 |
رواية عزلاء امام سطوة ماله الجزء الثاني 2 الفصل الثامن والخمسون 58 بقلم مريم غريب
( 58 )
_ إن عدنا ! _
لولا الأمر الصادر من سيدة القصر الأولى.. "فريال" هانم... لما إستجاب لها الحارس ضخم الجثة المسؤول عن البوابة الرئيسية للمنزل و هرول ليفتحها على مصراعيها بضغطة زر
كان كل فرد من الحراسة قد تلقّى أمرًا صارمًا من السيد "عثمان البحيري".. ألا ينبغي لزوجته المصون أن تتخذ خطوة واحدة خارج تلك البوابة بمفردها، أو بمعنى أصح بدونه
لكنها الآن تخرج أمام أعينه برفقة السيدة الأم !
لا يستطيع أن يقف بوجهها و يمنعها في وجود "فريال".. رغم تخبّطه و حيرته.. إلا أنه أذعن و تنحى جانبًا كي ما تتمكن "فريال" هانم من عبور بوابة القصر بسيارتها الفارهة ...
-أنا متشكرة أوي بجد ! .. تمتمت "سمر" بصوتٍ يفيض امتنانًا و هي تجلس بجوار "فريال" و تتطلع عبر نافذة السيارة إلى الطريق و سماء النهار
ترد "فريال" بلطفها المعهود دون أن تسهو عن القيادة :
-على إيه يا حبيبتي بس.. أنا لسا ماعملتش ليكي أي حاجة يا سمر. إنتي تستاهلي كل الحلو إللي في الدنيا دي
ابتسمت "سمر" بخفةٍ و أدارت رأسها نحو السيدة النبيلة، ثم قالت بصدقٍ :
-ربنا يعلم وجودك في حياتي الفترة إللي فاتت و لحد دلوقتي فارق معايا إزاي يا طنط. لولاكي كنت أنهرت فعلًا.. تعرفي إني شايلة هم فراقك إنتي أكتر حد. إنتي و يحيى !
إنقبض قلب "فريال" لدى سماع تصريح زوجة إبنها الأخير، لتقول تاليًا بلهجة ملؤها التوتر و القلق :
-ربنا ما يجيب فراق يا سمر. ليه بتقولي كده ؟ و بعدين إنتي مش كنتي قولتي حتى لو إنفصلتي هاتفضلي قاعدة مع إبنك في بيته ؟ ليه الكلام ده بقى ؟!
سمر و قد إستحالت لهجتها إلى الجمود :
-هو السبب.. أبو إبني هو السبب يا طنط
فريال بوهنٍ : عملك إيه عثمان بس يا سمر ؟ ما بقاله شهرين بعيد عنك زي ما طلبتي. نفذلك كل إللي قولتي عليه. عمل إيه ماتظلميش بقى
تضم "سمر" حاجبيها بشدة مغمغمة باستنكارٍ :
-أظلم ! مين إللي ظلم و بيظلم مين يا طنط ؟ أوكي أنا عارفة إنه إبنك و هاتفضلي تدافعي عنه.. لكن أرجوكي خليكي صريحة معايا على الأقل. أنا مش بتهمه كدب و لا بقول حاجة مش فيه
تنهدت "فريال" بيأسٍ و قالت بصوت أكثر هدوءً :
-طيب يا سمر.. عملك إيه عثمان خلاكي تفكري تسيبي البيت ؟ و عشان خاطري أنا ماتحطنيش في الموقف ده. أنا مش مخرجاكي معايا عشان تشوفيها فرصة و تمشي فعلًا
-أهو هو ده بالظبط إللي أقصده ! .. علّقت "سمر" فورًا
أصغت إليها "فريال" باهتمامٍ و هي تستطرد بلهجةٍ تكنف مرارة مبطنة :
-حتى بعد ما أجبرته عشان يطلقني. لما حصل فعلًا و قلت خلاص هايحس إني ضيعت من إيده. ممكن يندم. ممكن يعتذر.. لأ. لسا زي ما هو. لسا عايز يكسرني. و فاكر إنه يقدر يعمل كده.. حابسني في البيت. محدد إقامتي. بس أنا بقى ساكتة. ساكتة و مستنية شهور العدة تخلص. و هاوريه أنا هامشي إزاي و مش هايقدر ساعتها يمسكني و يقولي مافيش خروج.. إطمني يا طنط. أنا مش هاحطك في الموقف ده.. مش هاهرب المرة دي أصلًا. أنا هاعمل كل حاجة قدام عنيه. لازم يشوف بعنيه سمر. سمر إللي ماشفهاش قبل كده
اضطربت قبضتيّ "فريال" حول عجلة القيادة، فتذبذبت حركة السير قليلًا.. مِمّ أجبر "سمر" على التراجع عن موقفها كليًا و اسلوبها الحاد في الحديث و لو مؤقتًا من أجل تلك السيدة المسكينة ...
-إنتي كويسة يا طنط ؟! .. قالتها "سمر" بقلقٍ و هي تمد يدها و تحط على ذراع حماتها بلطفٍ
استجمعت الأخيرة نفسها و تمالكت أعصابها جيدًا قبل أن ترد عليها بصوتٍ طبيعي :
-آه يا حبيبتي أنا تمام.. ماتقلقيش. أنا كويسة خالص. يعني مهما كان. المفروض أكون إتعودت على إسلوب حياتك إنتي و عثمان. بصراحة بقيت إتوقع منكوا إنتوا الاتنين أي حاجة
سحبت "سمر" يدها و هي ترد عليها بخفوتٍ لا يخلو من الإباء :
-أنا آسفة يا طنط.. بس ده قراري و دي حياتي. أنا عارفة إنك فهماني. عشان كده إتكلمت معاكي براحتي و فتحت قلبي
فريال بحزنٍ بَيّن :
-فهماكي يا سمر.. فهماكي !
زمت "سمر" فمها محاولة أن تتهرب من هذا النقاش برمته، فقالت باندفاعٍ أول شيء خطر على بالها :
-آه صحيح أومال إحنا رايحين فين كده ؟!
تمتمت "فريال" بلهجة مستكينة :
-أنا عاملالك مفاجأة. يارب تعجبك.. مافضلش كتير. دقايق و هانوصل إن شاء الله !
______________
غثيان الصباح !
كان هذا عبارة عن كابوس يومي يداهمها لحظة أن تفتح عينيها مستقبلة نهارًا جديد، لقد كبرت بطنها الآن و أتم جنينها شهره الخامس منذ بضعة أيامٍ، لتصير هي أكثر عرضة لتقلّبات فترة الحمل الشائعة
كانت تتحمل، لا خيار أمامها غير أن تتحمل، فهي و إن كانت معه.. إن عادت إليه... لا تزال تشعر بأنها في غربة.. و الوحدة الشعور الوحيد الذي يجثم على قلبها و يؤثر فيها أكثر من أيّ شيء.. و ما الوحدة بالنسبة لها سوى بعده عنها و جفاؤه ناحيتها حتى الآن !!!
كانت "هالة" قد قفزت من الفراش ضاربة الأغطية بساقها، وضعت يد أسفل بطنها، و الأخرى خلف ظهرها و هرولت متجهة صوب الحمام الملحق بغرفتها ...
دفعت الباب بقوة و دلفت جاثية أمام المرحاض، رفعت شعرها عن وجهها و بدأت تتقيأ مفرغة محتويات بطنها الفارغة أصلًا.. كان هذا عذابًا... بالرغم من أن الطبيب الذي تتابع معه رحلة حملها قال بأن أغلب المشاعر التي تنتابها خلال تلك الفترة ربما تكون كلها وهمية بنسبة مئة بالمئة، و حريًا بها ألا تطاوع أوهامها كثيرًا كي لا يزداد التعب عليها
لكنها لا زالت غير مقتنعة بكلامه.. و كأنها تستعذب المعاناة !
-إنتي كويسة !!
توقف قلبها عن الخفقان لثانية.. حين آتاها صوته من الخلف... لم يكن جلفًا، لم يكن صلدًا.. بل في الواقع كان حنونًا !
إلتفتت "هالة" بجسمها و تطلعت إليه، حيث كان يقف عند عتبة الحمام بملابس البيت المؤلفة من بيجاما صيفية دمجت بين لونيّ الأزرق و الرمادي ..
كان منهدمًا رغم ذلك، و صدق حدسها أيضًا و هي تنظر بعينيه لترى نظرات القلق تطل منهما.. ربما لأنه يراها هكذا لأول مرة، إذ أنه حرص منذ جاءت إلى هنا على ألا يقضي معها أي وقت، كان يتذرع بأيّ شيء يبقيه بعيدًا عنها، و لم يتغيّب يومًا واحدًا عن العمل و لا إتخذ عطلة ليلةٍ أو نهارٍ أو ساعةٍ
لكنه اليوم لدهشتها، و في ساعة الظهيرة هذه.. يقف أمامها بالبيجامة.. ذلك إن دل.. فأنه يدل على شيئًا واحد فقط، أخيرًا قرر أن يقضي عطلة و لو يوم، يقضيها بالبيت، في وجودها، معها !!!
-أنا كويسة ! .. قالتها "هالة" هامسة باعياءٍ واضح
عبس "فادي" غير مقتنعًا إلا بما يراه بعينيه، حسم أمره و خطى داخل الحمام ماشيًا ناحيتها، مد لها كفه و هو يقول باقتضابٍ :
-و أنا معدي برا سمعت هبد و رزع. دخلت أطمن.. فيكي حاجة نروح للدكتور ؟
نظرت "هالة" مطولًا إلى يده الممدودة، ثم نظرت له.. تنفست بعمقٍ و قبلت مساعدته، حيث أودعت يدها الصغيرة بكفه و تركتها يشدها بمعرفته حتى أوقفها على قدميها و تأكد بأنها صارت متوازنة و متمالكة لنفسها ...
-مافيش داعي للدكتور ! .. غمغمت "هالة" و هي تسحب يدها من يده و تستدير نحو حوض المياه
أردفت و هي تمد يديها لتفتح الصنبور لتغسل وجهها :
-ده مجرد Morning Sickness بيحصل لأي ست حامل.. ماتقلقش. إبنك كويس !
و أغلقت الصنبور مجتذبة منشفة الوجه الصغيرة من فوق الحامل الرخامي أمامها.. أخذت تجفف وجهها، بينما يفكر "فادي" بجملتها الأخيرة
إذن فهي ترمي إلى حقيقة مشاعره تجاهها مؤخرًا، تفترض فعليًا بأنه صار يكرهها، و أنها لم تعد تعني له شيء.. حياة طفله أهم من حياتها بالنسبة إليه... على كلٌ هل هذا خطأ ؟ .. ربما لا.. و ربما ...
-إنت متأخر على شغلك و لا إيه. الساعة كام ؟
تبعها "فادي" إلى داخل الغرفة من جديد و هو يرد على سؤالها بفتورٍ :
-الساعة واحدة و ربع الضهر. أكيد مش بروح شغلي الساعة دي. 8 بالدقيقة لازم أكون في السيكشن.. أو على مكتبي
صدرت عنها نهدة حارة و هي تستدير في مواجهته قائلة بنفس الفتور :
-طيب هاتخرج إنهاردة. و لا قاعد ؟
فادي بجفافٍ : ليه.. عايزة تخرجي ؟
هزت "هالة" كتفيها و قالت بلا مبالاة :
-لأ مش عايزة أخرج.. بس كنت عايزة أعرف لو هاتقعد تحب تتغدى أكل بيتي أنا هاعمله و لا هاتطلب لنفسك من برا.. أعمل حسابك معايا على الغدا يعني و لا لأ ؟
توقعت إجابة بالرفض... لكنه فاجأها مرةً أخرى بعد لحظة واحدة :
-لأ مش خارج. و مش هاطلب أكل من برا.. ممكن تعملي حسابي معاكي. إذا مش هاتتعبي !
أجفلت "هالة" قائلة بجدية :
-لأ ماغيش تعب و لا حاجة.. أنا بتسلّى. تحب تاكل صنف معيّن ؟!
فادي بحزم : لأ.. إللي تعمليه هاكله. و ياريت ماتجهديش نفسك في المطبخ
تغلّبت بصعوبةٍ "هالة" على ابتسامة ما برحت تحارب لتنبلج على محياها، و قالت بثباتٍ :
-أوكي.. أنا هافطر بسرعة و بعدين ابدأ في الغدا !
______________
-أدخلي يا سمر ! .. هتفت "فريال" داعية زوجة إبنها للدخول بعد أن أشعلت الأضاءة بالمكان كله
كان صرحًا كبيرًا، ذاك الذي أفتتحته "فريال" للتو برفقة كنتها.. كان كل شيء يغطيه التراب، بدءً من البوابة الحديدية العملاقة بالخارج، وصولًا إلى هذه البوابة الداخلية
حتى عندما مدت "سمر" ساقها لتدخل ملبيّة دعوة والدة زوجها ...
كان كل شيء باللون الذهبي، الأرض، الجدران، إطارات اللوحات... و كأنها قاعة سحرية.. لكنه بالحقيقة لم يكن سوى آتيليه !
نعم
هكذا تبلغ عنه الملصقات و الديكورات أسفل طبقات الغبار السميكة ...
-إيه المكان ده يا طنط ؟! .. تساءلت "سمر" و هي تلتفت على الفور رامقة السيدة الجميلة بفضولٍ ما لبث أن تحوّل إلى صدمة
حين رأت دموعها تسيل فوق خديها بلا بكاءٍ، عقد لسانها و لم تستطع نطقًا بعد ذلك.. لتبتسم "فريال" و هي تسحب منديلًا ورقيًا من حقيبتها
بدأت تكفكف به الدموع برفقٍ و هي ترد على "سمر" بصوتٍ أبح :
-زي ما إنتي شايفة يا حبيبتي.. ده آتيليه. يحيى الله يرحمه كان مسلمّني مفتاحه قبل ما يتوفى بفترة قصيرة جدًا
تبدلت ملامح "سمر" إلى التعاطف فورًا عندظا فهمت الأمر، حاولت أن تصرف شيئًا من الحزن عن الأخيرة، فقالت و هي ترمق المكان بنظرة شمولية :
-جميل أوي يا طنط.. بجد. ناقصه الروح بس. و الحركة و هايبقى هايل
فريال بابتسامتها الرقيقة :
-الآتيليه ده كان في يوم من الأيام حلمي.. دلوقتي بقى ليكي إنتي يا سمر !
فغرت "سمر" فاها بذهولٍ و هي تعاود النظر إلى "فريال".. و قبل أن تتفوّه بكلمة أقتربت "فريال" خطوة منها و قالت و هي تقبض على يديها بشدة :
-مش هاسمحلك ترفضي إللي بقدمه ليكي ده يا سمر.. قبل ما تقولي كلمة واحدة. أنا خلاص كتبته باسمك. مش ناقص غير امضتك بس
تهز "سمر" رأسها للجانبين بقوةٍ و هي تقول :
-لأ. لأ طبعًا يا طنط فريال. أنا إستحالة أقبل حاجة زي دي.. حضرتك فاهمة إنتي بتعرضي عليا إيه ؟ دي مش ساعة و لا فستان هدية. دي ذكرى غالية من عمو يحيى.. من جوزك. من حبيبك. ثم أنا مش فاهمة بتقدميها ليا ليه ؟ أنا ماليش علاقة بالشغل ده و مش بفهم فيه. و الأهم من ده كله مش عايزاه
-سمر إسمعيني بس من فضلك.. زي ما بحترم رغباتك و قراراتك أتمنى تعملي معايا نفس الشيء. أنا مش صغيرة عشان أتصرف بدون عقل لو ده إللي إنتي شايفاه
-أستغفر الله. أنا ماقولتش كده و لا أقدر أقول كده على حضرتك بس آ ا ..
-مابسش بقى ! .. قاطعتها "فريال" بضيقٍ
-بصي.. أنا عارفة إنك بتحبي الرسم و التصميم. جايز الموضوع هايكون غريب عليكي. بس أنا هاعلمك. صدقيني هاتمشي في الموضوع ده و هاتبقي أحسن مني
واصلت "سمر" تمسكها بالرفض و هي تقول :
-يا طنط بالله عليكي أفهميني. أنا عندي إستعداد أقف جمبك و أساعدك في أي حاجة تطلبيها مني.. بس منغير مقابل. منغير ما أقبل حاجة زي دي. أنا مستحقهاش بأي شكل من الأشكال. و الله موافقة أتعلم منك و كل حاجة. بس حكاية الآتيليه ده يبقى بتاعي أنا مش هايحصل. وحياة إبني ما هايحصل
-كده يا سمر ؟! .. تمتمت "فريال" بتخاذلٍ و هي تترك يدي الأخيرة و تبتعد الخطوة عينها
أصرت "سمر" على موقفها قائلة بأقصى ما تستطيع من لطف :
-أنا آسفة. بس و الله صعب.. مستحيل. مش ممكن أقبل أخد منك أو منغيرك حاجة زي دي ..
و أردفت مبتسمة :
-بس ممكن أتعلم منك. و أساعدك نرجع للمكان ده روحه.. و تشوفي حلمك بيتحقق قدام عنيكي يا فريال هانم ! ................................................
