آكيد تخبلت من البداية كتلك هاي الحركات متعجبني وماتقبلهن
... انتي الشششبيج كلشي لا وممنوع اشو المخطوبين يسوون اشگال وألوان بس اني حظي زفت
... لا مو كلهم لاتعمم ذيج من ذيج التقبل بهذا الحال وأساسا معليه بغيري هاي اني وهذا طبعي يعجبك اهلاً وسهلاً ميعجبك بعدنا على البر
... ششو مانة عليه بنتي ششبيج اصحي لا عبالج الخلقج ما خلق غيرج
... اي أعرف اكو غيري خير من الله ليش ما اخذت منهن ششجابك على وحده معقدة مثلي
... زلال اني ممرخصج ولا متجاوز حدي ترى انتي مرتي وكلها كم شهر عرسنا ليش خايفة مني
.. داگلك هالحركات قبل العرس ما اتقبلهن مو خوف ولا هم يحزنون
... ماشي زلال والخلقج بعد فلا عليه بيج منا اليوم العرس حتى ترتاحين
... براحتك عفتة وطلعت لعبانة نفسي
واكفة على شعرة وانهي كلشي جاي ادور شي قوي وافسخ
اركان نفذ تهديدة ابتعد بشكل نهائي
جان كل شوية يتصل ويمر البيتنا هسه ابد ماكو
ماما كم مرة سألتني اركان ليش ما جاي يجي مثل قبل گتلها اني طلبت منه
حتى اركز بدروسي والأمتحانات
گالت عفية عليج زين سويتي
بدت امتحاناتي نفضت كلشي من عقلي وصبيت تركيزي على الدراسة
مندمجة بالقرأية فاتت ليال تهز بيدها
.. لو الدنيا تنگلب ولا تحسين بيها
.. ليش شكو
.. معقولة مسمعتي الصوت
.. مخلية هيتفون بأذني حتى لا اسمع صوت القرودة جهال عادل
.. شوف هاي يا جهال عادل يمكن صارت عركة بيت خالي
. عزززززا گولي والله ويامن وليش منو التعارك
.. ششمدريني سمعنا صوتهم عالي
بابا وماما والولد راحولهم
.. اي وبعدين
هاهي من يجون سأليهم
... هففف خابصة نفسج وتالي سالفتج مكطومة انطيتني نصها
... ياخبر هسه بفلوس بعدين يصير بلاش
صبري لمى وره شوية تلگيها اهنا تكت الاول والتالي
.. طبكت الكتاب بقيت انتظر ردت اروح البنات مخلوني گالوا ابقي اهنا لاتصيرين فضولية
.. ورة وين يلا أجوي
هاا سمجة بيت خالي شبيهم
... الولد متمالخين بينهم
.. منو منو
... وليد وأمجد واركان
..عزززا ليش
... كوثر گالت سالفة بينهم علمود الشغل اركان صارله جم يوم مايطلع يظل نايم للظهر حاجين عليه
ذاك مامتحمل يگلهم اني مو صغير وتحاسبوني كلمة من هذا وكلمة من ذاك صايرة هوسه
وليد وامجد لازمين اركان ودك كتل بالگوة فاكينة من ايدهم
.. عووود صدك تحجين ششنو طفل ويضربونة
.. معليج اخوانة الكبار اذا شافوا غلط يطلعون عينة لاتدخلين انتي
.. بسسس هذا ظلم حرام عليهم اركان وينه
... طالع زعلان كوثر خابرت ايهاب حجتلة
گاللها اني اخابرة اخلي يجي يمي
..رجعت للغرفة احوص اروح واجي
اكثر من مرة اتصلت عليه ميجاوب
للصبح منايمة القلق أكلني
بالگوة رحت امتحنت من رجعت سألت ليال
گالت لاتخافين اركان بيت ايهاب
شوية ارتاحيت
المصيبة زعلان مني بسبب أخر موقف بينا اتصل مايجاوب
اركان ظل بيت ايهاب خمس ايام بعدها أيهاب جابة تراضى ويا الولد
باليل اتصلت واخيرا جاوب
... ينطيك گلبك كل هالمدة تبقى زعلان اتصل ومترد
.... مو هذا التريدي
... لا طبعاً لو اطخك لو أشلع مخك
اريد ترجع مثل بداية خطوبتنا ما گتلك اهملني وبعد لاتباوع بوجهي
... ماظل شي للعرس بذاك الوقت كلشي راح يتغير هسه ما أكدر ابقى اخذ وانطي الف شغلة عندي تعبان من جميع النواحي
... الله يساعدك
... شلونج بالامتحانات
... الحمدلله كلش زينة
.. عفية من تخلصين حتى نروح نعقد
.. بقى امتحانين
... اي ماشي محتاجة شي
.. سلامتك اركان لاتضوج مني
... ماضايج لاتخلين بالج
... اوك تصبح على خير عمري
.. وأنتي من الخير حبي
.. انقهرت عليه نبرة صوتة كلش حزينة
حقة يضوج يمكن اني زودتها ويا واخوانة هم زودوها
خلصت امتحانات اجة يوم العقد
انتظرت اركان يجي شو تأخر. رحنا اني وماما البيت خالي نشوف وينهم
لگينا البيت مخبوص ومهوس الغراض مطشرة
يابة شكو
فردوس... أركان مضيع مستمسكاتة وخبصنا خبيصة عليهن گلبنا البيت وماكو
حورية... يمه اذكر اخاف مضيعهن برا واكعات منك
... لا عمة متأكد بالبيت شمدريني ما حاطيهم بالغسالة وغاسليهن
وصال.. يمعود والله اني اغسل الملابس قبل لا احطهن بالغسالة افتش الجيوب
... لعد وين راحن طارن
زلال... رجع البيت انخبص الكل يدور وهم ماكو
اركان صار بارود يگول هسه شراح اسوي لازم مركز وتبلغ وليما اطلع غيرهن ينعل سلفة سلفاي
رجعنا للبيت وتأجل العقد
اركان راح قدم بلاغ بالمركز
باليل خالي اجة يقنع بابا نتمم الزواج وراها نعقد محكمة گالة واني كفيل اذا خايف
بابا من حبه الخالي مايگدر يرفضلة طلب
اني من سمعت تخبلت شنو ازوج بدون عقد محكمة ابد ما اقبل
دگيت رجل لو عقد محكمة لو ماكو زواج
اشگد حجوا وتوسلوا ماكو قافلة
اخير شي خالي ومرتة زعلوا مني
بابا گال الخاطرهم اقبلي استسلمت ووافقت
عمو عاطف زوج خالة فردوس وأخيراً شرف للعراق خطية خالة ولمى طاروا بيه من الفرح
رحنا اخذنا غرفة تركيا مرتبة ونازكة
ثاني يوم جابوها شدوها بالغرفة
اني والبنات اخذنا ملابسي رتبناهن بيها
من كملنا اهلي جانوا موجودين جوة ملمومين
خالي گال يابة اركان يريد يسوي عرس بسيط وبالفلوس الباقية ياخذج اسبوع للشمال تتونسون شنو رأيج
بقيت ساكتة ما أعرف شحجي مو هذا التمنيتة بنفسي أسوي عرس حلو بقاعة اريد يظل هذا اليوم شي مميز بحياتي
أركان..زلال صدگي العرس ماله داعي نروح نتونس ونغير جو احسن
... تنهدت هذا هو بكيفك
رجعت للبيت ميتة قهر ورة شوية بابا دز عليه
... عزيزة ابوها ليش ضايجة
.. لا بابا ماضايجة
... تعلميني بيج تريدين عرس مو
.. نصيت راسي اشكد ماينة عليه بس هالمواضيع استحي اتناقش بيهن ويا
حورية.. لاتضوجين وتكدرين خاطرج والله لا اسويلج حنة فلا صارت مثلها
محمد...القاعة وباقي المصاريف عليه ومايكون خاطرج الا طيب
... اختنكت بعبرتي حضنتة وبيجت فدوة اروحلك حبيبي ربي لايحرمني منكم ومن حنيتكم
رجعت حضنت ماما
محمد.. هاي ضحكتج عندي بالدنيا
حورية... هم زين تزوج قريب مني ولا جان وين تحملت فراگها
.... هااا سمجة واني عبالي راح تكيفين تخلصين
مني
....حسج بالبيت عافية
... يا الله اشگد احبكم ظليت من حضن الحضن
الأهل الحنينين نعمة للبنية ربي لايحرم اي بنية من هاي النعمة
اهلي حجزولي قاعة صغيرة ومرتبة الكوشة مال حنة والأكل من ضمن القاعة
اما باقي التجهيزات على بيت خالي البدلات والصالون
نزلت للسوك اخذت فساتين اثنين واحد شتريتة
عادي مو نفش والثاني بدلة نفش اجرتها
اركان مخبوص بهوسة العرس بعد ولا شفتة
بيوم الحنة عزمت كل اقاربنا وصديقاتي والجيران
الحنة خاصة للنساء
البنات اخذوني للصالون راقي وشغلة يجنن
من كملت ولا عرفت نفسي لبست اول شي الفستان العادي أريد اخذ راحتي بارگص
وصلنا للقاعة الكل حاضرين الكوشة تجنن
بدت الحفلة اني والبنات يووو ولا گعدنا
كلمة فرحانة قليلة ماتعبر عن احساسي ولا توصف كمية السعادة البداخلي
الاستيج مايبين من البنات حتى النسوان الكبار رگصن
تعبنا اخذنا ريست نرتاح شوية وزعوا العشا
بعدها اخذني البنات الغرفة التبديل لبست البدلة الثانية جانت مارونية تؤالم هيج مناسبة
واني ردت مراسيم الحناء على الطريقة التركيا
من المسلسلات الا شوية وننگلب اتراك
على أساس اركان يجي يحنيني شو تأخر
همست الوصال اگلك اركان وين ظل شو تاخر
لاتنتظري خابرت وليد گال طالع ويا جماعتة يحتلفون بي ما اعتقد يجي
... هاي ششششنو مو گتلة لأزم تجي يعني جماعتة احسن مني
حتى مراح يشوفني بالبدلة
.
رغد.. لاتنقهرين من نرجع للبيت ظلي بيها حتى يشوفج
... مااا زعلت تمنيت يجي
... يوووو لاتكبريها فردي وجهج
خالة فردوس هي تخليلج الحنة
تحسرت ماشي
گعدت البنات كلهن اجني صينية الحنة كدامي بيها اشگال والوان
اجت خالة خلتلي حنة ولبستني الكف الخاص بهاي المناسبة
وزعت للبنات شغلوا اغاني البنات صارن يدون حوالية
بين كل هاي سعادتي حسيت نغزة بگلبي
ما ادري شجاني بلعومي انجرح اريد ابجي اي اريد أبجي ليش ما ادري او يمكن تأثرت بالموسيقى
رغم ما افهم كلمات الأغنية بس طابعها يدل على الحزن فقدت السيطرة وبجيت
البنات خربانات ضحك
ماما من بعيد باوعتلي وبجت
أنتهت مراسيم الحناء رجعن البنات للاستيج يرگصن رادن يكومني ماقبلت
ظلت ساعة وتنتهي الحفلة صارت حركة بالقاعة مو طبيعية التوتر والقلق خيم على وجوه الحضور
اشتغل المهامس بين النسوان
شكو ما ادري البنات ولا وحدة يمي كلهن واكفات يم ميز ماما وبيبي وخالة
گلبي دگاتة الف بالدقيقة اأشر للبنات اريد وحدة تجي ماكو
ماما گامت تمشي سريع طلعت من القاعة تبعتها خالة كوثر وخالة فردوس وباقي عماتي
ناس گامت تجر ناس كلها دتطلع
گمت من مكاني أريد اشوف شكو رجلي ترجف
أجت شذى وبنت عمتي لونهن مخطوف
ششششكو ليش عايفني وحدي احجوا شصايى ليش الكل طلعوا بـ ستعجال
شذى... هااا ماكو شي امشي زلال بدلي دنرجع
... ماتحملت گعدت بنص الگاع صرخت لج احجيييييي مو گلبي راح يوگف.......
