رواية القصه واللي كان الفصل الثامن والعشرون 28 والاخير بقلم نور ناصر

رواية القصه واللي كان الفصل الثامن والعشرون 28 بقلم نور ناصر 

 #القصه_واللي_كان❤

_الحلقه الاخيره

ـــــــــــــــــــــــــــــــــــــــــــــــــــ

سلاماا على اول نظره الى عينيك ..

سلاماا على ااول حديث بيننا .. 

وعلى ااول نقااش ورطني بك ..

وعلى ااول نظرة ااغرقتني بك .. 

وسلاماا على ااول اااغنية حب ...

سمعتهاا ورددتهاا لاجل عينيك...

وعلى ااول فجر ااغفى على صوتك ..

ياا تااريخ ميلادي وعمري الجديد .. 

ياا نبضي وانفااسي وعشقي الوحيد ..

سلاماا ي عشقي المنتهي..

♡💔♡💔♡💔♡💔♡💔♡💔♡💔♡💔♡💔♡💔♡

_تجلس فرح ارضاً مقيده وتنتفض بخوف وبكاء وكل هذا بأمر من شقيقها نعم ي ساده شقيقها، ذهب وجلس ارضاً امامها وهو يرمقها بأشمئزاز واردف بنبره غاضبه... 

خليل

طول عمري كنت عايزك تبقي احسن وحده وتبصي لفوق، جوزتك جوازه اي وحده تتمناها بس انتي غاويه فقر طالعه لابوكي..

رمقته فرح بسخريه واجابته

 انت عمرك مشوفتني عمرك مهمك حاجه غير مصلحتك وانا كنت بالنسبالك لعبه بتلعب بيها عشان مصلحتك مع محمد..

جذبها من خصلاتها بقوه قائلاً بحقد

وكانت اي مصلحتك مع ابن الميكانيكي اللي روحتي رميتي نفسك فحضنه وانتي ع ذمة راجل وجيبتيلي العار ي *****...

اجابته ببكاء والم

 انا عمري مجيبتلك العار ليك ولا لاهلنا انت اللي فضحتنا بشغلك القذر، انت اللي خليت الناس تشوفنا وحشين بسببك، وانا لما روحت ليحي قعدت عند اهل مراته وروحتله عشان للاسف لما جيت اسند ع اخويا لقيته حيطه مايله واجبرني اروح اسند ع الغريب..

تركها وهب واقفاً قائلاً بحده

انا هوريكي ازاي انا حيطه مايله بس لما يجي حبيب القلب ي اختي ي حبيبتي..

_تركها تبكي حظها وذهب وجلس بجوار عمر عزام الذي كان ينظر امامه بشرود..

خليل بهدوء

سرحان فاي ي عمر باشا..

نظر له عمر بغضب قائلا

 هو انا عارف انك شما*ل ومش مظبوط فكل حاجه بس عمري متخيلت انك بالقذا*ره دي، انك تدخل اختك وشرفك فاللعبه دي وترميها قدام الرجاله متكتفه كده ع الارض..

خليل بجمود

 اختي وانا حر فيها وبعاقبها ع افعالها ومحمد هيتبسط لما يجي ويلاقيها كده، وبعدين انت عايز تنتقم من يحي زيي ويحي مش هيجي غير بالطريقة دي...

جاء احد الرجال المسلحين الي خليل قائلاً بجمود

خليل باشا فخري كلمنا وقال ان يحي معاه وجايبه وجاي ع هنا..

خليل بخبث

 تمام قوله ياخد منه موبيله ويكسره لانهم ممكن يكونو متتبعينه..

الرجل بايماء

 حصل ي باشا بالفعل دي حاجه متعديش علينا..

عمر بجمود

هو محمد فين؟...

الرجل

 جاي فالطريق ساعه بالكتير وهيكون هنا..

خليل بحقد

تمام اووي محمد هيفرح برضو لما يلاقي يحي اللي قتله حبيبة القلب هنا قدامه..

الشيمي بقلق

 ي جماعه انا مش مطمن وحاسس ان في حاجه هتحصل..

عمر بجمود

متخفيش ي شيمي هي دي اخر خطوه وبعدين حياتنا كلها هتتغير ومش هنقضي يوم واحد فالسجن....

_مر بعض الوقت حتي جاء فخري الي ذلك المكان الذي يوجد به خليل وخلفه رجاله الممسكون بيحي من زراعيه وكان الاخر نظراته جامده، وما ان دلف للداخل ووجد فرح مكبله ارضا وتبكي بقوه وعلامات الخوف تظهر عليها حتي تحول جموده لغضب دفين وهو يتذكر ذلك اليوم الذي دمر به خليل حياته واخذها منه رغما عنه وقامو رجاله بالاعتدااء علي شقيقته وعائلته..

فاق من شروده ع صوت خليل الساخر

 لا انت هتتعصب من اولها ي يحي ده احنا لسه بنبتدي..

يجي بجمود

انا جيتلك اهوو ومن غير شرطه ولا اي حد معايا، سيب فرح تمشي وطلعها بره حسابتنا..

_امسك خليل مسدس فخري وقام بتصويبه ع شقيقته التي انتفضت رعباً تحت نظرات يحي الخائفه..

واردف خليل ببرود

حاضر هسيبها بس بعد مخلص منها ومن قرفها خالص..

_انهي حديثه وبكل دماء بارده قام بتفريغ طلقتين من ذلك المسدس بجسد شقيقته لتسقط ع ظهرها غارقه بدماء*ها، انتفض يحي بعدم تصديق وحاول الذهاب لها ولكن هؤلاء الرجال كانو بكبلونه بقوه، فهبطت دموعه بألم مميت وهو يراها تنفث اخر انفاسها بألم شديد..

يحي بدموع ونبره خائفه

فرح ردي عليا، عشان خاطري اتحملي ي فرح..

عمر بحده وهو يدفع خليل بعيداً

انت اتجننت ناقصين احنا مصايب عشان تلبسنا فجريمة قتل تانيه..

_تركه خليل وذهب بأتجاه شقيقته ونظر لها بسخريه وبكل قسوه نظر ليحي قائلاً: للاسف ماتت ي ابن الميكانيكي..

يحي بغضب دفين من وسط دموعه

انت ايييي شيطان، ازاي جالك قلب تقتل اختك ازااااي...

تابع بسخريه لازعه

بس مش غريبه عليك انت كنت معيشها متدمره ومهانتش عليك لحظه اللي زيك الاحساس معدوم من عنده..

دلف اخد الرجال للداخل قائلاً

 محمد باشا وصل..

خليل بابتسامه حاقده ليحي

ودورك جه، ودع الحياه انت كمان..

_دلف محمد فذلك الوقت الي الداخل، نظر ليحي بعدم فهم غير منتبه لجسد فرح الملقاه ارضا فاقده لحياتهااردف بجمود ليحي... 

محمد

هو في اي، واي اللي جابك هنا؟..

يحي بحده

للاسف طلعت غبي لما فكرت ان واحد زيك اتغير ومرضيتش اعاقبك معاهم ي ابن البحيري..

_كاد محمد ان يجيبه ولكنه لفت نظره جسد فرح الملقاه ارضا والدما*ء تغرق المكان، صعق بقوه وانتفض قلبه بألم وركض لها سريعاً وجثي أرضا بجوارها محتضن وجهها بين يديه قائلاً بدموع..

محمد

 فرح اي اللي جابك هنا ومين عمل كده، ردي عليا..

_نظر خليل وعمر والشيمي لبعضهم بقلق، فحين صاح محمد بفخري بقوه... 

محمد

ازاي جاات هنا ومين اللي عمل فيها كده؟..

فخري بقلق

ي محمد باشا انت قولتلنا ننفذ اللي خليل يطلبه ومنحسسوش بحاجه، واحنا مكناش فاكرين انه هيقتلها..

هبطت دموع محمد وهو ينظر لها قائلاً بحزن

 انا اسف ديما بتتأذي بسببي، بس والله مقصد انا كنت عايز احميكي ي فرح منه ومكنتش ناوي اذيكي والله..

جاء له صوت خليل الخائف قائلاً

 والله ي ابن عمي مكنت اعرف انك هتزعل عليها كده، ده انا افتكرتك هتفرح عشان طلقتها ومبقتش تلزمك..

نهض محمد واقفاً امامه قائلاً بحده

انت تخرس خالص، انا لو كنت هرحمك شويه ع اللي عملته فـ مي فكان عشانها ودلوقتي انت حرقت اللي فاضل جوايا باللي عملته فيها، واقسم بالله مهرحم حد منكم..

_اشر محمد لرجاله بيده، فقام فخري ورجاله بترك يحي والامساك بخليل وعمر والشيمي وناصر الشهابي وتقيدهم ع احد المقاعد الشبه متهالكه، وكانت نظرات خليل ناريه بأتجاه محمد..

عمر بغضب

 انت بتعمل اي ي محمد انا مالي باللي بينكم اصلا انا قولتله ميجيبهاش هو اللي صمم..

محمد بسخريه غاضبه

وانت برضو اللي اتفقت معاه تموتو مي واستكترتو عليا ابقي نضيف واكمل حياتي بعيد عنكم، حتي دلوقتي لما قررت اكمل حياتي عشان مراتي واعوضها عن القرف اللي شافته معايا انتو استكترتو دي عليا كمان وقتلتوها..

تابع بنظرات ملئيه بالحقد والغضب

 اوعو تفتكرو اني هربتكم عشان احميكم او اخليكم تسافرو بره البلد، انا هربتكم عشان انا اخد حقي منكم عشان السجن رحمه للي زيكم...

_ذهب يحي وجلس ارضاً بجوار فرح واخذ يمرر يده ع شعرها ودموعه تهبط بلا توقف لا يعي باي شئ يحدث حوله ففقدانها قاتل بالنسبه له، فذلك الوقت تقدم احد الرجال من محمد وقام باعطاءه ذلك الجهاز الالكتروني...

خليل بجمود

 انا عملت كده لمصلحتك متباقش ناكر للجميل وتنسي اني كنت بساعدك فشغلك وخليتك تترقي اكتر من مره بمساعدتي، حتي اختي لما قولت انك عايزها انا عملت المستحيل وجيبتهالك..

محمد بحده

لمصلحتك انت وعمر اديتوني اللي انتو عايزين تديهولي واخدتو مني اللي انتو عايزينه واكتر، بس انا عمري مكنت عايز ابقي معاكم، عمري ي خليل مكنت عايز فرح غصب عنها بس انت اوهمتني ان القسوه والضرب والاهانه هيخلوها تبقي كويسه وكده هبقي راجل وهي مش هتسيبني، ولما نضفت انتو مصلحتكم معايا خلصت فمهانش عليكم تسيبوني فحالي ولا ترحمو اي حد من اللي حبيتهم فمش هرحم حد فيكم دلوقتي..

الشيمي بخوف شديد

اي اللي فايدك ده، انت هتعمل اي؟.

محمد بابتسامه حاقده

 انا عملت اي؟ حاجه بسيطه خليت الرجاله تملا المكان قنابل مدمره وبضغطه وحده ع الزر ده المكان ده كله هيبقي دمار..

عمر بانفعال وغضب

 انت اتجننت، اهدي ي محمد وسيبني امشي واعمل فخليل اللي عايزه هو اللي خطط لموت مي كل حاجه كانت من تخطيته...

خليل بحده

وانت نفذت انا خططت وانت نفذت ي عمر ي باشا..

فخري بجمود

 يلا بينا ي باشا الحكومه اخدت خبر وجايين فالطريق...

محمد بنظرات مليئه بالدموع

خد رجالتك وامشي ي فخري انما الباقي فكلنا لازم نموت محدش من الموجودين لازم يعيش..

فخري بقلق

 ي محمد باشا وانت؟..

نظر محمد لفرح بابتسامه باهته قائلاً

 مبقاش فاضل حاجه اعيش عشانها وانا مفرقتش عنهم حاجه واذيت الكل معاهم ولازم اموت..

_نظر له يحي بجمود غير مبالي بما يحدث او سيحدث ع عكس هؤلاء الذين كانو مقيدين ويصيحون بخوف وغضب بمحمد ان يتوقف، ولكن كان الاخر جامداً ونظراته مليئه بالظلام تابع خروج فخري ورجاله وهو ممسك بذلك الجهاز الالكتروني و؟؟؟....

_وبعد مرور اكثر من ثلاث سنوات...

ـــــــــــــــــــــــــــــــــــــــــــــــــــــــــ

_هبط سليم من سيارته ومن الجهه الاخري نزلت لبني، اتجه لها قائلاً بأبتسامه واسعه.. 

سليم

بعد كده تنزليش غير لما اجي افتحلك الباب وتنزلي بالراحه..

ضحكت بهدوء واجابته

 والله ي سليم لحد دلوقتي مش مصدقه الدكتور قال بجد اني حامل ولا انا بيتهيألي..

ابتسم لها بهدوء قائلاً

 لا قال بجد عشان بعد كده تثقي فكلامي بقالي تلات سنين من لما اتجوزنا وانا بقنع فيكي ان ربنا هيكرمنا وانتي مكنش طالع عليكي غير لا انت بتظلم نفسك معايا، طلقني وروح اتجوز ي سليم وليالي سودا كنت بتقضيها فبكي ونكد ع اللي جابوني ي شيخه..

لبني باحراج وهي تضع يدها ع بطنها بسعاده قائله

خلاص بقي ي سليم وبعدين الدكتور ده شاطر اووي ده مكملتش معاه 6 شهور وحملت، ده انا طول الفتره الجايه مش هبطل صلاه وذكر لربنا ده كان حلم مستحيل بالنسبالي..

امسك يدها بهدوء قائلاً

من يوم متجوزتك وانا صدقت وقتها ان المستحيل ممكن يكون حقيقه، لا من يوم محبيتك ي مدام لبني..

ابتسمت بهدوء واجابته

انت احسن راجل فالدنيا، انا كل يوم لما بصحي والاقيك جنبي بحمد ربنا انه عوضني عن كل حياتي اللي ضاعت بواحد زيك ودلوقتي كمان هيبقي عندي بيبي صغير، انا المستحيل بقي حقيقه وانا معاك ي حبيبي..

_ابتسم باتساع وكاد ان يجيبها ولكنه لاحظ نظرات ياسين الذي يقف مستنداً ع السياره ويرمقهم بخبث..

سليم بتوتر

 ياسين انت بتعمل اي هنا؟..

نظرت له لبني بخجل، فاجابه ياسين بخبث

 لا خدو راحتكم كملو ولا كاني واقف ولا كانكم فالشارع عادي..

سليم بأبتسامه واسعه

 اعمل اي بقي فيها، اقسم بالله فالبيت بحس اني قاعد مع راجل اسمه سيد فمبصدق انها تنطق..

_ضحك ياسين بقوه، فحين لكمته لبني ع كتفه بغضب واحراج..

ياسين بسخريه

 مين سمعك عبتواب اخو سيد عايش معايا فالبيت برضو..

لبني بغيظ

طيب اي رئيك بقي ي استاذ ياسين اروح اسلم ع اميره واحكيلها ع موضوع عبتواب بتاعك ده؟..

ياسين بقلق

لا والنبي انا مش ناقص..

لبني بهدوء

 يبقي اتلم انت و هو هاا، وبعدين هي اميره جات معاك ولا انت جاي لوحدك؟..

ياسين بجمود

 جات معايا وطلعت فوق تسلم ع ام توني، وبعتتني اجيب بمبرز للواد حتي قبل مطلع اسلم ع حد..

سليم بضحكه هادئه

 الله يبشرك ي شيخ ده انا لسه بقول ي هادي..

تابع سليم بهدوء

المهم اطلع عند نسايبك وابقي قبل متمشي تيجي تقعد معايا شويه ولو طنشت هزعل..

ياسين وهو يتجه لمنزل اهل زوجته

 عيب ي سطا هجيلك والله..

سليم بعد ذهااب ياسين

 تعالي بقي ي حبيبتي نكمل باقي كلامنا فوق مفيش هروب..

لبني بسرعه وهي تذهب من امامه

كلام اي لا انا رايحه اكلم صفيه اقولها وبعدين اكلم الهام...

سليم بغيظ

 لا وع اي تكلمي اختك انا كمان شويه هبعتك ليها..

ذهب خلفها قائلاً بمرح

خدي ي بت انتي هنا...

ــــــــــ #بقلم_الكاتبه_رحاب_القاضي ــــــــ

_بمنزل ام توني.. 

ام توني وهي تحمل الطفل الصغير بين يديها بابتسامه واسعه

بسم الله مشاء الله اي الحلويات دي ي بنت ي اميره..

اميره بهدوء

 دي عنيكي الحلوه ي خالتي..

ام توني بجديه

روحتي لامك؟..

اميره بجمود

لا جيتلك انتي الاول، حتي اتحججت لياسين وبعته يجيب بامبرز عشان اجي واقعد معاكي لوحدنا..

ام توني بهدوء وهي تحتضن الصغير بين يديها

خير حبيبة خالتك في اي؟..

اميره بدموع

 انا مش عارفه اقولك اي، بس مفيش غيرك اقدر اكلمه فالموضوع ده..

ام توني بقلق

 ي بنتي اتكلمي مبحبش جو رمي الكلام ده تخلصي في اي، جوزك مزعلك فحاجه؟..

اميره بحزن

 ياسين من لما عرفته عمره مزعلني ولا حتي دايقني بكلمه وهو واهله بيتمنولي الرضا ارضي بس..

ام توني بجديه

 بس اي اتكلمي متخفيش..

اميره ببكاء

انا مش قادره انسي توني مش عارفه مفكرش فيه اوقات كتير مبكونش طايقه وجود ياسين جنبي لما افتكر توني بكون عايزه اخد بعضي وامشي واطلق واللي يحصل بقي يحصل..

ام توني بدموع

 ربنا يرحمه، بس انتي كده غلط ي اميره..

اميره بحزن شديد

عارفه ي خالتي بس مفيش فأيدي حاجه اعملها، ياسين كويس وطيب وبيحبني بس مش عارفه احبه، هو ااه غالي عليا وجوزي بس حاسه ان اللي بينا عشره مش حب زي اللي كان بيني وبين توني..

_كانت تتحدث بارتياح مع والدة توني غير عابئه بذلك الذي يقف امام باب المنزل ودموعه متحجره بعيناه وقد ظهر الالم والحزن جلياً ع معالم وجهه..اردف بجمود وهو يدلف للداخل... 

ياسين

 معلش ي جماعه دخلت كده بس الباب كان مفتوح..

نظرت ام توني له ولاميره بقلق قائله

بيتك ي بني تعالي اتفضل، انا سيبت الباب مفتوح اصلا عشانك اميره قالتلي انك جاي..

_ابتسم لها بهدوء، ثم حمل صغيره وجلس بجوار ام توني، ونظر لاميره قائلاً بحده.. 

ياسين

كملي كلامك يلاا..

اميره بخوف وهي تفرك يديها بتوتر

 ياسين اهدي الموضوع مش زي مانت فهمت..

اجابها بجمود

لا بالعكس ده انا المره دي بالذات فهمت كل حاجه صح، فهمت الحاجات اللي كنت بشوفها بس بكدب نفسي عنها ي اميره..

ام توني بقلق

 الكلام بالعقل ي بني بلاش عصبيه وافهم مراتك كويس وافهم قصدها..

ياسين بجمود

 مش عايز افهم حاجه خلصت كده ي ام توني..

اميره ببكاء

حرام عليك ي ياسين متعملش كده كفايه اللي انا مستحملاه عشانك وعشان نكمل حياتنا سوا..

ابتسم بسخريه ولمعت الدموع بعينه قائلاً

مستحمله اي انتي، لا فوقي ي ماما انا اللي استحملت، استحملت اني اخد وحده بظروفك وكنت فاكر انك هتراعي ربنا فيا وهتنسي حياتك القديمه ع الاقل لما نكون مع بعض فبيت واحد، بس للاسف طلعتي عايشه معايا صوره وكل اللي جواكي لسه فالماضي تحبي اقولك لما بتكوني معايا بتكوني ديما سرحانه ومتخيلاه هو مش كده؟؟..

_نظرت له ببكاء وهي تهز رأسها بنفي فبرغم انها مازالت تحب زوجها السابق ولكنها ليس بسيئه لتفعل شئ مثل هذا... 

اجابته بنفي وحده

انت بتقول اي ي ياسين والله مفي حاجه زي كده حصلت ابدا... 

ام توني بضيق وحزن من ما يحدث

ي بني صلي ع النبي وغلط الكلام اللي بتقوله ده، وهات الواد الصغير ده من ايدك وانت متعصب كده حرام عليك..

_اخذت منه ام توني الصغير ومازالت نظراته غاضبه جامده مليئه بالحزن مصوبه باتجاه زوجته... 

اميره بحده وغضب

 واي كمان حضرتك شايف اي كمان مستحملني عليه ي سي ياسين..

ياسين بسخريه لازعه

متعمليش فيها ضحيه واني جاي عليكي، انا استحملت بما فيه الكفايه ي اميره وقولت مسيرها تنسي وتشوف حبي ليها بس انتي لسه منستيش ولا عمرك حبتيني ربع محبيتك، لسه لحد النهارده من يوم متخطبنا بتغلطي وتناديني باسمه هاتيلي راجل فالدنيا يستحمل كده، بس انا استحملت وحاولت اعوضك وانسيكي عشان حبيتك بجد ومش عايز اخسرك بس لحد كده وكفايه..

تابع وهو يتجه للخارج

 خليكي عند بيت ابوكي وانا هرجع المنيا لوحدي..

_تركها وذهب للخارج فجلست هي ع مقعدها واخذت تبكي بقوه، فجلست ام توني ع المقعد المجاور لها وهي تربت ع كتفها بهدوء وتنظر لها بحزن وضيق..

ام توني بجديه

لي كده ي اميره، لي تحطيني وتحطي جوزك وتحطي نفسك فالموقف ده؟..

اميره ببكاء

انا برضو السبب انتي كمان هتجيبي اللوم عليا، لي محدش حاسس بياا.؟.

صاحت فيها ام توني بحده

 انتي عايزه اي بالظبط يا بت انتي، اسمعي انا هقولك الكلام اللي انتي مش راضيه تواجهي بيه نفسك، اللي راح ده ابني ومش هيكون اغلي عندك مني بس هو راح، ووجعي ع فراقه مش هينتهي بيوم ولا بليله بس فنفس الوقت انا عشت حياتي اهو باكل وبشرب وبنام كويس وبحضر افلام وبصلي وبدعيله وبطلعله صدقات لان الدنيا مش بتقف ع بشر ولا ع حد، انتي بقي فاكره انك لما هتكملي حياتك فده حرام وغلط مع انك معملتيش حاجه حرام او غلط، قفلتي ع قلبك وظلمتي الراجل اللي حبك معاكي بسبب دماغك المقفله دي..

تابعت ام توني بغضب

 وع فكره انا مش داخل عليا موضوع انك مغصوبه ع ياسين من ابوكي لانك لو مكنتيش عايزااه كنتي هتعملي المستحيل عشان الجوازه متمش بس انتي خوفتي ترفضي ياسين تندمي عليه بعدين، واستغليتي حبه ليكي فانك تفضلي مخلصه لتوني عشان كنتي فاكره انه هيفضل مستحمل، بس كده حرام وظلم ليه لانه معملكيش حاجه وحشه عشان ترديله الخير اللي عمله ليكي بانك تفضلي عليه واحد ميت، انا مبقولكيش انسي ابني ولا اكرهيه بس افتكري انه مات وانك متجوزه وجوزك ليه حق عليكي انك تحسسيه انه مفيش فحياتك غيره فهمتي ي اميره..

_اومئت اميره براسها بنعم وهي تمسح دموعها فام توني معها حق بكل كلمه قالتها، شعرت الان بالندم لما تفوهت به بل وشعرت بمدي حزن زوجها وغضبه وانها جرحته بقسوه الان وسابقاً..

اميره بحزن

 انا هرجع وراه ي خالتي..

ام توني بجديه

لا انتي روحي لامك وابوكي واقعدي معاهم يومين كده عشان ميلاحظوش حاجه وابقي خدي ابنك وامشي بعدها لبيت جوزك وحافظي ع بيتك وابنك عشان متندميش بجد ي اميره..

_احتضنتها اميره بقوه ودموعها تنهمر ع وجهها، فبرغم انها تزوجت غير ابنها المتوفي الا انها مازالت تتعامل معها مثل سابقاً حتي وانها تتعامل مع زوجها بطريقة جميله وحنونه..

_كانت تجلس نور امام اللابتوب الخاص بها وهي تتحدث لعدنان بمكالمة فديو..

نور بحده

 بقولك اي يالاا انا مش شاحنه الباقه ومكلماك عشان اشوف خلقتك انت فين صفيه والعيال؟..

عدنان بهدوء

صفيه والعيال فالبيت وانا فالشغل ي نور، وقولتلك مليون مره متكلمنيش وانا فالشغل..

نور بسخريه لازعه

 شغل اي ي ابو شغل ده الساعه داخله ع عشره بالليل، انت بتخون صفيه طب والله لاكلمها اقولها..

عدنان بضحكه هادئه

 ي بت افتكري مره لله انا فباريس وانتي فمصر وفي فرق توقيت..

نور بابتسامه هادئه

 يووه بنسي ديما واظلمك وبعدين تخون صفيه ازاي دي كانت بلعتك حي..

تنهد عدنان بنفاذ صبر قائلاً

المهم انتي كويسه وامك وخالد وصادقه كويسين..

نور بحده

بنتي اسمها صدقه ي حبيبي مش صادقه، وبعدين احنا كويسن الحمد لله..

عدنان بغيظ

 فرحانه اووي بالاسم في وحده عاقله تسمي بنتها صدقه..

نور بجديه

 والله لولا انهم لغو الاسماء المركبه كنت هسميتها صدقه جاريه..

عدنان بضحكه هادئه

 اقفلي ي نور عندي اجتماع مش فاضيلك ابقي اما افضي اكلمك انا ع حسابي،وع اخر الشهر باعتلك هديه حلوه...

نور بجمود

 لا ي حبيبي انت لما هتفضي هتجيب صفيه والعيال حبايب عمتهم وتيجي مصر وتجيبلي الهديه بنفسك...

عدنان بملامج غاضبه

ان شاء الله ي نور يلا بااي...

_اغلقت نور معه ثم جلست شارده فهي تعلم سبب عدم مجئ اخيها الي هنا وهو غيرته الشديده ع زوجته وانه اصبح متحكم بكل تفصيله بحياتها بشكل غير طبيعي..

نور بغيظ

 ياارب يعني مكنش ينفع عدنان ميبقاش اخويا وكان زماني انا مكان صفيه متشحططه فباريس وعندي زوج بيعشقني ومرمطني كده بدل م الكل سابني قاعده لوحدي كالقرد فالحاره..

جاء صوت خالد من خلفها قائلاً بسخريه

 الله يخربيتك انتي مكفتكيش المرمطه اللي عشناها سوا، عايزه مرمطه اي تاني..

وقفت نور امامه قائله بجديه

 وهي دي مرمطه، انت لي بجد مش بتجلدني ولي مش بتكهربني بسلك الكهربه العريان لي مخطفتنيش زمان واغتصبتني عشان تنتقم من ابويا لي معملتش كده؟..

_تجاهلها خالد ودلف الي داخل الغرفه واخذ يبدل ملابسه قائلاً بجمود.. 

خالد

مش هتناقش معاكي ي نور..

تابع بنفس نبرته

 كلمتي عدنان؟..

نور بقلق ما ان لاحظت حزنه

ااه كلمته وبيسلم عليك..

جلست بجواره ع الفراش قائله بحزن

خالد انت زعلت انا بهزر معاك والله..

خالد بغضب مصطنع

ايوه ي نور زعلت عشان انتي شايفه كل اللي عملته عشانك قليل واني كان لازم اعمل اكتر من كده عشان اثبتلك حبي ليكي..

نور بنفي

 لا والله مش قصدي كده..

تجاهلها ولم يجيب فاردفت هي بصوت هادئ

 خالودي..

_نظر للجهه الاخري وهو يكبت ضحكاته، فاردفت هي بنبره غنائيه مرحه... 

نور

خالد ي مدلعنا ي جدع ي اصيييييل، روق جمعنا ي كبير ي كبييييير..

ضحك رغما عنه قائلاً

فصلان انتي بتجيبي الاغاني دي منين؟..

نور بنبره مليئه بالثقه

انت مش فاكره ده اعلان احمد سعد بتاع فدفون او اورانج مش فاكره..

تابعت بنبره حاده

 وبعدين متتقمصش كده انت زي مضحيت عشاني انا ضحيت عشانك كفايه اني لحد النهارده مقاطعه اختي ومش بكلمها بسببك وبسبب انك خنتني معاها زمان...

خالد بعدم فهم

اختك وخنتك معاها؟! اختك مين دي وطلعتلك امتي؟..

نور بحده

اممم لف ودور ي واد لف، هي مش جيدا اختي افكرك مين جيدا لتكون ناسيها هي كمان..

خالد بضحكه ساخره

وجيدا اختك منين ان شاء الله...

نور بجديه

هو مش عدنان اخويا وهي اخت عدنان يبقي هي كمان اختي..

انفلت خالد ضاحكاً بقوه ثم امسك رأسها بين يديه قائلاً

 اموت واعرف هي الدماغ دي دماغ زينا عادي ولا دماغ عروسه لعبه..

نفضت نور يديه وهبت واقفه قائله بصدمه

متهزرش ي خالد، جيدا اختي صح؟...

خالد من بين ضحكاته اجابها

مش متخيل والله يعني انتي بقالك اكتر من تلات سنين فاكره ان جيدا اختك ي نور والله صعبتي عليا يا بنتي..

نور بأهتمام

طيب هي ازاي مش اختي؟..

خالد بهدوء

بصي ي نور انتي وعدنان اخوات من نفس الاب، وعدنان وجيدا اخوات من نفس الام فهمتي؟..

نظرت له ببلاهه فضحك هو مجددا قائلاً

ههههههههه مش هتناقش معاكي ي نور بس انتي فكري فالموضوع هتفهمي..

نور بغيظ

بطل تقولي مش هتناقش دي، لا انت هتتناقش معايا غصب عنك اومال اتناقش مع الحيطان لو متنقشتش معاك..

_استيقظت صغيرتهم باكيه ع صوت صياح نور، فرمقها هو بغضب قائلاً.. 

خالد

عجبك كده..

نهض وجذبها من زراعها بقوه قائلاً

روحي سكتي البت واطلعي جهزيلي العشا يلاا..

نور بغيظ وهي تذهب لصغيرتها الباكيه

مطبختش النهارده وماما رجليها واجعينها ومطبختش..

خالد بحده

 وانا اطفحلك اي دلوقتي انتي وامك..

نور بنظرات غاضبه

بتقول حاجه ي خالد؟..

تنهد بنفاذ صبر قائلاً

عايزه البيتزا باي عشان اطلبلك معايا..

نهضت نور واتجهت له وهي تحمل صغيرتها قائله بغمزه مرحه

 عايزها بالكريم كراميل بالقشطه بالعسل بالملبن ي ملبن انت..

خالد بابتسامه واسعه

بت انتي اتلمي امك صاحيه بره، بس ياريت تفضلي كده لحد امك متنام ملقكيش بتشخري زي كل يوم..

نور وهي تذهب للخارج قائله بخبث

 انت وحظك بقي..

خالد بغيظ

اقسم بالله الخيانه حلال فيكي ي ام صدقه..

تابع بهدوء

صحيح ي نور قوليلي احنا لو ربنا رزقنا بولد هتسميه اي، ابهريني ي روح قلبي؟..

نور بابتسامه بلهاء

 هسميه ملحق عشان يقولولك ي ابو ملحق،هيص بقي..

دفعها خالد للخارج قائلا بغيظ

اطلعي عند امك ي نور احنا مش هنخلف تاني برااااا...

_ذهبت نور للخارج وهي تضحك بقوه، فهي تتعمد دائما مشاغبته..

بالذهاب الي باريس..

ـــــــــــــــــــــــــــــــــ

_بقصر كبير مصمم من احدث التصميمات العالميه الراقيه، محاوط بأعداد كبيره من الرجال المسلحين، يصدح بداخله صوت بكاء طفل صغير..

صفيه بحده

ياربي بقي ي بنتي اسكتي انا تعبت..

اتت لها الخادمه الفلبينيه قائله بلغه عربيه متقطعه

معذره سيدتي قد جهزت لها الحليب..

صفيه بضيق

طيب خديها اكلها لحد مروح اشوف اخوها..

دلفت لها فذلك الوقت جيدا قائله بهدوء

 شلونك ي احلي مامي بباريس كلها..

صفيه بابتسامه واسعه

 جيدا انتي جيتي امتي؟..

ذهبت لها جيدا واحتضنتها بهدوء قائله

وصلت من شوي وجيت لهون ع طول حتي شوف سيف وسيلا حبايب قلبي هدول..

صفيه بضيق

امم جايه لعيال اخوكي بس يعني؟..

جيدا بضحكه هادئه

 اكيد طبعا بس برضو جايه لمرت اخي حبيبتي..

صفيه بابتسامه واسعه

ايوه كده اتعدلي، تعالي نقعد فوق لحد م سيلا تخلص اكل واجيبهالك..

جيدا وهي تتجه للصغيره الجالسه بعربتها امام الخادمه قائله

 اوكي، بس راح بوسها الاول قبل منروح لفوق..

_قبلت جيدا الصغيره بحنان وذهبت مع صفيه للاعلي، وجلس بالتراس الخاص بالقصر المطل ع مظهر اكثر من الرائع لارقي الاماكن بباريس..

جيدا بهدوء

شو فيكي صافي ليش عابسه هيك؟..

صفيه بتنهيده طويله

يعني مش عارفه في اي ي جيدا..

جيدا بجديه

بعرف وبعرف كل شي عم يعمله اخي معك بس فكرتك اتعودتي ع غيرته يعني..

صفيه بغضب

 دي مش غيره ي جيدا ده شك وقلة ثقه، لما يحبسني فقصر زي ده مع الخدامين ومحاوطلي البيت بحراس وممنوع اخرج ممنوع حد يشوفني يبقي شك وقلة ثقه و والله محد يستحمل كده..

جيدا بضيق

اوكي انتي معك حق ما حدا بيتحمل هيك، بس انتي الوحيده اللي فيكي تتحملي عدنان ماحدا حبه قدك مو هيك؟..

صفيه بابتسامه جانبيه

هو انا في حاجه مصبراني ع كل اللي بيعمله ده غير اني بحبه..

تابعت بحده

 بس زودها اووي جيدا والله، طيب من اسبوع كده قالي هنطلع نتعشي بره فرحت وقولت اخيرا هشوف ناس واتكلم مع ناس لقيته خدني بالعربيه روحنا مطعم مفهوش حد محجوز كله لينا لوحدنا وجابني بالعربيه من غير حتي ممشي خطوتين..

جيدا وهي تكتم ضحكاتها

 لك كتر خيره الرجال ما بده يتعبك ويمشيكي يعني..

صفيه بغيظ

 اسكتي ي بت انتي انا غلطانه اني بحكيلك حاجه..

جيدا بضحكه هادئه

عم بمزح معك صافي ما تبقي قفوشه هيك، وبعدين ربنا رزقك بطفلين توأم متل القمر الهي حالك فيهم...

_قطعهم صوت عدنان الذي جاء لهم قائلاً وهو يجلس بجوار صفيه قائلاً.. 

عدنان

وهي معاها اي غير عيالها تتلهي فيهم..

تابع وهو يرمقها بجمود

 ولا انا بتكلم غلط؟..

صفيه بنبره غاضبه

هو انت عمرك عملت حاجه غلط ي عدنان..

نهضت واقفه واردفت بجمود

 هروح اشوف الولاد..

رمقها بضيق وهي تغادر، ثم نظر لشقيقته قائلاً بهدوء

عامله اي ي جيدا..

جلست بجواره قائله بلوم

اتركك مني انا، انت شو اللي مسويه بالبنت عدنان حرام عليك والله؟..

عدنان بجمود

 عملتلها اي مهي كويسه اهي؟..

جيدا بحده

مو كويسه عدنان، البت من لما جبتها من مصر لليوم ما طلعت لحالها مره بره البيت، لك انت معيشها بسجن..

عدنان بضيق

سجن اي ي جيدا، البيت ده مكلفني فلوس قد كده وموفرلها فيه كل حاجه تحتاجها ومن اجمل البيوت هنا، وعندها خدم بينفذولها اللي بتطلبه وكل اللي بتتمناه...

جيدا بجديه

 وشو فايدة كل دا وانت مقيدها بين حيطان البيت ممنوع تطلع لبره ممنوع حدا من الحراس يشوفها وممنوع تشوف حدا او تحكي مع حدا، لك حبيبي اذا انت ما واثق فيها مكنت اتزوجتها من الاول، م كنت جيبتها لهون وغصبتها تتزوجك لما اجيتو ع طول واجبرتها ع عليك فاكر هدا الشي كمان ولا بذكرك فيه، كذبت عليها وعدتها انك راح تتركها تتعود عليك بس من لما رجلها دخلت البيت هون وانت بلشت تتحكم فيها واجبرتها تتزوجك بسرعه وتتقبلك بسرعه.. 

عدنان بحده

 جيدا طلعي نفسك بره الموضوع، انا حبيتها فوق متتخيلي مستحيل يكون حد حب حد زي مانا حبيتها وخايف عليها من الهوا الطاير ومش عايز حد يشوفها ولا يلمحها دي حاجه خاصه بيا انا، ومراتي انا اعمل فيها اللي عايزه..

جيدا بحزن

بس..

قاطعها بنبره صارمه

جيدا متدخليش فالموضوع ده بالذات، واياكي تقوليلي هتاخديها وتخرجي عشان مزعلش منك..

نظرت له بفقدان امل قائله

والله البنت الها الجنه انها متحملتك ولسه بتحبك..

عدنان بابتسامه هادئه

وبتموت فيا كمان..

نهضت من جواره قائله

 ع شووو بدي اعرف ع شوو؟..

عدنان بجديه

انتي رايحه فين؟..

جيدا بهدوء

ماما اجت معي بالاتويل تاركتا لحالها، راح روح لعندها وبجي بكره اقعد مع هي المسكينه مرتك شويه قبل ما ندور علي بيت لانو راح نضل هون شوي الاوضاع ببيروت مو منيحه بالمره ادعي الله تمر هالازمه علي خير ونخلص من العدو هدا...

عدنان بجمود

يارب طيب ابعتي فواتير الاوتيل ع الشركه واعملي اللي نفسكم فيه هنا وانا هجيبلكم بيت حلو.. 

جيدا بابتسامه واسعه

من غير متقول راح نعمل هيك، وبتلاقي امك هلأ صارفه شي وشويات بالاوتيل..

عدنان وهو يرافقها للخارج

براحتها ي ستي ولو طلبت تشوف الولاد متخليهاش تيجي انتي عارفه هي وصفيه مش بيتفقو انا هبعتهم ليها..

جيدا وهي تذهب للخارج

 اوكي حبيبي، بس واغلي شئ عندك ما تزودها ع صافي ما بتستاهل البنت اللي بيصير معها..

_اومئ لها بجمود وانتظر حتي غادرت، ثم دلف للداخل وجد الخادمه الخادمه تقوم بضبط طاولة الطعام، فأردف لها بجمود...

عدنان

 صفيه هانم فين؟..

اجابته بايمااء

اخبرتنا انها ليس لديها شهيه للطعام سيدي..

تنهد بضيق قائلاً وهو يذهب للاعلي

متجهزيش العشا خلاص مش هاكل..

_ دلف لغرفته ليجدها تجلس ع الفراش ومعها صغارها اصحاب الشهور القليله تقوم بتعلميهم الجلوس وهي تضحك لهم بهدوء، تجاهلت تواجده تماماً وهي تلهو مع صغارها.، فقام هو بالذهاب الي غرفة الملابس وعاد بعد قليل بعد ان ابدل ثيابه واردف لها بجديه...

عدنان

 منزلتيش تتعشي لي؟..

اجابته وهي لا تنظر له

مليش نفس..

صاح فيها بحده

بصيلي وانتي بتتكلمي وبطلي طريقتك دي؟..

نظرت له قائله بضيق

نعم ي عدنان عايز اي؟..

عدنان بنبره غاضبه

مش هنخلص ي صفيه من ام الموضوع ده،بقالك سنين هنا مش ناويه تتعودي بقي؟..

اجابته ببرود

موضوع اي؟..

تنهد بضيق قائلاً

انا مقصر معاكي فاي، في اي طلبتيه مني وانا منفذتوش..

اجابته بنبره حزينه

 طلبت منك اعيش حياه عاديه طلبت منك حريتي اللي اخدتها وانت منفذتش اي حاجه منهم ي عدنان..

عدنان بغضب

 احنا مش اتفقنا ع الكلام ده من الاول وانتي قولتي كفايه اني اكون جنبك ومعاك ورضيتي بيا من قبل منتحرك من مصر خلاص بقي مش كل يوم والتاني هنحكي نفس الحوار..

نهضت من جوار صغارها ووقفت امامه قائله بغضب

انت ضحكت عليا ي عدنان انت مقولتليش انك هتاخدني تحبسني فبيتك هنا، انت قولتلي انك بتحبني وبتثق فيا وعشان كده انا جيت معاك بس للاسف لقيت حاجات كتير غلط اولها لما اجبرتني اتجوزك واستغليت اني معاك هنا لوحدي فبلد غريبه معرفش فيها حاجه، وفضلت حابسني هنا ومانع خروجي انا بقالي 3 سنين عمري ما مشيت في الشارع، حتي مصر بلِح عليك كتير توديني زياره حتي رافض لانك مش واثق فيا وحاطط فبالك اني عايزه اروح مصر لحاجه تانيه..

وقف امامها قائلا بهدوء

ودي حياتي وده الوضع اللي هتعيشي معايا بيه معندكيش خيار تاني، انا خيرتك زمان وانتي وافقتي تسيبي الدنيا كلها وتيجي معايا..

صفيه بنبره قلقه ودموع

وافرض اني عايزه ارجع لحياتي القديمه..

_تحولت نظراته من الهدوء للغضب واقترب منها فتراجعت هي للخلف سريعا وهي تضع يدها ع وجهها بحركه عفويه وخوف نظر هو لصغاره الجالسين ع الفراش يتحركان بهدوء وتنهد بنفاذ صبر قائلاً لها..

عدنان

 خايفه لي، انا عمري مديت ايدي عليكي عشان تخافي بالشكل ده؟..

هبطت دموعها واجابته ببكاء

 انت عمرك معملت كده، بس غيرك عمل كده واكتر، وانت بتكمل عليا بانك بتدفني بالحياا..

مسح ع وجهه بغضب قائلاً

انتي عايزه اي طيب وانا هعملهولك ي صفيه..

ابتسمت ببعض الامل قائله

تسيبني اخرج اتمشي اروح كافي اعرف ناس و..

امسك يدها بهدوء قائلاً

 اوكي نتمشي مع بعض فاي وقت عايزاه نروح الاماكن اللي عايزاها وانا معاكي ومش ديما وممنوع تتكلمي مع اي راجل بره البيت وتطلعي باللبس والشكل اللي انا اقولك عليه، غير كده مفيش طلوع بره البيت ده ي صفيه..

_رمقته بغيظ فحين اتجه هو الي الفراش جالساً بجوار صغاره وبدا يداعبهم بهدوء متجاهل غضبها وحزنها، فحين صدح رنين هاتفها فاخذته واتجهت الي الشرفه..

ولكن اوقفها بقوله الحاد

 مين بيرن عليكي ورايحه فين؟..

وضعت الهاتف امام وجهه قائله بغيظ

لبني مفيش حد غيرها هي وجيدا ونور بيكلموني ي حسره...

_ذهبت الي الشرفه ومسحت دموعها وتنهدت بقوه واجابت ع شقيقتها بهدو قائله...

صفيه

 الو ي حبيبتي عامله؟..

لبني بهدوء

كويسه ي قلب اختك، انتي عامله اي طنيني عليكي..

هبطت دموعها مجددا واجابتها

انا كويسه جدا الحمد لله..

لبني بقلق

 مال صوتك ي صفيه في حاجه معاكي ولا اي؟..

_نظرت صفيه خلفها لتجده مازال يداعب صغاره واجابت شقيقتها بهدوء.. 

صفيه

مفيش حاجه بس عندي شوية برد، المهم انتي اخبارك اي وسليم عامل ونور وخالد وكل اللي عندك...

لبني بابتسامه واسعه

كلهم كويسين ي حبيبتي وبيسلمو عليكي، عندي ليكي خبر حلو اووي..

صفيه بفضول

خير ياريت بجد تكون حاجه حلوه لاني محتاجه حاجه تفرحني اووي..

لبني بحماس

 انا وسليم كنا النهارده عند الدكتور الجديد اللي قولتلك عليه وطلعت حامل ي صفيه..

_ادمعت عيني صفيه وهي تبتسم بسعاده فهذا اغلي حلم لدي شقيقتها واردفت بنبره مليئه بالسعاده..

صفيه

 بجد ي لبني ورحمة امك وابوكي بتتكلمي بجد؟..

لبني بدموع ايضاً

 والله بجد ي صفيه، انا زيك لحد دلوقتي مش مصدقه ان حلم حياتي اتحقق..

صفيه بهدوء

 ربنا يكملهولك ع خير وتقومي بالسلامه يارب..

لبني بقلق

 صفيه انتي هتيجي وتكوني معايا وانا بولد صح انا ماليش غيرك؟..

تنهدت صفيه بضيق قائله

اا اكيد طبعا وبعدين لسه بدري ع الكلام ده، احكيلي بقي سليم عمل اي لما عرف انك حامل وحامل فالشهر الكام، اتكلمي قولي كل حاجه انا بجد عايزه اسمعك واتكلم معاكي كتير..

لبني بحماس

 وانا معاكي للصبح هو انا ليا غيرك..

_وهكذا هي الحياه قد تاخذ منها ما تريد ولكن هناك ضريبه قاسيه ستنولها وستجبر ع تقبلها ودفعها بكل رضا..اخطأت صفيه بالماضي اخطاء كبيره للغايه، والان حكم عليها بتقبل وضع قاسي سيذكرها دائما بما فعلته بالماضي ويجعلها تندم عليه.. 

ـــــــــــــــــــــــــــــــــــــــــــــــــــــ

ــــــــــ #بقلم_الكاتبه_رحاب_القاضي ــــــــ

ـــــــــــــــــــــــــــــــــــــــــــــــــــــ

_بهذا المكان، البيت الابدي للجميع، نعم هي المقابر منازل الاخره، منازل العمر الاخير الباقي، كان يجلس هو امام احداهم ودموعه عالقه بعيناه، وكالعاده عادت ذاكرته الي ما حدث قبل ثلاث سنوات..

_فلااااش باااك..

ـــــــــــــــــــــــــ

_تابع محمد خروج فخري ورجاله ثم انتقل بنظره ليحي الذي يرمقه بجمود فاردف بجمود.. 

محمد

استني ي فخري..

وقف فخري ورجاله، واردف فخري بقلق

خير ي باشااا؟..

محمد بجمود وهو يشير ليحي

خدوه معاكم بره..

فخري بغيظ

بس هو ممكن يروح ي..

محمد بحده

انا مش متفق معاك تجيبه من الاول ودلوقتي هيطلع ومحدش هيعمله حاجه..

فخري بجمود

 تمام ي باشا..

_نهض يحي وذهب معهم للخارج، ولكن توقف ونظر لمحمد قائلا بهدوء... 

يحيي

تعالي اخرج معانا، انت ع الاقل رجعت عن الغلط، انت مهما كان اللي حصل مش زيهم..

محمد بدموع

انا كنت ناوي اخد فرح واعوضها عن كل حاجه عملتها فيها ونبعد عن الكل بس هي مشيت مش هقدر اعيش وكل حاجه حلوه مشيت ومشيت بسببي..

يحي بضيق

ي عم اطلع من هنا وابدا من جديد ربك كبير و..

خليل بسخريه

محمد متخلهوش يلف دماغك ده اكتر واحد بيكرهك ده، تعالي وفكني ي ابن عمي واول منطلع من هنا هنبدا انا وانت من جديد، طيب حتي عشان مراتي وبنتي ي محمد فكني..

محمد بحده

مراتك وبنتك موتك راحه ليهم..

تابع محمد وهو ينظر ليحي

وانت امشي فأخر مره كلمت فيها فرح قالتلي مأذيكش لاخر مره هقولك امشي والا انت اللي هتكون سبب فموتك معانا..

_تنهد يحي بنفاذ صبر وذهب وحمل جثمان فرح بين يديه ودلف للخارج مع فخري ورجاله ووقفو جميعهم امام سيارتهم وبعد دقائق انفجر ذلك المكان بقوه، فاغمض يحي عيناه بضيق وحزن، هو بالداخل محمد الذي لاول مره بحياته يري نظرة الحزن والكسره بعيناه..

فخري بنبره غاضبه

 المره اللي فاتت صاحبك انقذك من ايدي انما المره دي فمفيش حاجه هتمنعني اخلص عليك..

_كان هو يجلس ارضاً بجوار جثمان فرح، فرفع رأسه للاعلي ليجد فخري ورجاله يحاوطونه وعلامات الغضب تظهر ع وجوههم..

يحي بملل

 هو اليوم ده مش بيخلص لي انا نفسيتي تعبت ي شباب؟..

فخري بغضب

 هنخلصهولك دلوقتي ي خفيف..

_انهي جملته وقام رفع قدمه وارتطمت بوجه يحي ليسقط ارضاً واخذ رجال فخري يضربونه بقوه، فذلك الوقت جاء ياسين الي ذلك المكان ومعه ضباط الشرطه..نظر ياسين بخوف شديد وهو ينظر لشقيقه الملقي ارضا وهؤلاء الرجال اخذو سيارتهم وغادرو وخلفهم بعض رجال الشرطه..

ياسين وهو يركض لشقيقه وينظر لجثمان فرح بحزن

قوم ي يحي معلش والله انا يدوب بلغت واول محددو مكانك من الموبيل التاني اللي معاك جينا..

يحي بألم شديد

 بعد. اي جم بعد مالدنيا خربت..

ياسين بسخريه

مهي ديما الشرطه بتوصل متاخر فالافلام والحقيقه..

نظر يحي لفرح بدموع وحزن شديد، فاردف ياسين بحزن ايضاً

 قتلوها الحيونات..

يحي بصوت متألم

خليل اللي قتلها..

ياسين بجمود

مستغربتش، ربنا يرحمها..

_بااااااك..

ــــــــــــــــــ

يحي بابتسامه هادئه

ودي ي ست فرح اخر حكايتنا اللي بدأت لما دافعت عنك وانتي راجعه متأخر من الدرس واتضربت قدامك وحبيتك وعشقتك اووي وانتهت بأنك مشيتي بدري اووي..

مسح دموعه وتابع

تعرفي قصتنا ممكن تكون فيلم او مسلسل هتبقي حلوه اووي، انا هيعمل دوري احمد عز انتي عارفه اني بحبه للاسف العندليب زمانه بيمسي عليكي عندك كنت هخليه يعمل دوري وانتي بقي تبقي مين..

ابتسم باتساع قائلاً

هبه مجدي حلوه ورقيقه زيك، انما بقي سالي فدي مفيش زيها ولا ينفع حد يعمل دورها ويبقي سالي،هي وحده بس متكررتش ولا هتتكرر..

جاءت نوال خلفه قائله بهدوء

 كنت متاكده اني هاجي الاقيك هنا زي كل سنه..

نهض يحي واقفاً قائلاً بهدوء

مينفعش مجيش فالسانويه بتاعتها، اخبارك ايي طنط نوال..

نوال بهدوء

 انا بخير ي حبيبي، ويلا روح امشي عايزه اقعد مع بنتي لوحدنا..

يحي بابتسامه هادئ

 ماشي هسيبكم مع بعض بعد اذنك..

مشي يحيي ونوال بصتله بدموع وقالت 

ياريت الزمن يرجع تاني وكنت سمعتك انت وفرح، كان زماني دلوقتي بزور بنتي وهي معاك في بيتها مش وهي في قبرها،ربنا يرحمك يا فرح وتسامحيني يا بنتي.. 

ــــــــــ #بقلم_الكاتبه_رحاب_القاضي ــــــــ

_ع الجانب الاخر بمنزل يحي، دلف ياسين للداخل منزله وجلس بجوار شقيقته وملامحه جامده..

قمر بقلق

خير مش كنت هتيجو بعد اسبوع اي اللي جابكم بسرعه كده؟..

ياسين بضيق

اميره واياد عند. بيت ابوها وانا جيت امبارح لوحدي..

سالي بقلق

 لي مجاتش معاك في حاجه فالحته ولا اي؟..

صمت ياسين ولم يجيب فاردفت عائشة بحده

في اي ي ياسين متتكلم؟..

ياسين بغضب

انا واميره متخانقين وهنطلق..

شهق الجميع بصدمه، فاردفت قمر بحده

 تطلق مين يا طلقه تاخدك ما تجيبك ، عملتلك اي البنت الغلبانه دي عشان تطلقها..

ابتسم ياسين بسخريه قائلاً

معلملتش حاجه هي يدوب بس اعترفت انها مبتحبنيش ولسه بتحب جوزها الميت..

سالي بضيق

 لا مستحيل اميره تقولك كده..

ياسين بجمود

هي فعلا مقالتليش انا، قالت لام توني وانا سمعت..

_دلف فذلك الوقت يحي للداخل، وجلس بجوار سالي..

سالي بحده

 كنت فين وبرن عليك مش بترد؟..

يحي بهدوء

 انتي مطلعتيش العياده النهارده لي؟..

سالي بضيق

اميره سافرت وانا وعائشه مش هينفع نسيب ماما لوحدها مع يونس وقمر، فقولنا هناجل الموعيد بتاعت المرضي لبليل..

يحي بغمزه مشاكسه

 انسي ي ماما الليل ده بتاعي لوحدي محدش هياخدك مني فيه..

سالي بخجل

 يحي اتلم اهلك كلهم قاعدين..

يحي بنبره هامسه

اتلمي انتي بقي وشوفي اهو بالنهار مش عارف اكلمك كلمتين ع بعض وعايزه كمان بالليل تسبيني ي قاسيه..

سالي بخبث

 طيب بعيد عن كل ده انت كنت فين كده ومتقولش فالشغل عشان عمو عادل كان زعلان لان انت وياسين مش معاه فالشغل النهارده يبقي كنت فين؟..

رمقها بقلق قائلاً

 كنت بزور فرح، النهارده السناويه بتاعتها..

اومئت برأسها عدت مرات وتحولت ملامحها للضيق قائله

 اممم كويس وانك فكرتني باليوم ده..

كاد ان يتحدث ولكن قاطعته قمر قائله بضيق

اتصرف انت معاه ي يحي قوله كلمتين؟..

يحي بهدوء

 هو في اي اصلا واي اللي جابك ي ياسين مش قولت هتقعدو اسبوع هناك..

تنهد ياسين بغضب قائلاً

ي جماعه خلاص انتو كلكم كان معاكم حق انا المفروض مكنتش اتجوزت وحده بالظروف دي، ودلوقتي انا هصلح غلطتي..

نهره يحي بحده قائلاً

 غلطة اي اللي هتصلحها وابنك اللي وسطكم ده وبعدين كان من الاول، والبنت عملتلك اي عشان تقول كده دلوقتي..

اجابته سالي بنبره ساخره

 كل الحكايه ان اميره لسه فاكره جوزها اصيله البنت، هو بقي فهم غلط..

ياسين بغضب

فهمت غلط اي بقولك سمعتها بتقول انها لسه بتحبه وان اللي بيني وبينها مجرد عشره غلاوه مش اكتر، في راجل يستحمل كده ع كرامته؟..

نظرت سالي ليحي بلوم وحزن قائله

 رد ع اخوك في حد يستحمل كده ع كرامته..

تجاهل يحي نظراتها واجاب شقيقه بجمود قائلاً

 ااه في ي ياسين مدام انت عارف ظروفها من الاول ووافقت ودخلت العلاقه دي استحمل، متطلبش منها ترمي ماضيها ورا ضهرها وتنسي حياتها القديمه عشان جنابك لانها لو عملت كده هيبقي سهل اووي عليها تنساك بسهوله فهمت..

سالي بحده

 اسمع كلام اخوك ي ياسين وبعدين احمد ربنا دي يدوب مخلصه لواحد ميت..

تابعت وهي تنظر ليحي بسخريه قائله

مش جابته وقعدته معاك فنفس البيت وتخرج وتطلع معاه قدامك وتجبرك تسكت عشان انت واثق فيها وهي محترماك ومش بتجيب سيرته قدامك خالص ومحترمه مشاعرك مش كل شويه تجيب سيرته قدامك ولا كانك بني ادم وبتحس..

_اردفت كلماتها وتركتهم وذهبت لغرفتها ودموعها تملأ عيناها بحزن شديد..

يحي بنبره عاليه شبه حاده

 قلبك بقي اسود اووي اليومين دول هاا..

ياسين بضيق

 طلقها وانا اطلق اميره وندور ع اتنين فرفوشين نتجوزهم بدل النكد ده..

قمر بغضب

 اكتم منك ليه واتلمو وراعو ربنا فبنات الناس اللي معاكم، اللي لو لفيتو الدنيا كلها مش هتلاقو ضفرهم فاخلاقهم وادبهم واصلهم وحبهم ليكم...

يحي بهدوء

طيب اجهزو ي جماعه عشان هنروح القاهره الاسبوع الجاي هنقعد كام يوم هناك..

ياسين بضيق

يحي انا مش هروح ومش هرجعها و..

يحي بجمود

 مش رايحين عشانك، المستثمر الاجنبي جاي واحنا عايزين نمضي معاه عشان عايزين نمضي معاه عشان تبقي صفقة العربيات دي لينا احنا وهناخدهم معانا يغيرو جو..

عائشه بحماس

والله ي يحي انت اجمل اخ فالدنيا ي قلب اختك..

قمر بهدوء

يحي روح صالح مراتك متسيبهاش زعلانه..

_اومئ برأسه لوالدته وذهب لغرفته ليجدها تعد نفسها وتهم بالذهاب..

يحي بهدوء

رايحه فين؟..

سالي بجمود

قولتلك عندي شغل بالليل فهروح ارجع كام حاجه الاول..

يحي بجديه

وانا قولت مفيش شغل بالليل روحي قولي لعائشه تكلم المرضي تقولهم المعاد اتاجل لبكره..

اجابته ببرود

لا مش هاجل حاجه وانا هشوف شغلي وانت خليك فحالك..

صاح فيها بغضب

سالي متعصبنيش واسمعي الكلام عشان مقولش مفيش شغل خالص..

_القت بحقيبهتا ع الاريكه بغضب، واتجهت للخارج فجذبها من زراعها بقوه قائلاً.. 

يحيي

رايحه فين؟..

اجابته بضيق

 هشوف يونس قاعد من الصبح مع قمر فأوضتها والبنت عندها امتحان بكره مش فضياله...

يحي بهدوء وهو يقترب منها قليلاً

متقلقيش عليهم واهدي عشان مقصدش ادايقك انا بس مش عايز اكدب عليكي او اخبي عنك حاجه..

تنهدت بضيق قائله

عارفه بس متطلبش مني مدايقش ممكن..

يحي بابتسامه هادئه

لا مش ممكن ودلوقتي بالذات مش ممكن..

سالي بغيظ

اشمعنا بقي ولا ه..

قاطعها قائلاً بخبث

عشان دلوقتي حالا هنخاوي الواد يونس اللي عماال يزن علينا وعايز بيبي صغير،ونخليه يسيب البت قمر تذاكر براحتها..

توردت وجنتيها بخجل قائله

يحي لم نفسك اهلك قاعدين بره..

يحي بضحكه هادئه

واعملهم اي اهلي اللي قاعدين، اروح اخد منهم الاذن عشان اخوي ابني..

_ضحكت بهدوء وهي تنظر للجهه الاخري بخجل، فرفع هو جهها بيده ونظر لعينها بابتسامه هادئه..

سالي بخجل وتوتر

في اي بتبصلي كده لي؟..

اجابها ومازالت نظراته كما هي قائلاً

خلصت كل اغاني عبد الحليم. فيكي وبدور ع بيت شعر كده يليق اني اوصفك بيه مش لاقي، برغم كل الشعر اللي اتقال فالغزل مفيش حد قدر يوصف جمالك ولا ضحكت ولا عنيكي اللي سحروني دول..

سالي بابتسامه واسعه

 امم مش باخد منك غير كلام من ده وبس..

يحي بخبث

طيب مانا بقول نبقي بتوع افعال ونخاوي الواد مش راضيه..

_كان الاثنين يتحدثون غير منتبهين لصغيرهم الذي فتح الباب وجلس امامهم ع الفراش يتابعهم بصمت...

ولكنه اردف بنبرته الطفوليه الجميله قائلاً

بابا هو يعني اي نخاوي الواد؟..

ضحكت سالي بهدوء وهي تحاول الابتعاد عن يحي بخجل قائله

رد ع ابنك اللي عايز تخاويه...

جذبها يحي له اكثر قائلاً لصغيره بغيظ

 يعني نجيبلك بيبي صغير زي مانت عايز ي شبر ونص..

ابتسم الصغير بحماس قائلاً

 ماشي يلا هاتوه بسرعه..

سالي بخجل شديد وتوتر

 اوعي ي يحي انا مش نقصاك انت وابنك..

تجاهلها يحي قائلاً لصغيره بخبث

 طيب يلا ي حبيبي اطلع اقعد مع تيته بره ومتدخلش تاني غير لما تخبط ع الباب..

جلس الصغير بارتياح ع الفراش قائلاً بهدوء

 لا انا هستناكم تجيبو البيبي..

_ضحكت سالي بقوه، فحين ابتعد عنها يحي وذهب لصغيره قائلاً بغيظ... 

يحيي

يالا مانت طول ما قاعدلي كده مش هعرف اخلف عرسه حتي..

_ انهي حديثه واخذ يدغدغ صغيره بمرح لتصدح ضحكات الاخر وتملأ الغرفه، وانضمت لهم سالي لتبدو هييتهم رائعه هم وذلك الصغير الذي يشبه الديه بقوه...

ــــــــــــــــــــــــــــــــــــــــــــــــــــ

ــــــــــ #بقلم_الكاتبه_رحاب_القاضي ــــــــ

ــــــــــــــــــــــــــــــــــــــــــــــــــــ

_بعد مرور اسبوع...

_كان الجميع مجتمع بذلك المطعم الراقي الذي احتجزه يحي وخالد للانفراد بعائلتهم الصغيره، تقدمت منهم اميره وهي تحمل صغيرها فابتسم لها الجميع ورحبون لها معادا ياسين انقلبت ملامحه وبدت نظراته غاضبه لها بقوه..

عادل بهدوء

تعالي ي بنتي اقعدي جنب جوزك..

قمر بابتسامه واسعه

 هاتي اياد وحشني اووي..

_ذهبت اميره ووضعت الصغير بين يدي قمر، ثم جلست بجوار ياسين الذي تنهد بضيق ونهض سريعاً للخارج، فحين رمقته هي بحزن ودموع متحجره،تابع يحي ما حدث بغضب من تصرفات شقيقه..

ثم مال ع اميره التي تجلس بجواره ايضاً هامساً لها بهدوء

روحي ورااه وكلميه بالراحه وهو هيتراضي..

اميره بقلق

 لا ي يحي سيبه براحته..

يحي بجمود

 ع فكره هو معاه حق فزعله، لو حطيتي نفسك مكانه وهو جه وقالك بيحب وحده تانيه حتي لو ميته مش هتتحملي ده، بلاش تخسريه ي اميره وروحي عاتبيه وزعقي اتخانقي خبطي دماغه بس بلاش تسكتي وتتفرجي ع حياتكم وهي بتدمر كده..

_تنهدت بحزن ولمعت الدموع بعيناها، فهي حقاً تخشي ان تنتهي قصتها به هنا، نهضت من جوار يحي وذهبت لزوجها، فابتسم هو برضا فهو يعلم بانها تحب شقيقه وبقوه ايضا ولكنها تفعل مثلما فعل هو بالماضي تعلق نفسها بين الماضي والحاضر والمستقبل ولكن الان يجب ان تختار وهو يعلم جيدا ماذا ستختار..

سالي بخبث

 اي بقي اللي مخليك واثق انه هيسامحها؟..

نظر لها يحي بهدوء قائلاً

انتي؟..

سالي بعدم فهم

مش فاهمه قصدك؟..

يحي بابتسامه هادئه

اللي مخليني واثق انه هيسامحها حبك ي سالي، انتي سامحتيني زمان ومعايا دلوقتي، وواثق ان اخويا بيحبها وهيسامحها لانها هي بتحبه..

سالي بأبتسامه واسعه

متجوزه اسامه منير ي نااس..

يحي بخبث

 كان نفسي ارد عليكي واقول متجوز ياسمين عز بس للاسف طلعت متجوز رضوي الشربيني النسخه الاصليه..

_ضحكت بقوه وهي تلكمه فزراعه بغيظ..

ـــــــــــــــــــــــــــــــــ

_كان يقف ياسين امام النافذه الخارجيه لذلك المطعم وينظر امامه بشرود وملامحه غاضبه، جاءت هي ووقفت بجواره قائله بتوتر.. 

اميره

انا اسفه..

اجابها بضيق

روحي ي اميره شوفي كنتي جايه تعملي اي؟..

اميره بدموع متحجره وحزن

انا جايه عشانك انت ي ياسين..

نظر لها بسخريه قائلاً

 لا ي شيخه وجايه بقي عشان العشره اللي بينا ولا جايه عشان انا غالي عليكي ولا جايه شفقه؟..

امسكت يده واجابته بهدوء

 جايه عشان بحبك..

انتفض قلبه بقوه ولكنه سحب يدها منها قائلاً بجمود.

متكدبيش انا سمعت كل حاجه جواكي من نتحيتي ومن ناحيته هو الله يرحمه..

اميره بدموع ونبره صادقه

 انا عارفه انك سمعت وانا فعلا وقتها قولت احساسي واني كنت متلخبطه بين وجودي معاك وبين حاجات قديمه مش قادره انساها وقولتلك كده مليون مره قبل منتجوز، وانت قولتلي انا معاكي ومش هسبيك وهخليكي فيوم تقولي اني حبيتك ي ياسين وانا اهو بقولك انا بحبك والله بحبك..

مسحت دموعها وتابعت

يمكن الاول كنت بنكر الاحساس ده بس دلوقتي لما حسيت انك ممكن تروح مني عرفت واتأكدت اني مش هقدر اعيش لحظه وحده من غيرك، بعيد عن توني والماضي وكل حاجه حصلت زمان انا دلوقتي بحب جوزي ومفيش فحياتي غيره هو وابني وعايزه افضل عمري كله معاه ويسامحني ع سوء التفاهم اللي حصل..

رمقها بجمود وهو يحاول كبت ابتسامته قائلاً

اتحايلي عليا شويه كمان دي فرصه اطلع فيكي القديم والجديد..

_نظرت له بغيظ وكادت ان تذهب من امامه، فجذبها من زراعها بهدوء قائلا من وسط ضحكاته..

ياسين

 يخربيتك استني بهزر معاكي والله...

اميره بهدوء

 يعني مش زعلان خلاص؟..

ياسين بأبتسامه هادئه

 ابقي حمار لو بعد الكلام ده كله زعلت منك..

تابع بنبره حاده

 بس اقسم بالله لو نطقتي اسم اي راجل تاني قدامي او الكلام اللي سمعته الاول اتكرر تاني، هقطعلك لسانك ي اميره فهوم ي ام اياد..

اميره بغيظ

 ع فكره لو كنت قولتها بطريقه هاديه كانت هتبقي احلي بس اقول اي طبع السرسجيه دااااء فيك...

_تركته وذهبت للداخل ولحق هو بها ولكنه توقف عندما رأي سالي تذهب للخارح فاوقفها قائلاً.. 

ياسين

رايحه فين؟..

سالي بقلق

يونس طلع بره وطالعه اشوفه وخايفه اقول ليحي يزعقلي عشان سيبته يخرج..

ياسين بهدوء

 طيب اهدي وتعالي نجيبه سوا..

_ذهب الاثنين للخارج ولكنهم لم يجدو الصغير فذهب ياسين لحديقة المطعم ليبحث عنه وبقيت سالي واقفه بالخارج تنتظره بقلق، ولكنها ابتسمت بارتياح ما ان رأت صغيرها يركض لها، فاحتضنته بهدوء قائله..

سالي

 كده تطلع بره من غير متقولي، وروحت فين؟..

اجابها الصغير بهدوء

انا كنت عايز اروح العب مع قمر عند اللعب بس معرفتش اروح وعمو اللي واقف هناك جابني هنا تاني..

سالي بقلق

عمو مين اللي جابك هنا؟..

يونس وهو يشير خلفها ع مكان شبه بعيد نسبياً

عمو اللي واقف هناك..

_نظرت سالي خلفها ولكنها هبت واقفه بفزع وهي تتاكد من ملامح هذا الشخص، شعرت وكان الارض تدور بها وانتفضت بخوف، ولكنها فاقت ع صوت صغيرها الذي قال لها بضيق..

يونس

 يلا ي ماما ندخل عايز اروح العب مع قمر..

نظرت له سالي قائله بنبره خائفه

 حاضر ي حبيبي بس..

_عادت النظر مجددا لذلك الواقف ولكنها لم تجده، وانتفضت بقوه ما ان وضع يحي يده ع كتفها..

فاردف هو بقلق

في اي مالك وواقفه لي بالولد بره كده؟..

سالي بنبره خائفه

 يحي، محمد البحيري كان هنا..

ضيق يحي عيناه قائلا بأستنكار

محمد البحيري مين؟..

سالي بجسد مرتجف

جوز فرح، هو كان واقف هناك والله واختفي..

يحي بقلق

بت انتي مش ناقصين رعب، تلاقي حد شبهه..

سالي بقلق ونبره خائفه

لا ده هو انا فاكراه كويس انا شوفته في المطعم مره لما اتخانقت معاه وشوفته في المستشفي لما جالك بتد ما ولدت..

يحي بابتسامه ساخره

 بطلي عبط ي ماما والله تلاقي حد شبهه، محمد البحيري ي سالي مات قدام عينيا من 3 سنين..

_حديثه جعلها تشعر ببعض الارتياح قليلا، ثم امسكت بيد صغيرها وكادت ان تذهبت مع زوجها للداخل ولكن اوقفها يحي قائلاً بابتسامه هادئه.. 

يحيي

قولت لماما تاخد يونس يبات معاها النهارده عشان هننزل نلف شويه فالشارع انا وانتي وحشني الجنان معاكي..

سالي بغيظ

جنان اي بس دلوقتي، مع نفسك انا دكتوره وليا هيبه قدام الناس..

اقترب منها متناسياً كل شيء حولهم قائلاً بنبره غنائيه

والناس بيلموني ليه ي قلبي، عاييزين يحرموني منه لي ي قلبي..

سالي بضحكه هادئه

لا في حاجه كده لعبد الحليم سمعتها وافتكرتك قال فيها "والشووق، الشوق غلبني الشوق دوبني"..

_ابتسم باتساع وكاد ان يجيبها، ولكن قطع اندماجهم ياسين..قائلاً بغيظ:.. 

ياسين

والله كده كتير انا كنت مستحمل واحد بس بمحن عبدالحليم يبقو اتنين والله كتير..

يحي بغضب وهو يحمل صغيره

 تعالي ي يونس ندي عمك ع قفااه عشان وحشته الاهانه..

_دلف جميعهم للداخل وهم يمرحون، فحين نظرت سالي للخلف، وبداخلها قلق للغايه...

_وما ان دلفو حتي خرج محمد من خلف الحائط الذي كان يقف خلفه وهو ينظر ليحي وعائلته من بعيد بابتسامه هادئه ثم اردف بصوت هادئ.. 

محمظ

مكنش ينفع تعرف اني هفضل عايش ي يحي، الكل كان لازم يعرف اني ميت..

اخرج هاتفه واجاب ع المتصل به قائلاً

ايوه ي جميل باشاا البضاعه اتسلمت وانا هطلع ع المطار وجاي..

اجابه الاخر بجمود

دير بالك منيح ما بدي حدا يعرفك ولازم الكل يعرف انك ميت، كل معارفك لازم.يضلو عارفين انك ميت..

محمد بابتسامه ساخره

 انا معنديش معارف ي دروزي باشا، وانا فعلا ميت من لما معارفي وحبايبي وابني ماتو ومحمد البحيري مات معاهم واللي بيكلمك دلوقتي سامر الدروزي ابنك زي م انت قايل للناس..

ابتسم جميل بخبث قائلاً

 هيك منيح دير بالك ع حالك وما تتاخر بنتظرك...

_اغلق محمد معه، ثم اتجه لسيارته وقادها مغادراً من هذا المكان..

_وكيف لشيطان ان يصبح ملاك، وكيف لشخص تعود ع الاذي ان ينعم بحياه جيده، وكيف لعين تعودت ع الدمع ان تبتسم، وكيف لشخص اعتاد ع الخروج عن الطريق الصيحيح ان يعود للصواب..

=الخلاصه: كل انسان اعتاد ع فعل شئ سيعود له..

"خالد ويحي وعدنان بداخلهم اشخاص نقيه غير كاذبه ولا مخادعه عندما اجبرو ع الانحدار عن طريقهم عادو له سريعا مصححين اخطاءهم، كان موت توني وبعض الاشياء السيئه التي مرو بها درس مهم جداً ليجعلهم يتركون اخطاء الماضي ويجعلون حاضرهم ومستقبلهم افضل"..

" خليل وعمر كلاهما اعتاد ع فعل السوء واصبح الصح والصواب لهم خطأ وعيب لذلك اخذو جزاءهم،وكانت ضحية اخطاءهم فرح،فلكل قصه ضحيه وذلك الاحمق خليل اختار ضحية القصه شقيقته البريئه التي كانت كل جريمتها انها احبت وكانت فتاه حالمه ولكنها وقعت في قصه كانت قاسيه لن تشفق عليها اطلاقاً"..

"اما محمد فهذا تربي ونشأ ع هذا الشئ، بداخله شي نقي ولكن افعال الاخرين المشنه به قتلته وجعلته ملئ بالظلام غير قادر ع الرجوع او بمعني اخر لا يوجد من يخلصه من ظلامه"...

_النهااااااااايه👋🏻

لمتابعه روايتنا زورو قناتنا على التلجرام من هنا