رواية بيت الخبازه (كامله جميع الفصول) بقلم زهرة الرمان

 رواية بيت الخبازه الفصل الاول 1 بقلم زهرة الرمان

السلام عليكم ورحمه الله وبركاته...

#بيت_الخبازه .....#البارت١

بقلمي*زهره الرمان*

-تسمعين صوت لولا

نامي ماكو شي 

خايفه الزمي ايدي

-استبرق: لزمت أيديها وأعرف اكو صوت بس اريدها تغفى ايديها ثلج من الخوف وإني ايدي ترجف ... اكول اندس أمي بين إلي اخير نفسي شنو اسوي حسيت لمسات على فخذ رجلي طفرت مفزوعه بس ما صرخت اريد صوتي يطلع ماكو شنو حشره لو أيد لو شنو ضلمه بديت ادفر برجلي حيل والحركه برجلي مستمره وابقى ادفر لحد ما حسيت انفاس لوجهي قريبه وايد صارت على ضلوع صدري استنجد بيدي أريد اسحب أي احد من خواتي نايمات يمي ماكو وإني ادفر بلا صوت بس بداخلي احس اريد اصرخ وماكو أي صوت مني هي ثواني بس صارت دهر عليه شويه وحسيت هاي الادين انسحبت واجه صوت أبوي بس يحجي بهدوء مال عصبيه اعرف صوت أبوي 

صوت سحل مال رجلين ويترگع بالغراض مال واحد يريد يفرغ نفسه حسيت سحر تركت ايدي ووكفت عاطت ببجيه كعدت صار ضوه المطبخ بوجهي انفتح وامي تلف براسها بجرجف 

ع

اطت أمي اسم الله اسم الله 

شصاير ملا ملا شكو واجت لمتنه بيدها وتركض باتجاه المطبخ واحنه وراها 

أبوي كامش ابن خالتي رافد 

إلي عاش ببيتنه ايام اهله جانو مسافرين وبقى يمنه سنتين درس اعداديه لحد ما رجعو اهله بقى يجينه بس كلما يجي أبوي يكول لا اطلعن يمه كبرتن وجهه متروس دم وابوي يسأله 

مله حاچم:بشنوووو قصرت وياك فتحتلك بيتي واكلت من زادي وجيبك ما يوم فرغ 

ولا يوم حسستك أنت غريب ولا عبالك ما ادري جنت تبوگني واشوفك واسكت مو ضعف مثل ما تكول هذا متدين يخاف تتوقع المتدين شنو خواف لان يسامح ويعفو وينطي فرصه ثانيه كلت مي خالف يجوز محتاج يمون اتغاضى عن الفلوس 

بس توصل لبناتي هنا اموتك ذيج المره شكيت شك وكلت بعض الضن اثم وانتظرت كلت الواوي يرد للكاع لبيها اله لكمه ظايعه بس بناتي مو لكمه سهله 

وهسه حدد عقوبتك سمعت صوت زوجتي 

مله حاچم تعاال

شتردين يمره اخذي بناتج وروحن وسدي الباب 

اسمعني مله

مااا اسمع ابن اختج داس بيتي وتحارش ببناتي 

اسمعني وراها احكم بالتريده هسه أنت عصيي وماريدك تأخذ قرار بعدين يصير براسنه

يعني شتردين يمره 

يعني الله سترنه وما سوالهن شي وتكول اول ما دخل انت واعي وتباوع عليه 

تلاحكت المصيبه الحمد لله إذا شهرته بناتنه اليتأثرن 

أنت كسرت خشمه واصابعه وجفن عينه ينزف خله يولي وباجر نكول لاهله سطه وباك وخل يردونه لاتجيب هاي السالفه مالت التحرش هذا بعده مراهق وبناتنه صغار السمعه لاحوكه

تخافين على ابن اختج 

لا لا والله اخاف على بناتي يمله الناس تگلب السوالف حسب ما هي تريد وتزيد وتنقص وتالي تطلع سمعه على بنات مله حاچم 

اديه متروسات دم من بوكسيات بوجه تيشيرته مشكوك سحبته ومسحت دمه النكس وسحلته تطله منا رگعه وجهك ما اشوفها بحال شفتك موتك على ايدي تسمع لولا ؟؟

احجي تسمع لولا حرك رأسه ب اي 

دفترته من ياب المطبخ وطلع بقى أبوي واكف واحنه وره امي الي جانت وي أبوي بالغرفه ماعرف شنو كالت اله خلته يطرد رافد إلي جانت دونا عن اخوانه مستفز بشقاه من يجينه وجان يدخن بالمنور وينفخ الدخان بوجهنه ونكره إني الوحيده الجانت معاناتي من رافد جان يخنزر عليه يريد اجيبله ماي أو لفه اصعدها اله بالغرفه الفوك مسوينها مخزن يكعد يباوع عليه وبيدي الأكل ما يأخذه ويبقى يكول تعالي خلي الاكل هنا قريب عليه اول ما اوصل يمه يلزم ايدي او يلزم شعري اشرد ويبقى يتوعدلي

بهاي الليله احس براحه غريبه أن أبوي ضربه لأن قبل كانو خالاتي من ينجمعون أمي تنشغل ومن اريد اشتكيلها تكول يشاقى وياج مچانت تصدك لأن يعامل أمي كأن هو يحبها يصرف بشكل مختلف عن ما إني اشوفه

إني استبرق واصغر مني 

  تؤام مختلف صفا ومروه مايتشابهن 

أبوي هادئ جدا ومتدين يحب أمي 

چنا ببيت جدي عمام وعمات واحفاد بس اني عمري خمس سنوات وقسموا البيت بعد وفاه جدو اشترينا بيت بعيد عن عمامي او هما صارو كل وأحد بمنطقه 

بوقتها خالي الكبير كان ضابط بالجيش وعمده رتبه وعلاقات وقريب عمره لابوي لكانه هذا البيت 

نوعا ما قريب على خالتي تغريد 

زوجها راح بعثه دراسيه وهي لحكته وتركت رافد يمنه خامس علمي رادو يكمل اعداديه لكن فشل بالسادس ثلاث سنوات وهو ما ينجح وهو أصلا شخصيته خبث لكن من جوا ليجوه يحب جان يخرب بين اولاد الخالات من يجمعون 

حتى احنه البنات جان يخبث علينه بس يصير ملاك كدام أبوي وأمي 

لكن سمعت أبوي يكول لأمي 

رافد عيونه نگسه ولوتي انتبهي منه 

هي جانت تكله لأ فقير هذا 

بس يحب يشاقى ويضحك وكلما أبوي يعيد عليها تكله صوت عالي وگلب خالي خوفك من السكوتي 

بس بالحقيقه جان يخفي شخصيته بالضحك

بيومها ابوي ما نام ولا راح للجامع بأذن راح لصديفه يأذن بمكانه 

توضى وكعد كال نامو بناتي حبيباتي ويباوع علينه بعد ما اجاني ومسح وجهي وشعري 

سالني هاا بابا خفتي 

صارلج شي 

بس اهز برأسي بين خجلانه وبين خايفه مشاعر مختلطه لكن ارتياح أن أبوي خلصني من رافد 

كال نامي بابا وباجر سولفيلي عن كلشي 

جنا انام كلنا بالصاله مايقبل أبوي انام منفصلين عنهم يبقى يقرأ قرآن بفراشاتنه لحد ما نغفى لو اناشيد حلوه او قصائد 

ونردد وراه تبقى أمي تكول كافي خلي انام وأبوي يضحك رغم ذلك يكعد أمي للصلاه بصوت عالي حتى إذا كعدت وحده من عدنا يجي يشيلنه ويكول هله ببناتي يكول توضو وصلو من اسمعون صوتي هاي بالصغر فمن كبرنا تعودنا نفزو ننتظر أبوي يأذن

يومين قبل لا انام كعدني أبوي بالطارمه 

سألني عن رافد تلكا صوتي 

كال سولفيلي براحتج لأ تخافين إني ابوج صحيح بس صاحبج إذا شي بيوم شفتي كليلي اجيبه حتى لو ذيج النجمه وإذا احد كالج إني معجب بيج تعالي كليلي إني اشوفه عندي عيون رب العالمين خلاهن اليه أشوف بگلب اليشوفجن يحبجن لو يكرهجن أو يجذب عليجن 

حجيتله بعد ما حسيت أبوي حجه كلامه من گلبه

حجيتله تصرفات رافد رغم أمي ثاني يوم من الصبح بس طلع أبوي كالت لاتحجين أي شيء لأن هم سألتني وسولفتلها كولشي كالت الرجال يختلف عن المره مو كلشي ينكال اله عنده غيره فيتصرف تصرف يأذي نفسه وياذينه لاتحجين لابوج 

بس أبوي بسط الموضوع عليه وكوتله 

ما جاوب إلا بكلمه 

إني احميكم من سحب تراب من الكاع 

كال من هذا التراب إذا الهوا دفعه عليكم 

باسني كال انسي كل خوفج وإذا بعدج حاقده عليه اجيبه هنا واخليج أنتي تضربي لحد ما ترتاحين

لا بابا إني أصلا هدئ خوفي من أنت بسطته

اسبوع ماشفنا رافد ولا اجه ولا احد هم اجانه لكن يوم الاثنين صادف اتصلو على أمي عزموها اهلها على خطوبه بنت اخوها خالي من النوع يحب التباهي ويتفاخر ببيته وسيارته 

علاقته بأمي من يشوفها دوم يكوللها ما الله يهديج وتتركين هذا المعقد الفگر

تجاوبه خويه عندي ثلاث بنات منه والمله ما مقصر وياي ولليوم ما سمعت كلمه انچبي منه شلون اتبلئ عليه شلون تقبلها

وكاعده بگن دجاج وبناتج لبسهن مال اوادم بعدها طولها شبر محجبه وملفلفه واحس حتى أنتي صرتي معقده مثله تجين وجهج مصوفر لبسج ماعرف شنو

خويه شبيه وجهي مصوفر بنعمه إني واللبس ما اكول للمله إلا يشترينه

وانتقلت عدوى كلام خالي لاولاده وحتى وحده من اخوات أمي بحجه تعالي انمكيج هي اسمعها تكول خل اعدل شكلها ولبسها بس أمي ترفض المكياج جانت تخلي شويه كحل وشويه خفيف حمره على خدها وشفايفها بس هي نظيفه كلش ومرتبه بس خوالي غير

تجي ام الصالون للبيت ويحيرن باللبس 

وتبقى تجمع بينه يمها متريد نخلي مكياج مثل البنات الصفار من ينجمعن يصير عباره عن مهرجان الألوان بالمناسبات والمرايا حيله اليكدر يحصل سره كل خمسه ع مرايا يعدلن بوجهن اكثر من العروس 

أمي بعد مكالمه بيت خالي بقت حايره تروح ماتروح تكول لابوي ما تكوله 

اجه أبوي الضهر من شغله 

جان عنده محل مال فرفوري گدوره صواني خواشيك تحفيات 

بده بمحل صغير ووفقه الله

ينام شويه الضهر بعد ما يلعبنه ويركض ورا صفا ومروه بالبيت بعدين يكول منهي رمش عين ابوها تفرك رجليه نركض كلنا نفركه 

اجه على الغدا وما يقبل أمي تصب إلا هو يجي يوكلنه بيده اجت الطياره بحلك صفا ومروه انوب يوكل أمي بيده

امي أول ما خلص أبوي اكله وبعده يقرأ الفاتحه

مله خابرني ابو طه 

خير!

خطوبه بنته ويريدني اروح 

لحظه صمت بناتي تگابلن على الصينيه ولملمن الاكل ودنه للدجاج واغسلن المواعين بعد عيون ابوچن

خديجه ما امنعج من اهلج بس تعرفين راح يتجمعون وهذا رافد يجي بكل وكاحه عين 

إني شلون أأمن على بناتي وأنتي حتى أنتي ما أأمن عليج من هيج نگس

أخذ البنات لبيت امينه أختي لاولد ولا تلد 

وروحي أنتي

لأ مله اعوف بتاتي شلون 

زين اني ابقى بالبيت ما افتح العصر روحي ولاتباتين هي خطوبه

مو شلون 

شنو الشلون تريدين تباتين ابقى اليوم باجر امر عليج ولا يهمج ليله احملها بعيده عنج يلا راح تجي المدارس وصحيح صعبه طلعتج تونسي 

اجت أمي وصتني استبرق أنتي جبيره انتبهي على اخواتج باجر ارجع 

صعدنه كلنا بسياره عمو حامد ووصلنه أمي لبيت خالي ورجعنه ابوي بالطريق بقى يفرفر بينه لان صفا تتنوحس على أمي اشترالها نست امي تحب الاكل والحلويات والفواكه أبوي يضحك عليها يكول ماعدها معده عدها مكينه ثرم

رجعنا للبيت وبابا بيومها جاب النه اكل من برا بس هو طلع خضره وركي وتعشى 

ميحب أكل البرا

متعودين نفز على صوت أذان أبوي فزيت ماكو صوت الأذان باوعت بالساعه متعدي وقت الصلاه أبوي ماهوه لميت شعري وگمت كلت اصلي وصلت للمطبخ ياريت ما رحت شفت أبوي واكف مخلي ايده على رأسه ورجال ضخم بگاع المطبخ وصايره بركه دم جواه شافني اجه عليه أبوي خاف أشوف المتظر 

دفعني وكال روحي اخذي خواتج وادخلي للغرفه واقفليهه عليكم 

خواتي نايمات وإني ما انطاني گلبي اترك ابوي خايفه بس خوفي على أبوي ماعرف شنو اسوي بس الف سؤال اجه أبوي كتل هذا الرجال لو هذا حرامي لو شنو شويه وبده يكشف الوكت ابوي دخل ورجع للمطبخ يدخل يخابر ويسد التلفون ماعرف منو يحجي وياه

شويه سمعت صراخ مال رياجيل وعياط اطلع اطلع رجع أبوي بخوفه ركض علينه كمشنه بيده فوتنه للغرفه إني وصفا ومروه 

احجي وياه بابا منو هذا منو ذولي أبوي ساكت بس عيونه دمارتهن طاكه حمر 

وبدشداته دم 

شويه ودخلو رياجيل سحبو أبوي المختار وواحد جبير بالعمر معكل ووهواي يهدون يردون ياخذون أبوي والرجال الكبير يعيط اهدووو اصبرو 

إني فاتحه الباب لتسمع الهم 

وهو يكللهم خل يجي أخوي حامد أول يأخذ بناتي شويه وفات عمي حامد سحبنه نمشي وصفا تصيح بابا تعال بابا وهو يباوع علينه والرياجيل سحبوو من ايديه حيل صرخت بويه لحد يدفع ابوي بس وين إني صعدني عمي دك على الباب كال لابنه أخذ البنات وروح

*-زهره الرمان*

الفصل الثاني من هنا

بدل ماتدور وتبحث علي الروايات خليها علي تليفونك وحمل تطبيقنا

تعديل المقال