رواية الهجينه الجزء الثاني الفصل الواحد و الستون 61 والاهير بقلم ماهي احمد

ليتني أحبســكِ بين أضلُعي أيتها المدعوه بشمس ، ليتني أمتص منكِ حزنكِ، ليتني أستطيع الجلوس جوراكِ أثناء بكائكِ، ليتني لم أكون أنا

--------------------

الأيام سريعه ، سريعه كأحتراق ثقاب الكبريت عند اشعاله من يصدق أنه بمرور يومين قد حدث الكثير حتى أوصلته نتيجه ما حدث الى هنا يقف بمنتصف صحراء سيناء  العتمه والنيران المشتعله بكل مكان  ، الجميع يهرول هنا وهناك  يسمع صراخ الأطفال والأمهات من حوله ، يحيط بهِ رجال الدمنهوري بكل أتجاه ، اصبحت الصحراء ملكه من كثره عدد رجاله ابتسم الدمنهوري ساخراً :

ـ فاكر نفسك هتقدر تهرب مني ده أنا اجيبك لو روحت المريخ يلا 

لم يتوقع "ياسين" أن يجتمعا من جديد وخصوصاً بعدما رتب كل شىء لسفره  يعلم ان لقائهم هذا ستصبح نتيجته الكوارث طالعه "ياسين" باستخفاف وتحدث:

ـ بس أنا عمري ما هاروح المريخ ، بس ممكن اوديك  لو عايز 

نطق " الدمنهوري " مراوغاً :

ـ لسانك ده موديك في داهيه محلتكش غيره الا اما شوفتلك كلب حتى من فصيلتك يدافع عنك ولا حتى شوفت خلقت حد من أهلك ، حتى وأنا حبسك ذليل عندي ما شوفتش خلقت حد فيهم للدرجه دي مش عايزينك ، ده أنا كده بقى  هعمل ليهم خدمه واخلصهم منك خالص المفروض يشكروني بقى 

غزت الرعشه " جسده " حاول جاهداً ان يتماسك 

حتى لا يكتشف أمره أمام الجميع لا يهمه نفسه فالأهم عنده هو حياتهم ، ولكن فجأه خرج جسده عن السيطره حين شقت أظافره طريقاً للخروج وقبل أن يتحول أمسك " داغر " كف يده يقف بجواره يحثه على الهدوء هاتفاً :

ـ فعلاً ،  هنشكرك ، بس بطريقتنا 

قفزت "ميرا " أمامه تسند بيدها على الأرض تحفر أظافرها بداخلها :

ـ عيلته تقيله عليك قولنا يلعب بيك لوحده حبه 

وفي لمح البصر وجد " الطبيب " يقف خلفه وهو يقول :

ـ جيت في ملعبنا 

أتى بربروس من الخلف بابتسامه عريضه على وجهه :

ـ يافرحتــــاه ، لقد وقع الفأر بالمصيده 

ظهورهم من العدم اربكه ولكنه حاول اخفاء ارتباكه حين قال :

ـ والتلات دكوره والحرمه دول هما اللي هيحموك ، من الجيش ده 

اقترب " عز " ووقف من الناحيه الأخرى بجانبه يشهر سلاحه وينشر رجاله بكل مكان يحيطون برجال " الدمنهوري " يخبره بابتسامه ساخره:

ـ لاء ، انت ماتعرفش أن الحرمه دي بجيشك كله 

نظرات العيون لو انها تنطق لكانت حرب طاحنه الأن ، نعم انها ساعه الحرب وقد دقت الطبول ولكنها ستدق على رأس كل من يفكر في التقرب بالأذى من عائله الصاوي 

الخطوه الجريئه هذه سبقها الكثير من الاهوال ، كانت الايام السابقه بالنسبه لـ "ياسين" مليئه بالعديد والعديد من الأحداث ، بارعه الحياه حقاً في استغلال ولو لحظه واحده ، أتت ذكرى الى رأسهُ حين تذكر أخر كلماته مع" زوجته"  تطلب منه عدم الأنفصال في تلك الليله ووافقها هو ،  وافقها وكل انش بجسده يصرخ بالموافقه ، اومىء برأسه دون حديث وابتسمت عينيها دون حروف اومأت تبتسم لهُ في راحه وجوده  بجوارها هو الراحه ، رفع كف يده يزيل عباراتها الساخنه التي ما زالت تتساقط على وجنتيها دون توقف زاد اقترابه وكأنه يخبرها بعينيه  بأن تعانقه بشوق وعشق ، كادت أن تستجيب لنداء عينيه الصافيتين  ولكن فصل حديث الأعين  تلك صوت "زهره" تشعل مصباح القبو تقف بينهما رغماً عنهما تنطق بضيق :

- هو ده الوعد اللي وعدتهوني ياسي ياسين ، هو ده كلامك ليا 

تقصد بحديثها معهُ حين جلسا سوياً بكوخ 

" عم نصير " وادلى بوعده لها بأنهُ سيتخلى عن زوجته حينما تتيح لهُ الفرصه لذلك ، ابتعد عن زوجته يطالعها بغيظ وضاعفت " زهره" حديثها حين قالت : 

ـ مكانش لازم أصدقك مكانش لازم اصدق واحد زيك ولا اثق في كلامه ، واحد بيقول الكلمه وبيعمل عكسها ، من ناحيه توعدني انك هطلقها ومن ناحيه تانيه تاخدها في حضنك ، وانا متأكده انك انتَ اللي غصبها على كده ، كفايه بقى سيب بنتي في حالها ، ومش بنتي وبس سيبنا كلنا في حالنا وامشي كل اللي احنا فيه ده من تحت راسك 

توتر الأجواء هنا ليس كأي توتر بل اشتعال لم يخرج صوت "ياسين" كانت نظراته كافيه لقول كل شىء بل صدح صوت "شمس " التي قالت بأنفعال : 

- كفايه بقى ياماما ، حرام عليكي أنتِ مابتزهقيش ابداً 

صاحت في والدتها مما جعلها تقول بغير تصديق :

-بتزعقيلي ياشمس ، بتعلي صوتك على أمك عشان خايفه على مصلحتك يابنت المهدي ، بتقفي قصادي عشانه  ، عشان واحد قاتل ، قتل "فريد" بدم بارد 

وجهت حديثها للاخر حين قامت بسؤاله :

ـ كدبني لو كلامي غلط ياسي ياسين 

هنا فقد "ياسين" كل ذرة تعقل لديه وجذب "شمس" من مرفقها نحوه وقبل أن يرتكب اي شىء يجعله يندم على فعلته ،  أرتدى قناع البرود   بقول : 

ـ هترتاحي لما تعرفي  اذا كنت قتلته ولا لاء يازهره

أومأت برأسها بالأيجاب تؤكد على سؤاله :

ـ اكيد 

اقترب منها هامساً بضحكه مصطنعه :

ـ بس أنا بقى غلس ومش هريحك 

طالعته "زهره" بمقت تشير لـ "شمس"  بسبابتها ناحيته تؤكد على حديثه : 

ـ شايفه  ، حتى ما حاولش ينفي التهمه عنه ، محاولش يدافع عن نفسه ويقول انه ماقتلهوش بس يقول كده ازاي وقميصه اللي متغرق بدم فريد يشهد عليه وانتِ شوفتيه بعنيكي 

ركل المقعد الموضوع على الأرضيه بعنف صارخاً بقول :

- قميص ايه اللي عليه دم فريد انتِ جرى لمخك حاجه 

مما جعل "شمس" تمسك كفه مسرعه ، تقف بينهما في محاوله منها لأخماد ثورته :

- ياسين ... عشان خاطري ما تتهورش اهدى ياياسين دي أمي 

ابعدتها والدتها عنه وهي تتابع بغلظه :

- ابعدي أنتِ ياشمس ، انا عندي اموت على ايده عشان تشوفي حقيقته ويبان على أصله بدل ما ييجي في مره وتموتي انتِ وده اللي مش هقبله  أبداً

استدارت لوالدتها تابعت برجاء نابع من عينيها قبل فمها :

-أسكتِ ياماما بقى ، أسكتِ عشان خاطري أنتِ كده بتزوديه أكتر 

ولم تستجب "زهره" بل القت على مسامعه ما أصاب قلبه بغصه كالسهم الذي اخترق جسده :

ـ حتى شمس نفسها مش متأكده اذا كنت فعلاً ماقتلتهوش ولا لاء ، اسألها قولها ياشمس أنتِ واثقه أني مقتلتش فريد ولا لاء أسألها وشوف هترد عليك بأيه 

ابتلع ريقه وتباطىء حديثه خرجت منه الكلمات عنوه حين سألها : 

ـ صحيح الكلام ده ياشمس ، أنتِ شاكه اني ممكن اكون قتلته فعلاً 

هزت "شمس " رأسها رافضه حديثها ،فتابعت والدتها بحزم :

- ماتنطقي  ياشمس  ماتفضليش تهزي في راسك وبس قوليلوا انك مش متأكده أنه بريء وانه ممكن فعلاً يعمل حاجه زي كده 

بكت أكثر وهي تنظر الى كليهما ، وكأن الكلمات تقف على طرف شفاها ولا تستطيع الخروج ، شهدت الذهول على وجهُ وهو يسألها  :

ـ اللي بتقوله زهره ده صحيح ياشمس أنتِ فعلاً مصدقه أني قتلته 

قالها وعيونهم لا تتفارق ، توقع "ياسين" كل شىء

الا هذا لم تستطع الأجابه ،  وفضلت الصمت جذبها من مرفقها وصاح يكرر سؤاله : 

- ماتتكلمي ساكته ليه ياشمس 

بان الترقب على وجهه وألقت هي على مسامعه ما لديها : 

ـ معرفش 

كلمه مختصره قالتها لهُ وصوت نحيبها يتغللها ، 

وكأنها صفعته على وجهُ وتألم قلبه ، ابتسمت "زهره" ابتسامه بان بها الشماته وهي تقول :

ـ شوفت بقى أني ما كذبتش عليك هي نفسها مش حاسه معاك بالأمان لو عندك دم تطلقها 

لحظه تجمد الزمن بها لحظه يتلقى بها من الصدمات ما لن ينساه أبداً ولكن هذه المره كانت من الأقرب لقلبه ، تخطى "ياسين" الواقفه أمامه ليوجه حديثه هذه المره الى "زهره" يلقي عليها كلماته بثبات :

ـ لو طلقتها هترتاحي 

نطقت دون تردد وبلهفه :

ـ أكيد 

اقترب "ياسين" من "زهره " هامساً: 

ـ بس انا لسه غلس ومش هريحك 

لم تلتفت لهُ "زهره" بل تحركت عيناها ناحيه "شمس " بغيظ ، ثم أردف هو بقول :

ـ الظاهر ان مافيش حاجه ممكن اعملها تخليني اكسب ثقتك في يوم ياشمس ، انا عملت كتير عشانك عشان اخليكي تنسي اللي فات مني بس الظاهر مهما عملت الشرخ اللي جواكي من ناحيتي عمره ما هيترمم من جديد 

ـ هتفت "شمس" وعيناها لا تفارقه :

ياسين أنتَ مش فاهم 

بتر حديثها دون تردد :

ـ اللي فاهمه ان الشك جوه قلبك من ناحيتي وده كفايه 

تحرك خطوات للأمام ثم أكمل حديثه دون النظر للوراء :

ـ اللي اتفقنا عليه هيحصل اول ما اسافر 

وقبل ان ترمش لها عين أختفى من أمامها وكأنه تبخر ، حاولت الركض خلفه ، ولكن منعتها يد والدتها بثبات سائله: 

- انتِ اتفقتي  على ايه مع الغلس ده ، هيطلقك ؟ 

صاحت بوالدتها مجيبه من بين شهقاتها :

ـ أيوه ، هيطلقني ارتاحتي 

قالتها تحرر ذراعها من كف والدتها ، بعيون ملامه لما فعلته تركتها تحت أنظارها تغادر القبو حيث 

تنفست  "زهره" بعمق وقد تغللت الراحه اليها حين سمعت ما يرضيها ، صفعت "شمس " باب غرفتها وقد اتخذت قرارها المفاجىء توجهت "زهره" ناحيتها ولكنها ارتطمت بـ "مشيره" بالردهه حيث قالت : 

ـ مشيره أنتِ هنا من أمتى 

ارتبكت ، ولكنها ردت بهدوء محاوله الا تتوتر الأجواء :

ـ لسه راجعه من المستشفى حالاً 

كاذبه ، هي هنا منذ فتره وقد علمت بما حدث تراقصت الفرحه على وجهها ولم تستطع أخفاء فرحتها حين اردفت :

ـ أنا سمعتكم بالصدفه وشوفت ياسين وهو خارج  واللي عملتيه يازهره هو الصح ، ده اللي كان لازم يحصل من بدري 

اقتربت خطوات من زهره تربت على كتفها بلين :

ـ مش عايزاكي تبقي قلقانه خالص انا هاخد ياسين وارجع مكان ما جينا ووعد مني مش هخليه يرجع هنا تاني أبداً 

وردت عليها بضجر :

ـ كده الكل هيرتاح وانا مش عايزه في حياتي غير ان 

بتر حديثها تأويهات شمس ، فدلفت الى غرفتها دون استئذان تطالعها باستغراب :

ـ أنتِ بتعملي ايه 

ردت عليها " شمس" مما جعلها تنصت لها:

ـ زي ما أنتِ شايفه بلم هدومي وماشيه 

أخذت "شمس" متعلقاتها الموضوعه داخل خزانتها

ووقفت تستكمل توضيب حقائبها اوقفتها والدتها بقول :

ـ تعالي هنا ماشيه رايحه فين ؟ كل ده عشانه ؟ هتسيبي أمك عشانه ياشمس 

وضعت  ملابسها بداخل الحقيبه بضجر :

ـ  لاء ، عشاني 

نبهتها "زهره" للشىء الذي لا تنتبه لهُ :

ـ خللي بالك ياشمس أنتِ عارفه كويس لو روحتي وراه  مش هعرفك تاني 

ظلت "شمس" صامته لثواني قبل أن تقول بألم كاد أن يفتك بها :

ـ أنتِ عارفه مشكلتك ايه يا أمي ؟ أنك مابتشوفيش غير نفسك وبس ، مش مهم حد غيرك المهم تنفذي اللي أنتِ عايزاه 

نزلت دموعها وهي تكمل بقهر :

ـ شايفه اللي في دماغك هو الصح ولازم يتعمل مش مهم بنتي عايزه ايه ، عمرك جيتي وسألتيني  وقولتيلي أنتِ عايزه ايه ياشمس ، عايزه ياسين ولا لاء 

ضحكت بمراره وهي تقص على والدتها معاناتها الطويله : 

ـ طول السنين اللي فاتت دي وانا حاسه بالقهر على موت عمار وانه مات بسببي ، كنت بحس بتأنيب الضمير لما كبرت واكتشفت اني مكنتش بحبه وانه كان مجرد تعلق بحد اخد بأيدي وطلعني من اللي كنت فيه ، وده احساس كان بيموتني ، كنت بحس اني خاينه لي حتى وهو ميت ،  ماحسيتش ان روحي اتردت فيا من جديد الا لما ياسين رجعلي ، انا كنت عايشه على أمل انه يرجع واخيراً لما رجع لاقيتك واقفه قدامي وبقوه وبدافعي عن فريد ، فريد اللي كان هيغتصبني ولولا ياسين كنت زماني ميته ، اتحمل منك كتير وانا اتحملت منك اكتر ، كل اللي في البيت هنا اتحملك واتحمل انانيتك بس خلاص رصيدك خلص عند الكل ، وانتِ مش شايفه ده ، فاكره انك كده بتحميني ولكن في الحقيقه أنتِ بتأذيني 

ـ زاد انهيارها وهي تختم :

بس كفايه لحد كده ، انا مش هسمحلك تدخلي في حياتي تاني ، أنا كبيره كفايه وعارفه مصلحتي كويس ، مصلحتي اللي أنتِ عمرك ما شوفتيها 

ـ وبلا خوف صفعتها والدتها بكلماتها:

انا خايفه عليكي ، معاه عمرك ما هتحسي انك طبيعيه ، معاه عمرك ما هتعيشي حياه زي البني ادمين اللي احنا منهم انا ضحيت عشانك كتير واولهم علي ، علي اللي ماحبيتش ولا هحب حد غيره بس انا اختارتك انتِ وفضلتك عنه ، لما حسيت معاه اني خايفه ، خايفه في يوم مايتحكمش في نفسه ، ولما حسيت معاه اني مش هخلف تاني ، كان كل همي اني ما تجرحش واتعور  او اني اخليه يشم ريحه الدم لا يفقد السيطره على نفسه مكنتش عايزاكي تعيشي احساسي اللي حسيته 

كان ردها عليها كافياً لمضاعفه غضبها فردت بأنفعال : 

ـ ده كان أحساسك انتِ ، ومشاعرك أنتِ يا أمي مش مشاعري أنا ، ايه اللي يخليكي تحطيني مكانك ما ممكن انا اتقبل الشعور ده عادي جداً واتعود عليه ، وانا متأكده أني مع ياسين هتقبله عشان ياسين يستاهل أني أفضل معاه في كل حالاته 

ـ هزت رأسها تستكمل :

وعلي كمان كان يستاهل يا أمي أنك تتقبليه بكل حالاته 

قبضت على حقيبتها تحملها تتجه ناحيه الباب وقفت "زهره" امامها بعيون راجيه :

- ماتسبنيش ياشمس انا ماليش غيرك 

تركت لها المنزل ولم تستجب لحديثها ، نزلت وهي لا تعرف حتى الوجهه التي ستذهب اليها ، صافعه الباب من خلفها هرولت "زهره" للخارج ولكن أوقفها حديث " الطبيب" حين ظهر أمامها من العدم يطالعها بنظره شامته وابتسامه مكسوره بعض الشىء:

_ياخساره يازهره خسرتي كل اللي حواليكي حتى بنتك 

قال ما لديه ورحل ، تركها بقلب مرتجف خوفاً من القادم  وحيده بينما هناك من يقف خلفها يتابع ما يحدث باهتمام انها "مشيره" تلك التي لو ودت ان تحرق البيت بأكمله لحرقته وياليت يكفيها لتهدئه روحها 

-----------------بقلمي ماهي احمد--------------------

نسمات الهواء البارده قبيل الفجر كفيله بأن تنعش روح اي انسان إلا هو ، خُذلت روحه بعدما علم شعور "شمس " وما تفكر بهِ ، هو الأن يجلس بالقطار منتظر مغادرته بفارغ الصبر يريد الهروب ، الهروب حتى من نفسه يستند برأسه ناحيه النافذه المشبعه بقطرات الندا ،  في محاوله منه للأسترخاء ، من يراه من الخارج يقسم بأنه هادىء البال وتعرف الراحه طريقاً لقلبه ، ولكن من داخله ضجيج لو كان يُسمع لصم البشريه بأكملها صراع لا ينتهي أبداً ، لم ينتبه لشىء تفكيره منصب على شىء واحد وعلى جمله واحده حين قالت زهره :

ـ حتى شمس نفسها مش متأكده اذا كنت فعلاً ماقتلتهوش ولا لاء ، اسألها قولها ياشمس أنتِ واثقه أني مقتلتش فريد ولا لاء أسألها وشوف هترد عليك بأيه 

لم يهتز لحديث  زهره ولكن تألم لأجابه ابنتها  : 

ـ معرفش 

هنا تألم قلبه للمره التي تكاسل عن عدها ،  مسح بيده أسفل رأسه بتعب وبانت صدمته في اتساع عينيه ناحيه النافذه حين نادته "شمس" من الخلف رفعت كفيها الصغيرين تدق على النافذه بكل قوتها وقد لمعت عينيها وهي تراه يطالعها  فحثته على النزول بقول :

ـ ماتمشيش ياياسين ، ماتمشيش الا لما تسمعني

وأتاها الرد مدهشاً:

ـ ارجعي ياشمس بتعملي ايه هنا 

علت صافره القطار تعلن عن مغادرتها للمحطه تحرك  القطار ببطىء شديد ببادىء الأمر وتحركت هي معه لمعت عيناها  وهي تقول :

ـ انا مش سمعاك صوت الصفاره عالي أوي بس عارفه انك سامعني 

زادت ضربات قلبها ، والنهجه اعتلت صدرها ، ازدادت سرعه القطار وزاد ذلك من ركضها خلفه ترجته أكثر وزاد رجائها بقول :

ـ أنا ماقصدش أني مش واثقه فيك لما قولت اني معرفش اذا كنت قتلته ولا لاء  أنتَ فهمتني غلط ، اديني فرصه اشرحلك ارجوك 

ولم يخذل الرجاء في نبرتها حيث تحرك مسرعاً بأتجاه الباب يمد يدهُ لها ، اغتصبت ضحكه من بين دموعها وهرولت ناحيته حتى تشابكت ايديهم وجذبها من يدها بعيداً عن الباب  وما أن قفزت الى الداخل احتضنته وتشبثت به وكأنه الأمل الأخير وفصل هو عناقها بقول :

ـ اعملي حسابك هتنزلي المحطه الجايه 

اضطربت الاجواء وقد سددت "شمس" نظرات معاتبه ولكنها لم تؤثر كانت لا شىء أمام ألمه مما جعل شمس تقول :

ـ مش هنزل الا لما تسمعني 

رجاء من جديد وهي تستعطفه : 

ـ أرجوك 

لم يعطها حق الرد ، تبخر من أمامها وكأنه لم يكن دارت بعينيها في المكان ، بحثت عنه بكل مكان وبالأخير أدركت أنه من المحتمل بل بالتأكيد أنه على سطح القطار مكانه المفضل دائماً وابداً ، فتحت الباب و صعدت بحرص على الدرج الحديدي تتجه للأعلى وقد كانت قدماها ترتجف لم تسعفها على التوازن في ظل سرعه القطار ومع ذلك أجبرت قدميها على الصعود  ، وما أن صعدت حتى رأته بالفعل  بينها وبينه امتار قليله  نادته بأسمه بنبره مبطنه بالتوتر  :

ـ ياياسين 

استدار ليراها تكاد أن تقف ، المنظر مهيب .. الهواء الشديد .. تحرك القطار بسرعه كبيره .. الحقول على الجانبين ..  كل هذه العوامل اربكتها وأصابها الشعور  بعدم الاتزان ولكنها على الرغم من ذلك أتخذت قرارها بخطوتها الأولى نحوه وشكرت قدماها ألف مره على معاونتها وقدرتها على تحمل السير في حالتها هذه  ومع كل خطوه تفقد اتزانها أكثر صاح بها بقول :

ـ انزلي ياشمس 

رفضت طلبه بأصرار :

ـ مش نازله إلا لما تسمعني واللي عندي هقولوا 

رد بجفاء :

ـ مابقاش في بينا كلام عشان يتقال 

تحركت خطوه أخرى ناحيته وهي تنظر لموضع قدميها بتوتر :

ـ يبقى هفضل واقفه كده لحد ما تسمعني ان شالله اقع واموت 

ورد دون تفكير :

ـ حتى دي كمان مابقتش تهمني 

كلماته نجحت بالفعل لأحزانها أكثر ، نبرته الحاده كانت اكثر من ناجحه ولكنها نفضت كل ذلك عن تفكيرها حين نطقت بلين :

ـ مابقيتش تخاف عليا ياياسين 

أوجعته جملتها الاخيره ورأت في عينيه حزنه حين تذكر جملته نفس الجمله كان يخبرها بها دائماً منذ زمن مضى  تأثر بذلك وهرب من اي نقاش اخر بقول:

ـ قولي اللي عندك انا سامعك 

جاء قطار اخر بسرعه كبيره في الأتجاه المعاكس

لقطارهما أحدث ضجه عاليه فقدت تركيزها واتزانها بدأ يختل ،  انكمش جسدها وشعرت بالخوف وكادت أن تسقط لولا قبضته التي لحقتها وعيناه   تطلب منها اجابه وقف بجواراها كالعاده شعرت بالأمان باقترابه طالعته بامتنان على فعلته واخبرته بود :

ـ يبقى بتخاف عليا ياياسين 

---------------------

فاق "ياسين"  من شروده على صوت " ميرا " تتقدمهم تقف وجهاً لوجه أمام "الدمنهوري "  واسترجع حقيقه أنه  مازال هنا بمنتصف المعركه يقف بالمنتصف والجميع يحاوطه من جميع الاتجاهات حيث قالت "ميرا " ببرود مصطنع :

ـ هي كلمه حرمه دي تقصدني بيها أنا 

جاوبها " الدمنهوري " ساخراً :

ـ هو في حرمه هنا غيرك 

تحرك "ياسين" ناحيتها بسرعه وقبل أن ترد جاوب بدلاً عنها بقول :

ـ أه ... أنتَ ، ليك رأي تاني ولا ايه ؟

اتلف اعصابه وتحرك "الدمنهوري"خطوه للخلف هاتفاً  بحزم وقد قست تقاسيمه يأمر رجاله بالتالي :

ـ يارجاله عمروا أسلحتكم وانتوا عارفين هتعمروها بأيه 

يقصد بكلمه " تعمير الأسلحه " الحقن التي صنعها الغريب لقتلهم جميعاً فأتى "يزن " من جهه اليسار واضعاً كف يده بجيب بنطاله يخبره شامتاً : 

ـ ياترى هيعمروها بأيه ؟

وتصنع أنه تذكر شيئاً : 

اه ، افتكرت اوعى تقصد الحقن اللي غريب عملهالك أزعل اوي ، اصل الحقن اللي فاكر انها ممكن تأذينا ومتحامي فيها وموزعها على رجالتك دي مجرد كحول عشان تطمن وتيجي هنا برجليك لينا وتبعد عن القريه خالص ونبقى هنا مع بعضينا لوحدنا بقى بعيد عن الناس الغلابه اللي كنت عايز تاخدهم في الرجلين 

صاح بغضب بان في عينيه التي شنت حربً عليه :

ـ أنتَ كداب ، بدر عرف يجيبلي الراجل بتاعكم الغريب ، وده  اللي صنع الدوا بأيديه 

لم يكد "يزن" يرد حتى  رأى "الدمنهوري " من أتى من خلفه ، كان أخر من توقعه انه "بدر " ادرك الجزء الأهم في اللعبه علم أن ما حدث ما هو سوى فخ حتى يستدرجوه الى هنا وسط الصحراء المنعزله عن الجميع ، ضحك " ياسين " وعلت ضحكاته حين رأى الهلع اصاب تقاسيمه وطالعه "الدمنهوري" بغير تصديق  وانتظر على احر من الجمر كلمات "ياسين " التاليه حيث وجده قال :

ـ كل حلفاؤك خانوك يادمنهوري 

تهكمت ملامح وجهه وحول عيناه للون الأحمر القاتم حيث قال :

ـ عشان كده بقى 

نجح بجذب انتباه الجميع بكلماته الكل ينتظر سماع ما سيقوله ولكنه أذهلهم بقوله :

ـ انا عايز شيري كولا ، اصل بحس اني عايز اشربها لما احب اسمع حواديت 

ختم حديثه يغمز  للدمنهوري بطرف عينيه وبقى هو مكانه يطالعه بغير تصديق ثم نطق يشير لـ"بدر" بعينيه حتى يستكمل حديثه فأكمل "بدر" يواجهه بقول :

ـ أنتَ صحيح كنت هتقتلني وهتقتل خالتي وأي حد مكاني كان لازم ينفذ أوامرك بس انا المره دي نفذت اللي يمليه عليا ضميري ونفذت كل كلمه يزن قلهالي 

أشار برأسه ناحيه "أبو المعاطي " والذي كان يقف خلف" الدمنهوري " يسترسل حديثه :

ـ انا غلطت لما سمعت كلام أبو المعاطي الندل اللي باعني ليك من غير تمن 

شعر "ابو المعاطي" بالخطر فحاول التفاهم معه حين سأله  :

ـ أنا كنت معاك لحظه بلحظه أمتى قابلت يزن ؟

وأمام سؤاله ذكره هو بحدث مر حين ذهب لأيصال "غدير " الى منزلها ووعدها بأنه لن يؤذيها ولم يطمئن قلبه الا حين رأها تدخل منزلها بأمان  ولكنه لم يبرح مكانه ظل منتظراً لساعات طويله حتى رأه "يزن" من شرفه غرفته هبط الدرج مسرعاً وكان في قمه ثورته قبض بكف يدهُ على تلابيبه ، ولكنه نطق سريعاً يخبره مرتعباً  :

ـ أنا عارف عنكم كل حاجه غدير قالتلي على كل شىء ، بس يعلم ربنا اني مش ناوي على الغدر ووقفت هنا لساعات مستني أنك تنزل في اي وقت علشان اعرفك اللي بيحصل وتلحق تعمل اي شىء اللي مستنيكم مش هين 

قال هذا "بدر "  ببساطه مما جعل "يزن" ينفر من حديثه ويرد: 

ـ والمفروض بقى أن اصدق واحد زيك ، عنيه مليانه بالغدر وعشان ايه 

ـ عشان غدير 

امتلأت الدهشه تقاسيم "يزن" وانصت لما يقوله باهتمام ثم أكمل "بدر"  يؤكد على ما قاله من قبل :

ـ ايوه عشان غدير مش عايزها تتأذي ، ولو حد فيكم اتأذى أكنها هي اتأذت بالظبط ، عمرها ما هتسامح نفسها في يوم 

حظى بكامل اهتمامه فأردف بنبره مبطنه بالسخريه  :

ـ وانتَ بقى اللي هتأذينا 

ـ مش أنا ده الدمنهوري ، أنا لا يمكن أأذي غدير ، حظي الوحش اللي خلاني أقابلها في ظروف اوحش ، كنت محتاج لفلوس لما جاني واحد اسمه ابو المعاطي يتفق معايا اني هوقع بنت صغيره في الكلام واعرف منها اللي هما عايزين يعرفوه عمليه بسيطه وسهله هاخد منها الوف اقدر اعالج بيهم خالتي المريضه بس حصل اللي مكانش في حسابي 

لمعت عيناه بالعبارات يخبره بما داخله :

ـ حبيتها ، وكنت أتمنى أقابلها في ظروف غير دي 

انا دلوقتي قدامك وعارف أنتوا تقدروا تعملوا فيا ايه بس بالرغم من ده كله انا قدامك كان ممكن اهرب واقول ماليش فيه ، وابعد واسيب الدنيا تطربق من كل النواحي بس معملتش كده

ومعملتش كده عشانها هي وبس 

رأى الصدق بعينيه ، كل كلمه وكل حرف ينبع من داخله بصدق وهنا اطمئن لهُ "يزن" حيث اتفق معه انه سيبقى تحت رحمه "الدمنهوري " وهو من سيخبره عن الغريب وهنا اتضح كل شىء حيث جمع "ياسين" الخيوط ببعضها جميعاً  وتذكر حين غرس بهِ " الغريب" العقار المضاد لما يحقنه بهِ "الدمنهوري " وأصبح أقوى من ذي قبل مما ساعده ذلك على الهرب 

نطق "داغر " لأول مره في هذه الجلسه باستهجان :

ـ رغم كل اللي حصل يادمنهوري ورغم كل اللي بتعمله ، انا بديك فرصه انك تهرب 

ليكون جواب "ياسين" مقتضباً : 

ـ أنتَ بتقول ايه ؟ مين ده اللي يهرب 

ضغط "داغر" على كف يده يحثه على الهدوء واكمل يوجه حديثه للدمنهوري :

ـ أهرب يادمنهوري خد رجالتك من غير نقطه دم واحده ومن غير ما حد يتأذي ، أنتوا مجرد بشر  وانتَ عارف أحنا ممكن نقدر نعمل ايه 

ضرب "عز " سلاحه بكف يده بنبره تحذيريه : 

ـ ياسلام على طيبه قلبك ياداغر ، طول عمرك طيب ، بس بلاش مع الاشكال دي ماينفعش معاها الطيبه 

زئرت" ميرا " بصوت أرعب رجاله وبث الخوف بقلوبهم تراجع رجال "الدمنهوري"  خطوات للخلف يدورون بأعينهم بكل مكان وبان على تقاسيمهم الرعب الذي ملىء القلوب قرروا الانسحاب  ولكن اوقفهم صوت "مشيره " التي أتت من الخلف واضعه السلاح على رأس " الخاله " من يرى الخاله يقسم بأنها قد فقدت روحها من كثره ضعفها قائله ببسمه ماكره :

ـ مش على طول كده ياداغر 

التقط "داغر"  نبرة صوتها وبان ذلك على تقاسيمه ولكنه فشل في التعرف على المتحدث فاسترسلت حديثها بقول : 

ـ مافتكرش أنك هتعرفني ياداغر أصل دي اول مره 

تسمع صوتي فيها اعرفك بنفسي انا مشيره اللي الخاله جابتك مخصوص عشانها من المانيا وجمعتك انت وعز وميرا من جديد عشان تبقوا جنب ياسين في الوقت ده والحقيقه بقى اللي محدش يعرفها ان انا اللي خططت لكل ده 

أكملت تذكر مخططها دون خوف تشير الى "الخاله" باشمئزاز  :

ـ وانا اللي خليت الوليه العجوزه دي تشك فيا وتسمعني من ورا الباب عشان تسافر على مصر وتقول الحقوني لازم تتجمعوا من جديد 

أذهلت الجميع بتصريحها ، اصبح الجميع بحاله صدمه مما يعيشوه الأن ، تهكمت نبرتها حين نطقت كلماتها التاليه بقول : 

ـ واقهر قلب ياسين  مش بس على شمس لاء ، اقهر قلبه عليكم واحد واحد ، عايزاه يعيش شايف كل اللي حواليه بيموت يفضل عايش بجرحهم وان هو السبب في موتهم 

ضربت بكف يدها على موضع قلبها بقهر تواجهه بأنفعال  :

ـ زي ما قهرني وشرخ قلبي ورماني بره حياته بعد عشر سنين ، عشر سنين لميتوا من الشوارع اخدته في حضني وقفلت قلبي عليه ، عملت كل شىء ، علشان اقدر اخليه ينسى  شمس وابقى أنا مكانها بس مانسهاش ، وفي الاخر عمل ايه اختارها ، اختارها بعد ما باعته للمره المليون ولو كان عمار عايش مكانتش حتى بصت في وشه بعتني بالرخيص بعد ما اشتريتك بالغالي بس وحياتك يا  ياسين ياللي عمري ماحبيت حد قد ما حبيتك ، حبيتك قد ما بحب روحي ويمكن أكتر  ، عندي اموت ولا اشوفك متهني معاها في يوم 

كل تعابير "ياسين " ترسم ببراعه غضبه الجم من "مشيره " فأتى منه الرد :

ـ هتفضلي طول عمرك ***** اديتك الفرصه انك تطلعي بره حياتي ورحمتك من اللي هعمله فيكي ، بس الظاهر ان الرحمه خساره في اللي زيك،  ولو كنتي ذكيه كنتِ عرفتي ان الرصاص ده مابيأثرش فينا 

ضحكت ، ضحكت حتى سعلت بل وزاد هذا ضحكات الدمنهوري بصوت عالٍ حين قال بنبره منتصره  :

ـ افتكر انك بتستهون بذكاء مشيره ياياسين ، مشيره أذكى من كده 

وبنفس نبرته ردت :

ـ وتفتكر دي حاجه تفوت عليا ياياسين ، بعد ماخليت يزن وعلي يتأكدوا انهم ممكن يكونوا ضحكوا علينا بالكحول الاهبل اللي الغريب عمله خليت الدمنهوري يرجعوا بيته وخليت يزن يطمن انه خلاص رجع البيت في وسط عياله وبعدها كلكم جيته هنا ويــاحـــرام 

نطقت كلمتها الاخيره ببطىء ساخره من فعله  :

الغريب مكانش راضي يبيعكم أبداً ،  بس انا بقى قتلتله مراته وهددته لو معملش السم هقتله عياله كمان  ، شوفتوا الخاين باعكم عشان عياله وعمل السم  على طول حتى بص 

ـ والمفاجأه حين  أشهرت "مشيره" سلاحها ناحيه صدر "الخاله" واخترق جسدها العيار الناري  الممزوج بالسم القاتل وسقطت على الأرضيه  وارتوت الارض من دمائها صرخت ميرا بخوف على الخاله وكذلك "ياسين " الذي تجمدت عيناه وهو يرى والدته ملقاه على الأرض يفقد قطعه من روحه للمره الثانيه هرول ناحيتها وكذلك "الطبيب و بربروس " لحقوا به  وبلحظه هرول الجميع ناحيتها ولكن ازدادت الاعيره الناريه والتي قامت بتفرقتهم ،  اصبحت الدماء بكل مكان ، انطلقت الأعيره الناريه هنا وهناك والمقصود ابادتهم جميعاً صدحت بالأجواء من جهه اليمين  رجال "عز" يطلقون النيران ومن جهه اليسار تبادلهم طلقات رجال الدمنهوري انطلق "ياسين والطبيب علي " ناحيه الخاله هربت "مشيره" اتاها الفرار على طبق من ذهب ، هربت من هنا الى الأعلى ، تتجه لخطتها البديله ، انتشل ياسين الخاله وضمها الى صدره لم يهتم للضرب المتواصل من حوله بل حمل والدته التي تأن محاولاً بصعوبه تفادي الضرب وايجاد أي مخبىء لحمايتها قام بوضعها خلف كومه من الصخور ، قام "بربروس " من الخلف بحمايتهم والتصدي لأي احد بالأقتراب منهم ،  تسابقت دموعه على وجنتيه وهو  يراها بهذه الحاله يفقد والدته أمامه يراها تلفظ انفاسها الأخيره ، رفعت كف يدها تلمس وجهه بحنان تخبره بصعوبه من بين شفتيها :

ـ محدش يبكي ، ماتبكيش عليا ياعلي ، ولا أنت ياياسين دموعكم أغلى من أنها تنزل عشاني ياضنايا 

بان القهر في عيونه وهو يخبرها :

ـ انا السبب ، انا السبب في اللي بيجرالك يامـــاه 

كل أنش في جسدها يرتجف الأن ، غزته البروده ، نزلت الدموع من عينيها وهي تخبرهم ببسمه دامعه : 

ـ  اذا كنت السبب في شىء فانت سبب سعدي أنتَ واخوك ياولدي ، مين اسعد مني دلوقتي وانا بموت في حضن ولادي ، ايدك في ايد اخوك ياياسين 

وجهت حديثها للطبيب:

ـ ماتسيبش أخوك ياعلي مهما حصل ، ماتخليش حد يفرق بينكم في يوم ياولدي 

أخرج " الطبيب"  كلماته من بين شهقاته كالطفل الصغير وهو يقول :

ـ كانت غلطه ومش هتتكرر تاني ياماه ، ياللي من يوم ما طلعت على الدنيا وماسعنيش غير حضنك فيها 

مدت كف يدها تشبك كفه بكف الأخر قائله :

ـ اهو انا كده اطمنت ياولدي و هموت وانا حاسه بالراحه ياضنايا 

نزفت قلوبهم دماً ، وما هي إلا ثواني مضت وخرج  من بين شفتي "الخاله"  رغاوي سوداء لقد ادى السم مفعوله سريعاً من كثره ضعفها أغلقت عينيها وزهقت روحها ، زهقت بلا عوده  ، صرخ ياسين بأسمها ولكنه وجد الأرض تتفجر بالألغام في كل شبر بها تمالك الطبيب نفسه ومسح دموعه سريعاً ، أخذ يجذبه من قميصه حتى يتركها ويبتعدوا عن المكان ولكنه أبى تركها ،  فصرخ " الطبيب"  بوجهه من بين أصوات الرصاص وهو يقول :

ـ مش هسيبك ياياسين ، لو عايز تكون السبب في موتي  ماتتحركش دلوقتي عشان مش هتحرك غير بيك وهموت معاك انت فاهم ، هموت معاك ياياسين 

صاح "بربروس " بأنفعال يجرح اكبر عدد منهم :

ـ  ربـــــاه ، لا أريد قطع تلك الجلسه الوديه يجب عليك أرغامه لا مواساته  هيا قف أيها الوغد اللعين وخذ بثأر الخاله ياياسين 

قطع حديثه قاذفه ناريه ار بي چي تأتي بسرعه باتجاههم فرقتهم عن بعضهم وتدحرج جسد  كل منهما بأتجاه ، سعل ياسين وتمزقت ملابسه والجروح اصبحت بكل أنش بجسده حاول الوقوف يسند بكف يدهُ على الأرضيه ولكن أتت طائره هليكوبتر تقذف عليه الرصاص وكأن السماء تمطر طلقات ممزوجه بالسم القاتل ، هرول ياسين بسرعه رهيبه ، يتفادى الطلقات تهتز الأرض من كثرة سرعته تكاد أن لا تراه  ، تحامى بأول صخره كبيره واستند بظهره عليها لكي يلتقط أنفاسه ، حول عينيه للون الأحمر القاتم لكي يستطيع الرؤيه بوضوح في وسط تلك المعركه كالذئب المتربص  يحدد فريسته التاليه 

------------------------

هرول داغر ناحيه الجبال  يحاول كلاً من "يزن وبدر " مجاراته يطلق  "يزن " الأعيره الناريه على كل من يقف أمامهم ومن ثم تحدثت "هدير " بسماعه الأذن وهي تجلس بغرفه ما بمنزل "الصاوي " أمام الشاشات تحذر " داغر " وقد أصابت في شكها بقول :

ـ داغر زي ما شكيت بالظبط الراجل ده عايز يطلع أسوأ ما فينا عايز يعرف الكل حقيقتنا علشان الدنيا كلها تعرف بينا حاطت كاميرات في كل حته انا مراقبه المكان من عندي والكاميرا الطائره رصدت مكان الكاميرات بتاعته بس للأسف دي على النخل ده غير كمان الهيلكوبتر اللي بتصور يعني اي حد منا لو ظهرت حقيقته العالم كله هيتعاطف معاه وهيقولوا انهم كانوا بيبيدوا كائنات خطر على البشريه ، ماتخليش حد يتحول ياداغر ما تخليش حد يستخدم ضوافره ولا يجري بسرعه عاليه ، خليهم يتعاملوا زي البشر 

ومن ثم رأت بالشاشه قذيفه تأتي من الخلف صاحت تحذره :

- خللي بالك ياداغر وراك 

انتهت من تحذيره وانقطع البث نهائياً ، انقبض قلبها وبشده  وانقطعت الشاشات عن العمل

صوت صراخها أيقظ صغيرها "عمار"  من نومه يسألها بخوف :

ـ مالك ياماما بتصرخي ليه ؟

ضمته الى صدرها بهلع ووضعت قبله صغيره على رأسه  تحاول أضفاء بعض الهدوء ، ضمها الصغير وكانت هي من تحتاج لضمه نكرت من اجله حتى تنزع الخوف من قلبه  : 

ـ مافيش حاجه ياحبيبي انا بس حلمت حلم وحش نام أنتَ دلوقتي 

فرك عينيه بكفه الصغير معترضاً :

ـ لاء ، مش هنام الا لما تنامي معايا 

أفسح لها المجال على الفراش تحتضنه بهدوء عكس ما بداخلها ، تفرك بأصابعها بين خصلات شعره برويه وشردت ، ذهبت بذهنها حين كانوا بمنزلهم بألمانيا تلقوا اتصال  من " غرام  زوجه عز " على تطبيق الواتساب فتحت " هدير " الكاميرا مرحبه بها كالعاده ولكنها لم تجدها هي بل كانت "الخاله" هذه المره تراها بملامح وتقاسيم جامده سألتها بذعر من بين ملامحها العابسه :

ـ مالك ياخاله فيكي ايه أنتِ كويسه 

فجاوبت على سؤالها بسؤال أخر :

ـ أعذريني يابتي بس أنا محتاجه أتكلم مع داغر 

أتى "داغر " من الخلف وروت عليه ما حدث من البدايه حتى النهايه وقبل أن تطلب منه الانضمام لهم بادر هو بقول :

ـ انا جاي مصر ياخاله وطالما أنتِ عند عز يبقى اكيد عز معانا 

وكانت نتيجه مكالمته الهاتفيه انه هنا يقف بينهم بمنتصف المعركه فاقت من شرودها وقد عاد الأرسال لها مره أخرى  هرولت ناحيه الشاشات وشعرت بعودة روحها من جديد ، تنصت لصوت "داغر" بسماعه الأذن وهو يقول بهلع  : 

ـ هدير ، حدديلي بالظبط مكان الكاميرات بسرعه مافيش وقت 

هزت رأسها بالموافقه تفعل ما طُلب منها أخبرته بمكانها المحدد وأخبر يزن بما علمه وهو يقول :

ـ يزن مين أقرب حد في منطقه الشمال 

ساره هي اللي على الشمال من ناحيه البدو 

طلب منه مسرعاً : 

قولها بسرعه تعطل الكاميرات اللي هناك 

انصاع لأمره واتجه ناحيه "بدر " وأخرج سلاح من جيب بنطاله الخلفي ووضعه بكفه مبرراً : 

ـ السلاح ده علشان اي حد يحاول يأذيك تقتله ولازم تلاقي بربروس عرفه انه يحاول مايستخدمش قوته ويقول كده لياسين وعلي لحد ما نعطل الكاميرات فاهم لازم تلاقي بربروس بأي طريقه يابدر فاهمني 

هز رأسه بالموافقه وتركه ورحل يطلق الأعيره بلا هواده 

--------------------(بقلمي ماهي احمد)--------------

هناك بشر لا ننساهم أبداً من شدة حقدهم 

تَملك الخوف من "شمس " حين استيقظت لتجد نفسها في غرفه مظلمه مكبله بأصفاد من الحديد  هوى قلبها أرضاً شعرت بالخوف الشديد مقتت المكان تذكرها رائحته بالقبو المظلم والعفن التى عاشت بِه طوال حياتها ، صرخت بأعلى صوتها لعل ينجدها أحد صرخت بأسم " ياسين " مراراً وتكراراً دون فائده وزاد من صراخها حين شعرت بثقل جسدها ، وجدت نفسها ترتدي ستره ملغمه بقنبله رقميه تقل الثواني ومع كل ثانيه تنقص ينقص معها عمرها ، وضعت يدها على فمها تحاول كتم نحيبها عل ذلك يساعدها على التركيز لكي تصل الى ما اوصلها الى هنا شردت بذكرياتها حين وصلت مع "ياسين " الى جنوب سيناء تحديداً  منطقه جبل موسى ، وما ان وصل حتى رأوا حشد من الناس والاضواء الملونه بكل مكان المشاوي ولحم الماعز يتقلب على نار هادئه يعج المكان بالخيام الضخمه الرجال منفصله عن النساء ويغني أحد الحضور بالمنتصف أغاني خاصه بأهل سيناء رحب شيخ العرب بـ "ياسين " فور رؤيته لهُ وهو يقول : 

ـ مرحب بيك ياولدي ، طالت الغيبه 

رد باسماً :

ـ الغيبه مهما تطول بنرجع نتلاقى من جديد ياشيخ عزام  

تقدم "ياسين" الى موقعهما وبانت في عينيه الحيره فأرضى الشيخ عزام حيرته بقول :

ـ فرح بتي شهد الليله انتظرتك من باكر بس ما أچيت الله اعلم بظروفك ياياسين 

تحرك للأمام وتبعه ياسين يخبره :

ـ الطريق كان طويل واخد منا وقت كتير ياشيخنا 

اتفضل ياولدي اعتبر المكان هذا مكانك ، اليومين اللي هتقعد فيهم ويانا هتنورنا اكيد  افضال الخاله ماتتعدش وبتمنى ارد افضالها فيك ، بس ماتأخذنيش بالسؤال ياولدي الخاله مأكده عليا أنك هتكون وحدك ماقالتليش انك معاك ضيوف 

أشار برأسه الى تلك الواقفه بجواره وبدأ بسؤاله :

ـ هذي مرتك 

كانت شمس تنظر له تنتظر رده وأتاه الرد  :

ـ أيوه مراتي ياشيخ عزام 

يازين ما اختارت ياولدي 

قالها "الشيخ عزام " بابتسامه واسعه يرحب بها واقترح عليهم : 

ـ باين على ملامحك  التعب ، بس الليل لسه في اوله اقعد معانا السهره لسه طويله الماعز بيتشوي على النار لازم تاخد واجبك قبل ما تدخل تنام 

كاد أن يرفض بدا على ملامحه التعب من طول الطريق  يريد الراحه وبشده ولكن رد"شمس " كان الاسرع تشير بالأجابه :

ـ اكيد طبعاً انا جعانه اوي مأكلتش حاجه من الصبح 

طالعته بنظره تستعطفه بها فوافقها بقول :

ـ بس مش هنقعد كتير 

أشارت بالأيجاب مع بسمه واسعه جلس كلاهما أمام المشواه ترى الماعز تقلب على الجانبين فبدأت بسؤاله :

ـ أنتَ مش جعان 

رد بجفاء : 

ـ مش عايز 

تحركت تجلس بالجهه المقابله لهُ تدافع عن نفسها بقول :

ـ ياسين أنتَ طول الطريق ساكت ومابتتكلمش ولولا أني أصريت أني أجي معاك مكنتش أخدتني ، ياسين اللي حصل امبارح من أمي انا ماليش ذنب فيه 

وصرح وبقوه :

ـ لاء ، ليكي ياشمس لما ماتبقيش واثقه فيا لما اسألك وتقوليلي معرفش يبقى ليكي ذنب ، السؤال ده لو كان اتسألي أنا أنتِ اكيد كنتي عارفه ردي هيبقي أيه 

أكدت تكرر :

ـ عارفه ، بس أنتَ ساعات مابتبقاش في وعيك ياياسين أنتَ حاولت تقتلني أنا شخصياً مرتين فجأه بتتحول ما بتبقاش أنتَ ، وأنتَ عارف كده كويس أنا افتكرت ممكن وقتها يكون حصلك نفس اللي بيحصلك قبل كده وانتَ معايا واتهورت و .. 

بتر حديثها يستكمل جملتها :

ـ وقتلته صح 

انتبهت وسألته :

ياسين حط نفسك مكاني ، واسأل نفسك لو انا  مره واحده مابتحكمش في نفسي وحاولت اقتلك مرتين وحصل ومشيره اللي هي اكتر حد بكرهه اتقتلت وانا اللي في بيني وبينها عداوه ولاقيت هدومي عليها بقع دم أكيد هتفكر ، اكيد هتبقى مش عارف اللي بيحصل هتسأل نفسك على الأقل طيب الدم اللي على هدومي ده جه من أيه صح ولا أنا غلطانه لو انا غلطانه على الاقل عرفني الدم على قميصك ده جه منين 

شعرت بالتخبط من السؤال ولم تكن الأجابه سوى :

ـ غلطانه ، علشان انا عمري ما كنت هبقى مكانك عشان ثقتي مش هتتهز فيكي في يوم بالشكل ده حتى لو كنتي تعبانه ومريضه ومجنونه الكلمه اللي مش عايزه تنطقيها انا نطقتها بدالك عايزه تقولي اني مريض وبخرج عن السيطره اوقات كتير غصب عني ، بس افتكري ان في كل مره كنت بخرج فيها عن السيطره كنت بتحكم في نفسي علشانك مهما زادت قوة مرضي مافيش مرض ولا لعنه ولا قوه تخليني أأذيكي في يوم ياشمس وانا عارف ان لو انا قتلت فريد كده هعرضك للخطر وانا عمري ما هعمل ده 

تعلم هذا جيداً لامت نفسها على ما ظنته تحرك للأمام يبتعد عن الضجيج تبعته ولكن هناك من اعترض طريقها مجموعه من النساء وقفوا أمامها وبدأت واحده منهم بقول :

ـ ماشالله عليكي بدر منور ، مزوينه 

اجابتها "شمس" برفق  :

ـ أنتِ احلى 

سألتها أخرى بلين :

ـ الحاج عزام مصمم انك مش بس تاكلي من اكلنا وكمان تلبسي لبسنا ، همي يابنيه تعالي معانا 

ـ ايوه بس 

لم ينتظروا الرد جذبتها الفتيات من مرفقها بلين ودلفت الى احدى الخيام تطالع "ياسين" بقلق 

مرت على الأقل ساعه ، ساعه كامله ومازالت هي  بداخل الخيمه ثبت عينه عليها ينتظر خروجها بأي لحظه أتى "الشيخ عزام " بطبق من لحم الماعز المشوي يقدمه لهُ ببسمه رضا وهو يقول : 

ـ ماتقلقش ياولدي هي جوه مع الحريم شويه وهتلاقيها طالعه 

وضع يده على خصلاته بضيق وتصنع الجهل بسؤاله :

ـ هي مين 

ابتسم " الشيخ " يضع الطبق جواره :

ـ اللي ماشيلتش عينك من على خيمتها من ساعه ما دخلت جواها 

ربت على كتفه برفق :

ـ المشاكل بين الراجل ومرته مابتخلصش بس اللحظات الحلوه اللي زي دي هي اللي بتخلص ياياسين 

تركه ورحل أعطاه ظهره ، وطالع الخيمه من جديد 

خرجت الفتيات جميعاً  طالعت "شمس"  المرآه أولاً ، ثم رفعت كف يدها أمام عينيها تتأمل  الخاتم الموجود بأصبعها الذي صنعه لها ياسين بابتسامه ناعمه وغمر  قلبها السعاده وكانت هي أخر من خرج ، اقتربت منه وقد ارتدت زيي بنات سيناء وغطاء الوجه المطرز على الجانبين تغطي به وجهها  ،  كحلت عيناها بالكحل مما أبرز جمال عينيها ، كل مره يأسرها هو بنظراته ولكن الليله هي من أسرته بنظراتها الفاتنه و تحدثت متمنيه أجابه تسرها... اجابه تطمئن روحها :

ـ أيه رأيك الكحل حلو عليا 

كانت نظراته صادقه ، مؤثره ونبرته أكثر :

ـ هتصدقيني لو قولتلك أنك أنتِ اللي حلوه عليه 

احمرت وجنتيها خجلاً ونطق بما يريده طالباً :

ـ لو طلبت منك أنك تطلعي معايا الجبل أوريكي حاجه هناك هتطلعي معايا 

طالعت الجبل وصدمت من ارتفاعه شاهق للغايه وقبل أن ترفض صمم :

ـ اعتبري ان دي اخر مره هطلب منك طلب 

جذبها من يدها هذه المره برفق وهو يتوجه بها ناحيه الجبل وبالفعل ذهبت معه طلب منها الا تنزع غطاء الوجه حتى يصلوا الى وجهتهم ، تحركت معه  مسلوبه ،  ساعدها بالصعود وحملها بين ذراعيه صعد بها أكثر من سبعمائه وخمسون سلمه حتى وصل الى القمه وقف أمامها يطالع لحظات شروق الشمس وكأن الطبيعه ترسم لوحه فنيه بديعه حيث تقف جميع الكلمات عاجزه عن وصف جمالها ، فما بالك اذا كنت تستمتع بهذه اللحظه الفريده  مع من تحب على أشهر جبال مصر ، أكثر ما يميز جبل موسى هو شروق الشمس سيجعلك تنسى تعب رحله الصعود بأكملها وقفت "شمس" بجواره تستمتع بهذا المنظر البديع فأجابها على سؤالها بقول : 

ـ لما روحت لفريد اليوم اللي مات فيه كنت رايح ومافيش أي نيه جوايا لقتله ، كان مجرد تهديد مش اكتر انا وعدتك اني مش هأذيه وحافظت على وعدي ليكي ، بس هو كان أجبن حتى من أني المسه مجرد ما حولت لون عنيا ، عملها على روحه وبالرغم من كده حسيت بالغدر من ناحيته ليكي كورت ايدي وكنت لسه هضربه افتكرت وعدي ليكي من جديد وضربت أيدي في الحيطه بقوه جنب راسه وهددته اني لو لاحظت او عرفت انه بيقرب منك في يوم هو شاف ضربتي عامله ازاي ضربت أيدي شرخت الحيطه وهو بكده عرف مدى قوتي ايه  ، ايدي وقتها الدم نزل منها وانا مسحت الدم اللي نازل مني في قميصي يعني ده كان دمي أنا ياشمس مش دم فريد 

اقترب منها وحدثها بصدق  : 

ـ عايزك تعرفي ان الوعد اللي بوعده ليكي عقلي قبل قلبي بيحاربني عشان افضل محافظ عليه 

أشارت برأسها بالأيجاب وكان صريحاً معها وضاعف هذا نظراتها الأسره لهُ ،رفعت كف يدها ترفع غطاء الوجه  ولمس هو  وجنتيها بحنان :

ـ أهو أنا دلوقتي مافيش حد في سعادتي أنا الوحيد على كوكب الارض والمجارات المجاوره اللي شايف شمسين على كوكب واحد أنتِ بالنسبالي زي الشمس دي ياشمس الشمس بتنور حياه الناس وانتِ بتنوري حياتي 

هزمها فؤادها الأن ولما لا وهو ينظر لها هكذا : 

ـ أنتِ الحاجه الوحيده اللي حسستيني بضعفي في الدنيا ، انا بفكر فيكي ، وعشان اهرب من تفكيري بلجأ للنوم والاقيني أحلم بيكي

هي سعيده وان قالت شىء غير هذا فهي كاذبه ، هذا ما أدركته وهي تسمعه يقول بنبره هزت فؤادها الذي يعشقه : 

ـ أنا بحبك ياشمس 

كاد أن يقبلها واقترب حين رأى استجابتها ولكنها 

لاتقدر ابتعدت عنه و شعرت بنبضات قلبها من كثره ضجيجها سيسمع بها الأن ، استدارت ، وأعطته ظهرها ، وطالبته بنبره واحده أوشكت على البكاء :

ـ ماتسبنيش 

جذبها من مرفقها واستدارت اليه أنهارت أمام عينيه السوداء كسواد الليل ، تفتقد حديثه هذا وبشده أخيراً نطق بجمله واحده تريحها روى ظمأها بالأخير بتصريحه لها بحبه ، احتضنها ، وقال بلهفه عاشق محروم من حبه لسنين  :

ـ ياريت أنتِ اللي ماتسبينيش 

ولأول مره يقترب منها بهذا الشكل أنامله على جسدها تخبرها بأنه يريدها وبشده وبهذه اللحظه ، وقد شرع في فك غطاء الوجه بأنامله برفق طالباً منها :

ـ أنا عايزك ياشمس ومش قادر امنع نفسي عنك أكتر من كده 

وأمام قوله هربت الأقوال وأندثر كل شىء وصرحت لهُ :

ـ أنا كمان عايزاك ياياسين 

توقفت الأرض الأن في هذه اللحظه وقد أغدقت عليه بعطاياها ، كان الحدث الأفضل لهما منذ عشر سنوات هذا الحدث الذي يرغب أن يبقى للأبد ولا يمر أبداً 

----------------

فاقت من شرودها على صوت فتح الباب دلفت "مشيره " الى الغرفه تشعل الضوء تطالعها متصنعه دور المظلوم ببراعه :

ـ يرضيكي اللي عملتيه فينا ده 

تنهدت "شمس " بضجر فور رؤيتها أدركت بأنها سبب كل شىء ، الغل في عينيها فضح كل شىء 

--------------------(بقلمي ماهي احمد)---------------

ما أبغض أن تقف مشتتاً  بالمنتصف  ، لا تعلم ماذا تفعل تحاول ادراك ما يحدث  ولكنك تجد كل شىء يدفعك بقوه ناحيه العجز ترى أناس لطالما أحببتهم يعانون الواحد تلو الأخر تحاول المساعده 

بكل ما أوتيت من قوه تقف كلاً من ساره ومارال كعادتهم على مكان عالي حتى لا يصيبهم الأذى تصوب أحداهن على رجال الدمنهوري انزلق حجاب "مارال " من على رأسها للأسفل رفعته سريعاً  تعدل من حجابها ووجدت من يصوب عليها طلقاته في عز انشغالها  وظهرت نقطه حمراء على جسدها وكانت "ساره" هي الأسرع حين كشفت عن مكان ذلك القناص بسلاحها وأصابته بعيار ناري أصابه في مقتل فهمت " مارال " ماحدث للتو أومأت برأسها دليل على امتنانها لما فعلته وانقاذ حياتها ، رفعت حجابها وأتت لمحات مما حدث أتت على رأس "مارال "  حدث مر عليه يومين وهي تستيقظ كالعاده لوالدتها تساعدها على الوضوء لتأديه صلاة الفجر استمعت لـ "بربروس" وهو يتلي أيات الله عز وجل كالعاده في صلاته ولكن هذه الأيه تقشعر لها  الأبدان وهو يتلي أثناء صلاته : 

وَمَن يَبْتَغِ غَيْرَ الْإِسْلَامِ دِينًا فَلَن يُقْبَلَ مِنْهُ وَهُوَ فِي الْآخِرَةِ مِنَ الْخَاسِرِينَ  كَيْفَ يَهْدِي اللَّهُ قَوْمًا كَفَرُوا بَعْدَ إِيمَانِهِمْ وَشَهِدُوا أَنَّ الرَّسُولَ حَقٌّ وَجَاءَهُمُ الْبَيِّنَاتُ ۚ وَاللَّهُ لَا يَهْدِي الْقَوْمَ الظَّالِمِينَ 

تجمدت للحظات مكانها وانتظرت حتى أنتهى من 

أنهاء صلاة الفجر ، جلست على سجاده الصلاه أمامه تربع قدميها كما يفعل هو  احتراماً لهُ وهي تسأله : 

ـ مش عايفه ليه يابيدقوس اتاخدت وأنتَ بتقيأ الأيه دي بالذات  في صلاتك النهايده مع أن انا على طول بسمعك بتقيا قيأن هي السويه اللي كنت بتقيا منها دي أسمها سويه ايه 

قلب حبات سبحته بأصبعه وانتهى من تسبيحه ثم أجابها بهدوء :

ـ هذه سورة ال عمران 

ـ ومعناها ايه ؟

سألت فأجاب :

ـ أي من سلك طريقاً سوى ما شرعه الله فلن يقبل منه وهو في الآخرة من الخاسرين 

انتبهت جيداً وجذبها حديثه : 

-ممكن توضح أكتي 

وضع سبحته جانباً يبتسم لها وفكرها بحدث مر :

ـ قبل أن نتحدث بهذا الشأن دعيني اذكرك بأمراً جعلك مستاءة مني يازوجتي العزيزه ، حينما تحدثنا بالدين أتذكرين ، لقد وعدتك بألا نتحدث بمثل هذه الأمور مجدداً وأنا طالما حييت سنوات من عمري لن أنكث بوعدي يوم 

ابتسمت لهُ وأسرعت تقول في لهفه :

ـ لا لا الميه دي بجد مش هزعل وانا اللي بسألك انا بقالي فتيه كبييه بسأل وبقيأ كتيي وبفكي ليه ماما دخلت الأسلام ومتمسكه بي أوي كده ، ولما شوفت معاملتك وطيبتك وقد ايه طيقتك سهله وسلسه حبيت اعيف عن الأسلام اكتي واوعدك مش هزعل 

رمقها باستغراب ولكنه تفهم طلبها وأجابها بهدوء : 

ـ قبل الدخول في تفسير الآية الكريمة، أريد أن انبهك الى شيئاً ما يامارال  إلى أن الإسلام بمعناه العام، هو دين جميع الأنبياء منذ آدم إلى خاتمهم سيدنا محمد صلى الله عليه وسلم، فكلهم جاءوا بالدعوة إلى التوحيد، والاستسلام، والانقياد لله سبحانه، والتحذير من الشرك، وعبادة الأوثان ، وإن اختلفوا في بعض التشريعات التفصيلية

اعتدل في جلسته وما زالت "مارال " تنصت له باهتمام :

ـ وقد أخبرنا عز وجل عن كثير من الأنبياء بأنهم من المسلمين، وأنهم دعوا الله بأن يكونوا كذلك؛ قال تعالى عن إبراهيم عليه السلام: مَا كَانَ إِبْرَاهِيمُ يَهُودِيًّا وَلَا نَصْرَانِيًّا وَلَكِنْ كَانَ حَنِيفًا مُسْلِمًا وَمَا كَانَ مِنَ الْمُشْرِكِينَ

أي نتبين من هذا أن للأنبياء دينا واحدا هو الإسلام، وشرائع مختلفه 

واذا عدنا لتفسير الأيه فسنعلم ان الدين عند الله الاسلام  الذي ارتضاه الله لعباده، فعمله مردود غير مقبول، لأن دين الإسلام هو المتضمن للاستسلام لله، إخلاصا، وانقيادا لرسله. فما لم يأت به العبد، لم يأت بسبب النجاة من عذاب الله، والفوز بثوابه، وكل دين سواه فباطل. والله أعلى وأعلم 

ابتلعت ريقها بتوتر وهي تقول :

ـ تقصد أن 

بتر حديثها قبل أن تسترسل يرفع كفيه ببراءه :

ـ الله أعلى وأعلم لقد طلبتي تفسير الأيه الكريمه ولقد فسرتها لكي كما ينبغي 

 استقام يقف من مكانه يطبع قبله بسيطه على جبينها برفق وهو يقول  : 

ـ استودعك الله 

وقفت أمامه وشهد الذهول على وجهها تسأله باستغراب :

ـ أنتَ يايح فين أنا هاجي معاك يابيدقوس مش هسيبك لوحدك في حاجه زي دي 

كان سيعترض ولكن أصرار مارال واضح هي تريد الذهاب معه بأي ثمن لذا قالت برجاء قبل أن يعلن "بربروس" الرفض : 

ـ قلبي الميه دي مش مطمن ، حاسه ان الميه دي مش هتعدي على خيي الحيب الميه اللي فاتت أخدت اخويا  مني ومش هستحمل الميه دي ابقى عايفه انك في خطي وافضل هنا ، مش قاديه اقولك ماتيحش ومش هقدي استناك انا هفضل زي ما انا زي ما الخاله مامعودانا انا وسايه هنبقى بعيد مش في قلب المعيكه بس على الأقل هشوفك وابقى معاك اوعى تيفض يامحمد عشان خطيي 

كمش حاجبيه باستغراب من نطقها لأسمه فهذه هي المره الأولى التي تناديه فيها بأسمه استغرب وهو يقول: 

ـ من الغريب أن تناديني بأسمي يامارال 

أخبرته وهي تحاول ان تمهد لهُ ما يدور في خاطرها منذ فتره :

ـ الأغييب من أني اناديك بأسمك هو أني لحد دلوقتي مادخلتش في الأسلام مع كل شىء وضحتهولي كنت دايماً بتعيفني قد ايه الاسلام على حق وكتيي كنت بشوف نظيات في عنيك من ناحيتي  تتمنى فيها أني أقولك الجمله بس باليغم من كده عمي لسانك ما نطقها ، لحد ما خلتني أنا اللي أجي واقولهالك يامحمد 

ـ صمتت لحظات ثم قالت بنبره باكيه كساها الرجاء :

ـ أنا عايزه أدخل في دين الأسلام يامحمد عايزه لو جيالي حاجه و مت في الحيب بكيه أموت وانا مسلمه 

فتح عينيه على وسعمها فقد وقع عليه ما تقول كدلوً بارد ، ولكن المياه البارده هذه انعشت روحه ، شعر بسعاده غامره حملها من كثرة  فرحته لا كزوجته بل كطفلته الصغيره ضحكت عالياً وتحدث هو مازحاً : 

ـ كنت أخشى عليكي من الموت الأن أصبح قلبي مطمئناً لطالما تمنيت هذا اليوم منذ سنين رددي ورائي أيتها الجميله 

نزلت بفرح تكرر ما يقوله وقد تشاهدت وأسلمت لله عز وجل في لحظه مرت عليهم لن تتكرر مره أخرى 

صوت  " ساره  " تنادي "مارال " أجبرها على العوده الى واقعها وهي تقول :

ـ خللي بالك "يزن" لسه جايلي دلوقت وعرفني مكان الكاميرات انا هتحرك بسرعه ناحيتها وهحاول ادمرها خللي بالك يامارال واحمي ضهر ميرا كويس 

هزت "مارال" رأسها بالأيجاب  وتحركت "ساره" جهه الشمال كما اخبرها "يزن" تصوب بالقنص ناحيه الكاميرات الموجوده بجهه الشمال وقد نجحت بذلك 

-----------------------

تأخر "بدر " في الرد حين أخبر "ياسين " بما طلبه منه "يزن" وهو عدم  تحوله واظهار حقيقته لحين قيام "ساره" بتعطيل الكاميرات ولكنه لم يستطع كبت رغبته الملحه في الانتقام ، حين رأى "الدمنهوري" يتجه لسيارته وسط حراسه مشدده يتحرك بسرعه شديده لم يأبه بما أمر به "داغر " طالع الجوار ورمق سياره من على بعد عدة أمتار هرول بأتجاهها حتى يتفادي اطلاق الاعيره الناريه الممزوجه بالسم ، شق الطريق شقاً ناحيه الدمنهوري ، أسرع الدمنهوري بالصعود الى سيارته

 يلتفت حوله وكأن الموت يهرول خلفه 

يعلم جيداً بأن لا مفر وقف رجال "الدمنهوري" أمام سيارة "ياسين " وهو يأتي من على بعد يطلقون اعيرتهم عليه ولكنه لم يهتم اصطدم بهم وتساوو بالأرض جميعاً ، هرب الدمنهوري بسيارته ولحقه كان يجلس خلف المقود يقود سيارته بسرعه جنونيه ليلحق بهِ راوغه عند المنحدر واصطدم بسيارته من الجانب ، تحكم الدمنهوري بسيارته 

وانقذ نفسه من الأصطدام عاد ياسين يكرر ما فعله مره اخرى

-------------------

في نفس التوقيت علم الجميع بتعطيل الكاميرات تحرك داغر بسرعه رهيبه وكذلك بربروس والطبيب وقف الثلاثه بالمنتصف يفتكون بكل من يقرب منهم  اشار "عز " الى ميرا ناحيه الهليكوبتر فعلمت مقصده أغمضت عينيها واتاحت لنفسها فرصه التحول تغير جسدها وتحولت الى ذئب بلون الأزرق هرولت ناحيه الجبال تصعد لأعلى قمه  فيها 

-----------------------------

ناحيه اليمين تستطيع رؤيه كلاً من" الطبيب  وبربروس "  يحتمي كل منهم بظهر الأخر يفتكون  بكل من يقترب منهم وعلى جهه اليسار يقف "داغر وعز  " يطلق عز الأعيره الناريه على أي شخص يحاول الاقتراب منه ، اما عن "داغر" فمازال يفعل هوايته المفضله وهي فصل الرأس عن الجسد 

----------------------------

في تلك الأوقات تشابك "يزن" مع أحد الرجال بالأيدي بعدما فرغت ذخيرته ، كانت "ساره"  تحميه من الخلف بقناصتها وتقتل من يقترب منه طالعها وابتسم أشار لها بسبابته ثم هرول باتجاه سياره "عز " حتى يملىء ذخيرته وقف أحد الرجال  يتحرك ناحيته ببطء ويتربص لهُ كي يطعنه  من الخلف ضغطت هي على الزناد واجتمع الحظ السىء عندما لاحظت أن ذخيرتها قد أنتهت طالعت الجوار ولم تجد مارال لم تعد تعلم ماذا تفعل هرولت ناحيه "يزن" تنادي عليه بأعلى صوتها 

ولكن المسافه بينهما كبيره ، ظل يبحث عن مكان الذخيره يتذكر جيداً المكان السري لعز في سيارته وعندما فتحه وجده فارغ لعن حظه الف مره أقترب الرجل منه اكثر وعند رؤيتها لذلك هرولت ناحيته بأقصى سرعتها رفع الرجل كف يده الممسك بالخنجر حتى يطعنه بظهره ، نادته ساره بأسمه وسمع ندائها هذه المره استدار "يزن" لها سريعاً ووجدها أمامه تتلقى الطعنه عنه جحظت عيناه من هول ما رأى ارتطمت بالأرضيه تحاول التنفس بصعوبه اشتبك "يزن" مع الرجل ونجح بخنقه هرول ناحيتها يضمها الى صدره فرد أخر قد روى دمه الأرض وهجوم شديد على الجميع وكان مقصدهم هو أبادتهم جميعاً ، كان يحاول تجميع الكلمات :

ـ ساره .. ازاي .. لاء 

لا يعلم ما حدث وكيف حدث وكانت أخر توقعاته أن تفدي حياتها بحياته ، مال نحوها وهو يرجوها بالعين والقلب وكل حواسه :

ـ لا ، ساره ، الا أنتِ

نطقت بنبره متقطعه وعيناها لم تفارق تقاسيمه :

ـ  أنا كده كده كنت ميته  .. على الأقل موتي جه بفايده 

جسده ثيبث من الصدمه ، الصدمه التي جعلت ألم قلبه يتزايد وكأنه ينزف أخر دقاته ، هنا أمتزجت صرخاته مع صوت الأعيره الناريه التي ما زالت تصدح بالأجواء فكانت القتيله هي نصفه الأخر في الحياه 

-----------------------

ظل "ياسين" يتبع الأخر فتره يحاول أيقافه ولكن "الدمنهوري" سرعته مهوله كل منهما يزيد سرعته وكأنهم بسباق ذلك المعتوه يسير بطرق وعره لا رجعه منها الصحراء كبيره ومن السهل الضياع فيها استطاع "ياسين " أخيراً ان يقطع الطريق عليه واصطدم بسيارته مره أخرى ولكن من جهه الأمام ، وانقلب كلاهما ، رأساً على عقب ركل "ياسين"باب سيارته بقدمه حتى يستطيع الخروج ، كان الطريق هنا بارد ، مظلم ، كئيب ، فقط ذلك الضوء الخافت والذي يثير الذعر أكثر 

اقترب من الدمنهوري بقلبٍ بارد وعرفت أظافره طريق الخروج ، وكلما اقترب من الدمنهوري زاد الرعب بقلبه تنفس بصعوبه قبض ياسين بكف يده على باب السياره يلقيه بعيداً يجذبه من تلابيبه للخارج حول عينيه للون الأحمر القاتم تغيرت ملامحه تماماً ، والرعب والخوف تملك من قلب الدمنهوري أكثر رفع سلاحه الذي ظهر من العدم واطلق عيار ناري ممزوج بالسم بداخل صدر ياسين 

----------------------

مازالت "ميرا " تحاول الصعود لأعلى قمه جبليه لتقترب من الطائره التي مازالت تمطر عليهم تلك الأعيره وعند بلوغها قمه الجبل ثبتت أعينها على ذلك القناص ، قفزت من أعلى الجبل  واخذت تمزقه بأسنانها الحاده الثقيله 

---------------------------

غرز " ياسين " اضافره بداخل صدره اخرج الرصاصه من صدره يتغلل السم بجسده ببطىء اقترب من " الدمنهوري " يراه يعود خطوات للخلف 

كان يرمقه بنظرات مشتعله ولو كان أعينه رصاص لسقط صريعه يخبره : 

ـ أنا دلوقتي في قمه سعادتي ياياسين عارف ليه عشان نفذت اللي ابني كان عايزه ، قدرت اقتلك ، السم دلوقت جواك وشويه ومش هتبقى بقوتك السم هيضعفك واحده واحده هيقتلك وببطىء زي ما كنت بتمنى وأكتر مايهمنيش موتي قد ما يهمني اني اخدت بتار ابني اللي أنتَ قتلته بأيديك 

تظاهر بالقوه أمامه ولكن الضغط يولد الأنفجار جمله تصف تحديداً حاله "ياسين " في هذه اللحظه كل شىء قرر الوقوف ضده ، حتى قراراته ولكنه استجمع شتاته نفسه بقول :

ـ أنا صحيح ماقتلتش أبنك بس في اللحظه دي أتمنى أني كنت اقتله 

اقترب خطوه وعاد الدمنهوري خطوه للخلف يستكمل حديثه :

ـ أنتَ اللي زيك الموت قليل عليه ، فاكر أن كل شىء تقدر تمشيه على كيفك وعلى كيف ابنك ، محدش يقدر يقول للدمنهوري لاء لازم الكل ينحني ويوطي ويبوس الأيادي أبنك كان مريض 

وانت السبب في مرضه ماتحملش ان واحده ترفضه وتقوله لاء وعلشان المرض وراثه في عيلتكم أنتَ ماشفتش أن الغلط من عندك أنتَ وجاي ترمي بلاك على غيرك وتلوم غيرك على قتل فريد لنفسه 

تقهقر الدمنهوري للخلف بذعر نظرات ياسين لا تبشر بالخير أبداً :

ـ أنا كل حاجه كنت بعملها في حياتي غلط عملتها وانا مش في وعيي بس الغلط اللي هعمله دلوقتي هعمله وانا في كامل وعيي ومش ندمان عليه عارف ليه عشان هخلص البشريه من واحد زيك 

نهى حديثه وهو يغرز أظافره بجسده ، وانتهى بفصل رأسه ، تنفس الصعداء بعدما ارتوت الأرض بدمائه طالع ذراعه وقد بدأت عروقه بالبروز باللون الأسود القاتم ابتلع ريقه يفكر بشمس فدمائها الوحيده القادره على شفائه 

------------------------

هدأت الأجواء قليلاً  وحل السكون المكان الاجساد متناثره بكل مكان ، دب الرعب بما تبقى من الرجال عند رؤيتهم بهذا الشكل هرب الكثير ومات منهم أكثر ابتسم بربروس عند رؤيه وجوههم تملأها الفزع عاد "ياسين" يخفي ذراعه لم يقل الا كلمه واحده حين توقف بسيارته :

ـ فين شمس ، محدش فيكم شاف شمس 

لم يستطع أخفاء الأعصار في عينيه عواصف الحزن التي لم تتركه وشأنه ، بان ارتباكه بنبرته يحاول ارتداء ثوب القوه ، نطق داغر وسأله :

ـ أنت كويس ياياسين 

قاطع رده أجابه عز :

ـ أنا شوفتها ،  كانت مشيره بتنزلها من عربيه وكان باين عليها متخدره بس مالحقتش انزل وراها اتلم عليا شويه عيال وبعدها لاقيت نفسي في وسط المعركه 

--------------------

العدوان ليس كلمه الان بل العدوان تمثل فيه عروقه البارزه وعرقه الغزير وحالته التي جعلت " مشيره " تدرك بأنها هالكه لا محاله ، يقف "ياسين" أمامها  الأن بعدما أوصله "عز" الى المكان المحدد طلب منه "ياسين" انتظاره بالسياره مرت الكثير من الأحداث أوصلتهم الى هنا الى هذه النقطه والى هذه الحرب تحديداً عندما علمت "مشيره " بنيه "ياسين " حين حادثها عبر الهاتف يخبرها بأنه لن يرحل ويترك " زوجته " بمفردها واذا ارادت العوده ستعود وحيده الى المانيا ولكن ليست برفقته ، هنا جن جنونها ووضعت يدها بيد الدمنهوري لأبادتهم جميعاً ولكن مخططها لم يسري على نحو جيد ، ودائما لديها خطه بديله اقتربت من "ياسين " تطالع ساعتها وقد امتلكها الملل بقول :

ـ اي ده ياياسين معقول المواعيد دي بقالي ساعه مستنياك ياراجل ينفع تسيبني كل ده وانا مستنياك 

كسا نظراته الحقد وهو يقول:

ـ ده أنتِ موتك على أيدي 

لم تتركه عيناها بل احاطت به ولم تفلته حين طلبت :

ـ تؤ ، تؤ ، تؤ ،تؤ أوعى تتهور واعقل كده أنتَ ماتعرفش أن روحها في أيدي ولا ايه 

لم يفهم مقصدها ، ولم تنتظر هي أشارت برأسها ناحيه الغرفه المغلقه هاتفه :

_ جوه الاوضه دي  هتلاقي شمس وهي ملفوفه بهديه حلوه ، قنبله صغيره كده على قدها شغاله بمؤقت واللي سبحان الله قدامه ١٧ دقيقه بس وينفجر 

ابتسمت بسمه واسعه بقول:

ـ وبعدها شمس هتبقى مجرد أشلاء 

لم يصدق بل صاح بها : 

ـ أنتِ كذابه 

هزت كتفها بلا مبالاه : 

ـ مش مصدقني أهي عندك أسألها 

اقترب من الباب الحديدي ينادي عليها بقهر : 

ـ شمس 

هرولت "شمس" باتجاه الباب تخبره بحقيقه ما يحدث لها وقد عاد لها الأمل عند سماع صوته :

ـ ياسين ، ياسين الحقني مشيره حاطه قنبله على جسمي ، قنبله رقميه ياياسين 

ابتلع ريقه وقد تمكن السم من جسده برز اللون الأسود بعروقه تحت رقبته ، حاول الصمود اكثر يوجه حديثه لمشيره :

ـ أنتِ عايزه ايه ؟

 قالها بهدوء شديد تبعه قولها الذي شعر به بنبره ساخره:

ـ أنا ، أنا هعوز ايه ، هو في حاجه أعوزها تبقى احسن من كده ، وانا شيفاك بتموت قدامي وهي قدامها اقل من ربع ساعه وتموت تفتكر ياياسين هبقى عايزه حاجه تاني 

ـ مشيره انا بموت لو عايزه حد يموت هيبقي انا سيبيها هي تخرج هي مالهاش ذنب 

تصنعت "مشيره" الصدمه وبدأت تحوقل ثم قالت وهي  تتصنع الأسى :

ـ لا حول ولا قوه الا بالله تصدق صعبت عليا ، مع ان انا مصعبتش عليك وأنتَ بتكلمني وتقولي ارجعي بلدك لوحدك ، ولا لما طردتني بعد كل اللي عملته عشانك ، سيبتني عشانها 

صاح بألم : 

ـ أنتِ عملتي ايــــــه ؟

جاوبته بقهر : 

- حبيتك ، وفضلت مستنياك وكان عندي استعداد استناك العمر كله عشان خاطر كلمه واحده منك بس ماحصلش ، ماحصلش وسيبتني ، بس انا مبسوطه ، مبسوطه اني هموت معاك وان احنا التلاته هنموت سوا ، اصل انا ماليش حد اعيش عشانه ولو أنت مت يبقى انا كمان مت ياياسين 

- في حين أغمض ياسين عينيه وقد اقتربت براكين غضبه وهو يقول : 

ـ أنا هقتلك 

رفعت مشيره السلاح توجهه ناحيه رأسها والدموع تملؤ وجنتيها تخبره بقهر :

ـ وانا مش هستناك تقتلني عشان انا هقتل نفسي 

وضعت يدها على الزناد يترقبها هو بحذر وهو يقول برجاء :

ـ استني ، ارجوكي قوليلي الرقم عشان اقدر اوقف القنبله 

انزلت المسدس من على رأسها بحسره : 

- للدرجه دي بتحبها 

لم تتلقى رد فصاحت بهِ بقول :

- جـــــاوب 

أشار براسه بالموافقه :

ايوه ، ايوه بحبها 

أغمضت عينيها ووضعت السلاح على رأسها تخبره بقهر :

ـ وانا كمان كنت بحبك