 |
رواية لك ياذا الجمال اليوسفي الفصل الحادي عشر 11 بقلم فاطمة العبادي
#بارت_١١
رواية #لك_يا_ذا_الجمال_اليوسفي
فايفة بغيض و كال بغصة
... راح اخذج اخذج ما اخليج تصيرين الواحد غيري لو اعرف يگطعون ركبتي يدرة ..
كضني من زنودي جرني اله
ما يفصلنة غير جرة النفس
ارتعشت من جسمي لاصق جسمة
وارتعد كلبي
قرب راسة من أذني وهمس ... واذا هسة خذيتچ ..
دفعتة قوي ، انضرب ظهرة بالحايط
... صح انتَ مو خالي الحقيقي وما يربطنة دم بس خليتني اشوفك اب و اخ مو بس خال
لا تظن بيوم تشوف مني شي
لا تنسة احنة عشنة ع هذا الاساس انته خالي وانه بت اختك شنو تكول للعالم مثلا اذا ردت تخطبني وتتزوجني
معقولة تكول لعمي فاضل جاي اخطب منك درة الجانت عايشة وياي بت اخت !
يعني انته الهاي الدرجة صلف؟
كلماتي نزلن بمسامعة مثل السم ، ما رد عليه بس بؤبؤ عينة يتنقل ويوزع نظراتة ع ملامحي المقتضبة
عيونة جانت كلهة عتب و حزن وأنكسار
غص بعبرتة وكال ...
... مووو صلللف گلبي هوااا الصلف هواچ گلبي هوااا العينة صلفة وضليت اشوفج بعين كلبي
روحي
وقبلتي
وحبيبتي
ومهجتي
سعادتي
و وريدي
وكمري اليضوي ليلي يا اول سمرة تضوي
انه مالي ذنب، هوا دگلچ وارتعش عليچ، تمرد تمرد حد ما غلبني وخلاني اطيح كبال اسمج قتيل
ما جنت رايد غير تصيرين حلالي ونتشابك مثل الظفيرة
مني ومنج، ونصير أهل من صدك ما نجذب واحد ع ثاني مثل هسة
…لا تأذيني وتخوفني بكلامك ولا تحلم زيادة
من رخصتك
حر ...سهلة عليك تنطيني ظهرك
وانا لو شفتك جهنم بكل حيلي احضنك
مشيت بس كل ثانية التفتت اشوفة واكف يباوع ع خطواتي وانه ابتعد
والله حسيت بنار گلبة لفحتني
بحيث غمضت عيني وحطيت ايدي ع صدري ونزلت
كعدت بهدوء منصية راسي العب بالخيط مال ثوبي و رجعت بذاكرتي للماضي
امي وعد من تزوجت ابوي بسنة 1990 جان منفصل وعندة ولد الي هوا اخوي هاني عمرة 6 سنوات
ورة ما تزوج امي وعد بسنة رجع امي نهلة ع ذمتة
وحبلت بية بسنة 1991 وجابتني بنفس السنة
مواليدي 1991/3/3
الله ما كاتب الهة عمر مديد، جابتني عند القابلة ولادتهة الي جانت صعبة و انه ما اقبل اطلع مجلبة بأيديني وسنوني
يوم كامل تعبت كلش وبس ولدتني شحب وجهة و يبست، فاضت روحها و فارقت الحياة
طفلة عمري دقايق وصرت يتيمة الأم
عبالكم ما اكو حضن يلمني وشفاه تقبل الأمي حتى تختفي؟ لا ..اكو
جانو محتارين وين يخلوني بيبتي ام امي نهلة جبيرة بالعمر، ما تكدر تباريني
وهاني جان متعلق بيهة، ضل يمهة وانه اخذني ابوي الأمي وعد الجانت حامل برهف
هية ما كالت لا بالعكس، اخذتني بدفو أحضانهة تسويلي المميات وتشربني وتسهر عليه
ومن اتمرض تبجي عليه ، تشتري الرهف وتشتريلي نفس الشي اتطلعنة سوية وتلعبنة شوية ..
يعني جانت أم مثالية اليه
ربتني ويا رهف، وما فرقت بيناتنة ابد
بس ما رضعتني لأن صدرهة ما جان بي حليب
لو راضعتني جا هسة خالي حر ما اتجرأ وحط عينة عليه لأن احرم علي
هاني ضل يم بيبتي تحبة وما تقبل تنطي وانه طفلة ما اعرف شي غير وعد امي
وحتى من جانت تعصب مرات تضرب رهف راشدي تضل تبجي وتضربني راشدي ع كيف ابد ما اتعور
چانت تخاف الله بية لأن يتيمة وكلش ضعيفة ماتصير بية عافية عبالك وحدة جاية من مجاعة افريقيا
بالنسبة لهاني جان كل فترة يجي يمنة يجيبو ناس ما جنت اعرفهم ولحد اليوم ما اعرفهم
جان يحب امي ويسميها يمة بس يعز بيبي اكثر ومتعلق بيها وهي متعلقة بي لهذا السبب ضل يمها ..
ورة سنوات وقبل ولادة ترف اختي الصغيرة، ابوي انطاكم عمرة غرگ بالشط ومات ..
اذكر جنت طفلة صغيرة كلش اصغر من عمري
اسمع صريخ امي ولطمهة، وهي تملخ بروحهة
ونسوان هواي اجن هم يصرخن ويدكن
رهف حبست روحهة بالغرفة تخاف وتبجي وانه واكفة واباوع مفزوعة
رغم عمري 8 سنين بس عقلي اصغر بهووواي وما عندي اطلاع ع حياة لأن عايشين بعيد عن عمامي وخوالي ولا نروح لهذول ولا لهذول وبس كاعدين بالبيت ..
جنت ابجي بهسترية و واكفة ، واكو ولد شالني وطلعني من يم النسوان وانه ابجي اخذني للمحل اشترالي بسكت وعصير وكيك وخلاني اكعد بباب المحل اكل
ابد ما جان يحجي وشنو اكلة يهز راسة
ومن خلصت كضني من ايدي ورجعني للبيت، بعدين عرفت هذا اسمة ليث
3 ايام ضبط الناس تبجي وتصرخ ومن اكللهم وين ابوي
يكولون مات ..
ورة ل3 ايام طلعنة من هذا البيت وحطونة بسيارة لوحدنة امي جانت لابسة بوشية وجفوف سود
واسمعهم يكولون بنات المرحوم ومرتة
اخذونة لبيت جبير كعدنة بي واكو بي هواي ناس
نطلع بالباب ونشوف بنات و ولد نلعب وياهم ونضحك وهمة الاطفال جانو شنو يشترون ينطونة
بيوم ولادة اختي ترف، جنت طالعة اركض ودعمت بعمي فاضل مثل دعمتي بي من ركض وراي همام
رفعت راسي باوعتلة ببرائة وخايفة لان جان رجال عصبي وحواجبة معقودة دوم
كلي بصوت خشن ... وين طالعة بوية
... العب ويا الجهال عمو
هز راسة وكال ... هاا اولاد عمج
مسح ع راسي وكال روحي
طلعت شفت الولد يلعبون طوبة و البنات مسويات عزيمة حاطات لفات وكيك و عصاير وانواع الحلويات
رغم اذكر بسنة ل99 الناس ماعدهة وعايشة بتعب
كعدت يمهن وجانن ينطنة انه ورهف اكبر حصة
واكو بنية اصغر من عدنة بهواي انتفضت وكالت
... ليش تنطوهن هواي وانه شوية
البنية الجانت اكبر من عدنة بسنة وتلعبنة كلنا
خزرتهة وكلتلهة بصوت ناصي بس مسموع
... اششش عيب هنة يتيمات ...
رهف نفضت ايدهة من الاكل وكامت معصبة
كالت ... بعد ما العب وياجن انتن جلبات
عيبت عليهن وركضت للبيت
البنية حطت اصابعهة ع شفايفهة وكالت ... يااا يمكن سمعتني وزعلت
اجة ليث وسأل شبيهة البنية رهف تبجي
البنية شاورتة واخذ حصتهة وراح وداها الهة
و ورة شهرين بس، كعدتنة امي من نومنة چنة نعسانات و كالت وهية تبجي
... اششش لا تطلعن صوت امشن بناتي امشن
احنة لمينة شعرنة وكمنة، هية شايلة اختي الصغيرة ترف وانه و رهف وحدة كاضة ايد الثانية
طلعنة من الباب الخلفي
واخذتنة الدنيا ليل هية تكول نص ليل
بس ما اعرف اذا صدك نص ليل لو لا ..
وكفت تكسي ونزلت راسهة كلتلة
... شلونك خوية ما تاخذني للجمعيات
باوعلنة وكللهة ... وهذني البنات شيصيرن منج
وعد ... بناتي خوية، متعاركة ويا رجلي وطردني رايحة الأهلي
... صعدي خوية صعدي
صعدتنة بالسيارة وطلع بينة الزلمة وهوا كل شوية يسأل اذا محتاجات شي او لا
و اذا ماعدنة فلوس ينطينة هوا
وامي تكلة تسلم خوية ما تقصر الحمد لله عندي
من وصلنة لبيت خوالي جان خالي عدي بعدة ما عازل، هوا فتح النة الباب واستقبلنة
طبت امي تبجي وتتهامس ويا وهوا معصب
ومن يومهة صرنة ما نعرف شي
وليش امي انهزمت بينة من يم عمامي
عشنة بحرية و برائة وداومنة بالمدرسة القريبة
جنت دوم اشوف بنية بحديقتنة شگرة والعب وياها بس فجأة تختفي
واكول يمكن راحت البيتهم
و مرة جنت العب بالشارع واركض، فجأة طحت ع وجهي وتزلغت ضليت متمددة بالكاع وابجي
ما حسيت غير ايدين انتشلتني من الأرض وشفت واحد وجهة اسمراني وبنص وجهة جرح طويل قاسم وجهة نصين و كال بصوتة الخشن المرعب بالنسبة الي
... ع كيفج عمو ليش تبجين بله راويني تعورتي ؟
جان يحجي بأهتمام بس شكلة يخوف ..
هزيت راسي وعفتة وركضت وانه اتلفت بالضبط مثل هسة من انزل والتفتت علي
جان يمشي وراي فتت للبيت وسديت الباب وكعدت يم امي وزوجة خالي عدي بالحديقة
وما نحس غير ينفتح الباب ويفوت هوا نفسة علينة كتمت انفاسي وضليت ارجف
شفت امي طفرت و صاحت بصوت عالي
خوووية حرررر
وطلعو خوالي ع صوتهة
حضنتة وهية تبجي سلمت علي وتبوس بي وهوا ملامحة جامدة ما ينطي اي رد فعل
دقايق وفات خالي قصي وكال بفرح ... جنت منتظرك والله كلبي طار من نشرو خبر
صار عفو عام وانتظرت اتصال يجيلي بي خبر
يكول حر طلع من السجن
ابتسم بهدوء وسلم علي
چنة انه ورهف مصدومات ونتهامس ببرائة اطفال
... هوا السجن مو للأشرار
رهف .. اي هذا يمكن شرير شوفي مثل الكارتون بوجهة جروح
باوعلنة وأبتسم وكال
... بنات وعد
وعد ... اي بنياتي
دنك باس رهف وهية خافت ورجع باسني بس ضليت ارجف
يمكن جانت اصعب لحظة من تقرب هذا الشرير وطبع شفايفة ع خدي برهاوة
هنا تعرفت ع خالي حر
الجان يقضي ايامة بين القضبان
والمساجين
عرفت السجن سرق الوان حياتة سلفًا
وصارت غيمة سودة غامضة
تحجب ضوء القمر عن كل احبابهة
رجعني للواقع صوت كاتي الناعم و هي تطلب مني اطلع وياها للحديقة
... درة امشي للحديگة وياي
هزيت راسي بـ اي، رمقتة بسرعة و هوا ينزل من الدرج بهدوء مبدل ملابسة لابس دشداشة بيضة ناصعة ، يلبس بساعتة اباوع الايدة الحنطاوية مزينهة خاتم لون الحجر مالتة رمادي يلمع ..
رفعت عيني اباوع ع وجهة، فكة عريض
يحلق لحيتة ويخلي شارب كثيف مرتب مبروم الأطراف، وشعرة يحلقة ، اكرع
يجوز ما يكون بنظر الناس جميل، بس بعيوني ملاك و شكلة غريب بالأخص من سوة تغيير ع شكلة
وهوا بحلاقة لحيتة وشعرة ..وترك الشارب يزين وجهة، مو مثل باقي الرجال
طبعا اشوفة هيج من باب هوا عزيز ع كلبي و شما سوة يضل عزيز وغالي، وافضاله مغركتني
يكفي شالني ع امتونة، وتعب عليه وصرف عليه وزرع بكلبي الطيب
لبس نظارتة و كال و هوا يطلع من البيت ... رايح اعايد جماعتي اودعناكم ..
حجة هيج و هوا يعبر من يمي ، جر نفس عميق
شحيت نظري عنة و توقعتة يباوعلي من ورة النظارة ..
للعصر هوا ماكو واستنتجت غيبتة الهة اسباب
اولهة كلامي الجارح ويا مايريد يشوفني ويكعد يذكر شحجيت وشكلت
بس ما جان يوم عيد، احس حنجرتي جمرة
مقهورة و مهضومة من شني ما ادري ..
سحبت نفس تسلل عطرة لريتي فتحت عيني شفتة بالمطبخ
هذا منين فات فلك
فتح الثلاجة اخذ منهة مشمشة و كال ... اااااخ يااا چعب كلبي الك بكلبي حسرة شكبرها
بلحضة ردت اهجم علي واكتلة بس همست ... اش درة ع كيفج هسة ثواني ويطلع
حسيت بشي طاح بحضني نزلت راسي شفت مشمشة بحضني
حر ... هاي رايجة تحبينهة هيج انتي
وكفت الغصة ببلعومي ، ولك لا تهتم بية بعد والله مرمرتني ..
شلتهة من حضني و همست ... شكرًا ..
همزين طلع لأن جنت كاتمة انفاسي وبس طلع زفرت النفس الجنت حابستة بصدري
مد راسة من الباب و كال ... ولج سمنانة شنو يمي جنتي ما تاكلين؟
درة ... صدك سمنانة ؟
حر ... اي والله صايرة شحلاتچ ولج محلوّة من وراي
درة ... كاافي
حجيت ودرت وجهي عنة ، ضحك بثگل ورزانة وصعد لغرفتة و بعد ما شفتة
خابر سداد ع امي كلتلة خليهن
كال خوش باجر من الصبح اجي عليهن نريد نروح لسمان ابن داوود وانتي عمة معزومة مو ما تجين
كلتلة اشوف والله كريم و نهت الاتصال
احس روحي انضكيت
ما اريد اضل يمة ما اريد ليششش ربي ليششش
تنهدت بضيق
وصعدت للغرفة باوعت الوجهي بالمراية شو يكول محلوة
يعني قصدة حليانة عود صدك حليانة ؟
هوا صدك شوية صايرة بية عافية لأن عمة نجوى بس تعلف بية ليكول جايبة جاموسة تعلف بيهة علمود تسمنهة وتذبحهة ..
عود هية الجاموسة هم يذبحونهة وياكلون لحمهة ؟ انه تفكيري مال ثولان ..
طبت رهف ترعد وتضغط ع اسنانهة بغضب تفتح الكنتور وتكلب بأغراضنة القديمة و ترجع تدفر الكنتور برجلهة ..
... لج رهف سوادين شنو شالو عقلج وحطو بمكانة قندرة
رهف ... خررررر* بيك سداد
درة ... بي هذا البربوك؟
رهف ... ليششش قبل يخلينة هنا ليششش اوووف
درة ... منو ضوجج
رهف ... امج بعد منو موتتني تكول صهيب خاطبني منهة وتريد تنطيني اله
درة ... ع اساس ما جنتي كاتلة روحج حتى تحصلين نظرة وحدة من صهيب هسة صار كخة
رهف ... اي كخة كخة ما اريدة كوة خو ما كوة ما اريدة
درة ... و شتردين
رهف ... اريد واحد يحاول يكسبني ويكسب حبي
يحسسني انه مهمة بحياتة
مو لا أحد !
درة ... هسة انتي لا احد بحياة صهيب
رهف ... اي لا أحد ، انه جنت ثولة ومعجبة بي حقي ما شايفة حلوين
بس هسة ما يعجبني العجب
اريد واحد ع مزاجي ، اريدة خبل بعشكة هيج عشك معيدي مو هذا صهيب المايع
درة ... هسة صار صهيب مايع المهم كيفج هوا مو ثوب وتنزعينة بدام ما عاجبج لا توافقين
صعدت كاتي تكمز ... هررر عزمتنة ع عشاااااء هررر عاازمتنة
رهف ... هاك استلم وانه كالبة وجهي شلون اطلع
كاتي ... وعد كال بدلوووو بسرررعة وهلاا يا ابو هدود تفاهة ويا ابو هدود تفاهة
رهف ... علاء سعد شفط حتى الاجنبية
كاتي ... اي ءلاوي يهبل متبتب (مدبدب) وهلا يا ابو هدود تفاهة هلا هلا هلا
درة ...ها خوتي هاا
كاتي ...هااا درة هاا
درة ...كاتي بس گولي بلي بيج خير وتدللي
كاتي ...اسومة تفي لگلوب هدها (خدها) يشع ويا الروب
درة ...وايي ابو خد مشمشة
كاتي ...هلاني ومشة هلا هلا شتأنگ والبس يالون من اهجي ويا ابدي شلون
درة ...اي هلا هلا هزيهااا .. هلا
كاتي تهز خصرها وانه اهز چتفي
كاتي ...هلاني (خلاني) ومشة
درة ...وشتأنق والبس يالون من ابدي ويا ابدي شلون
كاتي ...سلاوات سلاوات نبدي شنقول
درة ...لا اله الا الله
كاتي ...والف السلاة ءلى الرسول
درة ..لا اله الا الله
كاتي ...وهذا لئبنة (لعبنة) ولا تكول مستهترين
درة ...استهتاررر
كاتي ...اريد ادبش دبش هلا هلا ..
رهف ...كااااافي هز ورگص وين ماخذچن حر الدين لأميركا هو كله مطعم يعشيچن
كاتي ...هلينا نتونس شبيك رهف كالب وشهك شنك بومة شا شلون ما نفره (نفرح)
رهف ...امشي بدلي كتكوتة
بدلنة ع سريع خليت رهف تحطلي شوية مكياج خفيف طلع وجهي حلو
... اكلج صدك حليانة بربج
... صايرة عسل وطالعاتلج خديدات تخبلين
هاي الكعدة كبال الصاكين ببيت عمي خلتج اتطكين
اندك علينة باب الغرفة
حر ... بننناااات
رهف ... فوت خالي
فتح الباب وطب وانه امشط شعري باوعلي و تحسر رهف ما حست ع شي لان لا هية تتوقع خالي حر ينظرلي كـ بنية غريبة و يحبني و لا انه جنت اتوقع ..
حر ... راح نطلع ليش اتأخرتن
رهف ... بس شوية خالي حباب وعيد وناس كتلة لازم نطلع بأبهى صورة
درة ... دقايق ونخلص
حر ... براحتچن ... لا تتأخرن بنات هم ياله ترة المطاعم مزدحمة خاف تردن اوكلجن لفات فلافل ههههههه
رهف ... لا دقايق وننزل
هز راسة وانه نطيت حاجيت رهف
... رهف امي قبلت اكص شعري ، كصي الي حد عنقي
باوعلي بسرعة بنظرة واحد تعبان وانطعن كلبة ويا حجايتي
رهف ... خوش من نرجع اكصة الج ..
هوا انه ما جنت اجذب لا احجي صدك لان توسلت بأمي وكالت كصي ما تدري راح ابترة بتر ..
لفيتة ولبست شالي ، جنت لابسة بنطرون اسود و قميص ماروني وبي قلب بيجي وشال وحذاء وجنطة لون بيجي ، ويا المكياج حسيت روحي صرت جميلة وقابلة ع شكلي
هاي ثالث مرة اقبل ع شكلي
الاولى بحنة هاني والثانية بعرسة والثالثة هسة ..
نزلنة و جان خالي حر وجهة محتقن و احمر وبس يزفر يريد واحد يكلة بز حتى يبطل ما يطلعنة ما اعرف شبي ..
صعدنة بالسيارة انه ورهف وكاتي ورة و امي يمة كدام خالي اسامة مو ويانة معزوم بحنة صديقة ..
بأعتبار ايام عيد والاعراس هواي ...
فرينة كومة مطاعم ما اكو طاولات فارغة وكل واحد يكول انتظرو
وخالي يجي يصعد مطنكر اخير شي اخذنة المتنزه البصرة العائلي
واشترالنة اكل ودخلنة للمتنزه
همزين حصلنة مكان نكعد بي ناكل وانه شفت سيارات التصادم وكلت الا اصعد
امي خزرتني وعضت شفتهة الي ... ولج عيييب
درة ... ما ماااا الااا اصعد اريد ادعم واحد الااا العب
حر ... امشي نلعب انه وياج
درة ... لا اريد وحدي يمة حبابة حبابة اريد العب بالتصادم
كاتي ... هتى انا اريد
حر ... يله امشن ثنينجن
اخذنة وكفة بالسرة راح خالي حر حاجة الولد وراح وكف جان سراهم اقل من سرانة و ضل واكف يم الولد من اجة دورنة
صعدت كاتي وانطت كرتهة وصعدت انه بوحدة وما احس غير خالي حر يدحس روحة يمي
حر ... وين تعرفين تسوقين انتي كلت اعلمج
بلعت ريكي و ارتج كلبي ، همست بصوت واحد طاكة روحة ... ارريد وحدي شبيك انتة
اشتغلت اللعبة وصارت السيارات تدعم بينة
حر ... دوسي بريك
دستة وافتر الستيرن
... شيلي رجلج شيليهة
شلتهة كض الستيرن وكال دوسي يلة ولا تشيلين رجلج
دستهة وتحركت السيارة يمين ويسار
ومن كثر الصدمات ضليت اروح يمين ويسار. ع حس الطبل خفن يرجلية
وانه ع صدمة ارتج يجسمي
لف ذراعة حول كتفي ولزمني وانه ادعم بكاتي و هية اتدردم بلغتهة كلشي ممفتهمة منهة ويا صوت الاغاني والصريخ
.... وين الكيرررر
حر ... منين اكوو گير بهاي
... ذيج المرة بيهة كير كضيتة وضليت اوديهة منا ومنا
حر ... لا متوهمة ماكو كير
قرب راسة مني و حجة بصوت طبيعي بس يغلفة الغضب ... اذا تگصين صبع واحد من شعرچ ابتر ايدچ وقد اعذر من أنذر ..
وكفت اللعبة ويا جمودي و نزلت بدون رد
نزل هوا يمسح بجبينة من العرك و طلعنة، راد يطلع من مكان الدخول وضحك و همس انثولت منا منا
رجعنة اتعشينة و طلعنة رحنة للكورنيش تمشينة شوية و اشترينة موطة وازبري كلينة ورجعنة للبيت الساعة بـ 11 بالليل ..
جان يوم حلو ابد ما انساه انحفر بذاكرتي ، ويا باقي ذكرياتي الصارت رماد
اتمنى هاي الأيام ما خلصت، ونرجع نلعب بالتصادم سوية ..
نمت بسرعة من التعب ورهف سمعتهة تتهامس بمبايل امي وتكول لواحد
... تعال من وكت طاكة روحي مالي خلك اضل هنا
و هوا يرد بعد ثواني تكلة ... اي مشكور ما تقصر تعبناك
عرفت هذا سداد ، رجعت غفيت ورة دقايق وجيزة فزيت من حسيت بأنفاس حارة تضرب وجهي
خفت افتح عيني ارتعبت
سمعت صوت الشباك انفتح بقوة والانفاس اختفت رفعت راسي شفت الشباك مفتوح والدنيا ظلممممة
وماكو غير نجمات متعلكة بالسما وتلمع
كمت ع كيفي باوعت جوة للحديقة شفت الاطفال الاثنين يحفرون بالحديقة بمكان واحد ، رفعو راسهم ورمقوني برمق مرعب ..
ارتجف بسببة كياني ..
سديت الشباك و رجعت قريت آيات ، حسيت احد خطف من كدامي ، و عيوني ضلت تتجول بارجاء الغرفة بخوف ..
ورة ثواني ضلت اذني تسمع اصوات مختلفة ضحكات وبجي و صريخ ..
حطيت ايديني ع أذني و كمت من مكاني مفزوعة ، فتحت الباب بهمة صار بوجهي خالي حر حاطلة كرسي وكاعد كبال باب غرفتنة يدخن و وجهة ع باب بحيث اول ما طلعت شافني ..
… درة بيچ شي
… خااايفة اكوووو جهال يحفرون بالحديقة
… وين!
… بالحديقة
… اسم الله الرحمن رجعي نامي متوهمة
… بنية و ولد يحفرون بالحديقة راااح انزل بعد ما اتحمل شفتهم بعيني
نزلت اركض ع درج و هوا وراي كضني من ايدي وجرني صعدني
... لا تصيرين مثلهم جاهل انه مو كتلج اكو بيناتنة وبين الجن حاجز مينشال الا بيوم القيامة
وكتلج بعد الله خالقهم من مارج من نار يعني مينشاوفون ، وهذااا الي تشوفينة كلة وسوسة لا اكثر ..
درة ... بعد ما اجي هنناااا تعبت من هذااا البيت
نترت ايدي منه و ركضت للغرفة رجع جرني قبل لا افوت
... لا تخافين انه راح اضل كاعد هنا للصبح كبال باب الغرفة
درة ...عادي اخلي الباب مفتوح لأن اخاف
ابتسم بهدوء وكال ... خلي
فتت خليت الباب مفتوح وتمددت غطيت راسي وأطمئن كلبي لأن هوا كبال الباب
امر غريب نتوقع من شخص حمايتنة، وهوا الجن اذا عندة سلطة عليه و يكدر يأذيني راح يأذي هوا هم
يعني وجودة ما اله فايدة
وبعدين هوا خالي كال مرة
الجن مالهم سلطان علينة هم اضعف من عدنة بهواي
كعدنة الصبح لكينة خالي نايم ع كرسي وهوا كاعد خطية
رهف زمت شفايفهة مستغربة و راحت تندسة
... خالي شعندك نايم هنا هاي شمسوي شكد امدخن
حر ... كعدت ادخن علمود غرفتي لا تثعول من الجكاير وغفيت يلة رايح اكمل نومتي
راح للغرفة واحنة نزلنة اتريكنة وصعدنة بدلنة وعدلنة نفسنة و انتظرنة سداد
اجة علينة واخذنة گبل لسلمان ابن داوود زرنة
جان فالح ويانة
واهل بارق امه وهمام ..
و بعدين اخذونة للشط ، يم جسر سعد
جان مكان اول مرة اروحلة بالهارثة
نزلنة فرشنة فراشنة و عمة نجوى حطت الجدورة
واحنة نلعب يم الشط
وابد ماكو ناس
والعالم الي يمرون يباوعون علينة مستغربين يمكن عبالهم احنة مخابيل ..
نمدد رجلينة بالماي ونضحك لأن بارد ويدغدغ
فالح لازم كاميرة ويصور بينة كلنا ، ويصور بعمي فاضل
وكل شوية يكلة فاضل باوعلي ابتسم طلع اسنونك
ويصورة ..
ويرجع علينة يكول صبايااا باوعلي
ويصورنة
فلك كاعدة بنصنة انه ورهف ..
عمة نجوى صاحت ... فلك رهف تعالن حطن الحلويات بصحونهن
كامت رهف قبل فدك و زلكت رجلهة بحافة الشط وطاحت ، صرخت بخوف
رهف ... يممممة ..
جانت لحضات تخوف، فزعنة كلنا و ارتجفنة
نزل سداد بسرعة و لحكة ليث
احنة نرجف ونبجي وهية تصرخ
يمممة يممةةة وترفع بايديهة تريد تسيطر وما تغرك
انه ابجي واشهك والطم ع خدي
فاضل ... كضوووهااا لا تغغغططططط
ثواني وغطت قبل لا توصللهة ايدين سداد او ليث
غاص سداد و لحكة ليث
وطلعو روسهم بسرعة ... ماكووووووووو مااااكووووو
كأن اكو حفرة وابتلعتهة ........
