رواية ليه يا زمن الفصل الثالث والاربعون 43 بقلم نسرين بلعجيلى
بعد شهر من كل اللي حصل…
علاقه فرح و مراد متوتره جدا جدا، بعد آخر لقاء بينهم ماتقابلوش تاني،
لأن مراد مشغول بالشغل الجديد، وكم ملفات و قضايا من طرف سالم.
المكتب اشتغل كويس جدا، بقا عندهم محامي تحت التمرين
و سكرتيره، في وقت قصير جدا، بس دا كله بواسطه سالم إلي كان ليه نفوذه و سلطته.
مراد مش قادر ينسى اللي عملته فرح، و طلب يقابلها بس هي رفضت
وهو أخذ على خاطره.
عماد ووداد علاقتهم كويسه، لان عماد قطع علاقته مع أمه ورجع محل الخضار، و بتنزل وداد معاه على أساس هي معاها الدوا لو حصل ليه حاجه، وكمان علشان ماحدش يضحك عليه في المحل. وهي عجبها الشغل معاه، خاصة لما بقوا يدخلوا فلوس، ودي كلها تعليمات زهره ليها.
جمالات هتتجن من كل اللي بيحصل، وشايفه إن وداد هي السبب إن ابنها قلب عليها.
رحمه إبتدت تتحسن، خاصه لما شافت علي رجع، وبيشتغل وبيضحك و قرر يتجوز. وجاب ليها ممرضه تقعد معاها، و دكتورة علاج طبيعي بتيجي لها كل يوم.
رحمه عارفه إن ابنها تعبان نفسيا وبيضحك بس علشانها، و بيحاول يكلمها كل ليله قبل ما تنام.
محمد بقى شغال في محلات المعلم سعد جنب شغله. ودا من زمان كان بيتمناه. وكمان زهره بتنزل مع المعلم.
سميره مبسوطه إن أخوها خطب وحده حلوه و بنت ناس، مفكره إن كده هينسى زهره.
زهره لسه عند موقفها من المعلم، بس علاقتهم كويسه.
المعلم بيروح يوم عند نوال و يوم عند نانسي اللي رجعت بيتها،
و بيروح عند زهره.
سماح راحت في سكة اللي يمشي مايرجعش. سيف مسك عليها فيديوهات، و بقت تنزل عند الضيوف وترقص. و خلاص ماعدش عندها حاجه تبكي عليها.
كريم رجع البيت عند نوال و أقنعته يشتغل مع المعلم، وفعلا نزل،
بس للأسف بقى مدمن بودره.
شويكار ارتاحت لما نرمين سافرت.
طارق رجع عادي لشغله. حاول يكلم زهره بس هي قالت ليه انها رضيت بالواقع، وإن المعلم بيعاملها كويس.
Nisrine Bellaajili
النهارده فرح علي..
حجز قاعه كبيره وعزم ناس كبيره من بينهم سالم.
في شقه رحمه…
سميره مش عاجبها أي حاجه. إزاي علي جاب ليهم فساتين و كارت الدعوه؟
سميره: بقولك يا فرح، هو أخوكي مش راضي بينا ؟
فرح : سميره لازم تعرفي ان عروسة أخوكي مش من مستوانا، دي هاي كلاس، بيئه تانيه، لا اتربت في حاره ولا أكلت فول و طعميه. سميره أنا شايفاكي فرحانه بيها، هو إنت مش شايفه أخوكي؟
إنت عارفه إنه جاب ليها فيلا بالشيء الفلاني؟ سألتي نفسك جاب الفلوس دي منين؟؟
سميره : هتقولي نفس كلام محمد. ماهو قال إن أبوها اللي جاب ليها الفيلا.
فرح : علي بيكذب. في حاجه مش تمام. أخوكي من ساعة ما رجع و هو متغير.
سميره : يا فرح، عادي يتغير. اللي حصل ليه مش سهل، والبنت شارياه. و ماتنسيش إن المكتب شغال، و قال إنه قبض حلو في القضيه اللي اشتغل فيها في دبي.
فرح : هو انت مجنونه؟ هيقبض كام علشان يشتري فيلا و يعمل الفرح ده؟؟ هو انت عارفه الفرح في أي فندق يتكلف كام ؟؟
سميره : بس الفستان اللي جابه حلو أوي.
فرح : جاب لينا الفساتين، و بعت ميكاب آرتست علشان نشرفه.
سيبك من كل ده، مراد بعت لي رساله إنه هو اللي هيوصلني الفرح مع أهله.
سميره : الحمدلله، والله كنت خايفه جدا.
فرح : ليه؟
سميره : معلش، بعد آخر مشكله بينكم لا خرجتوا ولا جالك هنا، آه بيكلمك، بس كله بسرعه مش طايقين بعض. يا فرح دي أحسن مرحله بين أي اثنين.
فرح : انا بحبه، بس هو اتغير معايا، بقى يسأل عليا بس لو محتاجه حاجه أو عاوزه فلوس. حتى مبقاش يوصلني الشغل، بيطلب ليا أوبر.
في حاجه اتكسرت بينا.
نسرين بلعجيلي
سميره : بس ليه محاولتيش تتكلمي معاه ؟
فرح : بصي، هو ماحاولش يتكلم ولا عاتبني ولا أي حاجه، فحسيت إنه مش مهتم، مش عارفه، مراد اتغير معايا قوى .
سميره : حاولي النهاردة تكلميه و تصالحيه .
فرح : أنا شايله الهم إزاي أقابل أهله بعد اللي حصل آخر مره.
حتى أمه حسيتها زعلانه، بحاول اكلمها عادي. أما أبوه، مافيش تواصل بينا، و حتى أخته كذا مره كتبت ليها بس ردها عليا ناشف.
سميره : شكلهم قرشين ملحتك، وانت لا ليكي في الدلع ولا في الكلام الحلو.
فرح : أنا مش طايقه نفسي، وعلشان كده من الأحسن نطلق.
سميره : يا مصيبتي السوده!! طلاق إيه؟ بعد كل اللي حصل علشان تتجوزوا والمشاكل، جايه دلوقتي تقولي نطلق.
فرح : قوليلي بقى أهله مش طايقيني، أعمل إيه؟ وهو اتغير،
عايزاني أصبر؟ ما الجواب باين من عنوانه.
في شقة نوال…
نوال دخلت عند سماح.
نوال : قومي يابت.
سماح : خير في إيه؟؟
نوال : مش النهارده فرح أخوكي علي؟
سماح : إزاي؟ إمبارح كنت عندهم في البيت محدش قالي.
نوال : ماهو معزمناش، دا أبوكي هينجلط منه.
سماح : علي بيستعر مننا ؟
نوال : أومال إنت فاكره إيه؟ دا اتجوز بنت المحامي الكبير. وسمعت إن أبوها جابلها فيلا، والفرح ياستي في قاعه كبيره،و فيه مطربين كبار،
وكل ده معزمناش.
سماح : معزمناش كلنا يعني، حتي سميره و فرح مش هيروحوا؟
نوال : إيش عرفني أنا.
سماح : إستني أتصل على سميره اسألها.
نوال : كلميها وابقي قوليلي، أروح أشوف أخوكي ماله رجع بدري.
راحت نوال أوضه كريم.
نوال : رجعت بدري ليه يا ولا ؟
كريم : يا دوب أجهز نفسي، رايح فرح علي.
نوال : هو عزمنا ؟
كريم : وأنا مالي بيكم، أنا بتكلم على نفسي.
نوال : أيوه أيوه، يعني عازمك انت لوحدك.
كريم : شكله كده.
هنا جات سماح.
سماح : سميره بتقول إن علي بعت ليهم كوافيره و فساتين، وهما رايحين الفرح.
نوال : إخص عليك يا علي، ماتعزمناش احنا؟ بقولك يا ولا رايحين معاك.
كريم : هو إنت اتجننتي ، تروحي معايا فين؟ دا هو عامل الفرح في أكبر فندق فيكي يا قاهره.
نوال : قاعه و لا فندق؟
كريم : ما القاعه في الفندق.
نوال : لأ، ماليش دعوه رايحين معاك.
روايات Nisrine Bellaajili
سماح : إنت سامعه بيقول إيه؟ الفرح في أكبر فندق، هتروحي بعبايه؟
نوال : لأ، تعالي ننزل عند البت نواعم الكحل، نختار أحلى فساتين عندها.
كريم حط إيده على راسه، وفكر إنه يتصل بعلي يبلغه.
المعلم كان قاعد سرحان
زهره : مالك يا سعد؟
المعلم : مافيش.
زهره : زعلان إن علي معزمكش على فرحه.؟
المعلم : عرفتي منين؟
زهره : إزاي منين؟ ما الحاره كلها عارفه.
المعلم : تصدقي معزمنيش !
زهره : هو إنت محتاج عزومه ؟
المعلم : دا مكلمنيش، ولا حتى امبارح كلمني علشان كتب الكتاب.
زهره : خلاص كتب كتابه ؟
المعلم : أيوه امبارح.
زهره قلبها وجعها، و حاولت تتماسك قدام المعلم اللي كان بيص عليها علشان يشوف ردة فعلها.
زهره : ألف مبروك. قوم إلبس علشان تروح فرح إبنك، وانا كمان جايه معاك
المعلم : نعم تيجي معايا؟
زهرة : آه طبعا، رجلي على رجلك
المعلم : بس.
زهره : مافيش بس، هنزل عند مدام وفاء تساعدني في اختيار فستان.
سعد، النهارده فرح إبنك و فرحك إنت كمان.
المعلم : قصدك إيه؟؟
زهره : يعني الحمد لله، ممكن نبتدي حياتنا بما يرضي الله.
المعلم : قصدك إني حنام جنبك على السرير؟
زهره : إن شاء الله.
المعلم : تعالي خدي الفلوس دي خليها معاكي
زهره وهي نازله ابتدت تفكر، هل اللي بتعمله صح و لا غلط؟
رجلها أخذتها على الكورنيش، المكان اللي كانوا بيتقابلوا فيه. وقفت تفتكر كل اللحظات اللي عاشتها معاه.
هو فعلا علي وحش و ربنا بعدها عنه؟ ولا هي اللي وحشه؟
ليه الفراق بعد الحب دا كله؟ هل أصلا كان حب، ولا بس هي اتعودت عليه؟ إزاي قدر ياخذ خطوة الجواز بالسرعه دي و معاها هي فضل سنين يفكر؟ هل حبها ولا كان بيحب نفسه؟ إزاي هتسلم نفسها للمعلم؟
وياتري هتعرف تواجه علي و عرسته؟
فضلت تفكر وحست إنها إتأخرت، راحت بسرعه لمدام وفاء.
على بالليل الكل جاهز.
اللي مبسوط، و اللي زعلان، واللي خايف،
الفرح ده فيه كميه مشاعر كثيره لكل الأبطال.
نسرين بلعجيلي
علي واقف قدام المرايا بعد ما لبس البدله، وهو شايف وشه مافيهوش ضحكه. ليه مش فرحان؟
علي : ياه يا علي! مش اليوم ده كنت مستنيه؟ بس مع زهره مش هايدي.
حاول تطلع زهره من عقلك و قلبك، هي بقت مرات أبوك.
إزاي زهره اللي كانت بين إيدي تكون بين إيدين أبويا؟ وهي ازاي سلمت نفسها ليه؟
هو إنت زعلان ليه؟
وهي ليه اتجوزت أبويا ؟
مش مهم يا علي، دوس على قلبك و روحك، و دوس على كل الماضي. اللي جاي كله ليك. و زهرة هخليها تندم.
فكر إنك متجوز بنت ناس، حلوه و مثقفه و هاي كلاس. فكر في مكانتك الاجتماعيه حاليا.
عند هايدي…
كانت طايره من الفرحه
نور : ياه! ماكنتش أعرف إنك قويه كده.
هايدي : قصدك إيه؟
نور : كنت طول السنين دي بتقولي إن علي هيبقى ليا، وفعلا النهارده فرحك عليه.
هايدي : لأني قويه، و عندي عزيمة عاليه جدا إنا أي حاجه عايزاها بوصل ليها.
دا علم الطاقه، بطاقتي عرفت أجذب علي ليا.
نور : مممممم! بصراحه ماكنتش بآمن بالحاجات دي، بس من دلوقتي لازم تعلميني. إنت طالعه حلوه أوي.
هايدي كانت لابسه فستان بلا أكمام،
و فتحة صدرها باينه، وكان طويل بذيل كله تطريز، و لو شالته بيطلع الفستان لحد الركبه.
هايدي: هاتيلي تليفوني أشوف علي خلص ولا لأ.
نور : أبوكي بره عايز يكلمك.
دخل أبو هايدي.
حمزه : ألف ألف مبروك.
هايدي : الله يبارك فيك يا بابا.
المحامي : أخيرا وصلتي اللي كنتي عايزاه ؟
هايدي : شفت يا بابا بنتك شاطره إزاي.
المحامي : أنا خايف عليكي يا بنتي. علي مجروح من حبيبته، و اتجوزك علشان يحرق قلبها. عارفه ده ولا لأ؟
هايدي بعصبيه.
هايدي : إنت قلت لي الكلام ده كثير. بكره هيقرب مني و يحبني.
المحامي : يبقى عززي نفسك.
هايدي : إزاي؟
المحامي : المفروض الكلام ده كانت تقولهولك مامتك الله يرحمها.
بصي يا بنتي، إوعي تسلمي نفسك ليه بسهوله. عارف إنه جوزك و ليه حقوق عليكي ، بس مش عايزه يقرب منك علشان كده، أنا انا عايزه يقرب منك علشان هايدي.
اشترطي عليه مايلمسكيش غير لما يحبك.
هايدي : ومش هيزعل؟
المحامي : ما يزعل ولا يتفلق، انت بتحبيه، إوعي تيجي على نفسك علشانه، إوعى تخسري نفسك،
خليكي قويه.
هايدي حضنت أبوها.
المحامي : يلا الزفه شويه و تبتدي.
هايدي : هما أهله جم ولا لسه؟
المحامي : مش عارف هنزل تحت أشوف.
فرح نزلت تحت، كانت لابسه فستان فيروزي وكان ضيق عليها وبين تقاسيم جسمها، وطلعت زي القمر مع ميكاب هادي.
مراد أول ما شافها نزل من العربيه،
وقرب جنبها وحضنها.
كإن الحضن ده دوب كل الجليد اللي كان بينهم
احمد : الله الله! إبنك بيحضن في الشارع.
تهاني : دي مراته، وبقاله كثير مشافهاش.
أحمد : ما السنيورة شايفه نفسها عليه، وبعدين إيه القرف اللي هي لابساه؟
تهاني : خلاص يا احمد اسكت بقى.
مراد فتح ليها الباب..
دخلت فرح.
Nisrine Bellaajili
فرح : السلام عليكم
تهاني : وعليكم السلام. إيه الحلاوه دي يا بنتي؟
فرح : عينيك اللي حلوه يا ماما.
إزيك يا عمي؟
أحمد : بخير. يلا يا بني اتاخرنا على صاحبك اتصل كثير.
فرح قلبها اتقبض من طريقه كلام حماها معاها.
أحمد : بقولك إيه؟ الفستان اللي انت لابساه ده مايلقش على واحده متجوزه دا تلبسه واحده بتدور على عريس، ولا ريحة البرفان الفواحه دي اللي قلبت العربيه، إنت متعرفيش إن البرفان حرام. وبعدين لازم تتحجبي،
دي عوايدنا، و بناتنا كلهم محجبات.
فرح إستنت مراد يرد.
فرح : معلش يا عمي علي هو اللي جابلي الفستان
أحمد : وانت يا يا خويا عاجبك اللي هي لابساه ؟؟
مراد : لو سمحت يا بابا ماتدخلش بيني وبين مراتي.
أحمد : أيوه أيوه معاك حق، خليها تركب وتدلدل رجليها.
تهاني : أستغفر الله.
عند بوابة الفندق.
نوال قاعده تتخانق هي و نانسي مع
السيكوريتي.
نوال : يا خويا خلينا ندخل، الولا يبقى ابن جوزي.
السيكوريتي : يا مدام مش معاكم الدعوه، ماينفعش.
نور راحت تجري عند هايدي.
نور : إلحقي، عيله جوزك بيئه أوي أوى. دا في ست تحت بتتخانق
عايزه تخش.
هايدي : إزاي ؟ علي عزم بس والدته و اخواته البنات.
نور : لا دا في اثنين ستات ماسكين في خناق السيكوريتي.
هايدي اتصلت على علي يلحق المشكله.
نزل علي في نفس توقيت وصول سميره و جوزها و معاهم الحاجه رحمه مع الممرضه، و مراد مع أهله.
نوال : يرضيك يا عريس مانحضرش فرحك؟
وابتدت تزغرت..
هايدي بتبص عليهم من الكاميرا.
هايدي : اتفضحت! شوفتي الست البيئه بتتكلم ازاي، ولا لابسه إيه.
نور : لازم علي يتصرف و مايخليهاش تدخل.
هايدي : أكيد هيعمل كده.
علي بيحاول يتكلم، بس نوال مش مدياه فرصه.
علي راح يجري على أمه.
علي : منوره يا ست الكل.
رحمه دموعها نزلت ومش عارفه تتكلم.
سلم على اهله، و يادوب هيدخله سمع صوت المعلم.
المعلم : مكانش العشم ده با بني انك ماتعزمنيش. أنا لسه حسي في الدنيا.
علي لف عنده..
شاف زهره، و هي فعلا زهره، كانت لابسه فستان إسود يجنن عليها، وعامله تسريحه وشايله الحجاب
وميكاب خفيف.
شكلها كان بيجنن.
فضل يبص عليها..
وهي فرحت من جواها إنها لسه بتأثر عليه.
زهره : ألف مبروك يا عريس.
هايدي شفتها اتجننت، وعايزه تنزل تطردها، خاصة لما شافت عينين علي هتطلع عليها.
نوال : يا لهوي! شايفه البجاحه.
زهره : بجاحة إيه؟ أنا جايه مع جوزي ما هو ابن جوزك يبقى ابن جوزي انا كمان.
يلا يا سعد، أنا مش قادره أقف كثير
وحطت إيديها على بطنها.
نوال بصوت خفيف بس علي سمعه..
نوال : البت حامل.
علي مش مستوعب اللي بيحصل ولا اللي سمعه.
زهره عدت من جنبه وهي ماسكه في ايد المعلم.وعلي واقف مصدوم مش عارف يتصرف إزاي.
الكل دخل و هو فضل بره
هايدي إتصلت عليه
علي : ألو!
هايدي : ازاي تخلي الناس البيئه دي تخش فرحي؟
علي : الناس دي أهلي.
هايدي : مش مشكلتي أدخل اطردهم وأولهم الزفته زهره، وإلا مش هنزل، و اعملك فضيحه.
يا أنا يا هي….
بدل ماتدور وتبحث علي الروايات خليها علي تليفونك وحمل تطبيقنا
