 |
رواية بيت الخبازه الفصل الرابع عشر 14 بقلم زهرة الرمان
بسم الله الرحمن الرحيم
السلام عليكم ورحمه الله وبركاته
#بيت_الخبازه......#البارت١٤
عندما تجبركِ الحياة يين امرين اختاري مايهدأ القلب له ولا تجبري نفسك على وضع لاجل أحد اختر نفسك
خديجه:شعرفها رقمنه
شمدريها إني ببغداد تعالي استبرق خابري خالتج أمل
الو ها أمل
هله خيه
خديجه:, أمل رقم تليفوني المن انطيتي
أمل:*بس لعزيزه اجت تسأل عليج وسالت من صار عدها رقم وأنتي دومج تكولين عزيزه زينه وياي
خديجه:,يله خيه مع السلامه
يعني ما خابرتني قبل لانجي يردون يجون چفت معناها نيتهم وصخه رادو يشوفون شسوي عزيزه هي انطت رقمي لمرت اخوها كلش حلو
خابريلي على هذا الرقم الخابرتنه بيه خلود
ألو
ألو ها ام استبرق
خديجه:منو انطاج رقمي
خلود: عزيزه
خديجه:واكيد انطتج عنوان بيت الكاعده بيه
خلود: أي
خديجه :تعالي
واستبرق تأشر شنو تجي
سديت التلفون
اصبري بنتي لازم اعرف شحاكو عليه حامد وعزيزه
دزولي مرت ابوجن
ثاني يوم الضهر اجت ب٣تقريبا صفا ضهري واستبرق جايه من المدرسة ومروه بالمدرسه هم خط يجيبها
فتحت الباب جايه وياها ثنين ولد
الچبير فاتح حلكه مبين متخلف
والثاني نسخه حاجم كأن حاجم على صغير يعني يشبه استبرق لأن استبرق تشبه ابوها
سلمت وإني بعدني فاهيه على الطفل
دحلتها الولد الجبير بده يركض منا ومنا ويريد يشرب الزاهي لو يطشر الاغراض
وهي خجلت وتتعذر
شاف الاكل صاح نوعااان نوعان
(جوعان )بادي يشب جبير عمره ١٣سنه
بداخلي انقهرت عليها
بس قهرتي منها ما تطفا
لزمته سألت استبرق
خلود: أنتي استبرق صح عفيه جيبي ورقه وقلم حتى يسكت
هدأ صدك من جابت الورق والقلم
خلود: إني تعمدت اجيبهم ثنينهم تشوفينهم
هذا الولد الجبير من زوجي الأول عيالي شمرو عليه لأن معاق واخوي سافر جنت اراعي أمي الله يرحمها
من تزوجت حاجم احلفلج بترابه مو اريد اخرب بيته
خديجه: قاطعتها لاتحلفين ولا شئ صادقه لأن لازم تحلفين بيه زوجج الي جبتيله الولد
خلود:حاجم مجان يهمه عنده ولد لو بنات يموت على بناته ويحبج والله كم مره يغلط باسمي وكم مره لو ماعرف شسوي يكول خديجه هيج وخديجة هيج
خديجه:,؛وانتي متعنيه وجايتني حتى تبينيلي حياه حاجم وياج لو تقنعيني بحبه لو شنو
خلود:,لاطبعا بس حبيت اكلج حاجم مو سيئ بس إني إلي عرضت عليه يزوجني ويستر عليه لأن ماعندي أحد يعيني على هاي الدنيا وعندي معاق من ماتت أمي
خديجه:هاا يعني اذا ماكو رجال لازم يموتن نفسهن النسوان ميعيشن
اكلج هاي حجج يستر عليه
شنو
خلود:ما الومج بس والله اني ماكدرت مجتمعنه تفكيره محدود
خديجه: أي صح اتفق وياج بهاي بس ماطول مجتمعنه مو زين هسه رح اطك العبايه واروح اهجم بيت مره واخذ رجلها حتى يستر عليه ويصرف عليه
خلود:,تره إني ماكعدت وسكتت اشتغل بروضه حالياً
خديجه: بعد مال يستر عليه هاي مو عذر بلله
كولي صديق اخوج وعجبج وكلتي يلا الشرع محلل اربعه
على العموم المطلوب مني شنو
خلود: إني هسه جايه استأذن منج
خديجه:بشنو
خلود: أبو شكر كال ببت حاجم قراره بيد خديجه وإني ماعندي بيت اريد اكعد بيه لحد ما يصيرون بالسن القانوني اولادج وابني ويتقاسمونه
خديجه:هاا هنا الحجي بحياته اخذتي وهسه جايه على البيت
خلود: أنتي لا كاعده بيه ولا تقبلين ترجعين إني ماعندي مكان والايجار غلا وراتبي مايكفي وعندي مريض وهذا الثاني هم مصاريف يحتاج
خديجه: يعني حامد مسولفلج هو وعزيزه عن كلشي ماشالله
حبيبه لو شنو تكولين ما ابريكم الذمه أنتي هجمتي بيتي وحاجم استغفلني واخوان حاجم بعدهم وراي
من ترجعين كولياهم عندي وگفه وي كلمن ضلمني يم الله
يعني لحگتوني على البيت
ردت أاجره بس طبعاً أنتي ما متعلمه على التعب
متعرفين شنو تلمين الفلس على الفلس حتى تنطيهن لطبيب لو مدارس
متعرفين شلون تلزگين تلزگ الاكل لأن ماتردين تصرفين
فانسب حل اكعد ببيت وراتبج يجي تصرفي
اما إني يحجون عليه شلون اخبز واطبخ للعالم ويدزونج عليه
مستعرين اشتغل بس من توصل للصرف دفعوج عليه كفو اليخاف على بنات اخوه اليصيح هنا ماعندي ناموس ونخوه
روحي اكعدي بالبيت بس من تستجد ضروف انطيج مهله اطلعين منه فهمتي
طلعت بدون أي رد
بليلتها ماردت احجي ابد بقيت افكر وأتذكر شكلها
حاجم هذا ذوقك بالنساء
وكلامك قبل ماتحلا بعيوني مرا
وين كلامك تزوجتها لاجل سترها وبس
حياه كامله وتتواصل وي اهلك عادي حالها حالي
اجت ثاني يوم استبرق منطيها اوراق الامتحان راسبه وإني بعدها قهره خلود بگلبي مكدرت احجي وياها كلتلها تعدلينهن يالشهر الجاي بس ركزي بس إني احس حتى ضلوعي بقن يصلن عليه
صعدت اخبز وتعب الخبز والتفكير احتركت ايدي بس الحرگ قوي
انصلخ الجلد وي الثوب
شاغت روحي
نزلت مفرفحه شافتني استبرق عاطت يمه احتركتي
رحت للمضمده خلت علاج ولفتها وبروده الدنيا الحرگ يصير نحس رجعت ميته قهر ووجع ليل كله يسعر بگلبي
اسولف وي نفسي ظلمت أحد إني يارب
وبعدين احمد الله على كل حال
يومين واجه علي من بيت السيد يسال عن خبز كالتله استبرق احتركت
العصر اجت ام رحمن ووياها كالت خطار اجاج
رحت للباب العلويه
رحبت بيهم دخلت وعلي وراها جايب علاليك خلاهن بالباب وراح
العلويه:سلامات أن شاء الله
يمعوده غير تنتبهين
باجر ادزج على طبيبنه مال جلديه
خديجه: لأ زينه الله يسلمج وتلم بالبنات وتسولف وياهن أكثر مما تسولف وياي
العلويه:بمعوده گطعتي بينه نوب علمتينه على خبز العروك كم يوم صار وحرگتي اديج باجر يجيج مسلم ياخذج للطبيب
خديجه: لأ زينه ميحتاج
العلويه:مو علمودج نريد اطيبين علمود الخبز
خديجه:كالت هيج وضحكت
من راحت البنات فتحو العلاليك جايبه حلويات للبنات وقطعه قماش إليه ودشداشه للزايره كالت هاي هي وشيله للزايره
الضهر اجه مسلم سايقهم كال يلا خالتنه استعجلي علميتنه على خبز التنور الطين
طيبي واخبزي
رحت
طبيب يفتهم كلش ومنطقه راقيه وعياده مرتبه سوا خلطه دهن كال مرتين باليوم حتى اثر ميبقى وهاي خلطه من اطيبين خليها لايدج متضرره ايدج
واتصل جاوبه واحد كله تدلل سيد تدلل
سد التلفون كال وهاي السيد يوصي عليج وطلعت بدون فلوس مقبل لأ هو ولا سكرتيرته ياخذون فلوس كالو دفع السيد
رجعت للبيت
يومين حسيت فرق بيها بدت اطيب وصارت ناعمه ايدي
استبرق : من اجينه لبغداد جنت متحمسه اساعد أمي حتى مانرجع لبيت عمي حامد ماريد ولايتنه
بس من عرفت أبوي متزوج بساعه احقد عليه وساعه اشتاقله اشتاق لحنانه وكلامه
بس من اشوف أمي شلون مقهوره انقهر
من روحتي لمعمل الخشب أمي بعد مخلتني اطلع ابد بس إني اختنك من البيت بيت زايره سنيه لاتلفزيون ولا راديو ضوجه وفراغ وأمي تركض بمروه بالاطباء أشوف أمي تهتم بالبنات وإني سوي هيج لاتسوين هيج ابتليت الجبيره يعني
من قشعم انسجن ردت عود اساعدها الرجال إلي بمعمل الخشب جاب مره حطب لبيتنه وأمي مموجوده كتله إمي متريد ولا تجيب كال تردين تساعدين امج اكو شغل
ورحت وياه وشفت المعمل مثل البيت بفرع
بس كلت لامي تخبلت مقبلت
اجه مره كتله أمي متقبل
من نقلتنه أمي ببالمدرسه ع طريق المدرسة اشوفه على طول
اروح وارجع واشوفه
انطاني رقم وكاتب عندج موبايل
اشرتله لأ
بس بقى الرقم يمي
من جابت امي رقم من خاله امل
خليت أمي تطلع واتصلت
دك مرتين ثلاثه وگلبي يدك اسرع
جاوب ألو الو محجيت
بس من غلقته
بقى يتصل خفت من أمي اتصلت وصعدت فوك لايسمعني زايره سنيه او صفا
ألو
الوو همزين حجيتي كولي منو
انطيت اسم مستعار تذكرت اسم مريم صديقتي
مهيمن: زين مريم منين جبتي رقمي
استبرق:لكيته مكتوب
مهيمن:وين مكتوب
استبرق:غلاف كتاب
مهيمن:هاي شنو عرفت من صوتها بعدها طفله
زين كتاب باصف
استبرق: الرياضيات
مهيمن: اوووووو اكره الرياضيات
ضحكت هاا وهسه اتصلتي لأن لكيتي الرقم
استبرق: أنت منطي رقمك لبنيه
مهيمن: اوووووو مخليت وحده ما طبعته وي المنهج المدرسي يعني كل مراحل مدرستج اتصلن عليه
استبرق:بس اريد اكلك هذا رقم أمي لاتتصل إذا شافت رقم غريب تشمرني بالتنور..
مهيمن اوك ما اتصل بقت تتصل بديت اسحب لسانها عرفتها بت الخبازه
خليتها تأمن اليه بقت تحجيلي عن كلشي يخص حياتها مأمنه ماعرفها
سولفتلي عن معانات امها
وشلون كتلتلها
استبرق: مهيمن أمي متحبني لأن إني اشبه أبوي وأبوي غدرها وتزوج عليها
مهيمن:بديت افهمها مستحيل ام تكره بنتها بس امج حملها ثكيل
لحد ما بدت تكول صايره تحبني
انصحها واعلمها لأن طفله
بديت اروح للمدرسه ما اخليها تشوفني
جانت تخلي مكياج من صديقاتها
بديت انفرها من المكياج
حسيت بمسؤليه اتجاها
شويه شويه بديت اشوف استبرق معدنها نضيف
قويه عنيده طموحه لكن متسرعه
إني تعلقت بيها لدرجه احس يوم الما تخابر ابقى اباوع بالموبايل وإني معلمها إذا تريد تتصل تدك مره وإني الاتصل علمود الرصيد ومعلمها تحذف المكالمات
وممنوع ادز مسجات
خوفا عليها
يومين واستبرق ماكو بطريقتي عرفت اسمها الحقيقي
استبرق:بطريق الصدفه طالبه تسولف وياي وعرفتني أمي تخبز واجت وياي مره اخذت خبز لأهلها
وراها بكم يوم
كالت بيتكم قريب على معمل بيت اهل زوجه اخوي عرفت تقصد معمل الخشب
وبقيت اسألها بطريقة غير مباشره
إلى أن جابت اسم مهيمن كالت هذا مهيمن اخو زوجه اخوي
سألتها عنه بس هم بطريقه غير مباشره
كالت متزوج وعنده ثنين ولد
انقهرت رغم ما سألته متزوج لولا بس سألت نفسي ع شنو اتصل عليه همزين ميعرفني بعد ما اتصل خلي يولي
استبرق:من اجت زوجه أبوي عرفت أن أمي احسن من هواية نسوان مع أن قبل اشوفها ضعيفه وما تقبل تأخذ حقنه
واحتركت ايدها
كلت بعد هذا الرجال ما اتصل عليه خلص إني بطبعي ما احب الدراسه بس
من أمي احتركت وبعدها بيومين راحت علمود مروه لمدرستها
كمت وعجنت إني تعلمت اعجن
كلت لازم اساعد أمي
المجانه ترستها وخليت خمره هواية اريد اكمل خبز قبل لاتجي من كثر ما باقيه يم أمي تعلمت شلون احمي تنور الطين لأن إني اساعدها اخلي الحطب وشلون تهغت النار
حضرت التنور
وزايره سنيه تصيح شسوين يمگطوعه الرجه
صفا بالمدرسة عكس دوامي احارش بالزايره
واشتغل
قريت ايه الكرسي وصعدت مثل ما تسوي أمي
شعلت التنور وبديت اخبز وكعن اول خبزتين بعدين مثل أمي جبت قطعه قماش بللتها ومسحته وخبزت صار حلو
اخذني الواهس خبزت هواي وكله طلهع زين مثل شمره ايد أمي بس احس انكسر ظهري وتعبت شلون أمي تخبز ضعف هذا الخبزته مرتين
هيج يمه متحمله التعب
بديت اخربط بالخبز لأن تعبت.بس صار هواية فرحت
من ساعتها اخذت عهد ع نفسي ما اترك أمي وحدها
رغم شكد كارهه حياتنه بس عندي افضل من رجعتنه لبيت عمي عمي زين وعمامي يحبونه بس لأ ولدهم ولا بناتهم زينين
وخوالي اكرهم كره العمى
خديجه:اجيت اليوم شويه فرحني طبيب مروه اكو تحسن ملحوظ بحالتها وكال باذله مجهود بحالتها الأهل يأيسون لأن وضعها جان متأخر بقى يكول أنت بطله وخير مثال للامومه
بعض الأحيان نحتاج رفق بكلمه حتى لو من غريب يشعرنا اننا على قيد الحياة
رجعت لكيت استبرق خابزه وخبزها يخبل حسستها بفرحتي بس لازم احذرها
لأ تخبزين بعد ولا توصلين للتنور يمه
اجت وخلت راسها بحضني
استبرق:,يمه فركي ضهري احسه انكطع بالنص شلون تنحملين هلكد تخبزين
خديجه ،: لأن بعدج صغيره
استبرق ،:,كعدت وكابلتها يمه شنو صغيره البعمري بالخامس إعدادي
تضحك أمي واحسها اول مره تضحك بهدوء
خديجه: وإني اشوفجن صغار بعد مهما كبرتن بس أنتي الكبيره أنتي لخواتج إني شوفه عينج
احتركت ايدي سحبت منج فلوس
واريد بعد فلوس علاج الزايره خلص
استبرق:يمه لازم نفكر بشغله ثانيه تساعدنه
خديجه:هو بس خبز وصارن يدخلن النسوان يحسدني على الفكر انوب أكثر من شغله
بعدنه نسولف واندك الباب
فتحته استبرق
اجت يمه ذولي نسوان
رحت أول مرة اشوفهن تفضلو
دخلن
اريد اعرف منو ماعرفت
وحده حجت وإني واستبرق والزايره نباوع منو وشتريد
حبيبتي إني زوجه خال مهيمن
خديجه: مهيمن منو
استبرق:بقبت بصدمه مكدرت حتى اتحرك
مهيمن شايفه معمل الخشب الي بالساحه
خديجه:أي
هو معمل اهله مهيمن كال روحي لام استبرق وشوفي طلبي
خديجه:شنو طلبه ومنو هو ومنين يعرفني
زوجه خال مهيمن: حبيبتي مهيمن يريد يخطب بنتج استبرق
خديجه:شعرف عن بنتي ودزت تخطبينها
هو يريد يخطبها على سنه الله ورسوله ليش عصبتي عيوني
خديجه:,ما معصبه مستغربه وين عرفها وشافها وجاي يخطبها
استبرق:, انصدمت ليش دز يخطبني يعني شنو يعرفني جان
ليش دزج أنتي ماعنده أهل هوه
عنده أهل بس كموافقه مبدأيه لأن تعرفون هيج موضوع شويه حساس
خديجه:,شنو الحساس
لأن يعني مهيمن متعرفونه ولا شايفينه لازم يصير عدكم علم بالاول
خديجه:وهو جاي وياج
أي بره باقي
خديجه:ممكن تصيحي اليه.
بالباب واجه عمره يطلع ٢٩/٢٨
سلم عليه
سألته رأسا منين تعرف بنتي
مهيمن:ما اعرفها شخصياً بس درب المعمل من بيتكم وهي تروح للمدرسه سألت عليها وعرفتكم أولاد أصول وحبيت اناسبكم
خديجه: أنت عمرك نهاية العشرينات وبنتي بعدها طفله مو مال زواج
مهيمن: أعرف بعدها طفله إني رايدها
خديجه: ماعندي بنات للزواج أعتذر
مهيمن:ليش
خديجه:بعدها تدرس وطفله ماتناسبك نعتذر
مهيمن:يمي واخليها تكمل دراستها
خديجه:,)مااا عندي بنات للزواج
وطلعت زوجه خاله
مهيمن يلا روح
خديجه :راحوا وإني دخلت ادور على استبرق وينج وينج
استبرق:,ها يمه
خديجه: هذا تعرفينه ؟ ولتچذببن عليه
لأن الموضوع اصعبه عليج بالجذب واكشفج
استبرق:شنو يمه منين اعرفه وبقيت اكمز
خديجه:,خوش حجي
ثاني يوم رحت لام رحمن سالتها عن المعمل وانطيتها اسمه طلعت تعرف اهله
سألتها عنه
كالت هذا متزوج وعنده ولد ثنين
ما گلتلها خطب استبرق
طلعت للسوك ورجعت جان دوام استبرق صباحي
دخلت للبيت كلت هي بعدها بالدوام
لكيتها بالسطح وتحجي
استبرق:ليش جذبت فهمني خليتني احجيلك عني كلشي ولا تكول مفاجاه شنو مغاجاه خليت أمي تشك بيه
واحس انسحب التلفون من أيدي
خلته أمي على اذنها وإني لطمت وابتعدت شويه
خديجه: شوف ولك اروح لمرتك واهلك واشهرك فهمت بالك واياك اشوفك بعد بدرب تتصل ببنتي يا سافل
انلصم مو سافل هوه
لعد شنو إلي يخطب وهو متزوج وعنده ولد ويخطب من وره اهله
شنو بنات الناس عندك لعبه سرسري
لزمت التلفون وضربته بالكاع وركضت على استبرق ماعرفت شسوي ضربتها بكل قوتي ما فكرت بعد تحجي بالتلفون وياه وهو متزوج انجن جنوني
بقبت اصرخ عليها
حقه حامد يكول باجر بنتج تجيبه من اديه تكلي اعقدلي
ولج بطول الشبر تخابرين برجال انوب متزوج خيبتي ضني بيج
حقهم عمامج ما يأمنون حقهم لأن ماعرفت اربيج
باجر ارجعج لببت عمج احسن
للعصر اجت صفا واحنه بلا اكل من لكمه الصبح وهي دخلت بالغرفه
وإني بالحوش يمي الزاايره كل شويه تسأل ها شبيها المشعننه
عزيزه: خويه إني ربيت ميثم وهو بالگماط لأ لبسه ولا أي شئ من مصاريفه عليكم كلهن عليه
وهسه هو يكول اريد اتزوج مابيها شي مثل ما صرفت عليه بدراسته اساعده بزواجه
ايمان ،:شنو تبنيله غرفه
عزيزه:,وليش ابنيله بيتي فارغ يتزوج واكعد وياه
ايمان:كولي اخذه واطلع بيه
هو هذا دگج ومدگوگج
عزيزه: يعني وين اخذه احسن ما يصيرن ثمين جناين عدج وحده هنا وحده هناك وهمه ولدج تره لا مسجل باسمي ولا اخذ كده حل للوضع يحب البنيه ويريدها ليش نوكفه على مكان
حامد:هاي هيه عزيزه كليله ابوك يكول موافق أهم شي نسأل عن البنيه واهلها وعشيرتها
ايمان:شنو الموافق أنت ماصدكت ولدي اريدهم كبال عيني
حامد:بسسس بسج يامره لاتملين ولا تكلين كلشي لازم مشكله وين تتحملين الچناين أنتي وخاصة إذا صار بينهن غيره لو معاين على غسله الماعون أنتي تشهرينه وهاي البنيه غريبه مو مثل بنت اخوج تعرف طبعج
هو مرت حاجم هججتيها وتحرضين بنتج وتسممين افكارها على بنات عمهن عرفت كلشي حتى ماكدر اجاوب خليت لساني بلهاتي وسكتت بسببج
ومن اجت مرت حاجم الله الثانيه حرتي شسوين لازم اكشن مختلف مطور من السويتي وي خديجه
احسن حل كلتلها روحي بييت حاجم لأن أعرف عيال بيتي ما يلفون دخيل ولا يضيفون كريب هم انفضح وهم تبقى تعيرني بيج مثل خديجه
لهذا خلي عزيزه تحضر بيتها واسكتي..
خديجه:شوفي ولج منا وهيج إني اوديج للمدرسه بيدي وارجعج صفا عدها خط وقشمرتيني كلتي مو بعيده المدرسة علويش المصاريف طلعتي حتى تفترين براحتج وتصاحبين
إني اعلمج
استبرق: ما اداوم بعد وما ادري بيه يريد يخطبني والله إذا تبقين تضربيني اشمر روحي منا وما ارجع لبيت عمي لو لاهلج ابجي بصوت عالي
خديجه: أي عفيه انوب اموت روحي هاي جديده طبعاً البعد من رب العالمين يخلي الشيطان يوسسلج بكلشي اخابر زلم عادي واطلع واخلي حمره لو اموت روحي هاي بعد بني ادم من ربه
تبقين عميه ماطولج ما ماشيه لرب العالمين كل الدروب ضلمه إذا ماكو نور رب العالمين بگلبج
موتي روحح حتى تخسرين دنيا واخره
بس شوفي ابطلج من المدرسة ادمغ عليج لو ادزج لايمان تخدمينها وبعدين يزوجج لولده احسن
أنتي هاي عود شوف عيونج
لميتجن مثل بزونه وشردت بيجن لأن ماريد تنذلن أو تنهان كرامتجن
بس أنتي دواج عمامج
استبرق: أي الله ارحم من هالعيشه تعيريني بعمامي ادري نكرهيني وتكرهين عمامي إني شعليه إني كلت لابوي تزوج إني كلتاهم يسوون بيج هيج
خديجه:تركتها ونزلت لأن حسيت ضغطي علا وصفا والزايره واكفات باول درجه من الدرج ويتصنتن
زايره سنيه: شمرتيها يمعطوره
خديجه:دخلت للغرفه افكر شسوي شسوي يارب وجهني لطريق احمي بنتي يارب بعدها صفا ما كبرانه
ومروه الجنت شايله حملها
مريضه
هسه اكول مريضه واشيلها احسن من ضيم استبرق
بايل اندك الباب
فتحته علي الي لبيت السيد
ها علي خير
علي: العلويه تكول بلكي تجينه تريدج
خديجه:,هسه
علي:أي
خديجه:انتضر البس عبايه واجي
طلعت وإني فكري يودي ويجيب شتريد
دخلت هالمره ما دخلتني من باب المطبخ لأ فاتحه باب الاستقبال بيه باب على البيت
هم مفتوح
كعدت شويه ودخلت من باب المطل على البيت
سلمت
علويه:, أعتذر جبتج بليل
خديجه: لأ عادي هذه هو البيت بعد وقت
علويه:, خديجه من يوم إلي دخلتي لبيتي لليوم ما صار عندج فضول ولو بالشقا وسالتيني عندج أولاد او لأ ودوم
تدعيلي يحفظ اولادج
خديجه: يعني ما اسال تعلمت ما ادخل بحياه الناس
علويه:بهاي الدنيا كلواحد همه شكل ولا أحد مرتاح لأن الدنيا دار بلاء مابيها راحه
حقيقه خديجه إني عقيمه
خديجه:لااله إلا الله حكمه الله
علويه: صحيح حكمه الله وحامدين رب العالمين وشاكرينه
السيد ابن عمي من طفولتنه يكولون فلان لفلانه وكبرنه وتزوجني ما عرف غيري ولا إني تخيلت غيره
وهاي عايشين سوا صار ١٦سنه
عند اهلي واهله خير من الله
مخلينه شي حتى للخارج ا رحت مصار
بس هو رجال وتعرفين لازم اله اسم يبقى
وهاي السنين كلها عمره ما جرحني بكلمه إني ألف مرة كتله تزوج الناس كلها كالتله ميقبل
يكول نصيبنه هيج
بديت إني اجيبله واتخطبله ويرفض
يطلع بيهن عيوب
وبيني وبينج الحجي كل إلي اختاريتهن لو ع طمع لو خفيفه ما تليق بإسم السيد او هواية أمور تخليني اتراجع
وتعرفين الانجاب للام يعني الطفل راح يطلع بيه صفات الوراثية من آلام فلازم اختارله أم لاولاده كون محترمه
خديجه:حقج وكلامج عين العقل
علويه: إني جبتج اليوم حتى اكولج أنتي بعدج ببدايه الثلاثنين وولود يعني جايبه اطفال
والسيد كرم واخلاق ونخوه وطيب كلهن بيه
واريدج للسيد على سنه الله ورسوله
وبناتج يمي اخليهن بعيوني لأن حبيتهن
وأنتي تصيرين أم البيت
خديجه: أول شئ خطر على بالي كلمه لأ لأ علويه هذا الشئ مستحيل يصير إني ما اتزوج ولا افكر بزواج عندي بناتي يحتاجون ام ع راسهم
علويه ،: مراح أخذ منج بناتج انما كلت يبقون برعايتنه إذا هامه بيهم
دخلت لببتج ابسط الاحتياجات ماعدهن والدنيا تتغير سريع
وأنتي تفيديهن وتفيدينه
خديجه: لأ مستحيل أخذ زوجج اخرب حياتج مستحيل وطلعت شتحجي هاي...
بدل ماتدور وتبحث علي الروايات خليها علي تليفونك وحمل تطبيقنا
