رواية قسوت على فاتنتى الفصل الثانى2 بقلم سحر السحرتي

كان على يجلس مع هيام يتحدث معها كعادته يوميا وجدت انه الوقت المناسب لتفتح معه هذا الموضوع

: على انت هتاخد خطوة جدية امتى في علاقتنا 

: يومين بس هكلم بابا وماما ونيجي نخطبك

*بكل خبث وكانت تظهر الحزن في عينيها 

:تفتكر هيوافقوا عليا اكمني يتيمة من غير اب ولا ليا أهل ولا سند

: ايه الكلام اللي بتقوليه ده اهلي ما يفرقش معاهم اهم حاجة عندهم أخلاق البنت وانت اخلاقك وادبك ما شفتش زيه

: انت سندي وظهري يا علي بلاش تسيبني انا استحملت فراق بابا بالعافية مش هقدر استحمل فراقك

: ما اقدرش انت بقيتي اهم حاجة فى حياتى 

*عاد إلى منزله بعد حديثه مع هيام ليتحدث مع والديه في انه يريد الزواج من جارتهم هيام

كريمة والدة على : ازاي يا على دول بقالهم شهر بس ساكنين وما نعرفش عنهم حاجة وكمان طريقة البنت ولبسها مش عاجبني

عبد الرحمن والد على : فعلا والدتك معاها حق انت كمان من يوم ما سكنوا وانت داخل خارج وبتقعد في شقتهم فترة طويلة وده ما يصحش خصوصا ان لسة مفيش شئ رسمي بينكم 

بقلمي سحر السحرتي

على : البنت ووالدتها لسة ناقلين وما لهمش اهل كنت بساعدهم والبنت مؤدبة جدا ومامتها بتعاملني زي ابنها 

كريمة : عموما اختك قدامها شهرين على ما تبدأ اخر سنة ليها ومنقدرش نساعدك الا لما نطمن على تعليمها

على بحدة: وانا هقعد كل ده البنت ممكن تتجوز حد غيري 

والده : في ايه يا على انت عمرك ما اتكلمت معانا بحدة كدة ... اختك لسة بتدرس ومحتاجة مصاريف عموما لو انت جاهز ومعاك حق الشبكة وتكاليف الجواز حدد معاد معاهم واحنا هنروح معاك 

على بحدة اكثر: حضرتك عارف ان اللي معايا كنت باخد بيه كورسات عشان اترقى في الشغل 

كريمة:على اتكلم كويس ما تنساش نفسك الكورسات دي بتزود خبرتك وبتبقى خطوة كويسة في سيرتك الذاتية وهتشغلك في أحسن الشركات ولو معانا كنا دفعنا تمنها احنا الحمد لله احنا اسرة متوسطة وربنا ساترها معانا بس دراستكم وعلاج والدك هو اللي بياخد مننا مصاريف كثير 

*خجل على من نفسه وبدأت نبرة صوته في الهدوء وأصبحت شبه رجاء 

: اعمل ايه دلوقت 

كريمة: يا حبيبي لو هي بتحبك وشرياك هتستنى لما انت تكون نفسك وظروفك تتحسن 

على دون اقتناع : حاضر يا ماما 

*خرج وترك والديه في الغرفة حائران في أمره وتبدل سلوكه وأخلاقه المستجدة عليهم

كريمة: هنعمل ايه يا عبده انا مش مطمنة للناس دي وواضح ان البنت مسيطرة على ابنك وباين عليه مدلوق قوي 

عبد الرحمن: ادعيله ربنا يبعدها عنه ومن هنا لغاية فتون ما تخلص يفرجها ربنا يمكن البنت يجلها نصيبها وتسيبه

*سمعا طرقات على باب غرفتهم ودخلت فتون بعد أن إذن لها

: ماما هطلع طبق الأرز باللبن ده لطنط سميحة واقعد معاها شوية كلمتني عايزاني في موضوع 

: طب ما تتاخريش ولو حسام ابنها رجع انزلي على طول ولو فوق ما تدخليش اجلى كلامك معاها لما تبقى لوحدها

: من غير ما تقولي لاني مش بطيق حسام سبحان الله من واحنا صغيرين انما اخواته عسل الا هو دمه تقيل قوي على قلبي 

: ما لناش دعوة بدمه الأصول كدة رغم انه صاحب على وابوك مربيه بس انت وهو ناقر ونقير وكفاية علينا اخوك 

عبد الرحمن: انت هتقارني عشرة عمرنا بالاغراب اطلعي يا بنتي واتعاملي مع حسام كويس ده زي اخوك

بقلمي سحر السحرتي

*صعدت فتون لسميحة جارتهم مالكة العقار او بمعنى أدق والدة حسام هو مالك العقار بعد أن أصبح هذا العقار نصيبه من ورث والده 

*طرقت فتون الباب طرق متناغم كما تفعل دائما مع سميحة فهي تحبها كثيرا وسميحة بدورها تعشق فتون فابنائها جميعهم رجال وتعتبرها ابنتها التي تتمناها

: طيب اصبري يا مستعجلة

: ايه يا ديحة مش قلتيلي اطلعي المفروض تقفي على الباب تستنيني وتفرشيه ورد كمان 

: ادخلي يا لمضة

: ابنك الغلس هنا 

: لا ...  نفسي اعرف عملك ايه

: ولا حاجة شكله بيعصبني بفتكر دائما لما كان بيشدني من الضفائر بتاعتي وانا صغيرة ويخطف عروستي ويقص شعرها خلاني اتحجبت بدري من اعدادي بسببه 

: قلبك اسود قوي وما فكرتيش انه كان بيعمل كدة لانه كان بيغير عليك مثلا لان شعرك كان حلو ويجنن

: اتفضلي يا حبيبتي رز باللبن يهدي اعصابك قال بيغير على ده احنا الد الأعداء هاه كنت عايزاني في ايه 

: هو ده الموضوع اللي كنت عوزاك فيه 

: موضوع الأرز باللبن ماما اللي عملته مش انا

: انت هتستعبطي من اولها

: بجد مش فاهمة 

: نفسي تبقى بنتي رسمي واجوزك ابني  

: بس مصطفى واحمد متجوزين واستحالة اوافق ابقى زوجة ثانية

: بت صحصحي معايا وبلاش تشليني 

: بعد الشر عنك يا ديحة

*وفتحت فمها ونظرت بدهشة بعد أن استوعبت 

: اوعي يكون قصدك الغلس لا علاقتنا كدة هتبوظ وتنسي ان لك بنت اسمها فتون 

: ليه يا فتون انا طول عمري بحبك من قلبي 

: هو انت عشان بتحبيني تغصبي عليه يتجوزني

: هو في ام بتغصب على راجل يتجوز ... حسام بيحبك من زمان ولما كان بيشدك من ضفايرك لانه كان بيغير عليك وهو اللي خلى على يقترح عليك تتحجبي

: بس حسام طول عمره اخ بالنسبة لي وصاحب على أكثر من كده لا آسفة يا طنط اعذريني 

: على طول قلبتي وبقيت طنط اتجوزتيه او لا هفضل ديحة .. فكري وخدي وقتك صرحيني هو في حد في حياتك 

: يا ديحة لو في حد في حياتي كنت اول واحدة هتعرف قبل ماما كمان انت كاتمة أسراري يا دودو 

: متأكدة وعارفة 

: آمال بتعملي شغل الحموات على ليه 

: يعني بتعتبريني حماتك

: لا يا دودو ما تفهمنيش غلط ابوس ايدك بلاش تدبسيني

: هو حسام تدبيسة اخص عليك 

: طب خلاص انا هعمل زي ما قلتي وافكر بس لو رفضت مفيناش من زعل تمام

: يا رب تبقى من نصيبه 

: بلاش الدعوة دي يا ديحة عشان احبك

بقلمي سحر السحرتي

*يدخل حسام من باب شقتهم يجد فتون تجلس مع والدته فأسرع يسلم عليها ونظراته كلها عشق ولهفة 

فتون: استأذن انا يا ديحة لاني اتأخرت على ماما ابقى كلي الأرز لوحدك

حسام: ازيك يا فتون 

*ومد يده ليسلم عليها نظرت ليده وقالت

: الحمد لله كويسة آسفة مش بسلم 

:كويس انا بحترم البنت اللي مش بتسلم

: لا مش بسلم عليك انت بالذات 

: ليه كده 

: نسيت زمان لما كنت بسلم عليك كنت بتكسر صوابعي

: يعني بتسلمي على الناس الغريبة عادي الكلام ده لازم يتغير

نظرت له بتحدي وغضب : يوم ما هيتغير هيبقى بمزاجي مش بتحكمات حد وربنا يخليلي بابا حسه بالدنيا هو المسؤول عني 

: ربنا يخليه طبعا بس لو جوزك طلب منك ده هترفضي

: ما انا مش ناوية اتجوز اصلا سلام 

*لم تنتظر الرد او إعطائه الفرصة ان يتحدث معها أكثر من ذلك واسرعت في النزول 

*حسام شاب وسيم الملامح جسمه رياضي مهندس أيضا زميل على بالعمل لكن طبعه قاسي في التعامل يريد ان يفرض سيطرته على من حوله فهو أصغر اخواته مدلل قليلا ... يرى أن كلمته يجب أن تنفذ ... طلب من اخويه ان يكون هذا العقار من نصيبه في الإرث من أجل فتون فهو يعشقها منذ الصغر ولن يسمح لأحد بالاقتراب منها... لكن قلبها لا يدق له او يراه

عادت فتون إلى منزلها مستأة من حوار حسام وطلب والدته الزواج منه لاحظت والدتها

: مالك في ايه

: مفيش لو طنط سميحة سألت عليا بعد كدة قوليلها اني مش موجودة وعموما انا هبقى مش موجودة فعلا لاني هنزل شغل من بكرة 

: هو ايه اللي حصل دى انت روحك فيها 

: بصراحة طلبتني للجواز من حسام وانت عارفة انا بطيق العما ولا اطيقه

 :ليه كده ده حسام مؤدب ومتربي وانا وابوك بنحبه

: وغلس وجلياط ومش بحبه ارجوك اقفلي الموضوع 

: طب فكري وخدي وقتك هما مش مستعجلين لسة على ما تخلصي السنة الأخيرة 

: انت عارفة بقى وبتشتغليني انت وهي 

: سميحة بتمشي بالاصول وما ينفعش تكلمك قبل ما تستأذني

: أصول اه قلتيلي طب الأصول بتقول ان ليا حق الرفض ومن غير تفكير انا برفض كام يوم كده وهبلغها تصبحي على خير لان شغلي الصبح بدري

:لازمته ايه الشغل ده 

: يا ماما منه تدريب ومحتاجة لاب توب اشتريه حتى ولو نص عمر وظروف البيت صعبة اليومين دول قدام بابا هيكون تدريب ماشي 

: ربنا يعينك يا حبيبتي تصبحي على خير 

*ذهبت فتون لغرفة نومها وحدثت كريمة نفسها : اهي يا على اختك بتحاول تساعد نفسها وحاسة بظروفنا مش انت بدل ما تجوزها وتجهزها الأول بتدور على نفسك ربنا يهديك

الفصل الثالث من هنا