 |
رواية ليلة الحنة الفصل الحادي عشر 11 بقلم بسمة البياتي
#لـيلـة_الحنـة _
_ #البارت_الحادي_عشر _
__________________
... انداريت عيني اجت بعين رائد متغير هواي ونظراتة ما اعرف شوصفهن عتب قهر زعل لو شماتة
شوفتة بهالحالة خلتني اكره روحي عفت الصينية من أيدي مشيت أريد طلع من المطبخ أريد انهزم گلبي خلصان ما عاد يتحمل العتب واللوم
رائد اذيتة بدون ما اقصد لان فعلاً ماعندي مشاعر اتجاهه والقبول والمحبة من الله
اما أهلي أذيتهم بـ أختياري الخاطئ نصحوني ماسمعت منهم
والضحية الثالثة هي بنتي أجت للدنيا مرفوضة من ابوها ماكو بگلبة حنية عليها كارها بدون ميشوفها
وكل هذا الحقد والغل لان اني امها راح تكبر وهي محرومة من كلمة بابا
غزل شي أكيد من توعى وتفهم راح تحس بالنقص لو شگد ما أحاول اسد مكانه وأعوضها تبقى بحاجتة
قبل لا اطلع صاحت عليه لمى
.. وووين تعالي ساعديني
.. اريد اشوف غزل أخاف تگعد على الصوت وما إسمع بجيها
طبيت للغرفة گابلت كاروكها صفنت عليها
الحسرة البگلبي شكبرها العبرة خانگتني
وصال..ليش گاعدة اهنا بيج شي؟!
.. مسحت دموعي قبل لا تنتبه عليهن
لا قابل شبيه جيت اشوف غزل
... شو انداري عليه وباوعي بوجهي
.. وصال شبيج
.. لاتكذبين مو بس غزل الجابتج اهنا احجي ليش باجية احد غثج؟
.. لا والله أبد
.. لعد شصاير؟!
... صدگي ماكو شي يمكن اذكرت خطوبتي ولمت نفسي عليها
... گولي الحمدلله هاي قسمتج محد ياخذ غير نصيبة صح زواجج فاشل بس دشوفي التعويض الأجاجج صارت عندج بنوتة تسوة كل الأذية والقهر
... بگد فرحي بيها بگد ما خايفة عليها خايفة تكبر وتسألني على ابوها بوقتها شراح اجاوبها شگوللها أبوج شك بيه وظلمني وبنظرة اني وحده خاينة
.. يووو من هسه شايلة هم گولي يا الله وعوفي كلشي الوقتة ربج هو يدبرها
... ان شاء الله
عدلت وجهي وطلعت وياها ضحكت زلال وفرحتها خلتني انسى همي بهاي اللحظة
قبل لاتنتهي الگعدة أجت مرة عمي أم رائد گعدت بصفي
أم رائد... شخبارج بنيتج شلونها أخير مرة شفتها عمرها أيام أكيد هسه نشنشت
.. الحمد لله أنتي شلونج
غزولة زينة
... وينها أريد اشوفها
...نايمة بالغرفة بس تگعد اجيبها تشوفيها
... لا خطية لاتجيبها اهنا بعدها لحمة حمرة موزين عليها الصوت العالي
اني اجي وياج اشوفها
... اخذتها ورحنا للغرفة عمتي الوسطانية اجت ويانة
سميت بسم الله وشلت غزل رايحة بسابع نومة فكيت الگماط حبيبتي حست كامت تتمعصر
اخذتها مرة عمي بوستها وراها عمتي شالتها
... صلوات صايرة تخبل تشبهج وتشبه ابوها
عمتي گالت صدك على طاري ابوها شخباره هم يجي يشوفها ويسأل عليها
.. كلش انحرجت ماردت ارخص بنتي واگوللهم لا
جاوبت اي دوم يخابر يطمئن عليها ويمر يشوفها
.. هااا اي زين
ام رائد...تمنيتج الرائد بس ما صارت القسمة
مامكتوبتلة
....مثل مگلتي كلشي قسمة الله يرزقة بالأحسن مني
... رايدتلة وداد ان شاء الله عن قريب نعزمكم الخطوبتهم
... يازين ما اختاريتي وداد وردة الله يسعدهم
ظلت تسولف ويا عمتي أجيبلها وهيج اسويلهم هيج أدللها أخليها بعيني
متأكدة متقصدة تسمعني هذا الكلام وبنفس الوقت توجهلي رسالة غير مباشرة
ان رائد طلعج من باله وراح يأخذ غيرج
ماستغربت تصرفها ولا أنزعجت هي آم وتريد الأبنها الأحسن
واذا نجي للواقع حتى لو يجي يطلبني ارجع ارفض اني نذرت حياتي وشبابي البنتي ما افكر بيوم أجيبلها زوج أم
وداد بنت عمي الجبير بعمر زلال حلوة وفقيرة كلش ملائمة الرائد بلكي تكون من نصيبة
انتهت الحفلة الكل راحوا
طبت زلال تهز
زلال....النهاردة خطوبتي يا گدعان وهلا وهلا وهلا هاي الرادها وهاي التمناها زلولة العسل الأركان جبناها وكللللللللوشششش
.... يولي اثگلي
. عفت الثگل ألج اذا بخطوبتي ما افرح لعد شوكت افرح
... حبيبتي شايفة الف خير ربي يكتبلج السعادة بكل لحظة
... اوووي راح ابجي شو صرت حساسة
حضنتها ياعمري ليلووو يوم الأفرح بيج وبهاي الفصعونة الصغيرة
... هووووب وين رحتي لا عيني افرحي بنفسج معليج لا بية ولا بغزل تعقدت من شي اسمه زواج
لمى... بله أنتي حقج تتعقدين غزل شعليها تحشريها وياج
.. لا يمه ما انطيها خلي تبقى يمي
.. تهي بهي اي مو بكيفج
زلال.. دخلي تكبر ودك رجل مثلج وتعاند عود شوفيني شلون تمنعيها
لمى. اي والنبي شلون امها جلبت بأبوها هي هم تجلب
... امدااااااكم يالعوبات والله زمن صار ينضرب المثل بيه
زلال.. هههههه نتشاقة لاتضوجين
ولكم عندي طاقة مايصير اكبتها واحبسها اريد ارگص أريد أغني أريد اطير
لزمت لمى كمت افتر وياها مثل الفراشة وادندن بفرح وحب
الحياه بقي لونها بمبي وانا جمبك وانت جمبي
وانا جمبك يا حبيبي يا حبيبي وانت جمبي
الحياه بقي لونها بمبي بمبي بمبي بمبي بمبي
شوفت سحر الحب عامل فيا ايه
رعشه حلوه زي ما تكون سنفونيه
وبمبي بمبي بمبيييييييييي
ليال... عيوني دمعت من الضحك منظرها يخلي الگلب يضحك مو بس الوجه
لمى... حرررررررررام اني هم اريد انخطب ترى غرت معليه ووووووينك بابا
رغد.. والكعبة انتي وزلال فلم وحده لو بيدها تصيح ما اريد العشا زفوني والثانية تلطم ادور خطوبة
زلال. لملومة معليج بيهن كل وحده مخلية زوجها جوة اباطها وتجي تتعيقل علينا
لمى.. اي والله الي ايده بالمي مو مثل الايده بالنار
ليال... ششورطج وحجيتي شراح يخلصج منهن
رغد... يبوووو توبة حمودي يبجي رايحتلة
... ههههه الهزيمة ثلثين المرجلة
زلال...تعبانة دخلت لفرأشي أريد انام
اهتز تلفوني طلعتة من جوة رأسي من شفت الأسم ابتسمت
.الوو
...هلو حبيبتي
.. عيدها
... ياهو منهن
.. تعرف ياهو لاتستلوت
... مو عيب تلگولين الزوجج تستلوت
.. قابل مكذبة انت صدك لوتي
... لأزم اتحمل واسايسج الحد ما أخذج بذاك الوقت اطلع القضى والمضى من عيونج
... يعني مخابرني وحارمني من نومتي العزيزة حتى تتحلف بيه ما أريد لاتعيدها عمي ما أريد اسمعها بعد
.. متأكدة متريدين
.. اي
.. أحبج
... وأضح
.. اذا ما احبج شكو مأخذج
.. عادي انت تحب كلشي ينتهي بتاء التأنيث الساكنة قابل بقت عليه
... هههههههههه خرب ضميرج ولج شايفتني زير نسوان
.. اي نعم
... بدون حلفان ظالمتني شاب فقير حباب واحلى أخواني أروح بدرب وأرجع من غير درب
...هههه اي شفت شگد مظلوم
.. أريد أشوفج ماشبعت منج غير جنتي طالعة تخبلين
... لحظة لحظة ششنو جنتي؟! يعني قبلها محنت حلوة
... حلوة بكل وقت بس اليوم خوش لابخيج طالعة احلى
... أركااااااان شنو شايفني طامسة بالمكياج ترى مخلية خفيف
.. ههههههه اشاقة وداعة عيونج اشاقة
اطلعي للحوش اشوفج ونگعد نسولف شوية
... اي تعال وبدربك سلم على علاء اكيد هو راح يفتحلك الباب
.. بطلت ما أريد ادري هذا شمسهره
...طبعة مينام من وقت هسه اذا يشوفني اطلع يسويلة سالفة مناقصة خباله
... قابل تعلميني بسوالفة عندي نسختة الثانية بالبيت اذا طولت بالسهرة ويا جماعتي الگي واگفلي بالباب دك رزايل ومحاضرات ولا عبالك الگدامة شاب طول بعرض
... اكيد امجد هههههه
ديلا نعست خلي انام تصبح على خير
.. وانتي من اهل الخير گلبي
ثاني يوم بالگوة گعدت عندي دوام شحدي اغيب بدلت وتريگت
اجة الخط شلت جنطتي طلعت اركض صار اركان بوجهي
... راح تنجبحين شكو مستعجلة
...يمعود السايق رجال جبير وروحه بخشمة شوية تأخر يعوفني ويروح
... عادي اذا راح اني اوصلج
علاء صاح عليه
...عوووفها تروح عندنا شغل متلتل لا عبالك بهاي دروبك تفلت
...اركان اشرلي على رگبتة بمعنى مخنوك منهم
طلعنا للباب قبل لا اصعد للخط
حجي صجمة صاح زلال انخطبت شدو رأسكم يگرعان
بهتت عزززززا حجي وأنت منو و ياك شمسويتلك من الصباحيات استلمتني
اركان... السايق راح يعوفج صعدي معليج بي
داومت صديقاتي والمدرسات كلهن باركنلي. علاقتي حلوة ويا الكل حتى المدرسات
مينا بين فترة وفترة نتواصل شي قليل مو مثل قبل من عرفت راح انخطب الاركان مدري ليش حسيتها ضاجت يمكن لهسه عدها امل اخذ اخوها
حياتي بهاي الفترة حيل حلوة السعادة الاني بيها ماتنوصف بالكلام
اركان يوم بعد يوم يفأجئني بصرفاتة
اطباعة حلوة وحبه نابع من گلبه
الشي الوحيد الجان يزعجة تشدد بابا واخواني
من انخطبت منعوني من الروحة البيت خالي وحدي اركان اذا راد يشوفني لازم ابيتنا وتحت انظارهم
وهو يضوج يدور ختلات
واني ما احب هالشي مأيده اهلي بحرصهم
اذا يحبني لأزم يصبر الحد ما نزوج
اني مو وحدة من صاحباتة الخفيفات ويدور ختلة وياي
ايدي بالگوة اخلي يلزمها يحجي ويزعل وراها يستسلم ويرضى
خالة كوثر بدت تجهزني خطية ابد مقصروا وياي لا بذهب ولا بملابس رغم اهلي ماطلبوا منهم شي
أركان جان جامع فلوس من شغلة والباقي من خالي
اكتشفت صفة ثانية بأركان كلش حبيتها كريم بشكل موطبيعي يومية باليل يتصل عليه
يگول طلعي للمطبخ
من اروح الگي جايب لفات نساتل عصائر
اعاتبة ليش تجيب وفر الفلوس للعرس يگول معليج ادري بيج تحبين النمنمات
والحلوة بي يحسب حساب ليال وياي
كا العادة دنحجي باليل
اركان.. هالسنة ناوية تنجحين لو تظلين مجلبة بالرحلة
... شو الكل ماخذين عليه نظرة اني كسلانة
.. الشاطر ليش ماينجح؟
.. عيبي ما احب الدراسة لو اخلي عقلي اطلع من الاوائل
... بربج لاتحمين بهاليل بيج خير اطلعي من الخامس حتى نزوج عمة قافلة اذا ما نجحتي ماكو زواج عود بالسادس ارسبي براحتج
... ليش تخليني اعاند وما اقرأ
... هذا هو بعد لا احجي ولا عليه
... اگلك شنو هذا الصوت
... عالگة بين امجد ولمى
.. يووو ليش
... خالي منطي بنتة الأمجد والعينتين من سمعت نصبت عزا
... خالك مو يدري امجد يريد لمى وحاجي ويا ابوها بعد شكو يصخم وجه ويوزع بنات
...ششمعرفني ديلا راح اسده اشوف امجد وين طلع ويمكن لمى اجتكم
... ماشي باي كمت من فراشي طلعت للمطبخ أريد افتح الباب اجاني العتوي علاء
... وووين
... يعني وين اولي بهاليل لمى راح تجي دافتحلها الباب
قبل لايجاوب فاتت لمى العيون تجري
بيدها كلينكس تحير تمسح دموعها لو خشمها
علاء.. خير يابة ليش تبجين؟!
.. لمى بالكوة تجر بالكلمة
عفية علاء امجد طلع متعصب روح شوفة وين راح
... دفوتوا جوة لاتوگفون اهنا رايح اشوف وين ولى
زلال.. اخذتها من ايدها طبينا للغرفة من شغلت الضوا ليال گعدت
لمى راحت حضنت ليال وتبجي
ليال... شصاير ولج ليش تبجين
.. اشرتلها تسكت بين ماشوية تهدء
عفناها براحتها ورة شوية سمعت صوت امجد
طلعت لگيتة علاء ديفوت امجد للاستقبال
وهذاك ما يقبل بالكوة دخل شكلة من العصبية يخوف
رجعت للغرفة
لمى..علاء لحك على امجد لو لا
.. بلي هياتهم گاعدين بالأستقبال
.. الحمدلله
ليال... دام هديتي احجيلنا شصاير بينكم
لمى... ليال تعبت بالقرآن تعبت بابا ذبها للسجينة
ما رايدين منه غير شهر يجي هم نشوفة مشتاقيلة وهم نعقد اني وامجد
... هذا الكلام كله نعرفة شنو الجديد
.. الجديد صار فترة مشاكل بيني وبينه حجة ويا ماما گاللها حاولي تقنعين عمي عاطف يجي هالشهر
ماما حاجت بابا ومثل كل مرة طلع الف عذر يگول ما اگدر اعوف شغلي موقع عقد ما اگدر اخذ اجازة طويلة
امجد سمع تخبل يگول لشوكت نظل هيج اخوي الأصغر مني راح يزوج واني ظال تحت رحمة أبوج شوكت يعطف ويجي
حجيت ويا وبالگوة سكت
اليوم سمعت خالهم منطي بنتة مروة گايل
بنات عماتكم بشنو احسن من بناتنة ومتأخذون منا
اني من سمعت تخبلت تعاركت بجيت لطمت موبيدي خايفة السالفة تصير صدك واخسره
ليال.. امجد شنو رأية شمجاوب خاله؟
... يحلف يگول رفضت گتلة بنتك تاج راسي ونسبك شرف الي بس تدري يا خالي رايد بنت عمتي فردوس وحاجي ويا اهلها مو رجال اذا تراجعت عن كلمتي وتخليت عنها
زلال.. خووش كلام لعد ششبيج مثل البومة خابصة الدنيا من شفت منظرج عبالي صدك راح يخطبها
... ليشش متفهمين والنبي اخاف لا الحجاية باجر عگبة تصير صدك ويروح يخطبها البنية مو فقيرة تحب تتخشخش وعينها وكحة
ولكم امجد اذا عافني اموووت
ليال. .. صلي على النبي شيعوف منج وين اكو حب مثل حب امجد ألج
زلال.. وابوج بالخير شوكت ناوي يجي
... ما أدري من سافر عاف ماما حامل بـ وسيم
وهسه راح يصير عمره خمس سنوات وهو الهسه مشايفة غير بالتلفون
العقد جان المفروض ثلاث سنوات من كملهن جددوا ثلاث سنوات ثانية خايفة لا سنة تجر سنة والحبل على الجرار
... يلا مظل شي راح تخلص هالسنة وان شاء الله يجي واذا سواها وما اجه انتي مو قاصر ازوجي وفضيها خلي عمامج يحضرون يسدون مكانة
... الله كريم
... عفناها تنام متنا قهر عليها والله خطية
علاء دك باب الغرفة صاحني يريد اسوي جاي واخذ فراش الغرفتة امجد راح ينام اهنا
عود زعلانين واثنينهم يمنا ههههههه
هستوني غمضت ندهتني لمى يبوووو شلون بله اليوم ماراح انام
.... اششش طاح حظج وحظ التگعدج
... حظ المگعدتني ادري بي طايح ميحتاج تگوليلي
هاا ولج شرايدة
... امجد دزلي مسج گال تعالي للأستقبال اريد احاجيج
... اي ماتروحين اني شعلية شكو مگعدتني
... حيوانة اخاف اطلع واحد من اهلج يشوفنا
.. ممممم ليش شراح تسوون وتخافين يشوفوكم
.... ششايفة السخافة
.. لا والله مشايفتها قابل وين اشوفها
.. انجبي اصلاً جنابج اسخف من السخافة
بربج تتوقعين امجد يسوي شي غلط
... ليش امجد نبي وما ادري
... امداج تجين توكفيلي لو لا
.. امششي امري لله لو ما مقهورة عليج لو يجي الريل ابو كفشة ما اتحرك من الفراش بهالبرد
.. اي ادري بيج
... طلعت وياها فاتت للأستقبال واني بقيت يم الباب اطك سن بسن من البرد
اروح واجي اريد ادفئ استوقفني كلام امجد الها
امجد... ربيتج على ايدي تعرفين طبعي اكثر من امي ماتوقعت بيوم راح تشكين بيه
لو رايد غيرج ماكو قوة تمنعني اروح اخطب لا خايف ولا مستحي خصوصاً الحق وياي صبرت هواي وطلبتج اكثر من مرة وأبوج مغلس
محد راح يلومني
بس يا بنت عمتي لأزم ثقتج تكون أكبر لان تدرين كلش زين گلبي مختوم بأسمج وحبج متربع بي لا عيني تشوف غيرج
ولا عقلي يتحمل خسارتج ولا هالگلب عنده استعداد يفوت وحدة ثانية بمكانج
لمى بدموع الله عليك لاتزعل مني والله اغار وهالشي موبيدي
زلال... رحت بعيد صفتت عااا والله طلع هالامجد مو قليل امداك يا اركان ماتتعلم منه
گاضيها وياي بس شقى وتحشيش وعود هو ابو بنات على گولت المصريين مگطع السمجة وذيلها
طلعت لمى عيونها تلمع والضحكة تارسة وجها
احم احم سبحان مغير الأحوال
.... اششش ولا كلمة عوفيني فرحانة
... ان شاء الله دوم الفرحة
هم زين ثاني يوم جمعة ماكو دوام شجان گعدني واني سهرانة الليل كله
ليال... اكو رقم صار يومين باليل تقريباً قبل الساعة 12 يدزلي شعر
أول يوم ماهتميت گلت يمكن غلطانين بالرقم
ثاني يوم نفس التوقيت هم دز وهالمرة خاطرة
كلها حزن وفراق وغدر
ياربي منو هذا او هذي معقولة ليث
لا ما اعتقد قبل كم يوم مرة مازن جانت تحجي وياي گالت ليث تزوج وحالياً بشهر العسل
ما أريد ادوخ نفسي وأبني افتراضات من عقلي حظرتة وهاهي
زلال... ليلووووووو يلا بسسسرعة
.. منو راكض وراج شنو يلا
.. بدلي نطلع
... وين؟!
... نفتر نتعشى برا الجو حلو يلا يلا لاتعطلينا
... اي مو بكيفي وبكيفج ابدل واطلع بعدين منو الراح يطلعنا
... اركان ولاتخافين حجة ويا بابا وستاذن منه
لمى هم تجي يلا الله عليج والله ضوجة ونفسيتي زفت من الدراسة
... روحوا انتوا ما أگدر اطلع وين اعوف غزل واذا اخذها ويانة تتمرض
..ماما گالت بقوها يمي هي لوما ليل ونهار يمها دمشي عاد مامليتي من البيت لا طلعة ولا طبه
... والله مالي خلگ ليش متصدگين
.. الخاطري الله عليج اذا ما اجيتي لمى هم متجي
وإكيد علاء مراح يقبل اطلع وحدي ويا
.. خو من البداية گولي علمود مصلحتج مو خايفة عليه وتريدين تونسيني
... بربج اني هيج
.. أبتسمت لا والله مو هيج يلا رايحة ابدل
زلال... اركان اخذنا افترينا ورأها دخلنا مطعم تعشينا
هم زين ميضوج من الطلعة ويا البنات وعنده خلگ للفرة
قبل لا نرجع ودانا محل مرطبات شربنا عصير طلع من خشمنا من وره ليال خبصتنا تريد ترجع بالها يم غزل
الشارع ظلمة اضاءة خفيفة
لمى وليال يمشون گدامنا واني واركان وراهم
شابك ايدي بيده رايحين بعالم ثاني غزل وغرام
ناسين نفسنا عود عشاق وكذا
وعلى طاري العشق ماحسينا غير اني ويا طططططب واكعين بحفرة شكبرها وشگدها توصل النص رجلنا
ليال.؛.. صارت طبة رأنا اندارينا وعينا متشوف الا النور منظر مايتسولف اركان وزلال گاعدين بنص حفرة
اني ولمى شفناها قبل لانفوت متروسة وسخ واوراق اشجار
اريد اوصل يمهم من الضحك ما اكدر
خو لمى گعدت بالگاع
لمى.. هههههههههههه ااخ بطني راح اموووت
.زلال...الدمعة بطارف عيني رجلي تزلغت انوب اركان يضحك ولا مهتم
ليال... هههههههههه بغيرتكم حفرة شكدها ماشفتوها
أركان...من اگلكم الي ياخذ زلال عقل ميظل برأسة متصدگون
زلال... اايييي مو وگعت وحدي لوما انت قبلي
بدال الضحك طلعوني ششنو تريدون ابات اهنا
صوت شباب واكفين بمسافة عنا ضحكهم وصل الاخر الشارع عززززا نفضحنا
بسرعة طلعنا انوب نمشي ونعرج
رجعنا للبيت لمى الجلبة مابقت احد ما حجتلة باليلتها صرنا فلم سينما وبلاش ياهو اليجي يخرب ضحك
لمى... ولكم بنات باركولييييييي
زلال. ولي زعلانة منج لا اباركلج ولاتباركيلي
رغد... معليج بيها الوكعة بالحفرة لهسه مأثرة عليها ههههه
زلال. اي مو هي ناقصتج
ليال...احجي لملومة على شنو نبارك
.... بابا يجي بالعطلة قبل عرسس اركان وزلال
زلال...يووو وأخيراً هذا الخبر يرادلة احتفال واطلاقات نارية وذبيحة
.. اي والنبي اصلاً لهسه ممصدگة اخاف اطلع أحلم
شذى.. الف مبروك حبيبتي ان شاء الله المباركة الثانية بيوم عرسكم
... امين يارب
ليال...امجد من سمع شسوة
.. يوووو طاير من الفرح گال لاتسوون عشا اجيب من برا بمناسبة هذا الخبر
زلال... مو تنسينا شيجيب تضمين حصتي
... اكيد النة والكم
.. اي خوش
ورة العشا اتصلت اكثر من مرة على مينا ماكو
هففف شجاها هالبنية صايرة هواي تغط
اركان... ناقصج خبال گاعدة تحاجين نفسج
.... كله بسبب الثولة مينا
.. هاا ليش شبيها
.... مدري ليش نبرة صوتة تغيرت وارتبك منظرة يجيب الشبهة
الشيطان گعد بصفي وگام يخطط وياي
... وين صفنتي شبيها مينا؟
... لا مابيها شو من خطوبتنا لليوم كلش متغيرة
قبل شوية دزتلي مسج كاتبة ( عندي وياج موضوع مهم ياريت من تسمعيني تفهميني وماتزعلين مني)
اركان وضعة صار اسوء يمكن حتى عرگ
.. اي وما عرفتي شنو الموضوع
... لا بعد دانتظرها
...تنفس قوي دخل اصابعة بين خصل شعرة ورجعة ليورة
.... من زمان ردت احجيلج ومتردد
.. عدلت گعدتي يعني توقعي صح اكو شي
احساسي مايكذب
اي اسمع كمل
.... قبل لا انطق حرف أريدج تعرفين الكلام الراح اگولة صار قبل خطوبتنا......
