رواية ليه يا زمن الفصل الثامن والخمسون 58 بقلم نسرين بلعجيلى
بعد أسبوع المعلم طلع من المستشفى ، بس للأسف بقى مقعد ، وعنده مشاكل صحيه كثيره . صدمة موت سماح أثرت عليه .
قاعد في بيته ، لحد ما جت أخته فكريه و حسنين . فتحت ليهم الباب زهره. ..
زهره : أهلا وسهلا بيكم اتفضلوا .
فكريه : يزيد فضلك يا بنتي ، المعلم فين ؟
زهره : قاعد في البلكونه زي عادته ، لا عايز يتكلم ولا عايز ياكل ، حتى دكتور العلاج الطبيعي مش عايز يبتدي معاه .
حسنين : الضنا غالي يا بنتي ، و اللي حصل مش سهل .
دخلوا عنده ، كان في عالم تاني خالص .
فكريه : إزيك يا خويا ؟
المعلم بص ليها من غير مايتكلم..
حسنين : البقيه في حياتك يا خويا.
المعلم : في حياتك الباقيه .
حسنين : شد حيلك .
المعلم : الشده على الله . أعمل إيه ؟ أهو بقيت زي ما انت شايف .
زهره راحت تعمل ليهم حاجه يشربوها .
فكريه : يا خويا إنت مارحتش تعزي مراتك نوال ، حالتها صعبه ، بتنام بالدوا و تصحى بيه دي بقت قاعده مع رحمه في شقتها .
المعلم : أعمل لها إيه؟؟؟ هي السبب في كل حاجه ، كل ما اسأل عليها تقولي عند وحده صاحبتها ، كل اللي يهمها تفضي البيت . أهي البت راحت فطيس .
فكريه : كلنا عارفين إن نوال بتحبك حب مش عادي .
المعلم : أهو الحب ده جه على عيالها ، البنت ماتت . لو كانت واخده بالها منها مكانش حصل لها حاجة .
فكريه بصت لحسنين…
فكريه : وهي ليها يد في موت البت ؟ ما دا قدر ربنا . علي قال لنا إنه جالها مغص ، ودخلت تعمل عمليه ، ماتت .
المعلم : علي قال كده ؟؟؟
حسنين : أيوه ، بس أنا سمعت في الحاره ، إن البوليس جه أخدها في البوكس بسبب جريمه قتل .
هنا تدخلت زهره…
روايات نسرين بلعجيلي Nisrine Bellaajili
زهره : ما جوز صاحبتها اللي مات ، وهي أخذوها علشان تشهد ، لأن ليلة الجريمه كانت بايته عندها . سماح ما استحملتش اللي حصل و تعبت .
فكريه : يالهوي ياني! الحاره مالهاش غير السيره دي.
زهره : ما انت عارفه الحاره و كلامهم ، الواحد مش لازم يسمع بيقولوا إيه .
فكريه : ناوي تعمل إيه مع مراتاتك ؟ إنت عارف نانسي وراحت بيت أهلها ، و نوال وقاعده مع رحمه ، بنتك سميره بتقول إنها لازم تروح مصحه نفسيه .
المعلم : عايزاني أعملهم إيه ؟؟ أنا تعبان وعندي مشاكل كثيره . اللي عايزه تفضل على ذمتي ، أهلا وسهلا ، واللي مش عايزه معنديش مشكله .
فكريه بصت لزهره…
فكريه : و زهره ؟؟
المعلم بص على زهره..
المعلم : زهره بنت أصول ، لو عايزه تطلق ، ما عنديش مشكله .
زهره : إنت بتقول إيه؟؟ ماينفعش أسيبك في الحاله دي و الظروف دي . وبعدين أنا ماليش غيرك ، أروح فين ؟ إوعى تفكر كده .
حسنين : يااااه ! عملت إيه في دنيتك علشان ربنا يرزقك بزهره ؟ حتى لو جوازك منها كان غلط .
زهره : اللي حصل حصل ، و دا نصيب
فكريه : إعدل بينهم يا معلم .
المعلم بنرفزه…
المعلم : أعدل بينهم ازاي ؟ انت مش شايفه حالتي عامله ازاي ؟ وبعدين الشقه هنا بادخل من الجنينه ، هناك في الحاره مين يساعدني علشان أطلع لفوق؟ وبعدين إحنا في إيه ولا إيه ؟؟
بالله عليكي يا فكريه ، سيبيني في اللي أنا فيه . مصروفهم بقاله فتره بيروح لهم . وكريم ودخلته غصب عنه مصحه ، و باصرف عليه ، وبنات رحمه ولا واحده فيهم جت تعزيني في اختهم ، أو حتى يبصوا عليا تعبان ولا حالتي إيه ؟ ما كانش العشم فيهم كده ؟ لولا محمد جوز سميره كتر خيره واقف في المحلات ، لأن زهره قاعده معايا . ولا علي اللي من آخر مره زارني في المستشفى ما شفتش وشه . قبل ما تيجي تحاسبيني حاسبيهم هما . إيه اللي عملته غلط ؟ إني باأتجوز ؟ كله على سنة الله و رسوله . ولا فرح اللي بقت مستعره مني ، إسأليها آخر مره شافتني كانت امتي ، ده من شهور ماشفتش وشها .
Nisrine Bellaajili
زهره : إهدا يا معلم ، الزعل وحش علشانك . وبعدين أعذرهم ، موت أختهم مش سهل .
حسنين : أيوه يا سعد ، البنات كمان مش كويسين ، ماحدش كويس. وبعدين إنت عمرك ماكنت قريب من عيالك علشان يقربوا منك ، ده كلام الحق أتحاسب عليه . موت سماح كلكم ليكم يد فيه . ربنا يرحمها ويغفر لها .
فكريه : خلاص يا خويا إهدا وشك بقى أحمر كده ليه ؟
زهره : لازم أقيس الضغط بتاعك .
راحت زهره وجابت قياس الضغط ، وابتدت تشوف ضغطه .
زهره : ياااااه ! الضغط عالي أوي ، لازم أكلم الدكتور .
حسنين : قومي يا فكريه نروح .
في بيت جمالات….
جمالات : آه ياني يا دماغي ! قولولي بنت الكلب دي راحت فين ؟؟
بطه : ياما إهدي ، كده مش كويس علشانك .
جمالات : هو انت مش شايفه الوكسه اللي أنا فيها ؟ الكل بيسأل عليها . هفضل لحد إمتى أكدب على الناس إنها تعبانه ولسه في المستشفى ؟
عواطف : قوليلي يا ما ، عملتي لها إيه خليتيها تهرب ؟ وحتى عماد مش عايز يقابلك في المستشفى .
جمالات : قومي يا بت من قدامي . هكون عملت إيه يعني ؟
بطه : ياما ، ما احنا عارفين البير و غطاه . إحنا فكرنا لما تحمل و تولد هتفرحي ، بس حصل العكس .
جمالات : أنا اللي خليتها تحمل ، ما الدكتور قال ماينفعش ، وفضل يقول لها كلام ، بس أنا ضغطت عليها لحد ما حملت . بس ماكنتش عارفه إن بنت الهرمه هتسيطر على الواد وتمشيه على العجين مايلخبطهوش. لا وتنزل معاه المحلات ، وبقت هي الكل في الكل ، و اللي شغالين هناك بقوا يسمعوا كلامها .
عواطف : و الصراحه المحلات كبرت وبقت تدخل إيرادات كثيره ، من ساعتها الفلوس اللي بتجينا زادت .
روايات Nisrine Bellaajili
جمالات : آه ، قولوا كده ، بقت حبيبتكم علشان الفلوس اللي بتاخذوها . وقلت لكم هاتوا فلوسكم أخبيها لكم ، أو اشتري ليكم بيها دهب ، بس أقول إيه ، كل واحده تاخذ في عبها و تدي لجوزها .
بطه : إيه الكلام ده ياما ؟ ده حقنا ، وكل واحده عندها مسؤليات ومصاريف ، ورجلاتنا مش طماعين . وقلتلك أنا باشتري ذهب ، و داخله جمعيه ، وباحوش في البنك. الزمن غدار ، وانا ماليش حد . أبويا والله يرحمه ، وعماد ربنا يشفيه ، لا بيحل ولا بيربط . الحمد لله إن وداد قبلت بيه .
جمالات : نعم ياختي؟ قبلت بيه؟؟؟؟ وداد اللي شكلها عامل إزاي ؟، هو اللي قبل بيها ، قال قبلت بيه .
عواطف : يعني إنت زعلانه لأن عماد بقى يتعالج ومبسوط بحياته ، و مراته كويسه ، وجابت له ولد ؟؟ يعني كلام جوزي صح ؟ إنت كنت مسيطره على عماد ، وعلى الفلوس ، وعلينا إحنا كمان ؟
جمالات : الله الله! بقى جوزك بيقول عليا كدة ؟ إيه رأيك بقى ، من النهارده ورايح مافيش مليم هتشوفوه . إبقي خلي جوزك ينفعك . يلا قومي انت وهي من بيتي . جاتكم القرف ، تربيه وسخه ، إتفو عليكم .
فكريه و حسنين رجعوا عند رحمه…
رحمه : أخباره إيه ؟
فكريه : تعبان أوي ياختي ، حالته تصعب على الكافر .
رحمه : ربنا يشفيه ، الصدمه شديده عليه .
فكريه : بس البت زهره واخذا بالها منه . يا ختي فكرت إنها ممكن تسيبه ، دا بقى حمل عليها ومعندهاش ممرضه ، قالتلي مش عايز .
رحمه : بنت أصول .
فكريه : بس هو زعلان من البنات ، ولا واحده راحت تعزيه ولا تسأل عليه .
رحمه : منه العوض ، وعليه العوض . مش عارفه أنا قصرت في إيه في تربيتهم ؟ علي من ساعة العزا لا حس ولا خبر . الصبر من عندك يارب .
بعد كذا شهر……
حالة المعلم تدهورت جدا جدا ، ما بقاش يقدر يقعد حتى على الكرسي المتحرك ، على طول نايم على السرير .
وداد سكنت قدام شقة زهره مع امها . وبعد التوكيل ، بدأت تنزل المحلات مع عواطف و بطه ، بيشتغلوا معاها علشان يساعدوها ، وعرفوا إن عماد كتب ليها كل حاجه ، وعرفوا حقيقة أمهم . طارق عمل معاهم إجتماع ، وعرفهم حقهم ، وأمهم عملت إيه معاهم ومع عماد .
عماد بقى يطلع كذا مره في الأسبوع ، ومتابع العلاج بتاعه .
أما جمالات ، ماقدرتش تستحمل جفا بناتها معاها وتعبت ، وبتتوعد لهم بس تقوم ، وترجع حقها . إزاي كانت بتملك كل حاجه ، وفجأه بقت على الحديده ؟
كريم مابقاش حد متابع معاه ، و طلع من المصحه ، بس بقى شغال في المحل مع محمد .
علي رجع من لبنان بعد ماخلص اللي وراه ، و هايدي بتحاول تعمل أي حاجه علشان يرجع لها . وبقت تضربه في شغله .
وائل بعد ما كلم طارق ، رجع أمريكا و طلق نرمين اللي اتصدمت ، إزاي وائل باعها بالسهوله دي ؟ وعرفت إنها حامل ، بس خبت على أمه و عليه ، وحاولت تسقط كذا مره ، بس ربنا كان ليه رأي ثاني . آخر مره الدكتور حذرها إنها ممكن تموت .
مراد فرض على فرح إنهم يعملوا حفله صغيره ، وتلبس الفستان وتروح شقته ، بس هي رفضت وأصرت تعمل فرح . بس رحمه وقفت لها بالمرصاد ، وقالت لها الفرح يتعمل بعد سنه من وفاه سماح ، لأن الناس هتاكل وشهم .
كل الأحداث دي حصلت في شهور من المعانات لكل أبطالنا. وبطلتنا زهره وقفت جنب المعلم في كل حاجه ، بس بييجي عليها اوقات بتتعب ، لأن المعلم بقى عصبي جدا ، وصعب التعامل معاه . أول ماحست إنه نام راحت شقة وداد ، فتحت لها أمها اللي علاقتهم كانت متوتره . زهره مش مطمنه لها ، وخاصة لما تسافر وتقولها أصلي باروح أزور أبوكي . وعرفت إنها سحبت مبلغ من وداد العبيطة ، واقترحت عليها إن أبوها ينزل يمسك معاها المحلات ، بس زهره رفضت بشده .
Nisrine Bellaajili
طارق عامل عيد ميلاد بنته ، وعزم زهره وعيلتها .
فاطمه فتحت الباب..
فاطمه : أهلا يا بنتي ، أنا جاهزه بس وداد لسه بترضع توفيق .
زهره : إيه اللي انت لابساه ده ؟ كل حاجه بتبرق كده ليه ، إنت رايحه عيد ميلاد مش فرح .
فاطمه : حاضر هاروح أشوف عبايه ثانيه .
زهره دخلت عند وداد..
زهره : ياختي على جمالوووو!! تعالا يا حبيب خالتو .
وداد : شيليه شويه أخش بسرعه آخد دوش والبس هدومي .
زهره : يلاه بسرعه ، إحنا إتاخرنا .
في بيت طارق كانت نرمين و شويكار موجودين . طارق راح يكلم نرمين اللي كانت مبسوطه أوي .
نرمين : كل سنه و وسيلا طيبه .
طارق : وانت طيبه . عايز اتكلم معاكي .
نرمين : إتفضل. هو وائل كلمك ؟؟
طارق : لأ. بصي أنا حاسس بالذنب ، وائل كلمني وقابلته ، وقلت ليه الحقيقه اللي إنت كدبتي فيها ، إننا كنا مع بعض واتخانقنا واتجوزت مسك . مش فاهم ليه عملتي كده؟ هو سألني وانا جاوبته بصراحه ، ماكنتش عارف إنه هيطلقك . وائل كان بيحبك وكان شريكي ، بس إنت ضيعتي راجل كويس . لا، وأمك قالت إنك مخبيه عليه إنك حامل ، ده حرام ، من حقه يعرف .
نرمين : إنت اللي خربت بيتي ، لما هو قالك كده ؟ قوله آه ، كان لازم ترضي ضميرك ، وتقوله على الحقيقه؟ وبعدين أنا ماكدبتش، أنا كنت بحبك قبل مسك .
طارق : عمري ماشفتك غير بنت خالتي بس ، أما مسك ، كانت حاجه تانيه ، بنت خالتي وحبيبتي .
نرمين : على فكره أنا اللي بنت خالتك ، مسك…
رن الجرس..
طارق قام فتح الباب .
طارق: أهلا أهلا ، نورتونا .
زهره : شكرا . أومال الحلوه اللي نفسي أتعرف عليها فين ؟
طارق : إتفضلوا ، يا ماما تعالي زهره جت .
نرمين أول ماسمعت إسمها اتجننت
راحت تشوفها .
نرمين : مش معقول!!!
دخلوا جوه ، جت حنان رحبت بيهم .
شويكار فضلت متنحه في زهره كثير .
زهره حست بإحراج . هنا دخلت وداد و فاطمه .
فاطمه : يا ساتر ، السلم هلكني ، يالهوي ياني ركبي سابت .
طارق : معلش ، الأسانسير عطلان .
شويكار حست بدوخه… أما فاطمه ، فضلت مبرقه لشويكار…
لحظات صمت رهيبه……
بدل ماتدور وتبحث علي الروايات خليها علي تليفونك وحمل تطبيقنا
