رواية همسة وجع الجزء الثاني الفصل الثالث والعشرون بقلم اسماء العذب
23
#همسه_وجع
#الجزء_الثاني
يَا مَنْ تُحبُّونَ الرسولَ محمدًا
صلُّوا على خيرِ الأنامِ وسلِّموا"ﷺ🕊️
♡_______________♡
حاله حزن مسيطره علي الكل
وعدم تصديق للي اتعرف النهارده
كان الكل متجمع في اوضه همسه بعد ما اغمي عليها ودخلوها هناك
وبعد محاولات مش كتيره فاقت بفزع وهي مش مصدقه ولا مستوعبه لحد دلوقتي انها كل اللي تعبت عشانه وعملته اتخرب
تعبها في حفظ سمعه أهلها وانها تراعي مشاعرهم
كله باظ ...
وفاء وسعيد اكتر اتنين حالتهم كانت صعبه
عمر ومازن مش عارفين يعملوا ايه ولا يتصرفوا ازاي وعم مش عارفين رد فعل أهلهم هيكون ايه ...هيحطوا الحق علي همسه وهيقفوا معاها ...ده شئ لسه مش متوضح من حالتهم
مشعل واقف متوتر وهو مش قادر يسيطر علي اعصابه وهو بيتخيل ان السبب ده ممكن يفرق همسه عنه لأي سبب ...او انه هيأذيها هي والأولاد اللي بقي يحبهم زي ولاده
وعد ووليد قاعدين حوالين همسه علي السرير ...والخوف باين عليهم ورغم صغر سنهم إلا انهم قدروا يفهموا ان فيه مشكله كبيره حاصله من الزعيق ومن توتر الأجواء حواليهم ...وإن الكل مضايق والسبب ..هم ..وامهم
وعد بصوت واطي مسمعهوش غير وليد:وليد هو احنا عملنا حاجه غلط لما ما سمعناش كلام ماما وخرجنا من الاوضه زي ما قالت
وليد بزعل ونبره طفوليه :ايوه احنا عملنا كده ...وماما زعلت مننا هي وجدو وتيته وخالو عمر وخالو مازن حتي بابا مشعل زعل مننا هو كمان
وعد :طب هنعمل ايه انا مش بحب ماما تزعل مننا خالث...بزعل انا كمان
وليد كان لسه هيتكلم لكن قطع صوته مشعل وهو بيحمحم بصوت عالي جذب انتباه الكل
مشعل بصوت هادي وتوتر :ممكن تسمعوني إذا سمحتو
الكل التفت ناحيته والجنود هو الشيء الوحيد اللي ظاهر علي ملامح الكل
مشعل بلع ريقه بتوتر اكبر :انا كنت بقصد باللي عملته ...انو..انو همسه ما تكون بخلاف مع عيلتها ... صدق ما كان قصدي سوء هو اللي يصير وو
وفاء بجمود غريب عليها :مفيش داعي انك تفسر حاجه ...انت مش كنت عاوز همسه تسافر معاك ...انا وابوها بنديك الأذن انك تاخدها وتسافر ...قدامكم شهر تمشوا فيه ...وياريت لو تاخدها في البيت اللي كنت مأجره تعيش فيه علي بال ما تسافر انت وهي ...إما العيال ياريت ما حدش يعرف عنهم حاجه والناس تفضل فاكره انهم عيالك لحد ما تمشي
سعيد بتكلمه :وياريت لما تسافروا اللي يجمعنا مغ بعض يكون التليفون والكلام يقتصر علي السلام بس ...عشان صله الرحم ..يلا يا وفاء
وفاء اخدت كرسي سعيد وخرجوا بره الاوضة والكل قاعد بيسمع وهو مدهوش من اللي اتقال
همسه بهمس وعدم تصديق: ما..ماما؟...بابا؟ ؟
♡_______________♡
هشام بفرح وهو مش مصدق نفسه:بجد عملت كده علشاني يا عصام
عصام بموده زايفه: وهو انا لو معملتش كده عشانك انت وتعبت عشان خاطر راحتك هتعب عشان خاطر مين بس
هشام بص عليه بصه كلها امتنان وتقدير وراح عليه وحضنه بكل حب اخوي صادق
هشام بحب اخوي:انا مش عارف من غيرك كنت عملت ايه ....عارف لو كان عندي اخ مكنش عمل اللي انت عملته ده ...ولا انا كنت حبيته الحب ده كله...تسلم يا ابو الرجوله كلها
عصام بتواضع وحب مزيف :يا بني مفيش بينا الشكر والكلام العبيط ده ...احنا اخوات ...اخوات بذمتك في الكلام ده بين الأخوات
هشان بلمعه حب في عيونه:وانت اكتر من اخويا يا عصام صدقني
عصام بهزار مزيف وضحكه سمجه: خلاص يا بني ...ده انت حساس اوي وانا مش عارف...المهم دلوقتي هتعمل ايه
هشام بلهفه: وهي دي محتاجه سؤال ...هروح بيت همسه واخد عيالي من هناك ...وهمسه لما تلاقيني اخدت العيال منها هتيجي هي لحد عندي وتطلب انها تتجوزيني عشان تفضل مع العيال ...وأكيد هتطلب الطلاق من البتاع الخليجي ده
عصام بمكر ونبره صوت ثعبانيه: ده انت داهيه يا جدع وتجيبها وهي طايره ...اومال عاملي فيها مسكين ليه
هشام: ماهو كله من توجيهاتك يا دكتره...يلا بقي انا عازمك بره النهارده علي حسابي بمناسبه الخبر ده
يلا يا صاحبي
♡_______________♡
:سامحيني؟؟؟ ...سامحيني؟؟ ...بجد ؟؟؟ هو ده اللي قدرتي عليه ...هو ده كل اللي عندك ...طب انا لو سامحتك انتي هتقدري تسامحي نفسك
انتي مدركه اللي بتقوليه ...يعني انتي خلاص هتهربي وتشيلي الليله لوحدك
وهشام ينفد بجلده ويعيش حياته ..لا وايه حضرتك باقيه علي ابنه اللي بطنك وعايزه تخليه
همسه بهمس موجوع:ولاء لو سمحتي انا مش ..
ولاء بصراخ :لو سمحتي ايه وزفت ايه ....انتي اتجنيتي ...عقلك كان فين وانتي بتسلمي نفسك بالطريقه دي للوسخ ده ....اهو باعك ولو فكرتي تقفي قصاده هيفتري عليكي وممكن يقول انه لما لمسك ما كنتيش بنت بنوت
ممكن يقول ان قفشك مع واحد تاني
ممكن بقول انه ملمسكيش من أصله وإن اللي في بطنك ده مش منه
وممكن وممكن وممكن...ما هو واطي ومتوقع منه اي حاجه
عقلك كان فين يا همسه
عقلك كان فين يا صحبتي وانتي بتعملي كده ...حرام عليكي
ولاء قعدت بتعب وهي حاسه ان قلبها اتفتت من زعلها علي همسه اللي في معزه اختها بالضبط
وحطت رأسها بين ايدها
:عشان كده
همسه صغيره خرجت من من همسه وهي ناكسه رأسها لتحت بكسره
ولاء رفعت رأسها ليها وهي بتسألها بعيونها هي تقصد ايه
همسه بوجع بان في صوتها:عشان كل اللي قولتيه ده هبعد وهمشي ...عشان احنا الستات لازم اللي نشيل الشيله والرجاله ما عليهم من عيب ...عشان الراجل مهما يعمل حتي لو كان الحمل ده نتيجه اغت/صاب برضوا انا اللي هطلع غلطانه في نظر الكل وهيقولو انها اكيد كانت لابسه لبس كاشف ولا فا.ضح..
وحتي لو لابسه محترم هيقولو ايه اللي ممشيها من الطريق دي ولا ايه اللي ممشيها في الوقت ده
ولا ايه اللي مخرجها اصلا من بيتها
دايما الحق بيكون علي الست
عشان احنا أصلا في مجتمع مبيرحمش الست من لحظه خروجها من بطن امها
عشان احنا في مجتمع شرقي يا ولاء
عشان احنا في مجتمع شرقي ...فهمتي ليه انا متنازله
عشان سمعه اهلي واللي هيتبقي من سمعتي بعد ما امشي واختفي ومحدش يعرف عني حاجه
ساعتها ممكن يقولو اتخطفت ولا عملت حادثه وماتت
والكلام هيفضل يوم ولا اتنين ولا شهر ولا شهرين وفي الاخر الناس هتسكت وتتلهي في حاجه تانيه
لاني مش هكون قصاد عينهم
لكن لو قعدت قدامهم وحتي لو اتثبت ان هشام ابو ابني ...هيكون فات الأوان لان هشام هيسوء سمعتي ويخليها في الارض ....وكل ما حد يشوفني هيشارورا عليا ويقولو مش هي دي اللي حملت من خطيبها من قبل الفرح ...مش هي دي اللي سلمت نفسها لواحد وحملت منه بغض النظر الواحد ده يبقي ليها ايه
وممكن يقولو كمان مش هي دي اللي ماشيه علي حل شعرها واخرت مشيها ده خلفت من قبل جوازها ويقعدوا بقوا يحكوا المصايب والنمر اللي هتحصل لما الموضوع يتعرف وطى واحد يحط التاتش بتاعه
وهو...ههه هو مش هيكون عليه عيب ما هو راجل من حقه يعمل اللي علي مزاجه
لكن هنا البنت لو غلطت غلطه مهما كانت صغيره لازم تتحاسب عليها وانا غلطتي مكنتش صغيره
انا ...انا حامل من قبل الفرح وهشام مش راضي يعترف بأبنه وحتي لو روحنا محاكم والتحاليل اثبتت انه ابنه كلام الناس مش هيسبنا في حالنا وانا مش عاوزه اهلي يوطوا رأسهم بسبب عملتي
عشان كده عاوزه ابعد عاوزه امشي واخد مصايبي معايا ....لعل الله يحدث بعد ذلك أمرا
ولاء بتأثر شديد وزعل عظيم علي همسه: وانتي فاكره انك لما تختفي فجأة كده من غير تفسير ده هيريح اهلك وما يتعبهمش
حرام عليكي بجد اللي عملتيه واللي هتعمليه يا همسه حرام عليكي ...انتي ايه مفكرتيش في نفسك ولا في اللي ممكن يحصل لما تعملي كده
عقلك كان فين ...كنتي بتفكري في ايه لما عملتي كده
همسه بتعب شديد وحزن لو اتوزع علي العالم هيكفي ويفيض:كنت بحبه...كنت معميه ومش شايفه غيره وبحبه....مره كنا خارجين بنشتري حاجات للجهاز ووداني الشقه عشان يتفق معايا علي مكان العفش والديكور والكلام ده
وانا لاني كنت واثقه فيه ثقه عاميه رحت معاه بكى غباء .....بعدها اتفاجأت انه بياخدني لاوضه النوم
ومن بعدها محستش بنفسي ولا باللي حصل غير بعد فوات الأوان
بعدها انهرت وعيطت وندمت ...لكنه كالعاده اكل بعقلي حلاوه وسكتني بكلمتين وخلاني اسكت ساعتها بحجه اني مراته وأننا معملناش حاجه حرام
وإن خلاص فرحنا قرب ومحدش هيعرف حاجه
وحاجات كتير من دي قدر انه يضحك عليا بيها عشان مقولتش لحد
خصوصا ماما وانتي لانه عارف اني بقولكم كل حاجه
ولو عرفتوا في وقتها اكيد كان اتدبس فيا وفي اسرع وقت
ولاء بعتاب :اديكي ادبستي لوحدك ...هتعملي ايه دلوقتي
همسه بتعب: هعمل ايه يعني ...لازم من بكره اختفي وأخرج بره مصر
ولاء بنفاذ صبر: ايوه يعني فين رايحه وين
همسه: مش عارفه...بكره هحجز تذكره طيران علي اول طياره لبره مصر ....لازم اختفي من هنا ومحدش يعرف عني حاجة
ولاء فاقت من شرودها واخر كلمه قالتها همسه وهي بتودعها في المطار ليه بترن في عقلها
ولاء بدموع وحزن :هشوفك تاني
همسه ببسمه وجع ودموع: يمكن الوشوش تتلاقي ...سلام يا صحبتي
قطع شرودها رنين تلفونها برقم همسه
مسحت الدموع اللي نزلت عينها واتكلمت بصوت مبحوح من أثر المشاعر اللي حاسه بيها
ولاء: الو يا همسه
همسه ببكاء: ولاء الحقيني ...كل حاجه اتكشفت يا ولاء كل حاجه اتكشفت ومشعل عاوز ياخدني ويسافر
♡_______________♡
بعد مرور اسبوع
إيمي كانت في المستشفى المتخصص لعلاج مشاكل الحمل
وكأن عدي علي عمليتها حوالي اسبوعين
دخلت مكتب الدكتور ومعاها امها وزيزي ومحمد
الدكتور ببسمه عمليه:ممكن اتفضلي معايا يا مدام إيمي عشان الكشف ونعرف آخر التطورات
إيمي بحماس ولهفه: اتفضل يا دكتور ...
بعد الكشف
الدكتور ببسمه للكل :الف مبروك يا مدام إيمي...العمليه نجحت وحضرتك خلاص حامل
إيمي وقفت من مكانها بفرحه وهي مش مصدقه
إيمي بفرحه:انت بتتكلم بجد يا دكتور ...يعني انا خلاص كده حامل
الدكتور بتأكد:ايوه يا مدام...حضرتك حامل وفي الشهر الأول
زيزي بفرحه وعدم فهم: ازاي وهي عامله العمليه من حوالي اسبوعين
الدكتور بتوضيح: لان انا احنا زرعنا في رحم المدام بويضات مخصبه...اخدناها منها قبل كده ودي بتاخد وقت من اسبوع لعشر ايام
عشان كده المدام حامل في شهر تقريبا
إيمي بعدم استيعاب: يعني انا خلاص كده حامل ...
الدكتور بتأكيد:طبعا يا مدام ...بس ياريت ترتاحي شويه في أول شهرين عشان الحمل يثبت ...وفي روتين يومي مم الادويه والاكلات لازم تمشي عليهم
ده غير الكشوفات والمتابعات الاسبوعيه والشهريه لازم تاخدي بالك منهم كوبس
ولو لحد الشهر التالت لازم ميكونش فيه إجهاد بدني بتاتا لحد ما نشوف الوضع هيكون ايه وقتها
زيزي بخبث وصوت واطي لمامت إيمي: مش مهم يا طنط شهرين... شهرين ...المهم انها خلاص قدام القانون بقت مراته ...فاضل بس نجيب مأذون واتنين شهود ..ومدام همسه وبنتك هتكون تمام وعلي ضمانتي
بيس؟؟؟
باااااااااااااااااااااس
جماعه انا عارفه اني المره دي اتأخرت جامد ومش هقدر افسر سبب تأخيري ده غير اني كنت محتاجه ابعد عن السوشيال شويه وانقطع عن كل مواقع التواصل عشان ده مأثر في نفسيه جامد
ولاني لازم ارجع لحاله الصفاء الذهني بتاعه الاول وده مكنش هينفع غير لمة ابعد عن كل حاجه بتضايقني وانا ك انسان ف انا عصبيه ود.مي بيفور بسرعه
دلوقتي الحمد لله بقي عندي كنترول وتحكم اكبر في الذات ..وحاولت أقرب من ربنا اكتر في الفتره دي مره أنجح واغلب شيطاني
ومره الشيطان يغلبني .. لكني بحاول والله وفي عادات سيئه كنت بعملها بقيت احاول ابطلها وبقيت اقللها لحد ما إن شاء الله ابطلها نهائي
و الحمد لله حالتي النفسيه اتحسنت عن الاول وارجع اكمل وإن شاءالله علي اخر الشهر ده قصه همسه وجع هتكون خلصانه وياريت تعذروني
ولو حد نفسيته تعبانه يا جماعه انصحه يبعد شويه عن السوشيال واي ضغوطات هيفرق معاه بجد زي ما فرق معايا
طبعا كله عرف همسه عاوزه تنتقم من هشام وعصام ليه ...بس اكيد بتسألوا ليه عاوزه تنتقم من مشعل
هنعرف في الفصل الجاي إن شاءالله
وأخيرا متنسوش تقولو رأيكم في فصل النهارده واللي بيعملوه عيله إيمي ده صح ولا لا
بدل ماتدور وتبحث علي الروايات خليها علي تليفونك وحمل تطبيقنا
