 |
رواية بيت الخبازه الفصل الحادي عشر 11 بقلم زهرة الرمان
بسم الله الرحمن الرحيم
السلام عليكم ورحمه الله وبركاته
#بيت_الخبازه .......#بارت١١
بقلمي زهره الرمان
ليس هناك امرأه لاتمتلك انوثه
وليس هناك امرأه لاتمتلك صفات الجمال
لكن تضهر هذه الصفات عندما تؤمن المراه نفسها بوجود صفاتها....
خديجه: بداخل كل مره شخصية ثانيه تختلف عن ماتضهر
أما ضروف أو خذلان قوي
تضهر شخصيتها الثانية
بديت اعجن وبناتي حواليه فرحانات بعد ما شفت أكو حطب تشجعت رغم ما خابزه بتنور الطين لكن كلت مايفرق عجنت وحتى زايره سنيه كاعده وتراقبني
وتعلق
لاتسوين العجين صلب تصير خبزته ملحه
لاتحطين هواي ملح
البنات متحمسات ويكولن سوينه حمايه(خبزه صغيره)
اختمر العجين وصعدنا كلنا حتى اخبز والبنات يلمن بالحطب سويت مخبازه
خبزت بعد ماشعلنا التنور
اخبز ويوكع اخبز وتصير الخبزه ثنين بالتنور
صارالخبز قطع قطع ما جمعت كرصتين عدلات سوا وكلساع اخذ نصيحه من استبرق لو زايره سنيه حتى انقذ الخبز اندك الباب نزلت صفا تركض ورجعت كالت يردون خبز بالف كالتلها زايره سنيه هذا مال خميعه چفه الغمه خربت طحين ام رحمن كعدت كبال الخبز المكطع إني واستبرق
استبرق:شلون يمه شنسوي
خديجه:,الله يحلها بقينا غربت الدنيا واحنه نباوع شي اكلوا البنات منه وزايره سنيه تضم بجيبه وتدرم الطحين ارده اخير هاي عوجه شلون خلفت مدري
استبرق:,يمه شوفي شتكول الزايره عليج بدت تقرا النشيد الوطني عليج خربتي الخبز
خديجه:وي المغرب بچيت
يارب لاتخليني اتحوج لبشر ماريد ارجع لعيالي ولا اريد ارجع للبيت الي چنت احسب نفسي بيه زوجه لحاجم
ماريد شي يذكرني بحاجم
فاتت الليله بهم على گلبي يومين لازم اسدد فلوس المركز
الصبح واجه قشعم
بوجه فرحه
خاله خديجه جماعتي يردون خبز
قشعم ماكدرت اعرف بالتنور الطين
خرب خبز البارحه
قشعم:صدك حرامات
خديجه:ما أيست عجنت مره ثانيه بس شويه وكلت خل اسأل زايره سنيه بلكي تجيها الصحوه الي خلتها تروح لام رحمن
خاله شلون ينخبز بالتنور
زايره سنيه: أول مره اشجري بخشب جبيره حتى طول نوب ذبي گشاش
خديجه:شنو گشاش
زايره سنيه:خايبه هذا السعف وليف خربان
خديجه:صعدت كلت أسوي على نصيحتها
بديت اخبز أول خبزات زينات اخذني الواهس خبزت وخبزت صارن سبع گرص وخلص النار احسه برد التنور رجعت خليت خطب وخاله سنيه تصيح خل يهفت بخي بشواي مي
خالتي سنيه تزوجت وعاشت بالجنوب
جيتها لبغداد صار سنوات قليله
لهجتها إلا افسرها أو اتذكر كلام اهلنه يلا افهمه
مشيت على نصيحتها
وخبزت عرفت أن النار من عاليه بعدها يخرب الخبز
وشفت ام رحمن صعدتنه
سلمت كالت صلوات على محمد يالله
خوش خبز بس هم ماتعرف بتنور الطين
:هاي استفتاح خير خلت على صينيه الخبز فلوس مبلغ بسيط واخذت كرصتين
كالت شمره ايدج حلوه بالخبز وقياس الخبزه شويه صغريها لأن مايصرفلج إذا هيج واعجني من وكت كميه جبيره وخلي خمره قليل وملح عينج ميزانج حتى يصرف الخمره إذا تعجنين من وكت وتخلين قليل اخبزي بس لاتشعلين التنور المغرب مايصلح
اخذني الواهس لأن اشترت الها ودزت وحده هم اشترت وخلص الخبز مبقالنه ضحكت فرحانه كلت قبل لايبرد التنور اعجن
بديت من الفجر من اصلي اعجن
وزايره سنيه اصلا الكاها كاعده قبلي
صليت وكعدت استبرق تصلي صارت بعد وفاه ابوها تشلع گلبي على الصلاه متقبل إلا اذكرها وابقى وراها وراها تصلي أما مروه وصفا يصلن وياي
مقبلت تكعد صليت وعجنت وكشف الوكت شويه نمت
شبيك حاجم
تعاليلي خديجه جيبي ايدج اصعدي وياي
خل اجيب بناتي
لالا تعالي أنتي شوفي
فزيت يمه مختنگه وخايفه وارجف اباوع على ايدي ترجف وصوت صفا وزايره سنيه صوتهن اجه
كمت صاير الضحى حاجم شنو ردت تشوفني شنو صار
لكيت العجين مختمر وبديت اخبز
بديت ابيع خبز استبرق على ايدي كملت
وكالو جواعنين نزلت سويت الجاي على عين مال طباخ وحده بريمز كملت الجاي سويت بيضات
وكعدنا
نتريك وجهت كلامي لاستبرق لمت الخبز وغسلت اجت تأكل سألتها
ليش تاكلين
استبرق:جوعانه يمه مو وياج صار ساعتين
خديجه: يعني جسمج احتاج اكل جعتي
استبرق:فديتج يمه صح هههه
خديجه: يعني من تجوعين تاكلين بس من سمعين صوت الأذان ما تصلين
مشت ايام يوم ينباع الخبز ويوم يبقى منه ويوم احركه ويوم يطلع زين
لحد ما اليوم اجه قشعم
قشعم:خاله الخبز الاخذه منح عجبهم وهسه سألوني على الفاصوليا السويتيه اليه اكلو منها وعرفو أنتي التخبزين كالو تكدر تطبخنه تمن ويابسا او أي مروكات نطلبها وشكد تأخذ
كلت رزق وانفتح باب بس ماعرف بالحساب استبرق على أيدي بيدها ورقة وقلم حتى تحسب التكلفه والصرفيات لأن همه ١٥شخص
ومروه يمنه تجاوب الرقم قبل لاتحسب استبرق بالبداية مننتبهه مشدود فكري وي مسؤؤليه الطبخ خاف ميطلع تمام او مابيه ربح بس تعب وافكر عندي بس عين وحده مال طباخ
لكن صفا انتبهت بقت تعيد يمه اسمعي مروه
عرفتها قوية كلش بالرياضيات. زين شعجب بالمركز ما انتبهوا
سجلنه المسواك المطلوب لطبخ جماعه قشعم وردت اروح اتسوك بس العجين اختمر كالت استبرق إني اروح للسوك وهو قريب
تمشي واوصيها لبست صايه وربطه وراحت
كعدت يم مروه وصفا تسالها وتجاوب سريع فرحت
كعدت بالسبعه الصبح ريگت بناتي ومتفقه وي قشعم ياخذ الغدا ب١١ونص
أشتغل وصفا وزايره سنيه يمي واستبرق تركض وياي ندور على جداري نطبخ بيهن أكثر الجدوره مزروفه او متكفي حرت
كلت اروح لام رحمن اطلب منها
عبالك تسمع افكاري اندفع الباب ودخلت ام رحمن وصارت عدنه ميانه وياها تغتح الباب وتأخذ خبز
دخلت
أم رحمن:شنو بعدج ما خابزه
خديجه:هسه رح اخبز
أم رحمن: شوفي خيه اريد يوميه ست گرص بس كون توصاه وحيل تعتنين بيهن لسيد موفق اجه اليشتغل يمهم وكتله اكو خبازه نضيفه وخبزها مال تنور طين راح لمرت السيد وكالت منا وهيج خلوها تخبز ست گرص يوميه بس كون من الصبح كون بال٨واصل بيتهم
خديجه:,وين بيتهم
ام رحمن: هذا الركن العالي والعالي ربي
البيه فوك مثل طير جبيرإذا تاه أحد يكلوله بفرع بيت سيد موفق لو بيت العالي العليه طير جبير
استبرق:شنو السيد مطيرجي
أم رحمن:ولج ام لسان هذا سيد وبخيت وشكد عايشه عوائل بجاهه
استبرق:المال مال الله بجاه ربهم
خديجه:روحي شوفي الجدر على النار قللي واسكتي
خيه ام رحمن إذا على الخبز صار من عيوني اخبز
هسه اريد جداري ثنين اطبخ بينهن وسولفتلها
أم رحمن: يعني طبخج يعتمد عليه
خديجه: والله مادري وإلا الخبز شنو منو متعرف تخبز كل النسوان يعرفن والطبخ همين بس قشعم يفكر بينه خطيه خلفله الله عليه
أم رحمن:خوش فكره والله وعفيه عليج جربي وإذا على الجداري طبي وتخيري هنه ضالات بالمخزن بس بمحرم نحتاجهن وكلشي اكو چفاچير مصفي صواني عيون مال طباخ هم أخذي واحد ثاني وهو كله وقف بثواب أبو عبد الله وقشعم ربته زايره سنيه والله هي مره حوك بس موتت ابنها حرك عقلها وإلا هي قوية وجانت أكاله تاكل هواي ورغم ما تكعد ونظيفه وشوكت ما تجينها شعرها ريحه الگرنفل
وتغسل شعرها بسدر وطين خاوه چنه مي سرح واحمر من الحنه والدباغ (الدباغ قشور الرمان المجففه)
وجانت تكول بس يخط شارب جشعم ازوجه
خديجه:نسولف عنها زايره سنيه وهي تباوع مثل الاطفال اخذت استبرق وياها
وودت بعربانه الجدوره والبريمز والمصفي وحتى نجانات اشتغل ببهن
وخبزت خبزات سيد موفق اخذتهن استبرق لام رحمن واجت
خبزت وخليت استبرق تعدل بالخبز
وبديت اطبخ
صارت ب١٠ونص اجه قشعم
أول ما دخل صبيتله ماعون حتى يختبر الأكل خله لگمه بحلكه اكلها وما يحجي واحنه نصيح هاا يسوي هسه اوكفوا يأشر بيده
يأكل اللكمه الثانية ونصيح هااا حلكه مليان وصاح اوكفوا شبيكم
خلص الماعون وبده يمسح بأصابعه وياكل
شاف الماعون رجع نضيف
هاج استبرق
مو طيب
استبرق:قشعم تحجي الصدك لو شلون
قشعم:قابل اجذب
وضحكت خاله خديجه ذوله إذا اطبخيلهم صوف الخروف ياكلونه شتحجين والله اطيب تمن ومركه وين هيج مركه المطعم اليمهم مصاله اسم ريحه حمار بيها
اخذت الجدوره وكلتلهم اشوف كم ماعون واحسب واجيب فلوسهن وصدك الموجودين اكلو الاكل كله وبيه صار خير من االله جمعت المبلغ ورجعت
خاله خديجه شكد صرفتي على الجدر
خديجه:خمسه وعشرين
قشعم:انباعن٤٨
خديجه: يعني ربحهن ١٨
الحمدلله وي فلوس الخبز زين
بديت اخبز واطبخ للمكان اليشتغل بيه قشعم واليوم جمعت الفلوس ورحنه للمركز اريد أشوف المشرفه على حاله مروه
لكن فأجتني تكلي بنتج متاكده ماعدها أي مرض وراثي ثاني لطمت شبيها
كالت انصح هذا صرفج عليها مابيه نتيجه وحالتها الضاهر متأخره
لطمت شنو متأخره يعني كولي ما نعرف لحالتها بس مو تيأسيني من بنتي
حتى لو يكولون باجر تموت اسم الله عليها ما اكعد من علاجها
وطلعت يسلتون فلوس مني وتالي اخذبها ما تفيد حالتها متأخره
رجعت مالي أي خلگ وبجيت لما مليت
عجنت وفكري كله يم مروه شلون وهي هيج قويه بالرياضيات
لازم اخليها اطيب اروح لغير طبيب
أي أي افضل
كملت عجن وغديت البنات والزايره وإني ألف فكره تاخذني وتجيبني ومهمومه على بنتي صعدت لكيت الحطب ميكفي العجين ياربي اليوم كله بيه شي خبزت الصبح كد ريوك سيد موفق
وناس هم يوميه الصبح يردون
وهسه قليل الحطب لعجن العصر بقيت حايره صعدت كلت اخبز وين يوصلني انعمله
صعدت اخبز وبقى هواي وهفت التنور
وصفا اخذت الخبز اجو يردون خبز
بقيت اباوع على نجانه العجين وماكو حطب وإني من الصبح روحي معتصره
ألف فكره وقرار تجي على رأسي ومن افكر ارجع لولايتي وعيالي
انفض الفكره واحجي وي نفسي لأ خديجه
لأ ربي بناتج ولا تبقين تحت رحمه أحد
بعدني بگعدتي وصعدتلي استبرق وبيدها وصل خشب مكسره
منين هذا
استبرق: أمي تشتغل وتتعب وإني اساعدها الصبح من خبزت ما انتبهت ماكو بعد حطب شي قليل
راحت وإني تركت صفا والزايره ولبست ربطه والصايه وطلعت لأن بطريق السوك اكو مكان مثل قطعه فارغه بيها خشب ناعم جمعته بگونيه خيطتها على شكل علاكه مسواك
وقريب عليها هاي القطعه مكان يلعبون طوبه اولاد صغار
بقيت افتر ادور لأن چنه جديد الخشب بقيت افتر شفت رجال بيده گونيه بس مبين نشاره خشب رحت ورا المكان الطلع منه
ريحه صمغ او صبغ اخشاب
شفته طلع معمل يسوون غرف نوم كناتير
گبالهم هواية خشب مقطع صغار وفضلات مال خشب مبينه
ردت اوصل يمهن سمعت صوت وراي شسوين هنا
حجيت بصوت حازم أكثر وأنت شكو واكفه باب بيت اهلك
مهيمن:شنو هلسان أنتي بنيه شعندج واكفه بباب معمل كله زلم
استبرق: وأنت شعليك
مهيمن: ول ول مو بنيه أنتي لج بنتي ميصير هاي وگفتج لسانج چنه ذاك المنشار
تعرفين أحد.... جايه على أحد غير تفهميني وگفتج هاي عيب لو غيري من العمال لاگفج واكفه جان صار غير تصرف منهم
استبرق:حسيت بكلامه يلمح لشي غلط تراجعت كلت اروح
مشيت بدون كلام
صاح وراي
غير تفهميني لشنو هنا وصلتي.
اجت الطوبه يمه واجه طفل بدون محد يسأله الطفل گاله تلم خشب بعلاگتها
اجه يمي
مهيمن:تجمعين خشب شسوين بيه
استبرق:معليك
مهبمن: ضحكت والولد هم ضحك گتله بيها جني اسمه معليك وجنيه اسمها شعليك
استبرق:دمه خفيف ابن امه المحفحف
مهيمن:شگلتي ليش صوتج ناصي احجي شو ما سمعت
الطفل جاوب
تكول عليك دمك خفيف المحفحف
مهيمن:ما حاف وروحها لأمي
انطيج خشب بس كولي شسوين بيه
استبرق:اريده حطب
مهيمن:تشووين بيه
استبرق:للتنور الطين أمي خبازه
مهيمن: صدك
استبرق:صدك
مهيمن تعالي افتريت ورا المعمل ماتقبل تمشي حسيتها خافت صحت على سلعوم سلعوم تعال
استبرق:من گال تعالي وراي خفت بقيت بوگفتي راح وبقى يصيح سلعوم سلعوم
اجه ولد ضعيف كلش بس سريع
شفتهم من ورا المعمل طلعوا جاب قطع خشب سحب علاكتي وبده يخليهن صارن هواي فرحت
مهيمن:بيتكم قريب لو بعيد
استبرق شويه منا بفرع البيت أبو الطير
مهيمن:اها يم بيت سيد موفق
كل يومين هيج اجمعلج بس إذا عندج أخ ولد خلي هو يجي ميصير هنا الشباب مشايفين بنات لاتجين
استبرق:وشنو فرق البنيه عن الولد إني اجي تريد تجمعلي تريد لأ بكيفك
ورحت اركض والولد الصغير ساعدني
وصلني للباب وراح ركضت لامي فوك فرحانه
خديجه:ومنو گلج تفرفرين بالشوارع منو عتب عليج تحليلي المشكله
استبرق:وشصار يعني مو زين شبيها إذا جبت حطب
خديجه:,اكمل خبز واكلج شبيها
كملت وإني افور من يندك الباب اخلي صفا تفتح الباب واستبرق ما خليتها
بس بقت على ايدي
كملت الخبز وغسلت
واجت وراي للغرفه
استبرق:يمه متباوعين بوجهي وماتحاجيني شسويت
خديجه:شسويتي طالعه بغير علمي ورايحه يم معمل زلم وتكولين شبيها
استبرق:همزين ما گلتلها على هذا الرجال إلي بقى يحقق وياي كلتلها ولد صغير يلعب طوبه جمعلي
خديجه:ممنوع اطلعين لأن أنتي شابه أولا ثانيه احنه نسوان وماعدنه رجال العيون تباوعلنه وإني ارمله شتردين الناس يكولون ماتعرف تربي مطلعين إلا أني أعرف وإلا اقبل
يومين مشانه الخشب وراها كعدنا كلت اشتري بهاي الفلوس طحين هم خلص وهم ماعندي حطب
اجت ام رحمن العصر على خبز كلتلها ماعندي حطب وانطيتها فلوسها مال الطحين
كالت اجيب طحين رفضت لأن ماكو حطب
بقينا على النطبخه لقشعم
حتى من رادو خبز كالاهم ماكو
سيد موفق: علويه اليوم الخبزه متغيره
علويه:علي يكول جبت خبز من المخبز
سيد موفق:وخبز تنور الطين
علويه: والله مادري
سيد موفق: استفسري خبزه التنور الطين جانت ترفه وطيبه
علي(عامل ببيت سيد موفق):خاله ام رحمن العلويه تريدج
أم رحمن: صار شويه وأمر عليهم
رحت ورا ساعتين لبيت السبد
شلونج علويه
علويه:يهله ومرحب ام رحمن شلونكم الويلاد شلونهم
ام رحمن:بنعمه علويه تسلمين
علويه: عيوني دزيت عليج على خبز تنور الطين الجنتي ادزينه شو هالايومين ماكو
أم رحمن: والله علويه المره التخبز ماعنده حطب وهم هي ارمله وعدها بنات مريضات صعب تشتري طحين إذا ما تأمن الحطب فخلص الطحين وكعدت
علويه:سهله أن شاء الله نشوف شلون نساعدها
دخلت لكيت السيد يسبح ينتظر تروح ام رحمن حتى يطلع الضاهر سمع كلام ام رحمن
سيد موفق:هسه اخلي الولد يدزون لبيتها حطب وأنتي دزي عليها شوفي بناتها وشتحتاج لوجه الله
علويه: أن شاء الله سيد
سيد موفق:وينك مسلم تأخذ البيكم وتروح للمزرعه تحملها كرب سعف يابس جذوع كون يصير حطب اريد البيكم تنترس وجيبها من توصل لمنطقه بيتي اوصلفلك وين توديها
خديجه:كملت طبخ لقشعم ودخلت ام رحمن
كالت راح تنحل سالغه الحطب جبتلج گونيه طحين خليها لما يجي الحطب
يا خيه نجيب المهد گبل الولد خل يجي الحطب ويلحك الطحين
ام رحمن: لأ العلويه بعد نطقت كالت نحلها لأن معناها السيديريد خبز تنور الطين
للعصر وصدك اجت بيكم طلعت صفا واستبرق صاحوني لبست عبايتي وطلعت ثنين شباب اشرت لاستبرق تدخل
خاله وين نخليلكم الحطب
كال السيد خليه يم التنور
يمه التنور فوگ السطح
دخلو الحطب فوك هواي حتى ما گالو من بيت السيد نزلو وراحوا
وام رحمن اجت عرفت جابو الحطب وگال الولد شوكت ما يخلص بلغي ام رحمن.. رجعت اخبز وكرست الليل كله اتعلم شلون اعلم مروه من وصايا الطبيب قبل بديت إني اعلمها صح صعب للما متعلم لكن إني مضطره
سيد موفق: علويه دزيتي على الخبازه
علويه: بعد باجر ادز على ام رحمن ويصير خير
السيد:شوفيها شتحتاج ولاتقصرين عدها بنات وايتام
علويه: أن شاء الله سيد
راح السيد دزيت على علي تعال ابني تروح لام رحمن تخليها على فراغها تجينا
العصر اجت أم رحمن
اسالج هاي الخبازه شكد عمره
أم رحمن:يجوز ببدايه الثلاثنين او نص الثلاثنين
علويه:وبناتها كبار
ام رحمن:, لأ وين اكبرهن بثالث متوسط
علويه:زين شون شكلها احم اقصد يعني مرتب شكلها
أم رحمن: والله علويه نظيفه وهي تصير بنت اخت زايره سنيه
ومحترمه ومحتشمه كلش وبداخلي اسأل ليش تسأل عنها استغربت
بعدها طلعت ضرف كالت انطي الها
هاي الها ولبناتها رحت بوجهي لبيت زايره سنيه
عيوني خديجه هاي دزتها العلويه مرت سيد موفق
خديجه: بأي مناسبه
فلوس الخبز جاي يودولي وجاي ادعيلهم الحطب اخبز وخير من الله
ام رحمن:رزق للبنات
خديجه: لأ ام رحمن هذا تصدق وإني ما اقبل الصدقه لأن جاي اشتغل وعندي خير من الله
ام رحمن: والله صعبه ارجعهن
خديجه ،:جان من الأول تكليلي يختي لأن إني هم عليه صعب أخذ فلوس صدقه
ام رحمن:شلون ارجعهن مو خوش موقف
خديجه: أنتي هم صاحبه فضل عليه مايرضيني تنحرجين انطيني اياهم هم اتشكر منها وهم إني ارجعهن الها
اخذت الفلوس ورحت وصلت لبابهم
أول ما دكيت الباب طلع ولد عمره ١٢سنه يمكن
تفضلي خاله
خديجه:, العلويه موجوده
علي: أي هسه
خديجه:صلوات البيت يشرح الصدر جبير وحلو إني بالباب الخارجي بس الحديقه كلش حلوه ومرتبه بس إني من النوع ما أتمنى شئ اشوفه عند أحد بس بقيت اكول الله يحرس الدار وراعيه
اجت مره اكبر مني مبينه بس مرتبه ونازكه كلش سلمت سلامها بصوت هادئ وحلو
العلويه :تفضلي
خديجه:زاد فضلج علويه إني بيتي الكاعده يم زايره سنيه خالتي إني الخبازه
علويه: أهلا ادخلي
خديجه: لأ تسلمين البنات وخالتي وحدهن بس حبيت اتشكر منج ومن السيد لأن جابولي حطب ربي يباركلكم باعماركم واولادككم ويزيد ارزاقكم
بس علويه إني اشتغل اعذريني ماريد الفلوس ممحتاجع يجوز تلكين اليحتاجهن أكثر مني إني الحمدلله عندي صحتي وصرت اشتغل
علويه: عزيزتي هاي الفلوس لليتيمات العندج اصرفيهن عليهن
خديجه:صدكي ما احتاجهن
علويه:زين انتي تخبزين وكالت ام رحمن تطبخين لسايلوات المخازن صح
خديجه: صحيح حفيد خالتي حارس يمهم وطلب مني والحمد لله مشي الحال
علويه:رغم السيد راح يزعل بس أنتي ندليتي البيت من تحتاجين أنتي او البنات شي لاتترددين
خديجه:الله يعمر بيتكم ويباركلكم
حسيت بكلامها هدوء ورزانه ومبينه بنت خير
صرت اخبز واطبخ لقشعم واعلم بنتي بس قربت العطله تخلص ولازم انقل بناتي
اسولف شلون نروح و اجه قشعم كتله الاسبوع الجاي ماكو طبخ ورح اوصي ام رحمن هم ماكو خبز مؤقتا علما انقل البنات
وأنت تخلي بالك يم البيت وخالتي لأن ردت اخذها وياي لولايتي كال قشعم تخاف من السيارة وتبقى تصرخ
باجر اطلع لولايتي واندك الباب لبست عبايتي وطلعت رجال نعم تفضل
أنتي ام استبرق
أي خير
قشعم خذوه الشرطة وكال بس بلغ اهلي إني يم السايلوات اشتغل وياه
يمه يمه تعال يمه شمسوي وخذوه
إني عكس شغله ما ادري بس العرفته علساس لاكين الاغراض بيهن نقص وهنه بعهدته
... قد يوهمك البعض بأخلاصه ونبل اخلاقه...
انتظري حين تدور الدنيا معكِ ستعرفي من ذي خلق واخلاص
أما قبلها استمعي للكل ولاتثقي ....
