 |
رواية من الجاني (حل القضيه الخامس عشر 15)الفصل الخامس عشر 15 بقلم محمود الامين
السلام عليكم ورحمة الله وبركاته
حل حلقة من الجاني؟
بعد ما خلصنا التحريات واللي اثبتت ان سيد كان بيكدب علينا.. تم استدعاؤه مرة تانية، والمرة دي واجهته بكدبه علينا وأنه معندوش مفر تاني ولازم يعترف وبعد الضغط عليه اكتر من مرة اتكلم وقال
_هو انا فعلا قتلته بس انا مكنتش لوحدي انا ليا شريك في الجريمة دي
= مين شريكك في الجريمة يا سيد؟
_ الست احسان.. وهي اللي ادتني الاعشاب اللي مات بيها سليمان
= لا واحدة واحدة بقا واحكيلي كل اللي حصل
...
لما سليمان طردني عشان اكتشف انى بسرقه.. حاولت كتير اني اروحله بس هو مكنش بيسمعني.. انا كل اللي كنت عاوزه حقي
مش هشتغل عنده كل السنين دي كلها بلوشي واونطة، وعشان كده انا كنت عارف سر عن سليمان.. والسر ده ان سليمان هو اللي عمل السحر لجوز الست احسان اللي البلد كلها كانت عارفة انه مسحور
وعشان كده انا روحت وبلغت الست احسان بالكلام ده وهي قررت انها تنتقم منه.. ويوم التنفيذ راحت العطارة وجابت من هناك خلطة كده اشبه بالشاي في شكلها وطلبت مني ابدلها.. بس وقتها مكنتش عارف هدخل ازاي؟
فاستنيته لما خرج وروحت خبطت علي البيت وفتحتلى الست فوزية وطلبت منها اني عاوز ادخل اخد باقي حاجتي وهدومي.. فدخلتني وسابت الباب مفتوح وساعتها استغليت الموقف وفضيت شوية في علبه الشاي اللي كان سليمان بيعمله بنفسه.. وبس وبعدها بساعات الست احسان راحت عشان تشوفه وهو بيموت وتشفي غليلها لكن هو زود الطينة بلة وحاول انه يعتدي عليها لكنه كان شرب من الشاى والمفعول اشتغل.. وعشان كده مكنش في وعيه ووقتها الست احسان زقته وشافته وهو بيموت قدامها.. لكن مقدرتش تمسك نفسها وضربته بسكينه وكملت عليه
بس يا بيه هو ده اللي حصل
...
بعد ما سيد خلص كلامه اتقبض علي احسان اللي اعترفت بكل حاجه بمجرد مواجهتها بسيد.. وقالت
لما عرفت اللي حصل وان سليمان هو السبب قررت انتقم منه.. وكنت عارفة من والدي ان في خلطة اشبه بالشاى وملهاش طعم بتعمل ازمة قلبية
ووقتها اتفقت مع سيد انه يحط شوية منه في الشاي بتاع سليمان عشان يموت بأزمة قلبية.. ولما روحت اشوفه مكفهوش انه اذي جوزي وحاول يعتدي عليا بس مكنش كويس كان بيطوح ولما زقيته ووقع على الارض شوفته قدامي بيطلع في الروح فقتلته بالسكينة من قهرتي علي جوزي ومكنتش اعرف انه مات قبل ما اضربه بيها
...
الاتنين اتحولوا للنيابة ومنها للمحكمة وما زالت القضية تحت اعين القضاء
بس لو الحكم بأيدكم تفتكروا اي الحكم اللي يستاهلوه؟
#محمودالأمين
