 |
رواية بيت الخبازه الفصل السابع عشر 17 بقلم زهرة الرمان
بسم الله الرحمن الرحيم
السلام عليكم ورحمه الله وبركاته
#بيت_الخبازه ......#بارت١٧
:شلونگ بالتࢪاب شلون گاضيها؟
هيج بصوࢪتگ ضليت احاچيها؟
المفࢪوض الوࢪد يندفن بالبستان
شچابگ للگبوࢪ شعࢪفگ بيها؟
يبو الضحگة الحلوة هاي تاليه؟
استبرق: ياريتني كعدت واخذت اختي بحضني ولا اشوف هذا اليوم
أمي راح تموت مني
طلعوا مروه وصارت مثل العاصفه تريد تأخذ مروه والكل يريد بهدأها ماكدرو صعدوها بالسيارة وهي تصرخ لاتخلونها بخشب ولكم هاي مروه
هنا إني حسيت إني حقيره شلون ضليت بفراشي وما جبت اختي يمي وأمي مريضه
عمه عزيزه لازمتها وام رحمن
وعمامي خلوها بالسياره واحنه اخذتنه إني وصفا اخذتنه عمه عزيزه
وأسأل تكول اسكتي هسه
راحت سياره بيها أمي وعمامي وخالتي أمل وي أمي واحنه رجعنه للبيت ويانه عمو رشيد وعمه عزيزه
كالت اجمعي شكو غراض بسياره صاحب رشيد سياره حمل
سألت كالت نرجع لولايتنه
والزايره شلون
كالت هسه يجيها قشعم
أول ما لمينه غراضنه زايره سنيه لزمت صفا وبقت تصرخ بكل صوتها ما انطي حميده
قشعم سحب زايره سنيه وبقى يحجي وي عمو رشيد يبقينه
بس رفضوا
ردنه نصعد زايره سنيه موتت روحها
قشعم لازمها ويبچي صفا ماتت من البچي ع الزايره
إني ماعرف دمعي على اختي مروه لو ع الزايره إلي تعلقنه بيها لو ع صفا الي صارت حمرا من قهرتها وهي أصلا متتحمل لأ ضوجه ولا حراره
مشت السياره وعيونه على الزايره إلي كعدت بالباب تصرخ مو تبجي
طلعت الكلمه مني من قهرتي گلت بحض وبخت كلمن اذانه واذاج بيبي سنيه
رشيد:شنو هاي الوكاحه ولج عليمن ادعين
استبرق:بقيت اباوع من شباك السياره وعمه عزيزه تجاوب عيفها خويه القهر كلشي يخليها تحجي بقى يكول يراد نعدل ترباتها من جديد
ولا حجيت لزمت صفا وخليت راسها يحضني خفت عليها
وعرفت راحوا يدفنون اختي يسولف عمو رشيد بالتلفون وإني عيوني بدت تصب رحتي خيه للتراب
شلون حالج يمه تخلين مروه بالگبر وأنتي حاربتي الكاع علمودها وعلمودها تشتغلين وبضيم خلصتي هاي الأيام
وصلنه لبيت عمي حامد لگينه نسوان عمامي وبناتهم ويبچن وبقن يحجن ليش هيج خديجه رحتي ببنات حاجم جان بقيتي كبال عمامهن وراحت البنيه بساع بساع
إني اباوع وعمه عزيزه تاشرلي اسكتي
بقيت لازمه صفا وروحي كوه عنهن
بليل وكالو اجو الدفانه
دخلت أمي تلكنها يتصارخن ويلطمن أمي ما لطمت وياهن ساكته عيونه كوه فاتحتهن تمشي كوه
ولازمته خاله أمل وكعدتها اشرت عمه ايمان لنسوان عمامي يعني اسكتن كلمن راحت بمكان وأمي مدنكه وساكته صفا تسحب بيها يمه يمه متحجي دحل عمو حامد وكال لبنته افرشي لعمتج تخربطت عدنه مرتين وشمر علاكه بوجهي هذا علاج امج وينه سيف خل يعلكلها مغذي
فات للحمام يسبح وللصبح أمي ما تمددت كلها نامت وأمي كاعده إني ابچي واباوعلها
سوو فاتحه بجامع لاختي والنسوان اجن من الصبح التبجي والتلطم وأمي بيدها المغذي تسكتهن عمه عزيزه من يدخلن
اجت خالتي أم ماجد شفتها وبقيت اكل باصابعي كلهم اذو أمي المن جايه وحضنت أمي وتبجي أمي ما نطت أي رده فعل
ولا تحجي بس من تحاجيها صفا تجاوب على كد الكد فهمت هي كارهه الحجي كله
تعبير حزنها هيج
أما إني مستحيل اسامح نفسي
احس بالذنب حسيت بمسؤولية وضع أمي بسببي وجه صفا الفارغ بسببي تجاوز عمامي وعيالهم على أمي كلساع واحد عود مقهور على مروه يبز أمي بكلمه لو يلومها وإني بداخلي اكول إني السبب كم مره كالت شدي حزامج وي حزامي وراي شمات والدنيا يرادلها عيون مفتوحه واحنه مالنه أحد
هسه فهمت كل حرف
من شفتهم
من شفت عمو حامد شلون يريد يدفر أمي برجله بالمستشفى وهي وضعها يكسر باب الگلب
بقينه يومين الناس تروح وتجي وبجي واسمع التدردم البيت انسحك بفاتحه تكول ايمان
شسمع اسكت لأن أمي حالتهه ماتسمح تسمع كلمه تغث
اجه سيف إبن عمي حامد
يغير الكانونه مأوته التفت عليه كاعده بغرفه عمه عزيزه أمي وإني وصفا من دخل التفت كال استبرق جيبي ثلج خلي ع ايد عمتي
ما جاوبته
ما عاد الكلمه كمل الكانونه وطلع
لحد يوم السابع أجت خاله ام ماجد
أمي متجاوبها من تسولف تحجي وي خاله أمل أمي متحجي
بدت الناس تخف وكلمن عمامي راح لبيته
صار عشر أيام على موت مروه
اجت عزيزه تباوع على أمي وتطلع
شبيها إني كاعده يم امي إني وصفا
رحت وراها شفت بالصالة زوجه أبوي عرفت جايه عود لأمي بس عمه عزيزه مخلتها تشوف أمي خلتها تروح احسن جان صارت حصتي
دخل عمو حامد سالني امج نايمه لو كاعده أمي ممدوده ولافه راسها
كتله نايمه
راح وشويه ورجع كال كعديها
يمه يمه عمو حامد يريدج
بالباب بعده مادخل لفت حجابها وكعدت دخل سحب كرسي وكعد مقابل أمي بس بعيد
حامد: سويتي البراسج واخذتي البنات موتي الطفله شنو بعد براسج تكعدين لو هم نبقى مطالب هاي بنتج بعده صغيره وهاي صاير لسانها بطولها
شلون يمرت اخوي صفيني على راي ما احتاريت بكتال اخوي بكد ما حيرتيني أنتي
كتلج اكعدي ببيتي ما استچنيتي
علساس اليوم مزوجه بيت الداود
مو ربيتي بينه مو بحلج عمار كبر وياج
ما ركدتي على مشاكل نسوان
كلت عيفه
كلتي اروح لاخوي كلت مي خالف رحتي واجيتيني بليله ضلمه
امنت بالله
كتلج تنحل قضيه حاجم ونشوف حل للبيت ناجره ونأجرلج يمنه بناتنه كبالنه كمزتي يبيت حاجم ويا حاجم تزوج
ويا مرت حاجم
افتريت وياج بالاطباء وكالو حالته تتعالج بالتدريج دكيتي رجل لأ إلا لبغداد واخذناها لبغداد وطلع مركز بغداد قفاصين باعترافج بس صارت لغوه بسيطه لميتي جوالاتج ورحتيلي لبغداد ديار غربه ولا الج والي ولا عم ولا خال
مره داخله بالعمرين وشاب بعده جاهل كابلتي البيت وهو خرابه واجيتج يبت الناس خطره بغداد رجعي معليكم ييه وبناتكم معزازات مكرمات
ومن بداية الشارع يسمون بيتج بين الخبازه
وتفترين بالشارع بالمعاملات تردين تكعديلي انوب بمدرسه
كلت بلكي تصير عدها غيره ضراير وتجي تكعد بيتها ووديت ام فضل
وماكو اضطريت اكلها وهي جايه تريد تتقرب النه
كتله بويه اكعدي هم ابنه عدها
وما رديتي الحصلناه شنو
استبرق:سحب دشداشته وحجه
حطي بشليلي شنووو فهميني وصوته بده يعلى
وعمي يصيح هسه نواياج شنو
أمي شالت راسها جاوبت بس كلمه
بكيييفك
حامد:,بكيفي بشنو احجي لاتعلين گلبي
خديجه: تريد اكعد ببيت حاجم اكعد تريد بنات اخوك تاخذهن تربيهن اخذهن
استبرق:,شتكولين يمه
حامد:من يأكلون تبن الكبار الصغار ينطمون خليني افتهم اللعبه الجديده شنو مال بت مزهر السد خان
خديجه:هذا التريدونه إني اسوي تريد نكعد بيت حاجم اكعد تريد تأخذ بنات اخوك ماعندي أي مانع
إني فشلت وخلص شخسر بعد
1
حامد ،:نفضت دشداشتي وكمت لاحول ولا قوة الا بالله العلي العظيم
استبرق:يمه شنو البكيفه فهميني شنو ووين نكعد وي مرت أبوي لو وين جاوبيني
خديجه: استبرق لأ تعلليني إني ماعرف اتصرف وسوء تصرفي موت اختج شتردين افرط بيجن همه زلم يتكفلون بيجن إني خلصت حياتي لهنا ووكف عداد عمري
دخلت عزيزه
كملت كلامي إني اسمع هذا من هبطه مات انجلط إني حطيت بنتي بالتراب وهاي كاعده وانوب عزيزه ترديني أكل إني حرمت بنتي الهوا ماحافضت على بنيتي
عزيزه:استغفري ربج بنتج راحت لرب كريم احسن مني ومنج هذا يومها تعددت الأسباب والموت واحد خيه إذا مو الكهرباء مو هالتكولين بحضني وربج بحضنج جان ماتت
ماكو تأخير الأجل
استبرق:,عمه عفيه عمو حامد يكول نكعد بيتنه شلون ووي زوجه أبوي
عزيزه:عمه بيتي إني موجود بيه بس ميثم ومرته نبنيلكم غرفه وتكعدون تردون هنا هاي غرفتي صارت لسيف وسيف كال الولد انام بالصاله ماعده نحاسه
تكولون ببيتنه نكول لمرت حاجم تشوفلها مكان
خديجه:اكعد ببيتي اروح
استبرق:ومرت ابوي
خديجه:تطلع ما تطلع اكعد ببيتي وأنتي تسكتين
استبرق:,رجعنه للاسكتي
اسبوعين وكالت عمه عزيزه اجت خلود تريد تشوف أمي
أمي ماعارضت
خلود: البقيه بحيانج
خديجه:حياتج الباقيه
خلود: الله يكون بعونج
استبرق: ساعه بقت بس عود تصبر أمي وكذا بعدين أمي رفعت راسها كالتلها اريد ارجع لبيتي
خلود: إني هسه ماعندي مكان بس عادي اخلي غراضي بالمطبخ اسوي غرفة وباقي لبيت الكم وبالترك نسوي مطبخ
خديجه:احسبي حسابج اسبوع واجي
استبرق: دخل عمو حامد وسأل شسويتن
خلود جاوبته مثل ما حجن
حامد:هيج الوضع يوالمج خديجه لو ااجر بيت
خديجه:يوالم
استبرق طلعوا وإني بديت لحجي وي أمي
شنو يمه لاجئين شنو هي تكعد ببيتنه
مو كافي هنا الله طيح حضنه من ذوله انوب بيتنه مانرتاح كون باقين يم زايره سنيه ولا هالذله اندك الباب دخل سيف فتح كنتوره يأخذ غراضه وإني ادردم بهدوء شفت صور معلكه بكنتوره ما ميزتهن بس مبينات قديمات
طلع وأمي بدت تحجي
خديجه:منا وهيج عمامج يتصرفون إني مالي أحد هذااك خالج سمع بنتي ميته ما اجاني لو خالتج تغريد الابنها وكلته وشربته تالي هالشارد وهي ما شوفتني ركعه وجها
أهل يفشلون فاكعدي عمامج يكفلونجن امجن غبره امجن ثوله امجن هجمت بيتها بيدها ولطمت
استبرق:سولفت وانوب انهارت لطمت ملخت نفسها تملخ وإني بقيت اكللها خوش يمه بس اهدي اهدي كلشي تكولينه صار بس اسكتي
وسكتت لأجل عيون أمي إلي تحولت بسبب خوفها الصار من ماتت مروه
اسبوعين ورجعنا لبيتنه لأول مرة دخلنه بعد موت أبوي كعدت أمي بالصاله وشبعت بجي الحايط بيه رسم لمروه تخبلت أمي
ويانه عمه عزيزه وخاله أمل وهي فرفحت روحها
دخلنها بالغرفه بيتنه كله غرفه وصاله ومطبخ المطبخ صار غرفة لخلود والترك صار مطبخ خلود مخليه مطبخها بغرفتها سوا
من دخلنه ولدها بباب المطبخ القديم غرفتها وهي واكفه وساكته
كعدنه بالغرفه وعمو واثق ويانه وبعدين اجه عمو عمار جاب ثلاجه خلاها بالصالة وجاب مسواك وراحو بقت يمنه خاله أمل وعمه عزيزه يومين
وراها سألت عمه عزيزه عن نقل مدارس شلون كالت بعدين عمامج يرحون وينقلونجن بقينا فتره من سألت كالو وره نصف السنه ماكو نقل يعني شنو راحت علينه السنه أمي ودت على عمو حامد حتى نروح لبغداد للمدرسه بقى يصيح.
حامد:انعل ابو بغداد يابو خيرها خلي تفوت هاي السنه
خديجه:,بكيفك
استبرق:يمه شنو البكيفه مو جنتي تكولين دراستجن اهم شي عمو مو نورس نقلتها من مكان لمكان لأن تخاف تخسر سنه
حامد ،:,, أول مرة احجي بهدوء وبادب ثانياً إني ما كلت بطلن كلت تفوت وترجعن للدراسه مو متعاجز بس المدرسة ما تنطي نقل شلون اهد عليهم
استبرق:اباوع لأمي مسلمه امرها لعمي ليش ليششش يمه بس طلع بديت احجي ليش يمه فهميني
شنو السبب تخليتي عن كلامج
خديجه:مو جنتي ادكين وتلطمين تردين تبطلين يلا بطلتي وضلي كاعده
استبرق:, أي بس أنتي صايره شيكول عمي تكولين بكيفك ليش واندك الباب
خلود ،:يصير ادخل
استبرق:,هو أنتي دخلتي
خلود،: عبوني ام استبرق إني عندي عرف اكدر انقل البنات بس انطوني مستمسكات
استبرق:*بقيت اباوع على أمي شنو عدها عرف
أمي هم جانت متردده متقبل تنطي المستمسكات فهمت خلود كالت راح اجيب ورقه القبول حتى انقلهن لمدارس قريبه
ورا كم يوم صدك نقلتنه شلون مندري
صار اربعين مروه وليليله أمي تنام بونين
لحد ما اخذونه لقبرها دافنينها
يم بابا
بس الاسماء والتواريخ على الگبور مالكينه أحد يتلكانه اجيناكم بدينه ضيافتنه شو محد تلگانه شلون
المگبره بوحشه على ترابها كعدنه ونعاتب ونسأل
وكفت على گبر أبوي عاتبته
ليش بويه ما بقيت تربينه أنت ليش
خليتنه بيد الناس
بويه مكسوره كسره جام روحي صرت كل اليقربلي اجرحه لأن فراكك خضرلي اشواك ما اريد احد بعد يگطع لوني بهتت كل الوجوه وصارت غريبه بويه بس رحت
وهاي اختي من كثر محبتها الك اجتك وإني المن عفتني ليش مو إني بمكانها
ولج مريوه يبعد عيون اختج العابج خيه موتني صوتج يفتر عليه خيه ردت تكبرين واصير عليج كلش حنينه حالفه محد يضوججن كلت تالي هديتج للكهرباء إني السبب
شبعنه بجي ومعانب قرينه قرآن ورجعنه
...
كل يومين ثلاثه تمر عمه عزيزه لو عمو رشيد قريب بيته
يجيب مسواك يخلي بالثلاجه بالباب يسأل محتاجين شي ويروح
رجعنا للمدرسه والامتحانات بقتلها ايام
وإني يدخل منا يطلع منا الدروس
ارجع للبيت الكا أمي مكابله لعبه الأرنب مال مروه ماتقبل ناخذها
مالها بطبخ او شئ
اجيت اليوم لكيت سياره بباب بيتنه
بس وصلت راحت رجال لابس نظارات
دخلت لكيت بالترك غساله جديده خلتها خلود
وهذا الكلام ابد ما داخلين المطبخ القديم غرفتها
سألت أمي كالت مادري
اروح وعمو عمار يجيب صفا من المدرسة
ويجيني إني هم يوصلني
موصيه عمو حامد يوصلني ويوصل صفا
ارجع إني اسوي أكل اوكل أمي گوه غدانه وعشانه وريوكنه مجرد حشو بطن من الجوع تجي ايام مالنه صوت لأن أمي إلي تنتبه على القميص المفتوك وعلى الصدريه خاف وصخه الحذاء خاف بيه طين
كلشي ما الها شغل هسه اعتمدت على نقسي ادرس صفا وانضف وارتب ملابسها كلشي يخصنه إني صارت مهمتي بس إمي بغير دنيا نوبات ادخل من المدرسة الكاها تنعئ وتبجي واريد بس اسكتها ما تسكت
ونوبات بليل تبقى تحجي باسم مروه وتكعد اشوفها وتبقى تبجي
من مات أبوي صحيح أمي تأثرت بس هسه لأ أمي صارت وحده ثانيه
عمامي يرحون ويجون علينه اليجي يحيب مسواك واكل بس البيت ميحتاج بس مسواك اليوم جمعه وصفا كالت اغسلي شعري هيج على طول هاي الغتره تستحي تبدل كامل يمي
أغسل شعرها لأن ما تسيطر وهي تكمل سبح وتطلع
غسلتلها شعرها وطلعت شويه وصاحتني الحنفيه انكسرت والمي ترس الحمام وإني ماعرفت شسوي
شسويله ياربي ركضت كلت لامي كالت روحي بالترك تلكين يم السخان كاك احمر فري وسدي
رحت سديت المي وباوعت صندوك أبوي مال العده بمكانه فتحته وكأن آثار ايدين أبوي بيه
دمعت بس اختفت الدمعه والعبره من شفت ابن خلود الخبل
جايبته سحل ويكمز وتضربه كل راشدي تسطره وما يبجي يخاف منها
كلت هاي شبيها ما شافتني من دخلت من بره لأن بالترك
وتحجي بالتلفون وتخنزر على ابنها الخبل
ودخلت
إني وراها سديت ياب الخارجي ودخلت سولفت لأمي باوعت بوجهي وكالت معليج بيهه
وراها افترت وتحجي شبيه المي مكطوع عبالها من الاساله مگطوع طلعت
إني سديت كاك المي البلترك
خلود:ليش
استبرق:انكسرت حنفيه الحمام
خلود:هي بيها تكلسات وملح قديمه نشوف أحد يبدلها هسه
استبرق: شويه واندك الباب شاب بالعشرين كالتله تعال فات للحمام بيده سكول سبانه وغراض وسواها وراح
رجعت لأمي هاي دخلت رجال للبيت يمه
خديجه:منو
استبرق:شمعرفني
خديجه:لأ اطلعن اكعدي هنا واسكتي
استبرق:بدت الإمتحانات وصارت مستمره خلود تطلع للدوام تأخذ ولدها الضاهر تخليي أبنها بمكان والثاني وياها
ومن ترجع نسمع يوميه تضرب بابنها الخبل وحتى ما يبجي يخاف يرجف منها ونوبات تعصب تبقى ادعي وتسب بنفسها وصوتها يجيب التايه
كله هذا واحنه أمي متقبل حتى اكول لعمه عزيزه
تكول معلينه
اليوم آخر امتحان عمو عمار وصلني للبيت وراح كال إذا تحتاجون شي خابريني ارقام عمامي صارت بتلفون أمي كلهن
رجعت لكيت أمي نايمه اندك الباب
رحت فتحته لكيت رجال ولهناك سياره حديثه
سألني على خلود كال ام أنمار موجوده
أنمار ابنها الچبير
كتله ماموجوده وراح
رجعت دك تلفون أمي
ام رحمن اتصلت على أمي بقت تسأل بيها وتسولف بس أمي تحجي كله مختصر مالها خلگ أحد
وقشعم على طول يتصل
ونخلي صفا تحجي وي زايره سنيه سولفنه قشعم شلون تمرضت ورانه
وامه جايبن للبيت مرممينه وكاعده امه فوك وهو وزايره سنيه باقين جوه
اجت خلود وإني أسوي غدا كلتلها اجه رجال ووصفته الها ما جاوبت بس هزت راسها
شعليه بيها
حامد:شنو هم ترحين تشوفينهن
عزيزه: أي جاي اروح كلما اروح للسوك أمر عليهن
حامد: ولج خاف يتمالخن
عزيزه: اطمأن مركب الشرايج مشه ومركب نسوان الحما وكف
حامد:ها يعني يتصافن خوش بس احنه ما نعرف خلود حك المعرفه لمن مات حاجم يلا عرفناها وشفناها جنه سمع نسمع بيهه لذلك ديري بالج عليهن
عزيزه: عمار ورشيد بيتهم قريب دوم يمهم لأ تشيل هم
استبرق:اجت العطله واحنه مثل الاموات نذكر مروه نبجي الأكل كوه نأكل
أما صفا بدت تكعد قريب باب غرفه نوم خلود وتسولف وي فضل
هو يكللها إني اخوج شكد عمرج وهي تسأله شكد عمرك طلع اصغر من صفا بسنتين
شكله نسخه أبوي ابيض وعيونه بيهن صغر بس مكحلات وإني اشبه أبوي بحيث يشبهني هواي
صفا تنطي شبه لخالاتي أكثر شي
بالعطله خلود ابد ما تكعد تطلع من البيت وكلما يجي أحد من عمامي
تتلكاهم بلهلا والمرحبه وتكوم بيهم بالصلوات
تضيف ومن يسالونها تكللهم بيت ام استبرق هذا انعم الله عليها مكعدتني يمها وصح هي لا تحجي ويانه ولا تتدخل بينه بس نوبات تجيها كراتين أما حلويات او ملابس او اغراض مال بيت تنطينه أمي ماتفبل ناخذ
حتى لو تلح أمي ترفض أي شيء منها
يترددون عمامي علينه اتصلت اليوم بعمو عمار كتله أريد اروح اجيب النتيجة اجاني ورحت لكيت نتيجتي راسبه ب٥
وصفا ناجحه
بليل عمو حامد اجانه هو وشكر كال استأذن منج زواج شكر محددين موعده لأن هو وراه سفر يتزوج ويروح ماجل زواجه تزوج ميثم وهو بعده
أمي كالت بالمبارك عرسو ماعندي شي
وبعده كاعد سألني عن نتيجتي صفا من يمها كالت راسبه ب٥
حامد بس لسانج شطوله وبالدراسه راسبه بخمسه
وخبصتينه شلون ما تنقلنه
استبرق: الدروس صعبه شسوي
بعدنه نحجي عن النتائج ودك التلفون مال أمي
كالت منو كلتلها العلويه
كالت عيفيها گلبي مايتحمل حجي
عمو حامد من يمه كال جاوبيها منو هاي
من عرف كال هااا أهل المزارع بقى يلح جاوبي
أمي اخذت التلفون سلمت وبس أي وأي نسمعها
بعدني من سدت التلفون
سالناها شكو
خديجه: العلويه تريد تجي تشوفنه
صفا:,؛والله يمه كون يجيبون بيبي سنيه
حامد:شعدهم جايين
خديجه:يىدون يشوفونه
حامد: خير أن شاء الله وشوكت راح يجون
خديجه:باجر
حامد: يلا عزيزه امشينه
استبرق راحو وثاني يوم
نضفت البيت وبالعشره الصبح من كعدت إني لكيت خلود داخله شوكت طلعت وعايفه ولدها نايمين مأمنه ولا كأن شافتني دخلت طبيعي بغرفتها وهم كلت لأمي كالت معليج
العصر واجت سياره السيد عرفتها مسلم سايقهم ودخلت العلويه وبقى السيد بالسيارة ما نزل
دخلت سلمنه عليها إني وصفا بوستنه
وطلعت أمي تلگتها حضنتها وبقن يبجن تبجي بصوت
مبين ذاك هو الگلبه يحترگ وي حرگه گلبك وينوجع وي وجعك العلويه صحيح تحبنه لأن بقت تبجي ساعه
كعدت وجبت مي وانطيت ل فضل كتله أخذ مي للسياره راح وإني اباوع عليه خاف يكلب الصينيه وصلها تلكاه مسلم
وشفت عمو حامد جاي
شجابه شلون عرف
وكف سلم عليهم وبقى يسولف وياهم
حامد:تفضلو ادخلو
سيد موفق: لأ والله مشكور
بس تعرف حجيتنه تحب الله يحفظها ام استبرق وتاذت من عرفت بخبر البنيه وهناك ما لحكت تشوفها هسه كدرت افرغ نفسي واخليها تجي تشوفها
حامد:ميصير جايين من بغداد وتبقى برا ميصير
اليوم غداكم ببيتي
سيد موفق:بيوتكم عامره أن شاء الله بس عدنه هنا شغل ولازم هم نخلصه
استبرق: بقت أمي والعلوية يسولفن وسألت عن فضل يكعد يم صفا وعرفت كاعدين وي خلود
العلويه:ولو مو وقتها بس شوفي بيوتنه ببغداد مفتوحتلج أنتي والبنات شوكت ما تشوفين روحج ماتتحملين دكي عليه ادزلج مسلم بنفس اليوم
استبرق: نزلو من صندوك السياره فواكه وعلاليك لحوم دجاج مخضر ممخليه شي مجايبته ونطت فلوس لأمي كالتلها شتحتاجين خابريني
راحت العلويه ودخل عمو حامد
وين امج كتله بالغرفه
حامد:صيحيها
خديجه: مساء الخير ها أبو شكر
حامد: السمعته صدك
خديجه:شسمعت ؟
حامد:احجيلي أنتي شرادت منج العلويه
خديجه:اجت المره تعازيني ببنتي
حامد:, لأ اتغشمين روحج مو على اليوم
شتريد منج وتاخذج للمزارع
خديجه:,مارادت جنت اطبخلهم واخبز
حامد: يعني مو تزوجج لرجلها يلمحترمه تگووو********العلويه وتاخذكم للمزارع
استبرق:عزا وصخام العزاني يعني معقول سمعني من كلت لصفا
لو فابله أمي من العلويه رادت تزوجها للسيد مو احسن من رجعتنه هنا شلون سمعنه
صفا:خاف من چنه نسفط بالغراض بالثلاجة هو الباب وين عن الصاله و الثلاجه وصوتج عالي
خديجه:منين جبت هالحجي إكو وحده تزوج زوجها
استبرق:,همزين أمي نكرت بس عمي مراح يكعد ويهدا الا يبقى يحفر
بقينا وراها ايام وايام ايام يجون عمامي وايام لأ تزوج شكر ما قبلنه نروح للعرس أمي كالت روحن بس ما قبلنه بس خلود كشخت وراحت
بقينه بالبيت الصبح محد موجود خلود باتت بالعرس بيت عمي واندك الباب
تفضل منو
هذا تبليغ انطي لصاحب البيت
استبرق:تبليغيش
التبليغ عن بيع للبيت بالمزاد العلني إذا ما دفعت المبالغ العليه
اجيت لأمي هاج يمه يكول هذا جاي تبليغ على البيت إذا ماتندفع المبالغ ينباع البيت بالمزاد العلني
خديجه:شنو مزاد علني ويا فلوس على البيت مسوين معامله فصل طابو عن جيرانه وعددنه سند شنو فلوس
⚙️قد يهجر الطير عشآ بقئ فصلا كاملاً يبني به.. لاجل أن يعيش
لأ تبقى بمكان يقيد قلبك حتى لو كان آخر مكان بنظرك قبل أن تخسر أجمل ايام عمرك ⚙️💡
