رواية الحكاية فيها عشق الفصل الخامس و العشرون25 بقلم نرمين هاني

 

رواية الحكاية فيها عشق الفصل الخامس و العشرون بقلم نرمين هاني

الفصل الخامس والعشرون

( فرحة رقيه ….!!!! )

......فى فيلا ادم.......

بعد أن حضر عمار ووالدته في غرفة الصالون للتقدم للخطبة جلسوا يتحدثون فى امور عديده اما رقيه فى غرفتها تسير بتوتر ذهابا وايابا وشذى تنظر لها وتضحك بشده قائله :-

- اقعدى خيلتيني كل دا عشان عمار ؟! ياعيني على الحب !!

نظرت لها شروق بابتسامه شاحبه....اهدى ياحبيبتى شويه !!

جلست رقيه على الفراش جوارهم وهى تحرك رجلها بتوتر قائله :-

- مش الحكايه يعنى ….. انا خايفه حاجه تحصل تبوظ الجوازة ؟! انا ﻻزم اسيطر على الوضع قولولى البت علياء البومة دى جت معاهم ولا لا ؟!!

ضحكو بشده لتقول شذى بمرح وهي تهز رجلها مقلده اياها.....لا مجاتش يا اختى قال وانا اللى فاكراها مكسوفه زى البنات

رقيه وهى تضربها برفق قائله بغيظ....بطلى هز فى رجلك وترتيني هو انا ناقصه

شذى......ما انتى كمان بتهزى الله

رقيه بعند.......انا اهز انتى لا 

ضحكت شروق قائله....بطلو انتو الاتنين زهقتونى

رقيه بفرح وسعاده وقد لمعت عينيها فرحا ...

- اعمل ايه مش مصدقه والله ياااه بقى دا حلم عمرى دا هييييح بقى ؟!!!!

شذى وهى تعزف بيدها باستهزاء......تيرارارا تيرارارا شوفو جعفر لما يحب تيرارارا

رفعت أحد حاجبيها بغيظ قائله.......بطلى رخامه بقى اى دا انا عروسه متعصبنيش؟!

شروق بتساؤل وضحك......ههههههه هو انتى هتنزلى امتى ؟!!

رقيه بلهفه.....دلوقت هما مش هيخلصوا كلام انا عارفه ما بيصدقو يلا بينا

ثم نظرت لهم بتوتر لتتابع ...... ولا استنى دقيقه كمان احسن يقولو مدلوقه صح ؟!!😂🤔

شذى باستهزاء......مدلوقه بعد الشر قال مدلوقه قال طيب بالنسبه للنضاره مش هتقلعيها وتحطى حاجه على وشك وتلبسى فستان حلو كدا

ضحكت رقية لتقول بملل.......ايه كل دا يا حاجه هو انا هعمل عامره ماروح لدكتور تجميل بالمره

شذى بضحك.....هههههه والله محتاجه فعلا ماتقولى حاجه ياشروق ؟!!

شروق بهدوء......والله هى رقيه عسل مش محتاجه حاجه وهو عارفها وبيحبها ملهاش لازمه بقى التزويق مدام بيحبها هيشوفها حلوه فى كل حالاتها !!!!!

قبلتها رقيه سريعا بفرح قائله وهى تغمز بطرف عينيها وتخرج لسانها :-

-اسمعى الكلام الموزون اهو مادام بيحبها هيشوفها حلوه

رمقتها شروق بتساؤل واهتمام لتتابع......هو بيحبك بقى ولا ايه النظام ؟!!

رفعت رقيه احدى حاجبيها قائلة بغيظ :-

- انا لسه كنت بشكر فيكى اى يا حاجه فى اى الله ؟!! طبعا بيحبنى هو قالى كدا لا وبيغير كمان !!!

ابتسمت شروق بحب قائله بدعاء وتمنى :-

- ربنا يسعدك يااارب ياحبيبتى ويتمملك على خير

رقيه بدعاء......يااارب يااارب يالا بقى ننزل ماما قالت عشر دقايق وفاتو يالا

شذى بغمزه....يالا 

وتوجهوا الثلاث فتيات للاسفل وهنا شعرت رقيه ان دقات قلبها تتعالى وشعرت بالتوتر لتمسك يد شروق التى كانت قد اقتربت من الدخول لغرفة الصالون قائلة بلهفة :-

- لالالا استنو استنو !!!

نظرو لها باستغراب و دهشة لتقول هي بتوتر :-

- انا مكسوفه بجد وقلبى بيطبل كدا من جوا اعمل ايه بقى انا دلوقتى ؟!

شذى بذهول.....نعم ياختى بتقولى مكسوفه !! دا بجد ؟!!

رقيه بتوتر......ايوا اقولك خليه يجى بكره اكون هديت !!!

ضحكت شروق لتمسك يدها قائله بخبث......بطلى هبل احسن لو مشى ممكن ميرجعش براحتك بقى !!!!

قبل ان تنهى حديثها وجدت رقيه تقدمت امامها سريعا بلهفه لتطرق الباب وتدخل عليهم قائله :-

- انا جيت اهو اوعى حد يتحرك من مكانه !ّ!!

شذى وشروق......ههههههههههههههههههههههههههه

عمر بضحك.......ههههههههههههههههه كبسه عريس ياماى

نظروا لها جميعا بتعجب لما تقوله ثم نظروا لملابسها التى عباره عن بنطلون جينز وفيست يصل إلى ركبتها وأعطت الحرية لشعرها لينفرد على ظهرها وترتدى فى قدمها كوتش ابيض ولم تضع أي مساحيق تجميل على وجهها ولكن فرحتها كانت تبدو على وجهها بشده فجعلتها اكثر جمالا واشراقا ...!!!

رمقتها كريمة باستغراب.......ايه الهبل دا فى حد يدخل يقول كدا ؟!!

رقيه وهى تنظر لعمار بتوتر الذى يجلس امامها مبتسم لتقول :-

- مفيش صح ؟ اه صح !!!

ومن ثم تجلس بهدوء بجوار خالتها قائله...... خلاص السلام عليكم ازيكم ازيك يا خالتي ؟!!!

رمقتها مشيرة بغيظ لتردف وهى تجز على أسنانها بضيق قائله :-

- اى خالتى دى اووف تانى مش قولت متقوليهاش !!!!

رقيه وهى تقبلها من خدها قائله بمرح :-

- ولا تزعلى بلاش خالتى نخليها ياحماتى ياعسل انتى …. ها حلو كدا ؟!!

جزت مشيره على اسنانها ووجهها اصبح شديد الاحمرار من كثرة الغضب ليتحدث عمار سريعا خوفا من أن يحدث اى اشتباك بينهم قائلا :-

- احم انا جاى اتقدم لرقيه اى رايك يا ادم ؟!!

ادم بجديه........انا مش

تقاطعه رقيه قائلة بلهفة فقد توقعت انه سيرفض :-

- مش اى ؟! اى اللى مشمشه دلوقتى بس انت تعبان ولا اى ؟!! ﻻ بص حاول تفكر فى الاجابه الاول خد وقتك هه احنا مش مستعجلين مش كدا ياماما قولى حاجه هه ؟!!

كريمه بهدوء.....اللى فى الخير يقدمه ربنا

نظرت لها رقيه بطريقه كوميديه....لاياشيخه تصدقى انبهرت انا انبهرت

الكل.....هههههههههههههههههههههههههههه

كريمه بجديه وهي تنظر لعمار قائله....سمعاك يابنى لما مشيرة قاتلى انك عايز تتجوز رقيه انا استغربت !!! انت كنت قبلها متقدم لشذى ولولا ان رقيه موافقة مكنتش جيت النهارده في ياريت تطمنى انا ام ومن حقى اطمن عليها حتى لو كان من ابن اختى

أومأ عمار برأسه ليقول.....عندك حق يا خالتو بس انا بحب رقيه ووعدك انى هحافظ عليها وهحطها فى عنيا …. وان شاء الله مش هتندم على جوازى منها ابدا وكمان بعد اذن حضرتك ياريت نعمل الفرح على طول بيتهيألى احنا مش محتاجين نتعرف او فترة خطوبه احنا عارفين بعض كويس

رقيه تنظر لعمار بحب ودقات قلبها تتعالى والفرحة باديه على وجهها لتنظر لها كريمه بتردد لترى فرحتها فتقول بتنهيده وهي تنظر لابنها :-

- اى رايك يا ادم ؟!!

ادم بجديه وقد لاحظ فرحة اخته فقال....انا عن نفسى معنديش مانع المهم رأى رقيه , اى رايك ياحبيبتى ؟!!

رقيه بفرحه وخجل......انا موافقه والله

كريمه بتساؤل ..... طيب والفرح هيبقى امتى ؟!

عمار بجديه......بعد شهر او شهر ونص ان شاء الله عشان نلحق قبل بداية السنة

ابتسمت مشيرة بشدة لتقول بلهفة......نقرا الفاتحة بقى !!!

نظرت لها كريمة بتردد وقلق لتمسك رقيه يدها بلهفة قائلة بتوسل :-

- اى ياكركر اوعى تكونى نسيتى الفاتحه الناس كلها حفظاها ؟!!

كريمه .......لا منستهاش مبروك ياحبيبتى نقرا الفاتحه

ورفعوا ايديهم جميعا لقراءة الفاتحة ورقيه قد تشعر ان قلبها سوف يخرج من مكانه من شدة فرحتها لتنظر لعمار لتجده ينظر لها ويبتسم بحب لتتم قراءة الفاتحة ويعم الفرح والسعاده على أهل المنزل لتترك كريمه قلقها وتفرح وتسعد لابنتها داعيه ربها بأن يسعدها ويتمم لها فرحتها على خير !!!

............................................................................

بعد انتهاء السهره توجهت رقيه نحو غرفتها سريعا وهى تغنى بسعادة بينما آدم نظر لشروق التى تتهرب منه طوال اليوم قائلا بعد ان علم كل شئ من والدته :-

- شروق انا اسف عن اللى حصل !!

شروق ببرود وهي تتهرب ب أنظارها عنه قائله :-

- محصلش حاجه حصل خير !!

تنهد آدم بقوة ليقول وهو ينظر لها بندم :-

-صدقينى انا مقدرتش اسيطر على اعصابى وقتها اتجننت ومعرفتش انا بقول اى ؟! بس لما هديت عرفت انى كنت غلط وكان ﻻزم اتصرف بعقل عن كدا

ابتسمت شروق بهدوء....حصل خير وكويس انك اعترفت بغلطك وندمت ودا كان درس ليا انى ماتصورش واخلى صورى على التليفون وكمان اتخلص من ذنب عشق وابوها يعرف مكانها ممكن لو دا مكنش دا حصل مكنتش ندمت وحسيت بغلطى وعشق مكنتش رجعت ﻻبوها

ابتسم ادم.....اى الرضى اللى عندك دا يعنى انتى مش زعﻻنه منى ؟!!

اومات بالرفض لتتابع بتنهيده...ﻻ انا زعﻻنه طبعا من الموقف وممكن معرفش اتعامل معاك زى اﻻول بس دا ميمنعش ان دا كان عقاب ليا وعرفت اد ايه ربنا رحيم بينا لدرجة انه كل ما يشوفنا بعدنا عنه او اذنبنا ، يبعتلنا اشاره كده تفوقنا و تقربنا منه تانى, ودا اللى حصل معايا والحمد لله ان كل حاجه بانت وهتخلص من الذنب اللى كان جوايا دا وعرفت ان ربنا بيحبنى لانه مش بيلهمنا الضيقه دي إلا لأنه بيحبنا و عايزنا نقرب منه اكتر ، نرجعله و نستغفره ، و مش بيلهمنا نستغفره أصلا إلا لأنه -سبحانه- عايز يغفرلنا واكيد برضو انت عرفت غلطك واتعلمت منه

اومأ برأسه باﻻيجاب ليقول بعدم فهم.... انا مش فاهم برضه انتى مسمحانى وﻻ زعﻻنه منى !!!

شروق بتنهيده.....ﻻ دا وﻻ دا انا مش عايزه افكر عشان ازعل او ﻻ….. عايزه اخد هدنة مع نفسى واراجع حساباتي مش عايزة افكر فى اى حاجه تضايقني بس مش اكتر …… عايزه احس بقوتي تانى ومبقاش ضعيفه انا امبارح اما وقعت حسيت انى ضعيفه اوى ومكنتش عايزه اقوم تانى عشان متوجعش بس لما واجهت وطلعت اللى جوايا واعترفت بغلطى عرفت ان دا تخليص ذنوب ليا واللى متاكده منه ان هيجى يوم والوجع دا ينتهى والمهم انى اتعلمت من غلطى ومش هكرره تاني وكام يوم وهرجع زى اﻻول واقوى كمان بس مش اكتر !!!

ابتسم آدم ليقول.........لعلمك انتى فعﻻ قويه واللى مريتى بيه كله لوحدك يثبت دا بس طبيعى فى وقت بنضعف فيه ونحتاج نقرب من ربنا تانى ونعرف الحﻻل من الحرام والصح من الغلط وكل ما نقع كل مانتعلم درس جديد فى حياتنا بس المهم ان احنا منكررش الغلط دا تانى

شروق.....عارف المشكله ان احنا مبنفهمش باﻻشارات بنفهم بالصفعات ﻻزم ناخد قلم عشان نفوق بس الواحد خد اقﻻم كتير اووى من الدنيا دى ياﻻ الحمد لله تصبح على خير

ادم بتردد.......شروق لسه مقتنعه ان العشق جرح ؟!!

شروق بابتسامة حزن......اتضح ان اى حاجه حلوه فى حياتنا ﻻزم تجرحنا اﻻول مش العشق بس !!! ....... ﻻزم نتجرح عشان نقوى ونتعلم ونبتسم بعد كدا اما نفتكر جرحنا دا لما يجى اﻻصعب منه !!! يلا تصبح على خير

ادم بشرود...... وانتى من اهله

لتتوجه شروق نحو غرفتها وتشعر بالحزن لبعد عشق عنها وانها ستنام بدونها ولكن يجب عليها ان تتحمل وتعلم ان مافعلته ليس من حقها !!!

...............................................................................................................................................................................................................................................

فى غرفة رقيه تجلس على الفراش ممسكة بدفتر مذكرتها لتدون أجمل ذكرى في حياتها فتكتب.....

حبيبى......

كنت أعي بأن للحب في عالمي وصفاً يختلف كثيراً عن كل ما قد كان يقال :‬

كنتُ أرى الحب طفلا ،

يسلب القلب رغماً عن انف أعظم ما بداخلي ، يرغمني على ضياع عقلي و تأتأه احرفي جمالاً .‬

‫تارة أخرى كنت اراه رجلاً .

رجلا شجاعاً لا يقبل مجاراه فئة الجبناء تلك ، ‬

‫تلك التي لا تخوض مع الشجعان كي يتجرعون الهزيمة و يجاورون عالم الجدران.‬

‫كان الحب في عالمي حرباً ، ‬حرباً لن تؤول إلا إلى عالم من السلام السرمديّ ، ‬

‫كان شيء أشبه بالخوض في كل ما تجهله للوصول إلى كل ما تريده ، كأنه الخوض في طريق اللاشيء الذي قد يؤول حقا إلى كل شيء . ‬

كان الحب كالقشة التي نجت من التقيد كي لا تصنع إلا عُشاً .‬

‫تلك القشة التي ادركت بأن شيئاً عظيماً يفوق العش ألفاً ستجده عند نهاية المطاف .‬

‫كان الحب هنا عالم من المقاومة العظيمة و التجبر على الإستسلام المريب .‬

‫كأن الحب كالشمس ، تلك التي تجبرنا ان نغمض اعيننا و نذكر الله ألفا ،‬

‫ كالقمر الذي وإن غاب حيناً ندرك أنه بالطبع سيعود .‬

‫ك نجوماً تشع في سماء حياتنا لتنير أزقة في القلب قد سئمت من الإنطفاء.‬

‫لطالما اعتقدتُ بأن الحب عالمُ من الأمان العظيم ، من الهدوء و السكون ، من التأمل و الجمال ، من الرهبة و الذهول ، ‬

‫كان مزيجا من الجمال قد مزج بكامل دقة عظيمة.‬

أدركت في نهاية المطاف بأن في وقت ما سنعلم جميعنا بأن الحب هو الجمال الذي يحيطنا و نحاط به وقد اثبت حبك حبيبى اليوم لي 💕.

ومن ثم اغلقت دفترها قائله بتنهيده حب......ابقى اديهولك بعد الفرح بقى عشان تعرف انا كنت بحبك قد ايه ؟!!!

لتمسك هاتفها وتتصل على عمار ليأتيها الرد بعد دقائق ليقول عمار :-

- حبيبى !!

نظرت رقيه للهاتف ووجهها احمر بشده لتقول ببلاهه :-

- دا بيقولى حبيبى يالهوى دا الموضوع شكله طلع بجد مش بحلم ولا تهيؤات ؟!!

عمار باستغراب...الو الو رقية انتى معايا

وضعت الهاتف على أذنها قائلة بتوتر...هه اه معاك

عمار....هههههههه طيب عايزه اى

رقيه بمرح لتخفف من توترها......مفيش قولت اتصل انكد عليك بما انا اتخطبنا يعنى

عمار بذهول......نعم !!!!

ضحكت رقيه لتتابع......انت متعرفش ان اول خطوه فى الخطوبه بتبدا بنكد ولا اى لالالا مستواك شكله فى النازل

ضحك عمار ........هههههههههههههههه تصدقى انتى فاضيه

رقيه........فاضيه مين ياعم دا انا استرون اندبندنت وماان

عمار بذهول......مالك اى التلوث اللى قلتيه دا دا انجليزى كدا يعني ؟!!

رقيه.......لا دا التاتش بتاعى على الانجليزى هى استرونج مشتقاتها استرون واسترو , استر يارب

ضحك عمار بشده ......انتى بتجيبى الكلام دا منين مش فاهم ؟!!

رقيه بمرح.......انا ضد العولمه دى ثقافه شخصيه كل الناس نفسها تعرف مصدرها بس انا مش هينفع اقول اسرار عليا بقى وبعدين انا بكلمك على الفيس ترد تانى يوم فقلت اتصل بقى بدل شغل المضاد الحيوى دا ترد على الرساله بعد 12 ساعه ينفع دا يعني ولا عشان دكاترة بقى هنشوف نفسنا ؟!!

عمار بضحك......هههههههههههههههههه والله انتى مجنونه وشكلك هتبدئي بالنكد فعلا بالفيس بوك

رقيه بضحك........لا انا نكدى فريش وبعدين بكره اما تعرف هتحكم على راى المثل بكره تشوف ياناكر خيرى نكدى من نكد غيرى والله انا بقول حكم وخساره فى البلد دى

عمار.....ههههههههههههه حكم فعلا يالا انا عايز انام وبكره ورايا ترتيبات كتير متنسيش لازم نجهز كل حاجه عشان نتجوز قبل ما الدراسه تبدا

رقيه .....قشطه تصبح على خير

عمار.....وانتى من اهله

لتغلق رقيه الهاتف وتتنهد بحب ليهتز الهاتف مره اخرى فتنظر له باستغراب وتضغط على زر الايجاب قائله

- ايوا ياصديكى ازيك فى حاجه ولا اى

رائد....زهقان قلت اكلمك

ضحكت رقيه بشدة لتردف بعدها.......هو حد قالك انى دوا للزهق انا مش فاهمه بس كويس انك اتكلمت عندى ليك مفاجئه

رائد......مفاجئة اى دى خير

رقيه بفرح.....انا اتخطبت

رائد بغضب..... نعم ؟!!

رقيه باستغراب......اى فى اى ؟!!

رائد بصوت غاضب...مفيش بس امتى دا يعنى

رقيه بفرح.......من شويه كدا والجواز بعد شهر وكام يوم علطول

رائد....شكلك فرحانة

رقيه بنبرة سعيدة....جدا يعنى مش عايزه اقولك قد اى اول مره افرح كده من قلبى

رائد بضيق....اه ربنا يفرحك على طول

رقيه.....يارب ياسطا انت بقى زهقان من اى

رائد بتنهيده.....مفيش يلا تصبحى على خير

رقيه باستغراب.......مالك

رائد.......مفيش بس حسيت انى عايز انام فاجئه كدا يالا سلام

رقيه بتعجب...سلام

ثم اغلقت الهاتف لتقول بتعجب.....غريبه ماله قلب فجأه كدا ليه ؟!! يالا يمكن فعلا عايز ينام

ثم تمددت على الفراش لتغمض عينيها والابتسامة السعيده مرسومة على شفتيها لتغط بعدها فى سبات عميق .............................................................

.....فى منزل ادهم......

بعد أن غفت عشق فى احضانه احضر صور زوجته لينظر لها والدموع تنهمر على وجنتيه قائلا بوجع...

- سبتينى ليه ؟!! حاسس انى لوحدى من غيرك انتى كنتى فرحتى فى الدنيا !! ثم تنهد ليقول ...انا عارف انك اكيد زعلانه منى بسبب اهمالى لعشق بس اوعدك ان دا عمره ما هيتكرر تانى وهعاقب نفسي على اهمالى دا قبل ما عاقب شروق بحبك وهفضل احبك لاخر يوم فى عمرى !!😍😍

ليضع الصورة جانبا ويتنهد بحزن ومن ثم يضم ابنته التى هى قطعه منه ومن معشوقته فرح الذى تم تسميتها بهذا الاسم نسبة للعشق الذى كان بينهم !!!!

.......................................................

بعد مرور شهر وقد تغير فيه الكثير فقد اقتربت رقيه من عمار بشده وكانت دائمة الاتصال به واوضحت لها حبه فى كل تصرفتها واحيانا كانت تشعر بالبرود والتجاهل منه ولكن كانت تعطى له العذر فى انشغاله بتنظيمات الفرح اما ادهم فابتعد عن شروق خلال هذا الشهر كما قالت له كريمة وكان يأتى بعشق يوميا وكانت تختفى شروق فى هذا الوقت حتى لا يراها وعندما يذهب تتوجه نحو عشق لتقضى معها وقتها بحب وحنان وسعاده الى ان ياتى ادهم مساءا ليأخذها وقد اشترى فيلا بجوار فيلا ادم بمسافه بسيطه حتى يكون قريبا منهم.....اما شروق فلم تذهب للعمل مره اخرى وتقضى وقتها فى رعاية عشق ومساعدة رقيه فى تجهيزات الفرح والاستغفار عن كل ماحدث منها فى الماضى وبالنسبه ل ادم فحاول كثير الاقتراب من شروق ولكنها كانت تضع حاجز بينهما دائما وتعامله برسميه بعض الوقت وتحاول ان تتناسى اهانته لها وتتعامل معه كما فى الماضى ففكر ادم كثير ليفكر انه يجب ان يقترب منها مره اخرى لكى يتقدم لها وتوافق هى عليه بدون تردد او حرج منها !!!

وفى يوم كانت تجلس شذى فى حجرتها ليدخل عليها عمر سريعا قائلا بلهفه وخوف :-

-الحقى مصيبه !!!!

انتفضت شذى لتنظر له بفزع قائله........اى فى اى ؟!!!

الفصل السادس والعشرون من هنا

بدل ماتدور وتبحث علي الروايات خليها علي تليفونك وحمل تطبيقنا

تعديل المقال