رواية الحكاية فيها عشق الفصل التاسع عشر19 بقلم نرمين هاني

 

رواية الحكاية فيها عشق الفصل التاسع عشر بقلم نرمين هاني

* خذلان يليه صدمه *

المجدُ لكلماتنا الساخرة في أكثر اوقاتِنا جَداً ، لهدوئنا العظيم في اكثر اوقاتِنا ضجراً ، لسكوتِنا المُريب في اعظم اوقاتِنا تَعباً ، و لكلِ ما يسعى بأن يُخفي ما نشعُر حقاً .

المجد حقاً لتلك الدمعات التي لم يُدرِكها احداً ، لتلك الكلمات التي عُلقت في حناجِرُنا ، لتلك الصرخات التي دُفِنت بداخِلنا ، لمئات الاحزان التي هزمت ارواحنا ، و لأكوام الاتعاب التي جعلتنا جِبالاً أمامهم.

المجد لنا ..

نحنُ من نتجرع اكواماً من الحزنّ و لا نُبالي ، من نفقد احبابنا ، و ننهزم ؟ فـ نبتسم ، يذهَبُ قريبنا فـ ننكسر ، و نبتسم ، نُلقى في وادٍ مُهمشِ على رصيفٍ جانبٍ داخل عقولهم ، و لا يسعُنا سوى بأن نبتسم.

المجدُ لنا ..

نحنُ من يظُن الجميع بأننا قوهٌ تسيرُ على قدمين ، بأننا جبالاً لا تخضع ابداً ، و أننا أرواحاً لا تعرف طعم اليأس ..

نحنُ من يُحكمُ علينا بالثبات و اليقين ، بالسعاده و الرضا ، بالتفاؤل والأمل ، والقوة بين الحين و الأخر .

المجد لتلك البسمه المنحوته دوماً على ملامِحُنا ، الباقيهُ دوماً ما حييّنا ، المرسومه بكلِ رغبه بـ ان تُخفي اكواماً من المشاعر خلفها..💫..

......................................

.......فى منزل دينا.........

تضحك علياء بشده قائله.....زمانه دلوقت وصله الصور وهيروح يجيبها من شعرها ويرميها فى الشارع

لتشاركها دينا الضحك.......ههههههههه والله انتى معلمه بس ممكن يكتشف انهم فوتوشوب

علياء.....ومين قالك انهم فوتوشوب الصور حقيقيه مليون فى الميه

رمقتها دينا بذهول قائله.....مش فاهمه ازاى يعنى ؟!!!

علياء...هفهمك خدت فون شذى وقلبت فيه لقيت صور للحلوه الشريفه دى بشعرها , وهدوم كت وميكب وحاجه مسخرة يعنى فنقلتهم لفونى على طول وظبطهم لا وكمان الحلوه كانت فى حضن ادهم باشا امبارح خدت لها كام لقطه حلوين

دينا......اى التفكير الجامد دا انا افتكرت انك ركبتلها صور بس ما ممكن شذى تقوله وكل تخطيطك دا يبوظ ؟!!!

ضحكت علياء بشده ومن ثم اردفت بمكر :-

- ادم مش هيستنى يسمع لحد وخصوصا لو اتكد ان الصور حقيقية مش فوتوشوب يعنى ست الشيخه هتبات فى الشارع النهارده !!!

ضحكت دينا بخبث.........طيب وخطف عشق ؟!!

علياء بلا مبالاه......لا فركش خلاص مع انك بعتى ولد غبى كان هيودينا فى داهيه الا انها جت بمصلحة كان هيبقى فيها شوشره كتير اما دا تم واحنا بره الموضوع خالص …. وانا كل اللى يهمنى انها تخرج من الفيلا دى وتدفع تمن القلم اللى ادتهولى وادم ساعتها مش هيشوف غيرى انا ويرجعلى بدل ما بيقارنى بالحقيرة دى

سقفت دينا باعجاب......وواوو هو دا

علياء وهى تضع يدها على مقدمة رأسها لتدلكها برفق قائلة بتعب :-

- بقولك اى شوفيلى حته معاكى اصل دماغى هتنفجر

نظر لها دينا بحقد لتتحدث بخبث قائلة :-

- من عنيا يا حبيبتى انتى تؤمرى

لتذهب وتجلب لها المخدرات لتغيب علياء عن كل ماحولها !!!!

....................................................................................

.......فى فيلا ادم.......

تدخل شروق الفيلا بتعب لترى كريمة جالسه وفي احضانها عشق لتبتسم قائله :

- السلام عليكم

رمقتها كريمة بقلق ومن ثم أردفت وهي تنظر لها بدقة :

- وعليكم السلام جايه بدري كده ليه !!! انتى تعبانه ؟!

ضحكت شروق : لا انا تقريبا اترفدت

شهقت كريمه : ليه انتى عملتى اى ؟!!

شروق بغضب : ضربت صاحب الشركه بالقلم الاستاذ كان عايز يمسك ايدى

- ما تسبيه يمسكها يافوزيه الله 😂

تقولها رقيه بمرح وهى تتجه نحوهم ……..

ضحكت شروق بشده......هههههههههههههههههههههه لا يجوز يا اختاه

رقيه وهى تنظر لكريمه بمرح.....سيبك دلوقت تعالى ياكركر عاوزاكى

رمقتها كريمه باستغراب.......خير ؟!!

رقيه ......اكيد خير طبعا هو انا عمرى عملت حاجه مش خير ؟!!

كريمه....طول عمرك😂

ضحكت رقيه قاله بخجل مصطنع :-

- احم بس عشان بؤحرج😌

كريمه بجديه.....طيب روحى دلوقت عشان عايزه اتكلم مع شروق فى موضوع مهم

لتجلس رقيه جوارها بفضول.....اى هه اى قولى ماتتكسفيش هو انا غريبه ولا فتانه لا خالص يبقى قولى على طول 🤔😄

شروق...خير ياعمتو ؟!!!

ابتسمت كريمه وهى تربت على كتفها قائلة :-

- كل خير ياحبيبتى انتى طبعا عارفه ان كل بنت مصيرها الجواز

تصفق رقيه بفرح قائلة بصوت مرتفع :-

- الله ينور عليكى يا كرمله حطى خط على اللى قلتيه دا دا اول المعطيات يالا اللى بعده😄👌

رمقتها كريمة بغضب......لو هتقعدى ماسمعش صوتك فاهمه ؟!!

اومات برأسها عدة مرات لتضع يدها على فمها بهدوء 🤭

كريمه وهى تنظر لشروق مرة أخرى لتتابع حديثها بابتسامة :-

- وطبعا انتى لسه صغيرة وكتير اووى يتمنوكي واكيد عشق محتاجه ل اب ليها

توترت شروق بشده قائله بصوت خافت.....انا مش فاهمه حضرتك تقصدى اى

كريمه......ادم عايز يتجوزك اى رايك يابنتى ؟!!

رقيه بفرح قائلة بصوت مرتفع.....لولولولولولولولى شوفى الافراح بتهل مره واحده ازاى دا عشان قلبك الطيب بس ياكركر عيالك هيتجوزو مع بعض

لترفع كريمه حذائها بغضب لتفر رقيه من امامها بسرعه قائله :-

- طيب خلاص هستنى شويه واطلب الماذون بس متزعليش انتى بس😂😉

زفرت كريمه بغضب لتنظر لشروق المصدومه امامها قائله :-

- اى ياحبيبتى مالك انتى مش موافقه على ادم ؟!!

توترت شروق بشده لتنطق بصعوبه....لا بس انا مش عايزه اتجوز دلوقتى

رقيه من خلفهم بصوت مرتفع.....انا عايزه والله عايزه اتصلى بالمأذون بقى😂😌

لتفزع كريمه بشده وترفع حذائها وتلقيه نحوها بسرعه ليصدم بوجهها بقوه

رقيه وهى تتحسس وجها بألم.....هو كله ضرب ضرب مفيش شتيمه كدا خالص انا اتهزقت فى البيت دا..... ولازم اتجوز واطلع منه و متحاوليش تقنعينى بغير كدا خلاص انا خدت قرارى😂🖕

كريمه بغضب.....انتى عارفه لو مغورتيش من وشى دلوقتى هيحصلك ايه ؟!!

ابتلعت رقيه ريقها بصعوبه قائله وهى تتجه نحو غرفتها :-

- خلاص خلاص انا هدخل اوضتى بكرامتى اول ماتخلصى هجيلك

شروق......بصى ياعمتو لو انا تقلت عليكم انا ممكن اخد عشق وامشى

غضبت كريمه بشده .......انتى هبله يا بت تقلتى ايه وزفت اى انتى عارفه انك زى عيالى بالظبط وبعدين لو مش متأكده ان ادم هيحافظ عليكى مكنتش قولتلك ابدا فكرى كويس وردى عليا !!

اومات شروق براسها لتقف وتقبل راسها قائله....متزعليش منى انا اسفه مقصدش حاجه

كريمه بحنيه.....مش زعلانه ياحبيبتى ربنا يكتبلك الخير يارب

شروق وهى تأخذ عشق من يدها قائله....يارب انا هروح انيم عشق واصلى واشوف عمر بيعمل اى

كريمه وهى تقف لتصعد معها.....وانا هروح اشوف الهبله دى عايزه اى !!!

لتتوجه شروق الى غرفتها وهى تتنهد بحزن فهذا ما كان ينقصها كيف تواجه عمتها بما يدور فى خاطرها كيف تتزوج من رجل يجرحها مره اخرى والاهم من هذا كله اذا فكرت بالزواج يجب اولا مصارحتهم بحقيقة عشق !!!

..................................

تدخل كريمه غرفة رقيه ناظر لها قائله.....اى اللى عايزانى فيه اكيد حاجه مايله زيك !!

ابتسمت بشده قائله......مش ملاحظه حاجه فى الاوضه ياكركر ؟!!

كريمه بعدم فهم....حاجه اي دى ؟!!

لتمسك رقيه يدها وتتوجه نحو دولابها قائله ....افتحي الدولاب وانبهرى

كريمه فتحت الدولاب لتنظر بصدمه قائله :-

- ايه دااا ايه داا ! مين عمل كدا ؟

رقيه بفخر وهى تشير بيدها فى جميع اركان الغرفه لتوضح قائلة :-

- أنا يا كركر اللى رتبت الدولاب…. ومافيش بديهات ع الأرض ولا هدوم ع المكتب أو تحت المخده ، وكمان الكرسي فاضي مافيش عليه بناطيل البيجامات ولا حتي هتلاقي فردة شراب ع أوكرة الباب.....

يعنى خليتلك الاوضه فله لا ومش بس كدا والمطبخ كمان غسلتلك المواعين خلتها بروبروق كدا😄😂👌

لتنظر كريمه للاوضه بدقه قائله بعدم تصديق :-

-عملتي كل ده لوحدك من غير ما تنبحي صوتي وأهزئك وشباشبي تطير فِ جميع أركان البيت, حقيقي إتفاجئت, وكمان نضفتي تحت السرير .. شابوه بجد برافو عليكى ياحبيبتى

رقيه بفخر.....لا وبعرف اعمل البطاطس بكل أنواعها والبيض كمان مقلي ومسلوق وكله وقهوه وشاى ونسكافيه وعصاير وسندوتشات جمبه وتونه كمان , عندى قدره خارقه على كدا لا وبجيب مايه فى وسط الاكل عادى😂😌

كريمه وهي ترفع حاجبيها قائلة....كفايا انبهارات كفايه عشان هيجرالى حاجه وبعدين شكلك كدا عاوزه حاجه ! صح ؟ مهو اللى عملتيه دا اكيد مش لله وللوطن يعنى ؟!!

رقيه بحزن مصطنع......فاهمنى غلط دايما على فكره بس المرادى انا فعلا عايزاكى يعنى مش هنعترض بس اهم حاجه تسمعيني بهدوء

لتجلس كريمه على الفراش ناظره لها بابتسامه.....

- طبعا ياحبيبتى متخافيش دوري ك ام أسمعك ونتكلم براحتنا, أنا اُم هاي كلاس ع فكره😄

جلست جوارها بمرح....هاى كلاس جبتى منين الكلمه دى يا كركر التلفزيون دا هيبوظك على فكره ؟!!!

كريمه بحده....اخلصى يابت عايزه اى مش فاضيالك ؟!

رقيه......يعني اتكلم براحتى ومش هتزعقي وتلمي علينا الناس اللى فى الفيلا ولا هلاقى شباشبك فى وشى ؟!!

هزت رأسها رافضه لتتحدث بحنان... يابنتي بقولك هاي كلاس .. كلااااس .. خدي راحتك كلى اذان صاغيه احكى

رقيه......قلقانه الحقيقه بس المهم يعنى انتى قلتى ان كل بنت مسيرها الجواز صح

اومأت برأسها لتتابع هى....وطبعا انا بنت ومسيرى الجواز الاتنين🤘

و زى ما شوفتى اهو ست بيت درجه اولى تنضيف وطبيخ وكله يبقى اتجوز بقى وعمار أولى بمواهبى من الغريب برضه😂🤔

كريمه بغضب.......تانى كدا معلش ؟!!!

رقيه بصرامة........انا موافقه على جوازى من عمار ياماما ودا ابسط حقوقى فى اختيار شريك حياتى ولو موافقتيش هنتحر انا بحذرك اهو🖕

لتضربها كريمه فى كتفها بقوه لتسقط رقيه ارضا.......

رقيه بألم......هاااى كلاس هااى كلاس يعنى مفيش كلام😂👌

كريمه بصوت مرتفع.......تنتحري يابنت الهبله قال شريك حياتى قال انتى عندك مخ اصلا وبعدين موضوع الانتحار دا مش هيدخل عليا شوفته فى مليون فيلم عربى قبل كدا العبى غيرها

ضربت كفا على كف بغيظ لتقول بغضب...

- انا قولت التلفزيونات دى هتبوظ الامهات كلها محدش صدقنى😂

كريمه بحده.....مش انتى بتقولى انك موافقه عليه طبعا موافقتك مهمه حقك طبعا

رقيه بلهفه..........ايوا بقى هتقولى لخالتو امتى بقى تيجى هى وعمار ؟!!

رمقتها كريمه بصرامة.....ويجو ليه ؟!!

زفرت رقيه بنفاذ صبر قائله بمرح....جرا ايه يا حاجه عشان نقرا الفاتحه ونبل الشربات

كريمه .....والله انتى من حقك توافقى وانا من حقى اختار جوز بنتى واوافق عليه برضه

وضعت يدها فى وسها قائله.......يعنى اى بقى ياماما ؟!!

كريمه بجديه....يعنى انا مش موافقه يارقيه

تنهدت رقيه بشده لتردف بحزن....ليه بس ياماما ؟!!

كريمة بهدوء لتحاول اقناعها.....ياحبيبتى انا مش مستريحه للموضوع دا شغلى عقلك شويه دا عايز يتسلى بيكى وانا امك وعارفه مصلحتك

رقيه باعتراض.......لا طبعا يتسلى اى ؟! لعلمك عمار دا قلبه قلب خساية والله وطيب

ترمقها كريمه باستهزاء لتتحدث متسائلة.......وانتى عرفتى منين ان شاء الله ؟!!

رقيه بمرح ضاحكه.......اكيد طبعا من الخسايه 🤔😂

كريمه.....بتهزرى هه بتهزرى عامله فيها دكتوره وخلاص وانتى مفكيش عقل اصلا ؟!!

رقيه بمرح.......لعلمك بقى ياكركر انا لو اتجوزت هعقل والله اسمعى الكلام كتير اووى كانو مجانين كدا ولما اتجوز بقى بقه ثم اشارت بيدها فى اتجاهات مختلفه قائله بتفكير :-

- هو انا مش عارفه بقه اى بس اكيد عقلو يعنى متقلقيش انا عماد مأكدلي😂🖕

نظرت لها كريمه بغضب قائلة وهي ترفع أحد حاجبيها....خليكى مجنونة مش عايزاكى تعقلى بس مفيش جواز

زفرت رقيه لتقترب وتجلس بجوارها قائله :-

- ياماما ما انتى لما اتقدم لشذى وافقتى وبعدين انا بحبه اومال انا برفض العرسان اللى بتتقدملى ليه وافقى بقى يعنى كدا هيبقى كتير عليا بجد

رمقتها كريمة بذهول.....بتحبيه !!!

احنت راسها بحزن.....ايوا ولما اتقدم لشذى اتوجعت اووى عشان خاطرى يا ماما وافقى وهو اكيد مش هيأذينى يعنى وبعدين مش انتى بتقولى عايز جواز على طول يبقى بيتسلى فين بقى لو بيتسلى كان قال خطوبه ؟!!!

كريمه وقد شعرت بحزن ابنتها لتتحدث باعتراض.....ياحبيبتى بس انا

لتقاطعها رقيه .......لا بس ولا هش خليكى جدعه بقى يا كركر وبعدين انا مش هتجوز وهعنسلك عشان تبقى عارفه لو متجوزتوش مش هتجوز

تنهدت كريمه بشده لتقول بهدوء.......ماشى يارقيه بس افتكرى انى مش موافقه عليه ولا مرتاحه للموضوع دا بس انا عمرى مافرضت عليكم حاجه ولما برفضه كدا عشان قلب الأم عمره ما بيكدب يابنتى وبكره تتاكدى بنفسك وتجربى احساسى اما تبقى ام

احتضنتها رقيه بفرحه قائله :-

- حبيبتى يا كركر

ربتت على كتفها بحب قائلة....ربنا يسعدك يابنتي ويخيب ظنى فيه ويطلع يستاهلك

ابتعدت عنها بمرح....يالا بقى قومى اتصلى بيهم خليهم يجو دلوقت ويجيبوا المأذون

كريمه بذهول........دلوقتى اى ومأذون ايه ياهبله انتي ؟!!

رقيه بسعاده......عندك حق لازم نتقل برضه احس يقولو انى واقعه ولا حاجه مع انى لا واقعه ولا اى حاجه خالص على فكره😄🤭

ضحكت كريمه......واضح واضح

لتتنهد رقيه بسعادة غير مصدقه ان حب طفولتها سوف يتقدم لها لاغيه عقلها تمام فى التفكير بينما شردت كريمه غير مطمئنة على ابنتها وما سوف يحدث لها على يد ابن اختها وهل هو يحبها حقا ام يريد ان يتلاعب بها !!!!

رقيه قائله بصوت مرتفع فى أذن والدتها....عدى دقيقة بيتهيألى كفايا تقل لحد كدا احسن يفطس مننا ولا ايه رايك يا كرمله ؟!!😂🤔

لتفزع كريمه وتضع يدها على قلبها قائله......تصدقى انا اللى هفطس من عمايلك دى صبرنى على ما ابتليتني يارب😱

......................................

تطرق شروق الباب عدة طرقات خفيه لتدخل على عمر الجالس ممسكا بالسجاره فى يده

شروق وهى تضرب على صدرها بصدمه.....الله يخربيتك انت بتشرب سجاير ياعمر ؟!!

ليقترب منها بلهفه ليكتم فمها ويقوم بغلق الباب قائلا....الله يخرب بيتك هتفضحينى اسكتى

لتزيح يده من على فمها بغضب و تأخذ منه السجاره قائله........افضحك !!! انت اتجننت تشرب سجاير دا لو ادم عرف هيموتك .... انت لازم تبطلها والا والله العظيم هخلى ليلتك سودا فاهم !!!

.................................

يدخل ادم الفيلا وملامح الغضب الشديد واضحه عليه بشده !!!

تراه شذى فتتجه نحوه قائله :-

- فى اى مالك ؟!!!

ادم بملامح غامضه قائلا بجديه...فين شروق ؟!!

شذى باستفهام....ليه فى اى ؟!!

ثار ادم ليقول بصوت مرتفع....انجزى هى فين ؟!!

فزعت شذى ل تتراجع للخلف قائله بتوتر :-

- فوق فى اوضه عمر

لينطلق هو صاعدا الدرج بسرعه شديده وملامح وجهه لا توحى بالخير ابدا !!!

ليقتحم غرفة عمر ليرى الصدمه التى ثبتت قدماه فى أرضية الحجرة !!!

شروق واقفه امامه ممسكه بسجاره فى يدها ناظره له بتوتر وعمر امامها مصدوما

شروق بتوتر.......انا

ليقاطعها آدم بصدمه وهو ينظر للسجاره الموجودة فى يدها قائلا بصوت غاضب مرتفع :-

- انتى بتشربى سجاير كمان !!!😡

ليجتمع كل من بالفيلا حولهم

رمقتهم كريمة باستغراب قائلة........فى اى يا ادم مالك صوتك عالى كدا لييه ؟!!!

ادم بغضب جامح وصوت مرتفع وهو يشير بأصبعه فى اتجاه شروق....الهانم الى فتحتلها بيتى وافتكرتها محترمه وصلنى صور ليها فى حضن واحد وبلبس اخر سفاله وقلة ادب لا ومش بس كدا كمان بتشرب سجاير.... فاضل ايه بقى معملتهوش هه ؟! دا جزاتى انى دخلتك بيتى وعاملتك اكنك واحده منه انا اللى غلطان اللى استئمت واحده زباله زيك تعيش معانا هنا لا وانا اللى ب غبائي كنت عايز اتجوزك هههههههههههه شايفه الغباء دا كدا علياء احسن منك مليون مره على الاقل هي واضحة مابتمثلش الاحترام والادب وهى اصلا حقيره وكمان الله اعلم بنتك اللى بتقولى عليها دى محدش عارف جبتيها منين ولا من مين ؟!!

بينما هو يتحدث كانت شروق تبكى بشده وجسدها يرتعش غير مصدقه مايقوله ولم تستطيع فتح فمها للتحدث من الصدمه

كريمة بحدة وصرامة...........اى اللى بتقوله دا انت اتجننت ازاى تقول على بنت عمك كده ؟!!

آدم بغضب.........متقوليش بنت عمى دى بنت مش محترمه !!!

كريمه بغضب.......اخرس بقى اتاكدت الاول مايمكن اللى فى الصور دا مش حقيقه

ليعطيها ادم الصور قائلا بصرامة وغضب.....اتاكدت !!! دا انا روحت لاكتر من واحد بيفهم كويس فى الفوتوشوب وكلهم اكدوا ان الصور دى حقيقيه

لتنظر كريمه للصور التى فى يدها لترى شروق فى احضان رجل لم تتبين ملامحه وصور اخرى لشروق بملابس قصيره وبشعرها وغيرها لتنظر شروق بصدمة قائله :-

- اى الصور دى يابنتى ؟!!!

ضرب ادم كفا على كف بغضب :-

- برضه هتقولها يابنتى دى متستهلش الكلمه دى منك ياماما دى واحده حقيره وسافله وخاينه للمكان اللى عايشه فيه

انتفضت بفزع والدموع تنهمر على وجنتيها قائلة بصوت باكى غير قادر على التحدث من كثرة شهقاتها

- آآآآ وووالله مااا عملت حاااجه

لتربت عليها رقيه قائلة بحنان :-

-اهدى ياحبيبتى

ثار ادم بشده ليقترب منها ممسكا بشعرها قائلا بغضب :-

- حالا تطلعى من البيت دا و مشوفش وشك تانى فاهمه

اقتربت كريمه بغضب لتبعده عنها قائله بصوت مرتفع :-

- انت اتجننت ؟!! انت اكيد مش وعيك ؟ مين دى اللى تطلع من البيت وازاى تمسكها من شعرها كدا

عمر بتوتر......السجاير دى مش بتاعة شروق

نظرو لهم جميعا بصدمه ليتابع هو وهو يبتلع ريقه بصعوبه قائلا :-

- انا كنت ماسكها وبدرب على مشهد وهى اصلا مطفيه وهى دخلت خدتها منى وكانت فاكره انى بشرب سجاير وكانت بتزعقلى وبعد كدا ادم دخل

لتنظر له كريمه بعتاب.......سمعت يا استاذ اديك ظلمتها

ادم ومازالت عينيه مشتعله بالغضب........والصور كمان ظلمتها فيها ياماما

لتنظر له بتوتر ومن ثم تنظر لشروق التى صوت شهقاتها يؤلم قلبها

- ما تقولى اى الحكايه يابنتى ؟!!

ليعم الصمت ليصدر صوت شهقاتها فقط والكل منتظر تبريرها لهذه الصور فيقطع الصمت ادم بصوت صارم :-

- البنت دى هتمشى من البيت دا حالا انا لحد الان محترم معاها لكن انا ميشرفنيش واحده زى دى تعيش مع اخواتى ويبقو زيها

كريمة بصرامة..........شروق مش هتمشى من هنا يا ادم

ذهل ادم من حديث والدته لينظر لها بغضب :-

- يعنى ايه ياماما هتسيبى واحده زى عايشه وسطينا ؟!!

ثارت كريمة بشدة لتردف بغضب :-

- الوحده دى تبقى بنت عمك غلطت تتعاقب مش تنطرد من البيت وهى ملهاش حد يا استاذ يا محترم ولو مش عاجبك كلامك يبقى انت اللى تطلع من هنا

ادم بصدمه........انا يعنى تخرجينى من بيتى عشانها !!!😮

كريمه بحده.......اما تبقى عايز تطرد بنت عمك اللى ملهاش غيرنا فى الدنيا وترميها فى الشارع تبقى مش ادم ابنى اللى ربيته ابدا ولو فكرت بعقلك هتعرف انى عندى حق فى اللى بقوله

ادم بهيجان وهو يصفق بيده قائلا :-

- ماشى ياماما خليهالك هى بقى وانا ماشى من هنا خالص مش هقدر اقعد مع واحده زى دى فى مكان واحد

لينطلق بعدها خارجا من الغرفه بل من الفيلا باكملها ونيران الغضب مشتعله بداخله بقلب محطم فهو قد بدأ بحبها ولم يتوقع ان تكون بهذا الشكل وبهذه الاخلاق !!!

اما شروق فهى اصبحت تبكي وترتجف بشده لتضمها رقيه بحزن قائله :-

- اهدى يا شروق بقى عشان نعرف اى حكاية الصور دى !!!

كريمه بحده......سبوها دلوقت واما تهدى هنتكلم وانت ياعمر حسابك معايا بعدين

تزمر عمر قائلا....انا مالى انا الله هو اى حاجه تجبوها عليا هى اللى دخلت تزعق من غير ماتسمع

لترفع رقيه يدها عاليا لتنزل بها على عنقه بقوه قائلا :-

- جايب سجاير البيت ياحيوان !!

ابتعد عنها ليضع يده على عنقه بالم....الله يخرب بيت ايدك يا شيخه دى ايد دى ولا مرزبة اعوذ بالله

لتنطلق شروق الى غرفتها والدموع تنهمر من عينيها وكلمات ادم تتردد فى اذنها ليتألم قلبها بشده

لترمي نفسها على الفراش دافنه وجهها به وتبكى بشدة شهقاتها تتعالى فى أرجاء الحجرة

..........................

كريمه بحزن.......كل واحد يروح اوضته وبكره انا ليا كلام تانى مع شروق واللى عايز ياكل ينزل ياكل انا داخله اوضتى وتركتهم لتتوجه نحو غرفتها

شذى بذهول.....اى اللى بيحصل دا معقول ؟!!

رقيه باعتراض.....اكيد فى حاجه غلط مش ممكن شروق اللى دايما تكلمنا اننا نقرب من ربنا تكون اخلاقها بالشكل دا ابدا

اومأ عمر براسه مؤكدا......عندك حق بس المشكله فى ادم دا اول مره يسيب البيت كدا

شذى.....هيهدى وهيرجع اكيد وانا هتصل بحمزة يروحله

رقيه.....تمام ربنا يستر

عمر وشذى....يارب

..............................

فى الشركه

يفتح حمزه باب المكتب ليطل برأسه قائلا بخوف :-

- ادخل ولا هنضرب انا وشى ورم والموضفين كلهم بيضحكوا عليا يعنى شكلى بقى فانلة قصادهم كلهم

ليخفى ادهم ضحكته قائلا بجديه....تعالى

يدخل حمزه ويجلس قائلا بمرح وغمزه....قولى بقى ياحلو شروق علمت عليك ليه ؟!!

اضلمت عيناه بشدة قائلا بصرامة......انا عايزك تقولى كل حاجه تعرفها عن البنت دى

حمزه بجديه......لا بقولك ايه شروق ملهاش زى بصراحه بقالها شهر شغاله معايا مشوفتش منها اى حاجه وحشه وكل الناس هنا بتحترمها واكيد انت عملتلها حاجة عشان تتصرف كدا !!!

ادهم بحده........عملتلها حاجة الاستاذه كانت عايزه تطلبى الأمن يرموني بره

ضحك حمزه بشده........ههههههههههههههههههه ياخساره طيب ومطلبتهمش ليه

نظر له ادهم نظره اخرسته ليتنهد قائلا......مش عايز اسمع لك صوت انا مش ناقصك

حمزه.......طيب عملت ايه فى موضوع عشق لسه مفيش اخبار

تنهد بالم لتمتلئ عينيه بالدموع ولكنه يحاول حبسها بقوه ليقول بصرامه وصوت متالم :-

- مفيش اى اخبار عنها انا حتى مش عارف اذا كانت عايشه ولا لا

لينظر له حمزه باسى قائلا...ان شاء الله تبقى عايشه وترجعلك تانى

ادهم....ازاى انت بتقنعني ب اى شهر ونص بدور عليها ومفيش اى اثر نهائى ولا حتى امل بسيط امشى وراه انا بموت كل ثانيه وانا مش عارف هى حالها اى انا تعبت بجد انا مبعرفش انام بالليل كل ما بنام فرح تجيلى فى الحلم تلومني بعنيها انى ضيعت بنتنا ومحافظتش عليها

حمزه بشفقه .........متعملش فى نفسك كدا يا ادهم انت مش شايف حياتك بقت عامله ازاى ؟!!

لينظر له ادهم بقوه عندما لاحظ نظراته ويردف.......مالى ما انا كويس يالا قوم شوف شغلك احنا مش بنلعب هنا

رمقهه حمزه بذهول لتحوله هذا........يخربيتك انت بتتحول كدا ازاى ؟!!

يقف ادهم بجديه ليأخذ الجاكت الخاص به قائلا....

- ملكش فيه انا ماشى ورايا مشوار مهم سلام

تابعه حمزه بحزن قائلا...ربنا يهديك يا ادهم وترجع زي ماكنت

ليقاطع شروده إتصال شذى فيرد عليها بمرح......

- حبيب قلبى اخبارك يا موزتى

شذى .........الحقنى يا حمزه مصيبه

ليفزع حمزة قائلا..........هى جوازه منيله انا عارف حصل ايه تانى ؟!!

شذى.........مش وقته دلوقتي روح شوف ادم فين عشان ساب البيت ومشى

حمزه.........طيب اهدى ياحبيبتى انا هدور عليه لحد مالقيه وهتصل اطمنك متقلقيش

شذى......تمام

اغلق هاتفه ليتوجه الى خارج الشركه وهو يحاول الاتصال ب ادم الى ان رد عليه بصوت غاضب قائلا :

- عايز اى يازفت ؟!!

حمزه وهو يصعد سيارته قائلا :

- انت فين ياعم انت ؟!!

- فى الشارع !!

حمزه ضاحكا......فى الشارع بقيت متسول خلاص طيب حصلنى على شقتى وانا جايلك حالا سلام

واغلق هاتفا ليتوجه نحو شقته ليرى ماذا حدث لصديقه !!!

................................................................

فى المساء

وبعد ان نام الجميع تجلس شروق على فراشها وعشق ناظره لها بحزن

شروق لنفسها........انا لازم امشى من هنا مش هينفع اسببلهم مشاكل اكتر من كدا ولا ابعد ادم عن والدته حتى لو كنت مظلومه مش هقدر اعيش معاهم وانا بخدعهم كفايا لحد كده

لتربت عشق على يدها قائله :

- هو انتى زحلانه ليه

شروق وهى تقبلها قائله........مش زعلانه ياحبيبتى بس احنا لازم نمشى من هنا

عشق.......موش هنيجى تانى

شروق وهى تحملها بهدوء قائله.......هنيجى ان شاء الله ياحبيبتى بس متعمليش صوت عشان محدش يصحى

اومأت براسها بصمت لتمسك شروق شنطه ملابسها وتفتح الباب ببطء لتنزل الدرج وتتوجه للخروج من الفيلا بحذر حتى خرجت منها لتسمع صوت خلفها قائلا بصرامه :-

- كنتى فاكره انى ممكن انام وانا ليا حق عندك حالا هدفعك تمن الالم اللى ادتهولى ياشروق !!!

لتلفت هى بصدمه وهي تبتلع ريقها بصعوبة ناظرة اليه بفزع :-

ليلفت انتباهه الطفله الموجوده على يدها فينظر لها بصدمه غير مصدقا مايراه قائلا بصوت مرتجف

- ع..ش...ق

الفصل العشرون من هنا

بدل ماتدور وتبحث علي الروايات خليها علي تليفونك وحمل تطبيقنا

تعديل المقال