 |
رواية لك ياذا الجمال اليوسفي الفصل الثاني عشر 12 بقلم فاطمة العبادي
#البارت١٢
رواية #لك_يا_ذا_الجمال_اليوسفي
بقلم ... فاطمة العبادي
لتنسون تصويت + تعليق بين الفقرات
قراءة ممتعة 🖤🖤🖤🖤🖤
كانت ثواني بس مرت علينة عبالك سنين من الخوف والرهبة ، تعبنة بكل معنى الكلمة
وصرخت بأعلى صوتي بخوف عليهة
نزل فالح وراهم ورجعو غاصو بس مادري شلون الله سبحانه وتعالى راد يخليهة عايشة
وبسرعة طافت بس وجهة ازرگ ..
كدرو يسحبونهة بس شكلهة جان يخوف ، ازرك وما بيهة حياة
روحي راحت مني وحسيت غيمة سودة نزلت ع عيوني و عمتني ..
سوالهة سداد الأسعافات الأولية، و قبلة الحياة ..
ضلت تكح و الماي ينزل من حلكهة ..
وحالتهة فعلا مزرية ، وتخوف بلحظة توقعت راح تموت ..
فاضل ... لا تكعدون واحد يباوع بوجه الثاني شيلوهة بسرعة شيلوهة اخذوهة للمستشفى ..
انه اروح وياكم يله
رهف حجت بصوت متقطع ... لا ... ما يحتاج .. زينة
ليث ... ولچ وگفتي كلوبنة
فاضل ... مالكم غرض بحجيهة وجهة ازرك اخذوهة
سداد ... موضوع طبيعي لان اختنكت هسة شوية ويرجع الدم الوجهة ..
ليث ... بس لازم ناخذهة للمستشفى احتمال رئاتهة تتأذى اذا ضلت هيج
نجوى ... ايي وشنووو متانين دخذوهة بسرعة تعاي فلك وياي سنديهة للسيارة
جابت عمة نجوى عبايتهة ولفتهة بيهة وسندتهة صعدتهة بالسيارة واخذت عباية مها لبستهة و صعدت وياهم وصعد سداد يسوق راد يروح ليث بس عمي كلة ارجع انه اروح
وصعد عمي يم سداد واخذوهة للمستشفى ..
واحنة شلنا مواعينة و حطيناهن بالسيارة نرجع للبيت خربت السفرة
سمعت ام بارق تكول ... بنات جعفر دومهن يخربن علينة ونستنة ، هنة البارحة بالمتنزه يتونسن واليوم خربن سفرتنة ..
فالح ... هوا حادث الله كاتبة تزلك رجلهة وتطيح البنية ، خو ما متعمدة ..
ام بارق ... اي متعمدة مبينة
فالح ... وين اكو واحد ما يعرف يسبح يشمر روحة متعمد بالشط شنو هذا الحجي
ام بارق بنص عين ... طبعا تدري وراها 3 زلم شمرو روحهم وراها واحد ورا الثانية ، كالت خلي اخرب عليهم وأذب روحي وهمة ينزلون وراي يطلعوني ..
ليث ... مها درة سفانة صعدن ، يله فلك
يحجي ويباوع الأم بارق بنص عين ..
صعدنة كلنا بالسيارات ورجعنة جان الطريق طويل تعبنة و خلگنة ضاج
فلك ... والله كلت ما راح تعدي ع خير هذول العالم بس يباوعون علينة ما يصدكون يشوفون ناس مرتاحين تضل عيونهم ثابتة عليهم ..
مها ... عين ما صلت ع نبي احنه متعودين ما تتعدالنة حتى بعرس هاني وفدك انتي اتخربطتي ..
فلك ...يله غدا الشر وتطشر ما صار شي زينة هية
ليث ... همزين ما طحتن انتن الثلاثة لأن الحافية تزلگ جا نطلع منو ونعوف منو وتروح وحدة منجن تغرگ
فلك ... انه اعرف اسبح
ليث ... الشط ماله صاحب فلك ، زلم معدلة ومتعودة ع سباحة يبلعهم
وهذا شط غميگ كلش ياما ناس هنا غرگو
وبي كوسج دوم يسحب الناس الي يسبحون
مرة ولد يسبح بي وجارة كاطع رجلة وطلع الولد مطوف ميت خطية
درة ... يمممة يمةةةة همزين ما جرهة
ليث ... اي جا شاف رهف حلوة ويكلهة تعاااي انتي لحمج حلو ويبيس بيهة ههههههههه
ضحكنة شوية و تشتت غيمة الحزن الي مستقرة فوگ روسنة ..
نباوع لفالح كاعد ويمة عمي ارفد ومرتة وفالح يباوعلنة ويسويلنة حركات علمود يضحكنة ..
وصلنة للبيت لكينة هاني يتريك بالمطبخ باوع علينة وكال
... زيارة مقبولة
ليث ... زرنة وندعينالك اختك غرگت
غص بلكمتة وضل يكح شرب جاي صرف اللكمة و كلة بفزع ... جذاااب لو غركانة جا طبيتو تلطمون
ليث ... ههههه جذب طاحت بالشط بس مابيهة شي اخذوهة ابوي وسداد وامي للمستشفى يتأكدون من سلامتهة خطية
هاني ... يا مستشفى؟
ليث ... شمدريني
هاني ... يله ما صار شي ، كمل شرب الجاي و صعد صاح فدك تعاي
لحكتة هية و انه وفلك ومها وسفانة رتبنة المطبخ و حطينة الاكل ع طباخ و رجعنة المواعين بأماكنهن ، عبر هاني من يمنة مبدل ولا كأنَ وطلع من البيت ..
خلصنة و رحنة سألنة ليث ما خابروك؟
ليث ... انه خابرتهم كالو نضل شوية بالمستشفى نتأكد من سلامتهة ونجي
مها ... يعني هية زينة ؟
ليث ... مو كتلج ايي ايي خاابرتهم .... حجة بنتر
هية ضاجت خطية نتر عليهة كدامنة كام من يمنة طلع ضايج، وبس يخنزر
حتى انه وفلك خفنة و كمنة دخلنة لغرفتنة ..
رهف ... مر كلشي كبال عيني مثل الكابوس عينً
جنت مختنكة وابتلع كميات جبيرة من الماي
ارفع ايديني وانسحب للقاع
مثل شعور الكوابيس المرعبة ..
من نقلوني للمستشفى چنت ابجي، احس مختنكة وبية رجفة
عمة نجوى جانت تقرأ ايات ع راسي وطريق المستشفى طويل
انه ما جان بية شي لأن سداد اسعفني ، بس انه بنفسي خفت لا يصير بية شي بسبب ثقل انفاسي
حالتي جانت كلش تمام ، بس احس ما اكدر اتنفس حطولي اوكسجين و ضليت بالردهة بس عيوني تتجول بأرجاء المكان ..
غمضت عيني ارتاح صارن حارات ، وكلبي يرجف مدري شبي ، اجت الممرضة شالت الجهاز و جيكت وضعي بعدهة كالت ... ما بيج غير العافية
كمت من فراشي ساعدتني عمة رجعت لبستني العباية و سديت دكمة بنطروني ماعرف ليش فاتحينهة .. فلك فلكهم بس لا شافو المستور ..
طلعت من الردهة وشفت عمي فاضل وسداد وهاني، هذا شجابة
تقرب هوا كال بجمود بس ما كدر يخفي الخوف والاهتمام الي واضحة بنظراتة ... الحمدلله ع سلامتج كلنة راح تموت و نخلص لسانهة الطويل ..
رهف ... لا تخاف أضل ع كلبك ما اموت و الله يسلمك
تحمدولي بالسلامة، و طلعنة للبيت ..
رجعت للبيت البنات بالمطبخ تحمدولي بالسلامة و صبو غدة
مرت الأيام انهمكنة بالدراسة ، وهذا جان اول اهتماماتنة بنات صغار ما نعرف شي غير لازم ندرس ونتفوق
بعدنة صغار ع حب يمكن الحجاية سهلة
بس الفعل صعب، من اكول راح اتمنة اعيش قصة حب
ويجي فارس احلامي التطبيق بالواقع يكون صعب عكس الأحلام ..
الهذا السبب عفنة كلشي و صار اهتمامنة بدراستنة فقط ..
سوولنة نقل بالمدرسة الي يدرس بيهة سداد وراح يسجل فلك بالمسائية لأن هي حولوهة مسائي و سوالهة استضافة بالمدرسة الصباحية ..
كال هوا ياخذنة و يرجعنة ويا
واذا مايكدر او يطلع متأخر احنة نروح قبلة لأن المدرسة قريبة نمشيلهة مشي ..
صادف اول يوم هوا يريد يطلع للتربية علمود فلك
فـ احنة بدلنة لبسنة زي المدرسة
صدرية نيلية وقميص ابيض وشال ابيض وحذاء ابيض
رتبت وجهي ولبست حجابي كامل
وهاي المرة الصيحة صارت ثنين
فلك و درة يصيحن يله أخرتينة
رشيت عطر واخذت حذائي بيدي طلعت شفتهن يتأفأفن بغضب و عاقدات حواجبهن
ليث ... عروس خو ما عروس يا عيني مو انتن رايحات مشي هم ياله تلحكن توصلن ..
باوعتلة بنظرة برائة و رمشت بعيوني
... شسوي غير اللبس يحتاج وقت
ليث ... انتن شبيجن بس تصيحن يله ويله خلنهة ع راحتهة عود انه اوصلجن
فلك ... لا دخيلك نريد نمشي نريد نشوف الشارع والعالم لا تحرمنة من هاي المتعة
ليث ... هوا صوجي انه اعرض عليجن خدماتي روحن خلن رجليجن تتكسر من المشي وتموعن من الحر ..
فلك ... احنه قابلين يله رررهف بس حذائج ساعة !
رهف ... شسوي غير اريد اشد القيطان وردة ! وتاخذ وكت
شديتة وكمت بنشاط ... خلصت يلة
درة ... بيهة الخير من خلصت العروس
انتبهت ليث باوعلي من فوك ليجوة بنظرة عميقة و جر حسرة ، جان يشرب جاي قبل لا يطلع لشغلة ، يشرب ويباوع عليه كأنما فيلم سينمائي وجاي يتفرج علي بتركيز وميريد يفوت منة ولا مشهد ..
لملمت روحي بروحي و طلعت قبل البنات كلبي يرجف ، ما اعرف ليش نظراتة تربكني
جان محاوطني بنظراتة و يقرا كل ذرة بية
هاي النظرات تخوف أي شخص الا انه ما خوفتني ع نفسي خفت ع سداد !
اعجاب سداد بية واضح عيونة تسولف الف قصة وتلقي الف قصيدة حب من تشوفني
احس الفراشات هيج ترفرف ع كلبة و كلبي ، بس مرات مو دوم ..
و خصوصا من البيت ما صار النه الأسباب مجهولة
هيج صاحبة كبل بطل يبيع
وانجبرنة نضل عدهم كل هاي الاشهر
جانت النتيجة هية حب سداد الصادق النابع من اعماق كلبة ..
ما اريد يوم يعرف نظرات اخو الي المو راحة ينقهر
حتى لو انه ما حبيت سداد بس تضل صعبة الواحد يعرف اخو حاط عينة ع البنية الي يحبهة
وسداد جان شفاف بحبة و الكل منتبه علي
ممعقولة ليث اثول و ما انتبه !
اذا همة عمة نجوى وعمي فاضل من يشوفون سداد كاعد قريب مني ويسترق النظر
يبتسمون من الأذن للأذن ويمكن يتخيلون درة وفلك الكاعدات بنصنة اطفالنة انه ويا..
فتنة لبناء المدرسة وسألنة وين صف السادس كالو لهسة ممحددين شلون يوزعون الصفوف ..
البنات هنا شحلاتهن واللبس كلة حصر اوف والاجسام رشيقة وانه غراضي شكبرهن حتى تفشلت
وفلك ما مهتمة رغم جسمهة نفس جسمي بس ما حاطة بالهة ويا الا انه اتمنة اضعف اضعف ياااربي وتالي وياي وتالي ..
احنة سداد جابلنة كتب من مدرستنة القديمة ودبر كتب لفلك
البنات استلمو وفاتو المدرسين والمدرسات انطو واجب
سداد مدرس اللغة العربية و استاذ فاقد مدرس الرياضيات ، جان رجل اربعيني اسمرررر بس ملامحة حلوة وكلشششش انيق ، لابس رسمي وشعرة مرتب ولا شعرة طافرة .. واللحية مسفطة
ماعت روح الطالبات وللأمانة انه منهن ، يشبه حسام الرسام بس هذا اسمر ..
سمعت صوت وحدة من وراي كاعدة حجت لصديقتهة بهمس
... انه درست علمود اصير سادس واستاذ فاقد يدرسني ههه فدوة شوف شحلاتة
... يمة كلبي تسرسح ..
استاذ فاقد ... راح اعتبر هذا الدرس درسي حتى لو مو الي ، انه استاذ فاقد مدرس مادة الرياضيات راح اكون وياكم طول السنة اتمنة اكون خفيف الظل وجيد بنقل المادة ..
كلنا همسنة ان شاءالله ..
درة ...ولج الكتب العندي مشككات وهذني الجدد ما يسون واهس راح ادرس بهذنيج القديمات
رهف ... درسي بــأالي يعجبج اهم شي الدراسة والمعدل
درة ... هزيت راسي بـ اي ، كملنة دوام طلعنة شفنة سداد واكف منتظرنة صعدنة ويا بسيارتة وطلعنة للبيت
سألنة ونبرتة يغلفهة الاهتمام ... شلون شفتن المدرسة ان شاءالله مرتاحات
رهف ... عجبتني صراحة وبناتهة يخبلن
سداد ... هسة انتي عفتي كلشي وركزتي ببناتهة هههه بس هنة صدك يخبلن
زمت شفايفهة وكالت بنبرة حادة ... انته مدرس لو مراهق وتباوع ع بنات ..
سداد ... جا شنو اغمض عيوني غير هنة اشوفهن واحجي وياهن شحلاتهن ..
دارت وجهة عنة بعد ما ردت ، عدل المراية وبس عيونة الملونة بينت يباوع بأتجاهة بمكر وكأن متعمد يثير غيرتهة و يوجر النار الراكدة بصدرهة ..
فلك ... انه عن نفسي حبيت كلشي
درة ... بعدني ممتعودة بس هية فترة واتعلم ..
سداد ... اي تتعودن ، وياجن مريم سمير ام عيون العسليات اتطيح الطير الطاير من سماه بوياي بوياااا من شفتهة اول مرة وتباوعلي برقة و الخجل مخيم على كل ذرة بيهة ، وحجت بصوتهة الترف
"العفو استاذ المديرة تريدك"
يمة يالترافه يمة وردة اذا تقسى عليهة بلزمة ايدك تتبعثر ..
رهف زفرة نفس قوي و كالت بحدة ... انتبه ع طريق وعوف مريم لا تگلبنة منو يفيدنة انته لو مريم حبيبتك من نتكسر .
ابتسم تك خد و علامات النصر اعتلت ملامحة
حس بنشوة الانتصار من نزل صوتهة الغيران بأذانة
دقت طبول الفرح بكلبة و حلقت فراشات الحب من حوله ..
وصلنة للبيت ، نزلنة صلينة و تغدينة
فتحنة كتبنة و بدينة ندرس ، رهف جانت تتذمر و ما عاجبهة و انه بالعكس وكعت بغرام كتبي القديمة والدروس ..
بالنسبة الفلك جانت هادئة كلش ، و ما تحجي لا زين و لا مو زين ..
هنا انقلبت من درة الى دودة الكتب ..
لا ليلي ليل ولا نهاري نهار ، حلم حياتي اصير مدرسة و ادرس اجيال تعجبني هاي المهنة .. وبعدين اتطورت وصرت اتمنه اصير دكتورة جامعية و ان شاءالله احقق حلمي ..
يوم بعد يوم تمر الأيام وامي ما جاي تحصل بيت ثاني ، بيوم سداد خلص دروسة و جان تعبان كلش
اجة للصف و لحكتة رهف كللهة انه راجع للبيت تعبان تكدرن ترجعن مشي لو ارجع عليجن
رهف ... لا بينة حيل نمشي وباجر جمعة يعني عطلة مسيطرين روح الله وياك
ردت احجي بعد و اسألة شبيك بس تلعثمت الحروف بين شفايفي نصيت راسي و مررت رجلي ع ارض بحركة دائرية ..
سداد ... محتاجة شي
رهف ... هوا الصراحة اي اريد اكلك ...
سداد ... مريم وراج
التفتت وشفتهة
رجعت باوعتلة بغضب دفين وبلعت الحجاية ردت اكلة محتاجة اعرف شبيك خو ما تعبان كلش
... باي روح يله
... اوكفي شبيج
... بية مرض روح المريم سولف وياها
... ولج اش لحد يسمعج هسة يكولون شعندة ويا الطالبة وانفصل
حجاها بتنبيه وغضب
... ان شاءالله يفصلونك وبعد ما نشوفك اوووووف شكد مكروه الخاطر محمد عود ليش ما طالع ع اهلك ينحبون ...
فك حلكة بصدمة وكال
... نارچ جاست گلبي
... عساهاا تحركك من راسك لجعب رجلك
... رايح رايح صارت تدعي بوجهي
عفتة و رجعت للصف اغلي و الدخان يطلع من راسي مثل صافرة القطار كضيت الكتاب وطريتة ع رحلة حيل
... حقير حقير
البنات بوعلي وصارن يتغامزن انه كبل كلبت الموجة ورجعت طريت الكتاب ... ما تنحفظ شكد حقير وصعب شنووو من منهج انته ما تنفهم اصعب من علم الذرة ...
درة ... ايقنت هنا ان رهف احتركت بنار غيرتهة ع سداد ، وصارت جمرة تچوي گلبة و روحة
اجارك الله يا سداد شكلهة راح تشن عليك الحرب
تزفر مثل التنين
يمة داخلهة غادي نار جمرة ..
ضحكت فلك وغمزتلي رديتلهة الغمزة و تقربت مني شاورتني
... هذولي الأثنين الهم مستقبل سوية و الظاهر راح يشيلون اهلي من ورة عركاتهم بالمستقبل
ضحكت بهدوء وشاورتهة
... اخوج چنة صينية بسبوسة والبنات يلتمن علي يردن يضوگنة و الاخت تغار
وتشن الحرب و تنزل سداد بالجلاليق تشمرة بحضن عمي فاضل ..
وتكلة ... اخذ ابنك ابو النسوان كلهن لاحگاتني علي انته شكلت الروحك من خلفت هيج ولد صاك .
ضحكنة و هية صاحت علينة ... خير يا طير شبيجن تتمضحكن ..
سكتنة انه باوعت بكتابي وفلك راحت كعدت برحلتهة تقرا وكل شوية تباوعلي دك الجرس و اجة مدرس الرياضيات چنة زنود الست، بالشوكلاططططة
كال السلام عليكم
ردينة عليكم السلام .. ابتسم وبرزت اسنانة الناصعة
كال استريحو
همزين ارتاحينة من ست سوزان
تخلينة نصيح لااا اله الااا الله
وتكعدنة نصيح محمد رسول الله
حتى الملحدة اتدخلهة للأسلام غصب ..
بدأ الاستاذ يشرح ، اكو بنية جايبة مراية اسمهة نسمة
رفعتهة وضربت بيهة الشمس عكست المراية وطلع الضوة بالحايط
هاي تجربة تعلمناها بالثاني متوسط بس ابد ما جربتهة و هية هية جاي تسويهة
تحرك بالمراية و نزل الضوة ع شعر الاستاذ و هوا يكتب كلنة ضحكنة
التفتت هوا و كال ... ضحكونة وياكم!
ما حجينة شي سكتنة
... هاي شنو صاير ليش ضحكتو بله انه بصفتي استاذكم اريد اضحك وياكم ..
ردت نسمة ... صار موقف استاذ ، احم محرج مال بنات و ضحكنة
هز راسة و كال بلا صوت انتم بداخل الصف لازم تركزون وياي انه وبس ..
رجع يكتب هوا يكتب التمرين ويشرح ويمسحة ويطلب من عدنة وحدة تحلة
ومن تكوم تحل ويا وهوا يشرح
وقبل هذا كلة هوا يكتبة ويشرحة قبل بيوم
بحيث يخلي الموضوع يدخل لدماغنة غصب ..
رجعت رفعت المراية وصارت تحركهة والضوة يتحرك ع حايط و هوا شافة التفتت وهية نزلتهة انتبه الهة بس سوة روحة ما شافهة وكال
... منو هاي التسوي الحركات الصبيانية هذي ؟
صرنة وحدة تباوع بوجه الثاني
صاح بغضب ... انتم جايين تدرسوووون لو تشاغبون منوووو سوت هاااي الحركات ..
ما جاوبنة ضلينة ساكتات ، لأن نسمة شرانية وتسوي مشاكل والي تفتن عليهة ما تسلم من شرهة ..
بس هية ويا الحباب وياهة تصير سمسم
بس اذا احد أذاها اتدوس بنص بطنة ..
حط ايدينة ع خواصرة ورجع سترتة ليورة باوع بتفكير رغم هوا يعرف كلش زين بسمة هي الي دتسوي هيج بس ما اعرف ليش ما حجة
اخذ المساحة ومسح السبورة و رجع باوع النة
كال بصوت صارم ... بدون نفس ما اريد اسمع ولا حرف هاي وحدة من عقوباتكم والي تحجي حرف واحد تنطرد
وطلعو اوراق واقلام عدكم امتحان شهري ..
ضلينة نتلاطم وصاح بصوت عالي
التحجي تنطرد واحسب الهة صفررررررر .
حجة بصرامة والتفتت ع سبورة
وحدة من البنات كلتلة استاذ والله بسمة هيج سوت احنه شنو ذنبنة
كللهة ... صفرررررر
يمة وهية بجت ، كتب الأسئلة وطلعنة اوراق واقلام
وضلينة بس نلطم جاوبت الي اعرفة كله
بس ما اعرف صح لو غلط
والبجي صار بفلس انه وحدة من البنات البجيت
همست رهف يحزن
... منين اطلبهة منك من صاحبك سداد
جان ناطينة بس 3 اسئلة مادري شلون يحط مية ع هذني لتلاثة ..
خلصت حل شفت رهف دمعتهة بعينهة و ما تعرف تحل خليتة يدور ومديت الهة ورقتي حطيتهة كبالهة واخذت ورقتهة
مسحت حلهة و ضليت احل بس حاولت قدر الامكان اغير خطي حتى ما ينتبه للتشابه ..
كامت رهف و سلمتة الورقة كللهة ... رهف كتبي اسمج
اخذت قلم من الطالبة وكتبتة .. انتبهتلة يقرا بالحل ويهز راسة بأعجاب
كال برضا
... رهف عفية الشاطرة عفية اعتبري روحج ناجحة بابا
ارتاحت نفسيتي باوعت لرهف تباوعلي بعيونهة بنظرة برائة ، ابتسمت وكملت حل هواي بنات سلمو الاوراق وانه بعدني احل
دك الجرس وكال الي مخلص يطلع ..
طلعن البنات وانة مستمرة احل ورة شوية خلصت وسلمتة الورقة
حطهة ويا باقي الاوراق بدون مينتبه الحمدلله ..
محاولة تغيير خطي أخرتني ...
رهف ... هاا جاوبتي
درة ... اي واعتمدت طرق مختصرة كلة في سبيل حلي عن حلج يختلف ويتبدل خطي .
رهف ... يممممة فديتتتتج عمري جعل الله لا يحرمني منج يدرة انقذتيني .
فلك ... ولكم اتطشر مستقبلي واتحطمت امالي ممجاوبة حسبي الله ونعم الوكيل
كعدت ع كاع تبجي
رهف ... اووو شبيج هوا مبين ما راح يعتمدة مجرد تخويف ، ممعقولة يظلم صف كامل بسبب طالبة وحدة
فلك ... اتدمرت انه اتدمرت راح ارسب كلشي ما مجاوبة والله اذا رسبت وانتن نجحتن ثنيناتجن
اروح اكلله استاذ درة بدلت الاوراق لان شفتجن
رهف ... هههههه لا يا فتانة
درة ... والله هوا استاذ فاقد اكبر بربوك ابن الكيكة
فلك ... ههههههه نذل الا اكول لسداد علي واخلي يحاجي المديرة
درة ... مض** هاي يكرم طاري الله ..
طلع الاستاذ ماخذ الاوراق وصار اللوم ع نسمة
وهية تتمضحك
دخلنة درس اخير و صارت حله
لميت كتبي وطلعت، فلك تنقل من السبورة و رهف تنزع حجابهة وتعدلة طلعت قبلهن كالعادة
بس ياريتني ما طلعت اليوم ..
باوعت من بين كل الناس اجت عيني ع خالي حر واكف يدخن ويباوع باتجاهي شافني ورفع صوت الأغنية
وانتشر صوت ياس خضر بأرجاء المكان و هوا يكول
مرينا بيكم حمد و احنة بقطار الليل
واسمعنة دك كهوة وشمينة ريحة هيل ...
وانه اكلة بكلبي
لا مرينا بيكم حمد ولا اريدنكم تجونة
الحطيتو خناجركم بالظهر عيب تگابلونة
حشو جروحكم بالملح ، ولا تعاتبونة ..
لا مرينا بيكم حمد ولا اريدنكم تجونة ..
اشرلي اروحلة شحيت بنظري عنة
نصة صوت الاغنية ودك هورن
باوعتلة باوعلي بنظرة معناها اذا ما تجين انزلچ .. يعني اتحداني
ردت اروح بس ترددت
شفت العالم كل واحد مشغول بروحة و رحت فتحت باب السيارة وكعدت يمة
... شلونك شخبارك خالي .. شددت ع كلمة خالي بلكت يحس ..
حر ... شلوني عكبچ لا ضلي لون لا ضلتلي عافية كلهن راحن وياج ، حتى انه ضعت مني و ما اعرف اخباري .
درة ... جاي من الجمعيات للكرنة علمود تگلي هذا الحجي ! شجابك ؟
حر ... مادري شفت روحي مريض كلش وكلت اروح للمستشفى فجأة لكيت روحي هنا أسأل ع اسم مدرستچ و صارلي ساعتين واكف منتظر طلعتج ..
درة ... روح حبوبي بعد لا تجي تسويلي مشاكل ويا عمامي
حر ... عمامج يعرفوني ، لا تخافين هسة لو واحد منهم شافني وياج ما يحجي شي انتي ربيتي وياي
درة ... وتالي وياك راح انزل
كض ايدي منعني
... لا تنزلين بروح ابوج عليچ كليلي شنو تردين وتقبلين بية ؟
درة ... تدري شنو اريد ؟ تمسح ذكرياتك من راسي امسحهن! امسحهن وانه اعيش وياك ع اساس زلمة غريب ما تربطنة مواقف أبوية
شنو گلتلك روحك من ركضت وراي مثل الجهال استغفر الله ..
حط ايدة ع صدرة وراسة ع ستيرن ونعقج كل وجهة متألم ..
... يمة شبيك خالي
حر ... گلبي يوجعني عليچ ..
درة ... بطلهن هاي السوالف مو الك للمراهقين خالي والله انته صاير مدري شلونك مراهق تصرفاتك مال زعاطيط والله حتى المراهقين ما يسوونهة
رفع راسة باوعلي بدون ما انتبه الوجهة كملت
... شكلت الروحك من جاي مكابل مدرسة وحدة اصغر منك بسنين وربيتهة ع ايدك
انته ما عندك احساس
حر ... درة!
درة ... صوجي انه حطيت ايدي بايدك وصحتلك خالي جان لازم من يوم عرفتك خريج سجون انتبه منك لان كلشي اتوقع من واحد جان بالسجن وما يقبل يذكر سبب سجنة
اذا ممسوي مصيبة شكبرهة ليش ينسجن
روح بابا روح لا تجي عليه روح العب ويا الي ابكدك ترة صغيرة عليك انه
حجيت ويا بكل جدية ، باوعتلة شفتة صدك ايدة ترجف ولون وجهة ازرك عبالك مابي دم
شهكت و حجيت بخوف .... شبييييك
حر ... انتِ درة نبتي بين ضلوعي ..
نزلي اريد اروح
درة ... وين ترجع صخام شوف شكلك
انطعن وجهة وكال نزلللي نزززلللييي نززززلييييي
يحجي وايدي ترجف نزلت من السيارة ارتجف
باوعلي بنظرة غضب وزم شفايفة بأسى و شخط السيارة وطلع ..
حطيت ايدي ع كلبي
امداني شكد وقحة انه امداني
تنهدت بضيق وباوعت ع بنات واكفات يدورون عليه بأنظارهن جن صخول ضايعة
ركضت الهن كالن بغضب وينج
درة ... اشتريت اقلام من المكتبة واجيت
رهف ... امشي اتأخرنة
مشينة وجانت الرجفة مسيطرة ع كل خلية بجسمي
شلون بي خاف يسوي حادث
بس ارمش ، تجي صورتة كبالي شلون شفايفة زرك و وجهة مطعون و ايدينة ترجف
شلون اذا سوة حادث شلون
بله اتخربط بالطريق وانگلبت بي السيارة ..
مية الف حسبة ببالي ، مادري يمتة وصلت للبيت وغسلت
كعدت ع جرباية ارجف
وايدي ع كلبي
ذكرت المبايل الضامتة بي رقمة
كمت دورت علي و طلعتة فتحتة لان مغلق و ما اسمع غير صوت عمي فاضل رج اركان البيت رج
يصيح بكل غضب و بأعلى صوتة ... بننننناااااتتتت فلللك ررررهف دررررةةةة تتتتتعااااالللن
طلعت ركض شفت فلك تنزل من الدرج مصدومة ورهف اكفة بباب المطبخ وسداد يركض ويلبس قميصة ويكول ... شصااايرررر ليش تصيح يااابة
ضرب عكازتة بالكاع بغضب و كال
... خابرني ابو عامر "من اقاربهم" و كال اليوم شفت وحدة من بنااااتكم طالعة ويااا زلمة غريب بسيارتة وتسولف وياااااا
سداد ... مخرف يمكن ما يسونهة البنات
فاضل ... منووووو منجنن كاعدة وياااا زلمة غريب
رهف وفلك وحدة تباوع بوجه الثانية وحتى هوا يباوع عليهن هنة وبس
يمكن بس انه استبعدني لان يعرفوني فقيرة
نجوى ... اعصابك يجوز مو بناتنة شبيك شنو قلة الثقة هاااي
فاضل ... ولج هذاااااا من صغرة يكرهنة ما يصدك يكض علينة الزلة
خااابرني يكلي رحت اجيب بتي وشفت وحدة من بناتكم كاعدة ويا زلمة غريب بالسيارة شنييي ماا عرررفت تكض بنية هالطولهة وتضبهة ...
سداد ... والله الا اسرت حلكة
فاضل ... اسكتتتت ، احجن فهمني فهمني شمسويات
رهف ... ممسوين شي عمو اساسًا بالروحة اخذنا سداد وفتنة ويا والي يفوت بعد ما يطلع من المدرسة
وبالرجعة تعبانات بس طلعنة رجعنة گبل هذا جذاب
درة ... لا مو جذاب صدك يحجي
التفتو علية كلهم ممصدكين ، باوعولي بصدمة كملت كلامي بسرعة ما اريدهم يضنون سوء
.... هوا شفت خالي حر وسلمت علي كال صعدي ليش واكفة ، صعدت يمة سألت ع امي وخوالي وشفت البنات طلعن ترخصت ونزلت
ردت اصيح الرهف تسلم علي بس كال عيب وياها صاحبتهة وراح
خابرو اذا متصدكون ..
فاضل ... وهوااا حررر شعندة يم مدرستجن .... حجاها وخصم عيونة بشك
ياربي هذا ما تضيع علي سالفة ..
درة ... والله مادري يجوز عندة شغل ، مالحكت اسألة هية دقيقة وحدة سلمت وسئلت ع امي وخوالي حتى مالحك يرد
مو النوب احقق ويا واشوف شعندة جاي وشعندة رايح، تكدر انتة تسألة وتكلة شعجب يم مدرسة البنات ..
سداد ... هذا هوا البنية سلمت ع خالهة
فاضل ... بمثابة خالهة
سداد ... نفس الشي مو صارلهة سنين عايشة وياهم
فاضل ... وين عايشة وياهم هية وعد عازلة بيهن فوگ ..
صدمني من كال عازلة بيهن فوگ ، شنو هاي الدوامة الأحنة عايشين بيهة
رهف ... اي بس ترة خالو حر جان بمثابة اب النه انه ودرة وترف ، يا ما ركض بينة و تعب علينة و هية تحسبة خالهة
فاضل ... ادري بهذا الحجي بس صححت معلومة سداد
روحن ارتاحن
حجاها وراح يمشي بهدوء لغرفتة
سداد ... وهذا الك*** ابو عااامر ما تخااابرة وتطيح حظة
فاضل ... طيحت حظة من هوا خابر لا تخاف
كتلة تخسى بناتنة ما تطلع منهن العيبة هذا خط يجيبهن جا سداد ما مداوم ...... و رزلتة رزالة زينة ..
فتت للغرفة لحكني البنات
رهف ... صدك خالي جاااي ترة هسة عمي يخابرة واذا طلع جذب عمي يفصم ظهرج
باوعتلهة بعتب
... وشتدرين بية انه اواعد زلم ؟
فلك ... لا ما تقصد هيج ندري بيج ماعندج هيج سوالف بس يجوز واحد مضوجج يجوز واحد من باقي اقاربكم
خوالجن مو عدهم شباب ؟
يعني اذا واحد منهم هوا الصاعدة ويا
وكلتي خالي حر
ويخابرون حر ويكلولة اليوم شفناك يم المدرسة
اذا مو هوا يكللهم لا ما جاي!
راح يستغربون ويرجعون يحققون وياج
شتكليلهم ابن خالي!
راح يستغربون
ليش جذبت من الاول!
ليش كاعدة بالسيارة يم ابن خالهة بالأسم!
وليش ما حجت
والف ليش
بالاخير تتوجه اصابع الرذيلة الطاهرة عليج
وتنفضحين يالمستورة
يكولون عاشكة
وهنا العاشكة عاهرة ..
لا تشوفين اهلي وعمامي يقبلون كعدة وسوالف وضحك ويا ولدنة
ترة ويا الغريب ممنوع
ونتحاسب اذا بس ابتسمنة
انه اكلج حتى تاخذين حذرج
درة ... ماكو داعي تكليلي اعرف هذا الشي وماخايفة من شي هوا خالي حر وعمي فاضل ما يحاسبني اذا كعدت وياااا
رهف ... لا اكيد همزين ..
تمددت غمضت عيني غفيت شوية وكعدت غسلت وجهي ورجعت ادرس ويا البنات
الى ان صار العشا وطلعنة نتعشة فلك ضلت تحجي لسداد عن الي صار بصفنة اليوم
وباوعت علينة وكالت ... ودرة حلت وخلصت طن حطت ورقتهة كبال رهف واخذت ورقة رهف حلت بيهة لروحهة
سداد ... خرب بيومجن والاسماء ?
درة .... ما جنة كاتبينهن هههه
رهف ... انه انصدمت من حطت ورقتهة كبالي بس يله الحمدلله هوا مدح ورقتي الحلتهة درة
سداد ... انتن مصيبة والله ههههه
درة ... لو فلك يمي جا غششتهة خطية
فلك ... متت من البجي والقرآن الكريم سداد احجي ويا مايصير هيج يسوي بينة بسبب طالبة وحدة
بعدهة ممكملة حجيهة وسمعنة صوت مبايل عالي ، التفتت صخام
صوت مبايلي هذااا وجاي من غرفتنة اتخزيتتت لان محد يعرف بي .......
