رواية ليه يا زمن الفصل التاسع والاربعون 49 بقلم نسرين بلعجيلى
علي صحي من صدمته، واتصل بالإسعاف اللي جت اخذت المعلم، و زهره غيرت و راحت معاه. هايدي طبعا مش هتسيب علي يروح لوحده، كانت بتبص على زهره و مستغربه حالتها.
زهره كانت حزينه وخايفه جدا. علي بيبص عليها طول الوقت.
هايدي : هو انت مش مكسوف من نفسك ؟
علي : في إيه؟؟
هايدي : إنت الوقت كله مركز معاها، واحده وزعلانه على جوزها، انت بتبص عليها ليه؟ ولا حنيت لحبيبة القلب ؟ شوف مقطعه نفسها عياط عليه إزاي؟ مش فاهمه دي كانت بتحبك؟ أكيد مش معقول.
علي : شايفه إن ده وقت الكلام في الموضوع؟؟
هايدي : انا تعبت وعايزه اروح.
علي : ماتروحي مين ماسكك.
هايدي : لا والله!! أروح وأسيبك معاها؟ والله صعبان عليا.
علي : ممكن تسكتي شويه؟
زهره جت عليهم..
زهره : ماتعمل حاجه، روح شوف هما اتاخروا جوه ليه ؟؟
هايدي : هو انت فاكره اننا شغالين عندك، علشان تتكلمي مع اسيادك كده؟؟
زهره : أسيادي؟ لا والله ماكنتش اعرف إن الأسياد بالواقحه دي. ما تلم مراتك يا علي ولا … الكلام خساره معاكم. إوعوا من وشي.
ومشيت من ادامهم..
علي : إنت بجد مش طبيعيه، إيه أسيادك دي؟
هايدي : هي مش كانت امها شغاله عندكم؟؟
علي : قدامي على الأوتيل.
روايات نسرين بلعجيلي Nisrine Bellaajili
هايدي : مش هروح مكان واسيبك مع العقربه دي، فاهم؟
زهره راحت تسأل بس قالوا لها تستنى.
جمالات طلعت فوق عند وداد وفضلت ترن الجرس..
وداد اتخضت…
وداد : مين؟؟؟
جمالات : إفتحي يا بت.
وداد فتحت.
وداد: فيه حاجه؟
جملات : ماجاليش نوم، قلت اطلع أرغي معاكي شويه.
وداد : هو انت عارفه الساعه كام؟
جمالات : أوف بقى، ما توعي من الباب كده خليني أخش شقة ابني.
وداد فضلت مصدومه.
جمالات : هتفضلي واقفه كده؟ تعالي اقعدي.
وداد : أهي قاعده، أنا كنت نايمه على فكره.
جمالات : ما انت طول اليوم نايمه، إيه الجديد؟
وداد : معلش الحمل تاعبني.
جمالات : ربنا يقومك بالسلامه. قوليلي يابت، ولد ولا بت ؟؟
وداد : ما انا قلتلك مش عارفه، الدكتور قالي إنه مش باين.
جملات : عليا الكلام ده؟ ولا اختك قالتلك ماتقوليش؟
وداد : و اختي تقولي ليه؟ انا بجد مش عارفه.
جمالات : طيب، أنا هاجبلك الدايه صاحبتي تكشف عليكي، وهي تقول لنا ولا ولا بت ؟
وداد وقفت.
Nisrine Bellaajili
وداد : إنت بتقولي إيه ؟؟ إذا كان الدكتور و ماعرفش، و عايزه الدايه تعرف؟ وبعدين حبكت دلوقتي؟ ما هي كلها كام يوم و اولد. أنا مش مرتحالك، ومش عارفه إنت بتفكري في إيه؟ من يوم ما اتهمتي إبنك بالسرقه، وانا مابقتش فاهمه لك حاجه. مره أشوفك بتحبيه و تفضليه على بناتك، مره أشوف إنك كنت عاوزاه يفضل على حاله، ومره بشوف إنك مش مبسوطه إنك شايفاه سعيد معايا ولا في الشغل ؟تنكري إنه من يوم ما مسك المحلات الإيرادات زادت؟؟
جمالات : مالك يابت؟ هبيتي فيا كده زي الثور الهايج؟؟؟
وداد : قومي يا حماتي انزلي شقتك ربنا يهديكي.
جمالات : وانزل ليه؟ قومي يلاه نخش نام. وراحت.
وداد : لا لا دي شكلها ناويه لي على حاجه.
ثاني يوم…
وائل راح عند نرمين.
شويكار : أهلا وسهلا يابني.
وائل : إزيك يا حماتي؟
شويكار : الحمدلله يابني، إتفضل.
وائل : نرمين موجوده؟؟
شويكار : أيوه يابني، أدخل لها الأوضه.
وائل : بعد إذنك.
شويكار : يارب يهديها.
وائل خبط الباب ودخل..
نرمين : يا ماما عايزه انام شويه.
وائل : صباح الخير، الساعه بقت 12 الظهر.
نرمين : وائل !!!
وائل : إنت كويسه ؟ إتصلت كثيير.
Nisrine Bellaajili
نرمين : مصدعه معلش.
وائل : طيب، صحصحي شويه و قومي خذي شاور، علشان نروح بيتنا.
نرمين : وائل، أنا عايزه اقعد مع ماما شويه. إحنا سنه مع بعض، بس ماما وحشتني، وانت كمان خليك مع والدتك.
وائل : الأصول بتقول ان الست تفضل مع جوزها.
نرمين : أرجوك يا وائل.
وائل : بتحبيه؟
نرمين اتخضت..
نرمين : هو مين؟؟
وائل : طارق !
نرمين : طارق!!!
وائل : أيوه. إوعى تفكري إني ما اخذتش بالي من نظراتك ليه.
نرمين : إنت عارف بتقول إيه؟ طارق إبن خالتي، إتربينا مع بعض، وكمان كان جوز اختي مسك الله يرحمها.
وائل : و مش هو حب حياتك؟
نرمين : إنت مين قالك الكلام ده؟؟
وائل : ماحدش قالي، أنا راجل بحس. من ساعة ما اتجوزتك، عمري ما شفت اللمعه في عنيكي زي ما شفتها في المطار لما جه يستقبلنا. ولا لما كنا بناكل، عينيك كانت عليه طول القعده.
نرمين : مش هاسمح لك تتكلم معايا كده و تتهمني.
وائل : أنا مش باتهمك، أنا متأكد من كلامي.
نرمين : يعني إيه متأكد؟
وائل : شكلك مصدعه، لما تبقي كويسه إبقي كلميني، سلام.
وخرج
نرمين كانت مصدومه..
جت شويكار.
شويكار : هو جوزك مشي ؟
نرمين : إلحقيني يا ماما.
شويكار : في إيه؟
نرمين : وائل قالي إني بحب طارق.
نسرين بلعجيلي
شويكار : إنت بتقولي إيه؟؟
نرمين : مش عارفه عرف منين. قال إيه، شاف اللمعه في عينيا، و إني كنت ببص ليه واحنا بنتغدا. لا أكيد حد قاله.
شويكار : يا فضيحتك يا شويكار. ما انا قلتلك الكل لاحظ، كنت خايفه إنه يشك. إيه اللي هيحصل دلوقتي؟
نرمين : مش عارفه يا ماما.
شويكار : يا مصيبتي السودا.
وطلعت بره
نرمين أخذت التليفون واتصلت..
المجهول : حمدالله على السلامه.
نرمين : الله يسلمك.
المجهول : إيه اللي جابك؟؟
نرمين : هو انتم ماكنتوش عايزيني أرجع ولا إيه؟؟
المجهول : مطوله كثير؟
نرمين : بقولك، أنا متصله علشان تساعدني.
المجهول : هببتي إيه ثاني؟
نرمين : جوزي عرف إني بحب طارق.
المجهول : إنت لسه بتحبيه؟؟
نرمين : بقولك عرف ومش عارفه مين قاله.
المجهول : و مين قالك إنه حد قاله؟ جوزك طلع من عندكم على بيت أمه، لا راح ولا جا. يبقى إنت فضحتي نفسك في المطار. مش طارق هو اللي جابكم؟؟
نرمين : هو إنتم بتراقبونا ؟؟
المجهول : طبعا، هو انت فاكره إيه؟
نرمين : بس ليه؟ ما انا عملت اللي انتم عاوزينه.
المجهول : قلتلك زمان إنت بقيتي كارت محروق. مش عارف ليه نزلتي مصر؟ أمك وحشتك تروح عندك واحنا نساعدها، بس إنت دلوقتي فتحتي عليكي نار جهنم.
نرمين : ما هو عايز ينزل مصر و وراه كذا حاجه، أعمل إيه؟
المجهول : على فكره، جوزك راجل طيب وشكله بيحبك، بس انت مالكيش في الطيب نصيب. إنت بتحبي اللي هايودي رقبتك لحبل المشنقه.
نرمين : فال الله ولا فالك.
المجهول : بقولك هدي اللعب، و حاولي تشيلي الكلام ده من دماغ جوزك، وياريت تخلفي ليك حتة عيل ينسيكي طارق. نرمين، إعقلي و بلاش جنان، لأن أي غلطه فيها حياتك.
نرمين : حاضر.
زهره لسه قاعده، راح عندها علي.
علي : ماكنتش اعرف إنه صعبان عليكي كده ؟
زهرة : صعبان عليا؟!! ده جوزي على فكره، و أبوك إوعي تنسى ده.
علي : بتحبيه ؟!!!
زهره : هو انت مجنون؟ ده سؤال يتسأل؟ و بعدين في حاجه أكبر من الحب، لأن الحب مش دايما كل حاجه. في حاجه إسمها عشره، جواز، ارتباط. الراجل اللي جوه ده آه اتعدا عليا، اغتصبني، إتجوزني بالحيله وضحك عليا، بس لما تقبلت الواقع، عشت معاه على الحلوه و المره،
و عرفت إنه غصب عنه، و مبسوطه معاه لو ده يهمك؟ وكمان حاجه حطها في دماغك، إنا طلعتك من حياتي من يوم ما سلمت نفسي لأبوك برضايا، لأنه ده حقه عليا.
علي : طلعتيني من حياتك بالسهوله دي؟؟
زهرة : زي ما انت طلعتني بسهوله. هو مكانش سهل، بس قدرت. عارف ليه؟ لأني عرفت إن ربنا حماني منك لأنك ماكنتش خير ليا، لو كنت عايز تتجوزني كنت اتجوزتني. ربنا إداني علامات كثيره، بس كنت هبله مافهمتش. علي، إبعد عني وبلاش تفضل تبص عليا، أنا مرات أبوك.
هايدي : سامع، بتقولك طلعتك من حياتها، يا ريتك إنت كمان تطلعها من حياتك.
زهرة : والله دي البركه فيكي، خليه ينسى نفسه ويبعد عني. و طول ما أنا واقفه هنا ماتكونش موجود. أنا هنا في المستشفى و مش محتاجه مساعدتك.
هايدي : شايف، قلتلك باعتك من زمان، ومش بعيد كانت متفقه مع أبوك ولا حبتك.
زهره : تصدقي، عندك حق. وحده زيك إيه اللي عرفها في الحب. وحده زيك، اللي هي عايزاه بتشتريه بفلوسها، وانت اشتريتي علي. يبقى مبروك عليكي، و سيبي الحب في حاله بلاش تتكلمي عليه. و لو سمحتوا، إمشوا من هنا.
علي : أنا راجل ماحدش يقدر يشتريني، فاهمه ولا لأ؟ كنت غلطان إني حبيتك.
زهرة : والله صعبان عليا الحب اللي بتتبلوا عليه. حبتني إمتي؟؟ هو إنت عارف إيه معنى الحب الأول؟ الحب تضحيه، وانت عمرك ماضحيت، انا اللي كنت بضحي. الحب إنك تكون فخور بلي بتحبها، وانت عمرك ماكنت فخور بيا، لأنك خلتني في الظلمه سنين.
روح يا علي، أنا مش مسامحاك على اللعب بالمشاعر اللي عملته معايا. كنت صغيره و مش فاهمه حاجه، لعبت بعقلي. وحسبي الله ونعم الوكيل في أي راجل بيضحك على بنت حبته من قلبها.
نسرين بلعجيلي
هنا طلع الدكتور..
الدكتور : إنت مدام زهرة؟
زهره : أيوه.
الدكتور : تعالي معايا المكتب.
علي : وانا إبنه.
الدكتور : أنا عايز مدام زهره لوحدها، وانت ممكن تدخل تطمن عليه لما ينقلوه غرفته.
زهره راحت معاه.
الدكتور : إتفضلي يا مدام.
زهره : طمني يا دكتور.
الدكتور : بعد الفحوصات و الكشف، جوز حضرتك كان واخذ منشط جنسي، وشكل المنشط ده عمل ليه مشاكل صحيه، لأن القلب عنده فيه مشكله، و الضغط نازل. حاليا هيفضل كذا يوم هنا.
زهره : حضرتك جوزي مش بياخذ منشطات.
الدكتور : يا مدام، التحاليل اللي بتقول.
زهره : بص حضرتك، جوزي الفتره دي تعبان، وكان عند دكتور خصوبه، و هو إداله أدويه وقاله إنه في بداية عجز جنسي. يمكن هي دي المنشطات؟
الدكتور : ودا بيأكد كلامي. لو معاك الأدويه جيبيها. حاليا جوزك مش لازم يعمل أي مجهود خالص، يعني ممنوع أي علاقه جنسيه لحد مانشوف، وشكله كان بياخذ حاجه. و كمان التحاليل بتأكد إن فيه ماده في جسمه، لسه ما حددناش إيه هي. حاليا هو محتاج راحه. اللي هو فيه ممكن يسبب ليه جلطه او شلل.
زهره : مادة إيه؟ جوزي عمره ما شرب أي دوا. وأصلا الدكتور كان طلب منه التحاليل، وجينا هنا علشان نسفيته ترتاح.
الدكتور : كويس، هو فعلا محتاج راحه. وجيبي المره الجايه الأدوية بتاعته.
زهرة: طيب، ممكن الموضوع ده يفضل سر؟ مش لازم تقول الكلام ده قدام إبنه.
Nisrine Bellaajili
الدكتور : أكيد. وأنا متأكد من كلامي إنه أخذ منشط جنسي. مدام، إنت صغيره، و هو في السن ده ممكن إتحرج قدامك. آسف، هل حاول وبعدها حصل اللي حصل؟
زهره : لأ حضرتك، أنا عارفه حالته. أنا كنت نايمه و هو كمان، وبعد كده صحاني لإنه مش قادر ياخذ نفسه. أخذته الحمام، رجع كثير. وبعد كده وقع مني في الحمام.
الدكتور : خير إن شاء الله. هاتصل أشوف نقلوه غرفته ولا لأ.
علي فضل مستني لحد ما الممرضه سمحتله إنه يدخل. وكانت هايدي معاه.
المعلم أول ماشاف علي…
المعلم : زهره فين؟
علي وهو مضايق.
علي : مع الدكتور.
المعلم : تعالى يا بني، عايزك لوحدك
علي بص على هايدي.
علي : إستني بره.
هايدي طلعت..
علي : زهره عملت فيك إيه وصلك الحاله دي؟
المعلم : أختك اللي عملت مش زهره.
الحق أختك.
علي : أختي مين؟؟
المعلم : نوال كلمتني بتقول إن البوليس أخذ سماح، بيقولوا قتلت حد. إلحق الفضيحه يابني، أنا مابقتش قادر استحمل. إخواتك أمانه في رقبتك. روح ليها شوف مالها، البت ضاعت. ياخوفي لا تكون فرطت في نفسها.
علي : كله منك ومن نوال، كريم و سماح ضاعوا.
هنا دخلت زهره..
المعلم أول ماشفها، كإنه شاف الحضن الحنين.
المعلم : إلحقيني يا زهره، البت سماح ضاعت وقتلت واحد.
زهره قربت منه ومسكت إيده.
زهرة : اهدا، إنت مش كويس. علشان هو دا اللي وصلك للحاله دي. ماصحتنيش ليه قبل ماتتعب؟ يا ريتني ما قلتلك اتصل بنوال، لأنها كانت بتتصل كثير.
المعلم : الدكتور قالك إيه؟
زهرة : كله خير، إنت بس ارتاح وسيب علي يتصرف. وبصت على علي، هو انت لسه واقف؟ أختك متهمه في جريمه قتل يا محامي يا شاطر. وكلم الناس الكبار اللي مشغلينك يوقفوا الموضوع قبل ما تبقى فضيحه ليك قدام الهانم مراتك اللي شايفه نفسها علينا. شايف كما تدين تدان.
زهره بصت للمعلم..
زهرة : معلش يا سعد، بس ده كلام حقيقي، ذنب سماح عليكم. يلاه انت بسرعه قبل ماتتحول للنيابه. ولو مش عايز إسمك يتجاب، أنا ممكن اتصل بطارق يساعدني.
علي : هي حصلت تتصلي بطارق ؟؟
زهره : أومال عايزني اعمل إيه علشان ألحق بنت جوزي؟ الراجل اللي وقف جنبي وساعدني. ياخسارة ياعلي، عمرك ما قربت من أبوك،طول عمرك اناني، بتفكر بس في نفسك.
علي : إنت ازاي كده؟ إنت بقيتي وحده ثانيه. ليه بتعملي فيا كده؟
زهره : لأنك تستاهل ده.
بدل ماتدور وتبحث علي الروايات خليها علي تليفونك وحمل تطبيقنا
