رواية ليه يا زمن الفصل الرابع و العشرين 24 بقلم نسرين بلعجيلى
الدكتور اتصل بالمستشفى وجهز كل حاجه لدخول عماد المصحه
وراح معاه حسن و عبد الغني
فاطمه : انا مصدومه اوي من اللي حصل عارفه انه تعبان بس مش للدرجه دي
عواطف: اسكتي لما امك تصحي هنقول لها إيه؟
وبعدين جوزي بص لي نظرات وحشه قوى
فاطمه: و جوزي كمان امك السبب فضلت تقول لنا اوعوا تفضحوا اخوكم لو كانوا عرفوا كانوا منعوا الجوازه دي
عواطف: البنت صعبانه عليا اوي اوي
فاطمه: خايفه من اللي جاي وخايفه من مصاريف المصحه ومؤخرا امك مابقتش تدينا حقنا… كله لعماد الجوازه دي صرفت عليها جامد وانا مش عارفه افاتحها في الموضوع
عواطف: احنا في إيه ولا إيه؟
فاطمه: يا عواطف دي حقيقه امك كل اللي يهمها عماد و بس
حتي المحل في سوق الخضار بي إسمه ومخليه الولا عليوه اللي مشغله و ياعالم بيعمل ايه من ورانا المال السايب يعلم السرقه
وكمان فلوس الأرض عمامك بيبعتوها لها
هو احنا مش لينا حق فيها احنا عايزين بس مبلغ كل شهر
العيال كبرت ومحتاجين مصاريف الحمدلله جوزي مش مقصر بس ليه انا عندي حقي ومش مستفيده بيه لحد أمتي هنفضل ساكتين
عواطف: خلينا بس نشوف المصيبه دى انت شوفتي الجيران كانوا بببصوا علينا ازاي ؟
فاطمه: شفت يا ختي ايه الهم اللي احنا فيه دا يارب
************************
علي حاول كثير يتصل بزهره ولقي موبايلها مقفول استغرب إنها مارجعتش اتصلت بيه و اكيد أهلها بلغوها بزيارته وإنه طلب ايديها
وهو في البلكونه شاف اخته فرح مع مراد وكان مبسوط انه اطمن عليها معاه مراد صاحب عمره وعارف أخلاقه وعارف انه مالوش في الشمال وراجل يعتمد عليه
مراد: ياه الوقت طار بسرعه
فرح: احنا اتاخرنا قوى وانا مش عايزه مشاكل
مراد: مافيش مشاكل انتي مراتي وزي ما قولتلك انا اللي هوصلك كل يوم الشغل وبقيتي مسؤوله مني اي حاجة عايزاها تطلبيها مني
فرح: ربنا يخليك ليا يلا نطلع
وهما علي السلم
سمعوا صريخ نوال اللي رج العماره كلها
علي طلع جري علي شقة نوال فوق والمعلم وراه
رحمه: يا ساتر استر يارب
فكريه : تلاقيها تمثيليه تانيه هو انت ما تعرفيش الاعيبها
علي فضل يخبط بس المعلم فتح الباب بالمفاتيح بسرعة
دخلوا لاقوا كريم واقف بره و حاط إيده علي راسه
علي: في إيه؟؟
كريم بيبص وهو مصدوم و مش قادر ينطق
علي جري علي الأوضه شاف سماح سايحه في دمها وبص لايديها لقاها قطعت شراينها جري عليها شاف نبضها
نوال: بنتي ماتت
علي: لا لسه عايشه لازم نوديها المستشفى بسرعة
المعلم دخل واتصدم من المنظر
علي شالها ونازل بيها في السلم
رحمه أول ما شفتها اتخضت
رحمه: بنتي مالها ؟؟
علي: انتحرت لازم الحقها بسرعه مراد بسرعه وديني في عربيتك
فرح كانت بتترعش
مراد دخلها جوه
مراد: ماما خلي بالك منها هروح مع علي
وطلع يجري
محمد جوز سميره مسك إيد المعلم
محمد: يلا بينا وراهم
نوال: خدوني معاكم
ونزلت سبقتهم علي السلم
لحقت علي و ركبت معاه العربيه
رحمه : استنوا خدوني معاكم
سميره مسكت اختها حضنتها
فرح: انا السبب انا انانيه فكرت في نفسي علي طول كنت بفكر فيها بس المره دي قولت لا
سميره: وحدي الله انت مالكيش ذنب
تهاني: لا حول ولا قوه الا بالله العلي العظيم
نانسي: خدي اشربي اللمون دا يهديكي هي اكيد عملت كده علشان زعلانه لأن المعلم كان قاسي حبتين في الكلام وكمان طلق امها قدامها
احمد: استغفر الله العظيم هو دا اللي كنت خايف منه وانت وابنك مش بتسمعوا الكلام
حسنين: دة نصيب يا بني ماحدش بيهرب من نصيبه بنتنا مكتوبه لإبنك بارادتك او من غيرها ربنا كاتبها له إن في الساعه دي هيحصل كده سماح ليها ربنا لو مكتوب ليها تعيش هتعيش مش مكتوب دة قدرها تعددت الأسباب والموت واحد
فكريه: ماتقولش الكلام دا انت اصلك ماتعرفش البت و امها
حسنين: لمي الدور يا فكريه وادعي البنت تقوم بالسلامه
فكريه: خليني اقوم اشوف الولا كريم مش بينطق ليه وساكت
طلعت له فكريه كان قاعد على الارض وبيعيط
فكريه: يا حبيبي يا ضنايا اهدا كده ربنا معاها
كريم: انا مش راجل ماعرفتش انقذها ولا اشيلها ولا اروح معاهم
فكريه: ماتقولش كده ماهو حسنين وحمى اختك معملوش حاجه يبقي مش رجاله الرجوله مش كده وانت راجل من ضهر راجل الصدمه كانت شديده عليك علشان انت اول واحد شوفتها
كريم: هي ممكن تموت؟؟
فكريه: بعد الشر تف من بؤك ان شاء الله تبقي كويسه
كريم: كله منها انا بكرها سابتها قافله علي نفسها وقعدت تندب علشان طلقها
انا بكرها اوي يا عمتي صحابي بيعايروني بيها بيقولولي يابن الرقاصه امك مالهاش فصل ولا اصل
فكريه: امك مالهاش ذنب إنها ماتعرفش أهلها ولو رقاصه كان غصب عنها وبعدين دول هما كام شهر وبعدين دي حافظت علي نفسها وابوك اتجوزها حتي لو انا مش بطيقها بس الحق يتقال ماحدش يقول حاجه في أخلاقها دي هي مش بتعتب باب العماره الا و المعلم معاها
هي بس سماويه شويه وقلبها كده اسود ومش بتحب الخير لغيرها كده يعني فيها كل العبر بس شريفه يا ولا وبعدين انت بتجرجرني في الكلام وانا ميته في دباديب امك
كريم ضحك
فكريه: اضحك يا ولا الدنيا لسه بخير قوم انزل معايا تحت انا مش هسيبك هنا لوحدك وبعدين عيب نسيب الضيوف تحت
في المستشفى الكل بيجري ودخلوها العمليات بسرعه
نوال: حسبي الله ونعم الوكيل فيكم ضيعتوا بنتي
المعلم: إنت لسه ليكي عين تتكلمي كنتي فين لما بنتك عملت كده؟
علي: مش وقته الكلام دا
رحمه: يارب ارحمنا برحمتك
بعد ساعه وهي في العمليات طلع الدكتور
الدكتور: محتاجين نقل دم بسرعه
علي: أنا أخوها و فصيلتنا واحده
نوال فضلت تبص عليه واستغربت تصرفه
نوال لسه مش مستوعبه إنه اخوها لأنها طول عمرها شايفاه عدو ليها
نوال عايشه في دور الضحيه وان الكل بيكرها والكل عايز ينتقم منها
علي اتبرع لها بدمه
وبعد وقت طلعت سماح من العمليات وطلع الدكتور
الدكتور: الحمدلله البنت بقت كويسه وهي في الافاقه و بعدين ننقلها للاوضة
بس لازم أبلغ البوليس لانها محاوله انتحار
مراد: ممكن يا دكتور عايزك في كلمتين
وغمز لعلي انه هيتصرف
نوال: الحمدلله يارب
مبسوطه يا رحمه المعلم طلقني وبنتي كانت هتموت وابني خدتيه في حضنك دا حتي مجاش يطمن علي اخته
رحمه: لا حول ولاقوة الابالله العلي العظيم ربنا يهدي لك نفسك يا نوال
بعد يوم طويل كل واحد رجع بيته الا نوال فضلت مع سماح
علي اخد دوش ورجع يتصل بزهره و تليفونها مقفول و مش عارف يعمل إيه
اتصلت بيه هايدي
وبلغته ان معاد الطياره اتغير ولازم يسافروا الصبح مش بليل زي ما قالت له
علي زعل لانه مش هيلحق يشوف زهره ولا يروح عندها في شغلها
أما احمد ابو مراد كان نايم علي السرير وحزين
تهاني: مالك بتتقلب ليه ومش عارف تنام ؟
احمد: صدقيني يا تهاني انا حبيت فرح بس في نفس الوقت قلبي مقبوض ومش مطمن العيله دي كلها مشاكل ليه ندخل نفسينا في حوارات مالهاش اول من آخر
كل حاجه كانت غريبه الواضح انهم ماكانوش يعرفوا ان المعلم جاي لكتب الكتاب ودا كان باين من تصرفاتهم
وكمان الكلام اللي بيتقال في الحاره
إبنك طلعت عليه سمعه وحشه انه كان بيشاغل الصغيره وبعدين اتجوز اختها الكبيره
والبنت اللي انتحرت ذنبها في رقبتنا كلنا شكلها بتحب إبنك جدا
وليه فرح تبقي عارفه ان اختها بتحب مراد وتوافق تتجوزه دي انانيه منها ازاي هتعيش كويس وهي عارفه ان في وحده بتتعذب بسببها وكمان حاولت تنتحر وذنب امها إيه تطلق
ولا كلام المعلم علي الطبقيه وان البنت اللي اختارها علي مش مناسبه
ما احنا كمان بنتهم مش مناسبه لينا ليه إبنك يتجوز واحده من الحاره الناس تقول علينا ايه اهلك وأهلي
ولما يعمل الفرح حيكون في الشارع زي النهاردة..؟
لا يا تهاني احنا غلطنا جدا
تهاني كانت بتسمعه و هي عارفه ان جوزها علي حق
تهاني: كلامك صح بس اللي حصل حصل وانت شوفت إبنك هيتجنن عليها
نام يا خويا الصباح رباح واللي فيه الخير يقدمه ربنا
**************************
Nisrine Bellaajili
زهره فضلت تدور علي موبايلها كثير لحد ما زهقت وطلعت السطح تشم هواء وبتفكر ازاي كان كتب اخت علي ومعزمهاش ولا قال لها حاجه
هتعمل ايه في الموبايل وهي مش معاها فلوس تجيب واحد تاني هتكلم علي ازاي
أما محمد وفاطمه قاعدين يخططوا ازاي يقنعوا زهره بالجواز
بس فاطمه ضميرها انبها وحاولت تضغط علي محمد انه يوافق علي علي ويخليه هو يواجهه كل المشاكل
بس محمد كان اناني في تفكيره كل اللي همه ان امره ما يتفضحش بعد كل السنين دي
أبطالنا كل واحد فيهم محتار في مشكلته
حتي المعلم قاعد يفكر في موضوع جواز علي من زهره
أما نانسي كانت بتفكر ازاي تأمن نفسها تسمع كلام امها وتحمل ولا تطلع من الجوازه دي خفيفه وتأمن مستقبلها و مستقبل عيالها
رحمه كانت في دوامه كبيره حزنها علي سفر علي و على فرحه بنتها اللي اتكسرت لتاني مره
ولا علي سماح اللي راقده في المستشفى وخايفه تاخد ذنبها و فعلا هي بتحب مراد ازاي فكرت تنتحر اكيد متعلقه بمراد ومجنونه بيه ولا نوال اللي طلقها المعلم اكيد عملت مصيبه علشان يطلقها
طارق كان في مكتبه في الشقه بيراجع اوراق قضيه وافتكر مسك لما كانت بتزعل لما تشوفه سهران علي قضيه وتيجي تقعد قدامه لحد مايخلص
سأل نفسه ليه مش قادر ينساها و مش قادر يقرب من اي ست تانيه هو راجل وليه متطلباته ليه نسي نفسه ونسي رغباته
هيفضل عايش علي ذكراها لحد أمتي
وعد نفسه انه لازم يزور طبيب نفسي علشان يعالجه او يساعده انه يتخطى الازمه دى
هايدي بقي كانت قلقانه وخايفه من السفريه دي وخايفه ان خطتها تفشل هي عايزه علي واتعودت لما تعوز حاجه بتوصل لها
ابوها بقي كان في مكتبه ومشغول في اتصالاته شكله عنده قضيه كبيره في دبي علشان كده بعت هايدي وعلي
خاصة علي اللي الناس طالبينه بالاسم يا ترى علي هيعرف يقوم بالمهمه دي وهيعمل إيه مع بنته هو مش مفهمها كل حاجه
وكمان خايف عليها من الخطر
يا تري إيه اللي مستني ابطلنا في اللي جاي اكيد كل واحد فيهم حياته هتتقلب وتتشقلب
تجري الرياح بما لا تشتهي السفن
بدل ماتدور وتبحث علي الروايات خليها علي تليفونك وحمل تطبيقنا
